| Library / Tipiṭaka / திபிடக • Tipiṭaka / மஹாவக்³க³-அட்ட²கதா² • Mahāvagga-aṭṭhakathā |
ப்³ரஹ்மயாசனகதா²
Brahmayācanakathā
7. அத² கோ² ப⁴க³வா ஸத்தாஹஸ்ஸ அச்சயேன தம்ஹா ஸமாதி⁴ம்ஹா வுட்ட²ஹித்வா வுத்தப்பகாரமேதங் ஸப்³ப³ங் கிச்சங் நிட்டா²பெத்வா ராஜாயதனமூலா புனபி யேன அஜபாலனிக்³ரோதோ⁴ தேனுபஸங்கமி. பரிவிதக்கோ உத³பாதீ³தி தஸ்மிங் நிஸின்னமத்தஸ்ஸேவ ஸப்³ப³பு³த்³தா⁴னங் ஆசிண்ணஸமாசிண்ணோ அயங் சேதஸோ பரிவிதக்கோ உத³பாதி³. கஸ்மா பனாயங் ஸப்³ப³பு³த்³தா⁴னங் உப்பஜ்ஜதீதி? த⁴ம்மஸ்ஸ மஹந்தபா⁴வங் க³ருபா⁴வங் பா⁴ரியபா⁴வங் பச்சவெக்க²ணாய ப்³ரஹ்முனா யாசிதே தே³ஸேதுகாமதாய ச. ஜானந்தி ஹி பு³த்³தா⁴ ‘‘ஏவங் பரிவிதக்கிதே ப்³ரஹ்மா ஆக³ந்த்வா த⁴ம்மதே³ஸனங் யாசிஸ்ஸதி, ததோ ஸத்தா த⁴ம்மே கா³ரவங் உப்பாதெ³ஸ்ஸந்தி, ப்³ரஹ்மக³ருகோ ஹி லோகஸன்னிவாஸோ’’தி. இதி இமேஹி த்³வீஹி காரணேஹி அயங் விதக்கோ உப்பஜ்ஜதீதி.
7. Atha kho bhagavā sattāhassa accayena tamhā samādhimhā vuṭṭhahitvā vuttappakārametaṃ sabbaṃ kiccaṃ niṭṭhāpetvā rājāyatanamūlā punapi yena ajapālanigrodho tenupasaṅkami. Parivitakko udapādīti tasmiṃ nisinnamattasseva sabbabuddhānaṃ āciṇṇasamāciṇṇo ayaṃ cetaso parivitakko udapādi. Kasmā panāyaṃ sabbabuddhānaṃ uppajjatīti? Dhammassa mahantabhāvaṃ garubhāvaṃ bhāriyabhāvaṃ paccavekkhaṇāya brahmunā yācite desetukāmatāya ca. Jānanti hi buddhā ‘‘evaṃ parivitakkite brahmā āgantvā dhammadesanaṃ yācissati, tato sattā dhamme gāravaṃ uppādessanti, brahmagaruko hi lokasannivāso’’ti. Iti imehi dvīhi kāraṇehi ayaṃ vitakko uppajjatīti.
தத்த² அதி⁴க³தோ கோ² ம்யாயந்தி அதி⁴க³தோ கோ² மே அயங். ஆலயராமாதி ஸத்தா பஞ்ச காமகு³ணே அல்லீயந்தி, தஸ்மா தே ‘‘ஆலயா’’தி வுச்சந்தி. தேஹி ஆலயேஹி ரமந்தீதி ஆலயராமா. ஆலயேஸு ரதாதி ஆலயரதா. ஆலயேஸு ஸுட்டு²முதி³தாதி ஆலயஸம்முதி³தா. யதி³த³ந்தி நிபாதோ. தஸ்ஸ டா²னங் ஸந்தா⁴ய ‘‘யங் இத³’’ந்தி படிச்சஸமுப்பாத³ங் ஸந்தா⁴ய ‘‘யோ அய’’ந்தி ஏவமத்தோ² த³ட்ட²ப்³போ³. இத³ப்பச்சயதாபடிச்சஸமுப்பாதோ³தி இமேஸங் பச்சயா இத³ப்பச்சயா, இத³ப்பச்சயாவ இத³ப்பச்சயதா, இத³ப்பச்சயதா ச ஸா படிச்சஸமுப்பாதோ³ சாதி இத³ப்பச்சயதாபடிச்சஸமுப்பாதோ³. ஸோ மமஸ்ஸ கிலமதோ²தி யா அஜானந்தானங் தே³ஸனா நாம, ஸோ மம கிலமதோ² அஸ்ஸ; ஸா மம விஹேஸா அஸ்ஸாதி அத்தோ². ப⁴க³வந்தந்தி ப⁴க³வதோ. அனச்ச²ரியாதி அனு அச்ச²ரியா. படிப⁴ங்ஸூதி படிபா⁴னஸங்கா²தஸ்ஸ ஞாணஸ்ஸ கோ³சரா அஹேஸுங், பரிவிதக்கயிதப்³ப³பா⁴வங் பாபுணிங்ஸு.
