| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ப்³ரஹ்மயாசனகதா²வண்ணனா
Brahmayācanakathāvaṇṇanā
7. ஆலீயந்தி ஸேவீயந்தீதி ஆலயா. பஞ்ச காமகு³ணாதி ஆஹ ‘‘ஸத்தா…பே॰… வுச்சந்தீ’’தி. ஸுட்டு² முதி³தாதி அதிவிய பமுதி³தா. டா²னங் ஸந்தா⁴யாதி டா²ன-ஸத்³த³ங் அபெக்கி²த்வா. இமேஸந்தி ஸங்கா²ராதீ³னங் ப²லானங். பாளியங் ஸப்³ப³ஸங்கா²ரஸமதோ²திஆதீ³னி நிப்³பா³னவேவசனானி. அபிஸ்ஸூதி ஸம்பிண்ட³னத்தே² நிபாதோ. ந கேவலங் ஏதத³ஹோஸி, இமாபி கா³தா² படிப⁴ங்ஸூதி அத்தோ².
7. Ālīyanti sevīyantīti ālayā. Pañca kāmaguṇāti āha ‘‘sattā…pe… vuccantī’’ti. Suṭṭhu muditāti ativiya pamuditā. Ṭhānaṃ sandhāyāti ṭhāna-saddaṃ apekkhitvā. Imesanti saṅkhārādīnaṃ phalānaṃ. Pāḷiyaṃ sabbasaṅkhārasamathotiādīni nibbānavevacanāni. Apissūti sampiṇḍanatthe nipāto. Na kevalaṃ etadahosi, imāpi gāthā paṭibhaṃsūti attho.
கிச்சே²ன மே அதி⁴க³தந்தி பாரமிபூரணங் ஸந்தா⁴ய வுத்தங், ந து³க்கா²படிபத³ங். பு³த்³தா⁴னஞ்ஹி சத்தாரோ மக்³கா³ ஸுகா²படிபதா³வ ஹொந்தி. ஹ-இதி ப்³யத்தங், ஏகங்ஸந்தி த்³வீஸு அத்தே²ஸு நிபாதோ, ப்³யத்தங், ஏகங்ஸேன வா அலந்தி வியோஜெந்தி. ஹலந்தி வா ஏகோ நிபாதோ.
Kicchena me adhigatanti pāramipūraṇaṃ sandhāya vuttaṃ, na dukkhāpaṭipadaṃ. Buddhānañhi cattāro maggā sukhāpaṭipadāva honti. Ha-iti byattaṃ, ekaṃsanti dvīsu atthesu nipāto, byattaṃ, ekaṃsena vā alanti viyojenti. Halanti vā eko nipāto.
8. பாளியங் ஸஹம்பதிஸ்ஸாதி ஸோ கிர கஸ்ஸபஸ்ஸ ப⁴க³வதோ ஸாஸனே ஸஹகோ நாம தே²ரோ பட²மஜ்ஜா²னபூ⁴மியங் ப்³ரஹ்மபதி ஹுத்வா நிப்³ப³த்தோ, தேன நங் ‘‘ஸஹம்பதீ’’தி ஸஞ்ஜானிங்ஸு. அஸ்ஸவனதாதி அஸ்ஸவனதாய, அஸ்ஸவனேனாதி அத்தோ². ஸவனமேவ ஹி ஸவனதா யதா² தே³வதாதி.
8. Pāḷiyaṃ sahampatissāti so kira kassapassa bhagavato sāsane sahako nāma thero paṭhamajjhānabhūmiyaṃ brahmapati hutvā nibbatto, tena naṃ ‘‘sahampatī’’ti sañjāniṃsu. Assavanatāti assavanatāya, assavanenāti attho. Savanameva hi savanatā yathā devatāti.
த⁴ம்மோ அஸுத்³தோ⁴தி மிச்சா²தி³ட்டி²த⁴ம்மோ. ஸமலேஹீதி பூரணகஸ்ஸபாதீ³ஹி ச²ஹி ஸத்தா²ரேஹி. அபாபுராதி தே³ஸனாஹத்தே²ன விவர. த்³வாரந்தி அரியமக்³க³ங் ஸந்தா⁴ய வத³தி.
Dhammo asuddhoti micchādiṭṭhidhammo. Samalehīti pūraṇakassapādīhi chahi satthārehi. Apāpurāti desanāhatthena vivara. Dvāranti ariyamaggaṃ sandhāya vadati.
ஸேலேதி க⁴னஸிலாமயே. ததூ²பமந்தி எத்த² ததா²-ஸத்³தோ³ தங்-ஸத்³த³த்தே² த³ட்ட²ப்³போ³. தேன ஸோ ஸேலபப்³ப³தோ உபமா யஸ்ஸ. தங் ததூ²பமந்தி அத்தோ². தேன வா பப்³ப³தாதி³னா பகாரேன உபமா அஸ்ஸாதிபி அத்தோ². த⁴ம்மமயந்தி லோகுத்தரத⁴ம்மபூ⁴தங். உட்டா²ஹீதி த⁴ம்மதே³ஸனத்தா²ய சாரிகசரணத்த²ங் இமம்ஹா ஆஸனா காயேன, அப்பொஸ்ஸுக்கபா⁴வதோ வா சித்தேன உட்டே²ஹி, அயமேவ வா பாடோ². தேனேவ ‘‘விசர, தே³ஸஸ்ஸூ’’தி து³விதே⁴பி காயசித்தபயோகே³ நியோஜேஸி. வீராதிஆதி³ சத்தாரி து²திவஸேன ஸம்போ³த⁴னானி.
Seleti ghanasilāmaye. Tathūpamanti ettha tathā-saddo taṃ-saddatthe daṭṭhabbo. Tena so selapabbato upamā yassa. Taṃ tathūpamanti attho. Tena vā pabbatādinā pakārena upamā assātipi attho. Dhammamayanti lokuttaradhammabhūtaṃ. Uṭṭhāhīti dhammadesanatthāya cārikacaraṇatthaṃ imamhā āsanā kāyena, appossukkabhāvato vā cittena uṭṭhehi, ayameva vā pāṭho. Teneva ‘‘vicara, desassū’’ti duvidhepi kāyacittapayoge niyojesi. Vīrātiādi cattāri thutivasena sambodhanāni.
9. பு³த்³த⁴சக்கு²னாதி இந்த்³ரியபரோபரியத்தஞாணேன, ஆஸயானுஸயஞாணேன ச. இமேஸஞ்ஹி த்³வின்னங் ‘‘பு³த்³த⁴சக்கூ²’’தி நாமங். ஸ்வாகாராதி ஸத்³தி⁴ந்த்³ரியாத³யோவ ஆகாரா ஸுந்த³ரா யேஸங், தே ஸ்வாகாரா, ஸுவிஞ்ஞாபயா, பரலோகஞ்ச வஜ்ஜஞ்ச ப⁴யதோ த³ஸ்ஸனஸீலா சாதி த³ட்ட²ப்³ப³ங். உப்பலானி எத்த² ஸந்தீதி உப்பலினீதி க³ச்ச²லதாபி பொக்க²ரணீபி வுச்சதி. இத⁴ பன பொக்க²ரணீ. ஏவமிதரேஸுபி. உத³கானுக்³க³தானீதி உத³கதோ அனுக்³க³தானி. அந்தோ நிமுக்³கா³னேவ ஹுத்வா புஸந்தி வட்³ட⁴ந்தி, தானி அந்தோனிமுக்³க³போஸீனி. அச்சுக்³க³ம்மாதி உத³கங் அதிக்கமனவஸேன உக்³க³ந்த்வா.
9.Buddhacakkhunāti indriyaparopariyattañāṇena, āsayānusayañāṇena ca. Imesañhi dvinnaṃ ‘‘buddhacakkhū’’ti nāmaṃ. Svākārāti saddhindriyādayova ākārā sundarā yesaṃ, te svākārā, suviññāpayā, paralokañca vajjañca bhayato dassanasīlā cāti daṭṭhabbaṃ. Uppalāni ettha santīti uppalinīti gacchalatāpi pokkharaṇīpi vuccati. Idha pana pokkharaṇī. Evamitaresupi. Udakānuggatānīti udakato anuggatāni. Anto nimuggāneva hutvā pusanti vaḍḍhanti, tāni antonimuggaposīni. Accuggammāti udakaṃ atikkamanavasena uggantvā.
அபாருதாதி விவடா. தேஸந்தி ஸஉபனிஸ்ஸயானங் ஸத்தானங். த்³வாராதி அரியமக்³க³த்³வாரானி. இத³ஞ்ச அத்தனோ ஸயம்பு⁴ஞாணேன ஸஉபனிஸ்ஸயானங் தேஸங் மக்³கு³ப்பத்திதி³ட்ட²தங் ஸந்தா⁴ய வத³தி. விஹிங்ஸஸஞ்ஞீதிஆதீ³ஸு ஏவமத்தோ² த³ட்ட²ப்³போ³ – ‘‘அஹஞ்ஹி அத்தனோ பகு³ணங் ஸுப்பவத்திதம்பி இமங் பணீதங் த⁴ம்மங் அஜானந்தேஸு மனுஜேஸு தே³ஸனாய விஹிங்ஸா காயவாசாகிலமதோ² ஹோதீ’’தி ஏவங் விஹிங்ஸஸஞ்ஞீ ஹுத்வா ந பா⁴ஸிங் பா⁴ஸிதுங் ந இச்சி²ங். இதா³னி பன ஹேதுஸம்பன்னா அத்தனோ ஸத்³தா⁴பா⁴ஜனங் விவரந்து, பூரெஸ்ஸாமி நேஸங் ஸங்கப்பந்தி.
Apārutāti vivaṭā. Tesanti saupanissayānaṃ sattānaṃ. Dvārāti ariyamaggadvārāni. Idañca attano sayambhuñāṇena saupanissayānaṃ tesaṃ magguppattidiṭṭhataṃ sandhāya vadati. Vihiṃsasaññītiādīsu evamattho daṭṭhabbo – ‘‘ahañhi attano paguṇaṃ suppavattitampi imaṃ paṇītaṃ dhammaṃ ajānantesu manujesu desanāya vihiṃsā kāyavācākilamatho hotī’’ti evaṃ vihiṃsasaññī hutvā na bhāsiṃ bhāsituṃ na icchiṃ. Idāni pana hetusampannā attano saddhābhājanaṃ vivarantu, pūressāmi nesaṃ saṅkappanti.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi / 5. ப்³ரஹ்மயாசனகதா² • 5. Brahmayācanakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / ப்³ரஹ்மயாசனகதா² • Brahmayācanakathā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / ப்³ரஹ்மயாசனகதா²வண்ணனா • Brahmayācanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / ப்³ரஹ்மயாசனகதா²வண்ணனா • Brahmayācanakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 5. ப்³ரஹ்மயாசனகதா² • 5. Brahmayācanakathā
