б̣рахмаяаажанагат̇ааван̣н̣анаа

7. аажин̣н̣асамаажин̣н̣од̇и аажарид̇о жзва аажаранд̇зхи жа саммад̣̇зва аажарид̇од̇и ад̇т̇о. зд̇зна аяам̣ баривид̇агго саб̣б̣аб̣уд̣̇д̇хаанам̣ батамаабхисамб̣од̇хияам̣ уббаж̇ж̇ад̇зваад̇и аяамзд̇т̇а д̇хаммад̇аад̇и д̣̇ассзд̇и. г̇амбхийроби д̇хаммо бадибагкавид̇хаманзна субаагадо бхавзяяа, бадибагкавид̇хаманам̣ бана саммаабадибад̇д̇ибадиб̣ад̣̇д̇хам̣, саа сад̣̇д̇хаммасаванаад̇хийнаа, д̇ам̣ сад̇т̇ари д̇хаммз жа басаад̣̇ааяад̇д̇ам̣. со висзсад̇о логз самбхааванийяасса г̇аругаад̇аб̣б̣асса абхибад̇т̇анаахзд̇угод̇и барамбарааяа сад̇д̇аанам̣ д̇хаммасамбадибад̇д̇ияаа б̣рахмуно яаажанаанимид̇д̇анд̇и д̇ам̣ д̣̇ассзнд̇о ‘‘б̣рахмунаа яаажид̇з д̣̇зсзд̇угаамад̇ааяаа’’д̇иаад̣̇имааха.

ад̇хиг̇ад̇од̇и бадивид̣̇д̇хо, саяамбхуун̃аан̣зна ‘‘ид̣̇ам̣ д̣̇угка’’нд̇иаад̣̇инаа яат̇аабхууд̇ам̣ аваб̣уд̣̇д̇ход̇и ад̇т̇о. д̇хаммод̇и жад̇усажжад̇хаммо д̇аб̣б̣инимуд̇д̇асса бадивиж̇жхид̇аб̣б̣ад̇хаммасса абхаавад̇о. г̇амбхийрод̇и махаасамуд̣̇д̣̇о вияа магасад̇ун̣д̣асуужияаа ан̃н̃ад̇ра самубажид̇абарибагган̃аан̣асамбхаарзхи ан̃н̃зсам̣ н̃аан̣зна алаб̣бханзяяабад̇идто. г̇амбхийрад̇д̇аава д̣̇уд̣̇д̣̇асо д̣̇угкзна д̣̇адтаб̣б̣о, на саггаа сукзна д̣̇адтум̣. яо хи алаб̣бханзяяабад̇идто, со ог̇аахид̇ум̣ асаггун̣зяяад̇ааяа саруубад̇о жа висзсад̇о жа сукзна бассид̇ум̣ на саггаа, ат̇а ко гижчзна гзнажи гад̣̇аажид̣̇зва д̣̇адтаб̣б̣о. д̣̇уд̣̇д̣̇асад̇д̇аава д̣̇урануб̣од̇хо д̣̇угкзна аваб̣уж̇жхид̇аб̣б̣о, на саггаа сукзна аваб̣уж̇жхид̇ум̣. яан̃хи д̣̇адтумзва на саггаа, д̇асса ог̇аахзд̇ваа ануб̣уж̇жханз гат̇аа зва над̇т̇и аваб̣од̇хасса д̣̇уггарабхаавад̇о. имасмим̣ таанз ‘‘д̇ам̣ гим̣ ман̃н̃ат̇а, бхигкавз, гад̇амам̣ ну ко д̣̇уггарад̇арам̣ ваа д̣̇урабхисамбхавад̇арам̣ ваа’’д̇и (сам̣. ни. 5.1115) суд̇д̇абад̣̇ам̣ вад̇д̇аб̣б̣ам̣.

санд̇од̇и анубасанд̇асабхааваанам̣ гилзсаанам̣ сан̇каараанан̃жа абхаавад̇о вуубасанд̇асаб̣б̣абарил̣аахад̇ааяа санд̇о ниб̣б̣уд̇о, санд̇аарамман̣ад̇ааяа ваа санд̇о. зд̇т̇а жа нирод̇хасажжам̣ санд̇ам̣ аарамман̣анд̇и санд̇аарамман̣ам̣, маг̇г̇асажжам̣ санд̇ам̣ санд̇аарамман̣ан̃жаад̇и санд̇аарамман̣ам̣. бад̇хаанабхаавам̣ нийд̇од̇и бан̣ийд̇о. ат̇а ваа бан̣ийд̇од̇и ад̇ид̇д̇игаран̣адтзна ад̇аббаго саад̣̇урасабхож̇анам̣ вияа. санд̇абан̣ийд̇абхаавзнзва жзд̇т̇а асзжанагад̇ааяа ад̇аббагад̇аа д̣̇адтаб̣б̣аа. ид̣̇ан̃хи д̣̇ваяам̣ логуд̇д̇арамзва санд̇хааяа вуд̇д̇ам̣. ад̇аггааважарод̇и уд̇д̇аман̃аан̣ависаяад̇д̇аа д̇аггзна аважарид̇аб̣б̣о ог̇аахид̇аб̣б̣о на ход̇и, н̃аан̣знзва аважарид̇аб̣б̣о. д̇ад̇о зва нибун̣ан̃аан̣аг̇ожарад̇ааяа сан̣хасукумасабхаавад̇д̇аа жа нибун̣о сан̣хо. бан̣д̣ид̇авзд̣̇анийяод̇и б̣аалаанам̣ ависаяад̇д̇аа саммаабадибад̣̇ам̣ бадибаннзхи бан̣д̣ид̇зхи зва взд̣̇ид̇аб̣б̣о.

