Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā)

    ༥. བྲཱཧྨཎཝགྒོ

    5. Brāhmaṇavaggo

    ༡. བྲཧྨཱཡུསུཏྟཝཎྞནཱ

    1. Brahmāyusuttavaṇṇanā

    ༣༨༣. ཨེཝཾ མེ སུཏནྟི བྲཧྨཱཡུསུཏྟཾ། ཏཏྠ མཧཏཱ བྷིཀྑུསངྒྷེན སདྡྷིནྟི མཧཏཱཏི གུཎམཧཏྟེནཔི མཧཏཱ, སངྑྱཱམཧཏྟེནཔི། སོ ཧི བྷིཀྑུསངྒྷེ གུཎེཧིཔི མཧཱ ཨཧོསི ཨཔྤིཙྪཏཱདིགུཎསམནྣཱགཏཏྟཱ, སངྑྱཱཡཔི མཧཱ པཉྩསཏསངྑྱཏྟཱ། བྷིཀྑཱུནཾ སངྒྷེན བྷིཀྑུསངྒྷེན, དིཊྛིསཱིལསཱམཉྙསངྒྷཱཏསངྑཱཏེན སམཎགཎེནཱཏི ཨཏྠོ། སདྡྷིནྟི ཨེཀཏོ། པཉྩམཏྟེཧི བྷིཀྑུསཏེཧཱིཏི པཉྩ མཏྟཱ ཨེཏེསནྟི པཉྩམཏྟཱནི། མཏྟཱཏི པམཱཎཾ ཝུཙྩཏི, ཏསྨཱ ཡཐཱ བྷོཛནེ མཏྟཉྙཱུཏི ཝུཏྟེ བྷོཛནེ མཏྟཾ ཛཱནཱཏི པམཱཎཾ ཛཱནཱཏཱིཏི ཨཏྠོ ཧོཏི, ཨེཝམིདྷཱཔི ཏེསཾ བྷིཀྑུསཏཱནཾ པཉྩམཏྟཱ པཉྩཔམཱཎནྟི ཨེཝམཏྠོ དཊྛབྦོ། བྷིཀྑཱུནཾ སཏཱནི བྷིཀྑུསཏཱནི། ཏེཧི པཉྩམཏྟེཧི བྷིཀྑུསཏེཧི།

    383.Evaṃme sutanti brahmāyusuttaṃ. Tattha mahatā bhikkhusaṅghena saddhinti mahatāti guṇamahattenapi mahatā, saṅkhyāmahattenapi. So hi bhikkhusaṅghe guṇehipi mahā ahosi appicchatādiguṇasamannāgatattā, saṅkhyāyapi mahā pañcasatasaṅkhyattā. Bhikkhūnaṃ saṅghena bhikkhusaṅghena, diṭṭhisīlasāmaññasaṅghātasaṅkhātena samaṇagaṇenāti attho. Saddhinti ekato. Pañcamattehi bhikkhusatehīti pañca mattā etesanti pañcamattāni. Mattāti pamāṇaṃ vuccati, tasmā yathā bhojane mattaññūti vutte bhojane mattaṃ jānāti pamāṇaṃ jānātīti attho hoti, evamidhāpi tesaṃ bhikkhusatānaṃ pañcamattā pañcapamāṇanti evamattho daṭṭhabbo. Bhikkhūnaṃ satāni bhikkhusatāni. Tehi pañcamattehi bhikkhusatehi.

    ཝཱིསཝསྶསཏིཀོཏི ཝཱིསཱདྷིཀཝསྶསཏིཀོ། ཏིཎྞཾ ཝེདཱནནྟི ཨིརུཝེདཡཛུཝེདསཱམཝེདཱནཾ། ཨོཊྛཔཧཏཀརཎཝསེན པཱརཾ གཏོཏི པཱརགཱུ། སཧ ནིགྷཎྜུནཱ ཙ ཀེཊུབྷེན ཙ སནིགྷཎྜུཀེཊུབྷཱནཾ, ནིགྷཎྜཱུཏི ནཱམནིགྷཎྚུརུཀྑཱདཱིནཾ ཝེཝཙནཔྤཀཱསཀཾ སཏྠཾ། ཀེཊུབྷནྟི ཀིརིཡཱཀཔྤཝིཀཔྤོ ཀཝཱིནཾ ཨུཔཀཱརཱཡ སཏྠཾ། སཧ ཨཀྑརཔྤབྷེདེན སཀྑརཔྤབྷེདཱནཾ། ཨཀྑརཔྤབྷེདོཏི སིཀྑཱ ཙ ནིརུཏྟི ཙ། ཨིཏིཧཱསཔཉྩམཱནནྟི ཨཱཐབྦཎཝེདཾ ཙཏུཏྠཾ ཀཏྭཱ ‘‘ཨིཏིཧ ཨཱས ཨིཏིཧ ཨཱསཱ’’ཏི ཨཱིདིསཝཙནཔྤཊིསཾཡུཏྟོ པུརཱཎཀཐཱསངྑཱཏོ ཨིཏིཧཱསོ པཉྩམོ ཨེཏེསནྟི ཨིཏིཧཱསཔཉྩམཱ, ཏེསཾ ཨིཏིཧཱསཔཉྩམཱནཾ། པདཉྩ ཏདཝསེསཉྩ བྱཱཀརཎཾ ཨདྷཱིཡཏི པཝེདེཏི ཙཱཏི པདཀོ ཝེཡྻཱཀརཎོ། ལོཀཱཡཏཾ ཝུཙྩཏི ཝིཏཎྜཝཱདསཏྠཾ། མཧཱཔུརིསལཀྑཎནྟི མཧཱཔུརིསཱནཾ བུདྡྷཱདཱིནཾ ལཀྑཎདཱིཔཀཾ དྭཱདསསཧསྶགནྠཔྤམཱཎཾ སཏྠཾ, ཡཏྠ སོལ༹སསཧསྶགཱཐཱཔརིམཱཎཱཡ བུདྡྷམནྟཱ ནཱམ ཨཧེསུཾ, ཡེསཾ ཝསེན ‘‘ཨིམིནཱ ལཀྑཎེན སམནྣཱགཏཱ བུདྡྷཱ ནཱམ ཧོནྟི, ཨིམིནཱ པཙྩེཀབུདྡྷཱ ནཱམ ཧོནྟི, ཨིམིནཱ དྭེ ཨགྒསཱཝཀཱ, ཨསཱིཏིམཧཱསཱཝཀཱ, བུདྡྷམཱཏཱ, བུདྡྷཔིཏཱ, ཨགྒུཔཊྛཱཀོ, ཨགྒུཔཊྛཱཡིཀཱ, རཱཛཱ ཙཀྐཝཏྟཱི’’ཏི ཨཡཾ ཝིསེསོ ཉཱཡཏི། ཨནཝཡོཏི ཨིམེསུ ལོཀཱཡཏམཧཱཔུརིསལཀྑཎེསུ ཨནཱུནོ པརིཔཱུརཀཱརཱི, ཨཝཡོ ན ཧོཏཱིཏི ཝུཏྟཾ ཧོཏི། ཨཝཡོ ནཱམ ཡོ ཏཱནི ཨཏྠཏོ ཙ གནྠཏོ ཙ སནྡྷཱརེཏུཾ ན སཀྐོཏི། ཨསྶོསི ཁོཏིཨཱདཱིསུ ཡཾ ཝཏྟབྦཾ སིཡཱ, ཏཾ སཱལེཡྻཀསུཏྟེ (མ॰ ནི॰ ༡.༤༣༩ ཨཱདཡོ) ཝུཏྟམེཝ།

    Vīsavassasatikoti vīsādhikavassasatiko. Tiṇṇaṃ vedānanti iruvedayajuvedasāmavedānaṃ. Oṭṭhapahatakaraṇavasena pāraṃ gatoti pāragū. Saha nighaṇḍunā ca keṭubhena ca sanighaṇḍukeṭubhānaṃ, nighaṇḍūti nāmanighaṇṭurukkhādīnaṃ vevacanappakāsakaṃ satthaṃ. Keṭubhanti kiriyākappavikappo kavīnaṃ upakārāya satthaṃ. Saha akkharappabhedena sakkharappabhedānaṃ. Akkharappabhedoti sikkhā ca nirutti ca. Itihāsapañcamānanti āthabbaṇavedaṃ catutthaṃ katvā ‘‘itiha āsa itiha āsā’’ti īdisavacanappaṭisaṃyutto purāṇakathāsaṅkhāto itihāso pañcamo etesanti itihāsapañcamā, tesaṃ itihāsapañcamānaṃ. Padañca tadavasesañca byākaraṇaṃ adhīyati pavedeti cāti padako veyyākaraṇo. Lokāyataṃ vuccati vitaṇḍavādasatthaṃ. Mahāpurisalakkhaṇanti mahāpurisānaṃ buddhādīnaṃ lakkhaṇadīpakaṃ dvādasasahassaganthappamāṇaṃ satthaṃ, yattha soḷasasahassagāthāparimāṇāya buddhamantā nāma ahesuṃ, yesaṃ vasena ‘‘iminā lakkhaṇena samannāgatā buddhā nāma honti, iminā paccekabuddhā nāma honti, iminā dve aggasāvakā, asītimahāsāvakā, buddhamātā, buddhapitā, aggupaṭṭhāko, aggupaṭṭhāyikā, rājā cakkavattī’’ti ayaṃ viseso ñāyati. Anavayoti imesu lokāyatamahāpurisalakkhaṇesu anūno paripūrakārī, avayo na hotīti vuttaṃ hoti. Avayo nāma yo tāni atthato ca ganthato ca sandhāretuṃ na sakkoti. Assosi khotiādīsu yaṃ vattabbaṃ siyā, taṃ sāleyyakasutte (ma. ni. 1.439 ādayo) vuttameva.

    ༣༨༤. ཨཡཾ ཏཱཏཱཏི ཨཡཾ མཧལླཀཏཱཡ གནྟུཾ ཨསཀྐོནྟོ མཱཎཝཾ ཨཱམནྟེཏྭཱ ཨེཝམཱཧ། ཨཔིཙ ཨེས བྲཱཧྨཎོ ཙིནྟེསི ‘‘ཨིམསྨིཾ ལོཀེ ‘ཨཧཾ བུདྡྷོ ཨཧཾ བུདྡྷོ’ཏི ཨུགྒཏསྶ ནཱམཾ གཧེཏྭཱ བཧཱུ ཛནཱ ཝིཙརནྟི, ཏསྨཱ ན མེ ཨནུསྶཝམཏྟེནེཝ ཨུཔསངྐམིཏུཾ ཡུཏྟཾ། ཨེཀཙྩཉྷི ཨུཔསངྐམནྟསྶ ཨཔཀྐམནམྤི གརུ ཧོཏི, ཨནཏྠོཔི ཨུཔྤཛྫཏི། ཡཾནཱུནཱཧཾ མམ ཨནྟེཝཱསིཀཾ པེསེཏྭཱ ‘བུདྡྷོ ཝཱ ནོ ཝཱ’ཏི ཛཱནིཏྭཱ ཨུཔསངྐམེཡྻ’’ནྟི ཏསྨཱ མཱཎཝཾ ཨཱམནྟེཏྭཱ ‘‘ཨཡཾ ཏཱཏཱ’’ཏིཨཱདིམཱཧ། ཏཾ བྷཝནྟནྟི ཏསྶ བྷཝཏོ། ཏཐཱ སནྟཾཡེཝཱཏི ཏཐཱ སཏོཡེཝ། ཨིདཉྷི ཨིཏྠམྦྷཱུཏཱཁྱཱནཏྠེ ཨུཔཡོགཝཙནཾ། ཡཐཱ ཀཐཾ པནཱཧཾ, བྷོཏི ཨེཏྠ ཀཐཾ པནཱཧཾ, བྷོ, ཏཾ བྷཝནྟཾ གོཏམཾ ཛཱནིསྶཱམི, ཡཐཱ སཀྐཱ སོ ཉཱཏུཾ, ཏཐཱ མེ ཨཱཙིཀྑཱཏི ཨཏྠོ། ཡཐཱཏི ཝཱ ནིཔཱཏམཏྟམེཝེཏཾ། ཀཐནྟི ཨཡཾ ཨཱཀཱརཔུཙྪཱ, ཀེནཱཀཱརེནཱཧཾ བྷཝནྟཾ གོཏམཾ ཛཱནིསྶཱམཱིཏི ཨཏྠོ།

    384.Ayaṃ tātāti ayaṃ mahallakatāya gantuṃ asakkonto māṇavaṃ āmantetvā evamāha. Apica esa brāhmaṇo cintesi ‘‘imasmiṃ loke ‘ahaṃ buddho ahaṃ buddho’ti uggatassa nāmaṃ gahetvā bahū janā vicaranti, tasmā na me anussavamatteneva upasaṅkamituṃ yuttaṃ. Ekaccañhi upasaṅkamantassa apakkamanampi garu hoti, anatthopi uppajjati. Yaṃnūnāhaṃ mama antevāsikaṃ pesetvā ‘buddho vā no vā’ti jānitvā upasaṅkameyya’’nti tasmā māṇavaṃ āmantetvā ‘‘ayaṃ tātā’’tiādimāha. Taṃ bhavantanti tassa bhavato. Tathā santaṃyevāti tathā satoyeva. Idañhi itthambhūtākhyānatthe upayogavacanaṃ. Yathākathaṃ panāhaṃ, bhoti ettha kathaṃ panāhaṃ, bho, taṃ bhavantaṃ gotamaṃ jānissāmi, yathā sakkā so ñātuṃ, tathā me ācikkhāti attho. Yathāti vā nipātamattamevetaṃ. Kathanti ayaṃ ākārapucchā, kenākārenāhaṃ bhavantaṃ gotamaṃ jānissāmīti attho.

    ཨེཝཾ ཝུཏྟེ ཀིར ནཾ ཨུཔཛ྄ཛྷཱཡོ – ‘‘ཀིཾ ཏྭཾ, ཏཱཏ, པཐཝིཡཾ ཋིཏོ པཐཝིཾ ན པསྶཱམཱིཏི ཝིཡ ཙནྡིམསཱུརིཡཱནཾ ཨོབྷཱསེ ཋིཏོ ཙནྡིམསཱུརིཡེ ན པསྶཱམཱིཏི ཝིཡ ཝདསཱི’’ཏིཨཱདཱིནི ཝཏྭཱ ཛཱནནཱཀཱརཾ དསྶེནྟོ ཨཱགཏཱནི ཁོ ཏཱཏཱཏིཨཱདིམཱཧ། ཏཏྠ མནྟེསཱུཏི ཝེདེསུ། ཏཐཱགཏོ ཀིར ཨུཔྤཛྫིསྶཏཱིཏི པཊིཀཙྩེཝ སུདྡྷཱཝཱསཱ དེཝཱ ཝེདེསུ ལཀྑཎཱནི པཀྑིཔིཏྭཱ ‘‘བུདྡྷམནྟཱ ནཱམ ཨེཏེ’’ཏི བྲཱཧྨཎཝེསེན ཝེདེ ཝཱཙེནྟི ‘‘ཏདནུསཱརེན མཧེསཀྑཱ སཏྟཱ ཏཐཱགཏཾ ཛཱནིསྶནྟཱི’’ཏི། ཏེན པུབྦེ ཝེདེསུ མཧཱཔུརིསལཀྑཎཱནི ཨཱགཙྪནྟི། པརིནིབྦུཏེ པན ཏཐཱགཏེ ཨནུཀྐམེན ཨནྟརདྷཱཡནྟི, ཏེན ཨེཏརཧི ནཏྠི། མཧཱཔུརིསསྶཱཏི པཎིདྷིསམཱདཱནཉཱཎཀརུཎཱདིགུཎམཧཏོ པུརིསསྶ། དྭེཡེཝ གཏིཡོཏི དྭེ ཨེཝ ནིཊྛཱ ། ཀཱམཉྩཱཡཾ གཏིསདྡོ – ‘‘པཉྩ ཁོ ཨིམཱ , སཱརིཔུཏྟ, གཏིཡོ’’ཏིཨཱདཱིསུ (མ॰ ནི॰ ༡.༡༥༣) བྷཝབྷེདེ ཝཏྟཏི, ‘‘གཏི མིགཱནཾ པཝན’’ནྟིཨཱདཱིསུ (པརི॰ ༣༣༩) ནིཝཱསཊྛཱནེ, ‘‘ཨེཝཾ ཨདྷིམཏྟགཏིམནྟོ’’ཏིཨཱདཱིསུ (མ॰ ནི॰ ༡.༡༦༡) པཉྙཱཡ, ‘‘གཏིགཏ’’ནྟིཨཱདཱིསུ ཝིསཊབྷཱཝེ, ཨིདྷ པན ནིཊྛཱཡཾ ཝཏྟཏཱིཏི ཝེདིཏབྦོ། ཏཏྠ ཀིཉྩཱཔི ཡེཧི སམནྣཱགཏོ རཱཛཱ ཧོཏི, ན ཏེཧེཝ བུདྡྷོ ཧོཏི, ཛཱཏིསཱམཉྙཏོ པན ཏཱནིཡེཝ ཏཱནཱིཏི ཝུཙྩནྟི། ཏེན ཝུཏྟཾ – ‘‘ཡེཧི སམནྣཱགཏསྶཱ’’ཏི། སཙེ ཨགཱརཾ ཨཛ྄ཛྷཱཝསཏཱིཏི ཡདི ཨགཱརེ ཝསཏི, རཱཛཱ ཧོཏི ཙཀྐཝཏྟཱི། ཙཏཱུཧི ཨཙྪརིཡདྷམྨེཧི སངྒཧཝཏྠཱུཧི ཙ ལོཀཾ རཉྫནཏོ རཱཛཱ། ཙཀྐརཏནཾ ཝཏྟེཏི, ཙཏཱུཧི སམྤཏྟིཙཀྐེཧི ཝཏྟེཏི, ཏེཧི ཙ པརཾ ཝཏྟེཏི, པརཧིཏཱཡ ཙ ཨིརིཡཱཔཐཙཀྐཱནཾ ཝཏྟོ ཨེཏསྨིཾ ཨཏྠཱིཏི ཙཀྐཝཏྟཱི། ཨེཏྠ ཙ རཱཛཱཏི སཱམཉྙཾ, ཙཀྐཝཏྟཱིཏི ཝིསེསནཾ། དྷམྨེན ཙརཏཱིཏི དྷམྨིཀོ, ཉཱཡེན སམེན ཝཏྟཏཱིཏི ཨཏྠོ། དྷམྨེན རཛྫཾ ལབྷིཏྭཱ རཱཛཱ ཛཱཏོཏི དྷམྨརཱཛཱ། པརཧིཏདྷམྨཀརཎེན ཝཱ དྷམྨིཀོ, ཨཏྟཧིཏདྷམྨཀརཎེན དྷམྨརཱཛཱ། ཙཏུརནྟཱཡ ཨིསྶརོཏི ཙཱཏུརནྟོ, ཙཏུསམུདྡནྟཱཡ ཙཏུབྦིདྷདཱིཔབྷཱུསིཏཱཡ ཙ པཐཝིཡཱ ཨིསྶརོཏི ཨཏྠོ། ཨཛ྄ཛྷཏྟཾ ཀོཔཱདིཔཙྩཏྠིཀེ བཧིདྡྷཱ ཙ སབྦརཱཛཱནོ ཝིཛེསཱིཏི ཝིཛིཏཱཝཱི། ཛནཔདཏྠཱཝརིཡཔྤཏྟོཏི ཛནཔདེ ཐཱཝརབྷཱཝཾ དྷུཝབྷཱཝཾ པཏྟོ, ན སཀྐཱ ཀེནཙི ཙཱལེཏུཾ, ཛནཔདོ ཝཱ ཏམྷི ཐཱཝརིཡཔྤཏྟོ ཨནུསྶུཀྐོ སཀམྨནིརཏོ ཨཙལོ ཨསམྤཝེདྷཱིཏི ཛནཔདཏྠཱཝརིཡཔྤཏྟོ། སེཡྻཐིདནྟི ནིཔཱཏོ, ཏསྶ ཏཱནི ཀཏམཱནཱིཏི ཨཏྠོ། ཙཀྐརཏནནྟིཨཱདཱིསུ ཙཀྐཉྩ ཏཾ རཏིཛནནཏྠེན རཏནཉྩཱཏི ཙཀྐརཏནཾ། ཨེསེཝ ནཡོ སབྦཏྠ།

    Evaṃ vutte kira naṃ upajjhāyo – ‘‘kiṃ tvaṃ, tāta, pathaviyaṃ ṭhito pathaviṃ na passāmīti viya candimasūriyānaṃ obhāse ṭhito candimasūriye na passāmīti viya vadasī’’tiādīni vatvā jānanākāraṃ dassento āgatāni kho tātātiādimāha. Tattha mantesūti vedesu. Tathāgato kira uppajjissatīti paṭikacceva suddhāvāsā devā vedesu lakkhaṇāni pakkhipitvā ‘‘buddhamantā nāma ete’’ti brāhmaṇavesena vede vācenti ‘‘tadanusārena mahesakkhā sattā tathāgataṃ jānissantī’’ti. Tena pubbe vedesu mahāpurisalakkhaṇāni āgacchanti. Parinibbute pana tathāgate anukkamena antaradhāyanti, tena etarahi natthi. Mahāpurisassāti paṇidhisamādānañāṇakaruṇādiguṇamahato purisassa. Dveyeva gatiyoti dve eva niṭṭhā . Kāmañcāyaṃ gatisaddo – ‘‘pañca kho imā , sāriputta, gatiyo’’tiādīsu (ma. ni. 1.153) bhavabhede vattati, ‘‘gati migānaṃ pavana’’ntiādīsu (pari. 339) nivāsaṭṭhāne, ‘‘evaṃ adhimattagatimanto’’tiādīsu (ma. ni. 1.161) paññāya, ‘‘gatigata’’ntiādīsu visaṭabhāve, idha pana niṭṭhāyaṃ vattatīti veditabbo. Tattha kiñcāpi yehi samannāgato rājā hoti, na teheva buddho hoti, jātisāmaññato pana tāniyeva tānīti vuccanti. Tena vuttaṃ – ‘‘yehi samannāgatassā’’ti. Sace agāraṃ ajjhāvasatīti yadi agāre vasati, rājā hoti cakkavattī. Catūhi acchariyadhammehi saṅgahavatthūhi ca lokaṃ rañjanato rājā. Cakkaratanaṃ vatteti, catūhi sampatticakkehi vatteti, tehi ca paraṃ vatteti, parahitāya ca iriyāpathacakkānaṃ vatto etasmiṃ atthīti cakkavattī. Ettha ca rājāti sāmaññaṃ, cakkavattīti visesanaṃ. Dhammena caratīti dhammiko, ñāyena samena vattatīti attho. Dhammena rajjaṃ labhitvā rājā jātoti dhammarājā. Parahitadhammakaraṇena vā dhammiko, attahitadhammakaraṇena dhammarājā. Caturantāya issaroti cāturanto, catusamuddantāya catubbidhadīpabhūsitāya ca pathaviyā issaroti attho. Ajjhattaṃ kopādipaccatthike bahiddhā ca sabbarājāno vijesīti vijitāvī. Janapadatthāvariyappattoti janapade thāvarabhāvaṃ dhuvabhāvaṃ patto, na sakkā kenaci cāletuṃ, janapado vā tamhi thāvariyappatto anussukko sakammanirato acalo asampavedhīti janapadatthāvariyappatto. Seyyathidanti nipāto, tassa tāni katamānīti attho. Cakkaratanantiādīsu cakkañca taṃ ratijananatthena ratanañcāti cakkaratanaṃ. Eseva nayo sabbattha.

