| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៦. ព្រហ្មលោកសុត្តវណ្ណនា
6. Brahmalokasuttavaṇṇanā
១៧៧. បច្ចេកំ ទ្វារពាហន្តិ បច្ចេកំ ទ្វារពាហំ។ បច្ចេក-សទ្ទោ ចេត្ថ អាវុត្តិវសេន វេទិតព្ពោ; ‘‘បច្ចេកំ បច្ចេក’’ន្តិ អាហ ‘‘ឯកេកោ ឯកេក’’ន្តិ។ តេសុ ហិ ឯកោ បច្ចេកព្រហ្មា គន្ធកុដិយា ឯកទ្វារពាហំ និស្សាយ ឋិតោ, អបរោ អញ្ញំ។ បច្ចេកព្រហ្មាតិ ច ឯកចារី ព្រហ្មា, ន បរិសចារី ព្រហ្មាតិ អត្ថោ។ សមិទ្ធិ នាម សគ្គេ សុខុបករណេហិ, ព្រហ្មានញ្ច ឈានំ សុខុបករណន្តិ ឈានសុខេន សមិទ្ធោតិ។ សម្បត្តិយា វេបុល្លប្បត្តតា ព្រហ្មានញ្ច អភិញ្ញាគុណេហិ វេបុល្លប្បត្តីតិ អាហ ‘‘ផីតោតិ អភិញ្ញាបុប្ផេហិ សុបុប្ផិតោ’’តិ។ អសហន្តោតិ នសហន្តោ នរោចេន្តោ។
177.Paccekaṃdvārabāhanti paccekaṃ dvārabāhaṃ. Pacceka-saddo cettha āvuttivasena veditabbo; ‘‘paccekaṃ pacceka’’nti āha ‘‘ekeko ekeka’’nti. Tesu hi eko paccekabrahmā gandhakuṭiyā ekadvārabāhaṃ nissāya ṭhito, aparo aññaṃ. Paccekabrahmāti ca ekacārī brahmā, na parisacārī brahmāti attho. Samiddhi nāma sagge sukhupakaraṇehi, brahmānañca jhānaṃ sukhupakaraṇanti jhānasukhena samiddhoti. Sampattiyā vepullappattatā brahmānañca abhiññāguṇehi vepullappattīti āha ‘‘phītoti abhiññāpupphehi supupphito’’ti. Asahantoti nasahanto narocento.
សតបទន្តិ សតសទ្ទោ។ រូបវសេនាតិ រូបសទ្ទវសេន, រូបសទ្ទេន សទ្ធិន្តិ អត្ថោ។ តថា បន្តិវសេនាតិ ឯត្ថាបិ។ ឯកច្ចេតិ ឯកេ មិគារី, តេសំ ព្យគ្ឃីនិសារូបកានំ បញ្ចសតានីតិ អត្ថោ។ ‘‘កស្ស អញ្ញស្ស ឧបដ្ឋានំ គមិស្សាមី’’តិ វិមានសម្បត្តិយំ វិម្ហយក្ខិកោ អហង្ការវសេន វទតិ។ រណន្តិ និន្ទន្តិ ឯតេហីតិ រណា, ទោសា។ វិរោធិបច្ចយសន្និបាតេ វិការុប្បត្តិ រុប្បនំ រូបស្ស បវេធនន្តិ អាហ ‘‘សីតាទីហិ ច និច្ចំ បវេធិត’’ន្តិ។ សុមេធោ សុន្ទរបញ្ញោ សោ សត្ថា រូបេ ន រមតិ, កិំ បន មន្ទបញ្ញោ រូបេ សរណញ្ច បវេធិតញ្ច អបស្សន្តោ រមសីតិ អធិប្បាយោ។
Satapadanti satasaddo. Rūpavasenāti rūpasaddavasena, rūpasaddena saddhinti attho. Tathā pantivasenāti etthāpi. Ekacceti eke migārī, tesaṃ byagghīnisārūpakānaṃ pañcasatānīti attho. ‘‘Kassa aññassa upaṭṭhānaṃ gamissāmī’’ti vimānasampattiyaṃ vimhayakkhiko ahaṅkāravasena vadati. Raṇanti nindanti etehīti raṇā, dosā. Virodhipaccayasannipāte vikāruppatti ruppanaṃ rūpassa pavedhananti āha ‘‘sītādīhi ca niccaṃ pavedhita’’nti. Sumedho sundarapañño so satthā rūpe na ramati, kiṃ pana mandapañño rūpe saraṇañca pavedhitañca apassanto ramasīti adhippāyo.
ព្រហ្មលោកសុត្តវណ្ណនា និដ្ឋិតា។
Brahmalokasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៦. ព្រហ្មលោកសុត្តំ • 6. Brahmalokasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៦. ព្រហ្មលោកសុត្តវណ្ណនា • 6. Brahmalokasuttavaṇṇanā
