Brihadaranyaka Upanishad

bṛhadāraṇyakopaniṣat

kāṇva pāṭhaḥ ।

A madhu kāṇḍa[upadeśa kāṇḍa]
adhyāya I brāhmaṇa i-vi mantrāḥ 80 1-...
adhyāya II brāhmaṇa i-vi mantrāḥ 66 1-...
B muni [yājñavalkya] kāṇḍa [upapatti kāṇḍa]
adhyāya III brāhmaṇa i-ix mantrāḥ 92 1-...
adhyāya IV brāhmaṇa i-vi mantrāḥ 92 1-...
C khila kāṇḍa[upāsanā kāṇḍa]
adhyāya V brāhmaṇa i-xv mantrāḥ 33 1-...
adhyāya VI brāhmaṇa i-v mantrāḥ 75 1-...

oṃ pūrṇamadaḥ pūrṇamidaṃ pūrṇātpūrṇamaducyate ।
pūrṇasya pūrṇamādāya pūrṇamevāvaśiṣyate ॥

oṃ śāntiḥ śāntiḥ śāntiḥ ॥

atha prathamo'dhyāyaḥ ।

atha prathamaṃ brāhmaṇam ।

mantra 1 [I.i.1]
uṣā vā aśvasya medhyasya śiraḥ । sūryaścakṣurvātaḥ prāṇo
vyāttamagnirvaiśvānaraḥ saṃvatsara ātmā'śvasya medhyasya । dyauḥ
pṛṣṭhamantarikṣamudaraṃ pṛthivī pājasyaṃ diśaḥ pārśve
avāntaradiśaḥ parśava ṛtavo'ṅgāni māsāścārdhamāsāśca
parvāṇyahorātrāṇi pratiṣṭhā nakṣatrāṇyasthīni nabho
mām̐sānyūvadhyam̐ sikatāḥ sindhavo gudā yakṛcca klomānaśca
parvatā oṣadhayaśca vanaspatayaśca lomānyudyanpūrvārdho
nimlocañjaghanārdho yadvijṛmbhate tadvidyotate yadvidhūnute
tatstanayati yanmehati tadvarṣati vāgevāsya vāk ॥ 1॥

mantra 2 [I.i.2]
aharvā aśvaṃ purastānmahimā'nvajāyata tasya pūrve samudre yonī
rātrirenaṃ paścānmahimā'nvajāyata tasyāpare samudre yoniretau vā aśvaṃ
mahimānāvabhitaḥ sambabhūvaturhayo bhūtvā devānavahad vājī gandharvān
arvā'surān aśvo manuṣyān samudra evāsya bandhuḥ samudro yoniḥ ॥ 2॥

iti prathamaṃ brāhamaṇam ॥

atha dvitīyaṃ brāhmaṇam ।

mantra 1 [I.ii.1]
naiveha kiṃcanāgra āsīn mṛtyunaivedamāvṛtamāsīdaśanāyayā'śanāyā
hi mṛtyustanmano'kurutā''tmanvī syāmiti । so'rcannacarat
tasyārcata āpo'jāyantārcate vai me kamabhūditi । tadevārkyasyārkatvam ।
kam̐ ha vā asmai bhavati ya evametadarkasyārkatvaṃ veda ॥ 1॥

mantra 2[I.ii.2]
āpo vā arka tadyadapām̐ śara āsīt tatsamahanyata । sā pṛthivyabhavat
tasyāmaśrāmyat tasya śrāntasya taptasya tejo raso niravartatāgniḥ ॥ 2॥

mantra 3 [I.ii.3]
sa tredhā''tmānaṃ vyakurutā''dityaṃ tṛtīyaṃ vāyuṃ tṛtīyam̐ ।
sa eṣa prāṇastredhā vihitastasya prācī dikṣiro'sau cāsau cermāva
athāsya pratīcī dikpucchamasau cāsau ca sakthyau dakṣiṇā codīcī
ca pārśve dyauḥ pṛṣṭhamantarikṣamudaramiyamuraḥ sa eṣo'psu
pratiṣṭhito yatra kva caiti tadeva pratitiṣṭhatyevaṃ vidvān ॥ 3॥

mantra 4[I.ii.4]
so'kāmayata dvitīyo ma ātmā jāyeteti । sa manasā vācaṃ
mithunam̐ samabhavadaśanāyā mṛtyustadyadreta āsīt sa
saṃvatsaro'bhavan na ha purā tataḥ saṃvatsara āsa । tametāvantaṃ
kālamabibharyāvānsaṃvatsarastametāvataḥ kālasya parastādasṛjata ।
taṃ jātamabhivyādadāt sa bhāṇakarot saiva vāgabhavat ॥ 4॥

mantra 5[I.ii.5]
sa aikṣata yadi vā imamabhimam̐sye kanīyo'nnaṃ kariṣya iti ।
sa tayā vācā tenā''tmanedam̐ sarvamasṛjata yadidaṃ
kiñcarco yajūm̐ṣi sāmāni chandām̐si yajñān prajāḥ
paśūn sa yadyadevāsṛjata tattadattumadhriyata । sarvaṃ vā attīti
tadaditeradititvam̐ । sarvasyaitasyāttā bhavati sarvamasyānnaṃ bhavati
ya evametadaditeradititvaṃ veda ॥ 5॥

mantra 6[I.ii.6]
so'kāmayata bhūyasā yajñena bhūyo yajeyeti । so'śrāmyat sa
tapo'tapyata । tasya śrāntasya taptasya yaśo vīryamudakrāmat prāṇā
vai yaśo vīryam । tat prāṇeṣūtkrānteṣu śarīram̐ śvayitumadhriyata
tasya śarīra eva mana āsīt ॥ 6॥

mantra 7[I.ii.7]
so'kāmayata medhyaṃ ma idam̐ syādātmanvyanena syāmiti । tato'śvaḥ
samabhavad yadaśvat tanmedhyamabhūditi । tadevāśvamedhasyāśvamedhatvaṃ
eṣa ha vā aśvamedhaṃ veda ya enamevaṃ veda । tamanavarudhyaivāmanyata ।
tam̐ saṃvatsarasya parastādātmana ālabhata । paśūndevatābhyaḥ
pratyauhat tasmātsarvadevatyaṃ prokṣitaṃ prājāpatyamālabhanta eṣa ha vā
aśvamedho ya eṣa tapati tasya saṃvatsara ātmā'yamagnirarkastasyeme lokā
ātmānastāvetāvarkāśvamedhau । so punarekaiva devatā bhavati mṛtyurevāpa
punarmṛtyuṃ jayati nainaṃ mṛtyurāpnoti mṛtyurasyā''tmā
bhavatyetāsāṃ devatānāmeko bhavati ॥ 7॥

