| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. ব্রাহ্মণসুত্তং
2. Brāhmaṇasuttaṃ
১০০৮. সাৰত্থিনিদানং । ‘‘ব্রাহ্মণা, ভিক্খৰে, উদযগামিনিং নাম পটিপদং পঞ্ঞপেন্তি। তে সাৰকং এৰং সমাদপেন্তি – ‘এহি ত্ৰং, অম্ভো পুরিস, কালস্সেৰ উট্ঠায পাচীনমুখো যাহি। সো ত্ৰং মা সোব্ভং পরিৰজ্জেহি, মা পপাতং, মা খাণুং, মা কণ্ডকঠানং 1, মা চন্দনিযং, মা ওল়িগল্লং। যত্থ 2 পপতেয্যাসি তত্থেৰ মরণং আগমেয্যাসি। এৰং ত্ৰং, অম্ভো পুরিস, কাযস্স ভেদা পরং মরণা সুগতিং সগ্গং লোকং উপপজ্জিস্সসী’’’তি।
1008. Sāvatthinidānaṃ . ‘‘Brāhmaṇā, bhikkhave, udayagāminiṃ nāma paṭipadaṃ paññapenti. Te sāvakaṃ evaṃ samādapenti – ‘ehi tvaṃ, ambho purisa, kālasseva uṭṭhāya pācīnamukho yāhi. So tvaṃ mā sobbhaṃ parivajjehi, mā papātaṃ, mā khāṇuṃ, mā kaṇḍakaṭhānaṃ 3, mā candaniyaṃ, mā oḷigallaṃ. Yattha 4 papateyyāsi tattheva maraṇaṃ āgameyyāsi. Evaṃ tvaṃ, ambho purisa, kāyassa bhedā paraṃ maraṇā sugatiṃ saggaṃ lokaṃ upapajjissasī’’’ti.
‘‘তং খো পনেতং, ভিক্খৰে, ব্রাহ্মণানং বালগমনমেতং 5 মূল়্হগমনমেতং ন নিব্বিদায ন ৰিরাগায ন নিরোধায ন উপসমায ন অভিঞ্ঞায ন সম্বোধায ন নিব্বানায সংৰত্ততি। অহঞ্চ খো, ভিক্খৰে, অরিযস্স ৰিনযে উদযগামিনিং পটিপদং পঞ্ঞপেমি; যা একন্তনিব্বিদায ৰিরাগায নিরোধায উপসমায অভিঞ্ঞায সম্বোধায নিব্বানায সংৰত্ততি।
‘‘Taṃ kho panetaṃ, bhikkhave, brāhmaṇānaṃ bālagamanametaṃ 6 mūḷhagamanametaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Ahañca kho, bhikkhave, ariyassa vinaye udayagāminiṃ paṭipadaṃ paññapemi; yā ekantanibbidāya virāgāya nirodhāya upasamāya abhiññāya sambodhāya nibbānāya saṃvattati.
‘‘কতমা চ সা, ভিক্খৰে, উদযগামিনী পটিপদা; যা একন্তনিব্বিদায…পে॰… নিব্বানায সংৰত্ততি? ইধ , ভিক্খৰে, অরিযসাৰকো বুদ্ধে অৰেচ্চপ্পসাদেন সমন্নাগতো হোতি – ইতিপি সো ভগৰা অরহং সম্মাসম্বুদ্ধো…পে॰… সত্থা দেৰমনুস্সানং বুদ্ধো ভগৰাতি; ধম্মে…পে॰… সঙ্ঘে…পে॰… অরিযকন্তেহি সীলেহি সমন্নাগতো হোতি অখণ্ডেহি…পে॰… সমাধিসংৰত্তনিকেহি। অযং খো সা, ভিক্খৰে, উদযগামিনী পটিপদা একন্তনিব্বিদায…পে॰… নিব্বানায সংৰত্ততী’’তি। দুতিযং।
‘‘Katamā ca sā, bhikkhave, udayagāminī paṭipadā; yā ekantanibbidāya…pe… nibbānāya saṃvattati? Idha , bhikkhave, ariyasāvako buddhe aveccappasādena samannāgato hoti – itipi so bhagavā arahaṃ sammāsambuddho…pe… satthā devamanussānaṃ buddho bhagavāti; dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Ayaṃ kho sā, bhikkhave, udayagāminī paṭipadā ekantanibbidāya…pe… nibbānāya saṃvattatī’’ti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২-৩. ব্রাহ্মণসুত্তাদিৰণ্ণনা • 2-3. Brāhmaṇasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২-৩. ব্রাহ্মণসুত্তাদিৰণ্ণনা • 2-3. Brāhmaṇasuttādivaṇṇanā
