| Library / Tipiṭaka / д̇ибидага • Tipiṭaka / суд̇д̇анибаад̇а-адтагат̇аа • Suttanipāta-aṭṭhakathā |
7. б̣раахман̣ад̇хаммигасуд̇д̇аван̣н̣анаа
7. Brāhmaṇadhammikasuttavaṇṇanā
звам̣ мз суд̇анд̇и б̣раахман̣ад̇хаммигасуд̇д̇ам̣. гаа уббад̇д̇и? аяамзва яаасса нид̣̇аанз ‘‘ат̇а ко самб̣ахулаа’’д̇иаад̣̇инаа наязна вуд̇д̇аа. д̇ад̇т̇а самб̣ахулаад̇и б̣ахуу анзгз. госалагаад̇и госаларадтаваасино. б̣раахман̣амахаасаалаад̇и ж̇аад̇ияаа б̣раахман̣аа махаасаарад̇ааяа махаасаалаа. язсам̣ гира нид̣̇ахид̇ваа табид̇ам̣язва асийд̇игодисан̇кяам̣ д̇ханамад̇т̇и, д̇з ‘‘б̣раахман̣амахаасаалаа’’д̇и вужжанд̇и. имз жа д̇аад̣̇исаа, д̇зна вуд̇д̇ам̣ ‘‘б̣раахман̣амахаасаалаа’’д̇и. ж̇ин̣н̣аад̇и ж̇аж̇ж̇арийбхууд̇аа ж̇арааяа кан̣д̣ижжаад̣̇ибхаавамаабаад̣̇ид̇аа. вуд̣дхаад̇и ан̇г̇абажжан̇г̇аанам̣ вуд̣дхимарияаад̣̇ам̣ бад̇д̇аа. махаллагаад̇и ж̇аад̇имахаллагад̇ааяа саманнааг̇ад̇аа, жирагаалаббасуд̇аад̇и вуд̇д̇ам̣ ход̇и. ад̣̇д̇хаг̇ад̇аад̇и ад̣̇д̇хаанам̣ г̇ад̇аа, д̣̇вз д̇аяо рааж̇абариваддз ад̇ийд̇аад̇и ад̇хиббааяо. ваяо ануббад̇д̇аад̇и бажчимаваяам̣ самбад̇д̇аа. абижа ж̇ин̣н̣аад̇и бораан̣аа, жирагаалаббавад̇д̇агуланваяаад̇и вуд̇д̇ам̣ ход̇и. вуд̣дхаад̇и сийлаажаараад̣̇иг̇ун̣авуд̣дхияуд̇д̇аа. махаллагаад̇и вибхавамаханд̇ад̇ааяа саманнааг̇ад̇аа махад̣̇д̇ханаа махаабхог̇аа. ад̣̇д̇хаг̇ад̇аад̇и маг̇г̇абадибаннаа б̣раахман̣аанам̣ вад̇ажарияаад̣̇имарияаад̣̇ам̣ авийд̇иггамма жарамаанаа. ваяо ануббад̇д̇аад̇и ж̇аад̇ивуд̣дхабхаавамби анд̇имаваяам̣ ануббад̇д̇аад̇и звамбзд̇т̇а яож̇анаа взд̣̇ид̇аб̣б̣аа. сзсамзд̇т̇а баагадамзва.
Evaṃme sutanti brāhmaṇadhammikasuttaṃ. Kā uppatti? Ayameva yāssa nidāne ‘‘atha kho sambahulā’’tiādinā nayena vuttā. Tattha sambahulāti bahū aneke. Kosalakāti kosalaraṭṭhavāsino. Brāhmaṇamahāsālāti jātiyā brāhmaṇā mahāsāratāya mahāsālā. Yesaṃ kira nidahitvā ṭhapitaṃyeva asītikoṭisaṅkhyaṃ dhanamatthi, te ‘‘brāhmaṇamahāsālā’’ti vuccanti. Ime ca tādisā, tena vuttaṃ ‘‘brāhmaṇamahāsālā’’ti. Jiṇṇāti jajjarībhūtā jarāya khaṇḍiccādibhāvamāpāditā. Vuḍḍhāti aṅgapaccaṅgānaṃ vuḍḍhimariyādaṃ pattā. Mahallakāti jātimahallakatāya samannāgatā, cirakālappasutāti vuttaṃ hoti. Addhagatāti addhānaṃ gatā, dve tayo rājaparivaṭṭe atītāti adhippāyo. Vayo anuppattāti pacchimavayaṃ sampattā. Apica jiṇṇāti porāṇā, cirakālappavattakulanvayāti vuttaṃ hoti. Vuḍḍhāti sīlācārādiguṇavuḍḍhiyuttā. Mahallakāti vibhavamahantatāya samannāgatā mahaddhanā mahābhogā. Addhagatāti maggapaṭipannā brāhmaṇānaṃ vatacariyādimariyādaṃ avītikkamma caramānā. Vayo anuppattāti jātivuḍḍhabhāvampi antimavayaṃ anuppattāti evampettha yojanā veditabbā. Sesamettha pākaṭameva.
бхаг̇авад̇аа сад̣̇д̇хим̣ саммод̣̇им̣сууд̇и каманийяаад̣̇ийни бужчанд̇аа ан̃н̃аман̃н̃ам̣ самаббавад̇д̇амод̣̇аа ахзсум̣. яааяа жа ‘‘гажжи бход̇о г̇од̇амасса каманийяам̣, гажжи яаабанийяам̣, аббааб̣аад̇хам̣, аббаад̇ан̇гам̣, б̣алам̣, лахудтаанам̣, паасувихааро’’д̇иаад̣̇игааяа гат̇ааяа саммод̣̇им̣су, д̇ам̣ бийд̇ибаамож̇ж̇асан̇каад̇асаммод̣̇аж̇ананад̇о саммод̣̇ид̇ум̣ арахад̇о жа саммод̣̇анийяам̣, ад̇т̇аб̣яан̃ж̇анамад̇хурад̇ааяа сужирамби гаалам̣ саарзд̇ум̣ ниранд̇арам̣ бавад̇д̇зд̇ум̣ арахад̇о сарид̇аб̣б̣абхаавад̇о жа сааран̣ийяам̣. суяяамаанасукад̇о жа саммод̣̇анийяам̣, ануссарияамаанасукад̇о сааран̣ийяам̣, д̇ат̇аа б̣яан̃ж̇анабарисуд̣̇д̇хад̇ааяа саммод̣̇анийяам̣, ад̇т̇абарисуд̣̇д̇хад̇ааяа сааран̣ийяанд̇и звам̣ анзгзхи барияааязхи саммод̣̇анийяам̣ гат̇ам̣ сааран̣ийяам̣ вийд̇исаарзд̇ваа барияосаабзд̇ваа нидтаабзд̇ваа язнад̇т̇зна ааг̇ад̇аа, д̇ам̣ бужчид̇угаамаа згаманд̇ам̣ нисийд̣̇им̣су. д̇ам̣ –
Bhagavatā saddhiṃ sammodiṃsūti khamanīyādīni pucchantā aññamaññaṃ samappavattamodā ahesuṃ. Yāya ca ‘‘kacci bhoto gotamassa khamanīyaṃ, kacci yāpanīyaṃ, appābādhaṃ, appātaṅkaṃ, balaṃ, lahuṭṭhānaṃ, phāsuvihāro’’tiādikāya kathāya sammodiṃsu, taṃ pītipāmojjasaṅkhātasammodajananato sammodituṃ arahato ca sammodanīyaṃ, atthabyañjanamadhuratāya sucirampi kālaṃ sāretuṃ nirantaraṃ pavattetuṃ arahato saritabbabhāvato ca sāraṇīyaṃ. Suyyamānasukhato ca sammodanīyaṃ, anussariyamānasukhato sāraṇīyaṃ, tathā byañjanaparisuddhatāya sammodanīyaṃ, atthaparisuddhatāya sāraṇīyanti evaṃ anekehi pariyāyehi sammodanīyaṃ kathaṃ sāraṇīyaṃ vītisāretvā pariyosāpetvā niṭṭhāpetvā yenatthena āgatā, taṃ pucchitukāmā ekamantaṃ nisīdiṃsu. Taṃ –
‘‘на бажчад̇о на бурад̇о, нааби аасаннад̣̇уурад̇о;
‘‘Na pacchato na purato, nāpi āsannadūrato;
на бассз нааби бадиваад̇з, на жааби он̣ад̇ун̣н̣ад̇з’’д̇и. –
Na passe nāpi paṭivāte, na cāpi oṇatuṇṇate’’ti. –
аад̣̇инаа наязна ман̇г̇аласуд̇д̇аван̣н̣анааяам̣ вуд̇д̇амзва.
Ādinā nayena maṅgalasuttavaṇṇanāyaṃ vuttameva.
звам̣ згаманд̇ам̣ нисиннаа ко д̇з б̣раахман̣амахаасаалаа бхаг̇аванд̇ам̣ зд̇ад̣̇авожум̣ – ‘‘гим̣ д̇а’’нд̇и? ‘‘санд̣̇иссанд̇и ну ко’’д̇иаад̣̇и. д̇ам̣ саб̣б̣ам̣ уд̇д̇аанад̇т̇амзва. гзвалан̃хзд̇т̇а б̣раахман̣аанам̣ б̣раахман̣ад̇хаммзд̇и д̣̇зсагаалаад̣̇ид̇хаммз чад̣д̣зд̇ваа яо б̣раахман̣ад̇хаммо, д̇асмим̣язва. д̇зна хи б̣раахман̣аад̇и яасмаа мам̣ д̇умхз яаажид̇т̇а, д̇асмаа б̣раахман̣аа сун̣аат̇а, сод̇ам̣ од̣̇ахат̇а, саад̇хугам̣ манаси гарот̇а, яонисо манаси гарот̇а. д̇ат̇аа баяог̇асуд̣̇д̇хияаа сун̣аат̇а, аасаяасуд̣̇д̇хияаа саад̇хугам̣ манаси гарот̇а. авигкзбзна сун̣аат̇а, баг̇г̇ахзна саад̇хугам̣ манаси гарот̇аад̇иаад̣̇инаа наязна зд̇зсам̣ бад̣̇аанам̣ буб̣б̣з авуд̇д̇оби ад̇хиббааяо взд̣̇ид̇аб̣б̣о. ат̇а бхаг̇авад̇аа вуд̇д̇ам̣ д̇ам̣ важанам̣ самбадижчанд̇аа ‘‘звам̣ бхо’’д̇и ко д̇з б̣раахман̣амахаасаалаа бхаг̇авад̇о бажжассосум̣, бхаг̇авад̇о важанам̣ абхимукаа худ̇ваа ассосум̣. ат̇а ваа бадиссун̣им̣су. ‘‘сун̣аат̇а саад̇хугам̣ манаси гарот̇аа’’д̇и вуд̇д̇амад̇т̇ам̣ гад̇д̇угаамад̇ааяа бадиж̇ааним̣сууд̇и вуд̇д̇ам̣ ход̇и. ат̇а д̇зсам̣ звам̣ бадиссуд̇авад̇ам̣ бхаг̇аваа зд̇ад̣̇авожа – ‘‘гим̣ д̇а’’нд̇и? ‘‘исаяо буб̣б̣агаа’’д̇иаад̣̇и.
