| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
5. බ්‍රාහ්‌මණසච්‌චසුත්‌තං
5. Brāhmaṇasaccasuttaṃ
185. එකං සමයං භගවා රාජගහෙ විහරති ගිජ්‌ඣකූටෙ පබ්‌බතෙ. තෙන ඛො පන සමයෙන සම්‌බහුලා අභිඤ්‌ඤාතා අභිඤ්‌ඤාතා පරිබ්‌බාජකා සිප්‌පිනිකාතීරෙ පරිබ්‌බාජකාරාමෙ පටිවසන්‌ති, සෙය්‍යථිදං අන්‌නභාරො වරධරො සකුලුදායී ච පරිබ්‌බාජකො අඤ්‌ඤෙ ච අභිඤ්‌ඤාතා අභිඤ්‌ඤාතා පරිබ්‌බාජකා. අථ ඛො භගවා සායන්‌හසමයං පටිසල්‌ලානා වුට්‌ඨිතො යෙන සිප්‌පිනිකාතීරෙ පරිබ්‌බාජකාරාමො තෙනුපසඞ්‌කමි.
185. Ekaṃ samayaṃ bhagavā rājagahe viharati gijjhakūṭe pabbate. Tena kho pana samayena sambahulā abhiññātā abhiññātā paribbājakā sippinikātīre paribbājakārāme paṭivasanti, seyyathidaṃ annabhāro varadharo sakuludāyī ca paribbājako aññe ca abhiññātā abhiññātā paribbājakā. Atha kho bhagavā sāyanhasamayaṃ paṭisallānā vuṭṭhito yena sippinikātīre paribbājakārāmo tenupasaṅkami.
තෙන ඛො පන සමයෙන තෙසං අඤ්‌ඤතිත්‌ථියානං පරිබ්‌බාජකානං සන්‌නිසින්‌නානං සන්‌නිපතිතානං අයමන්‌තරා කථා උදපාදි – ‘‘ඉතිපි බ්‍රාහ්‌මණසච්‌චානි, ඉතිපි බ්‍රාහ්‌මණසච්‌චානී’’ති. අථ ඛො භගවා යෙන තෙ පරිබ්‌බාජකා තෙනුපසඞ්‌කමි; උපසඞ්‌කමිත්‌වා පඤ්‌ඤත්‌තෙ ආසනෙ නිසීදි. නිසජ්‌ජ ඛො භගවා තෙ පරිබ්‌බාජකෙ එතදවොච –
Tena kho pana samayena tesaṃ aññatitthiyānaṃ paribbājakānaṃ sannisinnānaṃ sannipatitānaṃ ayamantarā kathā udapādi – ‘‘itipi brāhmaṇasaccāni, itipi brāhmaṇasaccānī’’ti. Atha kho bhagavā yena te paribbājakā tenupasaṅkami; upasaṅkamitvā paññatte āsane nisīdi. Nisajja kho bhagavā te paribbājake etadavoca –
‘‘කාය නුත්‌ථ, පරිබ්‌බාජකා, එතරහි කථාය සන්‌නිසින්‌නා, කා ච පන වො අන්‌තරාකථා විප්‌පකතා’’ති? ‘‘ඉධ, භො ගොතම, අම්‌හාකං සන්‌නිසින්‌නානං සන්‌නිපතිතානං අයමන්‌තරාකථා උදපාදි – ‘ඉතිපි බ්‍රාහ්‌මණසච්‌චානි, ඉතිපි බ්‍රාහ්‌මණසච්‌චානී’’’ති.
‘‘Kāya nuttha, paribbājakā, etarahi kathāya sannisinnā, kā ca pana vo antarākathā vippakatā’’ti? ‘‘Idha, bho gotama, amhākaṃ sannisinnānaṃ sannipatitānaṃ ayamantarākathā udapādi – ‘itipi brāhmaṇasaccāni, itipi brāhmaṇasaccānī’’’ti.
‘‘චත්‌තාරිමානි, පරිබ්‌බාජකා, බ්‍රාහ්‌මණසච්‌චානි මයා සයං අභිඤ්‌ඤා සච්‌ඡිකත්‌වා පවෙදිතානි. කතමානි චත්‌තාරි? ඉධ, පරිබ්‌බාජකා, බ්‍රාහ්‌මණො එවමාහ – ‘සබ්‌බෙ පාණා අවජ්‌ඣා’ති . ඉති වදං බ්‍රාහ්‌මණො සච්‌චං ආහ, නො මුසා. සො තෙන න සමණොති මඤ්‌ඤති, න බ්‍රාහ්‌මණොති මඤ්‌ඤති, න සෙය්‍යොහමස්‌මීති මඤ්‌ඤති, න සදිසොහමස්‌මීති මඤ්‌ඤති, න හීනොහමස්‌මීති මඤ්‌ඤති. අපි ච යදෙව තත්‌ථ සච්‌චං තදභිඤ්‌ඤාය පාණානංයෙව අනුද්‌දයාය 1 අනුකම්‌පාය පටිපන්‌නො හොති.
