| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
ப்³ரஹ்மயாசனகதா²வண்ணனா
Brahmayācanakathāvaṇṇanā
7. அதி⁴க³தோ கோ² ம்யாயந்திஆதி³ம்ஹி த⁴ம்மோதி சதுஸச்சத⁴ம்மோ, க³ம்பீ⁴ரத்தா து³த்³த³ஸோ. து³த்³த³ஸத்தா து³ரனுபோ³தோ⁴. ஸந்தோதி நிப்³பு³தோ. பணீதோதி அதப்பகோ. இத³ங் த்³வயங் லோகுத்தரமேவ ஸந்தா⁴ய வுத்தங். அதக்காவசரோதி தக்கேன ஆகாரபரிவிதக்கேன ஓகா³ஹிதப்³போ³ ந ஹோதி, ஞாணேனேவ அவசரிதப்³போ³தி அத்தோ². பண்டி³தவேத³னீயோதி ஸம்மாபடிபத³ங் படிபன்னேஹி பண்டி³தேஹி வேத³னீயோ. ஸப்³ப³ஸங்கா²ரஸமதோ²திஆதி³ ஸப்³ப³ங் நிப்³பா³னமேவ. தஞ்ஹி ப²லூபசாரேன ஏகம்பி ஸமானங் ததா² ததா² வுச்சதி. ராமாதி பஜா. அனு அனு அச்ச²ரியா அனச்ச²ரியா. தேஸங் ப⁴க³வதோ புப்³ப³பா⁴க³படிபத³ங் ஸுதபுப்³பா³னங், த⁴ம்மஸ்ஸ வா க³ம்பீ⁴ரபா⁴வங் அதி⁴க³தபுப்³பா³னங். கிஞ்சாபி ப⁴க³வதோ சத்தாரோபி மக்³கா³ ஸுக²ப்படிபதா³, ததா²பி போ³தி⁴ஸத்தபடிபத³ங் ஸந்தா⁴ய ‘‘கிச்சே²ன மே’’தி வுத்தங். ‘‘பகாஸிதங் பகாஸிது’’ந்தி உப⁴யதா²பி பாடோ². பரேதேஹி யுத்தேஹி. ராக³ரத்தாதி காமராக³தி³ட்டி²ராகே³ஹி ரத்தா. அத்தனிச்சாதி³கா³ஹகா ந த³க்க²ந்தி ந பஸ்ஸிஸ்ஸந்தி.
7.Adhigatokho myāyantiādimhi dhammoti catusaccadhammo, gambhīrattā duddaso. Duddasattā duranubodho. Santoti nibbuto. Paṇītoti atappako. Idaṃ dvayaṃ lokuttarameva sandhāya vuttaṃ. Atakkāvacaroti takkena ākāraparivitakkena ogāhitabbo na hoti, ñāṇeneva avacaritabboti attho. Paṇḍitavedanīyoti sammāpaṭipadaṃ paṭipannehi paṇḍitehi vedanīyo. Sabbasaṅkhārasamathotiādi sabbaṃ nibbānameva. Tañhi phalūpacārena ekampi samānaṃ tathā tathā vuccati. Rāmāti pajā. Anu anu acchariyā anacchariyā. Tesaṃ bhagavato pubbabhāgapaṭipadaṃ sutapubbānaṃ, dhammassa vā gambhīrabhāvaṃ adhigatapubbānaṃ. Kiñcāpi bhagavato cattāropi maggā sukhappaṭipadā, tathāpi bodhisattapaṭipadaṃ sandhāya ‘‘kicchena me’’ti vuttaṃ. ‘‘Pakāsitaṃ pakāsitu’’nti ubhayathāpi pāṭho. Paretehi yuttehi. Rāgarattāti kāmarāgadiṭṭhirāgehi rattā. Attaniccādigāhakā na dakkhanti na passissanti.
8. ஸஹங்பதி கிர ‘‘நஸ்ஸதி வத போ⁴ லோகோ’’தி இமங் ஸத்³த³ங் ததா² நிச்சா²ரேதி, யதா² த³ஸஸஹஸ்ஸிலோகதா⁴துப்³ரஹ்மானோ ஸுத்வா ஸன்னிபதிங்ஸு. பஞ்ஞாமயே அக்கி²ம்ஹி ஸந்தானானுஸயிதவஸேன அப்பங் பரித்தங் ராகா³தி³ரஜங் ஏதேஸங், ஏவங்ஸபா⁴வாதி அப்பரஜக்க²ஜாதிகா. அஸ்ஸவனதாதி அஸ்ஸவனதாய.
8. Sahaṃpati kira ‘‘nassati vata bho loko’’ti imaṃ saddaṃ tathā nicchāreti, yathā dasasahassilokadhātubrahmāno sutvā sannipatiṃsu. Paññāmaye akkhimhi santānānusayitavasena appaṃ parittaṃ rāgādirajaṃ etesaṃ, evaṃsabhāvāti apparajakkhajātikā. Assavanatāti assavanatāya.