Evaṃ ekamantaṃ nisinnā kho te brāhmaṇamahāsālā bhagavantaṃ etadavocuṃ – ‘‘kiṃ ta’’nti? ‘‘Sandissanti nu kho’’tiādi. Taṃ sabbaṃ uttānatthameva. Kevalañhettha brāhmaṇānaṃ brāhmaṇadhammeti desakālādidhamme chaḍḍetvā yo brāhmaṇadhammo, tasmiṃyeva. Tena hi brāhmaṇāti yasmā maṃ tumhe yācittha, tasmā brāhmaṇā suṇātha, sotaṃ odahatha, sādhukaṃ manasi karotha, yoniso manasi karotha. Tathā payogasuddhiyā suṇātha, āsayasuddhiyā sādhukaṃ manasi karotha. Avikkhepena suṇātha, paggahena sādhukaṃ manasi karothātiādinā nayena etesaṃ padānaṃ pubbe avuttopi adhippāyo veditabbo. Atha bhagavatā vuttaṃ taṃ vacanaṃ sampaṭicchantā ‘‘evaṃ bho’’ti kho te brāhmaṇamahāsālā bhagavato paccassosuṃ, bhagavato vacanaṃ abhimukhā hutvā assosuṃ. Atha vā paṭissuṇiṃsu. ‘‘Suṇātha sādhukaṃ manasi karothā’’ti vuttamatthaṃ kattukāmatāya paṭijāniṃsūti vuttaṃ hoti. Atha tesaṃ evaṃ paṭissutavataṃ bhagavā etadavoca – ‘‘kiṃ ta’’nti? ‘‘Isayo pubbakā’’tiādi.
287. д̇ад̇т̇а батамаг̇аат̇ааяа д̇аава сан̃н̃ад̇ад̇д̇аад̇и сийласам̣яамзна сам̣яад̇ажид̇д̇аа. д̇абассинод̇и инд̣̇рияасам̣варад̇абаяуд̇д̇аа. ад̇д̇ад̣̇ад̇т̇амажаарисунд̇и манд̇аж̇жхзнаб̣рахмавихаарабхааванаад̣̇им̣ ад̇д̇ано ад̇т̇ам̣ агам̣су. сзсам̣ баагадамзва.
287. Tattha paṭhamagāthāya tāva saññatattāti sīlasaṃyamena saṃyatacittā. Tapassinoti indriyasaṃvaratapayuttā. Attadatthamacārisunti mantajjhenabrahmavihārabhāvanādiṃ attano atthaṃ akaṃsu. Sesaṃ pākaṭameva.
288. д̣̇уд̇ияаг̇аат̇аад̣̇ийсуби аяам̣ сан̇кзбаван̣н̣анаа – на басуу б̣раахман̣аанаасунд̇и бораан̣аанам̣ б̣раахман̣аанам̣ басуу на аасум̣, на д̇з басубариг̇г̇ахамагам̣су. на хиран̃н̃ам̣ на д̇хаанияанд̇и хиран̃н̃ан̃жа б̣раахман̣аанам̣ анд̇амасо ж̇ад̇умаасагоби наахоси , д̇ат̇аа вийхисаалияаваг̇од̇хуумаад̣̇и буб̣б̣ан̣н̣аабаран̣н̣абхзд̣̇ам̣ д̇хаанияамби д̇зсам̣ наахоси. д̇з хи нигкид̇д̇аж̇аад̇аруубараж̇ад̇аа асаннид̇хигаарагаава худ̇ваа гзвалам̣ саж̇жхааяад̇ханад̇хан̃н̃аа ад̇д̇ано манд̇аж̇жхзнасан̇каад̇знзва д̇ханзна д̇хан̃н̃зна жа саманнааг̇ад̇аа ахзсум̣. яо жааяам̣ мзд̇д̇аад̣̇ивихааро сздтад̇д̇аа ануг̇аамигад̇д̇аа жа б̣рахманид̇хийд̇и вужжад̇и, д̇ан̃жа б̣рахмам̣ нид̇химабаалаяум̣ сад̣̇аа д̇асса бхааванаануяог̇зна.
288. Dutiyagāthādīsupi ayaṃ saṅkhepavaṇṇanā – na pasū brāhmaṇānāsunti porāṇānaṃ brāhmaṇānaṃ pasū na āsuṃ, na te pasupariggahamakaṃsu. Na hiraññaṃ na dhāniyanti hiraññañca brāhmaṇānaṃ antamaso jatumāsakopi nāhosi , tathā vīhisāliyavagodhūmādi pubbaṇṇāparaṇṇabhedaṃ dhāniyampi tesaṃ nāhosi. Te hi nikkhittajātarūparajatā asannidhikārakāva hutvā kevalaṃ sajjhāyadhanadhaññā attano mantajjhenasaṅkhāteneva dhanena dhaññena ca samannāgatā ahesuṃ. Yo cāyaṃ mettādivihāro seṭṭhattā anugāmikattā ca brahmanidhīti vuccati, tañca brahmaṃ nidhimapālayuṃ sadā tassa bhāvanānuyogena.
289. звам̣ вихаарийнам̣ яам̣ нзсам̣ багад̇ам̣ ааси, яам̣ зд̇зсам̣ багад̇ам̣ зд̇з б̣раахман̣з уд̣̇д̣̇исса гад̇ам̣ ахоси. д̣̇ваарабхад̇д̇ам̣ убадтид̇анд̇и ‘‘б̣раахман̣аанам̣ д̣̇ассаамаа’’д̇и саж̇ж̇зд̇ваа д̇зхи д̇зхи д̣̇ааяагзхи ад̇д̇ано ад̇д̇ано гхарад̣̇ваарз табид̇абхад̇д̇ам̣. сад̣̇д̇хаабагад̇анд̇и сад̣̇д̇хааяа багад̇ам̣, сад̣̇д̇хаад̣̇зяяанд̇и вуд̇д̇ам̣ ход̇и. зсаананд̇и зсанд̇ийд̇и зсаа, д̇зсам̣ зсаанам̣, зсамаанаанам̣ бариязсамаанаананд̇и вуд̇д̇ам̣ ход̇и. д̣̇аад̇авзд̇и д̣̇аад̇аб̣б̣ам̣. д̇ад̣̇аман̃н̃исунд̇и д̇ам̣ аман̃н̃им̣су, д̇ам̣ д̣̇ваарз саж̇ж̇зд̇ваа табид̇ам̣ бхад̇д̇ам̣ сад̣̇д̇хаад̣̇зяяам̣ бариязсамаанаанам̣ зд̇зсам̣ б̣раахман̣аанам̣ д̣̇аад̇аб̣б̣ам̣ аман̃н̃им̣су д̣̇ааяагаа ж̇анаа, на д̇ад̇о барам̣. анад̇т̇игаа хи д̇з ан̃н̃зна ахзсум̣, гзвалам̣ гхаасажчаад̣̇анабарамад̇ааяа санд̇удтаад̇и ад̇хиббааяо.
289. Evaṃ vihārīnaṃ yaṃ nesaṃ pakataṃ āsi, yaṃ etesaṃ pakataṃ ete brāhmaṇe uddissa kataṃ ahosi. Dvārabhattaṃ upaṭṭhitanti ‘‘brāhmaṇānaṃ dassāmā’’ti sajjetvā tehi tehi dāyakehi attano attano gharadvāre ṭhapitabhattaṃ. Saddhāpakatanti saddhāya pakataṃ, saddhādeyyanti vuttaṃ hoti. Esānanti esantīti esā, tesaṃ esānaṃ, esamānānaṃ pariyesamānānanti vuttaṃ hoti. Dātaveti dātabbaṃ. Tadamaññisunti taṃ amaññiṃsu, taṃ dvāre sajjetvā ṭhapitaṃ bhattaṃ saddhādeyyaṃ pariyesamānānaṃ etesaṃ brāhmaṇānaṃ dātabbaṃ amaññiṃsu dāyakā janā, na tato paraṃ. Anatthikā hi te aññena ahesuṃ, kevalaṃ ghāsacchādanaparamatāya santuṭṭhāti adhippāyo.
290. наанаарад̇д̇зхийд̇и наанаавид̇харааг̇арад̇д̇зхи вад̇т̇зхи вижид̇рад̇т̇аран̣ад̇т̇ад̇зхи, саяанзхи згабхуумигад̣̇вибхуумигаад̣̇ибаасаад̣̇аварзхи. аавасат̇зхийд̇и зваруубзхи убагаран̣зхи. пийд̇аа ж̇анабад̣̇аа радтаа згзгаббад̣̇зсабхууд̇аа ж̇анабад̣̇аа жа гзжи гзжи сагаларадтаа жа ‘‘намо б̣раахман̣аана’’нд̇и сааяам̣ баад̇ам̣ б̣раахман̣з д̣̇звз вияа намассим̣су.
290.Nānārattehīti nānāvidharāgarattehi vatthehi vicitrattharaṇatthatehi, sayanehi ekabhūmikadvibhūmikādipāsādavarehi. Āvasathehīti evarūpehi upakaraṇehi. Phītā janapadā raṭṭhā ekekappadesabhūtā janapadā ca keci keci sakalaraṭṭhā ca ‘‘namo brāhmaṇāna’’nti sāyaṃ pātaṃ brāhmaṇe deve viya namassiṃsu.
291. д̇з звам̣ намассияамаанаа логзна аваж̇жхаа б̣раахман̣аа аасум̣, на гзвалан̃жа аваж̇жхаа, аж̇зяяаа вихим̣сид̇умби анабхибхаванийяад̇д̇аа аж̇зяяаа жа ахзсум̣. гим̣ гааран̣аа? д̇хаммарагкид̇аа, яасмаа д̇хаммзна рагкид̇аа. д̇з хи бан̃жа варасийлад̇хаммз рагким̣су, ‘‘д̇хаммо хавз рагкад̇и д̇хаммажаари’’нд̇и (ж̇аа. 1.10.102; 1.15.385) д̇хаммарагкид̇аа худ̇ваа аваж̇жхаа аж̇зяяаа жа ахзсунд̇и ад̇хиббааяо. на нз гожи ниваарзсийд̇и д̇з б̣раахман̣з гулаанам̣ д̣̇ваарзсу саб̣б̣асо б̣аахирзсу жа аб̣бханд̇арзсу жа саб̣б̣ад̣̇ваарзсу яасмаа д̇зсу бияасаммад̇зсу варасийласаманнааг̇ад̇зсу маад̇аабид̇уусу вияа ад̇ивиссад̇т̇аа мануссаа ахзсум̣, д̇асмаа ‘‘ид̣̇ам̣ наама таанам̣ д̇аяаа на бависид̇аб̣б̣а’’нд̇и на гожи ниваарзси.
291. Te evaṃ namassiyamānā lokena avajjhā brāhmaṇā āsuṃ, na kevalañca avajjhā, ajeyyā vihiṃsitumpi anabhibhavanīyattā ajeyyā ca ahesuṃ. Kiṃ kāraṇā? Dhammarakkhitā, yasmā dhammena rakkhitā. Te hi pañca varasīladhamme rakkhiṃsu, ‘‘dhammo have rakkhati dhammacāri’’nti (jā. 1.10.102; 1.15.385) dhammarakkhitā hutvā avajjhā ajeyyā ca ahesunti adhippāyo. Na ne koci nivāresīti te brāhmaṇe kulānaṃ dvāresu sabbaso bāhiresu ca abbhantaresu ca sabbadvāresu yasmā tesu piyasammatesu varasīlasamannāgatesu mātāpitūsu viya ativissatthā manussā ahesuṃ, tasmā ‘‘idaṃ nāma ṭhānaṃ tayā na pavisitabba’’nti na koci nivāresi.