Tattha adhigato kho myāyanti adhigato kho me ayaṃ. Ālayarāmāti sattā pañca kāmaguṇe allīyanti, tasmā te ‘‘ālayā’’ti vuccanti. Tehi ālayehi ramantīti ālayarāmā. Ālayesu ratāti ālayaratā. Ālayesu suṭṭhumuditāti ālayasammuditā. Yadidanti nipāto. Tassa ṭhānaṃ sandhāya ‘‘yaṃ ida’’nti paṭiccasamuppādaṃ sandhāya ‘‘yo aya’’nti evamattho daṭṭhabbo. Idappaccayatāpaṭiccasamuppādoti imesaṃ paccayā idappaccayā, idappaccayāva idappaccayatā, idappaccayatā ca sā paṭiccasamuppādo cāti idappaccayatāpaṭiccasamuppādo. So mamassa kilamathoti yā ajānantānaṃ desanā nāma, so mama kilamatho assa; sā mama vihesā assāti attho. Bhagavantanti bhagavato. Anacchariyāti anu acchariyā. Paṭibhaṃsūti paṭibhānasaṅkhātassa ñāṇassa gocarā ahesuṃ, parivitakkayitabbabhāvaṃ pāpuṇiṃsu.
ஹலந்தி எத்த² ஹகாரோ நிபாதமத்தோ; அலந்தி அத்தோ². பகாஸிதுந்தி தே³ஸிதுங். அலங் தா³னி மே இமங் கிச்சே²ன அதி⁴க³தங் த⁴ம்மங் தே³ஸேதுந்தி வுத்தங் ஹோதி. படிஸோதகா³மிந்தி படிஸோதங் வுச்சதி நிப்³பா³னங்; நிப்³பா³னகா³மிந்தி அத்தோ². ராக³ரத்தாதி காமராக³ப⁴வராக³தி³ட்டி²ராகே³ன ரத்தா. ந த³க்க²ந்தீதி ந பஸ்ஸிஸ்ஸந்தி. தமோக²ந்தே⁴ன ஆவுடாதி அவிஜ்ஜாராஸினா அஜ்ஜொ²த்த²டா. அப்பொஸ்ஸுக்கதாயாதி நிருஸ்ஸுக்கபா⁴வேன; அதே³ஸேதுகாமதாயாதி அத்தோ².
Halanti ettha hakāro nipātamatto; alanti attho. Pakāsitunti desituṃ. Alaṃ dāni me imaṃ kicchena adhigataṃ dhammaṃ desetunti vuttaṃ hoti. Paṭisotagāminti paṭisotaṃ vuccati nibbānaṃ; nibbānagāminti attho. Rāgarattāti kāmarāgabhavarāgadiṭṭhirāgena rattā. Na dakkhantīti na passissanti. Tamokhandhena āvuṭāti avijjārāsinā ajjhotthaṭā. Appossukkatāyāti nirussukkabhāvena; adesetukāmatāyāti attho.
8. யத்ர ஹி நாமாதி யஸ்மிங் நாம லோகே. ப⁴க³வதோ புரதோ பாதுரஹோஸீதி த⁴ம்மதே³ஸனாயாசனத்த²ங் த³ஸஸு சக்கவாளஸஹஸ்ஸேஸு மஹாப்³ரஹ்மானோ க³ஹெத்வா ஆக³ம்ம ப⁴க³வதோ புரதோ பாதுரஹோஸி . அப்பரஜக்க²ஜாதிகாதி பஞ்ஞாமயே அக்கி²ம்ஹி அப்பங் ராக³தோ³ஸமோஹரஜங் ஏதேஸங் ஏவங்ஸபா⁴வாதி அப்பரஜக்க²ஜாதிகா. ப⁴விஸ்ஸந்தி த⁴ம்மஸ்ஸ அஞ்ஞாதாரோதி படிவிஜ்ஜி²தாரோ.
8.Yatra hi nāmāti yasmiṃ nāma loke. Bhagavato purato pāturahosīti dhammadesanāyācanatthaṃ dasasu cakkavāḷasahassesu mahābrahmāno gahetvā āgamma bhagavato purato pāturahosi . Apparajakkhajātikāti paññāmaye akkhimhi appaṃ rāgadosamoharajaṃ etesaṃ evaṃsabhāvāti apparajakkhajātikā. Bhavissanti dhammassa aññātāroti paṭivijjhitāro.
