| Library / Tipiṭaka / ติปิฎก • Tipiṭaka / สํยุตฺตนิกาย (ฎีกา) • Saṃyuttanikāya (ṭīkā) |
๖. พฺรหฺมโลกสุตฺตวณฺณนา
6. Brahmalokasuttavaṇṇanā
๑๗๗. ปเจฺจกํ ทฺวารพาหนฺติ ปเจฺจกํ ทฺวารพาหํฯ ปเจฺจก-สโทฺท เจตฺถ อาวุตฺติวเสน เวทิตโพฺพ; ‘‘ปเจฺจกํ ปเจฺจก’’นฺติ อาห ‘‘เอเกโก เอเกก’’นฺติฯ เตสุ หิ เอโก ปเจฺจกพฺรหฺมา คนฺธกุฎิยา เอกทฺวารพาหํ นิสฺสาย ฐิโต, อปโร อญฺญํฯ ปเจฺจกพฺรหฺมาติ จ เอกจารี พฺรหฺมา, น ปริสจารี พฺรหฺมาติ อโตฺถฯ สมิทฺธิ นาม สเคฺค สุขุปกรเณหิ, พฺรหฺมานญฺจ ฌานํ สุขุปกรณนฺติ ฌานสุเขน สมิโทฺธติฯ สมฺปตฺติยา เวปุลฺลปฺปตฺตตา พฺรหฺมานญฺจ อภิญฺญาคุเณหิ เวปุลฺลปฺปตฺตีติ อาห ‘‘ผีโตติ อภิญฺญาปุเปฺผหิ สุปุปฺผิโต’’ติฯ อสหโนฺตติ นสหโนฺต นโรเจโนฺตฯ
177.Paccekaṃdvārabāhanti paccekaṃ dvārabāhaṃ. Pacceka-saddo cettha āvuttivasena veditabbo; ‘‘paccekaṃ pacceka’’nti āha ‘‘ekeko ekeka’’nti. Tesu hi eko paccekabrahmā gandhakuṭiyā ekadvārabāhaṃ nissāya ṭhito, aparo aññaṃ. Paccekabrahmāti ca ekacārī brahmā, na parisacārī brahmāti attho. Samiddhi nāma sagge sukhupakaraṇehi, brahmānañca jhānaṃ sukhupakaraṇanti jhānasukhena samiddhoti. Sampattiyā vepullappattatā brahmānañca abhiññāguṇehi vepullappattīti āha ‘‘phītoti abhiññāpupphehi supupphito’’ti. Asahantoti nasahanto narocento.
สตปทนฺติ สตสโทฺทฯ รูปวเสนาติ รูปสทฺทวเสน, รูปสเทฺทน สทฺธินฺติ อโตฺถฯ ตถา ปนฺติวเสนาติ เอตฺถาปิฯ เอกเจฺจติ เอเก มิคารี, เตสํ พฺยคฺฆีนิสารูปกานํ ปญฺจสตานีติ อโตฺถฯ ‘‘กสฺส อญฺญสฺส อุปฎฺฐานํ คมิสฺสามี’’ติ วิมานสมฺปตฺติยํ วิมฺหยกฺขิโก อหงฺการวเสน วทติฯ รณนฺติ นินฺทนฺติ เอเตหีติ รณา, โทสาฯ วิโรธิปจฺจยสนฺนิปาเต วิการุปฺปตฺติ รุปฺปนํ รูปสฺส ปเวธนนฺติ อาห ‘‘สีตาทีหิ จ นิจฺจํ ปเวธิต’’นฺติฯ สุเมโธ สุนฺทรปโญฺญ โส สตฺถา รูเป น รมติ, กิํ ปน มนฺทปโญฺญ รูเป สรณญฺจ ปเวธิตญฺจ อปสฺสโนฺต รมสีติ อธิปฺปาโยฯ
Satapadanti satasaddo. Rūpavasenāti rūpasaddavasena, rūpasaddena saddhinti attho. Tathā pantivasenāti etthāpi. Ekacceti eke migārī, tesaṃ byagghīnisārūpakānaṃ pañcasatānīti attho. ‘‘Kassa aññassa upaṭṭhānaṃ gamissāmī’’ti vimānasampattiyaṃ vimhayakkhiko ahaṅkāravasena vadati. Raṇanti nindanti etehīti raṇā, dosā. Virodhipaccayasannipāte vikāruppatti ruppanaṃ rūpassa pavedhananti āha ‘‘sītādīhi ca niccaṃ pavedhita’’nti. Sumedho sundarapañño so satthā rūpe na ramati, kiṃ pana mandapañño rūpe saraṇañca pavedhitañca apassanto ramasīti adhippāyo.
พฺรหฺมโลกสุตฺตวณฺณนา นิฎฺฐิตาฯ
Brahmalokasuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๖. พฺรหฺมโลกสุตฺตํ • 6. Brahmalokasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๖. พฺรหฺมโลกสุตฺตวณฺณนา • 6. Brahmalokasuttavaṇṇanā