292. звам̣ д̇хаммарагкид̇аа гулад̣̇ваарзсу аниваарид̇аа жаранд̇аа адта жа жад̇д̇аалийсан̃жаад̇и адтажад̇д̇аалийсам̣ вассаани гумаарабхаавад̇о бабхуд̇и жаран̣зна гомаарам̣ б̣рахмажарияам̣ жарим̣су д̇з. язби б̣раахман̣ажан̣д̣аалаа ахзсум̣, го бана ваад̣̇о б̣рахмасамаад̣̇ийсууд̇и звамзд̇т̇а ад̇хиббааяо взд̣̇ид̇аб̣б̣о. звам̣ б̣рахмажарияам̣ жаранд̇аа зва хи виж̇ж̇аажаран̣абарияздтим̣ ажарум̣ б̣раахман̣аа бурз, на аб̣рахмажаарино худ̇ваа. д̇ад̇т̇а виж̇ж̇аабарияздтийд̇и манд̇аж̇жхзнам̣. вуд̇д̇ан̃жзд̇ам̣ ‘‘со адтажад̇д̇аалийса вассаани гомаарам̣ б̣рахмажарияам̣ жарад̇и манд̇з ад̇хийяамаано’’д̇и (а. ни. 5.192). жаран̣абарияздтийд̇и сийларагкан̣ам̣. ‘‘виж̇ж̇аажаран̣абарияздту’’нд̇иби баато, виж̇ж̇аажаран̣ам̣ бариязсид̇ум̣ ажарунд̇и ад̇т̇о.
292. Evaṃ dhammarakkhitā kuladvāresu anivāritā carantā aṭṭha ca cattālīsañcāti aṭṭhacattālīsaṃ vassāni kumārabhāvato pabhuti caraṇena komāraṃ brahmacariyaṃ cariṃsu te. Yepi brāhmaṇacaṇḍālā ahesuṃ, ko pana vādo brahmasamādīsūti evamettha adhippāyo veditabbo. Evaṃ brahmacariyaṃ carantā eva hi vijjācaraṇapariyeṭṭhiṃ acaruṃ brāhmaṇā pure, na abrahmacārino hutvā. Tattha vijjāpariyeṭṭhīti mantajjhenaṃ. Vuttañcetaṃ ‘‘so aṭṭhacattālīsa vassāni komāraṃ brahmacariyaṃ carati mante adhīyamāno’’ti (a. ni. 5.192). Caraṇapariyeṭṭhīti sīlarakkhaṇaṃ. ‘‘Vijjācaraṇapariyeṭṭhu’’ntipi pāṭho, vijjācaraṇaṃ pariyesituṃ acarunti attho.
293. яат̇аавуд̇д̇ан̃жа гаалам̣ б̣рахмажарияам̣ жарид̇ваа д̇ад̇о барам̣ гхарааваасам̣ габбзнд̇ааби на б̣раахман̣аа ан̃н̃амаг̇амум̣ кад̇д̇ияам̣ ваа взссаад̣̇ийсу ан̃н̃ад̇арам̣ ваа, яз ахзсум̣ д̣̇звасамаа ваа марияаад̣̇аа ваад̇и ад̇хиббааяо. д̇ат̇аа сад̇ам̣ ваа сахассам̣ ваа д̣̇ад̇ваа наби бхарияам̣ гин̣им̣су д̇з, сзяяат̇ааби зд̇арахи згажжз гин̣анд̇и. д̇з хи д̇хаммзна д̣̇аарам̣ бариязсанд̇и. гат̇ам̣? адтажад̇д̇аалийсам̣ вассаани б̣рахмажарияам̣ жарид̇ваа б̣раахман̣аа ган̃н̃аабхигкам̣ аахин̣д̣анд̇и – ‘‘ахам̣ адтажад̇д̇аалийса вассаани жин̣н̣аб̣рахмажарияо, яад̣̇и ваяаббад̇д̇аа д̣̇ааригаа ад̇т̇и, д̣̇зт̇а мз’’д̇и. д̇ад̇о яасса ваяаббад̇д̇аа д̣̇ааригаа ход̇и, со д̇ам̣ алан̇гарид̇ваа нийхарид̇ваа д̣̇ваарз тид̇ассзва б̣раахман̣асса хад̇т̇з уд̣̇агам̣ аасин̃жанд̇о ‘‘имам̣ д̇з, б̣раахман̣а, бхарияам̣ босааванад̇т̇ааяа д̣̇аммий’’д̇и вад̇ваа д̣̇зд̇и.
293. Yathāvuttañca kālaṃ brahmacariyaṃ caritvā tato paraṃ gharāvāsaṃ kappentāpi na brāhmaṇā aññamagamuṃ khattiyaṃ vā vessādīsu aññataraṃ vā, ye ahesuṃ devasamā vā mariyādā vāti adhippāyo. Tathā sataṃ vā sahassaṃ vā datvā napi bhariyaṃ kiṇiṃsu te, seyyathāpi etarahi ekacce kiṇanti. Te hi dhammena dāraṃ pariyesanti. Kathaṃ? Aṭṭhacattālīsaṃ vassāni brahmacariyaṃ caritvā brāhmaṇā kaññābhikkhaṃ āhiṇḍanti – ‘‘ahaṃ aṭṭhacattālīsa vassāni ciṇṇabrahmacariyo, yadi vayappattā dārikā atthi, detha me’’ti. Tato yassa vayappattā dārikā hoti, so taṃ alaṅkaritvā nīharitvā dvāre ṭhitasseva brāhmaṇassa hatthe udakaṃ āsiñcanto ‘‘imaṃ te, brāhmaṇa, bhariyaṃ posāvanatthāya dammī’’ti vatvā deti.
гасмаа бана д̇з звам̣ жирам̣ б̣рахмажарияам̣ жарид̇вааби д̣̇аарам̣ бариязсанд̇и, на яааваж̇ийвам̣ б̣рахмажаарино хонд̇ийд̇и? мижчаад̣̇идтивасзна. д̇зсан̃хи звам̣д̣̇идти ход̇и – ‘‘яо буд̇д̇ам̣ на уббаад̣̇зд̇и, со гулавам̣сажчзд̣̇агаро ход̇и, д̇ад̇о нираяз бажжад̇ий’’д̇и. жад̇д̇ааро гира абхааяид̇аб̣б̣ам̣ бхааяанд̇и г̇ан̣д̣уббаад̣̇о гигий гунд̇аний б̣раахман̣аад̇и. г̇ан̣д̣уббаад̣̇аа гира махаабат̇авияаа каяабхаязна мад̇д̇абхож̇ино хонд̇и, на б̣ахум̣ мад̇д̇игам̣ каад̣̇анд̇и. гигий сагун̣игаа аагаасабад̇анабхаязна ан̣д̣асса убари уд̇д̇аанаа сзд̇и. гунд̇аний сагун̣игаа бат̇авигамбанабхаязна баад̣̇зхи бхуумим̣ на судту аггамад̇и. б̣раахман̣аа гулавам̣суубажчзд̣̇абхаязна д̣̇аарам̣ бариязсанд̇и. ааха жзд̇т̇а –
Kasmā pana te evaṃ ciraṃ brahmacariyaṃ caritvāpi dāraṃ pariyesanti, na yāvajīvaṃ brahmacārino hontīti? Micchādiṭṭhivasena. Tesañhi evaṃdiṭṭhi hoti – ‘‘yo puttaṃ na uppādeti, so kulavaṃsacchedakaro hoti, tato niraye paccatī’’ti. Cattāro kira abhāyitabbaṃ bhāyanti gaṇḍuppādo kikī kuntanī brāhmaṇāti. Gaṇḍuppādā kira mahāpathaviyā khayabhayena mattabhojino honti, na bahuṃ mattikaṃ khādanti. Kikī sakuṇikā ākāsapatanabhayena aṇḍassa upari uttānā seti. Kuntanī sakuṇikā pathavikampanabhayena pādehi bhūmiṃ na suṭṭhu akkamati. Brāhmaṇā kulavaṃsūpacchedabhayena dāraṃ pariyesanti. Āha cettha –
‘‘г̇ан̣д̣уббаад̣̇о гигий жзва, гунд̇ий б̣раахман̣ад̇хаммиго;
‘‘Gaṇḍuppādo kikī ceva, kuntī brāhmaṇadhammiko;
зд̇з абхаяам̣ бхааяанд̇и, саммуул̣хаа жад̇уро ж̇анаа’’д̇и.
Ete abhayaṃ bhāyanti, sammūḷhā caturo janā’’ti.
звам̣ д̇хаммзна д̣̇аарам̣ бариязсид̇вааби жа самбиязнзва сам̣ваасам̣ сан̇г̇анд̇ваа самарожаяум̣, самбиязнзва ан̃н̃аман̃н̃ам̣ бзмзнзва гааязна жа жид̇д̇зна жа миссийбхууд̇аа сан̇гхадид̇аа сам̣садтаа худ̇ваа сам̣ваасам̣ самарожаяум̣, на аббиязна на ниг̇г̇ахзна жаад̇и вуд̇д̇ам̣ ход̇и.
Evaṃ dhammena dāraṃ pariyesitvāpi ca sampiyeneva saṃvāsaṃ saṅgantvā samarocayuṃ, sampiyeneva aññamaññaṃ pemeneva kāyena ca cittena ca missībhūtā saṅghaṭitā saṃsaṭṭhā hutvā saṃvāsaṃ samarocayuṃ, na appiyena na niggahena cāti vuttaṃ hoti.
294. звам̣ самбиязнзва сам̣ваасам̣ гаронд̇ааби жа ан̃н̃ад̇ра д̇амхаад̇и, яо со уд̇усамаяо, яамхи самаяз б̣раахман̣ий б̣раахман̣зна убаг̇анд̇аб̣б̣аа, ан̃н̃ад̇ра д̇амхаа самаяаа табзд̇ваа д̇ам̣ самаяам̣ уд̇уд̇о вирад̇ам̣ уд̇увзраман̣им̣ бад̇и бхарияам̣, яаава буна со самаяо ааг̇ажчад̇и, д̇аава адтад̇ваа анд̇арааязва. мзт̇унам̣ д̇хамманд̇и мзт̇унааяа д̇хаммааяа. самбад̣̇аанаважанабад̇д̇ияаа гирзд̇ам̣ убаяог̇аважанам̣. наассу г̇ажчанд̇ийд̇и нзва г̇ажчанд̇и. б̣раахман̣аад̇и яз хонд̇и д̣̇звасамаа жа марияаад̣̇аа жаад̇и ад̇хиббааяо.
294. Evaṃ sampiyeneva saṃvāsaṃ karontāpi ca aññatra tamhāti, yo so utusamayo, yamhi samaye brāhmaṇī brāhmaṇena upagantabbā, aññatra tamhā samayā ṭhapetvā taṃ samayaṃ ututo virataṃ utuveramaṇiṃ pati bhariyaṃ, yāva puna so samayo āgacchati, tāva aṭṭhatvā antarāyeva. Methunaṃ dhammanti methunāya dhammāya. Sampadānavacanapattiyā kiretaṃ upayogavacanaṃ. Nāssu gacchantīti neva gacchanti. Brāhmaṇāti ye honti devasamā ca mariyādā cāti adhippāyo.
295. ависзсзна бана саб̣б̣зби б̣рахмажарияан̃жа…бз… аван̣н̣аяум̣. д̇ад̇т̇а б̣рахмажарияанд̇и мзт̇унавирад̇и. сийланд̇и сзсаани жад̇д̇аари сигкаабад̣̇аани. аж̇ж̇аванд̇и уж̇убхааво, ад̇т̇ад̇о асатад̇аа амааяаавид̇аа жа. мад̣̇д̣̇аванд̇и муд̣̇убхааво, ад̇т̇ад̇о ад̇т̇ад̣̇д̇хад̇аа анад̇имаанид̇аа жа. д̇абод̇и инд̣̇рияасам̣варо. соражжанд̇и сурад̇абхааво сукасийлад̇аа аббадигууласамаажаарад̇аа. авихим̣саад̇и баан̣иаад̣̇ийхи авихзсигаж̇аад̇игад̇аа сагарун̣абхааво. канд̇ийд̇и ад̇хиваасанагканд̇и. ижжзд̇з г̇ун̣з аван̣н̣аяум̣. язби наасагким̣су саб̣б̣асо бадибад̇д̇ияаа аараад̇хзд̇ум̣, д̇зби д̇ад̇т̇а саарад̣̇ассино худ̇ваа ваажааяа ван̣н̣аяим̣су басам̣сим̣су.