iti dvitīyaṃ brāhmaṇam ॥

atha tṛtīyaṃ brāhmaṇam ।

mantra 1 [I.iii.1]
dvayā ha prājāpatyā devāścāsurāśca । tataḥ kānīyasā eva devā jyāyasā
asurāsta eṣu lokeṣvaspardhanta । te ha devā ūcurhantāsurānyajña
udgīthenātyayāmeti ॥ 1॥

mantra 2[I.iii.2]
te ha vācamūcustvaṃ na udgāyeti । tatheti । tebhyo vāgudagāyad yo vāci
bhogastaṃ devebhya āgāyad yatkalyāṇaṃ vadati tadātmane । te viduranena
vai na udgātrā'tyeṣyantīti । tamabhidrutya pāpmanā'vidhyan sa yaḥ sa
pāpmā yadevedamapratirūpaṃ vadati sa eva sa pāpmā ॥ 2॥

mantra 3[I.iii.3]
atha ha prāṇamūcustvaṃ na udgāyeti । tatheti । tebhyaḥ prāṇa udagāyad
yaḥ prāṇe bhogastaṃ devebhya āgāyad yatkalyāṇaṃ jighrati tadātmane ।
te viduranena vai na udgātrā'tyeṣyantīti । tamabhidrutya
pāpmanā'vidhyan sa yaḥ sa pāpmā yadevedamapratirūpaṃ jighrati sa eva
sa pāpmā ॥ 3॥

mantra 4[I.iii.4]
atha ha cakṣurūcustvaṃ na udgāyeti । tatheti । tebhyaścakṣurudagāyad
yaścakṣuṣi bhogastaṃ devebhya āgāyad yatkalyāṇaṃ paśyati
tadātmane । te viduranena vai na udgātrā'tyeṣyantīti । tamabhidrutya
pāpmanā'vidhyan sa yaḥ sa pāpmā yadevedamapratirūpaṃ paśyati sa eva
sa pāpmā ॥ 4॥

mantra 5[I.iii.5]
atha ha śrotramūcustvaṃ na udgāyeti । tatheti । tebhyaḥ śrotramudagāyad
yaḥ śrotre bhogastaṃ devebhya āgāyad yatkalyāṇam̐ śṛṇoti
tadātmane । te viduranena vai na udgātrā'tyeṣyantīti । tamabhidrutya
pāpmanā'vidhyan sa yaḥ sa pāpmā yadevedamapratirūpam̐ śṛṇoti sa
eva sa pāpmā ॥ 5॥

mantra 6[I.iii.6]
atha ha mana ūcustvaṃ na udgāyeti । tatheti । tebhyo mana udagāyad
yo manasi bhogastaṃ devebhya āgāyad yatkalyāṇam̐ saṅkalpayati
tadātmane । te viduranena vai na udgātrā'tyeṣyantīti । tamabhidrutya
pāpmanā'vidhyan sa yaḥ sa pāpmā yadevedamapratirūpam̐ saṅkalpayati sa
eva sa pāpmaivamu khalvetā devatāḥ pāpmabhirupāsṛjan pāpmabhisupāsṛjan
evamenāḥ pāpmanā'vidhyan ॥ 6॥

mantra 7[I.iii.7]
atha hemamāsanyaṃ prāṇamūcustvaṃ na udgāyeti । tatheti । tebhya eṣa
prāṇa udagāyat te viduranena vai na udgātrā'tyeṣyantīti । tamabhidrutya
pāpmanāvidhyan । sa yathāśmānamṛtvā loṣṭo vidhvam̐setaivam̐
haiva vidhvam̐samānā viṣvañco vineśustato devā abhavan parā'surāḥ ।
bhavatyātmanā parā'sya dviṣanbhrātṛvyo bhavati ya evaṃ veda ॥ 7॥

mantra 8[I.iii.8]
te hocuḥ kva nu so'bhūd yo na itthamasaktetyayamāsye'ntariti so'yāsya
āṅgiraso'ṅgānām̐ hi rasaḥ ॥ 8॥

mantra 9[I.iii.9]
sā vā eṣā devatā dūrnāma dūram̐ hyasyā mṛtyurdūram̐ ha vā
asmānmṛtyurbhavati ya evaṃ veda ॥ 9॥

mantra 10[I.iii.10]
sā vā eṣā devataitāsāṃ devatānāṃ pāpmānaṃ mṛtyumapahatya yatrā''sāṃ
diśāmantastadgamayāṃ cakāra tadāsāṃ pāpmano vinyadadhāt tasmānna
janamiyān nāntamiyān netpāpmānaṃ mṛtyumanvavāyānīti ॥ 10॥

mantra 11[I.iii.11]
sā vā eṣā devataitāsāṃ devatānāṃ pāpmānaṃ mṛtyumapahatyāthainā
mṛtyumatyavahat ॥ 11॥

mantra 12[I.iii.12]
sa vai vācameva prathamāmatyavahat sā yadā mṛtyumatyamucyata
so'gnirabhavat so'yamagniḥ pareṇa mṛtyumatikrānto dīpyate ॥ 12॥

mantra 13[I.iii.13]
atha prāṇamatyavahat sa yadā mṛtyumatyamucyata sa vāyurabhavat so'yaṃ
vāyuḥ pareṇa mṛtyumatikrāntaḥ pavate ॥ 13॥

mantra 14[I.iii.14]
atha cakṣuratyavahat tadyadā mṛtyumatyamucyata sa ādityo'bhavat
so'sāvādityaḥ pareṇa mṛtyumatikrāntastapati ॥ 14॥

mantra 15[I.iii.15]
atha śrotramatyavahat tadyadā mṛtyumatyamucyata tā
diśo'bhavam̐stā imā diśaḥ pareṇa mṛtyumatikrāntāḥ ॥ 15॥

mantra 16[I.iii.16]
atha mano'tyavahat tadyadā mṛtyumatyamucyata sa candramā abhavat
so'sau candraḥ pareṇa mṛtyumatikrānto bhātyevam̐ ha vā enameṣā
devatā mṛtyumativahati ya evaṃ veda ॥ 16॥

mantra 17[I.iii.17]
athā''tmane'nnādyamāgāyad yaddhi kiñcānnamadyate'nenaiva tadadyata
iha pratitiṣṭhati ॥ 17॥