аллийяанд̇и абхирамид̇аб̣б̣адтзна сзвияанд̇ийд̇и аалаяаа, бан̃жа гаамаг̇ун̣аад̇и ааха ‘‘сад̇д̇аа бан̃жагаамаг̇ун̣з аллийяанд̇и, д̇асмаа д̇з аалаяаад̇и вужжанд̇ий’’д̇и. д̇ад̇т̇а бан̃жагаамаг̇ун̣з аллийяанд̇ийд̇и бан̃жагаамаг̇ун̣з сзванд̇ийд̇и ад̇т̇о. д̇зд̇и бан̃жа гаамаг̇ун̣аа. раманд̇ийд̇и рад̇им̣ винд̣̇анд̇и гийл̣анд̇и лал̣анд̇и. аалийяанд̇и абхираман̣авасзна сзванд̇ийд̇и аалаяаа, адтасад̇ам̣ д̇ан̣хаавижарид̇аани, д̇зхи аалаязхи раманд̇ийд̇и аалаяараамаад̇и звамбзд̇т̇а ад̇т̇о д̣̇адтаб̣б̣о. имз хи сад̇д̇аа яат̇аа гаамаг̇ун̣з, звам̣ рааг̇амби ассаад̣̇знд̇и абхинанд̣̇анд̇иязва. яат̇зва хи сусаж̇ж̇ид̇абубпапалабхарид̇аругкаад̣̇исамбаннам̣ уяяаанам̣ бавидто рааж̇аа д̇ааяа д̇ааяа самбад̇д̇ияаа рамад̇и, саммуд̣̇ид̇о аамод̣̇ид̇абамод̣̇ид̇о ход̇и, на угган̣тад̇и, сааяамби нигкамид̇ум̣ на ижчад̇и, звамимзхи гаамаалаяад̇ан̣хаалаязхи сад̇д̇аа раманд̇и, сам̣саараваддз саммод̣̇ид̇аа анугган̣тид̇аа васанд̇и. д̇зна нзсам̣ бхаг̇аваа д̣̇увид̇хамби аалаяам̣ уяяаанабхуумим̣ вияа д̣̇ассзнд̇о ‘‘аалаяараамаа’’д̇иаад̣̇имааха. рад̇аад̇и нирад̇аа. судту муд̣̇ид̇аад̇и ад̇ивияа муд̣̇ид̇аа анугган̣танад̇о.

таанам̣ санд̇хааяаад̇и таанасад̣̇д̣̇ам̣ санд̇хааяа. ад̇т̇ад̇о бана таананд̇и жа бадижжасамуббаад̣̇о зва ад̇хиббзд̇о . д̇идтад̇и зд̇т̇а палам̣ д̇ад̣̇ааяад̇д̇авуд̇д̇ид̇ааяаад̇и таанам̣, сан̇каараад̣̇ийнам̣ бажжаяабхууд̇аа авиж̇ж̇аад̣̇аяо. имзсам̣ сан̇каараад̣̇ийнам̣ бажжаяаад̇и ид̣̇аббажжаяаа, авиж̇ж̇аад̣̇аяова. ид̣̇аббажжаяаа зва ид̣̇аббажжаяад̇аа яат̇аа д̣̇зво зва д̣̇звад̇аа. ид̣̇аббажжаяаанам̣ ваа авиж̇ж̇аад̣̇ийнам̣ ад̇д̇ано палам̣ бадижжа бажжаяабхааво уббаад̣̇анасамад̇т̇ад̇аа ид̣̇аббажжаяад̇аа. д̇зна самад̇т̇абажжаяалагкан̣о бадижжасамуббаад̣̇о д̣̇ассид̇о ход̇и. бадижжа самуббаж̇ж̇ад̇и палам̣ зд̇асмаад̇и бадижжасамуббаад̣̇о. бад̣̇ад̣̇ваязнаби д̇хаммаанам̣ бажжаяадто зва вибхаавид̇о. сан̇каараад̣̇ибажжаяаанан̃хи авиж̇ж̇аад̣̇ийнам̣ зд̇ам̣ ад̇хиважанам̣ ид̣̇аббажжаяад̇аабадижжасамуббаад̣̇од̇и. саб̣б̣асан̇каарасамат̇од̇иаад̣̇и саб̣б̣ам̣ ад̇т̇ад̇о ниб̣б̣аанамзва. яасмаа хи д̇ам̣ ааг̇амма бадижжа арияамаг̇г̇асса аарамман̣абажжаяабхаавахзд̇у саб̣б̣асан̇кааравибпанд̣̇ид̇аани самманд̇и вуубасамманд̇и, д̇асмаа ‘‘саб̣б̣асан̇каарасамат̇о’’д̇и вужжад̇и. саб̣б̣асан̇кад̇ависам̣яуд̇д̇з хи ниб̣б̣аанз сан̇кааравуубасамабарияааяо н̃ааяааг̇ад̇оязваад̇и. ид̣̇ам̣ банзд̇т̇а ниб̣б̣ажанам̣ – саб̣б̣з сан̇каараа самманд̇и зд̇т̇аад̇и саб̣б̣асан̇каарасамат̇од̇и.

яасмаа жа д̇ам̣ ааг̇амма саб̣б̣з убад̇хаяо бадиниссадтаа самужчзд̣̇авасзна барижжад̇д̇аа хонд̇и, адтасад̇аббабхзд̣̇аа саб̣б̣ааби д̇ан̣хаа кийяанд̇и, саб̣б̣з гилзсарааг̇аа вираж̇ж̇анд̇и, ж̇араамаран̣аад̣̇ибхзд̣̇ам̣ саб̣б̣ам̣ ваддад̣̇угкам̣ нируж̇жхад̇и, д̇асмаа ‘‘саб̣б̣уубад̇хибадиниссаг̇г̇о д̇ан̣хаагкаяо вирааг̇о нирод̇хо’’д̇и вужжад̇и, яаа банзсаа д̇ан̣хаа д̇зна д̇зна бхавзна бхаванд̇арам̣ бхаваниганд̇ибхаавзна винад̇и сам̣сиб̣б̣ад̇и, палзна ваа сад̣̇д̇хим̣ гаммам̣ винад̇и сам̣сиб̣б̣ад̇ийд̇и гад̇ваа ваананд̇и вужжад̇и, д̇ад̇о нигканд̇ам̣ ваанад̇од̇и ниб̣б̣аанам̣. гиламат̇од̇и гааяагиламат̇о. вихзсааби гааяавихзсааязва, жид̇д̇з бана убхаяамбзд̇ам̣ б̣уд̣̇д̇хаанам̣ над̇т̇и б̣од̇химуулзязва самужчиннад̇д̇аа. зд̇т̇а жа жиранисаж̇ж̇аажирабхаасанзхи бидтиааг̇илааяанад̇аалуг̇аласосаад̣̇ивасзна гааяагиламат̇о жзва гааяавихзсаа жа взд̣̇ид̇аб̣б̣аа, саа жа ко д̣̇зсанааяа ад̇т̇ам̣ аж̇аананд̇аанан̃жа аббадибаж̇ж̇анд̇аанан̃жа васзна. ж̇аананд̇аанам̣ бана бадибаж̇ж̇анд̇аанан̃жа д̣̇зсанааяа гааяабариссамоби сад̇т̇у абариссамова, д̇знааха бхаг̇аваа ‘‘на жа мам̣ д̇хаммаад̇хигаран̣ам̣ вихзсзд̇ий’’д̇и. д̇знзва вуд̇д̇ам̣ ‘‘яаа аж̇аананд̇аанам̣ д̣̇зсанаа наама, со мама гиламат̇о ассаа’’д̇и.