295. Avisesena pana sabbepi brahmacariyañca…pe… avaṇṇayuṃ. Tattha brahmacariyanti methunavirati. Sīlanti sesāni cattāri sikkhāpadāni. Ajjavanti ujubhāvo, atthato asaṭhatā amāyāvitā ca. Maddavanti mudubhāvo, atthato atthaddhatā anatimānitā ca. Tapoti indriyasaṃvaro. Soraccanti suratabhāvo sukhasīlatā appaṭikūlasamācāratā. Avihiṃsāti pāṇiādīhi avihesikajātikatā sakaruṇabhāvo. Khantīti adhivāsanakkhanti. Iccete guṇe avaṇṇayuṃ. Yepi nāsakkhiṃsu sabbaso paṭipattiyā ārādhetuṃ, tepi tattha sāradassino hutvā vācāya vaṇṇayiṃsu pasaṃsiṃsu.
296. звам̣ ван̣н̣знд̇аанан̃жа яо нзсам̣…бз… нааг̇амаа, яо зд̇зсам̣ б̣раахман̣аанам̣ барамо б̣рахмаа ахоси, б̣рахмасамо наама уд̇д̇амо б̣раахман̣о ахоси, д̣̇ал̣хзна бараггамзна саманнааг̇ад̇ад̇д̇аа д̣̇ал̣хабараггамо. са ваад̇и вибхааванз ваа-сад̣̇д̣̇о, д̇зна со зваруубо б̣раахман̣од̇и д̇амзва вибхаавзд̇и. мзт̇унам̣ д̇хамманд̇и мзт̇унасамаабад̇д̇им̣. субинанд̇зби нааг̇амаад̇и субинзби на аг̇амааси.
296. Evaṃ vaṇṇentānañca yo nesaṃ…pe… nāgamā, yo etesaṃ brāhmaṇānaṃ paramo brahmā ahosi, brahmasamo nāma uttamo brāhmaṇo ahosi, daḷhena parakkamena samannāgatattā daḷhaparakkamo. Sa vāti vibhāvane vā-saddo, tena so evarūpo brāhmaṇoti tameva vibhāveti. Methunaṃ dhammanti methunasamāpattiṃ. Supinantepi nāgamāti supinepi na agamāsi.
297. д̇ад̇о д̇асса вад̇д̇ам̣…бз… аван̣н̣аяум̣. имааяа г̇аат̇ааяа навамаг̇аат̇ааяа вуд̇д̇аг̇ун̣зязва аад̣̇ианд̇авасзна нид̣̇д̣̇исанд̇о д̣̇звасамз б̣раахман̣з багаасзд̇и. д̇з хи вин̃н̃уж̇аад̇игаа бан̣д̣ид̇аа д̇асса б̣рахмасамасса б̣раахман̣асса вад̇д̇ам̣ анусигканд̇и баб̣б̣аж̇ж̇ааяа жхаанабхааванааяа жа, д̇з жа имз б̣рахмажарияаад̣̇иг̇ун̣з бадибад̇д̇ияаа зва ван̣н̣аяанд̇ийд̇и. д̇з саб̣б̣зби б̣раахман̣аа бан̃жаганибаад̇з д̣̇он̣асуд̇д̇з (а. ни. 5.192) вуд̇д̇анаязнзва взд̣̇ид̇аб̣б̣аа.
297. Tato tassa vattaṃ…pe… avaṇṇayuṃ. Imāya gāthāya navamagāthāya vuttaguṇeyeva ādiantavasena niddisanto devasame brāhmaṇe pakāseti. Te hi viññujātikā paṇḍitā tassa brahmasamassa brāhmaṇassa vattaṃ anusikkhanti pabbajjāya jhānabhāvanāya ca, te ca ime brahmacariyādiguṇe paṭipattiyā eva vaṇṇayantīti. Te sabbepi brāhmaṇā pañcakanipāte doṇasutte (a. ni. 5.192) vuttanayeneva veditabbā.
298. ид̣̇аани марияаад̣̇з б̣раахман̣з д̣̇ассзнд̇о ааха – ‘‘д̇ан̣д̣улам̣ саяана’’нд̇и. д̇ассад̇т̇о – д̇зсу яз хонд̇и марияаад̣̇аа, д̇з б̣раахман̣аа сажз яан̃н̃ам̣ габбзд̇угаамаа хонд̇и, ат̇а аамагад̇хан̃н̃абадиг̇г̇ахан̣аа бадивирад̇ад̇д̇аа наанаббагаарагам̣ д̇ан̣д̣улан̃жа, ман̃жабийтаад̣̇ибхзд̣̇ам̣ саяанан̃жа, комаад̣̇ибхзд̣̇ам̣ вад̇т̇ан̃жа, г̇осаббид̇илад̇злаад̣̇ибхзд̣̇ам̣ саббид̇злан̃жа яаажияа д̇хаммзна, ‘‘уд̣̇д̣̇исса арияаа д̇идтанд̇и, зсаа арияаана яаажанаа’’д̇и звам̣ вуд̇д̇зна уд̣̇д̣̇иссатаанасан̇каад̇зна д̇хаммзна яаажид̇ваа, ат̇а яо яам̣ ижчад̇и д̣̇аад̇ум̣, д̇зна д̇ам̣ д̣̇иннад̇ан̣д̣улаад̣̇им̣ самод̇хаанзд̇ваа сам̣гад̣дхид̇ваа. ‘‘самуд̣̇аанзд̇ваа’’д̇иби баато, згоязвад̇т̇о. д̇ад̇о яан̃н̃амагаббаяунд̇и д̇ад̇о г̇ахзд̇ваа д̣̇аанамагам̣су .
298. Idāni mariyāde brāhmaṇe dassento āha – ‘‘taṇḍulaṃ sayana’’nti. Tassattho – tesu ye honti mariyādā, te brāhmaṇā sace yaññaṃ kappetukāmā honti, atha āmakadhaññapaṭiggahaṇā paṭiviratattā nānappakārakaṃ taṇḍulañca, mañcapīṭhādibhedaṃ sayanañca, khomādibhedaṃ vatthañca, gosappitilatelādibhedaṃ sappitelañca yāciya dhammena, ‘‘uddissa ariyā tiṭṭhanti, esā ariyāna yācanā’’ti evaṃ vuttena uddissaṭhānasaṅkhātena dhammena yācitvā, atha yo yaṃ icchati dātuṃ, tena taṃ dinnataṇḍulādiṃ samodhānetvā saṃkaḍḍhitvā. ‘‘Samudānetvā’’tipi pāṭho, ekoyevattho. Tato yaññamakappayunti tato gahetvā dānamakaṃsu .
299. гаронд̇аа жа звамзд̇асмим̣ убадтид̇асмим̣ д̣̇аанасан̇каад̇з яан̃н̃асмим̣ наассу г̇ааво ханим̣су д̇з, на д̇з г̇аавияо ханим̣су. г̇аавиймукзна жзд̇т̇а саб̣б̣абаан̣аа вуд̇д̇аад̇и взд̣̇ид̇аб̣б̣аа. гим̣гааран̣аа на ханим̣сууд̇и? б̣рахмажарияаад̣̇иг̇ун̣аяуд̇д̇ад̇д̇аа. абижа висзсад̇о яат̇аа маад̇аа…бз… наассу г̇ааво ханим̣су д̇з. д̇ад̇т̇а яаасу ж̇ааяанд̇и осад̇хаад̇и яаасу бид̇д̇аад̣̇ийнам̣ бхзсаж̇ж̇абхууд̇аа бан̃жа г̇орасаа ж̇ааяанд̇и.
299. Karontā ca evametasmiṃ upaṭṭhitasmiṃ dānasaṅkhāte yaññasmiṃ nāssu gāvo haniṃsu te, na te gāviyo haniṃsu. Gāvīmukhena cettha sabbapāṇā vuttāti veditabbā. Kiṃkāraṇā na haniṃsūti? Brahmacariyādiguṇayuttattā. Apica visesato yathā mātā…pe… nāssu gāvo haniṃsu te. Tattha yāsu jāyanti osadhāti yāsu pittādīnaṃ bhesajjabhūtā pañca gorasā jāyanti.
300. аннад̣̇аад̇иаад̣̇ийсу яасмаа бан̃жа г̇орасз барибхун̃ж̇анд̇аанам̣ куд̣̇аа вуубасаммад̇и, б̣алам̣ вад̣дхад̇и, чавиван̣н̣о виббасийд̣̇ад̇и, гааяигамаанасигам̣ сукам̣ уббаж̇ж̇ад̇и , д̇асмаа аннад̣̇аа б̣алад̣̇аа ван̣н̣ад̣̇аа сукад̣̇аа жзд̇аад̇и взд̣̇ид̇аб̣б̣аа. сзсамзд̇т̇а уд̇д̇аанад̇т̇амзва.
300.Annadātiādīsu yasmā pañca gorase paribhuñjantānaṃ khudā vūpasammati, balaṃ vaḍḍhati, chavivaṇṇo vippasīdati, kāyikamānasikaṃ sukhaṃ uppajjati , tasmā annadā baladā vaṇṇadā sukhadā cetāti veditabbā. Sesamettha uttānatthameva.
301. звам̣ д̇з яан̃н̃зсу г̇ааво ахананд̇аа бун̃н̃аббабхааваануг̇г̇ахид̇асарийраа сукумаалаа…бз… сукамзд̇хид̇т̇а яам̣ баж̇аа. д̇ад̇т̇а сукумаалаа муд̣̇уд̇алун̣ахад̇т̇абаад̣̇аад̣̇ид̇ааяа, махаагааяаа аарохабарин̣аахасамбад̇д̇ияаа, ван̣н̣аванд̇о суван̣н̣аван̣н̣ад̇ааяа сан̣таанаяуд̇д̇ад̇ааяа жа, яасассино лаабхабариваарасамбад̣̇ааяа. сзхи д̇хаммзхийд̇и сагзхи жаарид̇д̇зхи. гижжаагижжзсу уссугаад̇и гижжзсу ‘‘ид̣̇ам̣ гаад̇аб̣б̣ам̣’’, агижжзсу ‘‘ид̣̇ам̣ на гаад̇аб̣б̣а’’нд̇и уссуггамаабаннаа худ̇ваад̇и ад̇т̇о. звам̣ д̇з бораан̣аа б̣раахман̣аа зваруубаа худ̇ваа д̣̇ассанийяаа басаад̣̇анийяаа логасса барамад̣̇агкин̣зяяаа имааяа бадибад̇д̇ияаа яаава логз авад̇д̇им̣су, д̇аава виг̇ад̇аийд̇ибхаяубад̣̇д̣̇аваа худ̇ваа наанаббагаарагам̣ сукам̣ зд̇хид̇т̇а баабун̣и, сукам̣ ваа зд̇хид̇т̇а сукам̣ вуд̣дхим̣ аг̇амааси. аяам̣ баж̇аад̇и сад̇д̇алогам̣ нид̣̇ассзд̇и.
301. Evaṃ te yaññesu gāvo ahanantā puññappabhāvānuggahitasarīrā sukhumālā…pe… sukhamedhittha yaṃ pajā. Tattha sukhumālā mudutaluṇahatthapādāditāya, mahākāyā ārohapariṇāhasampattiyā, vaṇṇavanto suvaṇṇavaṇṇatāya saṇṭhānayuttatāya ca, yasassino lābhaparivārasampadāya. Sehi dhammehīti sakehi cārittehi. Kiccākiccesu ussukāti kiccesu ‘‘idaṃ kātabbaṃ’’, akiccesu ‘‘idaṃ na kātabba’’nti ussukkamāpannā hutvāti attho. Evaṃ te porāṇā brāhmaṇā evarūpā hutvā dassanīyā pasādanīyā lokassa paramadakkhiṇeyyā imāya paṭipattiyā yāva loke avattiṃsu, tāva vigataītibhayupaddavā hutvā nānappakārakaṃ sukhaṃ edhittha pāpuṇi, sukhaṃ vā edhittha sukhaṃ vuḍḍhiṃ agamāsi. Ayaṃ pajāti sattalokaṃ nidasseti.