mantra 18[I.iii.18]
te devā abruvann etāvadvā idam̐ sarvaṃ yadannaṃ tadātmana
āgāsīranu no'sminnanna ābhajasveti । te vai mā'bhisaṃviśateti ।
tatheti । tam̐ samantaṃ pariṇyaviśanta । tasmādyadanenānnamatti
tenaitāstṛpyantyevam̐ ha vā enam̐ svā abhisaṃviśanti bhartā
svānām̐ śreṣṭhaḥ pura etā bhavatyannādo'dhipatirya evaṃ veda ।
ya u haivaṃvidam̐ sveṣu pratipratirbubhūṣati na haivālaṃ bhāryebhyo
bhavatyatha ya evaitamanubhavati yo vaitamanu bhāryān bubhūrṣati sa
haivālaṃ bhāryebhyo bhavati ॥ 18॥

mantra 19[I.iii.19]
so'yāsya āṅgiraso'ṅgānām̐ hi rasaḥ । prāṇo vā aṅgānām̐ rasaḥ ।
prāṇo hi vā aṅgānām̐ rasastasmādyasmātkasmāccāṅgātprāṇa utkrāmati
tadeva tacchuṣyatyeṣa hi vā aṅgānām̐ rasaḥ ॥ 19॥

mantra 20[I.iii.20]
eṣa u eva bṛhaspatirvāgvai bṛhatī tasyā eṣa patistasmādu
bṛhaspatiḥ ॥ 20॥

mantra 21[I.iii.21]
eṣa u eva brahmaṇaspatirvāgvai brahma tasyā eṣa patistasmādu
brahmaṇaspatiḥ ॥ 21॥

mantra 22[I.iii.22]
eṣa u eva sāma vāgvai sāmaiṣa sā cāmaśceti tatsāmnaḥ sāmatvam ।
yadveva samaḥ pluṣiṇā samo maśakena samo nāgena sama ebhistribhirlokaiḥ
samo'nena sarveṇa tasmādveva sāmāśnute sāmnaḥ sāyujyam̐ salokatāṃ
ya evametatsāma veda ॥ 22॥

mantra 23[I.iii.23]
eṣa u vā udgīthaḥ । prāṇo vā ut prāṇena hīdam̐ sarvamuttabdham ।
vāgeva gīthocca gīthā ceti sa udgīthaḥ ॥ 23॥

mantra 24[I.iii.24]
taddhāpi brahmadattaścaikitāneyo rājānaṃ bhakṣayannuvācāyaṃ tyasya
rājā mūrdhānaṃ vipātayatād yadito'yāsya āṅgiraso'nyenodagāyaditi ।
vācā ca hyeva sa prāṇena codagāyaditi ॥ 24॥

mantra 25[I.iii.25]
tasya haitasya sāmno yaḥ svaṃ veda bhavati hāsya svam । tasya vai svara
eva svam । tasmādārtvijyaṃ kariṣyanvāci svaramiccheta tayā vācā
svarasampannayā''rtvijyaṃ kuryāt tasmādyajñe svaravantaṃ didṛkṣanta
evātho yasya svaṃ bhavati । bhavati hāsya svaṃ ya evametatsāmnaḥ svaṃ
veda ॥ 25॥

mantra 26[I.iii.26]
tasya haitasya sāmno yaḥ suvarṇaṃ veda bhavati hāsya suvarṇam । tasya vai
svara eva suvarṇam । bhavati hāsya suvarṇaṃ ya evametatsāmnaḥ suvarṇaṃ
veda ॥ 26॥

mantra 27[I.iii.27]
tasya haitasya sāmno yaḥ pratiṣṭhāṃ veda prati ha tiṣṭhati । tasya
vai vāgeva pratiṣṭhā vāci hi khalveṣa etatprāṇaḥ pratiṣṭhito gīyate
'nna ityu haika āhuḥ ॥ 27॥

mantra 28[I.iii.28]
athātaḥ pavamānānāmevābhyārohaḥ । sa vai khalu prastotā sāma
prastauti । sa yatra prastuyāt tadetāni japedasato mā sad gamaya
tamaso mā jyotirgamaya mṛtyormā'mṛtaṃ gamayeti । sa yadāhāsato mā
sadgamayeti mṛtyurvā asat sadamṛtaṃ mṛtyormā'mṛtaṃ gamayāmṛtaṃ
mā kurvityevaitadāha । tamaso mā jyotirgamayeti mṛtyurvai tamo
jyotiramṛtaṃ mṛtyormāmṛtaṃ gamayāmṛtaṃ mā kurvityevaitadāha ।
mṛtyormāmṛtaṃ gamayeti nātra tirohitamivāstyatha yānītarāṇi
stotrāṇi teṣvātmane'nnādyamāgāyet tasmādu teṣu varaṃ vṛṇīta yaṃ
kāmaṃ kāmayeta tam̐ । sa eṣa evaṃvidudgātā''tmane vā yajamānāya vā
yaṃ kāmaṃ kāmayate tamāgāyati । taddhaitallokajideva na haivālokyatāyā
āśāsti ya evametatsāma veda ॥ 28॥

iti tṛtīyaṃ brāhmaṇam ॥

atha caturthaṃ brāhmaṇam ।

mantra 1 [I.iv.1]
ātmaivedamagra āsītpuruṣavidhaḥ । so'nuvīkṣya nānyadātmano'paśyat
so'hamasmītyagre vyāharat tato'hannāmābhavat । tasmādapyetarhyāmantrito
'hamayamityevāgra uktvā'thānyannāma prabrūte yadasya bhavati । sa
yatpūrvo'smātsarvasmātsarvānpāpmana auṣat tasmātpuruṣaḥ । oṣati ha
vai sa taṃ yo'smātpūrvo bubhūṣati ya evaṃ veda ॥ 1॥

mantra 2[I.iv.2]
so'bibhet tasmādekākī bibheti । sa hāyamīkṣāṃ cakre yanmadanyannāsti
kasmānnu bibhemīti । tata evāsya bhayaṃ vīyāya । kasmāddhyabheṣyat
dvitīyādvai bhayaṃ bhavati ॥ 2॥

mantra 3[I.iv.3]
sa vai naiva reme tasmādekākī na ramate । sa dvitīyamaicchat
sa haitāvānāsa yathā strīpumām̐sau sampariṣvaktau ।
sa imamevā''tmānaṃ dvedhā'pātayat । tataḥ patiśca patnī
cābhavatām । tasmādidamardhabṛgalamiva sva iti ha smā''ha
yājñavalkyastasmādayamākāśaḥ striyā pūryata eva । tām̐ samabhavat
tato manuṣyā ajāyanta ॥ 3॥

