| Library / Tipiṭaka / তিপিটক • Tipiṭaka / মহাৰগ্গ-অট্ঠকথা • Mahāvagga-aṭṭhakathā |
ব্রহ্মযাচনকথা
Brahmayācanakathā
৭. অথ খো ভগৰা সত্তাহস্স অচ্চযেন তম্হা সমাধিম্হা ৰুট্ঠহিত্ৰা ৰুত্তপ্পকারমেতং সব্বং কিচ্চং নিট্ঠাপেত্ৰা রাজাযতনমূলা পুনপি যেন অজপালনিগ্রোধো তেনুপসঙ্কমি। পরিৰিতক্কো উদপাদীতি তস্মিং নিসিন্নমত্তস্সেৰ সব্ববুদ্ধানং আচিণ্ণসমাচিণ্ণো অযং চেতসো পরিৰিতক্কো উদপাদি। কস্মা পনাযং সব্ববুদ্ধানং উপ্পজ্জতীতি? ধম্মস্স মহন্তভাৰং গরুভাৰং ভারিযভাৰং পচ্চৰেক্খণায ব্রহ্মুনা যাচিতে দেসেতুকামতায চ। জানন্তি হি বুদ্ধা ‘‘এৰং পরিৰিতক্কিতে ব্রহ্মা আগন্ত্ৰা ধম্মদেসনং যাচিস্সতি, ততো সত্তা ধম্মে গারৰং উপ্পাদেস্সন্তি, ব্রহ্মগরুকো হি লোকসন্নিৰাসো’’তি। ইতি ইমেহি দ্ৰীহি কারণেহি অযং ৰিতক্কো উপ্পজ্জতীতি।
7. Atha kho bhagavā sattāhassa accayena tamhā samādhimhā vuṭṭhahitvā vuttappakārametaṃ sabbaṃ kiccaṃ niṭṭhāpetvā rājāyatanamūlā punapi yena ajapālanigrodho tenupasaṅkami. Parivitakko udapādīti tasmiṃ nisinnamattasseva sabbabuddhānaṃ āciṇṇasamāciṇṇo ayaṃ cetaso parivitakko udapādi. Kasmā panāyaṃ sabbabuddhānaṃ uppajjatīti? Dhammassa mahantabhāvaṃ garubhāvaṃ bhāriyabhāvaṃ paccavekkhaṇāya brahmunā yācite desetukāmatāya ca. Jānanti hi buddhā ‘‘evaṃ parivitakkite brahmā āgantvā dhammadesanaṃ yācissati, tato sattā dhamme gāravaṃ uppādessanti, brahmagaruko hi lokasannivāso’’ti. Iti imehi dvīhi kāraṇehi ayaṃ vitakko uppajjatīti.
তত্থ অধিগতো খো ম্যাযন্তি অধিগতো খো মে অযং। আলযরামাতি সত্তা পঞ্চ কামগুণে অল্লীযন্তি, তস্মা তে ‘‘আলযা’’তি ৰুচ্চন্তি। তেহি আলযেহি রমন্তীতি আলযরামা। আলযেসু রতাতি আলযরতা। আলযেসু সুট্ঠুমুদিতাতি আলযসম্মুদিতা। যদিদন্তি নিপাতো। তস্স ঠানং সন্ধায ‘‘যং ইদ’’ন্তি পটিচ্চসমুপ্পাদং সন্ধায ‘‘যো অয’’ন্তি এৰমত্থো দট্ঠব্বো। ইদপ্পচ্চযতাপটিচ্চসমুপ্পাদোতি ইমেসং পচ্চযা ইদপ্পচ্চযা, ইদপ্পচ্চযাৰ ইদপ্পচ্চযতা, ইদপ্পচ্চযতা চ সা পটিচ্চসমুপ্পাদো চাতি ইদপ্পচ্চযতাপটিচ্চসমুপ্পাদো। সো মমস্স কিলমথোতি যা অজানন্তানং দেসনা নাম, সো মম কিলমথো অস্স; সা মম ৰিহেসা অস্সাতি অত্থো। ভগৰন্তন্তি ভগৰতো। অনচ্ছরিযাতি অনু অচ্ছরিযা। পটিভংসূতি পটিভানসঙ্খাতস্স ঞাণস্স গোচরা অহেসুং, পরিৰিতক্কযিতব্বভাৰং পাপুণিংসু।
