| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6. ப்³ரஹ்மஸங்யுத்தங்
6. Brahmasaṃyuttaṃ
1. பட²மவக்³கோ³
1. Paṭhamavaggo
1. ப்³ரஹ்மாயாசனஸுத்தவண்ணனா
1. Brahmāyācanasuttavaṇṇanā
172. ப்³ரஹ்மஸங்யுத்தஸ்ஸ பட²மே பரிவிதக்கோ உத³பாதீ³தி ஸப்³ப³பு³த்³தா⁴னங் ஆசிண்ணஸமாசிண்ணோ அயங் சேதஸோ விதக்கோ உத³பாதி³. கதா³ உத³பாதீ³தி? பு³த்³த⁴பூ⁴தஸ்ஸ அட்ட²மே ஸத்தாஹே ராஜாயதனமூலே ஸக்கேன தே³வானமிந்தே³ன ஆப⁴தங் த³ந்தகட்ட²ஞ்ச ஓஸத⁴ஹரீதகஞ்ச கா²தி³த்வா முக²ங் தோ⁴வித்வா சதூஹி லோகபாலேஹி உபனீதே பச்சக்³கே⁴ ஸேலமயபத்தே தபுஸ்ஸப⁴ல்லிகானங் பிண்ட³பாதங் பரிபு⁴ஞ்ஜித்வா புன பச்சாக³ந்த்வா அஜபாலனிக்³ரோதே⁴ நிஸின்னமத்தஸ்ஸ.
172. Brahmasaṃyuttassa paṭhame parivitakko udapādīti sabbabuddhānaṃ āciṇṇasamāciṇṇo ayaṃ cetaso vitakko udapādi. Kadā udapādīti? Buddhabhūtassa aṭṭhame sattāhe rājāyatanamūle sakkena devānamindena ābhataṃ dantakaṭṭhañca osadhaharītakañca khāditvā mukhaṃ dhovitvā catūhi lokapālehi upanīte paccagghe selamayapatte tapussabhallikānaṃ piṇḍapātaṃ paribhuñjitvā puna paccāgantvā ajapālanigrodhe nisinnamattassa.
அதி⁴க³தோதி படிவித்³தோ⁴. த⁴ம்மோதி சதுஸச்சத⁴ம்மோ. க³ம்பீ⁴ரோதி உத்தானபடிக்கே²பவசனமேதங். து³த்³த³ஸோதி க³ம்பீ⁴ரத்தாவ து³த்³த³ஸோ து³க்கே²ன த³ட்ட²ப்³போ³, ந ஸக்கா ஸுகே²ன த³ட்டு²ங். து³த்³த³ஸத்தாவ து³ரனுபோ³தோ⁴ து³க்கே²ன அவபு³ஜ்ஜி²தப்³போ³, ந ஸக்கா ஸுகே²ன அவபு³ஜ்ஜி²துங். ஸந்தோதி நிப்³பு³தோ. பணீதோதி அதப்பகோ. இத³ங் த்³வயங் லோகுத்தரமேவ ஸந்தா⁴ய வுத்தங். அதக்காவசரோதி தக்கேன அவசரிதப்³போ³ ஓகா³ஹிதப்³போ³ ந ஹோதி, ஞாணேனேவ அவசரிதப்³போ³. நிபுணோதி ஸண்ஹோ. பண்டி³தவேத³னீயோதி ஸம்மாபடிபத³ங் படிபன்னேஹி பண்டி³தேஹி வேதி³தப்³போ³. ஆலயராமாதி ஸத்தா பஞ்சஸு காமகு³ணேஸு அல்லீயந்தி, தஸ்மா தே ஆலயாதி வுச்சந்தி. அட்ட²ஸததண்ஹாவிசரிதானி வா அல்லீயந்தி, தஸ்மாபி ஆலயாதி வுச்சந்தி. தேஹி ஆலயேஹி ரமந்தீதி ஆலயராமா. ஆலயேஸு ரதாதி ஆலயரதா. ஆலயேஸு ஸுட்டு² முதி³தாதி ஆலயஸம்முதி³தா. யதே²வ ஹி ஸுஸஜ்ஜிதங் புப்ப²ப²லப⁴ரிதருக்கா²தி³ஸம்பன்னங் உய்யானங் பவிட்டோ² ராஜா தாய தாய ஸம்பத்தியா ரமதி, ஸம்முதி³தோ ஆமோதி³தபமோதி³தோ ஹோதி, ந உக்கண்ட²தி, ஸாயம்பி நிக்க²மிதுங் ந இச்ச²தி, ஏவமிமேஹிபி காமாலயதண்ஹாலயேஹி ஸத்தா ரமந்தி, ஸங்ஸாரவட்டே ஸம்முதி³தா அனுக்கண்டி²தா வஸந்தி. தேன தேஸங் ப⁴க³வா து³வித⁴ங் ஆலயங் உய்யானபூ⁴மிங் விய த³ஸ்ஸெந்தோ ‘‘ஆலயராமா’’திஆதி³மாஹ.
Adhigatoti paṭividdho. Dhammoti catusaccadhammo. Gambhīroti uttānapaṭikkhepavacanametaṃ. Duddasoti gambhīrattāva duddaso dukkhena daṭṭhabbo, na sakkā sukhena daṭṭhuṃ. Duddasattāva duranubodho dukkhena avabujjhitabbo, na sakkā sukhena avabujjhituṃ. Santoti nibbuto. Paṇītoti atappako. Idaṃ dvayaṃ lokuttarameva sandhāya vuttaṃ. Atakkāvacaroti takkena avacaritabbo ogāhitabbo na hoti, ñāṇeneva avacaritabbo. Nipuṇoti saṇho. Paṇḍitavedanīyoti sammāpaṭipadaṃ paṭipannehi paṇḍitehi veditabbo. Ālayarāmāti sattā pañcasu kāmaguṇesu allīyanti, tasmā te ālayāti vuccanti. Aṭṭhasatataṇhāvicaritāni vā allīyanti, tasmāpi ālayāti vuccanti. Tehi ālayehi ramantīti ālayarāmā. Ālayesu ratāti ālayaratā. Ālayesu suṭṭhu muditāti ālayasammuditā. Yatheva hi susajjitaṃ pupphaphalabharitarukkhādisampannaṃ uyyānaṃ paviṭṭho rājā tāya tāya sampattiyā ramati, sammudito āmoditapamodito hoti, na ukkaṇṭhati, sāyampi nikkhamituṃ na icchati, evamimehipi kāmālayataṇhālayehi sattā ramanti, saṃsāravaṭṭe sammuditā anukkaṇṭhitā vasanti. Tena tesaṃ bhagavā duvidhaṃ ālayaṃ uyyānabhūmiṃ viya dassento ‘‘ālayarāmā’’tiādimāha.