‘‘Cattārimāni, paribbājakā, brāhmaṇasaccāni mayā sayaṃ abhiññā sacchikatvā paveditāni. Katamāni cattāri? Idha, paribbājakā, brāhmaṇo evamāha – ‘sabbe pāṇā avajjhā’ti . Iti vadaṃ brāhmaṇo saccaṃ āha, no musā. So tena na samaṇoti maññati, na brāhmaṇoti maññati, na seyyohamasmīti maññati, na sadisohamasmīti maññati, na hīnohamasmīti maññati. Api ca yadeva tattha saccaṃ tadabhiññāya pāṇānaṃyeva anuddayāya 2 anukampāya paṭipanno hoti.
‘‘පුන චපරං, පරිබ්‌බාජකා, බ්‍රාහ්‌මණො එවමාහ – ‘සබ්‌බෙ කාමා අනිච්‌චා දුක්‌ඛා විපරිණාමධම්‌මා’ති. ඉති වදං බ්‍රාහ්‌මණො සච්‌චමාහ, නො මුසා. සො තෙන න සමණොති මඤ්‌ඤති, න බ්‍රාහ්‌මණොති මඤ්‌ඤති, න සෙය්‍යොහමස්‌මීති මඤ්‌ඤති, න සදිසොහමස්‌මීති මඤ්‌ඤති, න හීනොහමස්‌මීති මඤ්‌ඤති. අපි ච යදෙව තත්‌ථ සච්‌චං තදභිඤ්‌ඤාය කාමානංයෙව නිබ්‌බිදාය විරාගාය නිරොධාය පටිපන්‌නො හොති.
‘‘Puna caparaṃ, paribbājakā, brāhmaṇo evamāha – ‘sabbe kāmā aniccā dukkhā vipariṇāmadhammā’ti. Iti vadaṃ brāhmaṇo saccamāha, no musā. So tena na samaṇoti maññati, na brāhmaṇoti maññati, na seyyohamasmīti maññati, na sadisohamasmīti maññati, na hīnohamasmīti maññati. Api ca yadeva tattha saccaṃ tadabhiññāya kāmānaṃyeva nibbidāya virāgāya nirodhāya paṭipanno hoti.
‘‘පුන චපරං, පරිබ්‌බාජකා, බ්‍රාහ්‌මණො එවමාහ – ‘සබ්‌බෙ භවා අනිච්‌චා…පෙ.… භවානංයෙව නිබ්‌බිදාය විරාගාය නිරොධාය පටිපන්‌නො හොති.
‘‘Puna caparaṃ, paribbājakā, brāhmaṇo evamāha – ‘sabbe bhavā aniccā…pe… bhavānaṃyeva nibbidāya virāgāya nirodhāya paṭipanno hoti.
‘‘පුන චපරං, පරිබ්‌බාජකා, බ්‍රාහ්‌මණො එවමාහ – ‘නාහං ක්‌වචනි 3 කස්‌සචි කිඤ්‌චනතස්‌මිං න ච මම ක්‌වචනි කත්‌ථචි කිඤ්‌චනතත්‌ථී’ති. ඉති වදං බ්‍රාහ්‌මණො සච්‌චං ආහ, නො මුසා. සො තෙන න සමණොති මඤ්‌ඤති, න බ්‍රාහ්‌මණොති මඤ්‌ඤති, න සෙය්‍යොහමස්‌මීති මඤ්‌ඤති, න සදිසොහමස්‌මීති මඤ්‌ඤති, න හීනොහමස්‌මීති මඤ්‌ඤති. අපි ච යදෙව තත්‌ථ සච්‌චං තදභිඤ්‌ඤාය ආකිඤ්‌චඤ්‌ඤංයෙව පටිපදං පටිපන්‌නො හොති. ඉමානි ඛො, පරිබ්‌බාජකා, චත්‌තාරි බ්‍රාහ්‌මණසච්‌චානි මයා සයං අභිඤ්‌ඤා සච්‌ඡිකත්‌වා පවෙදිතානී’’ති. පඤ්‌චමං.
‘‘Puna caparaṃ, paribbājakā, brāhmaṇo evamāha – ‘nāhaṃ kvacani 4 kassaci kiñcanatasmiṃ na ca mama kvacani katthaci kiñcanatatthī’ti. Iti vadaṃ brāhmaṇo saccaṃ āha, no musā. So tena na samaṇoti maññati, na brāhmaṇoti maññati, na seyyohamasmīti maññati, na sadisohamasmīti maññati, na hīnohamasmīti maññati. Api ca yadeva tattha saccaṃ tadabhiññāya ākiñcaññaṃyeva paṭipadaṃ paṭipanno hoti. Imāni kho, paribbājakā, cattāri brāhmaṇasaccāni mayā sayaṃ abhiññā sacchikatvā paveditānī’’ti. Pañcamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. බ්‍රාහ්‌මණසච්‌චසුත්‌තවණ්‌ණනා • 5. Brāhmaṇasaccasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 5. බ්‍රාහ්‌මණසච්‌චසුත්‌තවණ්‌ණනා • 5. Brāhmaṇasaccasuttavaṇṇanā