mantra 4[I.iv.4]
so heyamīkṣāṃ cakre kathaṃ nu mā''tmana eva janayitvā
sambhavati । hanta tiro'sānīti । sā gaurabhavad ṛṣabha
itarastām̐ samevābhavat tato gāvo'jāyanta । vaḍavetarā'bhavad
aśvavṛṣa itaro gardabhītarā gardabha itarastām̐ samevābhavat
tata ekaśaphamajāyata ajetarā'bhavad vasta itaro'viritarā meṣa
itarastām̐ samevābhavat tato'jāvayo'jāyantaivameva yadidaṃ kiñca
mithunamā pipīlikābhyastatsarvamasṛjata ॥ 4॥

mantra 5[I.iv.5]
so'vedahaṃ vāva sṛṣṭirasmyaham̐ hīdam̐ sarvamasṛkṣīti ।
tataḥ sṛṣṭirabhavat sṛṣṭyām̐ hāsyaitasyāṃ bhavati ya evaṃ veda ॥ 5॥

mantra 6[I.iv.6]
athetyabhyamanthat sa mukhācca yonerhastābhyāṃ
cāgnimasṛjata । tasmādetadubhayamalomakamantarato'lomakā
hi yonirantaratastadyadidamāhuramuṃ yajāmuṃ yajetyekaikaṃ
devametasyaiva sā visṛṣṭireṣa u hyeva sarve devā atha
yatkiñcedamārdraṃ tadretaso'sṛjata tadu somaḥ । etāvadvā
idam̐ sarvamannaṃ caivānnādaśca soma evānnamagnirannādaḥ ।
saiṣā brahmaṇo'tisṛṣṭiryacchreyaso devānasṛjatātha yanmartyaḥ
sannamṛtānasṛjata tasmādatisṛṣṭiratisṛṣṭyām̐ hāsyaitasyāṃ
bhavati ya evaṃ veda ॥ 6॥

mantra 7[I.iv.7]
taddhedaṃ tarhyavyākṛtamāsīt tannāmarūpābhyāmeva vyākriyatāsau
nāmā'yamidam̐rūpa iti । tadidamapyetarhi nāmarūpābhyāmeva
vyākriyate'sau nāmāyamidam̐rūpa iti । sa eṣa iha praviṣṭa ā
nakhāgrebhyo yathā kṣuraḥ kṣuradhāne'vahitaḥ syād viśvambharo vā
viśvambharakulāye taṃ na paśyantyakṛtsno hi saḥ prāṇanneva prāṇo
nāma bhavati vadanvāk paśyaṃścakṣuḥ śṛṇvañhrotraṃ manvāno
manastānyasyaitāni karmanāmānyeva । sa yo'ta ekaikamupāste na sa
vedākṛtsno hyeṣo'ta ekaikena bhavatyātmetyevopāsītātra hyete
sarva ekaṃ bhavanti । tadetatpadanīyamasya sarvasya yadayamātmā'nena
hyetatsarvaṃ veda । yathā ha vai padenānuvindedevaṃ kīrtim̐ ślokaṃ
vindate ya evaṃ veda ॥ 7॥

mantra 8[I.iv.8]
tadetatpreyaḥ putrāt preyo vittāt preyo'nyasmāt sarvasmādantarataraṃ
yadayamātmā । sa yo'nyamātmanaḥ priyaṃ bruvāṇaṃ brūyāt priyam̐
rotsyatītīśvaro ha tathaiva syādātmānameva priyamupāsīta । sa ya
ātmānameva priyamupāste na hāsya priyaṃ pramāyukaṃ bhavati ॥ 8॥

mantra 9[I.iv.9]
tadāhuryadbrahmavidyayā sarvaṃ bhaviṣyanto manuṣyā manyante kimu
tadbrahmāved yasmāttatsarvamabhavaditi ॥ 9॥

mantra 10[I.iv.10]
brahma vā idamagra āsīt tadātmānamevāvedahaṃ brahmāsmīti ।
tasmāttatsarvamabhavat tadyo yo devānāṃ pratyabudhyata sa eva tadabhavat
tatharṣīṇāṃ tathā manuṣyāṇām । taddhaitatpaśyannṛṣirvāmadevaḥ
pratipede'haṃ manurabhavam̐ sūryaśceti । tadidamapyetarhi
ya evaṃ vedāhaṃ brahmāsmīti iti sa idam̐ sarvaṃ bhavati tasya ha
na devāścanābhūtyā īśata ātmā hyeṣām̐ sa bhavatyatha yo'nyāṃ
devatāmupāste'nyo'sāvanyo'hamasmīti na sa veda । yathā paśurevam̐
sa devānām । yathā ha vai bahavaḥ paśavo manuṣyaṃ bhuñjyurevamekaikaḥ
puruṣo devānbhunaktyekasminneva paśāvādīyamāne'priyaṃ bhavati
kimu bahuṣu tasmādeṣāṃ tanna priyaṃ yadetanmanuṣyā vidyuḥ ॥ 10॥
manuṣyāsvidyurmantra 11

mantra 11[I.iv.11]
brahma vā idamagra āsīdekameva । tadekam̐ sanna vyabhavat tacchreyo
rūpamatyasṛjata kṣatraṃ yānyetāni devatrā kṣatrāṇīndro varuṇaḥ somo
rudraḥ parjanyo yamo mṛtyurīśāna iti । tasmātkṣatrātparaṃ nāsti
tasmādbrāhmaṇaḥ kṣatriyamadhastādupāste rājasūye । kṣatra eva tadyaśo
dadhāti saiṣā kṣatrasya yoniryadbrahma । tasmādyadyapi rājā paramatāṃ
gacchati brahmaivāntata upaniśrayati svāṃ yonim । ya u enam̐ hinasti
svām̐ sa yonimṛcchati । sa pāpīyānbhavati yathā śreyām̐sam̐
him̐sitvā ॥ 11॥

mantra 12[I.iv.12]
sa naiva vyabhavat sa viśamasṛjata yānyetāni devajātāni gaṇaśa
ākhyāyante vasavo rudrā ādityā viśve devā maruta iti ॥ 12॥

mantra 13[I.iv.13]
sa naiva vyabhavat sa śaudraṃ varṇamasṛjata pūṣaṇamiyaṃ vai
pūṣeyam̐ hīdam̐ sarvaṃ puṣyati yadidaṃ kiñca ॥ 13॥