302-3. гаалажжаязна бана самбхиннамарияаад̣̇абхаавам̣ аабаж̇ж̇ид̇угаамаанам̣ д̇зсам̣ ааси вибаллаасо…бз… бхааг̇асо мид̇з. д̇ад̇т̇а вибаллаасод̇и вибарийд̇асан̃н̃аа. ан̣уд̇о ан̣унд̇и лаамагадтзна барид̇д̇адтзна аббассаад̣̇адтзна ан̣убхууд̇ад̇о гаамаг̇ун̣ад̇о уббаннам̣ жхаанасааман̃н̃аниб̣б̣аанасукаани убанид̇хааяа сан̇кяамби анубаг̇аманзна ан̣ум̣ гаамасукам̣, логуд̇д̇арасукам̣ ваа убанид̇хааяа ан̣убхууд̇ад̇о ад̇д̇анаа бадилад̣̇д̇халогияасамаабад̇д̇исукад̇о ан̣ум̣ аббагад̇оби аббагам̣ гаамасукам̣ д̣̇исваад̇и ад̇хиббааяо. рааж̇ино жаад̇и ран̃н̃о жа. вияаагааранд̇и самбад̇д̇им̣. ааж̇ан̃н̃асам̣яуд̇д̇зд̇и ассааж̇аанийяасам̣яуд̇д̇з. сугад̇зд̇и д̣̇ааругаммалохагаммзна сунидтид̇з. жид̇д̇асиб̣б̣анзд̇и сийхажаммаад̣̇ийхи алан̇гаран̣авасзна жид̇расиб̣б̣анз. нивзсанзд̇и гхаравад̇т̇ууни. нивзсзд̇и д̇ад̇т̇а бад̇идтаабид̇агхараани. вибхад̇д̇зд̇и ааяаамавид̇т̇ааравасзна вибхад̇д̇аани. бхааг̇асо мид̇зд̇и ан̇г̇ан̣ад̣̇ваарабаасаад̣̇агуудааг̇аараад̣̇ивасзна годтаасам̣ годтаасам̣ гад̇ваа мид̇аани. гим̣ вуд̇д̇ам̣ ход̇и? д̇зсам̣ б̣раахман̣аанам̣ ан̣уд̇о ан̣усан̃н̃ид̇ам̣ гаамасукан̃жа ран̃н̃о б̣яаагааран̃жа алан̇гад̇анаарияо жа вуд̇д̇аббагаарз рат̇з жа нивзсанз нивзсз жа д̣̇исваа д̣̇угкзсуязва зд̇зсу вад̇т̇уусу ‘‘сука’’нд̇и бавад̇д̇ад̇д̇аа буб̣б̣з бавад̇д̇анзгкаммасан̃н̃аавибаллаасасан̇каад̇аа вибарийд̇асан̃н̃аа ааси.
302-3. Kālaccayena pana sambhinnamariyādabhāvaṃ āpajjitukāmānaṃ tesaṃ āsi vipallāso…pe… bhāgaso mite. Tattha vipallāsoti viparītasaññā. Aṇuto aṇunti lāmakaṭṭhena parittaṭṭhena appassādaṭṭhena aṇubhūtato kāmaguṇato uppannaṃ jhānasāmaññanibbānasukhāni upanidhāya saṅkhyampi anupagamanena aṇuṃ kāmasukhaṃ, lokuttarasukhaṃ vā upanidhāya aṇubhūtato attanā paṭiladdhalokiyasamāpattisukhato aṇuṃ appakatopi appakaṃ kāmasukhaṃ disvāti adhippāyo. Rājino cāti rañño ca. Viyākāranti sampattiṃ. Ājaññasaṃyutteti assājānīyasaṃyutte. Sukateti dārukammalohakammena suniṭṭhite. Cittasibbaneti sīhacammādīhi alaṅkaraṇavasena citrasibbane. Nivesaneti gharavatthūni. Niveseti tattha patiṭṭhāpitagharāni. Vibhatteti āyāmavitthāravasena vibhattāni. Bhāgaso miteti aṅgaṇadvārapāsādakūṭāgārādivasena koṭṭhāsaṃ koṭṭhāsaṃ katvā mitāni. Kiṃ vuttaṃ hoti? Tesaṃ brāhmaṇānaṃ aṇuto aṇusaññitaṃ kāmasukhañca rañño byākārañca alaṅkatanāriyo ca vuttappakāre rathe ca nivesane nivese ca disvā dukkhesuyeva etesu vatthūsu ‘‘sukha’’nti pavattattā pubbe pavattanekkhammasaññāvipallāsasaṅkhātā viparītasaññā āsi.
304. д̇з звам̣ вибарийд̇асан̃н̃аа худ̇ваа г̇оман̣д̣алабариб̣яуул̣хам̣…бз… б̣раахман̣аа. д̇ад̇т̇а г̇оман̣д̣алабариб̣яуул̣ханд̇и г̇ояуут̇зхи баригин̣н̣ам̣. наарийвараг̇ан̣ааяуд̇анд̇и варанаарийг̇ан̣асам̣яуд̇д̇ам̣. ул̣ааранд̇и вибулам̣ . маанусам̣ бхог̇анд̇и мануссаанам̣ нивзсанаад̣̇ибхог̇авад̇т̇ум̣. абхиж̇жхааяим̣сууд̇и ‘‘ахо вад̇ид̣̇ам̣ амхаагам̣ ассаа’’д̇и д̇ан̣хам̣ вад̣дхзд̇ваа абхибад̇т̇аяамаанаа жхааяим̣су.
304. Te evaṃ viparītasaññā hutvā gomaṇḍalaparibyūḷhaṃ…pe… brāhmaṇā. Tattha gomaṇḍalaparibyūḷhanti goyūthehi parikiṇṇaṃ. Nārīvaragaṇāyutanti varanārīgaṇasaṃyuttaṃ. Uḷāranti vipulaṃ . Mānusaṃ bhoganti manussānaṃ nivesanādibhogavatthuṃ. Abhijjhāyiṃsūti ‘‘aho vatidaṃ amhākaṃ assā’’ti taṇhaṃ vaḍḍhetvā abhipatthayamānā jhāyiṃsu.
305. звам̣ абхиж̇жхааяанд̇аа жа ‘‘зд̇з мануссаа сунхаад̇аа сувилид̇д̇аа габбид̇агзсамассуу аамуд̇д̇аман̣иаабхаран̣аа бан̃жахи гаамаг̇ун̣зхи барижаарзнд̇и, маяам̣ бана звам̣ д̇зхи намассияамаанааби сзд̣̇амалагилидтаг̇ад̇д̇аа баруул̣хагажчанакаломаа бхог̇арахид̇аа барамагаарун̃н̃ад̇ам̣ бад̇д̇аа вихараама. зд̇з жа хад̇т̇игканд̇хаассабидтисивигаасуван̣н̣арат̇аад̣̇ийхи вижаранд̇и, маяам̣ баад̣̇зхи. зд̇з д̣̇вибхуумигаад̣̇ибаасаад̣̇ад̇алзсу васанд̇и, маяам̣ аран̃н̃аругкамуулаад̣̇ийсу. зд̇з жа г̇онагаад̣̇ийхи ад̇т̇аран̣зхи ад̇т̇ад̇аасу варасзяяаасу саяанд̇и, маяам̣ д̇аддигаажаммакан̣д̣аад̣̇ийни ад̇т̇арид̇ваа бхуумияам̣. зд̇з наанаарасаани бхож̇анаани бхун̃ж̇анд̇и, маяам̣ ун̃чаажарияааяа яаабзма. гат̇ам̣ ну ко маяамби зд̇зхи сад̣̇исаа бхавзяяаамаа’’д̇и жинд̇зд̇ваа ‘‘д̇ханам̣ ижчид̇аб̣б̣ам̣, на саггаа д̇ханарахид̇зхи аяам̣ самбад̇д̇и баабун̣ид̇у’’нд̇и жа авад̇хаарзд̇ваа взд̣̇з бхинд̣̇ид̇ваа д̇хаммаяуд̇д̇з бураан̣аманд̇з наасзд̇ваа ад̇хаммаяуд̇д̇з гуудаманд̇з г̇ант̇зд̇ваа д̇ханад̇т̇игаа оггаагарааж̇аанамубасан̇гамма сод̇т̇иважанаад̣̇ийни баяун̃ж̇ид̇ваа ‘‘амхаагам̣, махаарааж̇а, б̣раахман̣авам̣сз бавзн̣ияаа ааг̇ад̇ам̣ бораан̣аманд̇абад̣̇ам̣ ад̇т̇и, д̇ам̣ маяам̣ аажарияамудтид̇ааяа на гассажи бхан̣имхаа, д̇ам̣ махаарааж̇аа сод̇умарахад̇ий’’д̇и жа вад̇ваа ассамзд̇хаад̣̇ияан̃н̃ам̣ ван̣н̣аяим̣су. ван̣н̣аяид̇ваа жа рааж̇аанам̣ уссаахзнд̇аа ‘‘яаж̇а, махаарааж̇а, звам̣ бахууд̇ад̇ханад̇хан̃н̃о д̇вам̣, над̇т̇и д̇з яан̃н̃асамбхааравзгаллам̣, зван̃хи д̇з яаж̇ад̇о сад̇д̇агулабариваддаа саг̇г̇з уббаж̇ж̇иссанд̇ий’’д̇и авожум̣. д̇зна нзсам̣ д̇ам̣ бавад̇д̇им̣ д̣̇ассзнд̇о ааха бхаг̇аваа ‘‘д̇з д̇ад̇т̇а манд̇з…бз… б̣аху д̇з д̇хана’’нд̇и.
305. Evaṃ abhijjhāyantā ca ‘‘ete manussā sunhātā suvilittā kappitakesamassū āmuttamaṇiābharaṇā pañcahi kāmaguṇehi paricārenti, mayaṃ pana evaṃ tehi namassiyamānāpi sedamalakiliṭṭhagattā parūḷhakacchanakhalomā bhogarahitā paramakāruññataṃ pattā viharāma. Ete ca hatthikkhandhaassapiṭṭhisivikāsuvaṇṇarathādīhi vicaranti, mayaṃ pādehi. Ete dvibhūmikādipāsādatalesu vasanti, mayaṃ araññarukkhamūlādīsu. Ete ca gonakādīhi attharaṇehi atthatāsu varaseyyāsu sayanti, mayaṃ taṭṭikācammakhaṇḍādīni attharitvā bhūmiyaṃ. Ete nānārasāni bhojanāni bhuñjanti, mayaṃ uñchācariyāya yāpema. Kathaṃ nu kho mayampi etehi sadisā bhaveyyāmā’’ti cintetvā ‘‘dhanaṃ icchitabbaṃ, na sakkā dhanarahitehi ayaṃ sampatti pāpuṇitu’’nti ca avadhāretvā vede bhinditvā dhammayutte purāṇamante nāsetvā adhammayutte kūṭamante ganthetvā dhanatthikā okkākarājānamupasaṅkamma sotthivacanādīni payuñjitvā ‘‘amhākaṃ, mahārāja, brāhmaṇavaṃse paveṇiyā āgataṃ porāṇamantapadaṃ atthi, taṃ mayaṃ ācariyamuṭṭhitāya na kassaci bhaṇimhā, taṃ mahārājā sotumarahatī’’ti ca vatvā assamedhādiyaññaṃ vaṇṇayiṃsu. Vaṇṇayitvā ca rājānaṃ ussāhentā ‘‘yaja, mahārāja, evaṃ pahūtadhanadhañño tvaṃ, natthi te yaññasambhāravekallaṃ, evañhi te yajato sattakulaparivaṭṭā sagge uppajjissantī’’ti avocuṃ. Tena nesaṃ taṃ pavattiṃ dassento āha bhagavā ‘‘te tattha mante…pe… bahu te dhana’’nti.