தத்த² யதி³த³ந்தி நிபாதோ, தஸ்ஸ டா²னங் ஸந்தா⁴ய ‘‘யங் இத³’’ந்தி, படிச்சஸமுப்பாத³ங் ஸந்தா⁴ய ‘‘யோ அய’’ந்தி ஏவமத்தோ² த³ட்ட²ப்³போ³. இத³ப்பச்சயதாபடிச்சஸமுப்பாதோ³தி இமேஸங் பச்சயா இத³ப்பச்சயா, இத³ப்பச்சயா ஏவ இத³ப்பச்சயதா, இத³ப்பச்சயதா ச ஸா படிச்சஸமுப்பாதோ³ சாதி இத³ப்பச்சயதாபடிச்சஸமுப்பாதோ³. ஸங்கா²ராதி³பச்சயானங் ஏதங் அதி⁴வசனங். ஸப்³ப³ஸங்கா²ரஸமதோ²திஆதி³ ஸப்³ப³ங் நிப்³பா³னமேவ. யஸ்மா ஹி தங் ஆக³ம்ம ஸப்³ப³ஸங்கா²ரவிப்ப²ந்தி³தானி ஸமந்தி, வூபஸம்மந்தி, தஸ்மா ஸப்³ப³ஸங்கா²ரஸமதோ²தி வுச்சதி. யஸ்மா ச தங் ஆக³ம்ம ஸப்³பே³ உபத⁴யோ படினிஸ்ஸட்டா² ஹொந்தி, ஸப்³பா³ தண்ஹா கீ²யந்தி, ஸப்³பே³ கிலேஸராகா³ விரஜ்ஜந்தி, ஸப்³ப³ங் து³க்க²ங் நிருஜ்ஜ²தி, தஸ்மா ஸப்³பூ³பதி⁴படினிஸ்ஸக்³கோ³ தண்ஹாக்க²யோ விராகோ³ நிரோதோ⁴தி வுச்சதி. யா பனேஸா தண்ஹா ப⁴வேன ப⁴வங், ப²லேன வா ஸத்³தி⁴ங் கம்மங் வினதி ஸங்ஸிப்³ப³தீதி கத்வா வானந்தி வுச்சதி, ததோ நிக்க²ந்தங் வானதோதி நிப்³பா³னங். ஸோ மமஸ்ஸ கிலமதோ²தி யா அஜானந்தானங் தே³ஸனா நாம, ஸோ மம கிலமதோ² அஸ்ஸ, ஸா மம விஹேஸா அஸ்ஸாதி அத்தோ². காயகிலமதோ² சேவ காயவிஹேஸா ச அஸ்ஸாதி வுத்தங் ஹோதி. சித்தே பன உப⁴யம்பேதங் பு³த்³தா⁴னங் நத்தி². அபிஸ்ஸூதி அனுப்³ரூஹனத்தே² நிபாதோ. ஸோ ‘‘ந கேவலங் அயங் பரிவிதக்கோ உத³பாதி³, இமாபி கா³தா² படிப⁴ங்ஸூ’’தி தீ³பேதி. அனச்ச²ரியாதி அனுஅச்ச²ரியா. படிப⁴ங்ஸூதி படிபா⁴னஸங்கா²தஸ்ஸ ஞாணஸ்ஸ கோ³சரா அஹேஸுங், பரிவிதக்கயிதப்³ப³தங் பாபுணிங்ஸு.
Tattha yadidanti nipāto, tassa ṭhānaṃ sandhāya ‘‘yaṃ ida’’nti, paṭiccasamuppādaṃ sandhāya ‘‘yo aya’’nti evamattho daṭṭhabbo. Idappaccayatāpaṭiccasamuppādoti imesaṃ paccayā idappaccayā, idappaccayā eva idappaccayatā, idappaccayatā ca sā paṭiccasamuppādo cāti idappaccayatāpaṭiccasamuppādo. Saṅkhārādipaccayānaṃ etaṃ adhivacanaṃ. Sabbasaṅkhārasamathotiādi sabbaṃ nibbānameva. Yasmā hi taṃ āgamma sabbasaṅkhāravipphanditāni samanti, vūpasammanti, tasmā sabbasaṅkhārasamathoti vuccati. Yasmā ca taṃ āgamma sabbe upadhayo paṭinissaṭṭhā honti, sabbā taṇhā khīyanti, sabbe kilesarāgā virajjanti, sabbaṃ dukkhaṃ nirujjhati, tasmā sabbūpadhipaṭinissaggo taṇhākkhayo virāgo nirodhoti vuccati. Yā panesā taṇhā bhavena bhavaṃ, phalena vā saddhiṃ kammaṃ vinati saṃsibbatīti katvā vānanti vuccati, tato nikkhantaṃ vānatoti nibbānaṃ. So mamassa kilamathoti yā ajānantānaṃ desanā nāma, so mama kilamatho assa, sā mama vihesā assāti attho. Kāyakilamatho ceva kāyavihesā ca assāti vuttaṃ hoti. Citte pana ubhayampetaṃ buddhānaṃ natthi. Apissūti anubrūhanatthe nipāto. So ‘‘na kevalaṃ ayaṃ parivitakko udapādi, imāpi gāthā paṭibhaṃsū’’ti dīpeti. Anacchariyāti anuacchariyā. Paṭibhaṃsūti paṭibhānasaṅkhātassa ñāṇassa gocarā ahesuṃ, parivitakkayitabbataṃ pāpuṇiṃsu.
கிச்சே²னாதி து³க்கே²ன, ந து³க்கா²ய படிபதா³ய. பு³த்³தா⁴னங் ஹி சத்தாரோபி மக்³கா³ ஸுக²படிபதா³வ ஹொந்தி. பாரமீபூரணகாலே பன ஸராக³ஸதோ³ஸஸமோஹஸ்ஸேவ ஸதோ ஆக³தாக³தானங் யாசகானங் அலங்கதபடியத்தங் ஸீஸங் கந்தித்வா க³லலோஹிதங் நீஹரித்வா ஸுஅஞ்ஜிதானி அக்கீ²னி உப்பாடெத்வா குலவங்ஸப்பதீ³பங் புத்தங் மனாபசாரினிங் ப⁴ரியந்தி ஏவமாதீ³னி தெ³ந்தஸ்ஸ அஞ்ஞானி ச க²ந்திவாதி³ஸதி³ஸேஸு அத்தபா⁴வேஸு சே²ஜ்ஜபே⁴ஜ்ஜாதீ³னி பாபுணந்தஸ்ஸ ஆக³மனீயபடிபத³ங் ஸந்தா⁴யேதங் வுத்தங். ஹலந்தி எத்த² ஹ-காரோ நிபாதமத்தோ, அலந்தி அத்தோ². பகாஸிதுந்தி தே³ஸிதுங், ஏவங் கிச்சே²ன அதி⁴க³தஸ்ஸ அலங் தே³ஸிதுங் பரியத்தங் தே³ஸிதுங். கோ அத்தோ² தே³ஸிதேனாதி வுத்தங் ஹோதி? ராக³தோ³ஸபரேதேஹீதி ராக³தோ³ஸபு²ட்டே²ஹி ராக³தோ³ஸானுக³தேஹி வா.
Kicchenāti dukkhena, na dukkhāya paṭipadāya. Buddhānaṃ hi cattāropi maggā sukhapaṭipadāva honti. Pāramīpūraṇakāle pana sarāgasadosasamohasseva sato āgatāgatānaṃ yācakānaṃ alaṅkatapaṭiyattaṃ sīsaṃ kantitvā galalohitaṃ nīharitvā suañjitāni akkhīni uppāṭetvā kulavaṃsappadīpaṃ puttaṃ manāpacāriniṃ bhariyanti evamādīni dentassa aññāni ca khantivādisadisesu attabhāvesu chejjabhejjādīni pāpuṇantassa āgamanīyapaṭipadaṃ sandhāyetaṃ vuttaṃ. Halanti ettha ha-kāro nipātamatto, alanti attho. Pakāsitunti desituṃ, evaṃ kicchena adhigatassa alaṃ desituṃ pariyattaṃ desituṃ. Ko attho desitenāti vuttaṃ hoti? Rāgadosaparetehīti rāgadosaphuṭṭhehi rāgadosānugatehi vā.