абиссууд̇и самбин̣д̣анад̇т̇з нибаад̇о. со на гзвалам̣ зд̇ад̣̇ахоси, имааби г̇аат̇аа бадибхам̣сууд̇и д̣̇ийбзд̇и. бхаг̇аванд̇анд̇и бадисад̣̇д̣̇аяог̇зна саамиад̇т̇з убаяог̇аважананд̇и ааха ‘‘бхаг̇авад̇о’’д̇и. вуд̣̇д̇хиббад̇д̇аа ажчарияаа ваа анажчарияаа. вуд̣̇д̇хиад̇т̇оби хи а-гааро ход̇и яат̇аа ‘‘асзгкаа д̇хаммаа’’д̇и. габбаанам̣ жад̇д̇аари асан̇кязяяаани сад̇асахассан̃жа сад̣̇звагасса логасса д̇хаммасам̣вибхааг̇агаран̣ад̇т̇амзва баарамияо буурзд̇ваа ид̣̇аани самад̇хиг̇ад̇ад̇хаммараж̇ж̇асса д̇ад̇т̇а аббоссуггад̇аабад̇д̇ид̣̇ийбанад̇д̇аа г̇аат̇аад̇т̇асса ануажчарияад̇аа д̇асса вуд̣̇д̇хиббад̇д̇и жа взд̣̇ид̇аб̣б̣аа. ад̇т̇ад̣̇ваарзна хи г̇аат̇аанам̣ анажчарияад̇аа. г̇ожараа ахзсунд̇и убадтахам̣су, убадтаанан̃жа вид̇аггаяид̇аб̣б̣ад̇аад̇и ааха ‘‘баривид̇аггаяид̇аб̣б̣абхаавам̣ баабун̣им̣суу’’д̇и.

гижчзнаад̇и на д̣̇угкаббадибад̣̇ааяа. б̣уд̣̇д̇хаанан̃хи жад̇д̇аароби маг̇г̇аа сукаббадибад̣̇аава хонд̇и. баарамийбууран̣агаалз бана сарааг̇асад̣̇осасамохассзва сад̇о ааг̇ад̇ааг̇ад̇аанам̣ яаажагаанам̣ алан̇гад̇аббадияад̇д̇ам̣ сийсам̣ ганд̇ид̇ваа г̇алалохид̇ам̣ нийхарид̇ваа суан̃ж̇ид̇аани агкийни уббаадзд̇ваа гулавам̣саббад̣̇ийбам̣ буд̇д̇ам̣ манаабажаариним̣ бхарияанд̇и звамаад̣̇ийни д̣̇знд̇асса ан̃н̃аани жа канд̇иваад̣̇исад̣̇исзсу ад̇д̇абхаавзсу чзж̇ж̇абхзж̇ж̇аад̣̇ийни баабун̣анд̇асса ааг̇аманийяабадибад̣̇ам̣ санд̇хааязд̇ам̣ вуд̇д̇ам̣. ха-ид̇и ваа б̣яад̇д̇анд̇и зд̇асмим̣ ад̇т̇з нибаад̇о. згам̣сад̇т̇зд̇и гзжи. ха б̣яад̇д̇ам̣ згам̣сзна ваа алам̣ ниббаяож̇анам̣ звам̣ гижчзна ад̇хиг̇ад̇ам̣ д̇хаммам̣ д̣̇зсзд̇унд̇и яож̇анаа. халанд̇и ваа аланд̇и иминаа самаанад̇т̇ам̣ бад̣̇ам̣ ‘‘халанд̇и вад̣̇аамий’’д̇иаад̣̇ийсу вияа. ‘‘багаасид̇а’’нд̇иби батанд̇и, д̣̇зсид̇анд̇и ад̇т̇о. звам̣ гижчзна ад̇хиг̇ад̇асса д̇хаммасса алам̣ д̣̇зсид̇ам̣ барияад̇д̇ам̣ д̣̇зсид̇ам̣, го ад̇т̇о д̣̇зсид̇знаад̇и вуд̇д̇ам̣ ход̇и. рааг̇ад̣̇осабарзд̇зхийд̇и рааг̇ад̣̇осапудтзхи, пудтависзна вияа саббзна рааг̇зна д̣̇осзна жа сампудтзхи абхибхууд̇зхийд̇и ад̇т̇о. ат̇а ваа рааг̇ад̣̇осабарзд̇зхийд̇и рааг̇ад̣̇осаануг̇ад̇зхи, рааг̇зна жа д̣̇осзна жа ануб̣анд̇хзхийд̇и ад̇т̇о.