mantra 14[I.iv.14]
sa naiva vyabhavat tacchreyo rūpamatyasṛjata dharmam ।
tadetatkṣatrasya kṣatraṃ yaddharmastasmāddharmāt paraṃ nāstyatho
abalīyān balīyām̐samāśam̐sate dharmeṇa yathā rājñaivam । yo vai sa
dharmaḥ satyaṃ vai tat tasmātsatyaṃ vadantamāhurdharmaṃ vadatīti dharmaṃ
vā vadantam̐ satyaṃ vadatītyetaddhyevaitadubhayaṃ bhavati ॥ 14॥

mantra 15[I.iv.15]
tadetadbrahma kṣatraṃ viṭ śūdrastadagninaiva deveṣu brahmābhavad
brāhmaṇo manuṣyeṣu kṣatriyeṇa kṣatriyo vaiśyena vaiśyaḥ śūdreṇa
śūdrastasmādagnāveva deveṣu lokamicchante brāhmaṇe manuṣyeṣvetābhyām̐
hi rūpābhyāṃ brahmābhavadatha yo ha vā asmāllokātsvaṃ
lokamadṛṣṭvā praiti sa enamavidito na bhunakti yathā vedo
vā'nanūkto'nyadvā karmākṛtam । yadi ha vā apyanevaṃvinmahatpuṇyaṃ
karma karoti taddhāsyāntataḥ kṣīyata evā''tmānameva lokamupāsīta । sa
ya ātmānameva lokamupāste na hāsya karma kṣīyate'smāddhyevā''tmano
yadyatkāmayate tattatsṛjate ॥ 15॥

mantra 16[I.iv.16]
atho ayaṃ vā ātmā sarveṣāṃ bhūtānāṃ lokaḥ sa yajjuhoti yadyajate
tena devānāṃ loko'tha yadanubrūte tena ṛṣīṇāmatha yat pitṛbhyo
nipṛṇāti atha yatprajāmicchate tena pitṛṇāmatha yanmanuṣyānvāsayate
yadebhyo'śanaṃ dadāti tena manuṣyāṇāmatha yatpaśubhyastṛṇodakaṃ
vindati tena paśūnāṃ yadasya gṛheṣu śvāpadā vayām̐syā pipīlikābhya
upajīvanti tena teṣāṃ loko yathā ha vai svāya lokāyāriṣṭimicched
evam̐ haivaṃvide sarvadā sarvāṇi bhūtānyariṣṭimicchanti । tadvā
etadviditaṃ mīmām̐sitam ॥ 16॥

mantra 17[I.iv.17]
ātmaivedamagra āsīdeka eva । so'kāmayata jāyā me syādatha prajāyeyātha
vittaṃ me syāt atha karma kurvīyetyetāvānvai kāmo neccham̐ścanāto
bhūyo vindet tasmādapyetarhyekākī kāmayate jāyā me syādatha prajāyeyātha
vittaṃ me syādatha karma kurvīyeti । sa yāvadapyeteṣāmekaikaṃ
na prāpnotyakṛtsna eva tāvan manyate । tasyo kṛtsnatā । mana
evāsyā''tmā vāgjāyā prāṇaḥ prajā cakṣurmānuṣaṃ vittaṃ cakṣuṣā
hi tadvindate śrotraṃ daivam̐ śrotreṇa hi tacchṛṇotyātmaivāsya
karmā''tmanā hi karma karoti । sa eṣa pāṅkto yajñaḥ pāṅktaḥ paśuḥ
pāṅktaḥ puruṣaḥ pāṅktamidam̐ sarvaṃ yadidaṃ kiñca । tadidam̐
sarvamāpnoti ya evaṃ veda ॥ 17॥

iti caturthaṃ brāhmaṇam ॥

atha pañcamaṃ brāhmaṇam ।

mantra 1[I.v.1]
yatsaptānnāni medhayā tapasā''janayatpitā । ekamasya sādhāraṇaṃ dve
devānabhājayat ॥ trīṇyātmane'kuruta paśubhya ekaṃ prāyacchat ।
tasmintsarvaṃ pratiṣṭhitaṃ yacca prāṇiti yacca na ॥ kasmāttāni
na kṣīyante'dyamānāni sarvadā । yo vai tāmakṣitiṃ veda so'nnamatti
pratīkena sa devānapigacchati sa ūrjamupajīvatīti ślokāḥ ॥ 1॥

mantra 2[I.v.2]
yatsaptānnāni medhayā tapasā'janayatpiteti medhayā hi tapasājanayat
pitaikamasya sādhāraṇamitīdamevāsya tatsādhāraṇamannaṃ yadidamadyate ।
sa ya etadupāste na sa pāpmano vyāvartate miśram̐ hyetat । dve
devānabhājayaditi hutaṃ ca prahutaṃ ca tasmād devebhyo juhvati ca pra
ca juhvatyatho āhurdarśapūrṇamāsāviti । tasmānneṣṭiyājukaḥ syāt ।
paśubhya ekaṃ prāyacchaditi tatpayaḥ । payo hyevāgre manuṣyāśca
paśavaścopajīvanti । tasmāt kumāraṃ jātaṃ ghṛtaṃ vai vāgre
pratilehayanti stanaṃ vā'nudhāpayantyatha vatsaṃ jātamāhuratṛṇāda
iti । tasminsarvaṃ pratiṣṭhitaṃ yacca prāṇiti yacca neti payasi
hīdam̐ sarvaṃ pratiṣṭhitaṃ yacca prāṇiti yacca na । tadyadidamāhuḥ
saṃvatsaraṃ payasā juhvadapa punarmṛtyuṃ jayatīti na tathā vidyād
yadahareva juhoti tadahaḥ punarmṛtyumapajayatyevaṃ vidvān sarvam̐
hi devebhyo'nnādyaṃ prayacchati । kasmāttāni na kṣīyante'dyamānāni
sarvadeti puruṣo vā akṣitiḥ sa hīdamannaṃ punaḥ punarjanayate ।
yo vai tāmakṣitiṃ vedeti puruṣo vā akṣitiḥ । sa hīdamannaṃ dhiyā
dhiyā janayate karmabhiryaddhaitanna kuryāt kṣīyeta ha । so'nnamatti
pratīkeneti mukhaṃ pratīkaṃ mukhenetyetat sa devānapigacchati sa
ūrjamupajīvatīti praśam̐sā ॥ 2॥

