| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. බ්‍රහ්‌මසුත්‌තං
3. Brahmasuttaṃ
63. ‘‘සබ්‍රහ්‌මකානි, භික්‌ඛවෙ 1, තානි කුලානි යෙසං පුත්‌තානං මාතාපිතරො අජ්‌ඣාගාරෙ පූජිතා හොන්‌ති. සපුබ්‌බාචරියකානි, භික්‌ඛවෙ, තානි කුලානි , යෙසං පුත්‌තානං මාතාපිතරො අජ්‌ඣාගාරෙ පූජිතා හොන්‌ති. සපුබ්‌බදෙවතානි 2, භික්‌ඛවෙ, තානි කුලානි යෙසං පුත්‌තානං මාතාපිතරො අජ්‌ඣාගාරෙ පූජිතා හොන්‌ති. සාහුනෙය්‍යකානි, භික්‌ඛවෙ, තානි කුලානි යෙසං පුත්‌තානං මාතාපිතරො අජ්‌ඣාගාරෙ පූජිතා හොන්‌ති.
63. ‘‘Sabrahmakāni, bhikkhave 3, tāni kulāni yesaṃ puttānaṃ mātāpitaro ajjhāgāre pūjitā honti. Sapubbācariyakāni, bhikkhave, tāni kulāni , yesaṃ puttānaṃ mātāpitaro ajjhāgāre pūjitā honti. Sapubbadevatāni 4, bhikkhave, tāni kulāni yesaṃ puttānaṃ mātāpitaro ajjhāgāre pūjitā honti. Sāhuneyyakāni, bhikkhave, tāni kulāni yesaṃ puttānaṃ mātāpitaro ajjhāgāre pūjitā honti.
‘‘බ්‍රහ්‌මාති, භික්‌ඛවෙ, මාතාපිතූනං 5 එතං අධිවචනං. පුබ්‌බාචරියාති, භික්‌ඛවෙ, මාතාපිතූනං එතං අධිවචනං. පුබ්‌බදෙවතාති 6, භික්‌ඛවෙ, මාතාපිතූනං එතං අධිවචනං. ආහුනෙය්‍යාති, භික්‌ඛවෙ, මාතාපිතූනං එතං අධිවචනං. තං කිස්‌ස හෙතු? බහුකාරා, භික්‌ඛවෙ, මාතාපිතරො, පුත්‌තානං ආපාදකා පොසකා ඉමස්‌ස ලොකස්‌ස දස්‌සෙතාරො’’ති.
‘‘Brahmāti, bhikkhave, mātāpitūnaṃ 7 etaṃ adhivacanaṃ. Pubbācariyāti, bhikkhave, mātāpitūnaṃ etaṃ adhivacanaṃ. Pubbadevatāti 8, bhikkhave, mātāpitūnaṃ etaṃ adhivacanaṃ. Āhuneyyāti, bhikkhave, mātāpitūnaṃ etaṃ adhivacanaṃ. Taṃ kissa hetu? Bahukārā, bhikkhave, mātāpitaro, puttānaṃ āpādakā posakā imassa lokassa dassetāro’’ti.
‘‘බ්‍රහ්‌මාති මාතාපිතරො, පුබ්‌බාචරියාති වුච්‌චරෙ;
‘‘Brahmāti mātāpitaro, pubbācariyāti vuccare;
ආහුනෙය්‍යා ච පුත්‌තානං, පජාය අනුකම්‌පකා.
Āhuneyyā ca puttānaṃ, pajāya anukampakā.
‘‘තස්‌මා හි නෙ නමස්‌සෙය්‍ය, සක්‌කරෙය්‍ය ච පණ්‌ඩිතො;
‘‘Tasmā hi ne namasseyya, sakkareyya ca paṇḍito;
අන්‌නෙන අථ පානෙන, වත්‌ථෙන සයනෙන ච;
Annena atha pānena, vatthena sayanena ca;
උච්‌ඡාදනෙන න්‌හාපනෙන, පාදානං ධොවනෙන ච.
Ucchādanena nhāpanena, pādānaṃ dhovanena ca.
‘‘තාය නං පාරිචරියාය, මාතාපිතූසු පණ්‌ඩිතා;
‘‘Tāya naṃ pāricariyāya, mātāpitūsu paṇḍitā;
ඉධෙව නං පසංසන්‌ති, පෙච්‌ච සග්‌ගෙ පමොදතී’’ති. තතියං;
Idheva naṃ pasaṃsanti, pecca sagge pamodatī’’ti. tatiyaṃ;
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3. බ්‍රහ්‌මසුත්‌තවණ්‌ණනා • 3. Brahmasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-4. පත්‌තකම්‌මසුත්‌තාදිවණ්‌ණනා • 1-4. Pattakammasuttādivaṇṇanā