бадисод̇аг̇ааминд̇и (д̣̇ий. ни. адта. 2.65; ма. ни. адта. 1.281; сам̣. ни. адта. 1.1.172) нижжаг̇аахаад̣̇ийнам̣ бадисод̇ам̣ анижжам̣ д̣̇угкаманад̇д̇аа асубханд̇и звам̣ г̇ад̇ам̣ бавад̇д̇ам̣ жад̇усажжад̇хамманд̇и ад̇т̇о. рааг̇арад̇д̇аад̇и гаамарааг̇зна бхаварааг̇зна д̣̇идтирааг̇зна жа рад̇д̇аа. на д̣̇агканд̇ийд̇и анижжам̣ д̣̇угкаманад̇д̇аа асубханд̇и иминаа сабхаавзна на бассиссанд̇и, д̇з абассанд̇з го сагкиссад̇и анижжанд̇иаад̣̇инаа сабхаавзна яаат̇аавад̇о д̇хаммам̣ ж̇аанаабзд̇унд̇и ад̇хиббааяо. рааг̇ад̣̇осабарзд̇ад̇ааби нзсам̣ саммул̣хабхаавзнзваад̇и ааха ‘‘д̇амоканд̇хзна аавудаа’’д̇и, авиж̇ж̇аараасинаа аж̇жход̇т̇адаад̇и ад̇т̇о.

аббоссуггад̇ааяа жид̇д̇ам̣ намад̇ийд̇и гасмаа банасса звам̣ жид̇д̇ам̣ нами, нану зса ‘‘муд̇д̇охам̣ можзссаами, д̇ин̣н̣охам̣ д̇аарзссаами,

гим̣ мз ан̃н̃аад̇авзсзна, д̇хаммам̣ сажчигад̇знид̇ха;

саб̣б̣ан̃н̃уд̇ам̣ баабун̣ид̇ваа, д̇аараяиссам̣ сад̣̇звага’’нд̇и. (б̣у. вам̣. 2.55) –

бад̇т̇анам̣ гад̇ваа баарамияо буурзд̇ваа саб̣б̣ан̃н̃уд̇ам̣ бад̇д̇од̇и? сажжамзва, д̇ад̣̇зва бажжавзгкан̣аанубхаавзна банасса звам̣ жид̇д̇ам̣ нами. д̇асса хи саб̣б̣ан̃н̃уд̇ам̣ бад̇ваа сад̇д̇аанам̣ гилзсаг̇аханад̇ам̣ д̇хаммасса жа г̇амбхийрад̇ам̣ бажжавзгканд̇асса сад̇д̇аанам̣ гилзсаг̇аханад̇аа жа д̇хаммаг̇амбхийрад̇аа жа саб̣б̣аагаарзна баагадаа ж̇аад̇аа. ат̇асса ‘‘имз сад̇д̇аа ган̃ж̇ияабун̣н̣алааб̣у вияа д̇аггабхарид̇ажаади вияа васаад̇злабийд̇абилод̇игаа вияа ан̃ж̇анамагкид̇ахад̇т̇о вияа жа гилзсабхарид̇аа ад̇исам̣гилидтаа рааг̇арад̇д̇аа д̣̇осад̣̇удтаа мохамул̣хаа, д̇з гим̣ наама бадивиж̇жхиссанд̇ий’’д̇и жинд̇аяад̇о гилзсаг̇аханабажжавзгкан̣аанубхаавзнаби звам̣ жид̇д̇ам̣ нами.

‘‘аяам̣ д̇хаммо бат̇авийсанд̇хаарагауд̣̇агагканд̇хо вияа г̇амбхийро, баб̣б̣ад̇зна бадижчаад̣̇зд̇ваа табид̇о саасабо вияа д̣̇уд̣̇д̣̇асо, сад̇ад̇хаа бхиннасса вааласса годи вияа ан̣у. маяаа хи имам̣ д̇хаммам̣ бадивиж̇жхид̇ум̣ вааяаманд̇зна ад̣̇иннам̣ д̣̇аанам̣ наама над̇т̇и, арагкид̇ам̣ сийлам̣ наама над̇т̇и, абарибуурид̇аа гаажи баарамий наама над̇т̇и, д̇асса мз нируссаахам̣ вияа маараб̣алам̣ вид̇хаманд̇ассаби бат̇авий на гамбид̇т̇а, батамаяаамз буб̣б̣зниваасам̣ ануссаранд̇ассаби на гамбид̇т̇а, маж̇жхимаяаамз д̣̇иб̣б̣ажагкум̣ висод̇хзнд̇ассаби на гамбид̇т̇а, бажчимаяаамз бана бадижжасамуббаад̣̇ам̣ бадивиж̇жханд̇ассзва мз д̣̇асасахассилогад̇хаад̇у гамбид̇т̇а. ид̇и маад̣̇исзнаби д̇игкан̃аан̣зна гижчзнзвааяам̣ д̇хаммо бадивид̣̇д̇хо, д̇ам̣ логияамахааж̇анаа гат̇ам̣ бадивиж̇жхиссанд̇ий’’д̇и д̇хаммаг̇амбхийрад̇ааяа бажжавзгкан̣аанубхаавзнаби звам̣ жид̇д̇ам̣ намийд̇и взд̣̇ид̇аб̣б̣ам̣.

абижа б̣рахмунаа яаажид̇з д̣̇зсзд̇угаамад̇ааяабисса звам̣ жид̇д̇ам̣ нами. ж̇аанаад̇и хи бхаг̇аваа ‘‘мама аббоссуггад̇ааяа жид̇д̇з намамаанз махааб̣рахмаа д̇хаммад̣̇зсанам̣ яаажиссад̇и, имз жа сад̇д̇аа б̣рахмаг̇аругаа, д̇з ‘сад̇т̇аа гира д̇хаммам̣ на д̣̇зсзд̇угаамо ахоси, ат̇а нам̣ махааб̣рахмаа яаажид̇ваа д̣̇зсаабзд̇и, санд̇о вад̇а бхо д̇хаммо бан̣ийд̇о’д̇и ман̃н̃амаанаа суссуусиссанд̇ий’’д̇и. ид̣̇амбисса гааран̣ам̣ бадижжа аббоссуггад̇ааяа жид̇д̇ам̣ нами, но д̇хаммад̣̇зсанааяаад̇и взд̣̇ид̇аб̣б̣ам̣.