    ཨིམེསུ པན རཏནེསུ ཨཡཾ ཙཀྐཝཏྟིརཱཛཱ ཙཀྐརཏནེན ཨཛིཏཾ ཛིནཱཏི, ཧཏྠིཨསྶརཏནེཧི ཝིཛིཏེ ཡཐཱསུཁཾ ཨནུཝིཙརཏི, པརིཎཱཡཀརཏནེན ཝིཛིཏམནུརཀྑཏི, སེསེཧི ཨུཔབྷོགསུཁམནུབྷཝཏི། པཋམེན ཙསྶ ཨུསྶཱཧསཏྟིཡོགོ, ཧཏྠིཨསྶགཧཔཏིརཏནེཧི པབྷུསཏྟིཡོགོ, པཙྪིམེན མནྟསཏྟིཡོགོ སུཔརིཔུཎྞོ ཧོཏི, ཨིཏྠིམཎིརཏནེཧི ཏིཝིདྷསཏྟིཡོགཕལཾ། སོ ཨིཏྠིམཎིརཏནེཧི བྷོགསུཁམནུབྷཝཏི, སེསེཧི ཨིསྶརིཡསུཁཾ། ཝིསེསཏོ ཙསྶ པུརིམཱནི ཏཱིཎི ཨདོསཀུསལམཱུལཛནིཏཀམྨཱནུབྷཱཝེན སམྤཛྫནྟི, མཛ྄ཛྷིམཱནི ཨལོབྷཀུསལམཱུལཛནིཏཀམྨཱནུབྷཱཝེན, པཙྪིམམེཀཾ ཨམོཧཀུསལམཱུལཛནིཏཀམྨཱནུབྷཱཝེནཱཏི ཝེདིཏབྦཾ། ཨཡམེཏྠ སངྑེཔོ, ཝིཏྠཱརོ པན བོཛ྄ཛྷངྒསཾཡུཏྟེ རཏནསུཏྟསྶ (སཾ॰ ནི॰ ༥.༢༢༢-༢༢༣) ཨུཔདེསཏོ གཧེཏབྦོ། ཨཔིཙ བཱལཔཎྜིཏསུཏྟེཔི (མ॰ ནི॰ ༣.༢༥༥) ཨིམེསཾ རཏནཱནཾ ཨུཔྤཏྟིཀྐམེན སདྡྷིཾ ཝཎྞནཱ ཨཱགམིསྶཏི།

    Imesu pana ratanesu ayaṃ cakkavattirājā cakkaratanena ajitaṃ jināti, hatthiassaratanehi vijite yathāsukhaṃ anuvicarati, pariṇāyakaratanena vijitamanurakkhati, sesehi upabhogasukhamanubhavati. Paṭhamena cassa ussāhasattiyogo, hatthiassagahapatiratanehi pabhusattiyogo, pacchimena mantasattiyogo suparipuṇṇo hoti, itthimaṇiratanehi tividhasattiyogaphalaṃ. So itthimaṇiratanehi bhogasukhamanubhavati, sesehi issariyasukhaṃ. Visesato cassa purimāni tīṇi adosakusalamūlajanitakammānubhāvena sampajjanti, majjhimāni alobhakusalamūlajanitakammānubhāvena, pacchimamekaṃ amohakusalamūlajanitakammānubhāvenāti veditabbaṃ. Ayamettha saṅkhepo, vitthāro pana bojjhaṅgasaṃyutte ratanasuttassa (saṃ. ni. 5.222-223) upadesato gahetabbo. Apica bālapaṇḍitasuttepi (ma. ni. 3.255) imesaṃ ratanānaṃ uppattikkamena saddhiṃ vaṇṇanā āgamissati.

    པརོསཧསྶནྟི ཨཏིརེཀསཧསྶཾ། སཱུརཱཏི ཨབྷཱིརུཀཛཱཏིཀཱ། ཝཱིརངྒརཱུཔཱཏི དེཝཔུཏྟསདིསཀཱཡཱ, ཨེཝཾ ཏཱཝ ཨེཀེ ཝཎྞཡནྟི, ཨཡཾ པནེཏྠ སབྷཱཝོ – ཝཱིརཱཏི ཨུཏྟམསཱུརཱ ཝུཙྩནྟི། ཝཱིརཱནཾ ཨངྒཾ ཝཱིརངྒཾ, ཝཱིརཀཱརཎཾ ཝཱིརིཡནྟི ཝུཏྟཾ ཧོཏི། ཝཱིརངྒཾ རཱུཔཾ ཨེཏེསནྟི ཝཱིརངྒརཱུཔཱ, ཝཱིརིཡམཡསརཱིརཱ ཝིཡཱཏི ཝུཏྟཾ ཧོཏི། པརསེནཔྤམདྡནཱཏི སཙེ པཊིམུཁཾ ཏིཊྛེཡྻ པརསེནཱ, ཏཾ མདྡིཏུཾ སམཏྠཱཏི ཨདྷིཔྤཱཡོ། དྷམྨེནཱཏི ‘‘པཱཎོ ན ཧནྟབྦོ’’ཏིཨཱདིནཱ པཉྩསཱིལདྷམྨེན།

    Parosahassanti atirekasahassaṃ. Sūrāti abhīrukajātikā. Vīraṅgarūpāti devaputtasadisakāyā, evaṃ tāva eke vaṇṇayanti, ayaṃ panettha sabhāvo – vīrāti uttamasūrā vuccanti. Vīrānaṃ aṅgaṃ vīraṅgaṃ, vīrakāraṇaṃ vīriyanti vuttaṃ hoti. Vīraṅgaṃ rūpaṃ etesanti vīraṅgarūpā, vīriyamayasarīrā viyāti vuttaṃ hoti. Parasenappamaddanāti sace paṭimukhaṃ tiṭṭheyya parasenā, taṃ maddituṃ samatthāti adhippāyo. Dhammenāti ‘‘pāṇo na hantabbo’’tiādinā pañcasīladhammena.

    ཨརཧཾ ཧོཏི སམྨཱསམྦུདྡྷོ ལོཀེ ཝིཝཊྚཙྪདོཏི ཨེཏྠ རཱགདོསམོཧམཱནདིཊྛིཨཝིཛྫཱདུཙྩརིཏཚདནེཧི སཏྟཧི པཊིཙྪནྣེ ཀིལེསནྡྷཀཱརལོཀེ ཏཾ ཚདནཾ ཝིཝཊྚེཏྭཱ སམནྟཏོ སཉྫཱཏཱལོཀོ ཧུཏྭཱ ཋིཏོཏི ཝིཝཊྚཙྪདོ། ཏཏྠ པཋམེན པདེན པཱུཛཱརཧཏཱ, དུཏིཡེན ཏསྶཱ ཧེཏུ ཡསྨཱ སམྨཱསམྦུདྡྷོཏི, ཏཏིཡེན བུདྡྷཏྟཧེཏུབྷཱུཏཱ ཝིཝཊྚཙྪདཏཱ ཝུཏྟཱཏི ཝེདིཏབྦཱ། ཨཐ ཝཱ ཝིཝཊྚོ ཙ ཝིཙྪདོ ཙཱཏི ཝིཝཊྚཙྪདོ, ཝཊྚརཧིཏོ ཚདནརཧིཏོ ཙཱཏི ཝུཏྟཾ ཧོཏི། ཏེན ཨརཧཾ ཝཊྚཱབྷཱཝེན, སམྨཱསམྦུདྡྷོ ཚདནཱབྷཱཝེནཱཏི ཨེཝཾ པུརིམཔདདྭཡསྶེཝ ཧེཏུདྭཡཾ ཝུཏྟཾ ཧོཏི། དུཏིཡཝེསཱརཛྫེན ཙེཏྠ པུརིམསིདྡྷི, པཋམེན དུཏིཡསིདྡྷི, ཏཏིཡཙཏུཏྠེཧི ཏཏིཡསིདྡྷི ཧོཏི། པུརིམཉྩ དྷམྨཙཀྑུཾ, དུཏིཡཾ བུདྡྷཙཀྑུཾ, ཏཏིཡཾ སམནྟཙཀྑུཾ སཱདྷེཏཱིཏིཔི ཝེདིཏབྦཾ། ཏྭཾ མནྟཱནཾ པཊིགྒཧེཏཱཏི ཨིམིནཱསྶ སཱུརབྷཱཝཾ ཛནེཏི།

    Arahaṃ hoti sammāsambuddho loke vivaṭṭacchadoti ettha rāgadosamohamānadiṭṭhiavijjāduccaritachadanehi sattahi paṭicchanne kilesandhakāraloke taṃ chadanaṃ vivaṭṭetvā samantato sañjātāloko hutvā ṭhitoti vivaṭṭacchado. Tattha paṭhamena padena pūjārahatā, dutiyena tassā hetu yasmā sammāsambuddhoti, tatiyena buddhattahetubhūtā vivaṭṭacchadatā vuttāti veditabbā. Atha vā vivaṭṭo ca vicchado cāti vivaṭṭacchado, vaṭṭarahito chadanarahito cāti vuttaṃ hoti. Tena arahaṃ vaṭṭābhāvena, sammāsambuddho chadanābhāvenāti evaṃ purimapadadvayasseva hetudvayaṃ vuttaṃ hoti. Dutiyavesārajjena cettha purimasiddhi, paṭhamena dutiyasiddhi, tatiyacatutthehi tatiyasiddhi hoti. Purimañca dhammacakkhuṃ, dutiyaṃ buddhacakkhuṃ, tatiyaṃ samantacakkhuṃ sādhetītipi veditabbaṃ. Tvaṃ mantānaṃ paṭiggahetāti imināssa sūrabhāvaṃ janeti.

    ༣༨༥. སོཔི ཏཱཡ ཨཱཙརིཡཀཐཱཡ ལཀྑཎེསུ ཝིགཏསམྨོཧོ ཨེཀོབྷཱསཛཱཏོ ཝིཡ བུདྡྷམནྟེ སམྤསྶམཱནོ ཨེཝཾ, བྷོཏི ཨཱཧ། ཏསྶཏྠོ – ཡཐཱ, བྷོ, མཾ ཏྭཾ ཝདསི, ཨེཝཾ ཀརིསྶཱམཱིཏི། སམནྣེསཱིཏི གཝེསི, ཨེཀཾ དྭེཏི ཝཱ གཎཡནྟོ སམཱནཡི། ཨདྡསཱ ཁོཏི ཀཐཾ ཨདྡས? བུདྡྷཱནཉྷི ནིསིནྣཱནཾ ཝཱ ནིཔནྣཱནཾ ཝཱ ཀོཙི ལཀྑཎཾ པརིཡེསིཏུཾ ན སཀྐོཏི, ཋིཏཱནཾ པན ཙངྐམནྟཱནཾ ཝཱ སཀྐོཏི། ཏསྨཱ ལཀྑཎཔརིཡེསནཏྠཾ ཨཱགཏཾ དིསྭཱ བུདྡྷཱ ཨུཊྛཱཡཱསནཱ ཏིཊྛནྟི ཝཱ ཙངྐམཾ ཝཱ ཨདྷིཊྛཧནྟི། ཨིཏི ལཀྑཎདསྶནཱནུརཱུཔེ ཨིརིཡཱཔཐེ ཝཏྟམཱནསྶ ཨདྡས། ཡེབྷུཡྻེནཱཏི པཱཡེན, བཧུཀཱནི ཨདྡས, ཨཔྤཱནི ན ཨདྡསཱཏི ཨཏྠོ། ཏཏོ ཡཱནི ན ཨདྡས, ཏེསཾ དཱིཔནཏྠཾ ཝུཏྟཾ ཋཔེཏྭཱ དྭེཏི། ཀངྑཏཱིཏི ‘‘ཨཧོ ཝཏ པསྶེཡྻ’’ནྟི པཏྠནཾ ཨུཔྤཱདེཏི། ཝིཙིཀིཙྪཏཱིཏི ཏཏོ ཏཏོ ཏཱནི ཝིཙིནནྟོ ཀིཙྪཏི ན སཀྐོཏི དཊྛུཾ། ནཱདྷིམུཙྩཏཱིཏི ཏཱཡ ཝིཙིཀིཙྪཱཡ སནྣིཊྛཱནཾ ན གཙྪཏི། ན སམྤསཱིདཏཱིཏི ཏཏོ ‘‘པརིཔུཎྞལཀྑཎོ ཨཡ’’ནྟི བྷགཝཏི པསཱདཾ ནཱཔཛྫཏི། ཀངྑཱཡ ཝཱ དུབྦལཱ ཝིམཏི ཝུཏྟཱ, ཝིཙིཀིཙྪཱཡ མཛ྄ཛྷིམཱ, ཨནདྷིམུཙྩནཏཱཡ བལཝཏཱི, ཨསམྤསཱདེན ཏེཧི ཏཱིཧི དྷམྨེཧི ཙིཏྟསྶ ཀཱལུསྶིཡབྷཱཝོ། ཀོསོཧིཏེཏི ཝཏྠིཀོསེན པཊིཙྪནྣེ། ཝཏྠགུཡ྄ཧེཏི ཨངྒཛཱཏེ། བྷགཝཏོ ཧི ཝཱརཎསྶེཝ ཀོསོཧིཏཝཏྠགུཡ྄ཧཾ སུཝཎྞཝཎྞཾ པདུམགབྦྷསམཱནཾ, ཏཾ སོ ཝཏྠཔཊིཙྪནྣཏྟཱ, ཨནྟོམུཁགཏཱཡ ཙ ཛིཝ྄ཧཱཡ པཧཱུཏབྷཱཝཾ ཨསལླཀྑེནྟོ ཏེསུ དྭཱིསུ ལཀྑཎེསུ ཀངྑཱི ཨཧོསི ཝིཙིཀིཙྪཱི།

    385. Sopi tāya ācariyakathāya lakkhaṇesu vigatasammoho ekobhāsajāto viya buddhamante sampassamāno evaṃ, bhoti āha. Tassattho – yathā, bho, maṃ tvaṃ vadasi, evaṃ karissāmīti. Samannesīti gavesi, ekaṃ dveti vā gaṇayanto samānayi. Addasā khoti kathaṃ addasa? Buddhānañhi nisinnānaṃ vā nipannānaṃ vā koci lakkhaṇaṃ pariyesituṃ na sakkoti, ṭhitānaṃ pana caṅkamantānaṃ vā sakkoti. Tasmā lakkhaṇapariyesanatthaṃ āgataṃ disvā buddhā uṭṭhāyāsanā tiṭṭhanti vā caṅkamaṃ vā adhiṭṭhahanti. Iti lakkhaṇadassanānurūpe iriyāpathe vattamānassa addasa. Yebhuyyenāti pāyena, bahukāni addasa, appāni na addasāti attho. Tato yāni na addasa, tesaṃ dīpanatthaṃ vuttaṃ ṭhapetvā dveti. Kaṅkhatīti ‘‘aho vata passeyya’’nti patthanaṃ uppādeti. Vicikicchatīti tato tato tāni vicinanto kicchati na sakkoti daṭṭhuṃ. Nādhimuccatīti tāya vicikicchāya sanniṭṭhānaṃ na gacchati. Na sampasīdatīti tato ‘‘paripuṇṇalakkhaṇo aya’’nti bhagavati pasādaṃ nāpajjati. Kaṅkhāya vā dubbalā vimati vuttā, vicikicchāya majjhimā, anadhimuccanatāya balavatī, asampasādena tehi tīhi dhammehi cittassa kālussiyabhāvo. Kosohiteti vatthikosena paṭicchanne. Vatthaguyheti aṅgajāte. Bhagavato hi vāraṇasseva kosohitavatthaguyhaṃ suvaṇṇavaṇṇaṃ padumagabbhasamānaṃ, taṃ so vatthapaṭicchannattā, antomukhagatāya ca jivhāya pahūtabhāvaṃ asallakkhento tesu dvīsu lakkhaṇesu kaṅkhī ahosi vicikicchī.

    ཨཐ ཁོ བྷགཝཱཏི ཨཐ བྷགཝཱ ཙིནྟེསི – ‘‘སཙཱཧཾ ཨིམསྶ ཨེཏཱནི དྭེ ལཀྑཎཱནི ན དསྶེསྶཱམི, ནིཀྐངྑོ ན བྷཝིསྶཏི། ཨེཏསྶ ཀངྑཱཡ སཏི ཨཱཙརིཡོཔིསྶ ནིཀྐངྑོ ན བྷཝིསྶཏི, ཨཐ མཾ དསྶནཱཡ ན ཨཱགམིསྶཏི, ཨནཱགཏོ དྷམྨཾ ན སོསྶཏི, དྷམྨཾ ཨསུཎནྟོ ཏཱིཎི སཱམཉྙཕལཱནི ན སཙྪིཀརིསྶཏི། ཨེཏསྨིཾ པན ནིཀྐངྑེ ཨཱཙརིཡོཔིསྶ ནིཀྐངྑོ མཾ ཨུཔསངྐམིཏྭཱ དྷམྨཾ སུཏྭཱ ཏཱིཎི སཱམཉྙཕལཱནི སཙྪིཀརིསྶཏི། ཨེཏདཏྠཾཡེཝ ཙ མཡཱ པཱརམིཡོ པཱུརིཏཱ། དསྶེསྶཱམིསྶ ཏཱནི ལཀྑཎཱནཱི’’ཏི།

    Atha kho bhagavāti atha bhagavā cintesi – ‘‘sacāhaṃ imassa etāni dve lakkhaṇāni na dassessāmi, nikkaṅkho na bhavissati. Etassa kaṅkhāya sati ācariyopissa nikkaṅkho na bhavissati, atha maṃ dassanāya na āgamissati, anāgato dhammaṃ na sossati, dhammaṃ asuṇanto tīṇi sāmaññaphalāni na sacchikarissati. Etasmiṃ pana nikkaṅkhe ācariyopissa nikkaṅkho maṃ upasaṅkamitvā dhammaṃ sutvā tīṇi sāmaññaphalāni sacchikarissati. Etadatthaṃyeva ca mayā pāramiyo pūritā. Dassessāmissa tāni lakkhaṇānī’’ti.

    ཏཐཱརཱུཔཾ ཨིདྡྷཱབྷིསངྑཱརམཀཱསི། ཀཐཾརཱུཔཾ? ཀིམེཏྠ ཨཉྙེན ཝཏྟབྦཾ? ཝུཏྟམེཏཾ ནཱགསེནཏྠེརེནེཝ མིལིནྡརཉྙཱ པུཊྛེན –

    Tathārūpaṃ iddhābhisaṅkhāramakāsi. Kathaṃrūpaṃ? Kimettha aññena vattabbaṃ? Vuttametaṃ nāgasenatthereneva milindaraññā puṭṭhena –

    ཨཱཧ ཙ དུཀྐརཾ, བྷནྟེ ནཱགསེན, བྷགཝཏཱ ཀཏནྟི། ཀིཾ མཧཱརཱཛཱཏི? མཧཱཛནེན ཧིརིཀརཎོཀཱསཾ བྲཧྨཱཡུབྲཱཧྨཎསྶ ཙ ཨནྟེཝཱསིཨུཏྟརསྶ ཙ བཱཝརིཡསྶ ཨནྟེཝཱསཱིནཾ སོལ༹སབྲཱཧྨཎཱནཉྩ སེལསྶ ཙ བྲཱཧྨཎསྶ ཨནྟེཝཱསཱིནཾ ཏིསཏམཱཎཝཱནཉྩ དསྶེསི, བྷནྟེཏི། ན, མཧཱརཱཛ, བྷགཝཱ གུཡ྄ཧཾ དསྶེཏི, ཚཱཡཾ བྷགཝཱ དསྶེཏི, ཨིདྡྷིཡཱ ཨབྷིསངྑརིཏྭཱ ནིཝཱསནནིཝཏྠཾ ཀཱཡབནྡྷནབདྡྷཾ ཙཱིཝརཔཱརུཏཾ ཚཱཡཱརཱུཔཀམཏྟཾ དསྶེསི མཧཱརཱཛཱཏི། ཚཱཡཾ དིཊྛེ སཏི དིཊྛོཡེཝ། ནནུ, བྷནྟེཏི? ཏིཊྛཏེཏཾ, མཧཱརཱཛ, ཧདཡརཱུཔཾ དིསྭཱ བུཛ྄ཛྷནཀསཏྟོ བྷཝེཡྻ, ཧདཡམཾསཾ ནཱིཧརིཏྭཱ དསྶེཡྻ སམྨཱསམྦུདྡྷོཏི། ཀལློསི, བྷནྟེ ནཱགསེནཱཏི།

    Āha ca dukkaraṃ, bhante nāgasena, bhagavatā katanti. Kiṃ mahārājāti? Mahājanena hirikaraṇokāsaṃ brahmāyubrāhmaṇassa ca antevāsiuttarassa ca bāvariyassa antevāsīnaṃ soḷasabrāhmaṇānañca selassa ca brāhmaṇassa antevāsīnaṃ tisatamāṇavānañca dassesi, bhanteti. Na, mahārāja, bhagavā guyhaṃ dasseti, chāyaṃ bhagavā dasseti, iddhiyā abhisaṅkharitvā nivāsananivatthaṃ kāyabandhanabaddhaṃ cīvarapārutaṃ chāyārūpakamattaṃ dassesi mahārājāti. Chāyaṃ diṭṭhe sati diṭṭhoyeva. Nanu, bhanteti? Tiṭṭhatetaṃ, mahārāja, hadayarūpaṃ disvā bujjhanakasatto bhaveyya, hadayamaṃsaṃ nīharitvā dasseyya sammāsambuddhoti. Kallosi, bhante nāgasenāti.

    ནིནྣཱམེཏྭཱཏི ནཱིཧརིཏྭཱ། ཨནུམསཱིཏི ཀཐིནསཱུཙིཾ ཝིཡ ཀཏྭཱ ཨནུམཛྫི། ཏཐཱ ཀརཎེན ཙེཏྠ མུདུབྷཱཝོ, ཀཎྞསོཏཱནུམསནེན དཱིགྷབྷཱཝོ, ནཱསིཀསོཏཱནུམསནེན ཏནུབྷཱཝོ, ནལཱཊཙྪཱདནེན པུཐུལབྷཱཝོ པཀཱསིཏོཏི ཝེདིཏབྦོ། ཨུབྷོཔི ཀཎྞསོཏཱནཱིཏིཨཱདཱིསུ ཙེཏྠ བུདྡྷཱནཾ ཀཎྞསོཏེསུ མལཾ ཝཱ ཛལླིཀཱ ཝཱ ནཏྠི, དྷོཝིཏྭཱ ཋཔིཏརཛཏཔནཱལི༹ཀཱ ཝིཡ ཧོནྟི, ཏཐཱ ནཱསིཀསོཏེསུ, ཏཱནིཔི ཧི སུཔརིཀམྨཀཏཀཉྩནཔནཱལི༹ཀཱ ཝིཡ ཙ མཎིཔནཱལི༹ཀཱ ཝིཡ ཙ ཧོནྟི། ཏསྨཱ ཛིཝ྄ཧཾ ནཱིཧརིཏྭཱ ཀཐིནསཱུཙིཾ ཝིཡ ཀཏྭཱ མུཁཔརིཡནྟེ ཨུཔསཾཧརནྟོ དཀྑིཎཀཎྞསོཏཾ པཝེསེཏྭཱ ཏཏོ ནཱིཧརིཏྭཱ ཝཱམཀཎྞསོཏཾ པཝེསེསི, ཏཏོ ནཱིཧརིཏྭཱ དཀྑིཎནཱསིཀསོཏཾ པཝེསེཏྭཱ ཏཏོ ནཱིཧརིཏྭཱ ཝཱམནཱསིཀསོཏཾ པཝེསེསི, ཏཏོ ནཱིཧརིཏྭཱ པུཐུལབྷཱཝཾ དསྶེནྟོ རཏྟཝལཱཧཀེན ཨཌྜྷཙནྡཾ ཝིཡ ཙ སུཝཎྞཔཏྟཾ ཝིཡ ཙ རཏྟཀམྦལཔཊལེན ཝིཛྫུཛོཏསདིསཱཡ ཛིཝ྄ཧཱཡ ཀེཝལཀཔྤཾ ནལཱཊམཎྜལཾ པཊིཙྪཱདེསི།

    Ninnāmetvāti nīharitvā. Anumasīti kathinasūciṃ viya katvā anumajji. Tathā karaṇena cettha mudubhāvo, kaṇṇasotānumasanena dīghabhāvo, nāsikasotānumasanena tanubhāvo, nalāṭacchādanena puthulabhāvo pakāsitoti veditabbo. Ubhopi kaṇṇasotānītiādīsu cettha buddhānaṃ kaṇṇasotesu malaṃ vā jallikā vā natthi, dhovitvā ṭhapitarajatapanāḷikā viya honti, tathā nāsikasotesu, tānipi hi suparikammakatakañcanapanāḷikā viya ca maṇipanāḷikā viya ca honti. Tasmā jivhaṃ nīharitvā kathinasūciṃ viya katvā mukhapariyante upasaṃharanto dakkhiṇakaṇṇasotaṃ pavesetvā tato nīharitvā vāmakaṇṇasotaṃ pavesesi, tato nīharitvā dakkhiṇanāsikasotaṃ pavesetvā tato nīharitvā vāmanāsikasotaṃ pavesesi, tato nīharitvā puthulabhāvaṃ dassento rattavalāhakena aḍḍhacandaṃ viya ca suvaṇṇapattaṃ viya ca rattakambalapaṭalena vijjujotasadisāya jivhāya kevalakappaṃ nalāṭamaṇḍalaṃ paṭicchādesi.

