| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. ப்³ராஹ்மணஸுத்தங்
2. Brāhmaṇasuttaṃ
1008. ஸாவத்தி²னிதா³னங் . ‘‘ப்³ராஹ்மணா, பி⁴க்க²வே, உத³யகா³மினிங் நாம படிபத³ங் பஞ்ஞபெந்தி. தே ஸாவகங் ஏவங் ஸமாத³பெந்தி – ‘ஏஹி த்வங், அம்போ⁴ புரிஸ, காலஸ்ஸேவ உட்டா²ய பாசீனமுகோ² யாஹி. ஸோ த்வங் மா ஸொப்³ப⁴ங் பரிவஜ்ஜேஹி, மா பபாதங், மா கா²ணுங், மா கண்ட³கடா²னங் 1, மா சந்த³னியங், மா ஓளிக³ல்லங். யத்த² 2 பபதெய்யாஸி தத்தே²வ மரணங் ஆக³மெய்யாஸி. ஏவங் த்வங், அம்போ⁴ புரிஸ, காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜிஸ்ஸஸீ’’’தி.
1008. Sāvatthinidānaṃ . ‘‘Brāhmaṇā, bhikkhave, udayagāminiṃ nāma paṭipadaṃ paññapenti. Te sāvakaṃ evaṃ samādapenti – ‘ehi tvaṃ, ambho purisa, kālasseva uṭṭhāya pācīnamukho yāhi. So tvaṃ mā sobbhaṃ parivajjehi, mā papātaṃ, mā khāṇuṃ, mā kaṇḍakaṭhānaṃ 3, mā candaniyaṃ, mā oḷigallaṃ. Yattha 4 papateyyāsi tattheva maraṇaṃ āgameyyāsi. Evaṃ tvaṃ, ambho purisa, kāyassa bhedā paraṃ maraṇā sugatiṃ saggaṃ lokaṃ upapajjissasī’’’ti.
‘‘தங் கோ² பனேதங், பி⁴க்க²வே, ப்³ராஹ்மணானங் பா³லக³மனமேதங் 5 மூள்ஹக³மனமேதங் ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸங்வத்ததி. அஹஞ்ச கோ², பி⁴க்க²வே, அரியஸ்ஸ வினயே உத³யகா³மினிங் படிபத³ங் பஞ்ஞபேமி; யா ஏகந்தனிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸங்வத்ததி.
‘‘Taṃ kho panetaṃ, bhikkhave, brāhmaṇānaṃ bālagamanametaṃ 6 mūḷhagamanametaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Ahañca kho, bhikkhave, ariyassa vinaye udayagāminiṃ paṭipadaṃ paññapemi; yā ekantanibbidāya virāgāya nirodhāya upasamāya abhiññāya sambodhāya nibbānāya saṃvattati.
‘‘கதமா ச ஸா, பி⁴க்க²வே, உத³யகா³மினீ படிபதா³; யா ஏகந்தனிப்³பி³தா³ய…பே॰… நிப்³பா³னாய ஸங்வத்ததி? இத⁴ , பி⁴க்க²வே, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – இதிபி ஸோ ப⁴க³வா அரஹங் ஸம்மாஸம்பு³த்³தோ⁴…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி; த⁴ம்மே…பே॰… ஸங்கே⁴…பே॰… அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி…பே॰… ஸமாதி⁴ஸங்வத்தனிகேஹி. அயங் கோ² ஸா, பி⁴க்க²வே, உத³யகா³மினீ படிபதா³ ஏகந்தனிப்³பி³தா³ய…பே॰… நிப்³பா³னாய ஸங்வத்ததீ’’தி. து³தியங்.
‘‘Katamā ca sā, bhikkhave, udayagāminī paṭipadā; yā ekantanibbidāya…pe… nibbānāya saṃvattati? Idha , bhikkhave, ariyasāvako buddhe aveccappasādena samannāgato hoti – itipi so bhagavā arahaṃ sammāsambuddho…pe… satthā devamanussānaṃ buddho bhagavāti; dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Ayaṃ kho sā, bhikkhave, udayagāminī paṭipadā ekantanibbidāya…pe… nibbānāya saṃvattatī’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2-3. ப்³ராஹ்மணஸுத்தாதி³வண்ணனா • 2-3. Brāhmaṇasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2-3. ப்³ராஹ்மணஸுத்தாதி³வண்ணனா • 2-3. Brāhmaṇasuttādivaṇṇanā
