| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৬. ব্রহ্মলোকসুত্তং
6. Brahmalokasuttaṃ
১৭৭. সাৰত্থিনিদানং। তেন খো পন সমযেন ভগৰা দিৰাৰিহারগতো হোতি পটিসল্লীনো। অথ খো সুব্রহ্মা চ পচ্চেকব্রহ্মা সুদ্ধাৰাসো চ পচ্চেকব্রহ্মা যেন ভগৰা তেনুপসঙ্কমিংসু; উপসঙ্কমিত্ৰা পচ্চেকং দ্ৰারবাহং 1 উপনিস্সায অট্ঠংসু। অথ খো সুব্রহ্মা পচ্চেকব্রহ্মা সুদ্ধাৰাসং পচ্চেকব্রহ্মানং এতদৰোচ – ‘‘অকালো খো তাৰ, মারিস, ভগৰন্তং পযিরুপাসিতুং; দিৰাৰিহারগতো ভগৰা পটিসল্লীনো চ। অসুকো চ ব্রহ্মলোকো ইদ্ধো চেৰ ফীতো চ, ব্রহ্মা চ তত্র পমাদৰিহারং ৰিহরতি। আযাম, মারিস, যেন সো ব্রহ্মলোকো তেনুপসঙ্কমিস্সাম; উপসঙ্কমিত্ৰা তং ব্রহ্মানং সংৰেজেয্যামা’’তি। ‘‘এৰং , মারিসা’’তি খো সুদ্ধাৰাসো পচ্চেকব্রহ্মা সুব্রহ্মুনো পচ্চেকব্রহ্মুনো পচ্চস্সোসি।
177. Sāvatthinidānaṃ. Tena kho pana samayena bhagavā divāvihāragato hoti paṭisallīno. Atha kho subrahmā ca paccekabrahmā suddhāvāso ca paccekabrahmā yena bhagavā tenupasaṅkamiṃsu; upasaṅkamitvā paccekaṃ dvārabāhaṃ 2 upanissāya aṭṭhaṃsu. Atha kho subrahmā paccekabrahmā suddhāvāsaṃ paccekabrahmānaṃ etadavoca – ‘‘akālo kho tāva, mārisa, bhagavantaṃ payirupāsituṃ; divāvihāragato bhagavā paṭisallīno ca. Asuko ca brahmaloko iddho ceva phīto ca, brahmā ca tatra pamādavihāraṃ viharati. Āyāma, mārisa, yena so brahmaloko tenupasaṅkamissāma; upasaṅkamitvā taṃ brahmānaṃ saṃvejeyyāmā’’ti. ‘‘Evaṃ , mārisā’’ti kho suddhāvāso paccekabrahmā subrahmuno paccekabrahmuno paccassosi.
অথ খো সুব্রহ্মা চ পচ্চেকব্রহ্মা সুদ্ধাৰাসো চ পচ্চেকব্রহ্মা – সেয্যথাপি নাম বলৰা পুরিসো…পে॰… এৰমেৰ – ভগৰতো পুরতো অন্তরহিতা তস্মিং ব্রহ্মলোকে পাতুরহেসুং। অদ্দসা খো সো ব্রহ্মা তে ব্রহ্মানো দূরতোৰ আগচ্ছন্তে। দিস্ৰান তে ব্রহ্মানো এতদৰোচ – ‘‘হন্দ কুতো নু তুম্হে, মারিসা, আগচ্ছথা’’তি? ‘‘আগতা খো মযং, মারিস, অম্হ তস্স ভগৰতো সন্তিকা অরহতো সম্মাসম্বুদ্ধস্স। গচ্ছেয্যাসি পন ত্ৰং, মারিস, তস্স ভগৰতো উপট্ঠানং অরহতো সম্মাসম্বুদ্ধস্সা’’তি?
Atha kho subrahmā ca paccekabrahmā suddhāvāso ca paccekabrahmā – seyyathāpi nāma balavā puriso…pe… evameva – bhagavato purato antarahitā tasmiṃ brahmaloke pāturahesuṃ. Addasā kho so brahmā te brahmāno dūratova āgacchante. Disvāna te brahmāno etadavoca – ‘‘handa kuto nu tumhe, mārisā, āgacchathā’’ti? ‘‘Āgatā kho mayaṃ, mārisa, amha tassa bhagavato santikā arahato sammāsambuddhassa. Gaccheyyāsi pana tvaṃ, mārisa, tassa bhagavato upaṭṭhānaṃ arahato sammāsambuddhassā’’ti?