    ཡཾནཱུནཱཧནྟི ཀསྨཱ ཙིནྟེསི? ཨཧཉྷི མཧཱཔུརིསལཀྑཎཱནི སམནྣེསིཏྭཱ གཏོ ‘‘དིཊྛཱནི ཏེ, ཏཱཏ, མཧཱཔུརིསལཀྑཎཱནཱི’’ཏི ཨཱཙརིཡེན པུཙྪིཏོ ‘‘ཨཱམ, ཨཱཙརིཡཱ’’ཏི ཝཏྟུཾ སཀྑིསྶཱམི། སཙེ པན མཾ ‘‘ཀིརིཡཱཀརཎམསྶ ཀཱིདིས’’ནྟི པུཙྪིསྶཏི , ཏཾ ཝཏྟུཾ ན སཀྑིསྶཱམི, ན ཛཱནཱམཱིཏི ཝུཏྟེ པན ཨཱཙརིཡོ ཀུཛ྄ཛྷིསྶཏི ‘‘ནནུ ཏྭཾ མཡཱ སབྦམྤེཏཾ ཛཱནནཏྠཱཡ པེསིཏོ, ཀསྨཱ ཨཛཱནིཏྭཱ ཨཱགཏོསཱི’’ཏི, ཏསྨཱ ཡནྣཱུནཱཧནྟི ཙིནྟེཏྭཱ ཨནུབནྡྷི། བྷགཝཱ ནྷཱནཊྛཱནཾ མུཁདྷོཝནཊྛཱནཾ སརཱིརཔཊིཛགྒནཊྛཱནཾ རཱཛརཱཛམཧཱམཏྟཱདཱིནཾ ཨོརོདྷེཧི སདྡྷིཾ པརིཝཱརེཏྭཱ ནིསིནྣཊྛཱནནྟི ཨིམཱནི ཙཏྟཱརི ཋཱནཱནི ཋཔེཏྭཱ སེསཊྛཱནེསུ ཨནྟམསོ ཨེཀགནྡྷཀུཊིཡམྤི ཨོཀཱསམཀཱསི།

    Yaṃnūnāhanti kasmā cintesi? Ahañhi mahāpurisalakkhaṇāni samannesitvā gato ‘‘diṭṭhāni te, tāta, mahāpurisalakkhaṇānī’’ti ācariyena pucchito ‘‘āma, ācariyā’’ti vattuṃ sakkhissāmi. Sace pana maṃ ‘‘kiriyākaraṇamassa kīdisa’’nti pucchissati , taṃ vattuṃ na sakkhissāmi, na jānāmīti vutte pana ācariyo kujjhissati ‘‘nanu tvaṃ mayā sabbampetaṃ jānanatthāya pesito, kasmā ajānitvā āgatosī’’ti, tasmā yannūnāhanti cintetvā anubandhi. Bhagavā nhānaṭṭhānaṃ mukhadhovanaṭṭhānaṃ sarīrapaṭijagganaṭṭhānaṃ rājarājamahāmattādīnaṃ orodhehi saddhiṃ parivāretvā nisinnaṭṭhānanti imāni cattāri ṭhānāni ṭhapetvā sesaṭṭhānesu antamaso ekagandhakuṭiyampi okāsamakāsi.

    གཙྪནྟེ གཙྪནྟེ ཀཱལེ – ‘‘ཨཡཾ ཀིར བྲཧྨཱཡུབྲཱཧྨཎསྶ མཱཎཝོ ཨུཏྟརོ ནཱམ ‘བུདྡྷོ ཝཱ ནོ ཝཱ’ཏི ཏཐཱགཏསྶ བུདྡྷབྷཱཝཾ ཝཱིམཾསནྟོ ཙརཏི, བུདྡྷཝཱིམཾསཀོ ནཱམཱཡ’’ནྟི པཱཀཊོ ཛཱཏོ། ཡམྷི ཡམྷི ཋཱནེ བུདྡྷཱ ཝསནྟི, པཉྩ ཀིཙྩཱནི ཀཏཱནེཝ ཧོནྟི, ཏཱནི ཧེཊྛཱ དསྶིཏཱནེཝ ། ཏཏྠ པཙྪཱབྷཏྟཾ ཨལངྐཏདྷམྨཱསནེ ནིསཱིདིཏྭཱ དནྟཁཙིཏཾ ཙིཏྟབཱིཛནིཾ གཧེཏྭཱ མཧཱཛནསྶ དྷམྨཾ དེསེནྟེ བྷགཝཏི ཨུཏྟརོཔི ཨཝིདཱུརེ ནིསཱིདཏི། དྷམྨསྶཝནཔརིཡོསཱནེ སདྡྷཱ མནུསྶཱ སྭཱཏནཱཡ བྷགཝནྟཾ ནིམནྟེཏྭཱ མཱཎཝམྤི ཨུཔསངྐམིཏྭཱ ཨེཝཾ ཝདནྟི – ‘‘ཏཱཏ, ཨམྷེཧི བྷགཝཱ ནིམནྟིཏོ, ཏྭམྤི བྷགཝཏཱ སདྡྷིཾ ཨཱགནྟྭཱ ཨམྷཱཀཾ གེཧེ བྷཏྟཾ གཎྷེཡྻཱསཱི’’ཏི། པུནདིཝསེ ཏཐཱགཏོ བྷིཀྑུསངྒྷཔརིཝུཏོ གཱམཾ པཝིསཏི, ཨུཏྟརོཔི པདཝཱརེ པདཝཱརེ པརིགྒཎྷནྟོ པདཱནུཔདིཀོ ཨནུབནྡྷཏི། ཀུལགེཧཾ པཝིཊྛཀཱལེ དཀྑིཎོདཀགྒཧཎཾ ཨཱདིཾ ཀཏྭཱ སབྦཾ ཨོལོཀེནྟོ ནིསཱིདཏི། བྷཏྟཀིཙྩཱཝསཱནེ ཏཐཱགཏསྶ པཏྟཾ བྷཱུམིཡཾ ཋཔེཏྭཱ ནིསིནྣཀཱལེ མཱཎཝཀསྶ པཱཏརཱསབྷཏྟཾ སཛྫེནྟི། སོ ཨེཀམནྟེ ནིསིནྣོ བྷུཉྫིཏྭཱ པུན ཨཱགནྟྭཱ སཏྠུ སནྟིཀེ ཋཏྭཱ བྷཏྟཱནུམོདནཾ སུཏྭཱ བྷགཝཏཱ སདྡྷིཾཡེཝ ཝིཧཱརཾ གཙྪཏི།

    Gacchante gacchante kāle – ‘‘ayaṃ kira brahmāyubrāhmaṇassa māṇavo uttaro nāma ‘buddho vā no vā’ti tathāgatassa buddhabhāvaṃ vīmaṃsanto carati, buddhavīmaṃsako nāmāya’’nti pākaṭo jāto. Yamhi yamhi ṭhāne buddhā vasanti, pañca kiccāni katāneva honti, tāni heṭṭhā dassitāneva . Tattha pacchābhattaṃ alaṅkatadhammāsane nisīditvā dantakhacitaṃ cittabījaniṃ gahetvā mahājanassa dhammaṃ desente bhagavati uttaropi avidūre nisīdati. Dhammassavanapariyosāne saddhā manussā svātanāya bhagavantaṃ nimantetvā māṇavampi upasaṅkamitvā evaṃ vadanti – ‘‘tāta, amhehi bhagavā nimantito, tvampi bhagavatā saddhiṃ āgantvā amhākaṃ gehe bhattaṃ gaṇheyyāsī’’ti. Punadivase tathāgato bhikkhusaṅghaparivuto gāmaṃ pavisati, uttaropi padavāre padavāre pariggaṇhanto padānupadiko anubandhati. Kulagehaṃ paviṭṭhakāle dakkhiṇodakaggahaṇaṃ ādiṃ katvā sabbaṃ olokento nisīdati. Bhattakiccāvasāne tathāgatassa pattaṃ bhūmiyaṃ ṭhapetvā nisinnakāle māṇavakassa pātarāsabhattaṃ sajjenti. So ekamante nisinno bhuñjitvā puna āgantvā satthu santike ṭhatvā bhattānumodanaṃ sutvā bhagavatā saddhiṃyeva vihāraṃ gacchati.

    ཏཏྠ བྷགཝཱ བྷིཀྑཱུནཾ བྷཏྟཀིཙྩཔརིཡོསཱནཾ ཨཱགམེནྟོ གནྡྷམཎྜལམཱལེ༹ ནིསཱིདཏི། བྷིཀྑཱུཧི བྷཏྟཀིཙྩཾ ཀཏྭཱ པཏྟཙཱིཝརཾ པཊིསཱམེཏྭཱ ཨཱགམྨ ཝནྡིཏྭཱ ཀཱལེ ཨཱརོཙིཏེ བྷགཝཱ གནྡྷཀུཊིཾ པཝིསཏི, མཱཎཝོཔི བྷགཝཏཱ སདྡྷིཾཡེཝ གཙྪཏི། བྷགཝཱ པརིཝཱརེཏྭཱ ཨཱགཏཾ བྷིཀྑུསངྒྷཾ གནྡྷཀུཊིཔྤམུཁེ ཋིཏོ ཨོཝདིཏྭཱ ཨུཡྻོཛེཏྭཱ གནྡྷཀུཊིཾ པཝིསཏི, མཱཎཝོཔི པཝིསཏི། བྷགཝཱ ཁུདྡཀམཉྩེ ཨཔྤམཏྟཀཾ ཀཱལཾ ནིསཱིདཏི, མཱཎཝོཔི ཨཝིདཱུརེ ཨོལོཀེནྟོ ནིསཱིདཏི། བྷགཝཱ མུཧུཏྟཾ ནིསཱིདིཏྭཱ སཱིསོཀྐམནཾ དསྶེཏི, – ‘‘བྷོཏོ གོཏམསྶ ཝིཧཱརཝེལཱ བྷཝིསྶཏཱི’’ཏི མཱཎཝོ གནྡྷཀུཊིདྭཱརཾ པིདཧནྟོ ནིཀྑམིཏྭཱ ཨེཀམནྟཾ ནིསཱིདཏི། མནུསྶཱ པུརེབྷཏྟཾ དཱནཾ དཏྭཱ བྷུཏྟཔཱཏརཱསཱ སམཱདིནྣཨུཔོསཐངྒཱ སུདྡྷུཏྟརཱསངྒཱ མཱལཱགནྡྷཱདིཧཏྠཱ དྷམྨཾ སུཎིསྶཱམཱཏི ཝིཧཱརཾ ཨཱགཙྪནྟི, ཙཀྐཝཏྟིནོ ཁནྡྷཱཝཱརཊྛཱནཾ ཝིཡ ཧོཏི།

    Tattha bhagavā bhikkhūnaṃ bhattakiccapariyosānaṃ āgamento gandhamaṇḍalamāḷe nisīdati. Bhikkhūhi bhattakiccaṃ katvā pattacīvaraṃ paṭisāmetvā āgamma vanditvā kāle ārocite bhagavā gandhakuṭiṃ pavisati, māṇavopi bhagavatā saddhiṃyeva gacchati. Bhagavā parivāretvā āgataṃ bhikkhusaṅghaṃ gandhakuṭippamukhe ṭhito ovaditvā uyyojetvā gandhakuṭiṃ pavisati, māṇavopi pavisati. Bhagavā khuddakamañce appamattakaṃ kālaṃ nisīdati, māṇavopi avidūre olokento nisīdati. Bhagavā muhuttaṃ nisīditvā sīsokkamanaṃ dasseti, – ‘‘bhoto gotamassa vihāravelā bhavissatī’’ti māṇavo gandhakuṭidvāraṃ pidahanto nikkhamitvā ekamantaṃ nisīdati. Manussā purebhattaṃ dānaṃ datvā bhuttapātarāsā samādinnauposathaṅgā suddhuttarāsaṅgā mālāgandhādihatthā dhammaṃ suṇissāmāti vihāraṃ āgacchanti, cakkavattino khandhāvāraṭṭhānaṃ viya hoti.

    བྷགཝཱ མུཧུཏྟཾ སཱིཧསེཡྻཾ ཀཔྤེཏྭཱ ཝུཊྛཱཡ པུབྦབྷཱགེན པརིཙྪིནྡིཏྭཱ སམཱཔཏྟིཾ སམཱཔཛྫཏི། སམཱཔཏྟིཏོ ཝུཊྛཱཡ མཧཱཛནསྶ ཨཱགཏབྷཱཝཾ ཉཏྭཱ གནྡྷཀུཊིཏོ ནིཀྑམྨ མཧཱཛནཔརིཝུཏོ གནྡྷམཎྜལམཱལ༹ཾ གནྟྭཱ པཉྙཏྟཝརབུདྡྷཱསནགཏོ པརིསཱཡ དྷམྨཾ དེསེཏི། མཱཎཝོཔི ཨཝིདཱུརེ ནིསཱིདིཏྭཱ – ‘‘ཀིཾ ནུ ཁོ སམཎོ གོཏམོ གེཧསྶིཏཝསེན པརིསཾ ཨུསྶཱདེནྟོ ཝཱ ཨཔསཱདེནྟོ ཝཱ དྷམྨཾ དེསེཏི, ཨུདཱཧུ ནོ’’ཏི ཨཀྑརཀྑརཾ པདཾ པདཾ པརིགྒཎྷཱཏི། བྷགཝཱ ཏཐཱཝིདྷཾ ཀཐཾ ཨཀཐེཏྭཱཝ ཀཱལཾ ཉཏྭཱ དེསནཾ ནིཊྛཱཔེསི། མཱཎཝོ ཨིམིནཱ ནིཡཱམེན པརིགྒཎྷནྟོ སཏྟ མཱསེ ཨེཀཏོ ཝིཙརིཏྭཱ བྷགཝཏོ ཀཱཡདྭཱརཱདཱིསུ ཨཎུམཏྟམྤི ཨཝཀྑལིཏཾ ན ཨདྡས། ཨནཙྪརིཡཉྩེཏཾ, ཡཾ བུདྡྷབྷཱུཏསྶ མནུསྶབྷཱུཏོ མཱཎཝོ ན པསྶེཡྻ, ཡསྶ བོདྷིསཏྟབྷཱུཏསྶ ཚབྦསྶཱནི པདྷཱནབྷཱུམིཡཾ ཨམནུསྶབྷཱུཏོ མཱརོ དེཝཔུཏྟོ གེཧསྶིཏཝིཏཀྐམཏྟམྤི ཨདིསྭཱ བུདྡྷབྷཱུཏཾ ཨེཀསཾཝཙྪརཾ ཨནུབནྡྷིཏྭཱ ཀིཉྩི ཨཔསྶནྟོ –

    Bhagavā muhuttaṃ sīhaseyyaṃ kappetvā vuṭṭhāya pubbabhāgena paricchinditvā samāpattiṃ samāpajjati. Samāpattito vuṭṭhāya mahājanassa āgatabhāvaṃ ñatvā gandhakuṭito nikkhamma mahājanaparivuto gandhamaṇḍalamāḷaṃ gantvā paññattavarabuddhāsanagato parisāya dhammaṃ deseti. Māṇavopi avidūre nisīditvā – ‘‘kiṃ nu kho samaṇo gotamo gehassitavasena parisaṃ ussādento vā apasādento vā dhammaṃ deseti, udāhu no’’ti akkharakkharaṃ padaṃ padaṃ pariggaṇhāti. Bhagavā tathāvidhaṃ kathaṃ akathetvāva kālaṃ ñatvā desanaṃ niṭṭhāpesi. Māṇavo iminā niyāmena pariggaṇhanto satta māse ekato vicaritvā bhagavato kāyadvārādīsu aṇumattampi avakkhalitaṃ na addasa. Anacchariyañcetaṃ, yaṃ buddhabhūtassa manussabhūto māṇavo na passeyya, yassa bodhisattabhūtassa chabbassāni padhānabhūmiyaṃ amanussabhūto māro devaputto gehassitavitakkamattampi adisvā buddhabhūtaṃ ekasaṃvaccharaṃ anubandhitvā kiñci apassanto –

    ‘‘སཏྟ ཝསྶཱནི བྷགཝནྟཾ, ཨནུབནྡྷིཾ པདཱཔདཾ།

    ‘‘Satta vassāni bhagavantaṃ, anubandhiṃ padāpadaṃ;

    ཨོཏཱརཾ ནཱདྷིགཙྪིསྶཾ, སམྦུདྡྷསྶ སཏཱིམཏོ’’ཏི༎ (སུ॰ ནི॰ ༤༤༨) –

    Otāraṃ nādhigacchissaṃ, sambuddhassa satīmato’’ti. (su. ni. 448) –

    ཨཱདིགཱཐཱཡོ ཝཏྭཱ པཀྐཱམི། ཏཏོ མཱཎཝོ ཙིནྟེསི – ‘‘ཨཧཾ བྷཝནྟཾ གོཏམཾ སཏྟ མཱསེ ཨནུབནྡྷམཱནོ ཀིཉྩི ཝཛྫཾ ན པསྶཱམི། སཙེ པནཱཧཾ ཨཉྙེཔི སཏྟ མཱསེ སཏྟ ཝཱ ཝསྶཱནི ཝསྶསཏཾ ཝཱ ཝསྶསཧསྶཾ ཝཱ ཨནུབནྡྷེཡྻཾ, ནེཝསྶ ཝཛྫཾ པསྶེཡྻཾ། ཨཱཙརིཡོ ཁོ པནསྶ མེ མཧལླཀོ, ཡོགཀྑེམཾ ནཱམ ན སཀྐཱ ཛཱནིཏུཾ། སམཎསྶ གོཏམསྶ སབྷཱཝགུཎེནེཝ བུདྡྷབྷཱཝཾ ཝཏྭཱ མཡ྄ཧཾ ཨཱཙརིཡསྶ ཨཱརོཙེསྶཱམཱི’’ཏི བྷགཝནྟཾ ཨཱཔུཙྪིཏྭཱ བྷིཀྑུསངྒྷཾ ཝནྡིཏྭཱ ནིཀྑམི།

    Ādigāthāyo vatvā pakkāmi. Tato māṇavo cintesi – ‘‘ahaṃ bhavantaṃ gotamaṃ satta māse anubandhamāno kiñci vajjaṃ na passāmi. Sace panāhaṃ aññepi satta māse satta vā vassāni vassasataṃ vā vassasahassaṃ vā anubandheyyaṃ, nevassa vajjaṃ passeyyaṃ. Ācariyo kho panassa me mahallako, yogakkhemaṃ nāma na sakkā jānituṃ. Samaṇassa gotamassa sabhāvaguṇeneva buddhabhāvaṃ vatvā mayhaṃ ācariyassa ārocessāmī’’ti bhagavantaṃ āpucchitvā bhikkhusaṅghaṃ vanditvā nikkhami.

    ཨཱཙརིཡསྶ སནྟིཀཉྩ པན གནྟྭཱ – ‘‘ཀཙྩི, ཏཱཏ ཨུཏྟར, ཏཾ བྷཝནྟཾ གོཏམཾ ཏཐཱསནྟཾཡེཝ སདྡོ ཨབྦྷུགྒཏོ’’ཏི པུཙྪིཏོ, ‘‘ཨཱཙརིཡ, ཀིཾ ཝདེསི? ཙཀྐཝཱལ༹ཾ ཨཏིསམྦཱདྷཾ, བྷཝགྒཾ ཨཏིནཱིཙཾ, ཏསྶ ཧི, བྷོཏོ གོཏམསྶ ཨཱཀཱསཾ ཝིཡ ཨཔརིཡནྟོ གུཎགཎོ། ཏཐཱསནྟཾཡེཝ, བྷོ, ཏཾ བྷཝནྟཾ གོཏམ’’ནྟིཨཱདཱིནི ཝཏྭཱ ཡཐཱདིཊྛཱནི དྭཏྟིཾསམཧཱཔུརིསལཀྑཎཱནི པཊིཔཱཊིཡཱ ཨཱཙིཀྑིཏྭཱ ཀིརིཡསམཱཙཱརཾ ཨཱཙིཀྑི། ཏེན ཝུཏྟཾ – ‘‘ཨཐ ཁོ ཨུཏྟརོ མཱཎཝོ…པེ॰… ཨེདིསོ ཙ ཨེདིསོ ཙ བྷཝཾ གོཏམོ ཏཏོ ཙ བྷིཡྻོ’’ཏི།

    Ācariyassa santikañca pana gantvā – ‘‘kacci, tāta uttara, taṃ bhavantaṃ gotamaṃ tathāsantaṃyeva saddo abbhuggato’’ti pucchito, ‘‘ācariya, kiṃ vadesi? Cakkavāḷaṃ atisambādhaṃ, bhavaggaṃ atinīcaṃ, tassa hi, bhoto gotamassa ākāsaṃ viya apariyanto guṇagaṇo. Tathāsantaṃyeva, bho, taṃ bhavantaṃ gotama’’ntiādīni vatvā yathādiṭṭhāni dvattiṃsamahāpurisalakkhaṇāni paṭipāṭiyā ācikkhitvā kiriyasamācāraṃ ācikkhi. Tena vuttaṃ – ‘‘atha kho uttaro māṇavo…pe… ediso ca ediso ca bhavaṃ gotamo tato ca bhiyyo’’ti.

    ༣༨༦. ཏཏྠ སུཔྤཏིཊྛིཏཔཱདོཏི ཡཐཱ ཧི ཨཉྙེསཾ བྷཱུམིཡཾ པཱདཾ ཋཔེནྟཱནཾ ཨགྒཏལཾ ཝཱ པཎྷི ཝཱ པསྶཾ ཝཱ པཋམཾ ཕུསཏི, ཝེམཛ྄ཛྷཾ ཝཱ པན ཚིདྡཾ ཧོཏི, ཨུཀྑིཔནྟཱནམྤི ཨགྒཏལཱདཱིསུ ཨེཀཀོཊྛཱསོཝ པཋམཾ ཨུཊྛཧཏི, ན ཨེཝཾ ཏསྶ། ཏསྶ པན སུཝཎྞཔཱདུཀཏལཾ ཝིཡ ཨེཀཔྤཧཱརེནེཝ སཀལཾ པཱདཏལཾ བྷཱུམིཾ ཕུསཏི, བྷཱུམིཏོ ཨུཊྛཧཏི། ཏསྨཱ ‘‘སུཔྤཏིཊྛིཏཔཱདོ ཁོ པན སོ བྷཝཾ གོཏམོ’’ཏི ཝདཏི།

    386. Tattha suppatiṭṭhitapādoti yathā hi aññesaṃ bhūmiyaṃ pādaṃ ṭhapentānaṃ aggatalaṃ vā paṇhi vā passaṃ vā paṭhamaṃ phusati, vemajjhaṃ vā pana chiddaṃ hoti, ukkhipantānampi aggatalādīsu ekakoṭṭhāsova paṭhamaṃ uṭṭhahati, na evaṃ tassa. Tassa pana suvaṇṇapādukatalaṃ viya ekappahāreneva sakalaṃ pādatalaṃ bhūmiṃ phusati, bhūmito uṭṭhahati. Tasmā ‘‘suppatiṭṭhitapādo kho pana so bhavaṃ gotamo’’ti vadati.

    ཏཏྲིདཾ བྷགཝཏོ སུཔྤཏིཊྛིཏཔཱདཏཱཡ – སཙེཔི ཧི བྷགཝཱ ཨནེཀསཏཔོརིསཾ ནརཀཾ ཨཀྐམིསྶཱམཱིཏི པཱདཾ ནཱིཧརཏི, ཏཱཝདེཝ ནིནྣཊྛཱནཾ ཝཱཏཔཱུརིཏཾ ཝིཡ ཀམྨཱརབྷསྟཾ ཨུནྣམིཏྭཱ པཐཝཱིསམཾ ཧོཏི, ཨུནྣཏཊྛཱནམྤི ཨནྟོ པཝིསཏི། དཱུརེ ཨཀྐམིསྶཱམཱིཏི ཨབྷིནཱིཧརནྟསྶ སིནེརུཔྤམཱཎོཔི པབྦཏོ སེདིཏཝེཏྟངྐུརོ ཝིཡ ནམིཏྭཱ པཱདསམཱིཔཾ ཨཱགཙྪཏི། ཏཐཱ ཧིསྶ ཡམཀཔཱཊིཧཱརིཡཾ ཀཏྭཱ ཡུགནྡྷརཔབྦཏཾ ཨཀྐམིསྶཱམཱིཏི པཱདེ ཨབྷིནཱིཧརཏོ པབྦཏོ ནམིཏྭཱ པཱདསམཱིཔཾ ཨཱགཏོ, སོ ཏཾ ཨཀྐམིཏྭཱ དུཏིཡཔཱདེན ཏཱཝཏིཾསབྷཝནཾ ཨཀྐམི། ན ཧི ཙཀྐལཀྑཎེན པཏིཊྛཱཏབྦཊྛཱནཾ ཝིསམཾ བྷཝིཏུཾ སཀྐོཏི། ཁཱཎུ ཝཱ ཀཎྜཀོ ཝཱ སཀྑརཀཐལཱ ཝཱ ཨུཙྩཱརཔསྶཱཝོ ཝཱ ཁེལ༹སིངྒྷཱཎིཀཱདཱིནི ཝཱ པུརིམཏརཱཝ ཨཔགཙྪནྟི, ཏཏྠ ཏཏྠེཝ ཙ པཐཝིཾ པཝིསནྟི། ཏཐཱགཏསྶ ཧི སཱིལཏེཛེན པཉྙཱཏེཛེན དྷམྨཏེཛེན དསནྣཾ པཱརམཱིནཾ ཨཱནུབྷཱཝེན ཨཡཾ མཧཱཔཐཝཱི སམཱ མུདུ པུཔྥཱབྷིཀིཎྞཱ ཧོཏི། ཏཏྲ ཏཐཱགཏོ སམཾ པཱདཾ ནིཀྑིཔཏི, སམཾ ཨུདྡྷརཏི, སབྦཱཝནྟེཧི པཱདཏལེཧི བྷཱུམིཾ ཕུསཏི།

    Tatridaṃ bhagavato suppatiṭṭhitapādatāya – sacepi hi bhagavā anekasataporisaṃ narakaṃ akkamissāmīti pādaṃ nīharati, tāvadeva ninnaṭṭhānaṃ vātapūritaṃ viya kammārabhastaṃ unnamitvā pathavīsamaṃ hoti, unnataṭṭhānampi anto pavisati. Dūre akkamissāmīti abhinīharantassa sineruppamāṇopi pabbato seditavettaṅkuro viya namitvā pādasamīpaṃ āgacchati. Tathā hissa yamakapāṭihāriyaṃ katvā yugandharapabbataṃ akkamissāmīti pāde abhinīharato pabbato namitvā pādasamīpaṃ āgato, so taṃ akkamitvā dutiyapādena tāvatiṃsabhavanaṃ akkami. Na hi cakkalakkhaṇena patiṭṭhātabbaṭṭhānaṃ visamaṃ bhavituṃ sakkoti. Khāṇu vā kaṇḍako vā sakkharakathalā vā uccārapassāvo vā kheḷasiṅghāṇikādīni vā purimatarāva apagacchanti, tattha tattheva ca pathaviṃ pavisanti. Tathāgatassa hi sīlatejena paññātejena dhammatejena dasannaṃ pāramīnaṃ ānubhāvena ayaṃ mahāpathavī samā mudu pupphābhikiṇṇā hoti. Tatra tathāgato samaṃ pādaṃ nikkhipati, samaṃ uddharati, sabbāvantehi pādatalehi bhūmiṃ phusati.