பாதுரஹோஸீதி பாதுப⁴வி. ஸமலேஹி சிந்திதோதி ராகா³தீ³ஹி மலேஹி ஸமலேஹி ச²ஹி ஸத்தா²ரேஹி சிந்திதோ. அபாபுரேதந்தி விவர ஏதங். அமதஸ்ஸ த்³வாரந்தி அமதஸ்ஸ நிப்³பா³னஸ்ஸ த்³வாரபூ⁴தங் அரியமக்³க³ங். ஸுணந்து த⁴ம்மங் விமலேனானுபு³த்³த⁴ந்தி இமே ஸத்தா ராகா³தி³மலானங் அபா⁴வதோ விமலேன ஸம்மாஸம்பு³த்³தே⁴ன அனுபு³த்³த⁴ங் சதுஸச்சத⁴ம்மங் ஸுணந்து.
Pāturahosīti pātubhavi. Samalehi cintitoti rāgādīhi malehi samalehi chahi satthārehi cintito. Apāpuretanti vivara etaṃ. Amatassa dvāranti amatassa nibbānassa dvārabhūtaṃ ariyamaggaṃ. Suṇantu dhammaṃ vimalenānubuddhanti ime sattā rāgādimalānaṃ abhāvato vimalena sammāsambuddhena anubuddhaṃ catusaccadhammaṃ suṇantu.
ஸேலே யதா² பப்³ப³தமுத்³த⁴னிட்டி²தோதி ஸேலமயே ஏகக்³க⁴னே பப்³ப³தமுத்³த⁴னி யதா²டி²தோவ யதா² சக்கு²மா புரிஸோ ஸமந்ததோ ஜனதங் பஸ்ஸெய்ய, த்வம்பி ஸுமேத⁴ ஸுந்த³ரபஞ்ஞ ஸப்³ப³ஞ்ஞுதஞ்ஞாணேன ஸமந்தசக்கு² ப⁴க³வா த⁴ம்மமயங் பஞ்ஞாமயங் பாஸாத³மாருய்ஹ ஸயங் அபேதஸோகோ ஸோகாவதிண்ணங் ஜாதிஜராபி⁴பூ⁴தஞ்ச ஜனதங் அவெக்க²ஸ்ஸு உபதா⁴ரய.
Sele yathā pabbatamuddhaniṭṭhitoti selamaye ekagghane pabbatamuddhani yathāṭhitova yathā cakkhumā puriso samantato janataṃ passeyya, tvampi sumedha sundarapañña sabbaññutaññāṇena samantacakkhu bhagavā dhammamayaṃ paññāmayaṃ pāsādamāruyha sayaṃ apetasoko sokāvatiṇṇaṃ jātijarābhibhūtañca janataṃ avekkhassu upadhāraya.
உட்டே²ஹீதி ப⁴க³வதோ த⁴ம்மதே³ஸனத்த²ங் சாரிகசரணங் யாசந்தோ ப⁴ணதி. வீராதிஆதீ³ஸு ப⁴க³வா வீரியவந்ததாய வீரோ. தே³வபுத்தமச்சுகிலேஸாபி⁴ஸங்கா²ரமாரானங் விஜிதத்தா விஜிதஸங்கா³மோ. ஜாதிகந்தாராதி³னித்த²ரணஸமத்த²தாய ஸத்த²வாஹோ. காமச்ச²ந்த³இணஸ்ஸ அபா⁴வதோ அணணோ.
Uṭṭhehīti bhagavato dhammadesanatthaṃ cārikacaraṇaṃ yācanto bhaṇati. Vīrātiādīsu bhagavā vīriyavantatāya vīro. Devaputtamaccukilesābhisaṅkhāramārānaṃ vijitattā vijitasaṅgāmo. Jātikantārādinittharaṇasamatthatāya satthavāho. Kāmacchandaiṇassa abhāvato aṇaṇo.