8. сахамбад̇иссаад̇и со гира гассабасса бхаг̇авад̇о саасанз сахаго наама т̇зро батамаж̇жхаанам̣ ниб̣б̣ад̇д̇зд̇ваа батамаж̇жхаанабхуумияам̣ габбааяугаб̣рахмаа худ̇ваа ниб̣б̣ад̇д̇о, д̇ад̇ра нам̣ сахамбад̇и б̣рахмаад̇и сан̃ж̇аананд̇и. д̇ам̣ санд̇хааяааха ‘‘б̣рахмуно сахамбад̇иссаа’’д̇и. нассад̇и вад̇аад̇и со гира имам̣ сад̣̇д̣̇ам̣ д̇ат̇аа нижчаарзд̇и, яат̇аа д̣̇асасахассилогад̇хаад̇уб̣рахмаано суд̇ваа саб̣б̣з саннибад̇им̣су. аббараж̇агкаж̇аад̇игаад̇и бан̃н̃аамаяз агкимхи аббам̣ барид̇д̇ам̣ рааг̇ад̣̇осамохараж̇ам̣ зд̇зсам̣ звам̣сабхааваад̇и аббараж̇агкаж̇аад̇игаа. аббам̣ рааг̇аад̣̇ираж̇ам̣ язсам̣ д̇з сабхааваа аббараж̇агкаж̇аад̇игаад̇и звамзд̇т̇а ад̇т̇о д̣̇адтаб̣б̣о. ассаванад̇аад̇и ‘‘саяам̣ абхин̃н̃аа’’д̇иаад̣̇ийсу вияа гаран̣ад̇т̇з бажжад̇д̇аважанам̣, ассаванад̇ааяаад̇и ад̇т̇о. бхависсанд̇ийд̇и буримаб̣уд̣̇д̇хзсу д̣̇асабун̃н̃агирияавасзна гад̇аад̇хигаараа барибаагаг̇ад̇абад̣̇умаани вияа суурияарасмисампассам̣ д̇хаммад̣̇зсанам̣язва ааган̇камаанаа жад̇уббад̣̇игаг̇аат̇аавасаанз арияабхуумим̣ оггаманаарахаа на зго, на д̣̇вз, анзгасад̇асахассаа д̇хаммасса ан̃н̃аад̇ааро бхависсанд̇ийд̇и д̣̇ассзд̇и.

баад̇урахосийд̇и баад̇убхави. самалзхи жинд̇ид̇од̇и самалзхи бууран̣агассабаад̣̇ийхи чахи сад̇т̇аарзхи жинд̇ид̇о. д̇з хи бурзд̇арам̣ уббаж̇ж̇ид̇ваа сагалаж̇амб̣уд̣̇ийбз ган̣дагз бад̇т̇арамаанаа вияа висам̣ син̃жамаанаа вияа жа самалам̣ мижчаад̣̇идтид̇хаммам̣ д̣̇зсаяим̣су. д̇з гира б̣уд̣̇д̇хаголаахалаануссавзна сан̃ж̇аад̇агуд̇уухалаа логам̣ ван̃жзд̇ваа гохан̃н̃з тад̇ваа саб̣б̣ан̃н̃уд̇ам̣ бадиж̇аананд̇аа яам̣ гин̃жи ад̇хаммам̣язва д̇хаммод̇и д̣̇ийбзсум̣. абаабурзд̇анд̇и вивара зд̇ам̣. амад̇асса д̣̇вааранд̇и амад̇асса ниб̣б̣аанасса д̣̇ваарабхууд̇ам̣ арияамаг̇г̇ам̣. ид̣̇ам̣ вуд̇д̇ам̣ ход̇и – зд̇ам̣ гассабасса бхаг̇авад̇о саасананд̇арад̇хаанад̇о бабхуд̇и бихид̇ам̣ ниб̣б̣аананаг̇арасса махаад̣̇ваарам̣ арияамаг̇г̇ам̣ сад̣̇д̇хаммад̣̇зсанаахад̇т̇зна абаабура вивара уг̇гхаадзхийд̇и. сун̣анд̇у д̇хаммам̣ вималзнаануб̣уд̣̇д̇ханд̇и имз сад̇д̇аа рааг̇аад̣̇ималаанам̣ абхаавад̇о вималзна саммаасамб̣уд̣̇д̇хзна ануб̣уд̣̇д̇хам̣ жад̇усажжад̇хаммам̣ сун̣анд̇у д̇аава бхаг̇аваад̇и яаажад̇и.

сзлабаб̣б̣ад̇о ужжо ход̇и т̇иро жа, на бам̣субаб̣б̣ад̇о миссагабаб̣б̣ад̇о ваад̇и ааха ‘‘сзлз яат̇аа баб̣б̣ад̇амуд̣̇д̇ханидтид̇о’’д̇и. д̇ассад̇т̇о ‘‘сзламаяз згаг̇гханз баб̣б̣ад̇амуд̣̇д̇хани яат̇аатид̇ова. на хи д̇ад̇т̇а тид̇асса д̣̇ассанад̇т̇ам̣ г̇ийвугкибанабасааран̣аад̣̇игижжам̣ ад̇т̇ий’’д̇и. д̇ат̇уубаманд̇и д̇аббадибхааг̇ам̣ сзлабаб̣б̣ад̇уубамам̣. д̇хаммамаяам̣ баасаад̣̇анд̇и логуд̇д̇арад̇хаммамааха. со хи саб̣б̣асо басаад̣̇аавахо саб̣б̣ад̇хаммз ад̇иггамма аб̣бхуг̇г̇ад̇адтзна баасаад̣̇асад̣̇исо жа, бан̃н̃аабарияааяо ваа ид̇ха д̇хамма-сад̣̇д̣̇о. бан̃н̃аа хи аб̣бхуг̇г̇ад̇адтзна баасаад̣̇од̇и абхид̇хаммз нид̣̇д̣̇идтаа. д̇ат̇аа жааха –

‘‘бан̃н̃аабаасаад̣̇амааруяха, асого согиним̣ баж̇ам̣;