    ཙཀྐཱནཱིཏི དྭཱིསུ པཱདེསུ དྭེ ཙཀྐཱནི། ཏེསཾ ཨརཱ ཙ ནེམི ཙ ནཱབྷི ཙ པཱལི༹ཡཾ ཝུཏྟཱཝ། སབྦཱཀཱརཔརིཔཱུརཱནཱིཏི ཨིམིནཱ པན ཨཡཾ ཝིསེསོ ཝེདིཏབྦོ – ཏེསཾ ཀིར ཙཀྐཱནཾ པཱདཏལསྶ མཛ྄ཛྷེ ནཱབྷི དིསྶཏི, ནཱབྷིཔརིཙྪིནྣཱ ཝཊྚལེཁཱ དིསྶཏི, ནཱབྷིམུཁཔརིཀྑེཔཔཊྚོ དིསྶཏི, པནཱལི༹མུཁཾ དིསྶཏི, ཨརཱ དིསྶནྟི, ཨརེསུ ཝཊྚལེཁཱ དིསྶནྟི, ནེམཱི དིསྶནྟི, ནེམིམཎིཀཱ དིསྶནྟི། ཨིདཾ ཏཱཝ པཱལི༹ཨཱགཏམེཝ།

    Cakkānīti dvīsu pādesu dve cakkāni. Tesaṃ arā ca nemi ca nābhi ca pāḷiyaṃ vuttāva. Sabbākāraparipūrānīti iminā pana ayaṃ viseso veditabbo – tesaṃ kira cakkānaṃ pādatalassa majjhe nābhi dissati, nābhiparicchinnā vaṭṭalekhā dissati, nābhimukhaparikkhepapaṭṭo dissati, panāḷimukhaṃ dissati, arā dissanti, aresu vaṭṭalekhā dissanti, nemī dissanti, nemimaṇikā dissanti. Idaṃ tāva pāḷiāgatameva.

    སམྦཧུལཝཱརོ པན ཨནཱགཏོ, སོ ཨེཝཾ དཊྛབྦོ – སཏྟི སིརི ཝཙྪོ ནནྡི སོཝཏྟིཀོ ཝཊཾསཀོ ཝཌྜྷམཱནཀཾ མཙྪཡུགལཾ བྷདྡཔཱིཋཾ ཨངྐུསཾ ཏོམརོ པཱསཱདོ ཏོརཎཾ སེཏཙྪཏྟཾ ཁགྒོ ཏཱལཝཎྚཾ མོརཧཏྠཀོ ཝཱལ༹བཱིཛནཱི ཨུཎྷཱིསཾ པཏྟོ མཎི ཀུསུམདཱམཾ ནཱིལུཔྤལཾ རཏྟུཔྤལཾ སེཏུཔྤལཾ པདུམཾ པུཎྜརཱིཀཾ པུཎྞགྷཊོ པུཎྞཔཱཏི སམུདྡོ ཙཀྐཝཱལོ༹ ཧིམཝཱ སིནེརུ ཙནྡིམསཱུརིཡཱ ནཀྑཏྟཱནི ཙཏྟཱརོ མཧཱདཱིཔཱ དྭེཔརིཏྟདཱིཔསཧསྶཱནི, ཨནྟམསོ ཙཀྐཝཏྟིརཉྙོ པརིསཾ ཨུཔཱདཱཡ སབྦོ ཙཀྐལཀྑཎསྶེཝ པརིཝཱརོ།

    Sambahulavāro pana anāgato, so evaṃ daṭṭhabbo – satti siri vaccho nandi sovattiko vaṭaṃsako vaḍḍhamānakaṃ macchayugalaṃ bhaddapīṭhaṃ aṅkusaṃ tomaro pāsādo toraṇaṃ setacchattaṃ khaggo tālavaṇṭaṃ morahatthako vāḷabījanī uṇhīsaṃ patto maṇi kusumadāmaṃ nīluppalaṃ rattuppalaṃ setuppalaṃ padumaṃ puṇḍarīkaṃ puṇṇaghaṭo puṇṇapāti samuddo cakkavāḷo himavā sineru candimasūriyā nakkhattāni cattāro mahādīpā dveparittadīpasahassāni, antamaso cakkavattirañño parisaṃ upādāya sabbo cakkalakkhaṇasseva parivāro.

    ཨཱཡཏཔཎྷཱིཏི དཱིགྷཔཎྷི, པརིཔུཎྞཔཎྷཱིཏི ཨཏྠོ། ཡཐཱ ཧི ཨཉྙེསཾ ཨགྒཔཱདོ དཱིགྷོ ཧོཏི, པཎྷིམཏྠཀེ ཛངྒྷཱ པཏིཊྛཱཏི, པཎྷི ཏཙྪེཏྭཱ ཋཔིཏཱ ཝིཡ ཧོཏི, ན ཨེཝཾ ཏཐཱགཏསྶ ། ཏཐཱགཏསྶ པན ཙཏཱུསུ ཀོཊྛཱསེསུ དྭེ ཀོཊྛཱསཱ ཨགྒཔཱདོ ཧོཏི, ཏཏིཡེ ཀོཊྛཱསེ ཛངྒྷཱ པཏིཊྛཱཏི, ཙཏུཏྠེ ཀོཊྛཱསེ ཨཱརགྒེན ཝཊྚེཏྭཱ ཋཔིཏཱ ཝིཡ རཏྟཀམྦལེ གེཎྜུཀསདིསཱ པཎྷི ཧོཏི།

    Āyatapaṇhīti dīghapaṇhi, paripuṇṇapaṇhīti attho. Yathā hi aññesaṃ aggapādo dīgho hoti, paṇhimatthake jaṅghā patiṭṭhāti, paṇhi tacchetvā ṭhapitā viya hoti, na evaṃ tathāgatassa . Tathāgatassa pana catūsu koṭṭhāsesu dve koṭṭhāsā aggapādo hoti, tatiye koṭṭhāse jaṅghā patiṭṭhāti, catutthe koṭṭhāse āraggena vaṭṭetvā ṭhapitā viya rattakambale geṇḍukasadisā paṇhi hoti.

    དཱིགྷངྒུལཱིཏི ཡཐཱ ཨཉྙེསཾ ཀཱཙི ཨངྒུལི དཱིགྷཱ ཧོཏི, ཀཱཙི རསྶཱ, ན ཨེཝཾ ཏཐཱགཏསྶ། ཏཐཱགཏསྶ པན མཀྐཊསྶེཝ དཱིགྷཧཏྠཔཱདངྒུལིཡོ མཱུལེ ཐཱུལཱ ཨནུཔུབྦེན གནྟྭཱ ཨགྒེ ཏནུཀཱ ནིཡྻཱསཏེལེན མདྡིཏྭཱ ཝཊྚིཏཧརིཏཱལཝཊྚིསདིསཱ ཧོནྟི། ཏེན ཝུཏྟཾ ‘‘དཱིགྷངྒུལཱི’’ཏི།

    Dīghaṅgulīti yathā aññesaṃ kāci aṅguli dīghā hoti, kāci rassā, na evaṃ tathāgatassa. Tathāgatassa pana makkaṭasseva dīghahatthapādaṅguliyo mūle thūlā anupubbena gantvā agge tanukā niyyāsatelena madditvā vaṭṭitaharitālavaṭṭisadisā honti. Tena vuttaṃ ‘‘dīghaṅgulī’’ti.

    མུདུཏལུནཧཏྠཔཱདོཏི སཔྤིམཎྜེ ཨོསཱདེཏྭཱ ཋཔིཏཾ སཏཝཱརཝིཧཏཀཔྤཱསཔཊལཾ ཝིཡ མུདཱུ, ཛཱཏམཏྟཀུམཱརསྶ ཝིཡ ཙ ནིཙྩཀཱལཾ ཏལུནཱ ཙ ཧཏྠཔཱདཱ ཨསྶཱཏི མུདུཏལུནཧཏྠཔཱདོ།

    Mudutalunahatthapādoti sappimaṇḍe osādetvā ṭhapitaṃ satavāravihatakappāsapaṭalaṃ viya mudū, jātamattakumārassa viya ca niccakālaṃ talunā ca hatthapādā assāti mudutalunahatthapādo.

    ཛཱལཧཏྠཔཱདོཏི ན ཙམྨེན པཊིབདྡྷཨངྒུལནྟརོ། ཨེདིསོ ཧི ཕཎཧཏྠཀོ པུརིསདོསེན ཨུཔཧཏོ པབྦཛྫམྤི ན ལབྷཏི། ཏཐཱགཏསྶ པན ཙཏསྶོ ཧཏྠངྒུལིཡོ པཉྩཔི པཱདངྒུལིཡོ ཨེཀཔྤམཱཎཱ ཧོནྟི, ཏཱསཾ ཨེཀཔྤམཱཎཏྟཱཡ ཡཝལཀྑཎཾ ཨཉྙམཉྙཾ པཊིཝིཛ྄ཛྷིཏྭཱ ཏིཊྛཏི། ཨཐསྶ ཧཏྠཔཱདཱ ཀུསལེན ཝཌྜྷཀིནཱ ཡོཛིཏཛཱལཝཱཏཔཱནསདིསཱ ཧོནྟི། ཏེན ཝུཏྟཾ ‘‘ཛཱལཧཏྠཔཱདོ’’ཏི།

    Jālahatthapādoti na cammena paṭibaddhaaṅgulantaro. Ediso hi phaṇahatthako purisadosena upahato pabbajjampi na labhati. Tathāgatassa pana catasso hatthaṅguliyo pañcapi pādaṅguliyo ekappamāṇā honti, tāsaṃ ekappamāṇattāya yavalakkhaṇaṃ aññamaññaṃ paṭivijjhitvā tiṭṭhati. Athassa hatthapādā kusalena vaḍḍhakinā yojitajālavātapānasadisā honti. Tena vuttaṃ ‘‘jālahatthapādo’’ti.

    ཨུདྡྷཾ པཏིཊྛིཏགོཔྥཀཏྟཱ ཨུསྶངྑཱ པཱདཱ ཨསྶཱཏི ཨུསྶངྑཔཱདོ། ཨཉྙེསཉྷི པིཊྛིཔཱདེ གོཔྥཀཱ ཧོནྟི། ཏེན ཏེསཾ པཱདཱ ཨཱཎིབདྡྷཱ ཝིཡ ཐདྡྷཱ ཧོནྟི, ན ཡཐཱསུཁཾ པརིཝཏྟནྟི, གཙྪནྟཱནཾ པཱདཏལཱནི ན དིསྶནྟི ། ཏཐཱགཏསྶ པན ཨབྷིརུཧིཏྭཱ ཨུཔརི གོཔྥཀཱ པཏིཊྛཧནྟི། ཏེནསྶ ནཱབྷིཏོ པཊྛཱཡ ཨུཔརིམཀཱཡོ ནཱཝཱཡ ཋཔིཏསུཝཎྞཔཊིམཱ ཝིཡ ནིཙྩལོ ཧོཏི, ཨདྷོཀཱཡོཝ ཨིཉྫཏི། སུཁེན པཱདཱ པརིཝཏྟནྟི། པུརཏོཔི པཙྪཏོཔི ཨུབྷཡཔསྶེསུཔི ཋཏྭཱ པསྶནྟཱནཾ པཱདཏལཱནི པཉྙཱཡནྟི, ན ཧཏྠཱིནཾ ཝིཡ པཙྪཏོཡེཝ།

    Uddhaṃ patiṭṭhitagopphakattā ussaṅkhā pādā assāti ussaṅkhapādo. Aññesañhi piṭṭhipāde gopphakā honti. Tena tesaṃ pādā āṇibaddhā viya thaddhā honti, na yathāsukhaṃ parivattanti, gacchantānaṃ pādatalāni na dissanti . Tathāgatassa pana abhiruhitvā upari gopphakā patiṭṭhahanti. Tenassa nābhito paṭṭhāya uparimakāyo nāvāya ṭhapitasuvaṇṇapaṭimā viya niccalo hoti, adhokāyova iñjati. Sukhena pādā parivattanti. Puratopi pacchatopi ubhayapassesupi ṭhatvā passantānaṃ pādatalāni paññāyanti, na hatthīnaṃ viya pacchatoyeva.

    ཨེཎིཛངྒྷོཏི ཨེཎིམིགསདིསཛངྒྷོ མཾསུསྶདེན པརིཔུཎྞཛངྒྷོ, ན ཨེཀཏོ བདྡྷཔིཎྜིཀམཾསོ , སམནྟཏོ སམསཎྛིཏེན མཾསེན པརིཀྑིཏྟཱཧི སུཝཊྚིཏཱཧི སཱལིགབྦྷསདིསཱཧི ཛངྒྷཱཧི སམནྣཱགཏོཏི ཨཏྠོ།

    Eṇijaṅghoti eṇimigasadisajaṅgho maṃsussadena paripuṇṇajaṅgho, na ekato baddhapiṇḍikamaṃso , samantato samasaṇṭhitena maṃsena parikkhittāhi suvaṭṭitāhi sāligabbhasadisāhi jaṅghāhi samannāgatoti attho.

    ཨནོནམནྟོཏི ཨནམནྟོ། ཨེཏེནསྶ ཨཁུཛྫཨཝཱམནབྷཱཝོ དཱིཔིཏོ། ཨཝསེསཛནཱ ཧི ཁུཛྫཱ ཝཱ ཧོནྟི ཝཱམནཱ ཝཱ, ཁུཛྫཱནཾ ཨུཔརིམཀཱཡོ ཨཔརིཔུཎྞོ ཧོཏི, ཝཱམནཱནཾ ཧེཊྛིམཀཱཡོ། ཏེ ཨཔརིཔུཎྞཀཱཡཏྟཱ ན སཀྐོནྟི ཨནོནམནྟཱ ཛཎྞུཀཱནི པརིམཛྫིཏུཾ། ཏཐཱགཏོ པན པརིཔུཎྞཨུབྷཡཀཱཡཏྟཱ སཀྐོཏི།

    Anonamantoti anamanto. Etenassa akhujjaavāmanabhāvo dīpito. Avasesajanā hi khujjā vā honti vāmanā vā, khujjānaṃ uparimakāyo aparipuṇṇo hoti, vāmanānaṃ heṭṭhimakāyo. Te aparipuṇṇakāyattā na sakkonti anonamantā jaṇṇukāni parimajjituṃ. Tathāgato pana paripuṇṇaubhayakāyattā sakkoti.

    ཨུསབྷཝཱརཎཱདཱིནཾ ཝིཡ སུཝཎྞཔདུམཀཎྞིཀསདིསེ ཀོསེ ཨོཧིཏཾ པཊིཙྪནྣཾ ཝཏྠགུཡ྄ཧཾ ཨསྶཱཏི ཀོསོཧིཏཝཏྠགུཡ྄ཧོ། ཝཏྠགུཡ྄ཧནྟི ཝཏྠེན གཱུཧིཏབྦཾ ཨངྒཛཱཏཾ ཝུཙྩཏི།

    Usabhavāraṇādīnaṃ viya suvaṇṇapadumakaṇṇikasadise kose ohitaṃ paṭicchannaṃ vatthaguyhaṃ assāti kosohitavatthaguyho. Vatthaguyhanti vatthena gūhitabbaṃ aṅgajātaṃ vuccati.

    སུཝཎྞཝཎྞོཏི ཛཱཏིཧིངྒུལཀེན མཛྫིཏྭཱ དཱིཔིདཱཋཱཡ གྷཾསིཏྭཱ གེརུཀཔརིཀམྨཾ ཀཏྭཱ ཋཔིཏགྷནསུཝཎྞརཱུཔཀསདིསོཏི ཨཏྠོ། ཨེཏེནསྶ གྷནསིནིདྡྷསཎྷསརཱིརཏཾ དསྶེཏྭཱ ཚཝིཝཎྞདསྶནཏྠཾ ཀཉྩནསནྣིབྷཏྟཙོཏི ཝུཏྟཾ, པུརིམསྶ ཝཱ ཝེཝཙནམེཝ ཨེཏཾ།

    Suvaṇṇavaṇṇoti jātihiṅgulakena majjitvā dīpidāṭhāya ghaṃsitvā gerukaparikammaṃ katvā ṭhapitaghanasuvaṇṇarūpakasadisoti attho. Etenassa ghanasiniddhasaṇhasarīrataṃ dassetvā chavivaṇṇadassanatthaṃ kañcanasannibhattacoti vuttaṃ, purimassa vā vevacanameva etaṃ.

    རཛོཛལླནྟི རཛོ ཝཱ མལཾ ཝཱ། ན ཨུཔལིམྤཏཱིཏི ན ལགྒཏི, པདུམཔལཱསཏོ ཨུདཀབིནྡུ ཝིཡ ཝིཝཊྚཏི། ཧཏྠདྷོཝནཔཱདདྷོཝནཱདཱིནི པན ཨུཏུགྒཧཎཏྠཱཡ ཙེཝ དཱཡཀཱནཾ པུཉྙཕལཏྠཱཡ ཙ བུདྡྷཱ ཀརོནྟི, ཝཏྟསཱིསེནཱཔི ཙ ཀརོནྟིཡེཝ། སེནཱསནཾ པཝིསནྟེན ཧི བྷིཀྑུནཱ པཱདེ དྷོཝིཏྭཱ པཝིསིཏབྦནྟི ཝུཏྟམེཏཾ།

    Rajojallanti rajo vā malaṃ vā. Na upalimpatīti na laggati, padumapalāsato udakabindu viya vivaṭṭati. Hatthadhovanapādadhovanādīni pana utuggahaṇatthāya ceva dāyakānaṃ puññaphalatthāya ca buddhā karonti, vattasīsenāpi ca karontiyeva. Senāsanaṃ pavisantena hi bhikkhunā pāde dhovitvā pavisitabbanti vuttametaṃ.

    ཨུདྡྷགྒལོམོཏི ཨཱཝཊྚཔརིཡོསཱནེ ཨུདྡྷགྒཱནི ཧུཏྭཱ མུཁསོབྷཾ ཨུལློཀཡམཱནཱནི ཝིཡ ཋིཏཱནི ལོམཱནི ཨསྶཱཏི ཨུདྡྷགྒལོམོ།

    Uddhaggalomoti āvaṭṭapariyosāne uddhaggāni hutvā mukhasobhaṃ ullokayamānāni viya ṭhitāni lomāni assāti uddhaggalomo.

    བྲཧྨུཛུགཏྟོཏི བྲཧྨཱ ཝིཡ ཨུཛུགཏྟོ, ཨུཛུམེཝ ཨུགྒཏདཱིགྷསརཱིརོ། ཡེབྷུཡྻེན ཧི སཏྟཱ ཁནྡྷེ ཀཊིཡཾ ཛཱཎཱུསཱུཏི ཏཱིསུ ཋཱནེསུ ནམནྟི། ཏེ ཀཊིཡཾ ནམནྟཱ པཙྪཏོ ནམནྟི, ཨིཏརེསུ དྭཱིསུ ཋཱནེསུ པུརཏོ། དཱིགྷསརཱིརཱ པནེཀེ པསྶཝངྐཱ ཧོནྟི, ཨེཀེ མུཁཾ ཨུནྣཱམེཏྭཱ ནཀྑཏྟཱནི གཎཡནྟཱ ཝིཡ ཙརནྟི, ཨེཀེ ཨཔྤམཾསལོཧིཏཱ སཱུལསདིསཱ ཧོནྟི, པཝེདྷམཱནཱ གཙྪནྟི། ཏཐཱགཏོ པན ཨུཛུམེཝ ཨུགྒནྟྭཱ དཱིགྷཔྤམཱཎོ དེཝནགརེ ཨུསྶིཏསུཝཎྞཏོརཎཾ ཝིཡ ཧོཏི།

    Brahmujugattoti brahmā viya ujugatto, ujumeva uggatadīghasarīro. Yebhuyyena hi sattā khandhe kaṭiyaṃ jāṇūsūti tīsu ṭhānesu namanti. Te kaṭiyaṃ namantā pacchato namanti, itaresu dvīsu ṭhānesu purato. Dīghasarīrā paneke passavaṅkā honti, eke mukhaṃ unnāmetvā nakkhattāni gaṇayantā viya caranti, eke appamaṃsalohitā sūlasadisā honti, pavedhamānā gacchanti. Tathāgato pana ujumeva uggantvā dīghappamāṇo devanagare ussitasuvaṇṇatoraṇaṃ viya hoti.

    སཏྟུསྶདོཏི དྭེ ཧཏྠཔིཊྛིཡོ དྭེ པཱདཔིཊྛིཡོ དྭེ ཨཾསཀཱུཊཱནི ཁནྡྷོཏི ཨིམེསུ སཏྟསུ ཋཱནེསུ པརིཔུཎྞམཾསུསྶདོ ཨསྶཱཏི སཏྟུསྶདོ། ཨཉྙེསཾ པན ཧཏྠཔཱདཔིཊྛཱིསུ ནྷཱརུཛཱལཱ པཉྙཱཡནྟི, ཨཾསཀཱུཊཁནྡྷེསུ ཨཊྛིཀོཊིཡོ, ཏེ མནུསྶཔེཏཱ ཝིཡ ཁཱཡནྟི, ན ཏཐཱགཏོ། ཏཐཱགཏོ པན སཏྟསུ ཋཱནེསུ པརིཔུཎྞམཾསུསྶདཏྟཱ ནིགཱུལ༹ྷནྷཱརུཛཱལེཧི ཧཏྠཔིཊྛཱདཱིཧི ཝཊྚེཏྭཱ ཋཔིཏསུཝཎྞཝཎྞཱལིངྒསདིསེན ཁནྡྷེན སིལཱརཱུཔཀཾ ཝིཡ ཙིཏྟཀམྨརཱུཔཀཾ ཝིཡ ཙ ཁཱཡཏི།

    Sattussadoti dve hatthapiṭṭhiyo dve pādapiṭṭhiyo dve aṃsakūṭāni khandhoti imesu sattasu ṭhānesu paripuṇṇamaṃsussado assāti sattussado. Aññesaṃ pana hatthapādapiṭṭhīsu nhārujālā paññāyanti, aṃsakūṭakhandhesu aṭṭhikoṭiyo, te manussapetā viya khāyanti, na tathāgato. Tathāgato pana sattasu ṭhānesu paripuṇṇamaṃsussadattā nigūḷhanhārujālehi hatthapiṭṭhādīhi vaṭṭetvā ṭhapitasuvaṇṇavaṇṇāliṅgasadisena khandhena silārūpakaṃ viya cittakammarūpakaṃ viya ca khāyati.

    སཱིཧསྶ པུབྦདྡྷཾ ཝིཡ ཀཱཡོ ཨསྶཱཏི སཱིཧཔུབྦདྡྷཀཱཡོ། སཱིཧསྶ ཧི པུརཏྠིམཀཱཡོཝ པརིཔུཎྞོ ཧོཏི, པཙྪིམཀཱཡོ ཨཔརིཔུཎྞོ། ཏཐཱགཏསྶ པན སཱིཧསྶ པུབྦདྡྷཀཱཡོཝ སབྦོ ཀཱཡོ པརིཔུཎྞོ། སོཔི སཱིཧསྶེཝ ན ཏཏྠ ཏཏྠ ཝིནཏུནྣཏཱདིཝསེན དུསྶཎྛིཏཝིསཎྛིཏོ, དཱིགྷཡུཏྟཋཱནེ པན དཱིགྷོ, རསྶཀིསཐཱུལཨནུཝཊྚིཏཡུཏྟཊྛཱནེསུ ཏཐཱཝིདྷོཝ ཧོཏི། ཝུཏྟཉྷེཏཾ –

    Sīhassa pubbaddhaṃ viya kāyo assāti sīhapubbaddhakāyo. Sīhassa hi puratthimakāyova paripuṇṇo hoti, pacchimakāyo aparipuṇṇo. Tathāgatassa pana sīhassa pubbaddhakāyova sabbo kāyo paripuṇṇo. Sopi sīhasseva na tattha tattha vinatunnatādivasena dussaṇṭhitavisaṇṭhito, dīghayuttaṭhāne pana dīgho, rassakisathūlaanuvaṭṭitayuttaṭṭhānesu tathāvidhova hoti. Vuttañhetaṃ –

    ‘‘མནཱཔིཡེ ཙ ཁོ, བྷིཀྑཝེ, ཀམྨཝིཔཱཀེ པཙྩུཔཊྛིཏེ ཡེཧི ཨངྒེཧི དཱིགྷེཧི སོབྷཏི, ཏཱནི ཨངྒཱནི དཱིགྷཱནི སཎྛཧནྟི། ཡེཧི ཨངྒེཧི རསྶེཧི སོབྷཏི, ཏཱནི ཨངྒཱནི རསྶཱནི སཎྛཧནྟི། ཡེཧི ཨངྒེཧི ཐཱུལེཧི སོབྷཏི, ཏཱནི ཨངྒཱནི ཐཱུལཱནི སཎྛཧནྟི། ཡེཧི ཨངྒེཧི ཀིསེཧི སོབྷཏི, ཏཱནི ཨངྒཱནི ཀིསཱནི སཎྛཧནྟི། ཡེཧི ཨངྒེཧི ཝཊྚེཧི སོབྷཏི, ཏཱནི ཨངྒཱནི ཝཊྚཱནི སཎྛཧནྟཱི’’ཏི།

    ‘‘Manāpiye ca kho, bhikkhave, kammavipāke paccupaṭṭhite yehi aṅgehi dīghehi sobhati, tāni aṅgāni dīghāni saṇṭhahanti. Yehi aṅgehi rassehi sobhati, tāni aṅgāni rassāni saṇṭhahanti. Yehi aṅgehi thūlehi sobhati, tāni aṅgāni thūlāni saṇṭhahanti. Yehi aṅgehi kisehi sobhati, tāni aṅgāni kisāni saṇṭhahanti. Yehi aṅgehi vaṭṭehi sobhati, tāni aṅgāni vaṭṭāni saṇṭhahantī’’ti.