д̇ад̇т̇а д̇ад̇т̇аад̇и д̇асмим̣, яам̣ бхог̇амабхиж̇жхааяим̣су, д̇аннимид̇д̇анд̇и вуд̇д̇ам̣ ход̇и. нимид̇д̇ад̇т̇з хи зд̇ам̣ бхуммаважанам̣. д̇ад̣̇убааг̇амунд̇и д̇ад̣̇аа убааг̇амум̣. бахууд̇ад̇ханад̇хан̃н̃осийд̇и бахууд̇ад̇ханад̇хан̃н̃о бхависсаси, абхисамбарааяанд̇и ад̇хиббааяо. аасам̣сааяан̃хи анааг̇ад̇зби вад̇д̇амаанаважанам̣ ижчанд̇и сад̣̇д̣̇аговид̣̇аа. яаж̇ассууд̇и яаж̇аахи. вид̇д̇ам̣ д̇хананд̇и ж̇аад̇аруубаад̣̇ирад̇анамзва вид̇д̇игааран̣ад̇о вид̇д̇ам̣, самид̣̇д̇хигааран̣ад̇о д̇хананд̇и вуд̇д̇ам̣. ат̇а ваа вид̇д̇анд̇и вид̇д̇игааран̣абхууд̇амзва аабхаран̣аад̣̇и убагаран̣ам̣, яам̣ ‘‘бахууд̇авид̇д̇уубагаран̣о’’д̇иаад̣̇ийсу (д̣̇ий. ни. 1.331) ааг̇ажчад̇и. д̇хананд̇и хиран̃н̃асуван̣н̣аад̣̇и. гим̣ вуд̇д̇ам̣ ход̇и? д̇з б̣раахман̣аа манд̇з г̇ант̇зд̇ваа д̇ад̣̇аа оггаагам̣ убааг̇амум̣. гинд̇и? ‘‘махаарааж̇а, б̣ахуу д̇з вид̇д̇ан̃жа д̇ханан̃жа, яаж̇ассу, ааяад̇имби бахууд̇ад̇ханад̇хан̃н̃о бхависсасий’’д̇и.
Tattha tatthāti tasmiṃ, yaṃ bhogamabhijjhāyiṃsu, tannimittanti vuttaṃ hoti. Nimittatthe hi etaṃ bhummavacanaṃ. Tadupāgamunti tadā upāgamuṃ. Pahūtadhanadhaññosīti pahūtadhanadhañño bhavissasi, abhisamparāyanti adhippāyo. Āsaṃsāyañhi anāgatepi vattamānavacanaṃ icchanti saddakovidā. Yajassūti yajāhi. Vittaṃ dhananti jātarūpādiratanameva vittikāraṇato vittaṃ, samiddhikāraṇato dhananti vuttaṃ. Atha vā vittanti vittikāraṇabhūtameva ābharaṇādi upakaraṇaṃ, yaṃ ‘‘pahūtavittūpakaraṇo’’tiādīsu (dī. ni. 1.331) āgacchati. Dhananti hiraññasuvaṇṇādi. Kiṃ vuttaṃ hoti? Te brāhmaṇā mante ganthetvā tadā okkākaṃ upāgamuṃ. Kinti? ‘‘Mahārāja, bahū te vittañca dhanañca, yajassu, āyatimpi pahūtadhanadhañño bhavissasī’’ti.
306. звам̣ гааран̣ам̣ вад̇ваа сан̃н̃аабзнд̇зхи д̇ад̇о жа рааж̇аа…бз… ад̣̇аа д̇ханам̣. д̇ад̇т̇а сан̃н̃ад̇д̇од̇и н̃аабид̇о. рат̇зсабход̇и махаарат̇зсу кад̇д̇иязсу агамбияадтзна усабхасад̣̇исо. ‘‘ассамзд̇ха’’нд̇иаад̣̇ийсу ассамзд̇т̇а мзд̇ханд̇ийд̇и ассамзд̇хо, д̣̇вийхи барияан̃н̃зхи яаж̇ид̇аб̣б̣асса згавийсад̇ияуубасса табзд̇ваа бхуумин̃жа бурисз жа авасзсасаб̣б̣авибхавад̣̇агкин̣асса яан̃н̃ассзд̇ам̣ ад̇хиважанам̣. бурисамзд̇т̇а мзд̇ханд̇ийд̇и бурисамзд̇хо, жад̇уухи барияан̃н̃зхи яаж̇ид̇аб̣б̣асса сад̣̇д̇хим̣ бхуумияаа ассамзд̇хз вуд̇д̇авибхавад̣̇агкин̣асса яан̃н̃ассзд̇ам̣ ад̇хиважанам̣. саммамзд̇т̇а баасанд̇ийд̇и саммаабаасо, д̣̇ивасз д̣̇ивасз саммам̣ кибид̇ваа д̇асса бад̇ид̇огаасз взд̣̇им̣ гад̇ваа сам̣хааримзхи яуубаад̣̇ийхи сарассад̇инад̣̇ияаа нимуг̇г̇огаасад̇о бабхуд̇и бадиломам̣ г̇ажчанд̇зна яаж̇ид̇аб̣б̣асса сад̇раяааг̇ассзд̇ам̣ ад̇хиважанам̣. вааж̇амзд̇т̇а биванд̇ийд̇и вааж̇абзяяо. згзна барияан̃н̃зна сад̇д̇арасахи басуухи яаж̇ид̇аб̣б̣асса б̣злуваяуубасса сад̇д̇арасагад̣̇агкин̣асса яан̃н̃ассзд̇ам̣ ад̇хиважанам̣. над̇т̇и зд̇т̇а аг̇г̇ал̣аад̇и нираг̇г̇ал̣о, навахи барияан̃н̃зхи яаж̇ид̇аб̣б̣асса сад̣̇д̇хим̣ бхуумияаа жа бурисзхи жа ассамзд̇хз вуд̇д̇авибхавад̣̇агкин̣асса саб̣б̣амзд̇хабарияааяанаамасса ассамзд̇хавигаббассзд̇ам̣ ад̇хиважанам̣. сзсамзд̇т̇а баагадамзва.
306. Evaṃ kāraṇaṃ vatvā saññāpentehi tato ca rājā…pe… adā dhanaṃ. Tattha saññattoti ñāpito. Rathesabhoti mahārathesu khattiyesu akampiyaṭṭhena usabhasadiso. ‘‘Assamedha’’ntiādīsu assamettha medhantīti assamedho, dvīhi pariyaññehi yajitabbassa ekavīsatiyūpassa ṭhapetvā bhūmiñca purise ca avasesasabbavibhavadakkhiṇassa yaññassetaṃ adhivacanaṃ. Purisamettha medhantīti purisamedho, catūhi pariyaññehi yajitabbassa saddhiṃ bhūmiyā assamedhe vuttavibhavadakkhiṇassa yaññassetaṃ adhivacanaṃ. Sammamettha pāsantīti sammāpāso, divase divase sammaṃ khipitvā tassa patitokāse vediṃ katvā saṃhārimehi yūpādīhi sarassatinadiyā nimuggokāsato pabhuti paṭilomaṃ gacchantena yajitabbassa satrayāgassetaṃ adhivacanaṃ. Vājamettha pivantīti vājapeyyo. Ekena pariyaññena sattarasahi pasūhi yajitabbassa beluvayūpassa sattarasakadakkhiṇassa yaññassetaṃ adhivacanaṃ. Natthi ettha aggaḷāti niraggaḷo, navahi pariyaññehi yajitabbassa saddhiṃ bhūmiyā ca purisehi ca assamedhe vuttavibhavadakkhiṇassa sabbamedhapariyāyanāmassa assamedhavikappassetaṃ adhivacanaṃ. Sesamettha pākaṭameva.
307-8. ид̣̇аани яам̣ вуд̇д̇ам̣ ‘‘б̣раахман̣аанамад̣̇аа д̇хана’’нд̇и, д̇ам̣ д̣̇ассзнд̇о ‘‘г̇ааво саяанан̃жаа’’д̇и г̇аат̇аад̣̇ваяамааха. со хи рааж̇аа ‘‘д̣̇ийгхарад̇д̇ам̣ луукаахаарзна гиланд̇аа бан̃жа г̇орасз барибхун̃ж̇анд̇уу’’д̇и нзсам̣ сабун̇г̇аваани г̇ояуут̇аанзва ад̣̇ааси, д̇ат̇аа ‘‘д̣̇ийгхарад̇д̇ам̣ т̇ан̣д̣иласааяид̇ааяа т̇ууласаадаганиваасанзна згасзяяааяа баад̣̇ажаарзна ругкамуулаад̣̇иваасзна жа гиланд̇аа г̇онагаад̣̇иад̇т̇ад̇аварасаяанаад̣̇ийсу сукам̣ анубхонд̇уу’’д̇и нзсам̣ махаг̇гхаани саяанаад̣̇ийни жа ад̣̇ааси. звамзд̇ам̣ наанаббагаарагам̣ ан̃н̃ан̃жа хиран̃н̃асуван̣н̣аад̣̇ид̇ханам̣ ад̣̇ааси. д̇знааха бхаг̇аваа – ‘‘г̇ааво саяанан̃жа вад̇т̇ан̃жа…бз… б̣раахман̣аанамад̣̇аа д̇хана’’нд̇и.
307-8. Idāni yaṃ vuttaṃ ‘‘brāhmaṇānamadā dhana’’nti, taṃ dassento ‘‘gāvo sayanañcā’’ti gāthādvayamāha. So hi rājā ‘‘dīgharattaṃ lūkhāhārena kilantā pañca gorase paribhuñjantū’’ti nesaṃ sapuṅgavāni goyūthāneva adāsi, tathā ‘‘dīgharattaṃ thaṇḍilasāyitāya thūlasāṭakanivāsanena ekaseyyāya pādacārena rukkhamūlādivāsena ca kilantā gonakādiatthatavarasayanādīsu sukhaṃ anubhontū’’ti nesaṃ mahagghāni sayanādīni ca adāsi. Evametaṃ nānappakārakaṃ aññañca hiraññasuvaṇṇādidhanaṃ adāsi. Tenāha bhagavā – ‘‘gāvo sayanañca vatthañca…pe… brāhmaṇānamadā dhana’’nti.