mantra 3[I.v.3]
trīṇyātmane'kuruteti mano vācaṃ prāṇaṃ tānyātmane'kurutānyatramanā
abhūvaṃ nādarśamanyatramanā abhūvaṃ nāśrauṣamiti manasā hyeva paśyati
manasā śṛṇoti । kāmaḥ saṅkalpo vicikitsā śraddhā'śraddhā
dhṛtiradhṛtirhrīrdhīrbhīrityetatsarvaṃ mana eva । tasmādapi
pṛṣṭhata upaspṛṣṭo manasā vijānāti । yaḥ kaśca śabdo vāgeva
saiṣā hyantamāyattaiṣā hi na । prāṇo'pāno vyāna udānaḥ samāno'na
ityetatsarvaṃ prāṇa evaitanmayo vā ayamātmā vāṅmayo manomayaḥ prāṇamayaḥ ॥ 3॥

mantra 4[I.v.4]
trayo lokā eta eva vāgevāyaṃ loko mano'ntarikṣalokaḥ prāṇo'sau lokaḥ ॥ 4॥

mantra 5[I.v.5.]
trayo vedā eta eva vāgevargvedo mano yajurvedaḥ prāṇaḥ sāmavedaḥ ॥ 5॥

mantra 6[I.v.6]
devāḥ pitaro manuṣyā eta eva vāgeva devā manaḥ pitaraḥ prāṇo manuṣyāḥ ।

mantra 7[I.v.7]
pitā mātā prajaita eva mana eva pitā vāṅmātā prāṇaḥ prajā ॥ 7॥

mantra 8[.I.v.8]
vijñātaṃ vijijñāsyamavijñātameta eva yatkiñca vijñātaṃ
vācastadrūpaṃ vāgghi vijñātā vāgenaṃ tadbhūtvā'vati ॥ 8॥

mantra 9[I.v.9]
yatkiñca vijijñāsyaṃ manasastadrūpaṃ mano hi vijijñāsyaṃ mana enaṃ
tadbhūtvā'vati ॥ 9॥

mantra 10[I.v.10]
yatkiñcāvijñātaṃ prāṇasya tadrūpaṃ prāṇo hyavijñātaḥ prāṇa enaṃ
tadbhūtvā'vati ॥ 10॥

mantra 11[I.v.11]
tasyai vācaḥ pṛthivī śarīraṃ jyotī rūpamayamagnistadyāvatyeva vāk
tāvatī pṛthivī tāvānayamagniḥ ॥ 11॥

mantra 12[I.v.12]
athaitasya manaso dyauḥ śarīraṃ jyotīrūpamasāvādityastadyāvadeva
manastāvatī dyaustāvānasāvādityastau mithunam̐ samaitāṃ tataḥ
prāṇo'jāyata । sa indraḥ sa eṣo'sapatno dvitīyo vai sapatno nāsya
sapatno bhavati ya evaṃ veda ॥ 12॥

mantra 13[I.v.13]
athaitasya prāṇasyā''paḥ śarīraṃ jyotīrūpamasau candrastadyāvāneva
prāṇastāvatya āpastāvānasau candraḥ । ta ete sarva eva samāḥ
sarve'nantāḥ । sa yo haitānantavata upāste'ntavantam̐ sa lokaṃ
jayatyatha yo haitānanantānupāste'nantam̐ sa lokaṃ jayati ॥ 13॥

mantra 14[I.v.14]
sa eṣa saṃvatsaraḥ prajāpatiḥ ṣoḍaśakalastasya rātraya eva pañcadaśa
kalā dhruvaivāsya ṣoḍaśī kalā । sa rātribhirevā'' ca pūryate
'pa ca kṣīyate । so'māvāsyām̐ rātrimetayā ṣoḍaśyā kalayā
sarvamidaṃ prāṇabhṛdanupraviśya tataḥ prātarjāyate । tasmādetām̐
rātriṃ prāṇabhṛtaḥ prāṇaṃ na vicchindyādapi kṛkalāsasyaitasyā eva
devatāyā apacityai ॥ 14॥ apacityai

mantra 15[I.v.15]
yo vai sa saṃvatsaraḥ prajāpatiḥ ṣoḍaśakalo'yameva sa
yo'yamevaṃvitpuruṣastasya vittameva pañcadaśa kalā ātmaivāsya
ṣoḍaśī kalā । sa vittenaivā'' ca pūryate'pa ca kṣīyate ।
tadetannabhyaṃ yadayamātmā pradhirvittam । tasmādyadyapi sarvajyāniṃ
jīyata ātmanā cejjīvati pradhinā'gādityevā''huḥ ॥ 15॥

mantra 16[I.v.16]
atha trayo vāva lokāḥ manuṣyalokā pitṛloko devaloka iti । so'yaṃ
manuṣyalokaḥ putreṇaiva jayyo nānyena karmaṇā karmaṇā pitṛloko vidyayā
devaloko devaloko vai lokānām̐ śreṣṭhastasmādvidyāṃ praśam̐santi ॥ 16॥

mantra 17[I.v.17]
athātaḥ samprattiryadā praiṣyanmanyate'tha putramāha tvaṃ brahma
tvaṃ yajñastvaṃ loka iti । sa putraḥ pratyāhāhaṃ brahmāhaṃ yajño
'ham loka iti । yadvai kiñcānūktaṃ tasya sarvasya brahmetyekatā ।
ye vai ke ca yajñāsteṣām̐ sarveṣāṃ yajña ityekatā ।
ye vai keca lokāsteṣām̐ sarveṣāṃ loka ityekataitāvadvā
idam̐ sarvametanmā sarvam̐ sannayamito'bhunajaditi ।
tasmāt putramanuśiṣṭaṃ lokyamāhustasmādenamanuśāsati । sa
yadaivaṃvidasmāllokātpraityathaibhireva prāṇaiḥ saha putramāviśati ।
sa yadyanena kiñcidakṣṇayā'kṛtaṃ bhavati tasmādenam̐
sarvasmātputro muñcati । tasmāt putro nāma । sa putreṇaivāsmiṃlloke
pratitiṣṭhatyathainamete daivāḥ prāṇā amṛtā āviśanti ॥ 17॥

mantra 18[I.v.18]
pṛthivyai cainamagneśca daivī vāgāviśati । sā vai daivī vāgyayā
yadyadeva vadati tattadbhavati ॥ 18॥

mantra 19[I.v.19]
divaścainamādityācca daivaṃ mana āviśati । tadvai daivaṃ mano
yenā''nandyeva bhavatyatho na śocati ॥ 19॥