Tattha adhigato kho myāyanti adhigato kho me ayaṃ. Ālayarāmāti sattā pañca kāmaguṇe allīyanti, tasmā te ‘‘ālayā’’ti vuccanti. Tehi ālayehi ramantīti ālayarāmā. Ālayesu ratāti ālayaratā. Ālayesu suṭṭhumuditāti ālayasammuditā. Yadidanti nipāto. Tassa ṭhānaṃ sandhāya ‘‘yaṃ ida’’nti paṭiccasamuppādaṃ sandhāya ‘‘yo aya’’nti evamattho daṭṭhabbo. Idappaccayatāpaṭiccasamuppādoti imesaṃ paccayā idappaccayā, idappaccayāva idappaccayatā, idappaccayatā ca sā paṭiccasamuppādo cāti idappaccayatāpaṭiccasamuppādo. So mamassa kilamathoti yā ajānantānaṃ desanā nāma, so mama kilamatho assa; sā mama vihesā assāti attho. Bhagavantanti bhagavato. Anacchariyāti anu acchariyā. Paṭibhaṃsūti paṭibhānasaṅkhātassa ñāṇassa gocarā ahesuṃ, parivitakkayitabbabhāvaṃ pāpuṇiṃsu.
হলন্তি এত্থ হকারো নিপাতমত্তো; অলন্তি অত্থো। পকাসিতুন্তি দেসিতুং। অলং দানি মে ইমং কিচ্ছেন অধিগতং ধম্মং দেসেতুন্তি ৰুত্তং হোতি। পটিসোতগামিন্তি পটিসোতং ৰুচ্চতি নিব্বানং; নিব্বানগামিন্তি অত্থো। রাগরত্তাতি কামরাগভৰরাগদিট্ঠিরাগেন রত্তা। ন দক্খন্তীতি ন পস্সিস্সন্তি। তমোখন্ধেন আৰুটাতি অৰিজ্জারাসিনা অজ্ঝোত্থটা। অপ্পোস্সুক্কতাযাতি নিরুস্সুক্কভাৰেন; অদেসেতুকামতাযাতি অত্থো।
Halanti ettha hakāro nipātamatto; alanti attho. Pakāsitunti desituṃ. Alaṃ dāni me imaṃ kicchena adhigataṃ dhammaṃ desetunti vuttaṃ hoti. Paṭisotagāminti paṭisotaṃ vuccati nibbānaṃ; nibbānagāminti attho. Rāgarattāti kāmarāgabhavarāgadiṭṭhirāgena rattā. Na dakkhantīti na passissanti. Tamokhandhena āvuṭāti avijjārāsinā ajjhotthaṭā. Appossukkatāyāti nirussukkabhāvena; adesetukāmatāyāti attho.
৮. যত্র হি নামাতি যস্মিং নাম লোকে। ভগৰতো পুরতো পাতুরহোসীতি ধম্মদেসনাযাচনত্থং দসসু চক্কৰাল়সহস্সেসু মহাব্রহ্মানো গহেত্ৰা আগম্ম ভগৰতো পুরতো পাতুরহোসি । অপ্পরজক্খজাতিকাতি পঞ্ঞামযে অক্খিম্হি অপ্পং রাগদোসমোহরজং এতেসং এৰংসভাৰাতি অপ্পরজক্খজাতিকা। ভৰিস্সন্তি ধম্মস্স অঞ্ঞাতারোতি পটিৰিজ্ঝিতারো।
8.Yatra hi nāmāti yasmiṃ nāma loke. Bhagavato purato pāturahosīti dhammadesanāyācanatthaṃ dasasu cakkavāḷasahassesu mahābrahmāno gahetvā āgamma bhagavato purato pāturahosi . Apparajakkhajātikāti paññāmaye akkhimhi appaṃ rāgadosamoharajaṃ etesaṃ evaṃsabhāvāti apparajakkhajātikā. Bhavissanti dhammassa aññātāroti paṭivijjhitāro.