309-10. звам̣ д̇асса ран̃н̃о санд̇игаа д̇з жа д̇ад̇т̇а…бз… буна мубааг̇амум̣. гим̣ вуд̇д̇ам̣ ход̇и? д̇асса ран̃н̃о санд̇игаа д̇з б̣раахман̣аа д̇зсу яааг̇зсу д̇ханам̣ лабхид̇ваа д̣̇ийгхарад̇д̇ам̣ д̣̇ивасз д̣̇ивасз звамзва гхаасажчаад̣̇анам̣ бариязсид̇ваа наанаббагаарагам̣ вад̇т̇угаама саннид̇хим̣ самарожаяум̣. д̇ад̇о д̇зсам̣ ижчаавад̇ин̣н̣аанам̣ кийраад̣̇ибан̃жаг̇орасассаад̣̇авасзна расад̇ан̣хааяа од̇ин̣н̣ажид̇д̇аанам̣ ‘‘кийраад̣̇ийниби д̇аава г̇уннам̣ саад̣̇ууни, ад̣̇д̇хаа имаасам̣ мам̣сам̣ саад̣̇уд̇арам̣ бхависсад̇ий’’д̇и звам̣ мам̣сам̣ бадижжа бхияяо д̇ан̣хаа бавад̣дхат̇а. д̇ад̇о жинд̇зсум̣ – ‘‘сажз маяам̣ маарзд̇ваа каад̣̇иссаама, г̇аараяхаа бхависсаама, яам̣нууна манд̇з г̇ант̇зяяаамаа’’д̇и. ат̇а бунаби взд̣̇ам̣ бхинд̣̇ид̇ваа д̇ад̣̇ануруубз д̇з д̇ад̇т̇а манд̇з г̇ант̇зд̇ваа д̇з б̣раахман̣аа д̇аннимид̇д̇ам̣ гуудаманд̇з г̇ант̇зд̇ваа оггаагарааж̇аанам̣ буна убааг̇амим̣су. имамад̇т̇ам̣ бхаасамаанаа ‘‘яат̇аа аабо жа…бз… б̣аху д̇з д̇хана’’нд̇и.
309-10. Evaṃ tassa rañño santikā te ca tattha…pe… puna mupāgamuṃ. Kiṃ vuttaṃ hoti? Tassa rañño santikā te brāhmaṇā tesu yāgesu dhanaṃ labhitvā dīgharattaṃ divase divase evameva ghāsacchādanaṃ pariyesitvā nānappakārakaṃ vatthukāma sannidhiṃsamarocayuṃ. Tato tesaṃ icchāvatiṇṇānaṃ khīrādipañcagorasassādavasena rasataṇhāya otiṇṇacittānaṃ ‘‘khīrādīnipi tāva gunnaṃ sādūni, addhā imāsaṃ maṃsaṃ sādutaraṃ bhavissatī’’ti evaṃ maṃsaṃ paṭicca bhiyyo taṇhā pavaḍḍhatha. Tato cintesuṃ – ‘‘sace mayaṃ māretvā khādissāma, gārayhā bhavissāma, yaṃnūna mante gantheyyāmā’’ti. Atha punapi vedaṃ bhinditvā tadanurūpe te tattha mante ganthetvā te brāhmaṇā tannimittaṃ kūṭamante ganthetvā okkākarājānaṃ puna upāgamiṃsu. Imamatthaṃ bhāsamānā ‘‘yathā āpo ca…pe… bahu te dhana’’nti.
гим̣ вуд̇д̇ам̣ ход̇и? амхаагам̣, махаарааж̇а, манд̇зсу зд̇ад̣̇ааг̇ад̇ам̣ яат̇аа аабо хад̇т̇ад̇хованаад̣̇исаб̣б̣агижжзсу баан̣ийнам̣ убаяог̇ам̣ г̇ажчад̇и, над̇т̇и д̇зсам̣ д̇ад̇онид̣̇аанам̣ баабам̣. гасмаа? яасмаа баригкааро со хи баан̣инам̣, убагаран̣ад̇т̇ааяа уббаннод̇и ад̇хиббааяо. яат̇аа жааяам̣ махаабат̇авий г̇аманадтаанаад̣̇исаб̣б̣агижжзсу гахаабан̣асан̇каад̇ам̣ хиран̃н̃ам̣ суван̣н̣араж̇ад̇аад̣̇ибхзд̣̇ам̣ д̇ханам̣, яаваг̇од̇хуумаад̣̇ибхзд̣̇ам̣ д̇хаанияан̃жа, сам̣вохаараад̣̇исаб̣б̣агижжзсу убаяог̇ам̣ г̇ажчад̇и, звам̣ г̇ааво мануссаанам̣ саб̣б̣агижжзсу убаяог̇аг̇аманад̇т̇ааяа уббаннаа. д̇асмаа зд̇аа ханид̇ваа наанаббагаарагз яааг̇з яаж̇ассу б̣аху д̇з вид̇д̇ам̣, яаж̇ассу б̣аху д̇з д̇хананд̇и.
Kiṃ vuttaṃ hoti? Amhākaṃ, mahārāja, mantesu etadāgataṃ yathā āpo hatthadhovanādisabbakiccesu pāṇīnaṃ upayogaṃ gacchati, natthi tesaṃ tatonidānaṃ pāpaṃ. Kasmā? Yasmā parikkhāro so hi pāṇinaṃ, upakaraṇatthāya uppannoti adhippāyo. Yathā cāyaṃ mahāpathavī gamanaṭṭhānādisabbakiccesu kahāpaṇasaṅkhātaṃ hiraññaṃ suvaṇṇarajatādibhedaṃ dhanaṃ, yavagodhūmādibhedaṃ dhāniyañca, saṃvohārādisabbakiccesu upayogaṃ gacchati, evaṃ gāvo manussānaṃ sabbakiccesu upayogagamanatthāya uppannā. Tasmā etā hanitvā nānappakārake yāge yajassu bahu te vittaṃ, yajassu bahu te dhananti.
311-12. звам̣ буриманаязнзва д̇ад̇о жа рааж̇аа…бз… агхаад̇аяи, яам̣ д̇ад̇о буб̣б̣з ган̃жи сад̇д̇ам̣ на баад̣̇аа…бз… гхаад̇аяи. д̇ад̣̇аа гира б̣раахман̣аа яан̃н̃ааваадам̣ г̇аавийнам̣ буурзд̇ваа ман̇г̇алаусабхам̣ б̣анд̇хид̇ваа ран̃н̃о муулам̣ нзд̇ваа ‘‘махаарааж̇а, г̇омзд̇хаяан̃н̃ам̣ яаж̇ассу, звам̣ д̇з б̣рахмалогасса маг̇г̇о висуд̣̇д̇хо бхависсад̇ий’’д̇и аахам̣су. рааж̇аа гад̇аман̇г̇алагижжо каг̇г̇ам̣ г̇ахзд̇ваа бун̇г̇авзна саха анзгасад̇асахассаа г̇ааво маарзси. б̣раахман̣аа яан̃н̃ааваадз мам̣саани чинд̣̇ид̇ваа каад̣̇им̣су, бийд̇агод̣̇аад̇арад̇д̇агамб̣алз жа баарубид̇ваа маарзсум̣. д̇ад̣̇убаад̣̇ааяа гира г̇ааво бааруд̇з д̣̇исваа уб̣б̣иж̇ж̇анд̇и. д̇знааха бхаг̇аваа – ‘‘на баад̣̇аа…бз… гхаад̇аяий’’д̇и.
311-12. Evaṃ purimanayeneva tato ca rājā…pe… aghātayi, yaṃ tato pubbe kañci sattaṃ na pādā…pe… ghātayi. Tadā kira brāhmaṇā yaññāvāṭaṃ gāvīnaṃ pūretvā maṅgalausabhaṃ bandhitvā rañño mūlaṃ netvā ‘‘mahārāja, gomedhayaññaṃ yajassu, evaṃ te brahmalokassa maggo visuddho bhavissatī’’ti āhaṃsu. Rājā katamaṅgalakicco khaggaṃ gahetvā puṅgavena saha anekasatasahassā gāvo māresi. Brāhmaṇā yaññāvāṭe maṃsāni chinditvā khādiṃsu, pītakodātarattakambale ca pārupitvā māresuṃ. Tadupādāya kira gāvo pārute disvā ubbijjanti. Tenāha bhagavā – ‘‘na pādā…pe… ghātayī’’ti.
313. д̇ад̇о д̣̇зваад̇и звам̣ д̇асмим̣ рааж̇ини г̇аавияо гхаад̇зд̇умаарад̣̇д̇хз ат̇а д̇ад̣̇ананд̇арамзва д̇ам̣ г̇огхаад̇агам̣ д̣̇исваа зд̇з жаад̇умахаарааж̇игаад̣̇аяо д̣̇зваа жа, бид̇арод̇и б̣раахман̣зсу лад̣̇д̇хавохаараа б̣рахмаано жа, сагго д̣̇зваанаминд̣̇о жа, баб̣б̣ад̇абаад̣̇аниваасино д̣̇аанаваяагкасан̃н̃ид̇аа асурарагкасаа жа ‘‘ад̇хаммо ад̇хаммо’’д̇и звам̣ ваажам̣ нижчаарзнд̇аа ‘‘д̇хи мануссаа, д̇хи мануссаа’’д̇и жа вад̣̇анд̇аа багганд̣̇ум̣. звам̣ бхуумид̇о бабхуд̇и со сад̣̇д̣̇о мухуд̇д̇зна яаава б̣рахмалогаа аг̇амааси, згад̇хиггаарабарибун̣н̣о лого ахоси. гим̣ гааран̣ам̣? яам̣ сад̇т̇ам̣ нибад̇ий г̇авз, яасмаа г̇аавимхи сад̇т̇ам̣ нибад̇ийд̇и вуд̇д̇ам̣ ход̇и.
313.Tato devāti evaṃ tasmiṃ rājini gāviyo ghātetumāraddhe atha tadanantarameva taṃ goghātakaṃ disvā ete cātumahārājikādayo devā ca, pitaroti brāhmaṇesu laddhavohārā brahmāno ca, sakko devānamindo ca, pabbatapādanivāsino dānavayakkhasaññitā asurarakkhasā ca ‘‘adhammo adhammo’’ti evaṃ vācaṃ nicchārentā ‘‘dhi manussā, dhi manussā’’ti ca vadantā pakkanduṃ. Evaṃ bhūmito pabhuti so saddo muhuttena yāva brahmalokā agamāsi, ekadhikkāraparipuṇṇo loko ahosi. Kiṃ kāraṇaṃ? Yaṃ satthaṃ nipatī gave, yasmā gāvimhi satthaṃ nipatīti vuttaṃ hoti.
314. на гзвалан̃жа д̣̇зваад̣̇аяо багганд̣̇ум̣, аяаман̃н̃оби логз анад̇т̇о уд̣̇абаад̣̇и – яз хи д̇з д̇аяо рог̇аа бурз аасум̣, ижчаа анасанам̣ ж̇араа, гин̃жи гин̃жид̣̇зва бад̇т̇анад̇ан̣хаа жа куд̣̇аа жа барибаагаж̇араа жаад̇и вуд̇д̇ам̣ ход̇и. д̇з басуунан̃жа самаарамбхаа, адтаанавуд̇имааг̇амум̣, жагкурог̇аад̣̇инаа бхзд̣̇зна адтанавуд̇ибхаавам̣ баабун̣им̣сууд̇и ад̇т̇о.
314. Na kevalañca devādayo pakkanduṃ, ayamaññopi loke anattho udapādi – ye hi te tayo rogā pure āsuṃ, icchā anasanaṃ jarā, kiñci kiñcideva patthanataṇhā ca khudā ca paripākajarā cāti vuttaṃ hoti. Te pasūnañca samārambhā, aṭṭhānavutimāgamuṃ, cakkhurogādinā bhedena aṭṭhanavutibhāvaṃ pāpuṇiṃsūti attho.
315. ид̣̇аани бхаг̇аваа д̇ам̣ басусамаарамбхам̣ нинд̣̇анд̇о ааха ‘‘зсо ад̇хаммо’’д̇и. д̇ассад̇т̇о зсо басусамаарамбхасан̇каад̇о гааяад̣̇ан̣д̣аад̣̇ийнам̣ д̇ин̣н̣ам̣ д̣̇ан̣д̣аанам̣ ан̃н̃ад̇арад̣̇ан̣д̣абхууд̇о д̇хаммад̇о абзд̇ад̇д̇аа ад̇хаммо огганд̇о аху, бавад̇д̇о ааси, со жа ко д̇ад̇о бабхуд̇и бавад̇д̇ад̇д̇аа бураан̣о, яасса оггаманад̇о бабхуд̇и гзнажи баад̣̇аад̣̇инаа ахим̣санад̇о ад̣̇уусигааяо г̇ааво хан̃н̃анд̇и. яаа гхаад̇знд̇аа д̇хаммаа д̇хам̣санд̇и жаванд̇и барихааяанд̇и яааж̇агаа яан̃н̃аяааж̇ино ж̇анаад̇и.