mantra 20[I.v.20]
adbhyaścainaṃ candramasaśca daivaḥ prāṇa āviśati । sa vai daivaḥ
prāṇo yaḥ sañcaram̐ścāsañcaram̐śca na vyathate'tho
na riṣyati । sa evaṃvitsarveṣāṃ bhūtānāmātmā bhavati । yathaiṣā
devataivam̐ sa yathaitāṃ devatām̐ sarvāṇi bhūtānyavantyevam̐
haivaṃvidam̐ sarvāṇi bhūtānyavanti । yadu kiñcemāḥ prajāḥ
śocantyamaivā''sāṃ tadbhavati puṇyamevāmuṃ gacchati na ha vai
devānpāpaṃ gacchati ॥ 20॥

mantra 21[I.v.21]
athāto vratamīmām̐sā । prajāpatirha karmāṇi sasṛje । tāni
sṛṣṭānyanyo'nyenāspardhanta vadiṣyāmyevāhamiti vāgdadhre
drakṣyāmyahamiti cakṣuḥ śroṣyāmyahamiti śrotram । evamanyāni
karmāṇi yathākarma । tāni mṛtyuḥ śramo bhūtvopayeme tānyāpnot
tānyāptvā mṛtyuravārundha । tasmācchrāmyatyeva vāk śrāmyati
cakṣuḥ śrāmyati śrotramathemameva nā''pnod yo'yaṃ
madhyamaḥ prāṇastāni jñātuṃ dadhrire'yaṃ vai naḥ śreṣṭho
yaḥ sañcaram̐ścāsañcaram̐śca na vyathate'tho na
riṣyati । hantāsyaiva sarve rūpamasāmeti । ta etasyaiva sarve
rūpamabhavam̐stasmādeta etenā''khyāyante prāṇā iti । tena ha vāva
tatkulamācakṣate yasminkule bhavati ya evaṃ veda । ya u haivaṃvidā
spardhate'nuśuṣyatyanuśuṣya haivāntato mriyata ityadhyātmam ॥ 21॥

mantra 22[I.v.22]
athādhidaivataṃ jvaliṣyāmyevāhamityagnirdadhre tapsyāmyahamityādityo
bhāsyāmyahamiti candramā evamanyā devatā yathādaivatam̐ । sa
yathaiṣāṃ prāṇānāṃ madhyamaḥ prāṇa evametāsāṃ devatānāṃ vāyurnimlocanti
hyanyā devatā na vāyuḥ । saiṣā'nastamitā devatā yadvāyuḥ ॥ 22॥

mantra 23[I.v.23]
athaiṣa śloko bhavati yataścodeti sūryo'staṃ yatra ca gacchatīti
prāṇādvā eṣa udeti prāṇe'stameti taṃ devāścakrire dharmam̐,
sa evādya sa u śva iti । yadvā ete'murhyadhriyanta tadevāpyadya
kurvanti । tasmādekameva vrataṃ caret prāṇyāccaivāpānyācca nenmā
pāpmā mṛtyurāpnavaditi । yadyu caret samāpipayiṣet teno etasyai
devatāyai sāyujyam̐ salokatāṃ jayati ॥ 23॥

iti pañcamaṃ brāhmaṇam ॥

atha ṣaṣṭhaṃ brāhmaṇam ।

mantra 1[I.vi.1]
trayaṃ vā idaṃ nāma rūpaṃ karma । teṣāṃ nāmnāṃ vāgityetadeṣāmukthamato
hi sarvāṇi nāmānyuttiṣṭhanti । etadeṣām̐ sāmaitaddhi sarvairnāmabhiḥ
samametadeṣāṃ brahmaitaddhi sarvāṇi nāmāni bibharti ॥ 1॥

mantra 2[I.vi.2]
atha rūpāṇāṃ cakṣurityetadeṣāmukthamato hi sarvāṇi rūpāṇyuttiṣṭhanti ।
etadeṣām̐ sāmaitaddhi sarvai rūpaiḥ samam । etadeṣāṃ brahmaitaddhi
sarvāṇi rūpāṇi bibharti ॥ 2॥

mantra 3[I.vi.3]
atha karmaṇāmātmetyetadeṣāmukthamato hi sarvāṇi
karmāṇyuttiṣṭhantyetadeṣām̐ sāmaitaddhi sarvaiḥ karmabhiḥ samaṃ
etadeṣāṃ brahmaitaddhi sarvāṇi karmāṇi bibharti । tadetattrayam̐
sadekamayamātmā''tmo ekaḥ sannetattrayam । tadetadamṛtam̐ satyena
channam । prāṇo vā amṛtaṃ nāmarūpe satyaṃ tābhyāmayaṃ prāṇaśchannaḥ ॥ 3॥

iti ṣaṣṭhaṃ brāhmaṇam ॥

॥ iti bṛhadāraṇyakopaniṣadi prathamo'dhyāyaḥ ॥

atha dvitīyo'dhyāyaḥ ।

atha prathamaṃ brāhmaṇam ।

mantra 1[II.i.1]
oṃ dṛptabālākirhānūcāno gārgya āsa । sa hovācājātaśatruṃ kāśyaṃ
brahma te bravāṇīti । sa hovācājātaśatruḥ sahasrametasyāṃ vāci dadmo
janako janaka iti vai janā dhāvantīti ॥ 1॥

mantra 2[II.i.2]
sa hovāca gārgyo ya evāsāvāditye puruṣa etamevāhaṃ brahmopāsa iti ।
sa hovācājātaśatrurmā maitasminsaṃvadiṣṭhā । atiṣṭhāḥ sarveṣāṃ
bhūtānāṃ mūrdhā rājeti vā ahametamupāsa iti । sa ya etamevamupāste
'tiṣṭhāḥ sarveṣāṃ bhūtānāṃ mūrdhā rājā bhavati ॥ 2॥

mantra 3[II.i.3]
sa hovāca gārgyo ya evāsau candre puruṣa etamevāhaṃ brahmopāsa iti ।
sa hovācājātaśatrurmā maitasminsaṃvadiṣṭhā । bṛhan pāṇḍaravāsāḥ
somo rājeti vā ahametamupāsa iti । sa ya etamevamupāste'haraharha
sutaḥ prasuto bhavati nāsyānnaṃ kṣīyate ॥ 3॥

mantra 4[II.i.4]
sa hovāca gārgyo ya evāsau vidyuti puruṣa etamevāhaṃ brahmopāsa iti ।
sa hovācājātaśatrurmā maitasminsaṃvadiṣṭhāstejasvīti vā ahametamupāsa
iti । sa ya etamevamupāste tejasvī ha bhavati tejasvinī hāsya prajā
bhavati ॥ 4॥