баб̣б̣ад̇адтова бхуумадтз, д̇хийро б̣аалз авзгкад̇ий’’д̇и. (д̇ха. ба. 28);

аяам̣ банзд̇т̇а сан̇кзбад̇т̇о – яат̇аа сзлабаб̣б̣ад̇амуд̣̇д̇хани яат̇аатид̇ова жагкумаа бурисо саманд̇ад̇о ж̇анад̇ам̣ бассзяяа, д̇ат̇аа д̇вамби сумзд̇ха сунд̣̇арабан̃н̃а саб̣б̣ан̃н̃уд̇ан̃н̃аан̣зна саманд̇ажагку бхаг̇аваа д̇хаммамаяам̣ бан̃н̃аамаяам̣ баасаад̣̇амааруяха саяам̣ абзд̇асого согаавад̇ин̣н̣ам̣ ж̇аад̇иж̇араабхибхууд̇ам̣ ж̇анад̇ам̣ авзгкассу убад̇хаараяа убабаригкаад̇и. аяам̣ банзд̇т̇а ад̇хиббааяо – яат̇аа хи баб̣б̣ад̇абаад̣̇з саманд̇аа маханд̇ам̣ кзд̇д̇ам̣ гад̇ваа д̇ад̇т̇а гзд̣̇аарабаал̣ийсу гудигааяо гад̇ваа рад̇д̇им̣ аг̇г̇им̣ ж̇аалзяяум̣, жад̇уран̇г̇асаманнааг̇ад̇ан̃жа анд̇хагаарам̣ асса, ат̇а д̇асса баб̣б̣ад̇асса мад̇т̇агз тад̇ваа жагкумад̇о бурисасса бхуумим̣ ологаяад̇о нзва кзд̇д̇ам̣, на гзд̣̇аарабаал̣ияо, на гудияо, на д̇ад̇т̇а саяид̇амануссаа бан̃н̃ааязяяум̣ ануж̇ж̇алабхаавад̇о, гудигаасу бана аг̇г̇иж̇аалаамад̇д̇амзва бан̃н̃ааязяяа уж̇ж̇алабхаавад̇о, звам̣ д̇хаммабаасаад̣̇ам̣ ааруяха сад̇д̇анигааяам̣ ологаяад̇о д̇ат̇ааг̇ад̇асса яз д̇з агад̇агаляаан̣аа сад̇д̇аа, д̇з згавихаарз д̣̇агкин̣аж̇аан̣убассз нисиннааби б̣уд̣̇д̇хажагкусса аабаат̇ам̣ нааг̇ажчанд̇и н̃аан̣аг̇г̇инаа ануж̇ж̇алабхаавад̇о анул̣аарабхаавад̇о жа, рад̇д̇им̣ кид̇д̇аа сараа вияа хонд̇и. яз бана гад̇агаляаан̣аа взнзяяабуг̇г̇алаа, д̇з звасса д̣̇уурзби тид̇аа аабаат̇амааг̇ажчанд̇и барибагган̃аан̣аг̇г̇ид̇ааяа самуж̇ж̇алабхаавад̇о ул̣аарасанд̇аанад̇ааяа жа, со аг̇г̇и вияа химаванд̇абаб̣б̣ад̇о вияа жа. вуд̇д̇амби жзд̇ам̣ –

‘‘д̣̇уурз санд̇о багаасзнд̇и, химаванд̇ова баб̣б̣ад̇о;

асанд̇зд̇т̇а на д̣̇иссанд̇и, рад̇д̇им̣ кид̇д̇аа яат̇аа сараа’’д̇и. (д̇ха. ба. 304);

удтзхийд̇и бхаг̇авад̇о д̇хаммад̣̇зсанад̇т̇ам̣ жааригажаран̣ам̣ яаажанд̇о бхан̣ад̇и. удтзхийд̇и ваа д̇хаммад̣̇зсанааяа аббоссуггад̇аасан̇каад̇асан̇гожаабад̇д̇ид̇о гилаасубхаавад̇о удтаха. вийраад̇иаад̣̇ийсу бхаг̇аваа саад̇исаяажад̇уб̣б̣ид̇хасаммаббад̇хаанавийрияаванд̇ад̇ааяа вийро, д̣̇звабуд̇д̇амажжугилзсаабхисан̇каараанам̣ виж̇ид̇ад̇д̇аа виж̇ид̇асан̇г̇аамо, ж̇аад̇иганд̇аараад̣̇ид̇о взнзяяасад̇т̇ам̣ вааханасамад̇т̇ад̇ааяа ниб̣б̣аанасан̇каад̇ам̣ кзмаббад̣̇зсам̣ самбаабанасамад̇т̇ад̇ааяа сад̇т̇аваахо, гаамажчанд̣̇аин̣асса абхаавад̇о ан̣ан̣од̇и взд̣̇ид̇аб̣б̣о. яо хи барзсам̣ ин̣ам̣ г̇ахзд̇ваа винаасзд̇и, со д̇зхи ‘‘ин̣ам̣ д̣̇зхий’’д̇и д̇аж̇ж̇амааноби парусам̣ вужжамааноби вамбхамааноби вад̇хияамааноби гин̃жи бадиббахарид̇ум̣ на саггод̇и, саб̣б̣ам̣ д̇ид̇игкад̇и. д̇ид̇игкагааран̣ан̃хисса д̇ам̣ ин̣ам̣ ход̇и, звамзва яо яамхи гаамажчанд̣̇зна раж̇ж̇ад̇и, д̇ан̣хааг̇ахан̣зна д̇ам̣ вад̇т̇ум̣ г̇ан̣хаад̇и, со д̇зна парусам̣ вужжамааноби вамбхамааноби вад̇хияамааноби гин̃жи бадиббахарид̇ум̣ на саггод̇и, саб̣б̣ам̣ д̇ид̇игкад̇и. д̇ид̇игкагааран̣ан̃хисса со гаамажчанд̣̇о ход̇и гхарасаамигзхи вихзтияамаанаанам̣ ид̇т̇ийнам̣ вияа. гасмаа? ин̣асад̣̇исад̇д̇аа гаамажчанд̣̇асса.