படிஸோதகா³மிந்தி நிச்சாதீ³னங் படிஸோதங், ‘‘அனிச்சங் து³க்க²மனத்தா அஸுப⁴’’ந்தி ஏவங் க³தங் சதுஸச்சத⁴ம்மங். ராக³ரத்தாதி காமராகே³ன ப⁴வராகே³ன தி³ட்டி²ராகே³ன ச ரத்தா. ந த³க்க²ந்தீதி அனிச்சங் து³க்க²மனத்தா அஸுப⁴ந்தி இமினா ஸபா⁴வேன ந பஸ்ஸிஸ்ஸந்தி , தே அபஸ்ஸந்தே கோ ஸக்கி²ஸ்ஸதி ஏவங் கா³ஹாபேதுங். தமோக²ந்தே⁴ன ஆவுடாதி அவிஜ்ஜாராஸினா அஜ்ஜொ²த்த²டா.
Paṭisotagāminti niccādīnaṃ paṭisotaṃ, ‘‘aniccaṃ dukkhamanattā asubha’’nti evaṃ gataṃ catusaccadhammaṃ. Rāgarattāti kāmarāgena bhavarāgena diṭṭhirāgena ca rattā. Na dakkhantīti aniccaṃ dukkhamanattā asubhanti iminā sabhāvena na passissanti , te apassante ko sakkhissati evaṃ gāhāpetuṃ. Tamokhandhena āvuṭāti avijjārāsinā ajjhotthaṭā.
அப்பொஸ்ஸுக்கதாயாதி நிருஸ்ஸுக்கபா⁴வேன, அதே³ஸேதுகாமதாயாதி அத்தோ². கஸ்மா பனஸ்ஸ ஏவங் சித்தங் நமி? நனு ஏஸ முத்தோ மோசெஸ்ஸாமி, திண்ணோ தாரெஸ்ஸாமி –
Appossukkatāyāti nirussukkabhāvena, adesetukāmatāyāti attho. Kasmā panassa evaṃ cittaṃ nami? Nanu esa mutto mocessāmi, tiṇṇo tāressāmi –
‘‘கிங் மே அஞ்ஞாதவேஸேன, த⁴ம்மங் ஸச்சி²கதேனித⁴;
‘‘Kiṃ me aññātavesena, dhammaṃ sacchikatenidha;
ஸப்³ப³ஞ்ஞுதங் பாபுணித்வா, தாரயிஸ்ஸங் ஸதே³வக’’ந்தி. (பு³॰ வங்॰ 2.56) –
Sabbaññutaṃ pāpuṇitvā, tārayissaṃ sadevaka’’nti. (bu. vaṃ. 2.56) –
பத்த²னங் கத்வா பாரமியோ பூரெத்வா ஸப்³ப³ஞ்ஞுதங் பத்தோதி? ஸச்சமேதங், ததே³வங் பச்சவெக்க²ணானுபா⁴வேன பனஸ்ஸ ஏவங் சித்தங் நமி. தஸ்ஸ ஹி ஸப்³ப³ஞ்ஞுதங் பத்வா ஸத்தானங் கிலேஸக³ஹனதங், த⁴ம்மஸ்ஸ ச க³ம்பீ⁴ரதங் பச்சவெக்க²ந்தஸ்ஸ ஸத்தானங் கிலேஸக³ஹனதா ச த⁴ம்மக³ம்பீ⁴ரதா ச ஸப்³பா³காரேன பாகடா ஜாதா. அத²ஸ்ஸ – ‘‘இமே ஸத்தா கஞ்ஜியபுண்ணா லாபு³ விய, தக்கப⁴ரிதா சாடி விய, வஸாதேலபீதபிலோதிகா விய, அஞ்ஜனமக்கி²தஹத்தோ² விய ச கிலேஸப⁴ரிதா அதிஸங்கிலிட்டா² ராக³ரத்தா தோ³ஸது³ட்டா² மோஹமூள்ஹா, தே கிங் நாம படிவிஜ்ஜி²ஸ்ஸந்தீ’’தி? சிந்தயதோ கிலேஸக³ஹனபச்சவெக்க²ணானுபா⁴வேனாபி ஏவங் சித்தங் நமி.
Patthanaṃ katvā pāramiyo pūretvā sabbaññutaṃ pattoti? Saccametaṃ, tadevaṃ paccavekkhaṇānubhāvena panassa evaṃ cittaṃ nami. Tassa hi sabbaññutaṃ patvā sattānaṃ kilesagahanataṃ, dhammassa ca gambhīrataṃ paccavekkhantassa sattānaṃ kilesagahanatā ca dhammagambhīratā ca sabbākārena pākaṭā jātā. Athassa – ‘‘ime sattā kañjiyapuṇṇā lābu viya, takkabharitā cāṭi viya, vasātelapītapilotikā viya, añjanamakkhitahattho viya ca kilesabharitā atisaṃkiliṭṭhā rāgarattā dosaduṭṭhā mohamūḷhā, te kiṃ nāma paṭivijjhissantī’’ti? Cintayato kilesagahanapaccavekkhaṇānubhāvenāpi evaṃ cittaṃ nami.
‘‘அயஞ்ச த⁴ம்மோ பத²வீஸந்தா⁴ரகஉத³கக்க²ந்தோ⁴ விய க³ம்பீ⁴ரோ, பப்³ப³தேன படிச்சா²தெ³த்வா ட²பிதோ ஸாஸபோ விய து³த்³த³ஸோ, ஸததா⁴ பி⁴ன்னஸ்ஸ வாலஸ்ஸ கோடியா கோடிபடிபாத³னங் விய து³ரனுபோ³தோ⁴. நனு மயா ஹி இமங் த⁴ம்மங் படிவிஜ்ஜி²துங் வாயமந்தேன அதி³ன்னங் தா³னங் நாம நத்தி², அரக்கி²தங் ஸீலங் நாம நத்தி², அபரிபூரிதா காசி பாரமீ நாம நத்தி², தஸ்ஸ மே நிருஸ்ஸாஹங் விய மாரப³லங் வித⁴மந்தஸ்ஸாபி பத²வீ ந கம்பித்த², பட²மயாமே புப்³பே³னிவாஸங் அனுஸ்ஸரந்தஸ்ஸாபி ந கம்பித்த², மஜ்ஜி²மயாமே தி³ப்³ப³சக்கு²ங் விஸோதெ⁴ந்தஸ்ஸாபி ந கம்பித்த², பச்சி²மயாமே பன படிச்சஸமுப்பாத³ங் படிவிஜ்ஜ²ந்தஸ்ஸேவ மே த³ஸஸஹஸ்ஸிலோகதா⁴து கம்பித்த². இதி மாதி³ஸேனாபி திக்க²ஞாணேன கிச்சே²னேவாயங் த⁴ம்மோ படிவித்³தோ⁴. தங் லோகியமஹாஜனா கத²ங் படிவிஜ்ஜி²ஸ்ஸந்தீ’’தி? த⁴ம்மக³ம்பீ⁴ரபச்சவெக்க²ணானுபா⁴வேனாபி ஏவங் சித்தங் நமீதி வேதி³தப்³ப³ங்.