এৰং ৰুত্তো 3 খো সো ব্রহ্মা তং ৰচনং অনধিৰাসেন্তো সহস্সক্খত্তুং অত্তানং অভিনিম্মিনিত্ৰা সুব্রহ্মানং পচ্চেকব্রহ্মানং এতদৰোচ – ‘‘পস্সসি মে নো ত্ৰং, মারিস, এৰরূপং ইদ্ধানুভাৰ’’ন্তি? ‘‘পস্সামি খো ত্যাহং, মারিস, এৰরূপং ইদ্ধানুভাৰ’’ন্তি। ‘‘সো খ্ৰাহং, মারিস, এৰংমহিদ্ধিকো এৰংমহানুভাৰো কস্স অঞ্ঞস্স সমণস্স ৰা ব্রাহ্মণস্স ৰা উপট্ঠানং গমিস্সামী’’তি?
Evaṃ vutto 4 kho so brahmā taṃ vacanaṃ anadhivāsento sahassakkhattuṃ attānaṃ abhinimminitvā subrahmānaṃ paccekabrahmānaṃ etadavoca – ‘‘passasi me no tvaṃ, mārisa, evarūpaṃ iddhānubhāva’’nti? ‘‘Passāmi kho tyāhaṃ, mārisa, evarūpaṃ iddhānubhāva’’nti. ‘‘So khvāhaṃ, mārisa, evaṃmahiddhiko evaṃmahānubhāvo kassa aññassa samaṇassa vā brāhmaṇassa vā upaṭṭhānaṃ gamissāmī’’ti?
অথ খো সুব্রহ্মা পচ্চেকব্রহ্মা দ্ৰিসহস্সক্খত্তুং অত্তানং অভিনিম্মিনিত্ৰা তং ব্রহ্মানং এতদৰোচ – ‘‘পস্সসি মে নো ত্ৰং, মারিস, এৰরূপং ইদ্ধানুভাৰ’’ন্তি? ‘‘পস্সামি খো ত্যাহং, মারিস, এৰরূপং ইদ্ধানুভাৰ’’ন্তি। ‘‘তযা চ খো, মারিস, মযা চ স্ৰেৰ ভগৰা মহিদ্ধিকতরো চেৰ মহানুভাৰতরো চ। গচ্ছেয্যাসি ত্ৰং, মারিস, তস্স ভগৰতো উপট্ঠানং অরহতো সম্মাসম্বুদ্ধস্সা’’তি? অথ খো সো ব্রহ্মা সুব্রহ্মানং পচ্চেকব্রহ্মানং গাথায অজ্ঝভাসি –
Atha kho subrahmā paccekabrahmā dvisahassakkhattuṃ attānaṃ abhinimminitvā taṃ brahmānaṃ etadavoca – ‘‘passasi me no tvaṃ, mārisa, evarūpaṃ iddhānubhāva’’nti? ‘‘Passāmi kho tyāhaṃ, mārisa, evarūpaṃ iddhānubhāva’’nti. ‘‘Tayā ca kho, mārisa, mayā ca sveva bhagavā mahiddhikataro ceva mahānubhāvataro ca. Gaccheyyāsi tvaṃ, mārisa, tassa bhagavato upaṭṭhānaṃ arahato sammāsambuddhassā’’ti? Atha kho so brahmā subrahmānaṃ paccekabrahmānaṃ gāthāya ajjhabhāsi –
‘‘তযো সুপণ্ণা চতুরো চ হংসা,
‘‘Tayo supaṇṇā caturo ca haṃsā,
ব্যগ্ঘীনিসা পঞ্চসতা চ ঝাযিনো।
Byagghīnisā pañcasatā ca jhāyino;
ওভাসযং উত্তরস্সং দিসায’’ন্তি॥
Obhāsayaṃ uttarassaṃ disāya’’nti.
‘‘কিঞ্চাপি তে তং জলতে ৰিমানং,
‘‘Kiñcāpi te taṃ jalate vimānaṃ,
ওভাসযং উত্তরস্সং দিসাযং।
Obhāsayaṃ uttarassaṃ disāyaṃ;
রূপে রণং দিস্ৰা সদা পৰেধিতং,
Rūpe raṇaṃ disvā sadā pavedhitaṃ,
তস্মা ন রূপে রমতী সুমেধো’’তি॥
Tasmā na rūpe ramatī sumedho’’ti.
অথ খো সুব্রহ্মা চ পচ্চেকব্রহ্মা সুদ্ধাৰাসো চ পচ্চেকব্রহ্মা তং ব্রহ্মানং সংৰেজেত্ৰা তত্থেৰন্তরধাযিংসু । অগমাসি চ খো সো ব্রহ্মা অপরেন সমযেন ভগৰতো উপট্ঠানং অরহতো সম্মাসম্বুদ্ধস্সাতি।
Atha kho subrahmā ca paccekabrahmā suddhāvāso ca paccekabrahmā taṃ brahmānaṃ saṃvejetvā tatthevantaradhāyiṃsu . Agamāsi ca kho so brahmā aparena samayena bhagavato upaṭṭhānaṃ arahato sammāsambuddhassāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৬. ব্রহ্মলোকসুত্তৰণ্ণনা • 6. Brahmalokasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৬. ব্রহ্মলোকসুত্তৰণ্ণনা • 6. Brahmalokasuttavaṇṇanā