9. அஜ்ஜே²ஸனந்தி யாசனங். பு³த்³த⁴சக்கு²னாதி இந்த்³ரியபரோபரியத்தஞாணேன ச ஆஸயானுஸயஞாணேன ச. இமேஸஞ்ஹி த்³வின்னங் ஞாணானங் பு³த்³த⁴சக்கூ²தி நாமங். அப்பரஜக்கா²தி பஞ்ஞாசக்கு²ம்ஹி ராகா³தி³ரஜங் அப்பங் யேஸங், தே அப்பரஜக்கா². யேஸங் தங் மஹந்தங் தே மஹாரஜக்கா². யேஸங் ஸத்³தா⁴தீ³னி இந்த்³ரியானி திக்கா²னி தே திக்கி²ந்த்³ரியா. யேஸங் தானி முதூ³னி தே முதி³ந்த்³ரியா. யேஸங் தேயேவ ஸத்³தா⁴த³யோ ஆகாரா ஸுந்த³ரா தே ஸ்வாகாரா. யேஸங் தேயேவ ஸத்³தா⁴த³யோ ஆகாரா அஸுந்த³ரா தே த்³வாகாரா. யே கதி²தகாரணங் ஸல்லக்கெ²ந்தி, ஸுகே²ன ஸக்கா ஹொந்தி விஞ்ஞாபேதுங் தே ஸுவிஞ்ஞாபயா. யே பரலோகஞ்ச வஜ்ஜஞ்ச ப⁴யதோ பஸ்ஸந்தி தே பரலோகவஜ்ஜப⁴யத³ஸ்ஸாவினோ. உப்பலினியந்தி உப்பலவனே. இதரேஸுபி ஏஸேவ நயோ. அந்தோனிமுக்³க³போஸீனீதி யானி உத³கஸ்ஸ அந்தோ நிமுக்³கா³னேவ போஸயந்தி. ஸமோத³கங் டி²தானீதி உத³கேன ஸமங் டி²தானி. உத³கங் அச்சுக்³க³ம்ம டி²தானீதி உத³கங் அதிக்கமித்வா டி²தானி.
9.Ajjhesananti yācanaṃ. Buddhacakkhunāti indriyaparopariyattañāṇena ca āsayānusayañāṇena ca. Imesañhi dvinnaṃ ñāṇānaṃ buddhacakkhūti nāmaṃ. Apparajakkhāti paññācakkhumhi rāgādirajaṃ appaṃ yesaṃ, te apparajakkhā. Yesaṃ taṃ mahantaṃ te mahārajakkhā. Yesaṃ saddhādīni indriyāni tikkhāni te tikkhindriyā. Yesaṃ tāni mudūni te mudindriyā. Yesaṃ teyeva saddhādayo ākārā sundarā te svākārā. Yesaṃ teyeva saddhādayo ākārā asundarā te dvākārā. Ye kathitakāraṇaṃ sallakkhenti, sukhena sakkā honti viññāpetuṃ te suviññāpayā. Ye paralokañca vajjañca bhayato passanti te paralokavajjabhayadassāvino. Uppaliniyanti uppalavane. Itaresupi eseva nayo. Antonimuggaposīnīti yāni udakassa anto nimuggāneva posayanti. Samodakaṃ ṭhitānīti udakena samaṃ ṭhitāni. Udakaṃ accuggamma ṭhitānīti udakaṃ atikkamitvā ṭhitāni.
அபாருதாதி விவடா. அமதஸ்ஸ த்³வாராதி அரியமக்³கோ³. ஸோ ஹி அமதஸங்கா²தஸ்ஸ நிப்³பா³னஸ்ஸ த்³வாரங். பமுஞ்சந்து ஸத்³த⁴ந்தி ஸப்³பே³ அத்தனோ ஸத்³த⁴ங் பமுஞ்சந்து. பச்சி²மபத³த்³வயே அயமத்தோ² , அஹஞ்ஹி அத்தனோ பகு³ணங் ஸுப்பவத்திம்பி இமங் பணீதங் உத்தமங் த⁴ம்மங் காயவாசாகிலமத²ஸஞ்ஞீ ஹுத்வா மனுஜேஸு தே³வமனுஸ்ஸேஸு ந பா⁴ஸிந்தி.
Apārutāti vivaṭā. Amatassa dvārāti ariyamaggo. So hi amatasaṅkhātassa nibbānassa dvāraṃ. Pamuñcantu saddhanti sabbe attano saddhaṃ pamuñcantu. Pacchimapadadvaye ayamattho , ahañhi attano paguṇaṃ suppavattimpi imaṃ paṇītaṃ uttamaṃ dhammaṃ kāyavācākilamathasaññī hutvā manujesu devamanussesu na bhāsinti.
ப்³ரஹ்மயாசனகதா² நிட்டி²தா.
Brahmayācanakathā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 5. ப்³ரஹ்மயாசனகதா² • 5. Brahmayācanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ப்³ரஹ்மயாசனகதா²வண்ணனா • Brahmayācanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ப்³ரஹ்மயாசனகதா²வண்ணனா • Brahmayācanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ப்³ரஹ்மயாசனகதா²வண்ணனா • Brahmayācanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. ப்³ரஹ்மயாசனகதா² • 5. Brahmayācanakathā
