| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೬. ಬ್ರಹ್ಮಲೋಕಸುತ್ತವಣ್ಣನಾ
6. Brahmalokasuttavaṇṇanā
೧೭೭. ಪಚ್ಚೇಕಂ ದ್ವಾರಬಾಹನ್ತಿ ಪಚ್ಚೇಕಂ ದ್ವಾರಬಾಹಂ। ಪಚ್ಚೇಕ-ಸದ್ದೋ ಚೇತ್ಥ ಆವುತ್ತಿವಸೇನ ವೇದಿತಬ್ಬೋ; ‘‘ಪಚ್ಚೇಕಂ ಪಚ್ಚೇಕ’’ನ್ತಿ ಆಹ ‘‘ಏಕೇಕೋ ಏಕೇಕ’’ನ್ತಿ। ತೇಸು ಹಿ ಏಕೋ ಪಚ್ಚೇಕಬ್ರಹ್ಮಾ ಗನ್ಧಕುಟಿಯಾ ಏಕದ್ವಾರಬಾಹಂ ನಿಸ್ಸಾಯ ಠಿತೋ, ಅಪರೋ ಅಞ್ಞಂ। ಪಚ್ಚೇಕಬ್ರಹ್ಮಾತಿ ಚ ಏಕಚಾರೀ ಬ್ರಹ್ಮಾ, ನ ಪರಿಸಚಾರೀ ಬ್ರಹ್ಮಾತಿ ಅತ್ಥೋ। ಸಮಿದ್ಧಿ ನಾಮ ಸಗ್ಗೇ ಸುಖುಪಕರಣೇಹಿ, ಬ್ರಹ್ಮಾನಞ್ಚ ಝಾನಂ ಸುಖುಪಕರಣನ್ತಿ ಝಾನಸುಖೇನ ಸಮಿದ್ಧೋತಿ। ಸಮ್ಪತ್ತಿಯಾ ವೇಪುಲ್ಲಪ್ಪತ್ತತಾ ಬ್ರಹ್ಮಾನಞ್ಚ ಅಭಿಞ್ಞಾಗುಣೇಹಿ ವೇಪುಲ್ಲಪ್ಪತ್ತೀತಿ ಆಹ ‘‘ಫೀತೋತಿ ಅಭಿಞ್ಞಾಪುಪ್ಫೇಹಿ ಸುಪುಪ್ಫಿತೋ’’ತಿ। ಅಸಹನ್ತೋತಿ ನಸಹನ್ತೋ ನರೋಚೇನ್ತೋ।
177.Paccekaṃdvārabāhanti paccekaṃ dvārabāhaṃ. Pacceka-saddo cettha āvuttivasena veditabbo; ‘‘paccekaṃ pacceka’’nti āha ‘‘ekeko ekeka’’nti. Tesu hi eko paccekabrahmā gandhakuṭiyā ekadvārabāhaṃ nissāya ṭhito, aparo aññaṃ. Paccekabrahmāti ca ekacārī brahmā, na parisacārī brahmāti attho. Samiddhi nāma sagge sukhupakaraṇehi, brahmānañca jhānaṃ sukhupakaraṇanti jhānasukhena samiddhoti. Sampattiyā vepullappattatā brahmānañca abhiññāguṇehi vepullappattīti āha ‘‘phītoti abhiññāpupphehi supupphito’’ti. Asahantoti nasahanto narocento.
ಸತಪದನ್ತಿ ಸತಸದ್ದೋ। ರೂಪವಸೇನಾತಿ ರೂಪಸದ್ದವಸೇನ, ರೂಪಸದ್ದೇನ ಸದ್ಧಿನ್ತಿ ಅತ್ಥೋ। ತಥಾ ಪನ್ತಿವಸೇನಾತಿ ಏತ್ಥಾಪಿ। ಏಕಚ್ಚೇತಿ ಏಕೇ ಮಿಗಾರೀ, ತೇಸಂ ಬ್ಯಗ್ಘೀನಿಸಾರೂಪಕಾನಂ ಪಞ್ಚಸತಾನೀತಿ ಅತ್ಥೋ। ‘‘ಕಸ್ಸ ಅಞ್ಞಸ್ಸ ಉಪಟ್ಠಾನಂ ಗಮಿಸ್ಸಾಮೀ’’ತಿ ವಿಮಾನಸಮ್ಪತ್ತಿಯಂ ವಿಮ್ಹಯಕ್ಖಿಕೋ ಅಹಙ್ಕಾರವಸೇನ ವದತಿ। ರಣನ್ತಿ ನಿನ್ದನ್ತಿ ಏತೇಹೀತಿ ರಣಾ, ದೋಸಾ। ವಿರೋಧಿಪಚ್ಚಯಸನ್ನಿಪಾತೇ ವಿಕಾರುಪ್ಪತ್ತಿ ರುಪ್ಪನಂ ರೂಪಸ್ಸ ಪವೇಧನನ್ತಿ ಆಹ ‘‘ಸೀತಾದೀಹಿ ಚ ನಿಚ್ಚಂ ಪವೇಧಿತ’’ನ್ತಿ। ಸುಮೇಧೋ ಸುನ್ದರಪಞ್ಞೋ ಸೋ ಸತ್ಥಾ ರೂಪೇ ನ ರಮತಿ, ಕಿಂ ಪನ ಮನ್ದಪಞ್ಞೋ ರೂಪೇ ಸರಣಞ್ಚ ಪವೇಧಿತಞ್ಚ ಅಪಸ್ಸನ್ತೋ ರಮಸೀತಿ ಅಧಿಪ್ಪಾಯೋ।
Satapadanti satasaddo. Rūpavasenāti rūpasaddavasena, rūpasaddena saddhinti attho. Tathā pantivasenāti etthāpi. Ekacceti eke migārī, tesaṃ byagghīnisārūpakānaṃ pañcasatānīti attho. ‘‘Kassa aññassa upaṭṭhānaṃ gamissāmī’’ti vimānasampattiyaṃ vimhayakkhiko ahaṅkāravasena vadati. Raṇanti nindanti etehīti raṇā, dosā. Virodhipaccayasannipāte vikāruppatti ruppanaṃ rūpassa pavedhananti āha ‘‘sītādīhi ca niccaṃ pavedhita’’nti. Sumedho sundarapañño so satthā rūpe na ramati, kiṃ pana mandapañño rūpe saraṇañca pavedhitañca apassanto ramasīti adhippāyo.
ಬ್ರಹ್ಮಲೋಕಸುತ್ತವಣ್ಣನಾ ನಿಟ್ಠಿತಾ।
Brahmalokasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೬. ಬ್ರಹ್ಮಲೋಕಸುತ್ತಂ • 6. Brahmalokasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೬. ಬ್ರಹ್ಮಲೋಕಸುತ್ತವಣ್ಣನಾ • 6. Brahmalokasuttavaṇṇanā