পাতুরহোসীতি পাতুভৰি। সমলেহি চিন্তিতোতি রাগাদীহি মলেহি সমলেহি ছহি সত্থারেহি চিন্তিতো। অপাপুরেতন্তি ৰিৰর এতং। অমতস্স দ্ৰারন্তি অমতস্স নিব্বানস্স দ্ৰারভূতং অরিযমগ্গং। সুণন্তু ধম্মং ৰিমলেনানুবুদ্ধন্তি ইমে সত্তা রাগাদিমলানং অভাৰতো ৰিমলেন সম্মাসম্বুদ্ধেন অনুবুদ্ধং চতুসচ্চধম্মং সুণন্তু।
Pāturahosīti pātubhavi. Samalehi cintitoti rāgādīhi malehi samalehi chahi satthārehi cintito. Apāpuretanti vivara etaṃ. Amatassa dvāranti amatassa nibbānassa dvārabhūtaṃ ariyamaggaṃ. Suṇantu dhammaṃ vimalenānubuddhanti ime sattā rāgādimalānaṃ abhāvato vimalena sammāsambuddhena anubuddhaṃ catusaccadhammaṃ suṇantu.
সেলে যথা পব্বতমুদ্ধনিট্ঠিতোতি সেলমযে একগ্ঘনে পব্বতমুদ্ধনি যথাঠিতোৰ যথা চক্খুমা পুরিসো সমন্ততো জনতং পস্সেয্য, ত্ৰম্পি সুমেধ সুন্দরপঞ্ঞ সব্বঞ্ঞুতঞ্ঞাণেন সমন্তচক্খু ভগৰা ধম্মমযং পঞ্ঞামযং পাসাদমারুয্হ সযং অপেতসোকো সোকাৰতিণ্ণং জাতিজরাভিভূতঞ্চ জনতং অৰেক্খস্সু উপধারয।
Sele yathā pabbatamuddhaniṭṭhitoti selamaye ekagghane pabbatamuddhani yathāṭhitova yathā cakkhumā puriso samantato janataṃ passeyya, tvampi sumedha sundarapañña sabbaññutaññāṇena samantacakkhu bhagavā dhammamayaṃ paññāmayaṃ pāsādamāruyha sayaṃ apetasoko sokāvatiṇṇaṃ jātijarābhibhūtañca janataṃ avekkhassu upadhāraya.
উট্ঠেহীতি ভগৰতো ধম্মদেসনত্থং চারিকচরণং যাচন্তো ভণতি। ৰীরাতিআদীসু ভগৰা ৰীরিযৰন্ততায ৰীরো। দেৰপুত্তমচ্চুকিলেসাভিসঙ্খারমারানং ৰিজিতত্তা ৰিজিতসঙ্গামো। জাতিকন্তারাদিনিত্থরণসমত্থতায সত্থৰাহো। কামচ্ছন্দইণস্স অভাৰতো অণণো।
Uṭṭhehīti bhagavato dhammadesanatthaṃ cārikacaraṇaṃ yācanto bhaṇati. Vīrātiādīsu bhagavā vīriyavantatāya vīro. Devaputtamaccukilesābhisaṅkhāramārānaṃ vijitattā vijitasaṅgāmo. Jātikantārādinittharaṇasamatthatāya satthavāho. Kāmacchandaiṇassa abhāvato aṇaṇo.