    ཨིཏི ནཱནཱཙིཏྟེན པུཉྙཙིཏྟེན ཙིཏྟིཏོ དསཧི པཱརམཱིཧི སཛྫིཏོ ཏཐཱགཏསྶ ཨཏྟབྷཱཝོ, ཏསྶ ལོཀེ སབྦསིཔྤིནོ ཝཱ ཨིདྡྷིམནྟོ ཝཱ པཊིརཱུཔཀམྤི ཀཱཏུཾ ན སཀྐོནྟི།

    Iti nānācittena puññacittena cittito dasahi pāramīhi sajjito tathāgatassa attabhāvo, tassa loke sabbasippino vā iddhimanto vā paṭirūpakampi kātuṃ na sakkonti.

    ཙིཏནྟརཾསོཏི ཨནྟརཾསཾ ཝུཙྩཏི དྭིནྣཾ ཀོཊྚཱནམནྟརཾ, ཏཾ ཙིཏཾ པརིཔུཎྞམསྶཱཏི ཙིཏནྟརཾསོ། ཨཉྙེསཉྷི ཏཾ ཋཱནཾ ནིནྣཾ ཧོཏི, དྭེ པིཊྛིཀོཊྚཱ པཱཊིཡེཀྐཾ པཉྙཱཡནྟི། ཏཐཱགཏསྶ པན ཀཊིཏོ པཊྛཱཡ མཾསཔཊལཾ ཡཱཝ ཁནྡྷཱ ཨུགྒམྨ སམུསྶིཏསུཝཎྞཕལཀཾ ཝིཡ པིཊྛིཾ ཚཱདེཏྭཱ པཏིཊྛིཏཾ།

    Citantaraṃsoti antaraṃsaṃ vuccati dvinnaṃ koṭṭānamantaraṃ, taṃ citaṃ paripuṇṇamassāti citantaraṃso. Aññesañhi taṃ ṭhānaṃ ninnaṃ hoti, dve piṭṭhikoṭṭā pāṭiyekkaṃ paññāyanti. Tathāgatassa pana kaṭito paṭṭhāya maṃsapaṭalaṃ yāva khandhā uggamma samussitasuvaṇṇaphalakaṃ viya piṭṭhiṃ chādetvā patiṭṭhitaṃ.

    ནིགྲོདྷཔརིམཎྜལོཏི ནིགྲོདྷོ ཝིཡ པརིམཎྜལོ། ཡཐཱ པཎྞཱསཧཏྠཏཱཡ ཝཱ སཏཧཏྠཏཱཡ ཝཱ སམཀྑནྡྷསཱཁོ ནིགྲོདྷོ དཱིགྷཏོཔི ཝིཏྠཱརཏོཔི ཨེཀཔྤམཱཎོཝ ཧོཏི, ཨེཝཾ ཀཱཡཏོཔི བྱཱམཏོཔི ཨེཀཔྤམཱཎོ། ཡཐཱ ཨཉྙེསཾ ཀཱཡོ ཝཱ དཱིགྷོ ཧོཏི བྱཱམོ ཝཱ, ན ཨེཝཾ ཝིསམཔྤམཱཎོཏི ཨཏྠོ། ཏེནེཝ ‘‘ཡཱཝཏཀྭསྶ ཀཱཡོ’’ཏིཨཱདི ཝུཏྟཾ། ཏཏྠ ཡཱཝཏཀོ ཨསྶཱཏི ཡཱཝཏཀྭསྶ།

    Nigrodhaparimaṇḍaloti nigrodho viya parimaṇḍalo. Yathā paṇṇāsahatthatāya vā satahatthatāya vā samakkhandhasākho nigrodho dīghatopi vitthāratopi ekappamāṇova hoti, evaṃ kāyatopi byāmatopi ekappamāṇo. Yathā aññesaṃ kāyo vā dīgho hoti byāmo vā, na evaṃ visamappamāṇoti attho. Teneva ‘‘yāvatakvassa kāyo’’tiādi vuttaṃ. Tattha yāvatako assāti yāvatakvassa.

    སམཝཊྚཀྑནྡྷོཏི སམཝཊྚིཏཀྑནྡྷོ། ཡཐཱ ཨེཀེ ཀོཉྩཱ ཝིཡ བཀཱ ཝིཡ ཝརཱཧཱ ཝིཡ ཙ དཱིགྷགལཱ ཝངྐགལཱ པུཐུལགལཱ ཙ ཧོནྟི, ཀཐནཀཱལེ སིརཱཛཱལཾ པཉྙཱཡཏི, མནྡོ སརོ ནིཀྑམཏི, ན ཨེཝཾ ཏསྶ། ཏཐཱགཏསྶ པན སུཝཊྚིཏསུཝཎྞཱལིངྒསདིསོ ཁནྡྷོ ཧོཏི, ཀཐནཀཱལེ སིརཱཛཱལཾ ན པཉྙཱཡཏི, མེགྷསྶ ཝིཡ གཛྫཏོ སརོ མཧཱ ཧོཏི།

    Samavaṭṭakkhandhoti samavaṭṭitakkhandho. Yathā eke koñcā viya bakā viya varāhā viya ca dīghagalā vaṅkagalā puthulagalā ca honti, kathanakāle sirājālaṃ paññāyati, mando saro nikkhamati, na evaṃ tassa. Tathāgatassa pana suvaṭṭitasuvaṇṇāliṅgasadiso khandho hoti, kathanakāle sirājālaṃ na paññāyati, meghassa viya gajjato saro mahā hoti.

    རསགྒསགྒཱིཏི ཨེཏྠ རསཾ གསནྟཱིཏི རསགྒསཱ , རསཧརཎཱིནམེཏཾ ཨདྷིཝཙནཾ, ཏཱ ཨགྒཱ ཨསྶཱཏི རསགྒསགྒཱི། ཏཐཱགཏསྶ ཧི སཏྟ རསཧརཎིསཧསྶཱནི ཨུདྡྷགྒཱནི ཧུཏྭཱ གཱིཝཱཡམེཝ པཊིམུཀྐཱནི། ཏིལཕལམཏྟོཔི ཨཱཧཱརོ ཛིཝ྄ཧགྒེ ཋཔིཏོ སབྦཾ ཀཱཡཾ ཨནུཕརཏི, ཏེནེཝ མཧཱཔདྷཱནཾ པདཧནྟསྶ ཨེཀཏཎྜུལཱདཱིཧིཔི ཀཱལཱ༹ཡཡཱུསཔསཏེནཱཔི ཀཱཡསྶ ཡཱཔནཾ ཨཧོསི། ཨཉྙེསཾ པན ཏཐཱ ཨབྷཱཝཱ ན སཀལཀཱཡཾ ཨོཛཱ ཕརཏི, ཏེན ཏེ བཧྭཱབཱདྷཱ ཧོནྟི། ཨིདཾ ལཀྑཎཾ ཨཔྤཱབཱདྷཏཱསངྑཱཏསྶ ནིསྶནྡཕལསྶ ཝསེན པཱཀཊཾ ཧོཏི།

    Rasaggasaggīti ettha rasaṃ gasantīti rasaggasā , rasaharaṇīnametaṃ adhivacanaṃ, tā aggā assāti rasaggasaggī. Tathāgatassa hi satta rasaharaṇisahassāni uddhaggāni hutvā gīvāyameva paṭimukkāni. Tilaphalamattopi āhāro jivhagge ṭhapito sabbaṃ kāyaṃ anupharati, teneva mahāpadhānaṃ padahantassa ekataṇḍulādīhipi kāḷāyayūsapasatenāpi kāyassa yāpanaṃ ahosi. Aññesaṃ pana tathā abhāvā na sakalakāyaṃ ojā pharati, tena te bahvābādhā honti. Idaṃ lakkhaṇaṃ appābādhatāsaṅkhātassa nissandaphalassa vasena pākaṭaṃ hoti.

    སཱིཧསྶེཝ ཧནུ ཨསྶཱཏི སཱིཧཧནུ། ཏཏྠ སཱིཧསྶ ཧེཊྛིམཧནུམེཝ པརིཔུཎྞཾ ཧོཏི, ན ཨུཔརིམཾ། ཏཐཱགཏསྶ པན སཱིཧསྶ ཧེཊྛིམཾ ཝིཡ དྭེཔི པརིཔུཎྞཱནི དྭཱདསིཡཾ པཀྑསྶ ཙནྡསདིསཱནི ཧོནྟི།

    Sīhasseva hanu assāti sīhahanu. Tattha sīhassa heṭṭhimahanumeva paripuṇṇaṃ hoti, na uparimaṃ. Tathāgatassa pana sīhassa heṭṭhimaṃ viya dvepi paripuṇṇāni dvādasiyaṃ pakkhassa candasadisāni honti.

    ཙཏྟཱལཱིསདནྟོཏིཨཱདཱིསུ ཨུཔརིམཧནུཀེ པཏིཊྛིཏཱ ཝཱིསཏི, ཧེཊྛིམེ ཝཱིསཏཱིཏི ཙཏྟཱལཱིས དནྟཱ ཨསྶཱཏི ཙཏྟཱལཱིསདནྟོ། ཨཉྙེསཉྷི པརིཔུཎྞདནྟཱནམྤི དྭཏྟིཾས དནྟཱ ཧོནྟི, ཏཐཱགཏསྶ ཙཏྟཱལཱིསཾ།

    Cattālīsadantotiādīsu uparimahanuke patiṭṭhitā vīsati, heṭṭhime vīsatīti cattālīsa dantā assāti cattālīsadanto. Aññesañhi paripuṇṇadantānampi dvattiṃsa dantā honti, tathāgatassa cattālīsaṃ.

    ཨཉྙེསཉྩ ཀེཙི དནྟཱ ཨུཙྩཱ ཀེཙི ནཱིཙཱཏི ཝིསམཱ ཧོནྟི, ཏཐཱགཏསྶ པན ཨཡཔཊྚཚིནྣསངྑཔཊལཾ ཝིཡ སམཱ།

    Aññesañca keci dantā uccā keci nīcāti visamā honti, tathāgatassa pana ayapaṭṭachinnasaṅkhapaṭalaṃ viya samā.

    ཨཉྙེསཾ ཀུམྦྷཱིལཱནཾ ཝིཡ དནྟཱ ཝིརལཱ༹ ཧོནྟི, མཙྪམཾསཱདཱིནི ཁཱདནྟཱནཾ དནྟནྟརཾ པཱུརཏི། ཏཐཱགཏསྶ པན ཀནཀལཏཱཡ སམུསྶཱཔིཏཝཛིརཔནྟི ཝིཡ ཨཝིརལཱ༹ ཏུལིཀཱཡ དསྶིཏཔརིཙྪེདཱ ཝིཡ དནྟཱ ཧོནྟི།

    Aññesaṃ kumbhīlānaṃ viya dantā viraḷā honti, macchamaṃsādīni khādantānaṃ dantantaraṃ pūrati. Tathāgatassa pana kanakalatāya samussāpitavajirapanti viya aviraḷā tulikāya dassitaparicchedā viya dantā honti.

    སུསུཀྐདཱཋོཏི ཨཉྙེསཉྩ པཱུཏིདནྟཱ ཨུཊྛཧནྟི, ཏེན ཀཱཙི དཱཋཱ ཀཱལཱ༹པི ཝིཝཎྞཱཔི ཧོནྟི། ཏཐཱགཏོ སུསུཀྐདཱཋོ ཨོསདྷིཏཱརཀམྤི ཨཏིཀྐམྨ ཝིརོཙམཱནཱཡ པབྷཱཡ སམནྣཱགཏདཱཋོ, ཏེན ཝུཏྟཾ ‘‘སུསུཀྐདཱཋོ’’ཏི།

    Susukkadāṭhoti aññesañca pūtidantā uṭṭhahanti, tena kāci dāṭhā kāḷāpi vivaṇṇāpi honti. Tathāgato susukkadāṭho osadhitārakampi atikkamma virocamānāya pabhāya samannāgatadāṭho, tena vuttaṃ ‘‘susukkadāṭho’’ti.

    པཧཱུཏཛིཝ྄ཧོཏི ཨཉྙེསཾ ཛིཝ྄ཧཱ ཐཱུལཱཔི ཧོཏི ཀིསཱཔི རསྶཱཔི ཐདྡྷཱཔི ཝིསམཱཔི, ཏཐཱགཏསྶ པན མུདུ དཱིགྷཱ པུཐུལཱ ཝཎྞསམྤནྣཱ ཧོཏི། སོ ཏཾ ལཀྑཎཾ པརིཡེསིཏུཾ ཨཱགཏཱནཾ ཀངྑཱཝིནོདནཏྠཾ མུདུཀཏྟཱ ཏཾ ཛིཝ྄ཧཾ ཀཐིནསཱུཙིཾ ཝིཡ ཝཊྚེཏྭཱ ཨུབྷོ ནཱསིཀསོཏཱནི པརཱམསཏི, དཱིགྷཏྟཱ ཨུབྷོ ཀཎྞསོཏཱནི པརཱམསཏི, པུཐུལཏྟཱ ཀེསནྟཔརིཡོསཱནཾ ཀེཝལམྤི ནལཱཊཾ པཊིཙྪཱདེཏི། ཨེཝཾ ཏསྶཱ མུདུདཱིགྷཔུཐུལབྷཱཝཾ པཀཱསེནྟོ ཀངྑཾ ཝིནོདེཏི། ཨེཝཾ ཏིལཀྑཎསམྤནྣཾ ཛིཝ྄ཧཾ སནྡྷཱཡ ‘‘པཧཱུཏཛིཝ྄ཧོ’’ཏི ཝུཏྟཾ།

    Pahūtajivhoti aññesaṃ jivhā thūlāpi hoti kisāpi rassāpi thaddhāpi visamāpi, tathāgatassa pana mudu dīghā puthulā vaṇṇasampannā hoti. So taṃ lakkhaṇaṃ pariyesituṃ āgatānaṃ kaṅkhāvinodanatthaṃ mudukattā taṃ jivhaṃ kathinasūciṃ viya vaṭṭetvā ubho nāsikasotāni parāmasati, dīghattā ubho kaṇṇasotāni parāmasati, puthulattā kesantapariyosānaṃ kevalampi nalāṭaṃ paṭicchādeti. Evaṃ tassā mududīghaputhulabhāvaṃ pakāsento kaṅkhaṃ vinodeti. Evaṃ tilakkhaṇasampannaṃ jivhaṃ sandhāya ‘‘pahūtajivho’’ti vuttaṃ.

    བྲཧྨསྶརོཏི ཨཉྙེ ཚིནྣསྶརཱཔི བྷིནྣསྶརཱཔི ཀཱཀསྶརཱཔི ཧོནྟི, ཏཐཱགཏོ པན མཧཱབྲཧྨུནོ སརསདིསེན སརེན སམནྣཱགཏོ། མཧཱབྲཧྨུནོ ཧི པིཏྟསེམྷེཧི ཨཔལིབུདྡྷཏྟཱ སརོ ཝིསུདྡྷོ ཧོཏི། ཏཐཱགཏེནཱཔི ཀཏཀམྨཾ ཝཏྠུཾ སོདྷེཏི, ཝཏྠུསྶ སུདྡྷཏྟཱ ནཱབྷིཏོ པཊྛཱཡ སམུཊྛཧནྟོ སརོ ཝིསུདྡྷོ ཨཊྛངྒསམནྣཱགཏོཝ སམུཊྛཱཏི། ཀརཝིཀོ ཝིཡ བྷཎཏཱིཏི ཀརཝིཀབྷཱཎཱི, མཏྟཀརཝིཀརུཏམཉྫུགྷོསོཏི ཨཏྠོ།

    Brahmassaroti aññe chinnassarāpi bhinnassarāpi kākassarāpi honti, tathāgato pana mahābrahmuno sarasadisena sarena samannāgato. Mahābrahmuno hi pittasemhehi apalibuddhattā saro visuddho hoti. Tathāgatenāpi katakammaṃ vatthuṃ sodheti, vatthussa suddhattā nābhito paṭṭhāya samuṭṭhahanto saro visuddho aṭṭhaṅgasamannāgatova samuṭṭhāti. Karaviko viya bhaṇatīti karavikabhāṇī, mattakaravikarutamañjughosoti attho.

    ཏཏྲིདཾ ཀརཝིཀརུཏསྶ མཉྫུཏཱཡ – ཀརཝིཀསཀུཎེ ཀིར མདྷུརརསཾ ཨམྦཔཀྐཾ མུཁཏུཎྜཀེན པཧརིཏྭཱ པགྒྷརིཏཾ རསཾ སཱཡིཏྭཱ པཀྑེན ཏཱལཾ དཏྭཱ ཝིཀཱུཛམཱནེ ཙཏུཔྤདཱདཱིནི མཏྟཱནི ཝིཡ ལལི༹ཏུཾ ཨཱརབྷནྟི། གོཙརཔྤསུཏཱཔི ཙཏུཔྤདཱ མུཁགཏཱནིཔི ཏིཎཱནི ཚཌྜེཏྭཱ ཏཾ སདྡཾ སུཎནྟི, ཝཱལ༹མིགཱ ཁུདྡཀམིགེ ཨནུབནྡྷམཱནཱ ཨུཀྑིཏྟཔཱདཾ ཨནུཀྑིཔིཏྭཱཝ ཏིཊྛནྟི, ཨནུབདྡྷམིགཱཔི མརཎབྷཡཾ ཧིཏྭཱཔི ཏིཊྛནྟི, ཨཱཀཱསེ པཀྑནྡཔཀྑིནོཔི པཀྑེ པསཱརེཏྭཱ ཏིཊྛནྟི, ཨུདཀེ མཙྪཱཔི ཀཎྞཔཊལཾ ཨཔྥོཊེནྟཱ ཏཾ སདྡཾ སུཎམཱནཱཝ ཏིཊྛནྟི། ཨེཝཾ མཉྫུརུཏཱ ཀརཝིཀཱ།

    Tatridaṃ karavikarutassa mañjutāya – karavikasakuṇe kira madhurarasaṃ ambapakkaṃ mukhatuṇḍakena paharitvā paggharitaṃ rasaṃ sāyitvā pakkhena tālaṃ datvā vikūjamāne catuppadādīni mattāni viya laḷituṃ ārabhanti. Gocarappasutāpi catuppadā mukhagatānipi tiṇāni chaḍḍetvā taṃ saddaṃ suṇanti, vāḷamigā khuddakamige anubandhamānā ukkhittapādaṃ anukkhipitvāva tiṭṭhanti, anubaddhamigāpi maraṇabhayaṃ hitvāpi tiṭṭhanti, ākāse pakkhandapakkhinopi pakkhe pasāretvā tiṭṭhanti, udake macchāpi kaṇṇapaṭalaṃ apphoṭentā taṃ saddaṃ suṇamānāva tiṭṭhanti. Evaṃ mañjurutā karavikā.

    ཨསནྡྷིམིཏྟཱཔི དྷམྨཱསོཀསྶ དེཝཱི – ‘‘ཨཏྠི ནུ ཁོ, བྷནྟེ, བུདྡྷསདྡེན སདིསོ ཀསྶཙི སདྡོ’’ཏི སངྒྷཾ པུཙྪི། ཨཏྠི ཀརཝིཀསཀུཎསྶཱཏི། ཀུཧིཾ, བྷནྟེ, སཀུཎཱཏི? ཧིམཝནྟེཏི། སཱ རཱཛཱནཾ ཨཱཧ, – ‘‘དེཝ, ཀརཝིཀསཀུཎཾ དཊྛུཀཱམཱ’’ཏི། རཱཛཱ ‘‘ཨིམསྨིཾ པཉྫརེ ནིསཱིདིཏྭཱ ཀརཝིཀོ ཨཱགཙྪཏཱུ’’ཏི སུཝཎྞཔཉྫརཾ ཝིསྶཛྫེསི། པཉྫརོ གནྟྭཱ ཨེཀསྶ ཀརཝིཀསྶ པུརཏོ ཨཊྛཱསི། སོ ‘‘རཱཛཱཎཱཡ ཨཱགཏོ པཉྫརོ, ན སཀྐཱ ཨགནྟུ’’ནྟི ཏཏྠ ནིསཱིདི། པཉྫརོ ཨཱགནྟྭཱ རཉྙོ པུརཏོཝ ཨཊྛཱསི། ཀརཝིཀཾ སདྡཾ ཀཱརཱཔེཏུཾ ན སཀྐོནྟི། ཨཐ རཱཛཱ ‘‘ཀཐཾ བྷཎེ ཨིམེ སདྡཾ ཀརོནྟཱི’’ཏི ཨཱཧ? ཉཱཏཀེ དིསྭཱ དེཝཱཏི། ཨཐ ནཾ རཱཛཱ ཨཱདཱསེཧི པརིཀྑིཔཱཔེསི། སོ ཨཏྟནོཝ ཚཱཡཾ དིསྭཱ ‘‘ཉཱཏཀཱ མེ ཨཱགཏཱ’’ཏི མཉྙམཱནོ པཀྑེན ཏཱལ༹ཾ དཏྭཱ མཉྫུསྶརེན མཎིཝཾསཾ དྷམམཱནོ ཝིཡ ཝིརཝི། སཀལནགརེ མནུསྶཱ མཏྟཱ ཝིཡ ལལི༹ཾསུ། ཨསནྡྷིམིཏྟཱ ཙིནྟེསི – ‘‘ཨིམསྶ ཏཱཝ ཏིརཙྪཱནསྶ ཨེཝཾ མདྷུརོ སདྡོ, ཀཱིདིསོ ནུ ཁོ སབྦཉྙུཏཉྙཱཎསིརིཔྤཏྟསྶ བྷགཝཏོ ཨཧོསཱི’’ཏི པཱིཏིཾ ཨུཔྤཱདེཏྭཱ ཏཾ པཱིཏིཾ ཨཝིཛཧིཏྭཱ སཏྟཧི ཛངྒྷསཏེཧི སདྡྷིཾ སོཏཱཔཏྟིཕལེ པཏིཊྛཱསི། ཨེཝཾ མདྷུརོ ཀརཝིཀསདྡོ། ཏཏོ སཏབྷཱགེན སཧསྶབྷཱགེན ཙ མདྷུརཏརོ ཏཐཱགཏསྶ སདྡོ, ལོཀེ པན ཀརཝིཀཏོ ཨཉྙསྶ མདྷུརརསྶ ཨབྷཱཝཏོ ‘‘ཀརཝིཀབྷཱཎཱི’’ཏི ཝུཏྟཾ།

    Asandhimittāpi dhammāsokassa devī – ‘‘atthi nu kho, bhante, buddhasaddena sadiso kassaci saddo’’ti saṅghaṃ pucchi. Atthi karavikasakuṇassāti. Kuhiṃ, bhante, sakuṇāti? Himavanteti. Sā rājānaṃ āha, – ‘‘deva, karavikasakuṇaṃ daṭṭhukāmā’’ti. Rājā ‘‘imasmiṃ pañjare nisīditvā karaviko āgacchatū’’ti suvaṇṇapañjaraṃ vissajjesi. Pañjaro gantvā ekassa karavikassa purato aṭṭhāsi. So ‘‘rājāṇāya āgato pañjaro, na sakkā agantu’’nti tattha nisīdi. Pañjaro āgantvā rañño puratova aṭṭhāsi. Karavikaṃ saddaṃ kārāpetuṃ na sakkonti. Atha rājā ‘‘kathaṃ bhaṇe ime saddaṃ karontī’’ti āha? Ñātake disvā devāti. Atha naṃ rājā ādāsehi parikkhipāpesi. So attanova chāyaṃ disvā ‘‘ñātakā me āgatā’’ti maññamāno pakkhena tāḷaṃ datvā mañjussarena maṇivaṃsaṃ dhamamāno viya viravi. Sakalanagare manussā mattā viya laḷiṃsu. Asandhimittā cintesi – ‘‘imassa tāva tiracchānassa evaṃ madhuro saddo, kīdiso nu kho sabbaññutaññāṇasirippattassa bhagavato ahosī’’ti pītiṃ uppādetvā taṃ pītiṃ avijahitvā sattahi jaṅghasatehi saddhiṃ sotāpattiphale patiṭṭhāsi. Evaṃ madhuro karavikasaddo. Tato satabhāgena sahassabhāgena ca madhurataro tathāgatassa saddo, loke pana karavikato aññassa madhurarassa abhāvato ‘‘karavikabhāṇī’’ti vuttaṃ.