‘‘Ayañca dhammo pathavīsandhārakaudakakkhandho viya gambhīro, pabbatena paṭicchādetvā ṭhapito sāsapo viya duddaso, satadhā bhinnassa vālassa koṭiyā koṭipaṭipādanaṃ viya duranubodho. Nanu mayā hi imaṃ dhammaṃ paṭivijjhituṃ vāyamantena adinnaṃ dānaṃ nāma natthi, arakkhitaṃ sīlaṃ nāma natthi, aparipūritā kāci pāramī nāma natthi, tassa me nirussāhaṃ viya mārabalaṃ vidhamantassāpi pathavī na kampittha, paṭhamayāme pubbenivāsaṃ anussarantassāpi na kampittha, majjhimayāme dibbacakkhuṃ visodhentassāpi na kampittha, pacchimayāme pana paṭiccasamuppādaṃ paṭivijjhantasseva me dasasahassilokadhātu kampittha. Iti mādisenāpi tikkhañāṇena kicchenevāyaṃ dhammo paṭividdho. Taṃ lokiyamahājanā kathaṃ paṭivijjhissantī’’ti? Dhammagambhīrapaccavekkhaṇānubhāvenāpi evaṃ cittaṃ namīti veditabbaṃ.
அபிச ப்³ரஹ்முனா யாசிதே தே³ஸேதுகாமதாயபிஸ்ஸ ஏவங் சித்தங் நமி. ஜானாதி ஹி ப⁴க³வா – ‘‘மம அப்பொஸ்ஸுக்கதாய சித்தே நமமானே மங் மஹாப்³ரஹ்மா த⁴ம்மதே³ஸனங் யாசிஸ்ஸதி, இமே ச ஸத்தா ப்³ரஹ்மக³ருகா. தே ‘ஸத்தா² கிர த⁴ம்மங் ந தே³ஸேதுகாமோ அஹோஸி. அத² நங் மஹாப்³ரஹ்மா யாசித்வா தே³ஸாபேஸி. ஸந்தோ வத போ⁴ த⁴ம்மோ, பணீதோ வத போ⁴ த⁴ம்மோ’தி மஞ்ஞமானா ஸுஸ்ஸூஸிஸ்ஸந்தீ’’தி. இத³ம்பிஸ்ஸ காரணங் படிச்ச அப்பொஸ்ஸுக்கதாய சித்தங் நமி, நோ த⁴ம்மதே³ஸனாயாதி வேதி³தப்³ப³ங்.
Apica brahmunā yācite desetukāmatāyapissa evaṃ cittaṃ nami. Jānāti hi bhagavā – ‘‘mama appossukkatāya citte namamāne maṃ mahābrahmā dhammadesanaṃ yācissati, ime ca sattā brahmagarukā. Te ‘satthā kira dhammaṃ na desetukāmo ahosi. Atha naṃ mahābrahmā yācitvā desāpesi. Santo vata bho dhammo, paṇīto vata bho dhammo’ti maññamānā sussūsissantī’’ti. Idampissa kāraṇaṃ paṭicca appossukkatāya cittaṃ nami, no dhammadesanāyāti veditabbaṃ.
ஸஹம்பதிஸ்ஸாதி ஸோ கிர கஸ்ஸபஸ்ஸ ப⁴க³வதோ ஸாஸனே ஸஹகோ நாம தே²ரோ பட²மஜ்ஜா²னங் நிப்³ப³த்தெத்வா பட²மஜ்ஜா²னபூ⁴மியங் கப்பாயுகப்³ரஹ்மா ஹுத்வா நிப்³ப³த்தோ. தத்ர நங் ‘‘ஸஹம்பதிப்³ரஹ்மா’’தி படிஸஞ்ஜானந்தி. தங் ஸந்தா⁴யாஹ ‘‘ப்³ரஹ்முனோ ஸஹம்பதிஸ்ஸா’’தி. நஸ்ஸதி வத போ⁴தி ஸோ கிர இமங் ஸத்³த³ங் ததா² நிச்சா²ரேஸி, யதா² த³ஸஸஹஸ்ஸிலோகதா⁴துப்³ரஹ்மானோ ஸுத்வா ஸப்³பே³ ஸன்னிபதிங்ஸு. யத்ர ஹி நாமாதி யஸ்மிங் நாம லோகே. புரதோ பாதுரஹோஸீதி தேஹி த³ஸஹி ப்³ரஹ்மஸஹஸ்ஸேஹி ஸத்³தி⁴ங் பாதுரஹோஸி. அப்பரஜக்க²ஜாதிகாதி பஞ்ஞாமயே அக்கி²ம்ஹி அப்பங் பரித்தங் ராக³தோ³ஸமோஹரஜங் ஏதேஸங் ஏவங்ஸபா⁴வாதி அப்பரஜக்க²ஜாதிகா. அஸ்ஸவனதாதி அஸ்ஸவனதாய. ப⁴விஸ்ஸந்தீதி புரிமபு³த்³தே⁴ஸு த³ஸபுஞ்ஞகிரியவஸேன கதாதி⁴காரா பரிபாகக³தா பது³மானி விய ஸூரியரஸ்மிஸம்ப²ஸ்ஸங், த⁴ம்மதே³ஸனங்யேவ ஆகங்க²மானா சதுப்பதி³ககா³தா²வஸானே அரியபூ⁴மிங் ஓக்கமனாரஹா ந ஏகோ, ந த்³வே, அனேகஸதஸஹஸ்ஸா த⁴ம்மஸ்ஸ அஞ்ஞாதாரோ ப⁴விஸ்ஸந்தீதி த³ஸ்ஸேதி.
Sahampatissāti so kira kassapassa bhagavato sāsane sahako nāma thero paṭhamajjhānaṃ nibbattetvā paṭhamajjhānabhūmiyaṃ kappāyukabrahmā hutvā nibbatto. Tatra naṃ ‘‘sahampatibrahmā’’ti paṭisañjānanti. Taṃ sandhāyāha ‘‘brahmuno sahampatissā’’ti. Nassati vata bhoti so kira imaṃ saddaṃ tathā nicchāresi, yathā dasasahassilokadhātubrahmāno sutvā sabbe sannipatiṃsu. Yatra hi nāmāti yasmiṃ nāma loke. Purato pāturahosīti tehi dasahi brahmasahassehi saddhiṃ pāturahosi. Apparajakkhajātikāti paññāmaye akkhimhi appaṃ parittaṃ rāgadosamoharajaṃ etesaṃ evaṃsabhāvāti apparajakkhajātikā. Assavanatāti assavanatāya. Bhavissantīti purimabuddhesu dasapuññakiriyavasena katādhikārā paripākagatā padumāni viya sūriyarasmisamphassaṃ, dhammadesanaṃyeva ākaṅkhamānā catuppadikagāthāvasāne ariyabhūmiṃ okkamanārahā na eko, na dve, anekasatasahassā dhammassa aññātāro bhavissantīti dasseti.
