| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. බ්‍රාහ්‌මණසුත්‌තං
2. Brāhmaṇasuttaṃ
1008. සාවත්‌ථිනිදානං . ‘‘බ්‍රාහ්‌මණා, භික්‌ඛවෙ, උදයගාමිනිං නාම පටිපදං පඤ්‌ඤපෙන්‌ති. තෙ සාවකං එවං සමාදපෙන්‌ති – ‘එහි ත්‌වං, අම්‌භො පුරිස, කාලස්‌සෙව උට්‌ඨාය පාචීනමුඛො යාහි. සො ත්‌වං මා සොබ්‌භං පරිවජ්‌ජෙහි, මා පපාතං, මා ඛාණුං, මා කණ්‌ඩකඨානං 1, මා චන්‌දනියං, මා ඔළිගල්‌ලං. යත්‌ථ 2 පපතෙය්‍යාසි තත්‌ථෙව මරණං ආගමෙය්‍යාසි. එවං ත්‌වං, අම්‌භො පුරිස, කායස්‌ස භෙදා පරං මරණා සුගතිං සග්‌ගං ලොකං උපපජ්‌ජිස්‌සසී’’’ති.
1008. Sāvatthinidānaṃ . ‘‘Brāhmaṇā, bhikkhave, udayagāminiṃ nāma paṭipadaṃ paññapenti. Te sāvakaṃ evaṃ samādapenti – ‘ehi tvaṃ, ambho purisa, kālasseva uṭṭhāya pācīnamukho yāhi. So tvaṃ mā sobbhaṃ parivajjehi, mā papātaṃ, mā khāṇuṃ, mā kaṇḍakaṭhānaṃ 3, mā candaniyaṃ, mā oḷigallaṃ. Yattha 4 papateyyāsi tattheva maraṇaṃ āgameyyāsi. Evaṃ tvaṃ, ambho purisa, kāyassa bhedā paraṃ maraṇā sugatiṃ saggaṃ lokaṃ upapajjissasī’’’ti.
‘‘තං ඛො පනෙතං, භික්‌ඛවෙ, බ්‍රාහ්‌මණානං බාලගමනමෙතං 5 මූළ්‌හගමනමෙතං න නිබ්‌බිදාය න විරාගාය න නිරොධාය න උපසමාය න අභිඤ්‌ඤාය න සම්‌බොධාය න නිබ්‌බානාය සංවත්‌තති. අහඤ්‌ච ඛො, භික්‌ඛවෙ, අරියස්‌ස විනයෙ උදයගාමිනිං පටිපදං පඤ්‌ඤපෙමි; යා එකන්‌තනිබ්‌බිදාය විරාගාය නිරොධාය උපසමාය අභිඤ්‌ඤාය සම්‌බොධාය නිබ්‌බානාය සංවත්‌තති.
‘‘Taṃ kho panetaṃ, bhikkhave, brāhmaṇānaṃ bālagamanametaṃ 6 mūḷhagamanametaṃ na nibbidāya na virāgāya na nirodhāya na upasamāya na abhiññāya na sambodhāya na nibbānāya saṃvattati. Ahañca kho, bhikkhave, ariyassa vinaye udayagāminiṃ paṭipadaṃ paññapemi; yā ekantanibbidāya virāgāya nirodhāya upasamāya abhiññāya sambodhāya nibbānāya saṃvattati.
‘‘කතමා ච සා, භික්‌ඛවෙ, උදයගාමිනී පටිපදා; යා එකන්‌තනිබ්‌බිදාය…පෙ.… නිබ්‌බානාය සංවත්‌තති? ඉධ , භික්‌ඛවෙ, අරියසාවකො බුද්‌ධෙ අවෙච්‌චප්‌පසාදෙන සමන්‌නාගතො හොති – ඉතිපි සො භගවා අරහං සම්‌මාසම්‌බුද්‌ධො…පෙ.… සත්‌ථා දෙවමනුස්‌සානං බුද්‌ධො භගවාති; ධම්‌මෙ…පෙ.… සඞ්‌ඝෙ…පෙ.… අරියකන්‌තෙහි සීලෙහි සමන්‌නාගතො හොති අඛණ්‌ඩෙහි…පෙ.… සමාධිසංවත්‌තනිකෙහි. අයං ඛො සා, භික්‌ඛවෙ, උදයගාමිනී පටිපදා එකන්‌තනිබ්‌බිදාය…පෙ.… නිබ්‌බානාය සංවත්‌තතී’’ති. දුතියං.
‘‘Katamā ca sā, bhikkhave, udayagāminī paṭipadā; yā ekantanibbidāya…pe… nibbānāya saṃvattati? Idha , bhikkhave, ariyasāvako buddhe aveccappasādena samannāgato hoti – itipi so bhagavā arahaṃ sammāsambuddho…pe… satthā devamanussānaṃ buddho bhagavāti; dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Ayaṃ kho sā, bhikkhave, udayagāminī paṭipadā ekantanibbidāya…pe… nibbānāya saṃvattatī’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 2-3. බ්‍රාහ්‌මණසුත්‌තාදිවණ්‌ණනා • 2-3. Brāhmaṇasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2-3. බ්‍රාහ්‌මණසුත්‌තාදිවණ්‌ණනා • 2-3. Brāhmaṇasuttādivaṇṇanā