    ཨབྷིནཱིལནེཏྟོཏི ན སཀལནཱིལནེཏྟོཝ, ནཱིལཡུཏྟཊྛཱནེ པནསྶ ཨུམཱཔུཔྥསདིསེན ཨཏིཝིསུདྡྷེན ནཱིལཝཎྞེན སམནྣཱགཏཱནི ཨཀྑཱིནི ཧོནྟི། པཱིཏཡུཏྟཊྛཱནེ ཀཎིཀཱརཔུཔྥསདིསེན པཱིཏཝཎྞེན, ལོཧིཏཡུཏྟཊྛཱནེ བནྡྷུཛཱིཝཀཔུཔྥསདིསེན ལོཧིཏཝཎྞེན, སེཏཡུཏྟཊྛཱནེ ཨོསདྷིཏཱརཀསདིསེན སེཏཝཎྞེན, ཀཱལ༹ཡུཏྟཊྛཱནེ ཨདྡཱརིཊྛཀསདིསེན ཀཱལ༹ཝཎྞེན སམནྣཱགཏཱནི སུཝཎྞཝིམཱནེ ཨུགྒྷཱཊིཏམཎིསཱིཧཔཉྫརསདིསཱནི ཁཱཡནྟི།

    Abhinīlanettoti na sakalanīlanettova, nīlayuttaṭṭhāne panassa umāpupphasadisena ativisuddhena nīlavaṇṇena samannāgatāni akkhīni honti. Pītayuttaṭṭhāne kaṇikārapupphasadisena pītavaṇṇena, lohitayuttaṭṭhāne bandhujīvakapupphasadisena lohitavaṇṇena, setayuttaṭṭhāne osadhitārakasadisena setavaṇṇena, kāḷayuttaṭṭhāne addāriṭṭhakasadisena kāḷavaṇṇena samannāgatāni suvaṇṇavimāne ugghāṭitamaṇisīhapañjarasadisāni khāyanti.

    གོཔཁུམོཏི ཨེཏྠ པཁུམནྟི སཀལཾ ཙཀྑུབྷཎྜཾ ཨདྷིཔྤེཏཾ། ཏཾ ཀཱལ༹ཝཙྪཀསྶ བཧལདྷཱཏུཀཾ ཧོཏི, རཏྟཝཙྪཀསྶ ཝིཔྤསནྣཾ, ཏཾམུཧུཏྟཛཱཏརཏྟཝཙྪསདིསཙཀྑུབྷཎྜོཏི ཨཏྠོ། ཨཉྙེསཉྷི ཨཀྑིབྷཎྜཱ ཨཔརིཔུཎྞཱ ཧོནྟི, ཧཏྠིམཱུསིཀཀཱཀཱདཱིནཾ ཨཀྑིསདིསེཧི ཝིནིགྒཏེཧི གམྦྷཱིརེཧིཔི ཨཀྑཱིཧི སམནྣཱགཏཱ ཧོནྟི། ཏཐཱགཏསྶ པན དྷོཝིཏྭཱ མཛྫིཏྭཱ ཋཔིཏམཎིགུལི༹ཀཱ ཝིཡ མུདུསིནིདྡྷནཱིལསུཁུམཔཁུམཱཙིཏཱནི ཨཀྑཱིནི།

    Gopakhumoti ettha pakhumanti sakalaṃ cakkhubhaṇḍaṃ adhippetaṃ. Taṃ kāḷavacchakassa bahaladhātukaṃ hoti, rattavacchakassa vippasannaṃ, taṃmuhuttajātarattavacchasadisacakkhubhaṇḍoti attho. Aññesañhi akkhibhaṇḍā aparipuṇṇā honti, hatthimūsikakākādīnaṃ akkhisadisehi viniggatehi gambhīrehipi akkhīhi samannāgatā honti. Tathāgatassa pana dhovitvā majjitvā ṭhapitamaṇiguḷikā viya mudusiniddhanīlasukhumapakhumācitāni akkhīni.

    ཨུཎྞཱཏི ཨུཎྞལོམཾ། བྷམུཀནྟརེཏི དྭིནྣཾ བྷམུཀཱནཾ ཝེམཛ྄ཛྷེ ནཱསིཀམཏྠཀེཡེཝ ཛཱཏཱ། ཨུགྒནྟྭཱ པན ནལཱཊམཛ྄ཛྷཛཱཏཱ། ཨོདཱཏཱཏི པརིསུདྡྷཱ ཨོསདྷིཏཱརཀཝཎྞཱ། མུདཱུཏི སཔྤིམཎྜེ ཨོསཱདེཏྭཱ ཋཔིཏསཏཝཱརཝིཧཏཀཔྤཱསཔཊལསདིསཱ། ཏཱུལསནྣིབྷཱཏི སིམྦལིཏཱུལལཏཱཏཱུལསམཱནཱ, ཨཡམསྶཱ ཨོདཱཏཏཱཡ ཨུཔམཱ། སཱ པནེསཱ ཀོཊིཡཾ གཧེཏྭཱ ཨཱཀཌྜྷིཡམཱནཱ ཨུཔཌྜྷབཱཧུཔྤམཱཎཱ ཧོཏི, ཝིསྶཊྛཱ དཀྑིཎཱཝཊྚཝསེན ཨཱཝཊྚིཏྭཱ ཨུདྡྷགྒཱ ཧུཏྭཱ སནྟིཊྛཏི, སུཝཎྞཕལཀམཛ྄ཛྷེ ཋཔིཏརཛཏཔུཔྥུལ༹ཀཱ ཝིཡ སུཝཎྞགྷཊཏོ ནིཀྑམམཱནཱ ཁཱིརདྷཱརཱ ཝིཡ ཨརུཎཔྤབྷཱརཉྫིཏེ གམནཏལེ ཨོསདྷིཏཱརཀཱ ཝིཡ ཙ ཨཏིམནོཧརཱཡ སིརིཡཱ ཝིརོཙཏི།

    Uṇṇāti uṇṇalomaṃ. Bhamukantareti dvinnaṃ bhamukānaṃ vemajjhe nāsikamatthakeyeva jātā. Uggantvā pana nalāṭamajjhajātā. Odātāti parisuddhā osadhitārakavaṇṇā. Mudūti sappimaṇḍe osādetvā ṭhapitasatavāravihatakappāsapaṭalasadisā. Tūlasannibhāti simbalitūlalatātūlasamānā, ayamassā odātatāya upamā. Sā panesā koṭiyaṃ gahetvā ākaḍḍhiyamānā upaḍḍhabāhuppamāṇā hoti, vissaṭṭhā dakkhiṇāvaṭṭavasena āvaṭṭitvā uddhaggā hutvā santiṭṭhati, suvaṇṇaphalakamajjhe ṭhapitarajatapupphuḷakā viya suvaṇṇaghaṭato nikkhamamānā khīradhārā viya aruṇappabhārañjite gamanatale osadhitārakā viya ca atimanoharāya siriyā virocati.

    ཨུཎྷཱིསསཱིསོཏི ཨིདཾ པརིཔུཎྞནལཱཊཏཉྩེཝ པརིཔུཎྞསཱིསཏཉྩཱཏི དྭེ ཨཏྠཝསེ པཊིཙྩ ཝུཏྟཾ། ཏཐཱགཏསྶ ཧི དཀྑིཎཀཎྞཙཱུལི༹ཀཏོ པཊྛཱཡ མཾསཔཊལཾ ཨུཊྛཧིཏྭཱ སཀལཾ ནལཱཊཾ ཚཱདཡམཱནཾ པཱུརཡམཱནཾ གནྟྭཱ ཝཱམཀཎྞཙཱུལི༹ཀཱཡ པཏིཊྛིཏཾ, རཉྙོ བདྡྷཨུཎྷཱིསཔཊྚོ ཝིཡ ཝིརོཙཏི། པཙྪིམབྷཝིཀབོདྷིསཏྟཱནཾ ཀིར ཨིམཾ ལཀྑཎཾ ཝིདིཏྭཱ རཱཛཱུནཾ ཨུཎྷཱིསཔཊྚཾ ཨཀཾསུ, ཨཡཾ ཏཱཝ ཨེཀོ ཨཏྠོ། ཨཉྙེ པན ཛནཱ ཨཔརིཔུཎྞསཱིསཱ ཧོནྟི, ཀེཙི ཀཔྤསཱིསཱ, ཀེཙི ཕལསཱིསཱ, ཀེཙི ཨཊྛིསཱིསཱ, ཀེཙི ཏུམྦསཱིསཱ, ཀེཙི པབྦྷཱརསཱིསཱ། ཏཐཱགཏསྶ པན ཨཱརགྒེན ཝཊྚེཏྭཱ ཋཔིཏཾ ཝིཡ སུཔརིཔུཎྞཾ ཨུདཀཔུཔྥུལ༹སདིསཾ སཱིསཾ ཧོཏི། ཏཏྠ པུརིམནཡེན ཨུཎྷཱིསཝེཋིཏསཱིསོ ཝིཡཱཏི ཨུཎྷཱིསསཱིསོ། དུཏིཡནཡེན ཨུཎྷཱིསཾ ཝིཡ སབྦཏྠ པརིམཎྜལསཱིསོཏི ཨུཎྷཱིསསཱིསོ།

    Uṇhīsasīsoti idaṃ paripuṇṇanalāṭatañceva paripuṇṇasīsatañcāti dve atthavase paṭicca vuttaṃ. Tathāgatassa hi dakkhiṇakaṇṇacūḷikato paṭṭhāya maṃsapaṭalaṃ uṭṭhahitvā sakalaṃ nalāṭaṃ chādayamānaṃ pūrayamānaṃ gantvā vāmakaṇṇacūḷikāya patiṭṭhitaṃ, rañño baddhauṇhīsapaṭṭo viya virocati. Pacchimabhavikabodhisattānaṃ kira imaṃ lakkhaṇaṃ viditvā rājūnaṃ uṇhīsapaṭṭaṃ akaṃsu, ayaṃ tāva eko attho. Aññe pana janā aparipuṇṇasīsā honti, keci kappasīsā, keci phalasīsā, keci aṭṭhisīsā, keci tumbasīsā, keci pabbhārasīsā. Tathāgatassa pana āraggena vaṭṭetvā ṭhapitaṃ viya suparipuṇṇaṃ udakapupphuḷasadisaṃ sīsaṃ hoti. Tattha purimanayena uṇhīsaveṭhitasīso viyāti uṇhīsasīso. Dutiyanayena uṇhīsaṃ viya sabbattha parimaṇḍalasīsoti uṇhīsasīso.

    ཨིམཱནི པན མཧཱཔུརིསལཀྑཎཱནི ཀམྨཾ ཀམྨསརིཀྑཀཾ ལཀྑཎཾ ལཀྑཎཱནིསཾསནྟི ཨིམེ ཙཏྟཱརོ ཀོཊྛཱསེ ཨེཀེཀསྨིཾ ལཀྑཎེ དསྶེཏྭཱ ཀཐིཏཱནི སུཀཐིཏཱནི ཧོནྟི། ཏསྨཱ བྷགཝཏཱ ལཀྑཎསུཏྟེ (དཱི॰ ནི॰ ༣.༢༠༠-༢༠༢) ཝུཏྟཱནི ཨིམཱནི ཀམྨཱདཱིནི དསྶེཏྭཱ ཀཐེཏབྦཱནི ། སུཏྟཝསེན ཝིནིཙྪིཏུཾ ཨསཀྐོནྟེན སུམངྒལཝིལཱསིནིཡཱ དཱིགྷནིཀཱཡཊྛཀཐཱཡ ཏསྶེཝ སུཏྟསྶ ཝཎྞནཱཡ ཝུཏྟནཡེན གཧེཏབྦཱནི།

    Imāni pana mahāpurisalakkhaṇāni kammaṃ kammasarikkhakaṃ lakkhaṇaṃ lakkhaṇānisaṃsanti ime cattāro koṭṭhāse ekekasmiṃ lakkhaṇe dassetvā kathitāni sukathitāni honti. Tasmā bhagavatā lakkhaṇasutte (dī. ni. 3.200-202) vuttāni imāni kammādīni dassetvā kathetabbāni . Suttavasena vinicchituṃ asakkontena sumaṅgalavilāsiniyā dīghanikāyaṭṭhakathāya tasseva suttassa vaṇṇanāya vuttanayena gahetabbāni.

    ཨིམེཧི ཁོ, བྷོ, སོ བྷཝཾ གོཏམོཏི, བྷོ ཨཱཙརིཡ, ཨིམེཧི དྭཏྟིཾསམཧཱཔུརིསལཀྑཎེཧི སོ བྷཝཾ གོཏམོ སམནྣཱགཏོ དེཝནགརེ སམུསྶིཏརཏནཝིཙིཏྟཾ སུཝཎྞཏོརཎཾ ཝིཡ ཡོཛནསཏུབྦེདྷོ སབྦཔཱལིཕུལློ པཱརིཙྪཏྟཀོ ཝིཡ སེལནྟརམྷི སུཔུཔྥིཏསཱལརུཀྑོ ཝིཡ ཏཱརཱགཎཔཊིམཎྜིཏགགནཏལམིཝ ཙ ཨཏྟནོ སིརིཝིབྷཝེན ལོཀཾ ཨཱལོཀཾ ཀུརུམཱནོ ཝིཡ ཙརཏཱིཏི ཨིམཏྠམྤི དཱིཔེཏྭཱ ཀིརིཡཱཙཱརཾ ཨཱཙིཀྑིཏུཾ གཙྪནྟོ ཁོ པནཱཏིཨཱདིམཱཧ།

    Imehi kho, bho, so bhavaṃ gotamoti, bho ācariya, imehi dvattiṃsamahāpurisalakkhaṇehi so bhavaṃ gotamo samannāgato devanagare samussitaratanavicittaṃ suvaṇṇatoraṇaṃ viya yojanasatubbedho sabbapāliphullo pāricchattako viya selantaramhi supupphitasālarukkho viya tārāgaṇapaṭimaṇḍitagaganatalamiva ca attano sirivibhavena lokaṃ ālokaṃ kurumāno viya caratīti imatthampi dīpetvā kiriyācāraṃ ācikkhituṃ gacchanto kho panātiādimāha.

    ༣༨༧. དཀྑིཎེནཱཏི བུདྡྷཱནཉྷི ཋཏྭཱ ཝཱ ནིསཱིདིཏྭཱ ཝཱ ནིཔཛྫིཏྭཱ ཝཱ གམནཾ ཨབྷིནཱིཧརནྟཱནཾ དཀྑིཎཔཱདོཝ པུརཏོ ཧོཏི། སཏཏཔཱཊིཧཱརིཡཾ ཀིརེཏཾ། ནཱཏིདཱུརེ པཱདཾ ཨུདྡྷརཏཱིཏི ཏཾ དཀྑིཎཔཱདཾ ན ཨཏིདཱུརེ ཋཔེསྶཱམཱིཏི ཨུདྡྷརཏི། ཨཏིདཱུརཉྷི ཨབྷིཧརིཡམཱནེ དཀྑིཎཔཱདེན ཝཱམཔཱདོ ཨཱཀཌྜྷིཡམཱནོ གཙྪེཡྻ, དཀྑིཎཔཱདོཔི དཱུརཾ གནྟུཾ ན སཀྐུཎེཡྻ, ཨཱསནྣེཡེཝ པཏིཊྛཧེཡྻ, ཨེཝཾ སཏི པདཝིཙྪེདོ ནཱམ ཧོཏི། དཀྑིཎཔཱདེ པན པམཱཎེནེཝ ཨུདྡྷཏེ ཝཱམཔཱདོཔི པམཱཎེནེཝ ཨུདྡྷརིཡཏི, པམཱཎེན ཨུདྡྷཏོ པཏིཊྛཧནྟོཔི པམཱཎེཡེཝ པཏིཊྛཱཏི། ཨེཝམནེན ཏཐཱགཏསྶ དཀྑིཎཔཱདཀིཙྩཾ ཝཱམཔཱདེན ནིཡམིཏཾ, ཝཱམཔཱདཀིཙྩཾ དཀྑིཎཔཱདེན ནིཡམིཏནྟི ཝེདིཏབྦཾ།

    387.Dakkhiṇenāti buddhānañhi ṭhatvā vā nisīditvā vā nipajjitvā vā gamanaṃ abhinīharantānaṃ dakkhiṇapādova purato hoti. Satatapāṭihāriyaṃ kiretaṃ. Nātidūrepādaṃ uddharatīti taṃ dakkhiṇapādaṃ na atidūre ṭhapessāmīti uddharati. Atidūrañhi abhihariyamāne dakkhiṇapādena vāmapādo ākaḍḍhiyamāno gaccheyya, dakkhiṇapādopi dūraṃ gantuṃ na sakkuṇeyya, āsanneyeva patiṭṭhaheyya, evaṃ sati padavicchedo nāma hoti. Dakkhiṇapāde pana pamāṇeneva uddhate vāmapādopi pamāṇeneva uddhariyati, pamāṇena uddhato patiṭṭhahantopi pamāṇeyeva patiṭṭhāti. Evamanena tathāgatassa dakkhiṇapādakiccaṃ vāmapādena niyamitaṃ, vāmapādakiccaṃ dakkhiṇapādena niyamitanti veditabbaṃ.

    ནཱཏིསཱིགྷནྟི དིཝཱ ཝིཧཱརབྷཏྟཏྠཱཡ གཙྪནྟོ བྷིཀྑུ ཝིཡ ན ཨཏིསཱིགྷཾ གཙྪཏི། ནཱཏིསཎིཀནྟི ཡཐཱ པཙྪཏོ ཨཱགཙྪནྟོ ཨོཀཱསཾ ན ལབྷཏི, ཨེཝཾ ན ཨཏིསཎིཀཾ གཙྪཏི། ཨདྡུཝེན ཨདྡུཝནྟི ཛཎྞུཀེན ཛཎྞུཀཾ, ན སཏྠིཾ ཨུནྣཱམེཏཱིཏི གམྦྷཱིརེ ཨུདཀེ གཙྪནྟོ ཝིཡ ན ཨཱུརུཾ ཨུནྣཱམེཏི། ན ཨོནཱམེཏཱིཏི རུཀྑསཱཁཱཚེདནདཎྜངྐུསཔཱདོ ཝིཡ ན པཙྪཏོ ཨོསཀྐཱཔེཏི། ན སནྣཱམེཏཱིཏི ཨོབདྡྷཱནཱབདྡྷཊྛཱནེཧི པཱདཾ ཀོཊྚེནྟོ ཝིཡ ན ཐདྡྷཾ ཀརོཏི། ན ཝིནཱམེཏཱིཏི ཡནྟརཱུཔཀཾ ཀཱིལཱ༹པེནྟོ ཝིཡ ན ཨིཏོ ཙིཏོ ཙ ཙཱལེཏི། ཨདྷརཀཱཡོཝཱཏི ཧེཊྛིམཀཱཡོཝ ཨིཉྫཏི, ཨུཔརིམཀཱཡོ ནཱཝཱཡ ཋཔིཏསུཝཎྞཔཊིམཱ ཝིཡ ནིཙྩལོ ཧོཏི། དཱུརེ ཋཏྭཱ ཨོལོཀེནྟོ ཧི བུདྡྷཱནཾ ཋིཏབྷཱཝཾ ཝཱ གམནབྷཱཝཾ ཝཱ ན ཛཱནཱཏི ། ཀཱཡབལེནཱཏི བཱཧཱ ཁིཔནྟོ སརཱིརཏོ སེདེཧི མུཙྩནྟེཧི ན ཀཱཡབལེན གཙྪཏི། སབྦཀཱཡེནེཝཱཏི གཱིཝཾ ཨཔརིཝཏྟེཏྭཱ རཱཧུལོཝཱདེ ཝུཏྟནཱགཱཔལོཀིཏཝསེནེཝ ཨཔལོཀེཏི།

    Nātisīghanti divā vihārabhattatthāya gacchanto bhikkhu viya na atisīghaṃ gacchati. Nātisaṇikanti yathā pacchato āgacchanto okāsaṃ na labhati, evaṃ na atisaṇikaṃ gacchati. Adduvena adduvanti jaṇṇukena jaṇṇukaṃ, nasatthiṃ unnāmetīti gambhīre udake gacchanto viya na ūruṃ unnāmeti. Na onāmetīti rukkhasākhāchedanadaṇḍaṅkusapādo viya na pacchato osakkāpeti. Na sannāmetīti obaddhānābaddhaṭṭhānehi pādaṃ koṭṭento viya na thaddhaṃ karoti. Navināmetīti yantarūpakaṃ kīḷāpento viya na ito cito ca cāleti. Adharakāyovāti heṭṭhimakāyova iñjati, uparimakāyo nāvāya ṭhapitasuvaṇṇapaṭimā viya niccalo hoti. Dūre ṭhatvā olokento hi buddhānaṃ ṭhitabhāvaṃ vā gamanabhāvaṃ vā na jānāti . Kāyabalenāti bāhā khipanto sarīrato sedehi muccantehi na kāyabalena gacchati. Sabbakāyenevāti gīvaṃ aparivattetvā rāhulovāde vuttanāgāpalokitavaseneva apaloketi.

    ན ཨུདྡྷནྟིཨཱདཱིསུ ནཀྑཏྟཱནི གཎེནྟོ ཝིཡ ན ཨུདྡྷཾ ཨུལློཀེཏི, ནཊྛཾ ཀཱཀཎིཀཾ ཝཱ མཱསཀཾ ཝཱ པརིཡེསནྟོ ཝིཡ ན ཨདྷོ ཨོལོཀེཏི, ན ཧཏྠིཨསྶཱདཡོ པསྶནྟོ ཝིཡ ཨིཏོ ཙིཏོ ཙ ཝིཔེཀྑམཱནོ གཙྪཏི། ཡུགམཏྟནྟི ནཝཝིདཏྠིམཏྟེ ཙཀྑཱུནི ཋཔེཏྭཱ གཙྪནྟོ ཡུགམཏྟཾ པེཀྑཏི ནཱམ, བྷགཝཱཔི ཡུགེ ཡུཏྟོ སུདནྟཨཱཛཱནཱིཡོ ཝིཡ ཨེཏྟཀཾ པསྶནྟོ གཙྪཏི། ཏཏོ ཙསྶ ཨུཏྟརཱིཏི ཡུགམཏྟཏོ པརཾ ན པསྶཏཱིཏི ན ཝཏྟབྦོ། ན ཧི ཀུཊྚཾ ཝཱ ཀཝཱཊཾ ཝཱ གཙྪོ ཝཱ ལཏཱ ཝཱ ཨཱཝརིཏུཾ སཀྐོཏི, ཨཐ ཁྭསྶ ཨནཱཝརཎཉཱཎསྶ ཨནེཀཱནི ཙཀྐཝཱལ༹སཧསྶཱནི ཨེཀངྒཎཱནེཝ ཧོནྟི། ཨནྟརགྷརནྟི ཧེཊྛཱ མཧཱསཀུལུདཱཡིསུཏྟེ ཨིནྡཁཱིལཏོ པཊྛཱཡ ཨནྟརགྷརཾ, ཨིདྷ གྷརཨུམྨཱརཏོ པཊྛཱཡ ཝེདིཏབྦཾ། ན ཀཱཡནྟིཨཱདི པཀཏིཨིརིཡཔཐེནེཝ པཝིསཏཱིཏི དསྶནཏྠཾ ཝུཏྟཾ། དལིདྡམནུསྶཱནཾ ནཱིཙགྷརཀཾ པཝིསནྟེཔི ཧི ཏཐཱགཏེ ཚདནཾ ཝཱ ཨུགྒཙྪཏི, པཐཝཱི ཝཱ ཨོགཙྪཏི, བྷགཝཱ པན པཀཏིགམནེནེཝ གཙྪཏི། ནཱཏིདཱུརེཏི ཨཏིདཱུརེ པརིཝཏྟནྟེན ཧི ཨེཀཾ དྭེ པདཝཱརེ པིཊྛིབྷཱགེན གནྟྭཱ ནིསཱིདིཏབྦཾ ཧོཏི། ནཱཙྩཱསནྣེཏི ཨཙྩཱསནྣེ པརིཝཏྟནྟེན ཨེཀཾ དྭེ པདཝཱརེ པུརཏོ གནྟྭཱ ནིསཱིདིཏབྦཾ ཧོཏི། ཏསྨཱ ཡསྨིཾ པདཝཱརེ ཋིཏེན པུརཏོ ཝཱ པཙྪཏོ ཝཱ ཨགནྟྭཱ ནིསཱིདིཏབྦཾ ཧོཏི, ཏཏྠ པརིཝཏྟཏི།

    Na uddhantiādīsu nakkhattāni gaṇento viya na uddhaṃ ulloketi, naṭṭhaṃ kākaṇikaṃ vā māsakaṃ vā pariyesanto viya na adho oloketi, na hatthiassādayo passanto viya ito cito ca vipekkhamāno gacchati. Yugamattanti navavidatthimatte cakkhūni ṭhapetvā gacchanto yugamattaṃ pekkhati nāma, bhagavāpi yuge yutto sudantaājānīyo viya ettakaṃ passanto gacchati. Tato cassa uttarīti yugamattato paraṃ na passatīti na vattabbo. Na hi kuṭṭaṃ vā kavāṭaṃ vā gaccho vā latā vā āvarituṃ sakkoti, atha khvassa anāvaraṇañāṇassa anekāni cakkavāḷasahassāni ekaṅgaṇāneva honti. Antaragharanti heṭṭhā mahāsakuludāyisutte indakhīlato paṭṭhāya antaragharaṃ, idha gharaummārato paṭṭhāya veditabbaṃ. Nakāyantiādi pakatiiriyapatheneva pavisatīti dassanatthaṃ vuttaṃ. Daliddamanussānaṃ nīcagharakaṃ pavisantepi hi tathāgate chadanaṃ vā uggacchati, pathavī vā ogacchati, bhagavā pana pakatigamaneneva gacchati. Nātidūreti atidūre parivattantena hi ekaṃ dve padavāre piṭṭhibhāgena gantvā nisīditabbaṃ hoti. Nāccāsanneti accāsanne parivattantena ekaṃ dve padavāre purato gantvā nisīditabbaṃ hoti. Tasmā yasmiṃ padavāre ṭhitena purato vā pacchato vā agantvā nisīditabbaṃ hoti, tattha parivattati.