ஸமலேஹி ஸத்தா²ரேஹி. அபாபுரேதந்தி விவர ஏதங். அமதஸ்ஸ த்³வாரந்தி அரியமக்³க³ங், சதுஸச்சத⁴ம்மங் வா. விஜ்ஜத்தயசதுமக்³க³ஞாணேஹி புனப்புனங் பு³த்³த⁴ங் படிவித்³த⁴ங். ஸேலேதி ஸிலாமயே. விக³தரஜத்தா ஸுக²த³ஸ்ஸனயொக்³கே³ இதோ ச எத்தோ ச ஆக³ந்த்வா யதா² டி²தோ சக்கு²மா புரிஸோ ஸமந்ததோ ஜனதங் பஸ்ஸெய்ய. த்வம்பி ஸுமேத⁴ ஸுந்த³ரபஞ்ஞ ஸப்³ப³ஞ்ஞுதஞ்ஞாணாதி⁴க³மாய ஸமந்தசக்கு². ஸப்³ப³கிலேஸஸங்கா³மானங் விஜிதத்தா விஜிதஸங்கா³ம. ஜாதிகந்தாராதி³னித்த²ரணத்த²ங் வேனெய்யஜனஸத்த²வாஹனஸமத்த²தாய ஸத்த²வாஹ. காமச்ச²ந்த³இணஸ்ஸ அபா⁴வதோ அணண.
Samalehi satthārehi. Apāpuretanti vivara etaṃ. Amatassa dvāranti ariyamaggaṃ, catusaccadhammaṃ vā. Vijjattayacatumaggañāṇehi punappunaṃ buddhaṃ paṭividdhaṃ. Seleti silāmaye. Vigatarajattā sukhadassanayogge ito ca etto ca āgantvā yathā ṭhito cakkhumā puriso samantato janataṃ passeyya. Tvampi sumedha sundarapañña sabbaññutaññāṇādhigamāya samantacakkhu. Sabbakilesasaṅgāmānaṃ vijitattā vijitasaṅgāma. Jātikantārādinittharaṇatthaṃ veneyyajanasatthavāhanasamatthatāya satthavāha. Kāmacchandaiṇassa abhāvato aṇaṇa.
9. பு³த்³த⁴சக்கு²னா இந்த்³ரியபரோபரியத்தஞாணேன ச ஆஸயானுஸயஞாணேன ச. இமேஸஞ்ஹி த்³வின்னங் ஞாணானங் ‘‘பு³த்³த⁴சக்கூ²’’தி நாமங். உப்பலினியந்தி உப்பலவனே. ஏவங் ஸேஸேஸுபி . அந்தோ நிமுக்³க³போஸீனீதி யானி அந்தோ நிமுக்³கா³னேவ போஸியந்தி, தத்த² யானி உத³கங் அச்சுக்³க³ம்ம டி²தானி, தானி ஸூரியரங்ஸிஸம்ப²ஸ்ஸங் ஆக³மயமானானி டி²தானி அஜ்ஜ புப்ப²னகானி. யானி ஸமோத³கங் டி²தானி, தானி ஸ்வே புப்ப²னகானி. யானி உத³கானுக்³க³தானி, தானி ததியதி³வஸே புப்ப²னகானி. உத³கா பன அனுக்³க³தானி அஞ்ஞானிபி ஸரோக³உப்பலாதீ³னி நாம ஹொந்தி. யானி நேவ புப்பி²ஸ்ஸந்தி மச்ச²கச்ச²பப⁴க்கா²னேவ ப⁴விஸ்ஸந்தி, தானி பாளினாருள்ஹானி, ஆஹரித்வா பன தீ³பேதப்³பா³னி. ஏதேஹி உக்³க⁴டிதஞ்ஞூ விபஞ்சிதஞ்ஞூ நெய்யோ பத³பரமோதி சத்தாரோ புக்³க³லா யோஜேதப்³பா³. பச்சபா⁴ஸீதி பதி அபா⁴ஸி.
9.Buddhacakkhunā indriyaparopariyattañāṇena ca āsayānusayañāṇena ca. Imesañhi dvinnaṃ ñāṇānaṃ ‘‘buddhacakkhū’’ti nāmaṃ. Uppaliniyanti uppalavane. Evaṃ sesesupi . Anto nimuggaposīnīti yāni anto nimuggāneva posiyanti, tattha yāni udakaṃ accuggamma ṭhitāni, tāni sūriyaraṃsisamphassaṃ āgamayamānāni ṭhitāni ajja pupphanakāni. Yāni samodakaṃ ṭhitāni, tāni sve pupphanakāni. Yāni udakānuggatāni, tāni tatiyadivase pupphanakāni. Udakā pana anuggatāni aññānipi sarogauppalādīni nāma honti. Yāni neva pupphissanti macchakacchapabhakkhāneva bhavissanti, tāni pāḷināruḷhāni, āharitvā pana dīpetabbāni. Etehi ugghaṭitaññū vipañcitaññū neyyo padaparamoti cattāro puggalā yojetabbā. Paccabhāsīti pati abhāsi.
அபாருதாதி விவடா. பச்சி²மஸ்ஸ பத³த்³வயஸ்ஸ அயமத்தோ². அஹஞ்ஹி அத்தனோ பகு³ணங் ஸுப்பவத்தம்பி இமங் பணீதங் உத்தமங் த⁴ம்மங் காயவாசாகிலமத²ஸஞ்ஞீ ஹுத்வா நாபா⁴ஸி.
Apārutāti vivaṭā. Pacchimassa padadvayassa ayamattho. Ahañhi attano paguṇaṃ suppavattampi imaṃ paṇītaṃ uttamaṃ dhammaṃ kāyavācākilamathasaññī hutvā nābhāsi.
ப்³ரஹ்மயாசனகதா²வண்ணனா நிட்டி²தா.
Brahmayācanakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 5. ப்³ரஹ்மயாசனகதா² • 5. Brahmayācanakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ப்³ரஹ்மயாசனகதா² • Brahmayācanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ப்³ரஹ்மயாசனகதா²வண்ணனா • Brahmayācanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / ப்³ரஹ்மயாசனகதா²வண்ணனா • Brahmayācanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. ப்³ரஹ்மயாசனகதா² • 5. Brahmayācanakathā