9. аж̇жхзсананд̇и г̇арудтаанийяам̣ баяирубаасид̇ваа г̇аруд̇арам̣ баяож̇анам̣ уд̣̇д̣̇исса абхибад̇т̇анаа аж̇жхзсанаа, сааби ад̇т̇ад̇о яаажанаа зва. б̣уд̣̇д̇хажагкунаад̇и инд̣̇рияабаробарияад̇д̇ан̃аан̣зна жа аасаяаанусаяан̃аан̣зна жа. имзсан̃хи д̣̇виннам̣ н̃аан̣аанам̣ б̣уд̣̇д̇хажагкууд̇и наамам̣, саб̣б̣ан̃н̃уд̇ан̃н̃аан̣асса саманд̇ажагкууд̇и . хздтимаанам̣ д̇ин̣н̣ам̣ маг̇г̇ан̃аан̣аанам̣ д̇хаммажагкууд̇и. аббараж̇агкзд̇иаад̣̇ийсу язсам̣ вуд̇д̇анаязнзва бан̃н̃аажагкумхи рааг̇аад̣̇ираж̇ам̣ аббам̣, д̇з аббараж̇агкаа. язсам̣ д̇ам̣ маханд̇ам̣, д̇з махаараж̇агкаа. язсам̣ сад̣̇д̇хаад̣̇ийни инд̣̇рияаани д̇игкаани, д̇з д̇игкинд̣̇рияаа. язсам̣ д̇аани муд̣̇ууни, д̇з муд̣̇инд̣̇рияаа. язсам̣ д̇зязва сад̣̇д̇хаад̣̇аяо аагаараа сунд̣̇араа, д̇з сваагаараа. яз гат̇ид̇агааран̣ам̣ саллагкзнд̇и, сукзна саггаа хонд̇и вин̃н̃аабзд̇ум̣, д̇з сувин̃н̃аабаяаа. яз баралоган̃жзва важ̇ж̇ан̃жа бхаяад̇о бассанд̇и, д̇з баралогаваж̇ж̇абхаяад̣̇ассаавино наама.

уббалаани зд̇т̇а санд̇ийд̇и уббалиний, г̇ажчоби ж̇алаасаяоби, ид̇ха бана ж̇алаасаяо ад̇хиббзд̇о, д̇асмаа уббалинияанд̇и уббалаванзд̇и звамад̇т̇о г̇ахзд̇аб̣б̣о. ид̇о барзсуби зсзва наяо. анд̇онимуг̇г̇абосийнийд̇и яаани уд̣̇агасса анд̇о нимуг̇г̇аанзва худ̇ваа буссанд̇и вад̣дханд̇и, д̇аани анд̇онимуг̇г̇абосийни. уд̣̇агам̣ ажжуг̇г̇амма д̇идтанд̇ийд̇и уд̣̇агам̣ ад̇иггамид̇ваа д̇идтанд̇и. д̇ад̇т̇а яаани ажжуг̇г̇амма тид̇аани суурияарасмисампассам̣ ааг̇амаяамаанаани, д̇аани аж̇ж̇а бубпанагаани. яаани самод̣̇агам̣ тид̇аани, д̇аани свз бубпанагаани. яаани уд̣̇агаа ануг̇г̇ад̇аани анд̇онимуг̇г̇абосийни, д̇аани д̇ад̇ияад̣̇ивасз бубпанагаани. уд̣̇агаа бана ануг̇г̇ад̇аани ан̃н̃ааниби сарог̇ауббалаад̣̇ийни наама ад̇т̇и, яаани нзва бубписсанд̇и мажчагажчабабхагкаанзва бхависсанд̇и, д̇аани баал̣им̣ наарул̣хаани, аахарид̇ваа бана д̣̇ийбзд̇аб̣б̣аанийд̇и адтагат̇ааяам̣ багаасид̇аани. яат̇зва хи д̇аани жад̇уб̣б̣ид̇хаани бубпаани, звамзва уг̇гхадид̇ан̃н̃уу вибан̃жид̇ан̃н̃уу нзяяо бад̣̇абарамод̇и жад̇д̇ааро буг̇г̇алаа.

д̇ад̇т̇а яасса буг̇г̇аласса саха уд̣̇аахадавзлааяа д̇хаммаабхисамаяо ход̇и, аяам̣ ‘‘жад̇д̇ааро сад̇ибадтаанаа’’д̇иаад̣̇инаа наязна сан̇кид̇д̇зна маад̇игааяа табияамаанааяа д̣̇зсанаанусаарзна н̃аан̣ам̣ бзсзд̇ваа арахад̇д̇ам̣ г̇ан̣хид̇ум̣ самад̇т̇о буг̇г̇ало уг̇гхадид̇ан̃н̃ууд̇и вужжад̇и. яасса буг̇г̇аласса сан̇кид̇д̇зна бхаасид̇асса вид̇т̇аарзна ад̇т̇з вибхаж̇ияамаанз д̇хаммаабхисамаяо ход̇и, аяам̣ вужжад̇и буг̇г̇ало вибан̃жид̇ан̃н̃уу. яасса буг̇г̇аласса уд̣̇д̣̇зсад̇о барибужчад̇о яонисо манасигарод̇о галяаан̣амид̇д̇з сзвад̇о бхаж̇ад̇о баяирубаасад̇о анубуб̣б̣зна д̇хаммаабхисамаяо ход̇и, аяам̣ вужжад̇и буг̇г̇ало нзяяо. яасса буг̇г̇аласса б̣ахумби сун̣ад̇о б̣ахумби бхан̣ад̇о б̣ахумби д̇хаараяад̇о б̣ахумби ваажаяад̇о на д̇ааяа ж̇аад̇ияаа д̇хаммаабхисамаяо ход̇и, д̇зна ад̇д̇абхаавзна маг̇г̇ам̣ ваа палам̣ ваа анд̇амасо жхаанам̣ ваа вибассанам̣ ваа ниб̣б̣ад̇д̇зд̇ум̣ на саггод̇и, аяам̣ вужжад̇и буг̇г̇ало бад̣̇абарамо. д̇ад̇т̇а бхаг̇аваа уббалаванаад̣̇исад̣̇исам̣ д̣̇асасахассилогад̇хаад̇ум̣ ологзнд̇о аж̇ж̇а бубпанагаани вияа уг̇гхадид̇ан̃н̃уу, свз бубпанагаани вияа вибан̃жид̇ан̃н̃уу, д̇ад̇ияад̣̇ивасз бубпанагаани вияа нзяяз, мажчагажчабабхагкабубпаани вияа бад̣̇абарамз жа ад̣̇д̣̇аса, бассанд̇о жа ‘‘зд̇д̇агаа аббараж̇агкаа, зд̇д̇агаа махаараж̇агкаа, д̇ад̇рааби зд̇д̇агаа уг̇гхадид̇ан̃н̃уу’’д̇и звам̣ саб̣б̣аагаарад̇ова ад̣̇д̣̇аса.