    པཱཎིནཱཏི ཀཊིཝཱཏཱབཱདྷིཀོ ཝིཡ ན ཨཱསནཾ ཧཏྠེཧི གཧེཏྭཱ ནིསཱིདཏི། པཀྑིཔཏཱིཏི ཡོ ཀིཉྩི ཀམྨཾ ཀཏྭཱ ཀཱིལ༹ནྟོ ཋིཏཀོཝ པཏཏི, ཡོཔི ཨོརིམཾ ཨངྒཾ ནིསྶཱཡ ནིསིནྣོ གྷཾསནྟོ ཡཱཝ པཱརིམངྒཱ གཙྪཏི, པཱརིམངྒཾ ཝཱ ནིསྶཱཡ ནིསིནྣོ ཏཐེཝ ཡཱཝ ཨོརིམངྒཱ ཨཱགཙྪཏི, སབྦོ སོ ཨཱསནེ ཀཱཡཾ པཀྑིཔཏི ནཱམ། བྷགཝཱ པན ཨེཝཾ ཨཀཏྭཱ ཨཱསནསྶ མཛ྄ཛྷེ ཨོལམྦཀཾ དྷཱརེནྟོ ཝིཡ ཏཱུལཔིཙུཾ ཋཔེནྟོ ཝིཡ སཎིཀཾ ནིསཱིདཏི། ཧཏྠཀུཀྐུཙྩནྟི པཏྟམུཁཝཊྚིཡཾ ཨུདཀབིནྡུཋཔནཾ མཀྑིཀབཱིཛནིཡཱ པཎྞཙྪེདནཕཱལནཱདི ཧཏྠེན ཨསཾཡཏཀརཎཾ། པཱདཀུཀྐུཙྩནྟི པཱདེན བྷཱུམིགྷཾསནཱདི ཨསཾཡཏཀརཎཾ།

    Pāṇināti kaṭivātābādhiko viya na āsanaṃ hatthehi gahetvā nisīdati. Pakkhipatīti yo kiñci kammaṃ katvā kīḷanto ṭhitakova patati, yopi orimaṃ aṅgaṃ nissāya nisinno ghaṃsanto yāva pārimaṅgā gacchati, pārimaṅgaṃ vā nissāya nisinno tatheva yāva orimaṅgā āgacchati, sabbo so āsane kāyaṃ pakkhipati nāma. Bhagavā pana evaṃ akatvā āsanassa majjhe olambakaṃ dhārento viya tūlapicuṃ ṭhapento viya saṇikaṃ nisīdati. Hatthakukkuccanti pattamukhavaṭṭiyaṃ udakabinduṭhapanaṃ makkhikabījaniyā paṇṇacchedanaphālanādi hatthena asaṃyatakaraṇaṃ. Pādakukkuccanti pādena bhūmighaṃsanādi asaṃyatakaraṇaṃ.

    ན ཚམྦྷཏཱིཏི ན བྷཱཡཏི། ན ཀམྤཏཱིཏི ན ཨོསཱིདཏི། ན ཝེདྷཏཱིཏི ན ཙལཏི། ན པརིཏསྶཏཱིཏི བྷཡཔརིཏསྶནཱཡཔི ཏཎྷཱཔརིཏསྶནཱཡཔི ན པརིཏསྶཏི། ཨེཀཙྩོ ཧི དྷམྨཀཐཱདཱིནཾ ཨཏྠཱཡ ཨཱགནྟྭཱ མནུསྶེསུ ཝནྡིཏྭཱ ཋིཏེསུ ‘‘སཀྑིསྶཱམི ནུ ཁོ ཏེསཾ ཙིཏྟཾ གཎྷནྟོ དྷམྨཾ ཝཱ ཀཐེཏུཾ, པཉྷཾ ཝཱ པུཙྪིཏོ ཝིསྶཛྫེཏུཾ, བྷཏྟཱནུམོདནཾ ཝཱ ཀཱཏུ’’ནྟི བྷཡཔརིཏསྶནཱཡ པརིཏསྶཏི། ཨེཀཙྩོ ‘‘མནཱཔཱ ནུ ཁོ མེ ཡཱགུ ཨཱགཙྪིསྶཏི, མནཱཔཾ ཨནྟརཁཛྫཀ’’ནྟི ཝཱ ཏཎྷཱཔརིཏསྶནཱཡ པརིཏསྶཏི། ཏདུབྷཡམྤི ཏསྶ ནཏྠཱིཏི ན པརིཏསྶཏི། ཝིཝེཀཱཝཊྚོཏི ཝིཝེཀེ ནིབྦཱནེ ཨཱཝཊྚམཱནསོ ཧུཏྭཱ། ཝིཝེཀཝཏྟོཏིཔི པཱཋོ, ཝིཝེཀཝཏྟཡུཏྟོ ཧུཏྭཱཏི ཨཏྠོ། ཝིཝེཀཝཏྟཾ ནཱམ ཀཏབྷཏྟཀིཙྩསྶ བྷིཀྑུནོ དིཝཱཝིཧཱརེ སམཐཝིཔསྶནཱཝསེན མཱུལཀམྨཊྛཱནཾ གཧེཏྭཱ པལླངྐཾ ཨཱབྷུཛིཏྭཱ ནིསཱིདནཾ། ཨེཝཾ ནིསིནྣསྶ ཧི ཨིརིཡཱཔཐོ ཨུཔསནྟོ ཧོཏི།

    Na chambhatīti na bhāyati. Na kampatīti na osīdati. Na vedhatīti na calati. Naparitassatīti bhayaparitassanāyapi taṇhāparitassanāyapi na paritassati. Ekacco hi dhammakathādīnaṃ atthāya āgantvā manussesu vanditvā ṭhitesu ‘‘sakkhissāmi nu kho tesaṃ cittaṃ gaṇhanto dhammaṃ vā kathetuṃ, pañhaṃ vā pucchito vissajjetuṃ, bhattānumodanaṃ vā kātu’’nti bhayaparitassanāya paritassati. Ekacco ‘‘manāpā nu kho me yāgu āgacchissati, manāpaṃ antarakhajjaka’’nti vā taṇhāparitassanāya paritassati. Tadubhayampi tassa natthīti na paritassati. Vivekāvaṭṭoti viveke nibbāne āvaṭṭamānaso hutvā. Vivekavattotipi pāṭho, vivekavattayutto hutvāti attho. Vivekavattaṃ nāma katabhattakiccassa bhikkhuno divāvihāre samathavipassanāvasena mūlakammaṭṭhānaṃ gahetvā pallaṅkaṃ ābhujitvā nisīdanaṃ. Evaṃ nisinnassa hi iriyāpatho upasanto hoti.

    ན པཏྟཾ ཨུནྣཱམེཏཱིཏིཨཱདཱིསུ ཨེཀཙྩོ པཏྟམུཁཝཊྚིཡཱ ཨུདཀདཱནཾ ཨཱཧརནྟོ ཝིཡ པཏྟཾ ཨུནྣཱམེཏི, ཨེཀོ པཱདཔིཊྛིཡཾ ཋཔེནྟོ ཝིཡ ཨོནཱམེཏི, ཨེཀོ བདྡྷཾ ཀཏྭཱ གཎྷཱཏི, ཨེཀོ ཨིཏོ ཙིཏོ ཙ ཕནྡཱཔེཏི, ཨེཝཾ ཨཀཏྭཱ ཨུབྷོཧི ཧཏྠེཧི གཧེཏྭཱ ཨཱིསཀཾ ནཱམེཏྭཱ ཨུདཀཾ པཊིགྒཎྷཱཏཱིཏི ཨཏྠོ། ན སམྤརིཝཏྟཀནྟི པརིཝཏྟེཏྭཱ པཋམམེཝ པཏྟཔིཊྛིཾ ན དྷོཝཏི། ནཱཏིདཱུརེཏི ཡཐཱ ནིསིནྣཱསནཏོ དཱུརེ པཏཏི, ན ཨེཝཾ ཚཌྜེཏི། ནཱཙྩཱསནྣེཏི པཱདམཱུལེཡེཝ ན ཚཌྜེཏི། ཝིཙྪཌྜཡམཱནོཏི ཝིཀིརནྟོ, ཡཐཱ པཊིགྒཱཧཀོ ཏེམཏི, ན ཨེཝཾ ཚཌྜེཏི།

    Na pattaṃ unnāmetītiādīsu ekacco pattamukhavaṭṭiyā udakadānaṃ āharanto viya pattaṃ unnāmeti, eko pādapiṭṭhiyaṃ ṭhapento viya onāmeti, eko baddhaṃ katvā gaṇhāti, eko ito cito ca phandāpeti, evaṃ akatvā ubhohi hatthehi gahetvā īsakaṃ nāmetvā udakaṃ paṭiggaṇhātīti attho. Na samparivattakanti parivattetvā paṭhamameva pattapiṭṭhiṃ na dhovati. Nātidūreti yathā nisinnāsanato dūre patati, na evaṃ chaḍḍeti. Nāccāsanneti pādamūleyeva na chaḍḍeti. Vicchaḍḍayamānoti vikiranto, yathā paṭiggāhako temati, na evaṃ chaḍḍeti.

    ནཱཏིཐོཀནྟི ཡཐཱ ཨེཀཙྩོ པཱཔིཙྪོ ཨཔྤིཙྪཏཾ དསྶེནྟོ མུཊྛིམཏྟམེཝ གཎྷཱཏི, ན ཨེཝཾ། ཨཏིབཧུནྟི ཡཱཔནམཏྟཏོ ཨཏིརེཀཾ། བྱཉྫནམཏྟཱཡཱཏི བྱཉྫནསྶ མཏྟཱ ནཱམ ཨོདནཏོ ཙཏུཏྠོ བྷཱགོ། ཨེཀཙྩོ ཧི བྷཏྟེ མནཱཔེ བྷཏྟཾ བཧུཾ གཎྷཱཏི, བྱཉྫནེ མནཱཔེ བྱཉྫནཾ བཧུཾ། སཏྠཱ པན ཏཐཱ ན གཎྷཱཏི། ན ཙ བྱཉྫནེནཱཏི ཨམནཱཔཉྷི བྱཉྫནཾ ཋཔེཏྭཱ བྷཏྟམེཝ བྷུཉྫནྟོ, བྷཏྟཾ ཝཱ ཋཔེཏྭཱ བྱཉྫནམེཝ ཁཱདནྟོ བྱཉྫནེན ཨཱལོཔཾ ཨཏིནཱམེཏི ནཱམ། སཏྠཱ ཨེཀནྟརིཀཾ བྱཉྫནཾ གཎྷཱཏི, བྷཏྟམྤི བྱཉྫནམྤི ཨེཀཏོཝ ནིཊྛནྟི། དྭཏྟིཀྑཏྟུནྟི ཏཐཱགཏསྶ ཧི པུཐུཛིཝ྄ཧཱཡ དནྟཱནཾ ཨུཔནཱིཏབྷོཛནཾ དྭཏྟིཀྑཏྟུཾ དནྟེཧི ཕུཊྛམཏྟམེཝ སཎྷཀརཎཱིཡཔིཊྛཝིལེཔནཾ ཝིཡ ཧོཏི, ཏསྨཱ ཨེཝམཱཧ། ན མུཁེ ཨཝསིཊྛཱཏི པོཀྑརཔཏྟེ པཏིཏཨུདཀབིནྡུ ཝིཡ ཝིནིཝཏྟིཏྭཱ པརགལམེཝ ཡཱཏི, ཏསྨཱ ཨཝསིཊྛཱ ན ཧོཏི། རསཔཊིསཾཝེདཱིཏི མདྷུརཏིཏྟཀདུཀཱདིརསཾ ཛཱནཱཏི། བུདྡྷཱནཉྷི ཨནྟམསོ པཱནཱིཡེཔི དིབྦོཛཱ པཀྑིཏྟཱཝ ཧོཏི, ཏེན ནེསཾ སབྦཏྠེཝ རསོ པཱཀཊོ ཧོཏི, རསགེདྷོ པན ནཏྠི།

    Nātithokanti yathā ekacco pāpiccho appicchataṃ dassento muṭṭhimattameva gaṇhāti, na evaṃ. Atibahunti yāpanamattato atirekaṃ. Byañjanamattāyāti byañjanassa mattā nāma odanato catuttho bhāgo. Ekacco hi bhatte manāpe bhattaṃ bahuṃ gaṇhāti, byañjane manāpe byañjanaṃ bahuṃ. Satthā pana tathā na gaṇhāti. Na ca byañjanenāti amanāpañhi byañjanaṃ ṭhapetvā bhattameva bhuñjanto, bhattaṃ vā ṭhapetvā byañjanameva khādanto byañjanena ālopaṃ atināmeti nāma. Satthā ekantarikaṃ byañjanaṃ gaṇhāti, bhattampi byañjanampi ekatova niṭṭhanti. Dvattikkhattunti tathāgatassa hi puthujivhāya dantānaṃ upanītabhojanaṃ dvattikkhattuṃ dantehi phuṭṭhamattameva saṇhakaraṇīyapiṭṭhavilepanaṃ viya hoti, tasmā evamāha. Na mukhe avasiṭṭhāti pokkharapatte patitaudakabindu viya vinivattitvā paragalameva yāti, tasmā avasiṭṭhā na hoti. Rasapaṭisaṃvedīti madhuratittakadukādirasaṃ jānāti. Buddhānañhi antamaso pānīyepi dibbojā pakkhittāva hoti, tena nesaṃ sabbattheva raso pākaṭo hoti, rasagedho pana natthi.

    ཨཊྛངྒསམནྣཱགཏནྟི ‘‘ནེཝ དཝཱཡཱ’’ཏི ཝུཏྟེཧི ཨཊྛཧི ཨངྒེཧི སམནྣཱགཏཾ། ཝིསུདྡྷིམགྒེ པནསྶ ཝིནིཙྪཡོ ཨཱགཏོཏི སབྦཱསཝསུཏྟེ ཝུཏྟམེཏཾ། ཧཏྠེསུ དྷོཏེསཱུཏི སཏྠཱ ཀིཾ ཀརོཏི? པཋམཾ པཏྟསྶ གཧཎཊྛཱནཾ དྷོཝཏི། ཏཏྠ པཏྟཾ གཧེཏྭཱ སུཁུམཛཱལཧཏྠཾ པེསེཏྭཱ དྭེ ཝཱརེ སཉྩཱརེཏི། ཨེཏྟཱཝཏཱ པོཀྑརཔཏྟེ པཏིཏཨུདཀཾ ཝིཡ ཝིནིཝཏྟིཏྭཱ གཙྪཏི། ན ཙ ཨནཏྠིཀོཏི ཡཐཱ ཨེཀཙྩོ པཏྟཾ ཨཱདྷཱརཀེ ཋཔེཏྭཱ པཏྟེ ཨུདཀཾ ན པུཉྪཏི, རཛེ པཏནྟེ ཨཛ྄ཛྷུཔེཀྑཏི, ན ཨེཝཾ ཀརོཏི། ན ཙ ཨཏིཝེལཱནུརཀྑཱིཏི ཡཐཱ ཨེཀཙྩོ པམཱཎཱཏིཀྐནྟཾ ཨཱརཀྑཾ ཋཔེཏི, བྷུཉྫིཏྭཱ ཝཱ པཏྟེ ཨུདཀཾ པུཉྪིཏྭཱ ཙཱིཝརབྷོགནྟརཾ པཝེསེཏྭཱ པཏྟཾ ཨུདརེན ཨཀྐམིཏྭཱ གཎྷཱཏི, ན ཨེཝཾ ཀརོཏི།

    Aṭṭhaṅgasamannāgatanti ‘‘neva davāyā’’ti vuttehi aṭṭhahi aṅgehi samannāgataṃ. Visuddhimagge panassa vinicchayo āgatoti sabbāsavasutte vuttametaṃ. Hatthesu dhotesūti satthā kiṃ karoti? Paṭhamaṃ pattassa gahaṇaṭṭhānaṃ dhovati. Tattha pattaṃ gahetvā sukhumajālahatthaṃ pesetvā dve vāre sañcāreti. Ettāvatā pokkharapatte patitaudakaṃ viya vinivattitvā gacchati. Na ca anatthikoti yathā ekacco pattaṃ ādhārake ṭhapetvā patte udakaṃ na puñchati, raje patante ajjhupekkhati, na evaṃ karoti. Na ca ativelānurakkhīti yathā ekacco pamāṇātikkantaṃ ārakkhaṃ ṭhapeti, bhuñjitvā vā patte udakaṃ puñchitvā cīvarabhogantaraṃ pavesetvā pattaṃ udarena akkamitvā gaṇhāti, na evaṃ karoti.

    ན ཙ ཨནུམོདནསྶཱཏི ཡོ ཧི བྷུཏྟམཏྟོཝ དཱརཀེསུ བྷཏྟཏྠཱཡ རོདནྟེསུ ཚཱཏཛ྄ཛྷཏྟེསུ མནུསྶེསུ བྷུཉྫིཏྭཱ ཨནཱགཏེསྭེཝ ཨནུམོདནཾ ཨཱརབྷཏི, ཏཏོ སབྦཀམྨཱནི ཚཌྜེཏྭཱ ཨེཀཙྩེ ཨཱགཙྪནྟི, ཨེཀཙྩེ ཨནཱགཏཱཝ ཧོནྟི, ཨཡཾ ཀཱལཾ ཨཏིནཱམེཏི། ཡོཔི མནུསྶེསུ ཨཱགནྟྭཱ ཨནུམོདནཏྠཱཡ ཝནྡིཏྭཱ ནིསིནྣེསུ ཨནུམོདནཾ ཨཀཏྭཱཝ ‘‘ཀཐཾ ཏིསྶ, ཀཐཾ ཕུསྶ, ཀཐཾ སུམན, ཀཐཾ ཏིསྶེ, ཀཐཾ ཕུསྶེ, ཀཐཾ སུམནེ, ཀཙྩིཏྠ ཨརོགཱ, སསྶཾ སམྤནྣ’’ནྟིཨཱདིཾ པཱཊིཡེཀྐཾ ཀཐཾ སམུཊྛཱཔེཏི, ཨཡཾ ཨནུམོདནསྶ ཀཱལཾ ཨཏིནཱམེཏི, མནུསྶཱནཾ པན ཨོཀཱསཾ ཉཏྭཱ ཨཱཡཱཙིཏཀཱལེ ཀརོནྟོ ནཱཏིནཱམེཏི ནཱམ, སཏྠཱ ཏཐཱ ཀརོཏི།

    Na ca anumodanassāti yo hi bhuttamattova dārakesu bhattatthāya rodantesu chātajjhattesu manussesu bhuñjitvā anāgatesveva anumodanaṃ ārabhati, tato sabbakammāni chaḍḍetvā ekacce āgacchanti, ekacce anāgatāva honti, ayaṃ kālaṃ atināmeti. Yopi manussesu āgantvā anumodanatthāya vanditvā nisinnesu anumodanaṃ akatvāva ‘‘kathaṃ tissa, kathaṃ phussa, kathaṃ sumana, kathaṃ tisse, kathaṃ phusse, kathaṃ sumane, kaccittha arogā, sassaṃ sampanna’’ntiādiṃ pāṭiyekkaṃ kathaṃ samuṭṭhāpeti, ayaṃ anumodanassa kālaṃ atināmeti, manussānaṃ pana okāsaṃ ñatvā āyācitakāle karonto nātināmeti nāma, satthā tathā karoti.

    ན ཏཾ བྷཏྟནྟི ཀིཾ བྷཏྟཾ ནཱམེཏཾ ཨུཏྟཎྜུལཾ ཨཏིཀིལིནྣནྟིཨཱདཱིནི ཝཏྭཱ ན གརཧཏི། ན ཨཉྙཾ བྷཏྟནྟི སྭཱཏནཱཡ ཝཱ པུནདིཝསཱཡ ཝཱ བྷཏྟཾ ཨུཔྤཱདེསྶཱམཱིཏི ཧི ཨནུམོདནཾ ཀརོནྟོ ཨཉྙཾ བྷཏྟཾ པཊིཀངྑཏི། ཡོ ཝཱ – ‘‘ཡཱཝ མཱཏུགཱམཱནཾ བྷཏྟཾ པཙྩཏི, ཏཱཝ ཨནུམོདནཾ ཀརིསྶཱམི, ཨཐ མེ ཨནུམོདནཱཝསཱནེ ཨཏྟནོ པཀྐབྷཏྟཏོཔི ཐོཀཾ དསྶནྟཱི’’ཏི ཨནུམོདནཾ ཝཌྜྷེཏི, ཨཡམྤི པཊིཀངྑཏི ནཱམ། སཏྠཱ ན ཨེཝཾ ཀརོཏི། ན ཙ མུཙྩིཏུཀཱམོཏི ཨེཀཙྩོ ཧི པཊིསཾམུཉྩིཏྭཱ གཙྪཏི, ཝེགེན ཨནུབནྡྷིཏབྦོ ཧོཏི། སཏྠཱ པན ན ཨེཝཾ གཙྪཏི, པརིསཱཡ མཛ྄ཛྷེ ཋིཏོཝ གཙྪཏི། ཨཙྩུཀྐཊྛནྟི ཡོ ཧི ཡཱཝ ཧནུཀཊྛིཏོ ཨུཀྑིཔིཏྭཱ པཱརུཔཏི, ཏསྶ ཨཙྩུཀྐཊྛཾ ནཱམ ཧོཏི། ཡོ ཡཱཝ གོཔྥཀཱ ཨོཏཱརེཏྭཱཝ པཱརུཔཏི, ཏསྶ ཨཙྩུཀྐཊྛཾ ཧོཏི། ཡོཔི ཨུབྷཏོ ཨུཀྑིཔིཏྭཱ ཨུདརཾ ཝིཝརིཏྭཱ ཡཱཏི, ཏསྶཔི ཨཙྩུཀྐཊྛཾ ཧོཏི། ཡོ ཨེཀཾསཾ ཀཏྭཱ ཐནཾ ཝིཝརིཏྭཱ ཡཱཏི, ཏསྶཔི ཨཙྩུཀྐཊྛཾ། སཏྠཱ ཏཾ སབྦཾ ན ཀརོཏི།

    Na taṃ bhattanti kiṃ bhattaṃ nāmetaṃ uttaṇḍulaṃ atikilinnantiādīni vatvā na garahati. Naaññaṃ bhattanti svātanāya vā punadivasāya vā bhattaṃ uppādessāmīti hi anumodanaṃ karonto aññaṃ bhattaṃ paṭikaṅkhati. Yo vā – ‘‘yāva mātugāmānaṃ bhattaṃ paccati, tāva anumodanaṃ karissāmi, atha me anumodanāvasāne attano pakkabhattatopi thokaṃ dassantī’’ti anumodanaṃ vaḍḍheti, ayampi paṭikaṅkhati nāma. Satthā na evaṃ karoti. Na ca muccitukāmoti ekacco hi paṭisaṃmuñcitvā gacchati, vegena anubandhitabbo hoti. Satthā pana na evaṃ gacchati, parisāya majjhe ṭhitova gacchati. Accukkaṭṭhanti yo hi yāva hanukaṭṭhito ukkhipitvā pārupati, tassa accukkaṭṭhaṃ nāma hoti. Yo yāva gopphakā otāretvāva pārupati, tassa accukkaṭṭhaṃ hoti. Yopi ubhato ukkhipitvā udaraṃ vivaritvā yāti, tassapi accukkaṭṭhaṃ hoti. Yo ekaṃsaṃ katvā thanaṃ vivaritvā yāti, tassapi accukkaṭṭhaṃ. Satthā taṃ sabbaṃ na karoti.