315. Idāni bhagavā taṃ pasusamārambhaṃ nindanto āha ‘‘eso adhammo’’ti. Tassattho eso pasusamārambhasaṅkhāto kāyadaṇḍādīnaṃ tiṇṇaṃ daṇḍānaṃ aññataradaṇḍabhūto dhammato apetattā adhammo okkanto ahu, pavatto āsi, so ca kho tato pabhuti pavattattā purāṇo, yassa okkamanato pabhuti kenaci pādādinā ahiṃsanato adūsikāyo gāvo haññanti. Yā ghātentā dhammā dhaṃsanti cavanti parihāyanti yājakā yaññayājino janāti.
316. звамзсо ан̣уд̇хаммод̇и звам̣ зсо лаамагад̇хаммо хийнад̇хаммо, ад̇хаммод̇и вуд̇д̇ам̣ ход̇и. яасмаа ваа зд̇т̇а д̣̇аанад̇хаммоби аббаго ад̇т̇и , д̇асмаа д̇ам̣ санд̇хааяааха ‘‘ан̣уд̇хаммо’’д̇и. бораан̣од̇и д̇аава жирагаалад̇о бабхуд̇и бавад̇д̇ад̇д̇аа бораан̣о. вин̃н̃уухи бана г̇арахид̇ад̇д̇аа вин̃н̃ууг̇арахид̇од̇и взд̣̇ид̇аб̣б̣о. яасмаа жа вин̃н̃уг̇арахид̇о, д̇асмаа яад̇т̇а зд̣̇исагам̣ бассад̇и, яааж̇агам̣ г̇арахад̇ий ж̇ано. гат̇ам̣? ‘‘аб̣б̣уд̣̇ам̣ б̣раахман̣зхи уббаад̣̇ид̇ам̣, г̇ааво вад̇хид̇ваа мам̣сам̣ каад̣̇анд̇ий’’д̇и звамаад̣̇ийни вад̇ваад̇и аяамзд̇т̇а ануссаво.
316.Evameso aṇudhammoti evaṃ eso lāmakadhammo hīnadhammo, adhammoti vuttaṃ hoti. Yasmā vā ettha dānadhammopi appako atthi , tasmā taṃ sandhāyāha ‘‘aṇudhammo’’ti. Porāṇoti tāva cirakālato pabhuti pavattattā porāṇo. Viññūhi pana garahitattā viññūgarahitoti veditabbo. Yasmā ca viññugarahito, tasmā yattha edisakaṃ passati, yājakaṃ garahatī jano. Kathaṃ? ‘‘Abbudaṃ brāhmaṇehi uppāditaṃ, gāvo vadhitvā maṃsaṃ khādantī’’ti evamādīni vatvāti ayamettha anussavo.
317. звам̣ д̇хаммз вияаабаннзд̇и звам̣ бораан̣з б̣раахман̣ад̇хаммз надтз. ‘‘вияаавад̇д̇з’’д̇иби баато, вибаривад̇д̇ид̇ваа ан̃н̃ат̇аа бхууд̇зд̇и ад̇т̇о. вибхиннаа суд̣̇д̣̇авзссигаад̇и буб̣б̣з самаг̇г̇аа вихаранд̇аа суд̣̇д̣̇аа жа взссаа жа д̇з вибхиннаа. бут̇уу вибхиннаа кад̇д̇ияаад̇и кад̇д̇ияааби б̣ахуу ан̃н̃аман̃н̃ам̣ бхиннаа. бад̇им̣ бхарияааваман̃н̃ат̇аад̇и бхарияаа жа гхарааваасад̇т̇ам̣ иссарияаб̣алз табид̇аа буд̇д̇аб̣алаад̣̇ийхи убзд̇аа худ̇ваа бад̇им̣ аваман̃н̃ат̇а, барибхави аваман̃н̃и на саггажжам̣ убадтааси.
317.Evaṃ dhamme viyāpanneti evaṃ porāṇe brāhmaṇadhamme naṭṭhe. ‘‘Viyāvatte’’tipi pāṭho, viparivattitvā aññathā bhūteti attho. Vibhinnā suddavessikāti pubbe samaggā viharantā suddā ca vessā ca te vibhinnā. Puthū vibhinnā khattiyāti khattiyāpi bahū aññamaññaṃ bhinnā. Patiṃ bhariyāvamaññathāti bhariyā ca gharāvāsatthaṃ issariyabale ṭhapitā puttabalādīhi upetā hutvā patiṃ avamaññatha, paribhavi avamaññi na sakkaccaṃ upaṭṭhāsi.
318. звам̣ ан̃н̃аман̃н̃ам̣ вибхиннаа самаанаа кад̇д̇ияаа б̣рахмаб̣анд̇хуу жа…бз… гаамаанам̣ васаманваг̇унд̇и. кад̇д̇ияаа жа б̣раахман̣аа жа яз жан̃н̃з взссасуд̣̇д̣̇аа яат̇аа сан̇гарам̣ наабаж̇ж̇анд̇и, звам̣ ад̇д̇ано ад̇д̇ано г̇од̇д̇зна рагкид̇ад̇д̇аа г̇од̇д̇арагкид̇аа. д̇з саб̣б̣зби д̇ам̣ ж̇аад̇иваад̣̇ам̣ нирам̣гад̇ваа, ‘‘ахам̣ кад̇д̇ияо, ахам̣ б̣раахман̣о’’д̇и зд̇ам̣ саб̣б̣амби наасзд̇ваа бан̃жагаамаг̇ун̣асан̇каад̇аанам̣ гаамаанам̣ васам̣ анваг̇ум̣ аасад̇д̇ам̣ баабун̣им̣су, гаамахзд̇у на гин̃жи агад̇д̇аб̣б̣ам̣ наагам̣сууд̇и вуд̇д̇ам̣ ход̇и.
318. Evaṃ aññamaññaṃ vibhinnā samānā khattiyā brahmabandhū ca…pe… kāmānaṃ vasamanvagunti. Khattiyā ca brāhmaṇā ca ye caññe vessasuddā yathā saṅkaraṃ nāpajjanti, evaṃ attano attano gottena rakkhitattā gottarakkhitā. Te sabbepi taṃ jātivādaṃ niraṃkatvā, ‘‘ahaṃ khattiyo, ahaṃ brāhmaṇo’’ti etaṃ sabbampi nāsetvā pañcakāmaguṇasaṅkhātānaṃ kāmānaṃ vasaṃ anvaguṃ āsattaṃ pāpuṇiṃsu, kāmahetu na kiñci akattabbaṃ nākaṃsūti vuttaṃ hoti.
звамзд̇т̇а бхаг̇аваа ‘‘исаяо буб̣б̣агаа’’д̇иаад̣̇ийхи навахи г̇аат̇аахи бораан̣аанам̣ б̣раахман̣аанам̣ ван̣н̣ам̣ бхаасид̇ваа ‘‘яо нзсам̣ барамо’’д̇и г̇аат̇ааяа б̣рахмасамам̣, ‘‘д̇асса вад̇д̇аманусигканд̇аа’’д̇и г̇аат̇ааяа д̣̇звасамам̣, ‘‘д̇ан̣д̣улам̣ саяана’’нд̇иаад̣̇игаахи жад̇уухи г̇аат̇аахи марияаад̣̇ам̣, ‘‘д̇зсам̣ ааси вибаллаасо’’д̇иаад̣̇ийхи сад̇д̇арасахи г̇аат̇аахи самбхиннамарияаад̣̇ам̣, д̇асса виббадибад̇д̇ияаа д̣̇зваад̣̇ийнам̣ багганд̣̇анаад̣̇ид̣̇ийбанад̇т̇ан̃жа д̣̇ассзд̇ваа д̣̇зсанам̣ нидтаабзси. б̣раахман̣ажан̣д̣аало бана ид̇ха авуд̇д̇оязва. гасмаа? яасмаа вибад̇д̇ияаа агааран̣ам̣. б̣раахман̣ад̇хаммасамбад̇д̇ияаа хи б̣рахмасамад̣̇звасамамарияаад̣̇аа гааран̣ам̣ хонд̇и, вибад̇д̇ияаа самбхиннамарияаад̣̇о. аяам̣ бана д̣̇он̣асуд̇д̇з (а. ни. 5.192) вуд̇д̇аббагааро б̣раахман̣ажан̣д̣аало б̣раахман̣ад̇хаммавибад̇д̇ияааби агааран̣ам̣. гасмаа? вибаннз д̇хаммз уббаннад̇д̇аа. д̇асмаа д̇ам̣ ад̣̇ассзд̇ваава д̣̇зсанам̣ нидтаабзси. зд̇арахи бана соби б̣раахман̣ажан̣д̣аало д̣̇уллабхо. звамаяам̣ б̣раахман̣аанам̣ д̇хаммо винадто. д̇знзвааха д̣̇он̣о б̣раахман̣о – ‘‘звам̣ санд̇з маяам̣, бхо г̇од̇ама, б̣раахман̣ажан̣д̣ааламби на буурзмаа’’д̇и. сзсамзд̇т̇а вуд̇д̇анаяамзва.
Evamettha bhagavā ‘‘isayo pubbakā’’tiādīhi navahi gāthāhi porāṇānaṃ brāhmaṇānaṃ vaṇṇaṃ bhāsitvā ‘‘yo nesaṃ paramo’’ti gāthāya brahmasamaṃ, ‘‘tassa vattamanusikkhantā’’ti gāthāya devasamaṃ, ‘‘taṇḍulaṃ sayana’’ntiādikāhi catūhi gāthāhi mariyādaṃ, ‘‘tesaṃ āsi vipallāso’’tiādīhi sattarasahi gāthāhi sambhinnamariyādaṃ, tassa vippaṭipattiyā devādīnaṃ pakkandanādidīpanatthañca dassetvā desanaṃ niṭṭhāpesi. Brāhmaṇacaṇḍālo pana idha avuttoyeva. Kasmā? Yasmā vipattiyā akāraṇaṃ. Brāhmaṇadhammasampattiyā hi brahmasamadevasamamariyādā kāraṇaṃ honti, vipattiyā sambhinnamariyādo. Ayaṃ pana doṇasutte (a. ni. 5.192) vuttappakāro brāhmaṇacaṇḍālo brāhmaṇadhammavipattiyāpi akāraṇaṃ. Kasmā? Vipanne dhamme uppannattā. Tasmā taṃ adassetvāva desanaṃ niṭṭhāpesi. Etarahi pana sopi brāhmaṇacaṇḍālo dullabho. Evamayaṃ brāhmaṇānaṃ dhammo vinaṭṭho. Tenevāha doṇo brāhmaṇo – ‘‘evaṃ sante mayaṃ, bho gotama, brāhmaṇacaṇḍālampi na pūremā’’ti. Sesamettha vuttanayameva.
барамад̇т̇аж̇од̇игааяа куд̣̇д̣̇ага-адтагат̇ааяа
Paramatthajotikāya khuddaka-aṭṭhakathāya
суд̇д̇анибаад̇а-адтагат̇ааяа б̣раахман̣ад̇хаммигасуд̇д̇аван̣н̣анаа нидтид̇аа.
Suttanipāta-aṭṭhakathāya brāhmaṇadhammikasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / суд̇д̇анибаад̇абаал̣и • Suttanipātapāḷi / 7. б̣раахман̣ад̇хаммигасуд̇д̇ам̣ • 7. Brāhmaṇadhammikasuttaṃ