பாதுரஹோஸீதி பாதுப⁴வி. ஸமலேஹி சிந்திதோதி ஸமலேஹி ச²ஹி ஸத்தா²ரேஹி சிந்திதோ. தே ஹி புரேதரங் உப்பஜ்ஜித்வா ஸகலஜம்பு³தீ³பே கண்டகே பத்த²ரமானா விய, விஸங் ஸிஞ்சமானா விய ச ஸமலங் மிச்சா²தி³ட்டி²த⁴ம்மங் தே³ஸயிங்ஸு. அபாபுரேதந்தி விவரங் ஏதங். அமதஸ்ஸ த்³வாரந்தி அமதஸ்ஸ நிப்³பா³னஸ்ஸ த்³வாரபூ⁴தங் அரியமக்³க³ங். ஸுணந்து த⁴ம்மங் விமலேனானுபு³த்³த⁴ந்தி இமே ஸத்தா ராகா³தி³மலானங் அபா⁴வதோ விமலேன ஸம்மாஸம்பு³த்³தே⁴ன அனுபு³த்³த⁴ங் சதுஸச்சத⁴ம்மங் ஸுணந்து தாவ ப⁴க³வாதி யாசதி.
Pāturahosīti pātubhavi. Samalehi cintitoti samalehi chahi satthārehi cintito. Te hi puretaraṃ uppajjitvā sakalajambudīpe kaṇṭake pattharamānā viya, visaṃ siñcamānā viya ca samalaṃ micchādiṭṭhidhammaṃ desayiṃsu. Apāpuretanti vivaraṃ etaṃ. Amatassa dvāranti amatassa nibbānassa dvārabhūtaṃ ariyamaggaṃ. Suṇantu dhammaṃ vimalenānubuddhanti ime sattā rāgādimalānaṃ abhāvato vimalena sammāsambuddhena anubuddhaṃ catusaccadhammaṃ suṇantu tāva bhagavāti yācati.
ஸேலே யதா² பப்³ப³தமுத்³த⁴னிட்டி²தோதி ஸேலமயே ஏகக்³க⁴னே பப்³ப³தமுத்³த⁴னி யதா²டி²தோவ. ந ஹி தஸ்ஸ டி²தஸ்ஸ த³ஸ்ஸனத்த²ங் கீ³வுக்கி²பனபஸாரணாதி³கிச்சங் அத்தி². ததூ²பமந்தி தப்படிபா⁴க³ங் ஸேலபப்³ப³தூபமங். அயங் பனெத்த² ஸங்கே²பத்தோ² – யதா² ஸேலபப்³ப³தமுத்³த⁴னி டி²தோவ சக்கு²மா புரிஸோ ஸமந்ததோ ஜனதங் பஸ்ஸெய்ய , ததா² த்வம்பி ஸுமேத⁴ ஸுந்த³ரபஞ்ஞ ஸப்³ப³ஞ்ஞுதஞாணேன ஸமந்தசக்கு² ப⁴க³வா த⁴ம்மமயங் பாஸாத³மாருய்ஹ ஸயங் அபேதஸோகோ ஸோகாவதிண்ணங் ஜாதிஜராபி⁴பூ⁴தங் ஜனதங் அவெக்க²ஸ்ஸு உபதா⁴ரய உபபரிக்க². அயங் பனெத்த² அதி⁴ப்பாயோ – யதா² ஹி பப்³ப³தபாதே³ ஸமந்தா மஹந்தங் கெ²த்தங் கத்வா, தத்த² கேதா³ரபாளீஸு குடிகாயோ கத்வா ரத்திங் அக்³கி³ங் ஜாலெய்யுங், சதுரங்க³ஸமன்னாக³தஞ்ச அந்த⁴காரங் அஸ்ஸ, அத² தஸ்ஸ பப்³ப³தஸ்ஸ மத்த²கே ட²த்வா சக்கு²மதோ புரிஸஸ்ஸ பூ⁴மிங் ஓலோகயதோ நேவ கெ²த்தங் ந கேதா³ரபாளியோ ந குடியோ ந தத்த² ஸயிதமனுஸ்ஸா பஞ்ஞாயெய்யுங். குடிகாஸு பன அக்³கி³ஜாலாமத்தகமேவ பஞ்ஞாயெய்ய, ஏவங் த⁴ம்மபாஸாத³ங் ஆருய்ஹ ஸத்தனிகாயங் ஓலோகயதோ ததா²க³தஸ்ஸ யே தே அகதகல்யாணா ஸத்தா, தே ஏகவிஹாரே த³க்கி²ணஜாணுபஸ்ஸே நிஸின்னாபி பு³த்³த⁴சக்கு²ஸ்ஸ ஆபாத²ங் நாக³ச்ச²ந்தி, ரத்திங் கி²த்தா ஸரா விய ஹொந்தி. யே பன கதகல்யாணா வேனெய்யபுக்³க³லா, தே ஏவஸ்ஸ தூ³ரேபி டி²தா ஆபாத²ங் ஆக³ச்ச²ந்தி ஸோ அக்³கி³ விய ஹிமவந்தபப்³ப³தோ விய ச. வுத்தம்பி சேதங் –
Sele yathā pabbatamuddhaniṭṭhitoti selamaye ekagghane pabbatamuddhani yathāṭhitova. Na hi tassa ṭhitassa dassanatthaṃ gīvukkhipanapasāraṇādikiccaṃ atthi. Tathūpamanti tappaṭibhāgaṃ selapabbatūpamaṃ. Ayaṃ panettha saṅkhepattho – yathā selapabbatamuddhani ṭhitova cakkhumā puriso samantato janataṃ passeyya , tathā tvampi sumedha sundarapañña sabbaññutañāṇena samantacakkhu bhagavā dhammamayaṃ pāsādamāruyha sayaṃ apetasoko sokāvatiṇṇaṃ jātijarābhibhūtaṃ janataṃ avekkhassu upadhāraya upaparikkha. Ayaṃ panettha adhippāyo – yathā hi pabbatapāde samantā mahantaṃ khettaṃ katvā, tattha kedārapāḷīsu kuṭikāyo katvā rattiṃ aggiṃ jāleyyuṃ, caturaṅgasamannāgatañca andhakāraṃ assa, atha tassa pabbatassa matthake ṭhatvā cakkhumato purisassa bhūmiṃ olokayato neva khettaṃ na kedārapāḷiyo na kuṭiyo na tattha sayitamanussā paññāyeyyuṃ. Kuṭikāsu pana aggijālāmattakameva paññāyeyya, evaṃ dhammapāsādaṃ āruyha sattanikāyaṃ olokayato tathāgatassa ye te akatakalyāṇā sattā, te ekavihāre dakkhiṇajāṇupasse nisinnāpi buddhacakkhussa āpāthaṃ nāgacchanti, rattiṃ khittā sarā viya honti. Ye pana katakalyāṇā veneyyapuggalā, te evassa dūrepi ṭhitā āpāthaṃ āgacchanti so aggi viya himavantapabbato viya ca. Vuttampi cetaṃ –
‘‘தூ³ரே ஸந்தோ பகாஸெந்தி, ஹிமவந்தோவ பப்³ப³தோ;
‘‘Dūre santo pakāsenti, himavantova pabbato;
அஸந்தெத்த² ந தி³ஸ்ஸந்தி, ரத்திங் கி²த்தா யதா² ஸரா’’தி. (த⁴॰ ப॰ 304);
Asantettha na dissanti, rattiṃ khittā yathā sarā’’ti. (dha. pa. 304);
அஜ்ஜே²ஸனந்தி யாசனங். பு³த்³த⁴சக்கு²னாதி இந்த்³ரியபரோபரியத்தஞாணேன ச ஆஸயானுஸயஞாணேன ச. இமேஸங் ஹி த்³வின்னங் ஞாணானங் ‘‘பு³த்³த⁴சக்கூ²’’தி நாமங், ஸப்³ப³ஞ்ஞுதஞ்ஞாணஸ்ஸ ‘‘ஸமந்தசக்கூ²’’தி, திண்ணங் மக்³க³ஞாணானங் ‘‘த⁴ம்மசக்கூ²’’தி. அப்பரஜக்கே²திஆதீ³ஸு யேஸங் வுத்தனயேனேவ பஞ்ஞாசக்கு²ம்ஹி ராகா³தி³ரஜங் அப்பங், தே அப்பரஜக்கா². யேஸங் தங் மஹந்தங், தே மஹாரஜக்கா². யேஸங் ஸத்³தா⁴தீ³னி இந்த்³ரியானி திக்கா²னி, தே திக்கி²ந்த்³ரியா. யேஸங் தானி முதூ³னி, தே முதி³ந்த்³ரியா. யேஸங் தேயேவ ஸத்³தா⁴த³யோ ஆகாரா ஸுந்த³ரா, தே ஸ்வாகாரா. யே கதி²தகாரணங் ஸல்லக்கெ²ந்தி, ஸுகே²ன ஸக்கா ஹொந்தி விஞ்ஞாபேதுங், தே ஸுவிஞ்ஞாபயா. யே பரலோகஞ்சேவ வஜ்ஜஞ்ச ப⁴யதோ பஸ்ஸந்தி, தே பரலோகவஜ்ஜப⁴யத³ஸ்ஸாவினோ நாம.