    ཨལླཱིནནྟི ཡཐཱ ཨཉྙེསཾ སེདེན ཏིནྟཾ ཨལླཱིཡཏི, ན ཨེཝཾ སཏྠུ། ཨཔཀཊྛནྟི ཁལིསཱཊཀོ ཝིཡ ཀཱཡཏོ མུཙྩིཏྭཱཔི ན ཏིཊྛཏི། ཝཱཏོཏི ཝེརམྦྷཝཱཏོཔི ཨུཊྛཧིཏྭཱ ཙཱལེཏུཾ ན སཀྐོཏི། པཱདམཎྜནཱནུཡོགནྟི ཨིཊྛཀཱཡ གྷཾསནཱདཱིཧི པཱདསོབྷཱནུཡོགཾ། པཀྑཱལེཏྭཱཏི པཱདེནེཝ པཱདཾ དྷོཝིཏྭཱ། སོ ནེཝ ཨཏྟབྱཱབཱདྷཱཡཱཏིཨཱདཱིནི ན པུབྦེནིཝཱསཙེཏོཔརིཡཉཱཎཱནཾ ཨཏྠིཏཱཡ ཝདཏི, ཨིརིཡཱཔཐསནྟཏཾ པན དིསྭཱ ཨནུམཱནེན ཝདཏི། དྷམྨནྟི པརིཡཏྟིདྷམྨཾ། ན ཨུསྶཱདེཏཱིཏི ཀིཾ མཧཱརཊྛིཀ, ཀིཾ མཧཱཀུཊུམྦིཀཱཏིཨཱདཱིནི ཝཏྭཱ གེཧསྶིཏཝསེན ན ཨུསྶཱདེཏི། ན ཨཔསཱདེཏཱིཏི ‘‘ཀིཾ, ཨུཔཱསཀ, ཀཐཾ ཏེ ཝིཧཱརམགྒོ ཉཱཏོ? ཀིཾ བྷཡེན ནཱགཙྪསི? ན ཧི བྷིཀྑཱུ ཀིཉྩི ཨཙྪིནྡིཏྭཱ གཎྷནྟི, མཱ བྷཱཡཱི’’ཏི ཝཱ ‘‘ཀིཾ ཏུཡ྄ཧཾ ཨེཝཾ མཙྪརིཡཛཱིཝིཏཾ ནཱམཱ’’ཏི ཝཱ ཨཱདཱིནི ཝཏྭཱ གེཧསྶིཏཔེམེན ན ཨཔསཱདེཏི།

    Allīnanti yathā aññesaṃ sedena tintaṃ allīyati, na evaṃ satthu. Apakaṭṭhanti khalisāṭako viya kāyato muccitvāpi na tiṭṭhati. Vātoti verambhavātopi uṭṭhahitvā cāletuṃ na sakkoti. Pādamaṇḍanānuyoganti iṭṭhakāya ghaṃsanādīhi pādasobhānuyogaṃ. Pakkhāletvāti pādeneva pādaṃ dhovitvā. So neva attabyābādhāyātiādīni na pubbenivāsacetopariyañāṇānaṃ atthitāya vadati, iriyāpathasantataṃ pana disvā anumānena vadati. Dhammanti pariyattidhammaṃ. Na ussādetīti kiṃ mahāraṭṭhika, kiṃ mahākuṭumbikātiādīni vatvā gehassitavasena na ussādeti. Na apasādetīti ‘‘kiṃ, upāsaka, kathaṃ te vihāramaggo ñāto? Kiṃ bhayena nāgacchasi? Na hi bhikkhū kiñci acchinditvā gaṇhanti, mā bhāyī’’ti vā ‘‘kiṃ tuyhaṃ evaṃ macchariyajīvitaṃ nāmā’’ti vā ādīni vatvā gehassitapemena na apasādeti.

    ཝིསྶཊྛོཏི སིནིདྡྷོ ཨཔལིབུདྡྷོ། ཝིཉྙེཡྻོཏི ཝིཉྙཱཔནཱིཡོ པཱཀཊོ, ཝིསྶཊྛཏྟཱཡེཝ ཙེས ཝིཉྙེཡྻོ ཧོཏི། མཉྫཱུཏི མདྷུརོ། སཝནཱིཡོཏི སོཏསུཁོ, མདྷུརཏྟཱཡེཝ ཙེས སཝནཱིཡོ ཧོཏི། བིནྡཱུཏི སམྤིཎྜིཏོ། ཨཝིསཱརཱིཏི ཨཝིསཊོ, བིནྡུཏྟཱཡེཝ ཙེས ཨཝིསཱརཱི ཧོཏི། གམྦྷཱིརོཏི གམྦྷཱིརསམུཊྛིཏོ། ནིནྣཱདཱིཏི ནིནྣཱདཝཱ, གམྦྷཱིརཏྟཱཡེཝ ཙེས ནིནྣཱདཱི ཧོཏི། ཡཐཱཔརིསནྟི ཙཀྐཝཱལ༹པརིཡནྟམྤི ཨེཀཱབདྡྷཔརིསཾ ཝིཉྙཱཔེཏི། བཧིདྡྷཱཏི ཨངྒུལིམཏྟམྤི པརིསཏོ བཧིདྡྷཱ ན གཙྪཏི། ཏསྨཱ? སོ ཨེཝརཱུཔོ མདྷུརསྶརོ ཨཀཱརཎཱ མཱ ནསྶཱིཏི། ཨིཏི བྷགཝཏོ གྷོསོ པརིསཱཡ མཏྠཀེནེཝ ཙརཏི།

    Vissaṭṭhoti siniddho apalibuddho. Viññeyyoti viññāpanīyo pākaṭo, vissaṭṭhattāyeva cesa viññeyyo hoti. Mañjūti madhuro. Savanīyoti sotasukho, madhurattāyeva cesa savanīyo hoti. Bindūti sampiṇḍito. Avisārīti avisaṭo, binduttāyeva cesa avisārī hoti. Gambhīroti gambhīrasamuṭṭhito. Ninnādīti ninnādavā, gambhīrattāyeva cesa ninnādī hoti. Yathāparisanti cakkavāḷapariyantampi ekābaddhaparisaṃ viññāpeti. Bahiddhāti aṅgulimattampi parisato bahiddhā na gacchati. Tasmā? So evarūpo madhurassaro akāraṇā mā nassīti. Iti bhagavato ghoso parisāya matthakeneva carati.

    ཨཝལོཀཡམཱནཱཏི སིརསྨིཾ ཨཉྫལིཾ ཋཔེཏྭཱ བྷགཝནྟཾ ཨོལོཀེནྟཱཝ པཙྩོསཀྐིཏྭཱ དསྶནཝིཛཧནཊྛཱནེ ཝནྡིཏྭཱ གཙྪནྟི། ཨཝིཛཧིཏཏྟཱཏི ཡོ ཧི ཀཐཾ སུཏྭཱ ཝུཊྛིཏོ ཨཉྙཾ དིཊྛསུཏཱདིཀཾ ཀཐཾ ཀཐེནྟོ གཙྪཏི, ཨེས སབྷཱཝེན ཝིཛཧཏི ནཱམ། ཡོ པན སུཏདྷམྨཀཐཱཡ ཝཎྞཾ ཀཐེནྟོཝ གཙྪཏི, ཨཡཾ ན ཝིཛཧཏི ནཱམ, ཨེཝཾ ཨཝིཛཧནྟབྷཱཝེན པཀྐམནྟི། གཙྪནྟནྟི རཛྫུཡནྟཝསེན རཏནསཏྟུབྦེདྷཾ སུཝཎྞགྒྷིཀཾ ཝིཡ གཙྪནྟཾ། ཨདྡསཱམ ཋིཏནྟི སམུསྶིཏཀཉྩནཔབྦཏཾ ཝིཡ ཋིཏཾ ཨདྡསཱམ། ཏཏོ ཙ བྷིཡྻོཏི ཝིཏྠཱརེཏྭཱ གུཎེ ཀཐེཏུཾ ཨསཀྐོནྟོ ཨཝསེསེ གུཎེ སཾཁིཔིཏྭཱ ཀལཱཔཾ ཝིཡ སུཏྟཀབདྡྷཾ ཝིཡ ཙ ཀཏྭཱ ཝིསྶཛྫེནྟོ ཨེཝམཱཧ། ཨཡམེཏྠ ཨདྷིཔྤཱཡོ – མཡཱ ཀཐིཏགུཎེཧི ཨཀཐིཏཱཝ བཧུཏརཱ། མཧཱཔཐཝིམཧཱསམུདྡཱདཡོ ཝིཡ ཧི ཏསྶ བྷོཏོ ཨནནྟཱ ཨཔྤམེཡྻཱ གུཎཱ ཨཱཀཱསམིཝ ཝིཏྠཱརིཏཱཏི།

    Avalokayamānāti sirasmiṃ añjaliṃ ṭhapetvā bhagavantaṃ olokentāva paccosakkitvā dassanavijahanaṭṭhāne vanditvā gacchanti. Avijahitattāti yo hi kathaṃ sutvā vuṭṭhito aññaṃ diṭṭhasutādikaṃ kathaṃ kathento gacchati, esa sabhāvena vijahati nāma. Yo pana sutadhammakathāya vaṇṇaṃ kathentova gacchati, ayaṃ na vijahati nāma, evaṃ avijahantabhāvena pakkamanti. Gacchantanti rajjuyantavasena ratanasattubbedhaṃ suvaṇṇagghikaṃ viya gacchantaṃ. Addasāma ṭhitanti samussitakañcanapabbataṃ viya ṭhitaṃ addasāma. Tato ca bhiyyoti vitthāretvā guṇe kathetuṃ asakkonto avasese guṇe saṃkhipitvā kalāpaṃ viya suttakabaddhaṃ viya ca katvā vissajjento evamāha. Ayamettha adhippāyo – mayā kathitaguṇehi akathitāva bahutarā. Mahāpathavimahāsamuddādayo viya hi tassa bhoto anantā appameyyā guṇā ākāsamiva vitthāritāti.

    ༣༩༠. ཨཔྤཊིསཾཝིདིཏོཏི ཨཝིཉྙཱཏཨཱགམནོ། པབྦཛིཏེ ཨུཔསངྐམནྟེན ཧི ཙཱིཝརཔརིཀམྨཱདིསམཡེ ཝཱ ཨེཀཾ ནིཝཱསེཏྭཱ སརཱིརབྷཉྫནསམཡེ ཝཱ ཨུཔསངྐམིཏྭཱ ཏཏོཝ པཊིནིཝཏྟིཏབྦཾ ཧོཏི, པཊིསནྠཱརམཏྟམྤི ན ཛཱཡཏི། པུརེཏརཾ པན ཨོཀཱསེ ཀཱརིཏེ དིཝཱཊྛཱནཾ སམྨཛྫིཏྭཱ ཙཱིཝརཾ པཱརུཔིཏྭཱ བྷིཀྑུ ཝིཝིཏྟེ ཋཱནེ ནིསཱིདཏི, ཏཾ ཨཱགནྟྭཱ པསྶནྟཱ དསྶནེནཔི པསཱིདནྟི, པཊིསནྠཱརོ ཛཱཡཏི, པཉྷབྱཱཀརཎཾ ཝཱ དྷམྨཀཐཱ ཝཱ ལབྦྷཏི། ཏསྨཱ པཎྜིཏཱ ཨོཀཱསཾ ཀཱརེནྟི། སོ ཙ ནེསཾ ཨཉྙཏརོ, ཏེནསྶ ཨེཏདཧོསི། ཛིཎྞོ ཝུཌྜྷོཏི ཨཏྟནོ ཨུགྒཏབྷཱཝཾ ཨཀཐེཏྭཱ ཀསྨཱ ཨེཝམཱཧ? བུདྡྷཱ ནཱམ ཨནུདྡཡསམྤནྣཱ ཧོནྟི, མཧལླཀབྷཱཝཾ ཉཏྭཱ སཱིགྷཾ ཨོཀཱསཾ ཀརིསྶཏཱིཏི ཨེཝམཱཧ།

    390.Appaṭisaṃviditoti aviññātaāgamano. Pabbajite upasaṅkamantena hi cīvaraparikammādisamaye vā ekaṃ nivāsetvā sarīrabhañjanasamaye vā upasaṅkamitvā tatova paṭinivattitabbaṃ hoti, paṭisanthāramattampi na jāyati. Puretaraṃ pana okāse kārite divāṭṭhānaṃ sammajjitvā cīvaraṃ pārupitvā bhikkhu vivitte ṭhāne nisīdati, taṃ āgantvā passantā dassanenapi pasīdanti, paṭisanthāro jāyati, pañhabyākaraṇaṃ vā dhammakathā vā labbhati. Tasmā paṇḍitā okāsaṃ kārenti. So ca nesaṃ aññataro, tenassa etadahosi. Jiṇṇo vuḍḍhoti attano uggatabhāvaṃ akathetvā kasmā evamāha? Buddhā nāma anuddayasampannā honti, mahallakabhāvaṃ ñatvā sīghaṃ okāsaṃ karissatīti evamāha.

    ༣༩༡. ཨོརམིཡ ཨོཀཱསམཀཱསཱིཏི ཝེགེན ཨུཊྛཱཡ དྭིདྷཱ བྷིཛྫིཏྭཱ ཨོཀཱསམཀཱསི།

    391.Oramiya okāsamakāsīti vegena uṭṭhāya dvidhā bhijjitvā okāsamakāsi.

    ཡེ མེཏི ཡེ མཡཱ། ནཱརཱིསམཱནསཝ྄ཧཡཱཏི ནཱརཱིསམཱནནཱམཾ ཨིཏྠིལིངྒཾ, ཏེན ཨཝ྄ཧཱཏབྦཱཏི ནཱརཱིསམཱནསཝ྄ཧཡཱ, ཨིཏྠིལིངྒེན ཝཏྟབྦཱཏི ཝོཧཱརཀུསལཏཱཡ ཨེཝཾ ཝདཏི། པཧཱུཏཛིཝ྄ཧོཏི པུཐུལཛིཝ྄ཧོ། ནིནྣཱམཡེཏནྟི ནཱིཧར ཨེཏཾ།

    Ye meti ye mayā. Nārīsamānasavhayāti nārīsamānanāmaṃ itthiliṅgaṃ, tena avhātabbāti nārīsamānasavhayā, itthiliṅgena vattabbāti vohārakusalatāya evaṃ vadati. Pahūtajivhoti puthulajivho. Ninnāmayetanti nīhara etaṃ.

    ༣༩༣. ཀེཝལཱིཏི སཀལགུཎསམྤནྣོ།

    393.Kevalīti sakalaguṇasampanno.

    ༣༩༤. པཙྩབྷཱསཱིཏི ཨེཀཔྤཧཱརེན པུཙྪིཏེ ཨཊྛ པཉྷེ བྱཱཀརོནྟོ པཏིཨབྷཱསི། ཡོ ཝེདཱིཏི ཡོ ཝིདཏི ཛཱནཱཏི, ཡསྶ པུབྦེནིཝཱསོ པཱཀཊོ། སགྒཱཔཱཡཉྩ པསྶཏཱིཏི དིབྦཙཀྑུཉཱཎཾ ཀཐིཏཾ། ཛཱཏིཀྑཡཾ པཏྟོཏི ཨརཧཏྟཾ པཏྟོ། ཨབྷིཉྙཱ ཝོསིཏོཏི ཏཾ ཨརཧཏྟཾ ཨབྷིཛཱནིཏྭཱ ཝོསིཏོ ཝོསཱནཔྤཏྟོ། མུནཱིཏི ཨརཧཏྟཉཱཎམོནེཡྻེན སམནྣཱགཏོ།

    394.Paccabhāsīti ekappahārena pucchite aṭṭha pañhe byākaronto patiabhāsi. Yo vedīti yo vidati jānāti, yassa pubbenivāso pākaṭo. Saggāpāyañca passatīti dibbacakkhuñāṇaṃ kathitaṃ. Jātikkhayaṃpattoti arahattaṃ patto. Abhiññā vositoti taṃ arahattaṃ abhijānitvā vosito vosānappatto. Munīti arahattañāṇamoneyyena samannāgato.

    ཝིསུདྡྷནྟི པཎྜརཾ། མུཏྟཾ རཱགེཧཱིཏི ཀིལེསརཱགེཧི མུཏྟཾ། པཧཱིནཛཱཏིམརཎོཏི ཛཱཏིཀྑཡཔྤཏྟཏྟཱ པཧཱིནཛཱཏིཀོ, ཛཱཏིཔཧཱནེནེཝ པཧཱིནམརཎོ། བྲཧྨཙརིཡསྶ ཀེཝལཱིཏི ཡཾ བྲཧྨཙརིཡསྶ ཀེཝལཱི སཀལབྷཱཝོ, ཏེན སམནྣཱགཏོ, སཀལཙཏུམགྒབྲཧྨཙརིཡཝཱསོཏི ཨཏྠོ། པཱརགཱུ སབྦདྷམྨཱནནྟི སབྦེསཾ ལོཀིཡལོཀུཏྟརདྷམྨཱནཾ ཨབྷིཉྙཱཡ པཱརཾ གཏོ, སབྦདྷམྨེ ཨབྷིཛཱནིཏྭཱ ཋིཏོཏི ཨཏྠོ། པཱརགཱུཏི ཝཱ ཨེཏྟཱཝཏཱ པརིཉྙཱཔཱརགཱུ པཉྩནྣཾ ཁནྡྷཱནཾ, པཧཱནཔཱརགཱུ སབྦཀིལེསཱནཾ , བྷཱཝནཱཔཱརགཱུ ཙཏུནྣཾ མགྒཱནཾ, སཙྪིཀིརིཡཱཔཱརགཱུ ནིརོདྷསྶ, སམཱཔཏྟིཔཱརགཱུ སབྦསམཱཔཏྟཱིནནྟི ཨཡམཏྠོ ཝུཏྟོ། པུན སབྦདྷམྨཱནནྟི ཨིམིནཱ ཨབྷིཉྙཱཔཱརགཱུ ཝུཏྟོཏི། བུདྡྷོ ཏཱདཱི པཝུཙྩཏཱིཏི ཏཱདིསོ ཚཧི ཨཱཀཱརེཧི པཱརཾ གཏོ སབྦཱཀཱརེན ཙཏུནྣཾ སཙྩཱནཾ བུདྡྷཏྟཱ བུདྡྷོཏི པཝུཙྩཏཱིཏི།

    Visuddhanti paṇḍaraṃ. Muttaṃ rāgehīti kilesarāgehi muttaṃ. Pahīnajātimaraṇoti jātikkhayappattattā pahīnajātiko, jātipahāneneva pahīnamaraṇo. Brahmacariyassa kevalīti yaṃ brahmacariyassa kevalī sakalabhāvo, tena samannāgato, sakalacatumaggabrahmacariyavāsoti attho. Pāragū sabbadhammānanti sabbesaṃ lokiyalokuttaradhammānaṃ abhiññāya pāraṃ gato, sabbadhamme abhijānitvā ṭhitoti attho. Pāragūti vā ettāvatā pariññāpāragū pañcannaṃ khandhānaṃ, pahānapāragū sabbakilesānaṃ , bhāvanāpāragū catunnaṃ maggānaṃ, sacchikiriyāpāragū nirodhassa, samāpattipāragū sabbasamāpattīnanti ayamattho vutto. Puna sabbadhammānanti iminā abhiññāpāragū vuttoti. Buddho tādī pavuccatīti tādiso chahi ākārehi pāraṃ gato sabbākārena catunnaṃ saccānaṃ buddhattā buddhoti pavuccatīti.

    ཀིཾ པན ཨེཏྟཱཝཏཱ སབྦེ པཉྷཱ ཝིསྶཛྫིཏཱ ཧོནྟཱིཏི? ཨཱམ ཝིསྶཛྫིཏཱ, ཙིཏྟཾ ཝིསུདྡྷཾ ཛཱནཱཏི, མུཏྟཾ རཱགེཧཱིཏི ཨིམིནཱ ཏཱཝ བཱཧིཏཔཱཔཏྟཱ བྲཱཧྨཎོཏི པཋམཔཉྷོ ཝིསྶཛྫིཏོ ཧོཏི། པཱརགཱུཏི ཨིམིནཱ ཝེདེཧི གཏཏྟཱ ཝེདགཱུཏི དུཏིཡཔཉྷོ ཝིསྶཛྫིཏོ ཧོཏི། པུབྦེནིཝཱསནྟིཨཱདཱིཧི ཨིམཱསཾ ཏིསྶནྣཾ ཝིཛྫཱནཾ ཨཏྠིཏཱཡ ཏེཝིཛྫོཏི ཏཏིཡཔཉྷོ ཝིསྶཛྫིཏོ ཧོཏི། མུཏྟཾ རཱགེཧི སབྦསོཏི ཨིམིནཱཝ ནིསྶཊཏྟཱ པཱཔདྷམྨཱནཾ སོཏྟིཡོཏི ཙཏུཏྠཔཉྷོ ཝིསྶཛྫིཏོ ཧོཏི། ཛཱཏིཀྑཡཾ པཏྟོཏི ཨིམིནཱ པན ཨརཧཏྟསྶེཝ ཝུཏྟཏྟཱ པཉྩམཔཉྷོ ཝིསྶཛྫིཏོ ཧོཏི། ཝོསིཏོཏི ཙ བྲཧྨཙརིཡསྶ ཀེཝལཱིཏི ཙ ཨིམེཧི ཚཊྛཔཉྷོ ཝིསྶཛྫིཏོ ཧོཏི། ཨབྷིཉྙཱ ཝོསིཏོ མུནཱིཏི ཨིམིནཱ སཏྟམཔཉྷོ ཝིསྶཛྫིཏོ ཧོཏི། པཱརགཱུ སབྦདྷམྨཱནཾ, བུདྡྷོ ཏཱདཱི པཝུཙྩཏཱིཏི ཨིམིནཱ ཨཊྛམཔཉྷོ ཝིསྶཛྫིཏོ ཧོཏི།

    Kiṃ pana ettāvatā sabbe pañhā vissajjitā hontīti? Āma vissajjitā, cittaṃ visuddhaṃ jānāti, muttaṃ rāgehīti iminā tāva bāhitapāpattā brāhmaṇoti paṭhamapañho vissajjito hoti. Pāragūti iminā vedehi gatattā vedagūti dutiyapañho vissajjito hoti. Pubbenivāsantiādīhi imāsaṃ tissannaṃ vijjānaṃ atthitāya tevijjoti tatiyapañho vissajjito hoti. Muttaṃ rāgehi sabbasoti imināva nissaṭattā pāpadhammānaṃ sottiyoti catutthapañho vissajjito hoti. Jātikkhayaṃ pattoti iminā pana arahattasseva vuttattā pañcamapañho vissajjito hoti. Vositoti ca brahmacariyassa kevalīti ca imehi chaṭṭhapañho vissajjito hoti. Abhiññā vosito munīti iminā sattamapañho vissajjito hoti. Pāragū sabbadhammānaṃ, buddho tādī pavuccatīti iminā aṭṭhamapañho vissajjito hoti.

    ༣༩༥. དཱནཀཐནྟིཨཱདཱིནི ཧེཊྛཱ སུཏྟེ ཝིཏྠཱརིཏཱནེཝ། པཙྩཔཱདཱིཏི པཊིཔཛྫི། དྷམྨསྶཱནུདྷམྨནྟི ཨིམསྨིཾ སུཏྟེ དྷམྨོ ནཱམ ཨརཧཏྟམགྒོ, ཨནུདྷམྨོ ནཱམ ཧེཊྛིམཱ ཏཡོ མགྒཱ ཏཱིཎི ཙ སཱམཉྙཕལཱནི, ཏཱནི པཊིཔཱཊིཡཱ པཊིལབྷཱིཏི ཨཏྠོ། ན ཙ མཾ དྷམྨཱདྷིཀརཎཾ ཝིཧེསེསཱིཏི མཉྩ དྷམྨཀཱརཎཱ ན ཀིལམེསི, ན པུནཔྤུནཾ ཀཐཱཔེསཱིཏི ཝུཏྟཾ ཧོཏི། སེསཾ སབྦཏྠ ཨུཏྟཱནམེཝ། ཏཏྠ པརིནིབྦཱཡཱིཏི པན པདེན དེསནཱཡ ཨརཧཏྟེནེཝ ཀཱུཊཾ གཧིཏནྟི།

    395.Dānakathantiādīni heṭṭhā sutte vitthāritāneva. Paccapādīti paṭipajji. Dhammassānudhammanti imasmiṃ sutte dhammo nāma arahattamaggo, anudhammo nāma heṭṭhimā tayo maggā tīṇi ca sāmaññaphalāni, tāni paṭipāṭiyā paṭilabhīti attho. Na ca maṃ dhammādhikaraṇaṃ vihesesīti mañca dhammakāraṇā na kilamesi, na punappunaṃ kathāpesīti vuttaṃ hoti. Sesaṃ sabbattha uttānameva. Tattha parinibbāyīti pana padena desanāya arahatteneva kūṭaṃ gahitanti.

    པཔཉྩསཱུདནིཡཱ མཛ྄ཛྷིམནིཀཱཡཊྛཀཐཱཡ

    Papañcasūdaniyā majjhimanikāyaṭṭhakathāya

    བྲཧྨཱཡུསུཏྟཝཎྞནཱ ནིཊྛིཏཱ།

    Brahmāyusuttavaṇṇanā niṭṭhitā.




    Next: ༢. སེལསུཏྟཝཎྞནཱ • 2. Selasuttavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༡. བྲཧྨཱཡུསུཏྟཾ • 1. Brahmāyusuttaṃ

    ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) / ༡. བྲཧྨཱཡུསུཏྟཝཎྞནཱ • 1. Brahmāyusuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact