| Library / Tipiṭaka / তিপিটক • Tipiṭaka / ৰজিরবুদ্ধি-টীকা • Vajirabuddhi-ṭīkā |
ব্রহ্মযাচনকথাৰণ্ণনা
Brahmayācanakathāvaṇṇanā
৭. অধিগতো খো ম্যাযন্তিআদিম্হি ধম্মোতি চতুসচ্চধম্মো, গম্ভীরত্তা দুদ্দসো। দুদ্দসত্তা দুরনুবোধো। সন্তোতি নিব্বুতো। পণীতোতি অতপ্পকো। ইদং দ্ৰযং লোকুত্তরমেৰ সন্ধায ৰুত্তং। অতক্কাৰচরোতি তক্কেন আকারপরিৰিতক্কেন ওগাহিতব্বো ন হোতি, ঞাণেনেৰ অৰচরিতব্বোতি অত্থো। পণ্ডিতৰেদনীযোতি সম্মাপটিপদং পটিপন্নেহি পণ্ডিতেহি ৰেদনীযো। সব্বসঙ্খারসমথোতিআদি সব্বং নিব্বানমেৰ। তঞ্হি ফলূপচারেন একম্পি সমানং তথা তথা ৰুচ্চতি। রামাতি পজা। অনু অনু অচ্ছরিযা অনচ্ছরিযা। তেসং ভগৰতো পুব্বভাগপটিপদং সুতপুব্বানং, ধম্মস্স ৰা গম্ভীরভাৰং অধিগতপুব্বানং। কিঞ্চাপি ভগৰতো চত্তারোপি মগ্গা সুখপ্পটিপদা, তথাপি বোধিসত্তপটিপদং সন্ধায ‘‘কিচ্ছেন মে’’তি ৰুত্তং। ‘‘পকাসিতং পকাসিতু’’ন্তি উভযথাপি পাঠো। পরেতেহি যুত্তেহি। রাগরত্তাতি কামরাগদিট্ঠিরাগেহি রত্তা। অত্তনিচ্চাদিগাহকা ন দক্খন্তি ন পস্সিস্সন্তি।
7.Adhigatokho myāyantiādimhi dhammoti catusaccadhammo, gambhīrattā duddaso. Duddasattā duranubodho. Santoti nibbuto. Paṇītoti atappako. Idaṃ dvayaṃ lokuttarameva sandhāya vuttaṃ. Atakkāvacaroti takkena ākāraparivitakkena ogāhitabbo na hoti, ñāṇeneva avacaritabboti attho. Paṇḍitavedanīyoti sammāpaṭipadaṃ paṭipannehi paṇḍitehi vedanīyo. Sabbasaṅkhārasamathotiādi sabbaṃ nibbānameva. Tañhi phalūpacārena ekampi samānaṃ tathā tathā vuccati. Rāmāti pajā. Anu anu acchariyā anacchariyā. Tesaṃ bhagavato pubbabhāgapaṭipadaṃ sutapubbānaṃ, dhammassa vā gambhīrabhāvaṃ adhigatapubbānaṃ. Kiñcāpi bhagavato cattāropi maggā sukhappaṭipadā, tathāpi bodhisattapaṭipadaṃ sandhāya ‘‘kicchena me’’ti vuttaṃ. ‘‘Pakāsitaṃ pakāsitu’’nti ubhayathāpi pāṭho. Paretehi yuttehi. Rāgarattāti kāmarāgadiṭṭhirāgehi rattā. Attaniccādigāhakā na dakkhanti na passissanti.
৮. সহংপতি কির ‘‘নস্সতি ৰত ভো লোকো’’তি ইমং সদ্দং তথা নিচ্ছারেতি, যথা দসসহস্সিলোকধাতুব্রহ্মানো সুত্ৰা সন্নিপতিংসু। পঞ্ঞামযে অক্খিম্হি সন্তানানুসযিতৰসেন অপ্পং পরিত্তং রাগাদিরজং এতেসং, এৰংসভাৰাতি অপ্পরজক্খজাতিকা। অস্সৰনতাতি অস্সৰনতায।
8. Sahaṃpati kira ‘‘nassati vata bho loko’’ti imaṃ saddaṃ tathā nicchāreti, yathā dasasahassilokadhātubrahmāno sutvā sannipatiṃsu. Paññāmaye akkhimhi santānānusayitavasena appaṃ parittaṃ rāgādirajaṃ etesaṃ, evaṃsabhāvāti apparajakkhajātikā. Assavanatāti assavanatāya.
সমলেহি সত্থারেহি। অপাপুরেতন্তি ৰিৰর এতং। অমতস্স দ্ৰারন্তি অরিযমগ্গং, চতুসচ্চধম্মং ৰা। ৰিজ্জত্তযচতুমগ্গঞাণেহি পুনপ্পুনং বুদ্ধং পটিৰিদ্ধং। সেলেতি সিলামযে। ৰিগতরজত্তা সুখদস্সনযোগ্গে ইতো চ এত্তো চ আগন্ত্ৰা যথা ঠিতো চক্খুমা পুরিসো সমন্ততো জনতং পস্সেয্য। ত্ৰম্পি সুমেধ সুন্দরপঞ্ঞ সব্বঞ্ঞুতঞ্ঞাণাধিগমায সমন্তচক্খু। সব্বকিলেসসঙ্গামানং ৰিজিতত্তা ৰিজিতসঙ্গাম। জাতিকন্তারাদিনিত্থরণত্থং ৰেনেয্যজনসত্থৰাহনসমত্থতায সত্থৰাহ। কামচ্ছন্দইণস্স অভাৰতো অণণ।
Samalehi satthārehi. Apāpuretanti vivara etaṃ. Amatassa dvāranti ariyamaggaṃ, catusaccadhammaṃ vā. Vijjattayacatumaggañāṇehi punappunaṃ buddhaṃ paṭividdhaṃ. Seleti silāmaye. Vigatarajattā sukhadassanayogge ito ca etto ca āgantvā yathā ṭhito cakkhumā puriso samantato janataṃ passeyya. Tvampi sumedha sundarapañña sabbaññutaññāṇādhigamāya samantacakkhu. Sabbakilesasaṅgāmānaṃ vijitattā vijitasaṅgāma. Jātikantārādinittharaṇatthaṃ veneyyajanasatthavāhanasamatthatāya satthavāha. Kāmacchandaiṇassa abhāvato aṇaṇa.
৯. বুদ্ধচক্খুনা ইন্দ্রিযপরোপরিযত্তঞাণেন চ আসযানুসযঞাণেন চ। ইমেসঞ্হি দ্ৰিন্নং ঞাণানং ‘‘বুদ্ধচক্খূ’’তি নামং। উপ্পলিনিযন্তি উপ্পলৰনে। এৰং সেসেসুপি । অন্তো নিমুগ্গপোসীনীতি যানি অন্তো নিমুগ্গানেৰ পোসিযন্তি, তত্থ যানি উদকং অচ্চুগ্গম্ম ঠিতানি, তানি সূরিযরংসিসম্ফস্সং আগমযমানানি ঠিতানি অজ্জ পুপ্ফনকানি। যানি সমোদকং ঠিতানি, তানি স্ৰে পুপ্ফনকানি। যানি উদকানুগ্গতানি, তানি ততিযদিৰসে পুপ্ফনকানি। উদকা পন অনুগ্গতানি অঞ্ঞানিপি সরোগউপ্পলাদীনি নাম হোন্তি। যানি নেৰ পুপ্ফিস্সন্তি মচ্ছকচ্ছপভক্খানেৰ ভৰিস্সন্তি, তানি পাল়িনারুল়্হানি, আহরিত্ৰা পন দীপেতব্বানি। এতেহি উগ্ঘটিতঞ্ঞূ ৰিপঞ্চিতঞ্ঞূ নেয্যো পদপরমোতি চত্তারো পুগ্গলা যোজেতব্বা। পচ্চভাসীতি পতি অভাসি।
9.Buddhacakkhunā indriyaparopariyattañāṇena ca āsayānusayañāṇena ca. Imesañhi dvinnaṃ ñāṇānaṃ ‘‘buddhacakkhū’’ti nāmaṃ. Uppaliniyanti uppalavane. Evaṃ sesesupi . Anto nimuggaposīnīti yāni anto nimuggāneva posiyanti, tattha yāni udakaṃ accuggamma ṭhitāni, tāni sūriyaraṃsisamphassaṃ āgamayamānāni ṭhitāni ajja pupphanakāni. Yāni samodakaṃ ṭhitāni, tāni sve pupphanakāni. Yāni udakānuggatāni, tāni tatiyadivase pupphanakāni. Udakā pana anuggatāni aññānipi sarogauppalādīni nāma honti. Yāni neva pupphissanti macchakacchapabhakkhāneva bhavissanti, tāni pāḷināruḷhāni, āharitvā pana dīpetabbāni. Etehi ugghaṭitaññū vipañcitaññū neyyo padaparamoti cattāro puggalā yojetabbā. Paccabhāsīti pati abhāsi.
অপারুতাতি ৰিৰটা। পচ্ছিমস্স পদদ্ৰযস্স অযমত্থো। অহঞ্হি অত্তনো পগুণং সুপ্পৰত্তম্পি ইমং পণীতং উত্তমং ধম্মং কাযৰাচাকিলমথসঞ্ঞী হুত্ৰা নাভাসি।
Apārutāti vivaṭā. Pacchimassa padadvayassa ayamattho. Ahañhi attano paguṇaṃ suppavattampi imaṃ paṇītaṃ uttamaṃ dhammaṃ kāyavācākilamathasaññī hutvā nābhāsi.
ব্রহ্মযাচনকথাৰণ্ণনা নিট্ঠিতা।
Brahmayācanakathāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi / ৫. ব্রহ্মযাচনকথা • 5. Brahmayācanakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / ব্রহ্মযাচনকথা • Brahmayācanakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ব্রহ্মযাচনকথাৰণ্ণনা • Brahmayācanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ব্রহ্মযাচনকথাৰণ্ণনা • Brahmayācanakathāvaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৫. ব্রহ্মযাচনকথা • 5. Brahmayācanakathā