Ajjhesananti yācanaṃ. Buddhacakkhunāti indriyaparopariyattañāṇena ca āsayānusayañāṇena ca. Imesaṃ hi dvinnaṃ ñāṇānaṃ ‘‘buddhacakkhū’’ti nāmaṃ, sabbaññutaññāṇassa ‘‘samantacakkhū’’ti, tiṇṇaṃ maggañāṇānaṃ ‘‘dhammacakkhū’’ti. Apparajakkhetiādīsu yesaṃ vuttanayeneva paññācakkhumhi rāgādirajaṃ appaṃ, te apparajakkhā. Yesaṃ taṃ mahantaṃ, te mahārajakkhā. Yesaṃ saddhādīni indriyāni tikkhāni, te tikkhindriyā. Yesaṃ tāni mudūni, te mudindriyā. Yesaṃ teyeva saddhādayo ākārā sundarā, te svākārā. Ye kathitakāraṇaṃ sallakkhenti, sukhena sakkā honti viññāpetuṃ, te suviññāpayā. Ye paralokañceva vajjañca bhayato passanti, te paralokavajjabhayadassāvino nāma.
அயங் பனெத்த² பாளி – ‘‘ஸத்³தோ⁴ புக்³க³லோ அப்பரஜக்கோ², அஸ்ஸத்³தோ⁴ புக்³க³லோ மஹாரஜக்கோ². ஆரத்³த⁴வீரியோ, குஸீதோ. உபட்டி²தஸ்ஸதி, முட்ட²ஸ்ஸதி. ஸமாஹிதோ , அஸமாஹிதோ. பஞ்ஞவா, து³ப்பஞ்ஞோ புக்³க³லோ மஹாரஜக்கோ². ததா² ஸத்³தோ⁴ புக்³க³லோ திக்கி²ந்த்³ரியோ…பே॰… பஞ்ஞவா புக்³க³லோ பரலோகவஜ்ஜப⁴யத³ஸ்ஸாவீ, து³ப்பஞ்ஞோ புக்³க³லோ ந பரலோகவஜ்ஜப⁴யத³ஸ்ஸாவீ. லோகோதி க²ந்த⁴லோகோ, ஆயதனலோகோ, தா⁴துலோகோ, ஸம்பத்திப⁴வலோகோ, ஸம்பத்திஸம்ப⁴வலோகோ, விபத்திப⁴வலோகோ, விபத்திஸம்ப⁴வலோகோ. ஏகோ லோகோ ஸப்³பே³ ஸத்தா ஆஹாரட்டி²திகா. த்³வே லோகா நாமஞ்ச ரூபஞ்ச. தயோ லோகா திஸ்ஸோ வேத³னா. சத்தாரோ லோகா சத்தாரோ ஆஹாரா. பஞ்ச லோகா பஞ்சுபாதா³னக்க²ந்தா⁴. ச² லோகா ச² அஜ்ஜ²த்திகானி ஆயதனானி. ஸத்த லோகா ஸத்த விஞ்ஞாணட்டி²தியோ. அட்ட² லோகா அட்ட² லோகத⁴ம்மா. நவ லோகா நவ ஸத்தாவாஸா. த³ஸ லோகா த³ஸாயதனானி. த்³வாத³ஸ லோகா த்³வாத³ஸாயதனானி. அட்டா²ரஸ லோகா அட்டா²ரஸ தா⁴துயோ. வஜ்ஜந்தி ஸப்³பே³ கிலேஸா வஜ்ஜா, ஸப்³பே³ து³ச்சரிதா வஜ்ஜா, ஸப்³பே³ அபி⁴ஸங்கா²ரா வஜ்ஜா, ஸப்³பே³ ப⁴வகா³மிகம்மா வஜ்ஜா, இதி இமஸ்மிஞ்ச லோகே இமஸ்மிஞ்ச வஜ்ஜே திப்³பா³ ப⁴யஸஞ்ஞா பச்சுபட்டி²தா ஹோதி, ஸெய்யதா²பி உக்கி²த்தாஸிகே வத⁴கே. இமேஹி பஞ்ஞாஸாய ஆகாரேஹி இமானி பஞ்சிந்த்³ரியானி ஜானாதி பஸ்ஸதி அஞ்ஞாஸி படிவிஜ்ஜி². இத³ங் ததா²க³தஸ்ஸ இந்த்³ரியபரோபரியத்தே ஞாண’’ந்தி (படி॰ ம॰ 1.112).
Ayaṃ panettha pāḷi – ‘‘saddho puggalo apparajakkho, assaddho puggalo mahārajakkho. Āraddhavīriyo, kusīto. Upaṭṭhitassati, muṭṭhassati. Samāhito , asamāhito. Paññavā, duppañño puggalo mahārajakkho. Tathā saddho puggalo tikkhindriyo…pe… paññavā puggalo paralokavajjabhayadassāvī, duppañño puggalo na paralokavajjabhayadassāvī. Lokoti khandhaloko, āyatanaloko, dhātuloko, sampattibhavaloko, sampattisambhavaloko, vipattibhavaloko, vipattisambhavaloko. Eko loko sabbe sattā āhāraṭṭhitikā. Dve lokā nāmañca rūpañca. Tayo lokā tisso vedanā. Cattāro lokā cattāro āhārā. Pañca lokā pañcupādānakkhandhā. Cha lokā cha ajjhattikāni āyatanāni. Satta lokā satta viññāṇaṭṭhitiyo. Aṭṭha lokā aṭṭha lokadhammā. Nava lokā nava sattāvāsā. Dasa lokā dasāyatanāni. Dvādasa lokā dvādasāyatanāni. Aṭṭhārasa lokā aṭṭhārasa dhātuyo. Vajjanti sabbe kilesā vajjā, sabbe duccaritā vajjā, sabbe abhisaṅkhārā vajjā, sabbe bhavagāmikammā vajjā, iti imasmiñca loke imasmiñca vajje tibbā bhayasaññā paccupaṭṭhitā hoti, seyyathāpi ukkhittāsike vadhake. Imehi paññāsāya ākārehi imāni pañcindriyāni jānāti passati aññāsi paṭivijjhi. Idaṃ tathāgatassa indriyaparopariyatte ñāṇa’’nti (paṭi. ma. 1.112).
உப்பலினியந்தி உப்பலவனே. இதரேஸுபி ஏஸேவ நயோ. அந்தோனிமுக்³க³போஸீனீதி யானி அந்தோ நிமுக்³கா³னேவ போஸியந்தி. உத³கங் அச்சுக்³க³ம்ம டி²தானீ தி உத³கங் அதிக்கமித்வா டி²தானி. தத்த² யானி அச்சுக்³க³ம்ம டி²தானி, தானி ஸூரியரஸ்மிஸம்ப²ஸ்ஸங் ஆக³மயமானானி டி²தானி அஜ்ஜ புப்ப²னகானி. யானி பன ஸமோத³கங் டி²தானி, தானி ஸ்வே புப்ப²னகானி. யானி உத³கானுக்³க³தானி அந்தோனிமுக்³க³போஸீனி, தானி ததியதி³வஸே புப்ப²னகானி. உத³கா பன அனுக்³க³தானி அஞ்ஞானிபி ஸரோக³உப்பலாதீ³னி நாம அத்தி², யானி நேவ புப்பி²ஸ்ஸந்தி, மச்ச²கச்ச²பப⁴க்கா²னேவ ப⁴விஸ்ஸந்தி, தானி பாளிங் நாருள்ஹானி. ஆஹரித்வா பன தீ³பேதப்³பா³னீதி தீ³பிதானி. யதே²வ ஹி தானி சதுப்³பி³தா⁴னி புப்பா²னி, ஏவமேவங் உக்³க⁴டிதஞ்ஞூ விபஞ்சிதஞ்ஞூ நெய்யோ பத³பரமோதி சத்தாரோ புக்³க³லா.
Uppaliniyanti uppalavane. Itaresupi eseva nayo. Antonimuggaposīnīti yāni anto nimuggāneva posiyanti. Udakaṃ accuggamma ṭhitānī ti udakaṃ atikkamitvā ṭhitāni. Tattha yāni accuggamma ṭhitāni, tāni sūriyarasmisamphassaṃ āgamayamānāni ṭhitāni ajja pupphanakāni. Yāni pana samodakaṃ ṭhitāni, tāni sve pupphanakāni. Yāni udakānuggatāni antonimuggaposīni, tāni tatiyadivase pupphanakāni. Udakā pana anuggatāni aññānipi sarogauppalādīni nāma atthi, yāni neva pupphissanti, macchakacchapabhakkhāneva bhavissanti, tāni pāḷiṃ nāruḷhāni. Āharitvā pana dīpetabbānīti dīpitāni. Yatheva hi tāni catubbidhāni pupphāni, evamevaṃ ugghaṭitaññū vipañcitaññū neyyo padaparamoti cattāro puggalā.
தத்த² ‘‘யஸ்ஸ புக்³க³லஸ்ஸ ஸஹ உதா³ஹடவேலாய த⁴ம்மாபி⁴ஸமயோ ஹோதி, அயங் வுச்சதி புக்³க³லோ உக்³க⁴டிதஞ்ஞூ. யஸ்ஸ புக்³க³லஸ்ஸ ஸங்கி²த்தேன பா⁴ஸிதஸ்ஸ வித்தா²ரேன அத்தே² விப⁴ஜியமானே த⁴ம்மாபி⁴ஸமயோ ஹோதி, அயங் வுச்சதி புக்³க³லோ விபஞ்சிதஞ்ஞூ. யஸ்ஸ புக்³க³லஸ்ஸ உத்³தே³ஸதோ பரிபுச்ச²தோ யோனிஸோ மனஸிகரோதோ கல்யாணமித்தே ஸேவதோ ப⁴ஜதோ பயிருபாஸதோ அனுபுப்³பே³ன த⁴ம்மாபி⁴ஸமயோ ஹோதி, அயங் வுச்சதி புக்³க³லோ நெய்யோ. யஸ்ஸ புக்³க³லஸ்ஸ ப³ஹும்பி ஸுணதோ ப³ஹும்பி ப⁴ணதோ ப³ஹும்பி தா⁴ரயதோ ப³ஹும்பி வாசயதோ ந தாய ஜாதியா த⁴ம்மாபி⁴ஸமயோ ஹோதி, அயங் வுச்சதி புக்³க³லோ பத³பரமோ (பு॰ ப॰ 148-151). தத்த² ப⁴க³வா உப்பலவனாதி³ஸதி³ஸங் த³ஸஸஹஸ்ஸிலோகதா⁴துங் ஓலோகெந்தோ – ‘‘அஜ்ஜ புப்ப²னகானி விய உக்³க⁴டிதஞ்ஞூ, ஸ்வே புப்ப²னகானி விய விபஞ்சிதஞ்ஞூ, ததியதி³வஸே புப்ப²னகானி விய நெய்யோ, மச்ச²கச்ச²பப⁴க்கா²னி புப்பா²னி விய பத³பரமோ’’தி அத்³த³ஸ்ஸ. பஸ்ஸந்தோ ச ‘‘எத்தகா அப்பரஜக்கா², எத்தகா மஹாரஜக்கா², தத்ராபி எத்தகா உக்³க⁴டிதஞ்ஞூ’’தி ஏவங் ஸப்³பா³காரதோவ அத்³த³ஸ.
Tattha ‘‘yassa puggalassa saha udāhaṭavelāya dhammābhisamayo hoti, ayaṃ vuccati puggalo ugghaṭitaññū. Yassa puggalassa saṃkhittena bhāsitassa vitthārena atthe vibhajiyamāne dhammābhisamayo hoti, ayaṃ vuccati puggalo vipañcitaññū. Yassa puggalassa uddesato paripucchato yoniso manasikaroto kalyāṇamitte sevato bhajato payirupāsato anupubbena dhammābhisamayo hoti, ayaṃ vuccati puggalo neyyo. Yassa puggalassa bahumpi suṇato bahumpi bhaṇato bahumpi dhārayato bahumpi vācayato na tāya jātiyā dhammābhisamayo hoti, ayaṃ vuccati puggalo padaparamo (pu. pa. 148-151). Tattha bhagavā uppalavanādisadisaṃ dasasahassilokadhātuṃ olokento – ‘‘ajja pupphanakāni viya ugghaṭitaññū, sve pupphanakāni viya vipañcitaññū, tatiyadivase pupphanakāni viya neyyo, macchakacchapabhakkhāni pupphāni viya padaparamo’’ti addassa. Passanto ca ‘‘ettakā apparajakkhā, ettakā mahārajakkhā, tatrāpi ettakā ugghaṭitaññū’’ti evaṃ sabbākāratova addasa.