৯. অজ্ঝেসনন্তি যাচনং। বুদ্ধচক্খুনাতি ইন্দ্রিযপরোপরিযত্তঞাণেন চ আসযানুসযঞাণেন চ। ইমেসঞ্হি দ্ৰিন্নং ঞাণানং বুদ্ধচক্খূতি নামং। অপ্পরজক্খাতি পঞ্ঞাচক্খুম্হি রাগাদিরজং অপ্পং যেসং, তে অপ্পরজক্খা। যেসং তং মহন্তং তে মহারজক্খা। যেসং সদ্ধাদীনি ইন্দ্রিযানি তিক্খানি তে তিক্খিন্দ্রিযা। যেসং তানি মুদূনি তে মুদিন্দ্রিযা। যেসং তেযেৰ সদ্ধাদযো আকারা সুন্দরা তে স্ৰাকারা। যেসং তেযেৰ সদ্ধাদযো আকারা অসুন্দরা তে দ্ৰাকারা। যে কথিতকারণং সল্লক্খেন্তি, সুখেন সক্কা হোন্তি ৰিঞ্ঞাপেতুং তে সুৰিঞ্ঞাপযা। যে পরলোকঞ্চ ৰজ্জঞ্চ ভযতো পস্সন্তি তে পরলোকৰজ্জভযদস্সাৰিনো। উপ্পলিনিযন্তি উপ্পলৰনে। ইতরেসুপি এসেৰ নযো। অন্তোনিমুগ্গপোসীনীতি যানি উদকস্স অন্তো নিমুগ্গানেৰ পোসযন্তি। সমোদকং ঠিতানীতি উদকেন সমং ঠিতানি। উদকং অচ্চুগ্গম্ম ঠিতানীতি উদকং অতিক্কমিত্ৰা ঠিতানি।
9.Ajjhesananti yācanaṃ. Buddhacakkhunāti indriyaparopariyattañāṇena ca āsayānusayañāṇena ca. Imesañhi dvinnaṃ ñāṇānaṃ buddhacakkhūti nāmaṃ. Apparajakkhāti paññācakkhumhi rāgādirajaṃ appaṃ yesaṃ, te apparajakkhā. Yesaṃ taṃ mahantaṃ te mahārajakkhā. Yesaṃ saddhādīni indriyāni tikkhāni te tikkhindriyā. Yesaṃ tāni mudūni te mudindriyā. Yesaṃ teyeva saddhādayo ākārā sundarā te svākārā. Yesaṃ teyeva saddhādayo ākārā asundarā te dvākārā. Ye kathitakāraṇaṃ sallakkhenti, sukhena sakkā honti viññāpetuṃ te suviññāpayā. Ye paralokañca vajjañca bhayato passanti te paralokavajjabhayadassāvino. Uppaliniyanti uppalavane. Itaresupi eseva nayo. Antonimuggaposīnīti yāni udakassa anto nimuggāneva posayanti. Samodakaṃ ṭhitānīti udakena samaṃ ṭhitāni. Udakaṃ accuggamma ṭhitānīti udakaṃ atikkamitvā ṭhitāni.
অপারুতাতি ৰিৰটা। অমতস্স দ্ৰারাতি অরিযমগ্গো। সো হি অমতসঙ্খাতস্স নিব্বানস্স দ্ৰারং। পমুঞ্চন্তু সদ্ধন্তি সব্বে অত্তনো সদ্ধং পমুঞ্চন্তু। পচ্ছিমপদদ্ৰযে অযমত্থো , অহঞ্হি অত্তনো পগুণং সুপ্পৰত্তিম্পি ইমং পণীতং উত্তমং ধম্মং কাযৰাচাকিলমথসঞ্ঞী হুত্ৰা মনুজেসু দেৰমনুস্সেসু ন ভাসিন্তি।
Apārutāti vivaṭā. Amatassa dvārāti ariyamaggo. So hi amatasaṅkhātassa nibbānassa dvāraṃ. Pamuñcantu saddhanti sabbe attano saddhaṃ pamuñcantu. Pacchimapadadvaye ayamattho , ahañhi attano paguṇaṃ suppavattimpi imaṃ paṇītaṃ uttamaṃ dhammaṃ kāyavācākilamathasaññī hutvā manujesu devamanussesu na bhāsinti.
ব্রহ্মযাচনকথা নিট্ঠিতা।
Brahmayācanakathā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৫. ব্রহ্মযাচনকথা • 5. Brahmayācanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ব্রহ্মযাচনকথাৰণ্ণনা • Brahmayācanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ব্রহ্মযাচনকথাৰণ্ণনা • Brahmayācanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ব্রহ্মযাচনকথাৰণ্ণনা • Brahmayācanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫. ব্রহ্মযাচনকথা • 5. Brahmayācanakathā