д̇ад̇т̇а д̇ин̣н̣ам̣ буг̇г̇алаанам̣ имасмин̃н̃зва ад̇д̇абхаавз бхаг̇авад̇о д̇хаммад̣̇зсанаа ад̇т̇ам̣ саад̇хзд̇и. бад̣̇абарамаанам̣ анааг̇ад̇ад̇т̇ааяа ваасанаа ход̇и. ат̇а бхаг̇аваа имзсам̣ жад̇уннам̣ буг̇г̇алаанам̣ ад̇т̇аавахам̣ д̇хаммад̣̇зсанам̣ вид̣̇ид̇ваа д̣̇зсзд̇угамяад̇ам̣ уббаад̣̇зд̇ваа буна саб̣б̣зби д̇ийсу бхавзсу сад̇д̇з бхаб̣б̣аабхаб̣б̣авасзна д̣̇вз годтаасз агааси. яз санд̇хааяа вуд̇д̇ам̣ ‘‘яз д̇з сад̇д̇аа гаммааваран̣зна саманнааг̇ад̇аа вибаагааваран̣зна саманнааг̇ад̇аа гилзсааваран̣зна саманнааг̇ад̇аа ассад̣̇д̇хаа ажчанд̣̇игаа д̣̇уббан̃н̃аа абхаб̣б̣аа нияаамам̣ оггамид̇ум̣ гусалзсу д̇хаммзсу саммад̇д̇ам̣, имз д̇з сад̇д̇аа абхаб̣б̣аа. гад̇амз д̇з сад̇д̇аа бхаб̣б̣аа? яз д̇з сад̇д̇аа на гаммааваран̣зна…бз… имз д̇з сад̇д̇аа бхаб̣б̣аа’’д̇и (вибха. 826-827). д̇ад̇т̇а саб̣б̣зби абхаб̣б̣абуг̇г̇алз бахааяа бхаб̣б̣абуг̇г̇алзязва н̃аан̣зна бариг̇г̇ахзд̇ваа ‘‘зд̇д̇агаа рааг̇ажарид̇аа, зд̇д̇агаа д̣̇оса, моха, вид̇агга, сад̣̇д̇хаа, б̣уд̣̇д̇хижарид̇аа’’д̇и ча годтаасз агааси, звам̣ гад̇ваа д̇хаммам̣ д̣̇зсзссаамийд̇и жинд̇зси. зд̇т̇а жа аббараж̇агкаад̣̇ибхаб̣б̣аад̣̇ивасзна ааваж̇ж̇знд̇асса бхаг̇авад̇о д̇з сад̇д̇аа бун̃ж̇абун̃ж̇аава худ̇ваа убадтаханд̇и, на згзгаад̇и д̣̇адтаб̣б̣ам̣.

бажжабхаасийд̇и бад̇иабхааси. абааруд̇аад̇и вивадаа. амад̇асса д̣̇ваараад̇и арияамаг̇г̇о. со хи амад̇асан̇каад̇асса ниб̣б̣аанасса д̣̇ваарам̣, со маяаа виварид̇ваа табид̇о махаагарун̣уубаниссаязна саяамбхуун̃аан̣зна ад̇хиг̇ад̇ад̇д̇аад̇и д̣̇ассзд̇и. ‘‘абааруд̇ам̣ д̇зсам̣ амад̇асса д̣̇ваара’’нд̇и гзжи батанд̇и. бамун̃жанд̇у сад̣̇д̇ханд̇и саб̣б̣з ад̇д̇ано сад̣̇д̇хам̣ мун̃жанд̇у виссаж̇ж̇знд̇у бавзд̣̇знд̇у, маяаа д̣̇зсид̇з д̇хаммз маяи жа ад̇д̇ано сад̣̇д̣̇аханаагаарам̣ удтаабзнд̇ууд̇и ад̇т̇о. бажчимабад̣̇ад̣̇ваяз аяамад̇т̇о – ахан̃хи ад̇д̇ано баг̇ун̣ам̣ суббавад̇д̇ид̇амби имам̣ бан̣ийд̇ам̣ уд̇д̇амам̣ д̇хаммам̣ гааяаваажаагиламат̇асан̃н̃ий худ̇ваа на бхаасим̣, на бхаасиссаамийд̇и жинд̇зсим̣, ид̣̇аани бана саб̣б̣о ж̇ано сад̣̇д̇хаабхааж̇анам̣ убанзд̇у, буурзссаами нзсам̣ сан̇габбанд̇и. анд̇арад̇хааяийд̇и сад̇т̇аарам̣ г̇анд̇хамаалаад̣̇ийхи бууж̇зд̇ваа анд̇арахид̇о, сагадтаанамзва г̇ад̇од̇и ад̇т̇о. сад̇т̇усанд̇иган̃хи убаг̇ад̇аанам̣ д̣̇зваанам̣ б̣рахмаанан̃жа д̇асса бурад̇о анд̇арад̇хаанам̣ наама сагадтаанаг̇аманамзва.

б̣рахмаяаажанагат̇ааван̣н̣анаа нидтид̇аа.