தத்த² திண்ணங் புக்³க³லானங் இமஸ்மிங்யேவ அத்தபா⁴வே ப⁴க³வதோ த⁴ம்மதே³ஸனா அத்த²ங் ஸாதே⁴தி. பத³பரமானங் அனாக³தத்தா²ய வாஸனா ஹோதி. அத² ப⁴க³வா இமேஸங் சதுன்னங் புக்³க³லானங் அத்தா²வஹங் த⁴ம்மதே³ஸனங் விதி³த்வா தே³ஸேதுகம்யதங் உப்பாதெ³த்வா புன ஸப்³பே³பி தீஸு ப⁴வேஸு ஸத்தே ப⁴ப்³பா³ப⁴ப்³ப³வஸேன த்³வே கொட்டா²ஸே அகாஸி. யே ஸந்தா⁴ய வுத்தங் – ‘‘கதமே ஸத்தா அப⁴ப்³பா³? யே தே ஸத்தா கம்மாவரணேன ஸமன்னாக³தா கிலேஸாவரணேன ஸமன்னாக³தா விபாகாவரணேன ஸமன்னாக³தா அஸ்ஸத்³தா⁴ அச்ச²ந்தி³கா து³ப்பஞ்ஞா அப⁴ப்³பா³ நியாமங் ஓக்கமிதுங் குஸலேஸு த⁴ம்மேஸு ஸம்மத்தங், இமே தே ஸத்தா அப⁴ப்³பா³. கதமே ஸத்தா ப⁴ப்³பா³? யே தே ஸத்தா ந கம்மாவரணேன…பே॰… இமே தே ஸத்தா ப⁴ப்³பா³’’தி (விப⁴॰ 827; படி॰ ம॰ 1.115). தத்த² ஸப்³பே³பி அப⁴ப்³ப³புக்³க³லே பஹாய ப⁴ப்³ப³புக்³க³லேயேவ ஞாணேன பரிக்³க³ஹெத்வா, ‘‘எத்தகா ராக³சரிதா எத்தகா தோ³ஸ-மோஹசரிதா விதக்க-ஸத்³தா⁴-பு³த்³தி⁴சரிதா’’தி ச² கொட்டா²ஸே அகாஸி. ஏவங் கத்வா த⁴ம்மங் தே³ஸெஸ்ஸாமீதி சிந்தேஸி.
Tattha tiṇṇaṃ puggalānaṃ imasmiṃyeva attabhāve bhagavato dhammadesanā atthaṃ sādheti. Padaparamānaṃ anāgatatthāya vāsanā hoti. Atha bhagavā imesaṃ catunnaṃ puggalānaṃ atthāvahaṃ dhammadesanaṃ viditvā desetukamyataṃ uppādetvā puna sabbepi tīsu bhavesu satte bhabbābhabbavasena dve koṭṭhāse akāsi. Ye sandhāya vuttaṃ – ‘‘katame sattā abhabbā? Ye te sattā kammāvaraṇena samannāgatā kilesāvaraṇena samannāgatā vipākāvaraṇena samannāgatā assaddhā acchandikā duppaññā abhabbā niyāmaṃ okkamituṃ kusalesu dhammesu sammattaṃ, ime te sattā abhabbā. Katame sattā bhabbā? Ye te sattā na kammāvaraṇena…pe… ime te sattā bhabbā’’ti (vibha. 827; paṭi. ma. 1.115). Tattha sabbepi abhabbapuggale pahāya bhabbapuggaleyeva ñāṇena pariggahetvā, ‘‘ettakā rāgacaritā ettakā dosa-mohacaritā vitakka-saddhā-buddhicaritā’’ti cha koṭṭhāse akāsi. Evaṃ katvā dhammaṃ desessāmīti cintesi.
பச்சபா⁴ஸீதி பதிஅபா⁴ஸி. அபாருதாதி விவடா. அமதஸ்ஸ த்³வாராதி அரியமக்³கோ³. ஸோ ஹி அமதஸங்கா²தஸ்ஸ நிப்³பா³னஸ்ஸ த்³வாரங், ஸோ மயா விவரித்வா ட²பிதோதி த³ஸ்ஸேதி. பமுஞ்சந்து ஸத்³த⁴ந்தி ஸப்³பே³ அத்தனோ ஸத்³த⁴ங் பமுஞ்சந்து விஸ்ஸஜ்ஜெந்து. பச்சி²மபத³த்³வயே அயமத்தோ² – அஹஞ்ஹி அத்தனோ பகு³ணங் ஸுப்பவத்திதம்பி இமங் பணீதங் உத்தமங் த⁴ம்மங் காயவாசாகிலமத²ஸஞ்ஞீ ஹுத்வா ந பா⁴ஸிங். இதா³னி பன ஸப்³போ³ ஜனோ ஸத்³தா⁴பா⁴ஜனங் உபனேது, பூரெஸ்ஸாமி தேஸங் ஸங்கப்பந்தி.
Paccabhāsīti patiabhāsi. Apārutāti vivaṭā. Amatassa dvārāti ariyamaggo. So hi amatasaṅkhātassa nibbānassa dvāraṃ, so mayā vivaritvā ṭhapitoti dasseti. Pamuñcantu saddhanti sabbe attano saddhaṃ pamuñcantu vissajjentu. Pacchimapadadvaye ayamattho – ahañhi attano paguṇaṃ suppavattitampi imaṃ paṇītaṃ uttamaṃ dhammaṃ kāyavācākilamathasaññī hutvā na bhāsiṃ. Idāni pana sabbo jano saddhābhājanaṃ upanetu, pūressāmi tesaṃ saṅkappanti.
அந்தரதா⁴யீதி ஸத்தா²ரங் க³ந்த⁴மாலாதீ³ஹி பூஜெத்வா அந்தரஹிதோ, ஸகட்டா²னமேவ க³தோதி அத்தோ². க³தே ச பன தஸ்மிங் ப⁴க³வா ‘‘கஸ்ஸ நு கோ² அஹங் பட²மங் த⁴ம்மங் தே³ஸெய்ய’’ந்தி? ஆளாருத³கானங் காலங்கதபா⁴வங், பஞ்சவக்³கி³யானஞ்ச ப³ஹூபகாரபா⁴வங் ஞத்வா தேஸங் த⁴ம்மங் தே³ஸேதுகாமோ பா³ராணஸியங் இஸிபதனங் க³ந்த்வா த⁴ம்மசக்கங் பவத்தேஸீதி. பட²மங்.
Antaradhāyīti satthāraṃ gandhamālādīhi pūjetvā antarahito, sakaṭṭhānameva gatoti attho. Gate ca pana tasmiṃ bhagavā ‘‘kassa nu kho ahaṃ paṭhamaṃ dhammaṃ deseyya’’nti? Āḷārudakānaṃ kālaṅkatabhāvaṃ, pañcavaggiyānañca bahūpakārabhāvaṃ ñatvā tesaṃ dhammaṃ desetukāmo bārāṇasiyaṃ isipatanaṃ gantvā dhammacakkaṃ pavattesīti. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. ப்³ரஹ்மாயாசனஸுத்தங் • 1. Brahmāyācanasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. ப்³ரஹ்மாயாசனஸுத்தவண்ணனா • 1. Brahmāyācanasuttavaṇṇanā