mantra 5[II.i.5]
sa hovāca gārgyo ya evāyamākāśe puruṣa etamevāhaṃ brahmopāsa iti ।
sa hovācājātaśatrurmā maitasminsaṃvadiṣṭhāḥ । pūrṇamapravartīti
vā ahametamupāsa iti । sa ya etamevamupāste pūryate prajayā
paśubhirnāsyāsmāllokātprajodvartate ॥ 5॥

mantra 6[II.i.6]
sa hovāca gārgyo ya evāyaṃ vāyau puruṣa etamevāhaṃ brahmopāsa
iti । sa hovācājātaśatrurmā maitasminsaṃvadiṣṭhā । indro
vaikuṇṭho'parājitā seneti vā ahametamupāsa iti । sa ya etamevamupāste
jiṣṇurhāparājiṣṇurbhavatyanyatastyajāyī ॥ 6॥

mantra 7[II.i.7]
sa hovāca gārgyo ya evāyamagnau puruṣa etamevāhaṃ brahmopāsa iti ।
sa hovācājātaśatrurmā maitasminsaṃvadiṣṭhā । viṣāsahiriti
vā ahametamupāsa iti । sa ya etamevamupāste viṣāsahirha bhavati
viṣāsahirhāsya prajā bhavati ॥ 7॥

mantra 8[II.i.8]
sa hovāca gārgyo ya evāyamapsu puruṣa etamevāhaṃ brahmopāsa
iti । sa hovācājātaśatrurmā maitasminsaṃvadiṣṭhāḥ । pratirūpa
iti vā ahametamupāsa iti । sa ya etamevamupāste pratirūpam̐
haivainamupagacchati nāpratirūpamatho pratirūpo'smājjāyate ॥ 8॥

mantra 9[II.i.9]
sa hovāca gārgyo ya evāyamādarśe puruṣa etamevāhaṃ brahmopāsa iti ।
sa hovācājātaśatrurmā maitasminsaṃvadiṣṭhā । rociṣṇuriti
vā ahametamupāsa iti । sa ya etamevamupāste rociṣṇurha
bhavati rociṣṇurhāsya prajā bhavatyatho yaiḥ sannigacchati
sarvām̐stānatirocate ॥ 9॥

mantra 10[II.i.10]
sa hovāca gārgyo ya evāyaṃ yantaṃ paścāchabdo'nūdetyetamevāhaṃ
brahmopāsa iti । sa hovācājātaśatrurmā maitasminsaṃvadiṣṭhā । asuriti
vā ahametamupāsa iti । sa ya etamevamupāste sarvam̐ haivāsmim̐lloka
āyureti nainaṃ purā kālātprāṇo jahāti ॥ 10॥

mantra 11[II.i.11]
sa hovāca gārgyo ya evāyaṃ dikṣu puruṣa etamevāhaṃ brahmopāsa iti ।
sa hovācājātaśatrurmā maitasminsaṃvadiṣṭhā । dvitīyo'napaga iti
vā ahametamupāsa iti । sa ya etamevamupāste dvitīyavānha bhavati nāsmād
gaṇaśchidyate ॥ 11॥

mantra 12[II.i.12]
sa hovāca gārgyo ya evāyaṃ chāyāmayaḥ puruṣa etamevāhaṃ brahmopāsa
iti । sa hovācājātaśatrurmā maitasminsaṃvadiṣṭhā । mṛtyuriti vā
ahametamupāsa iti । sa ya etamevamupāste sarvam̐ haivāsmim̐lloka
āyureti nainaṃ purā kālānmṛtyurāgacchati ॥ 12॥

mantra 13[II.i.13]
sa hovāca gārgyo ya evāyamātmani puruṣa etamevāhaṃ brahmopāsa iti । sa
hovācājātaśatrurmā maitasminsaṃvadiṣṭhā ātmanvīti vā ahametamupāsa iti ।
sa ya etamevamupāsta ātmanvī ha bhavatyātmanvinī hāsya prajā bhavati ।
sa ha tūṣṇīmāsa gārgyaḥ ॥ 13॥

mantra 14[II.i.14]
sa hovācājātaśatruretāvannū 3 ityetāvaddhīti । naitāvatā viditaṃ
bhavatīti । sa hovāca gārgya upa tvā yānīti ॥ 14॥

mantra 15[II.i.15]
sa hovācājātaśatruḥ pratilomaṃ caitadyadbrāhmaṇaḥ
kṣatriyamupeyād brahma me vakṣyatīti । vyeva tvā
jñapayiṣyāmīti । taṃ pāṇāvādāyottasthau । tau ha puruṣam̐
suptamājagmatustametairnāmabhirāmantrayāṃcakre bṛhanpāṇḍaravāsaḥ
soma rājanniti । sa nottasthau । taṃ pāṇinā''peṣaṃ bodhayāṃcakāra ।
sa hottasthau ॥ 15॥

mantra 16[II.i.16]
sa hovācājātaśatruryatraiṣa etat supto'bhūd ya eṣa vijñānamayaḥ
puruṣaḥ kvaiṣa tadā'bhūt kuta etadāgāditi । tadu ha na mene gārgyaḥ ॥ 16॥

mantra 17[II.i.17]
sa hovācājātaśatruryatraiṣa etat।supto'bhūd ya eṣa vijñānamayaḥ
puruṣastadeṣāṃ prāṇānāṃ vijñānena vijñānamādāya ya eṣo'ntarhṛdaya
ākāśastasmiñchete । tāni yadā gṛhṇāti atha haitatpuruṣaḥ
svapiti nāma । tadgṛhīta eva prāṇo bhavati gṛhītā vāg gṛhītaṃ
cakṣurgṛhītam̐ śrotraṃ gṛhītaṃ manaḥ ॥ 17॥

mantra 18[II.i.18]
sa yatraitatsvapnyayā carati te hāsya lokāstaduteva mahārājo
bhavatyuteva mahābrāhmaṇa utevoccāvacaṃ nigacchati । sa yathā
mahārājo jānapadāngṛhītvā sve janapade yathākāmaṃ parivartetaivamevaiṣa
etatprāṇāngṛhītvā sve śarīre yathākāmaṃ parivartate ॥ 18॥ gṛhītvā
sve śarīre yathākāmam parivartate

mantra 19[II.i.19]
atha yadā suṣupto bhavati yadā na kasyacana veda hitā nāma nāḍyo
dvāsaptatiḥ sahasrāṇi hṛdayātpurītatamabhipratiṣṭhante । tābhiḥ
pratyavasṛpya purītati śete । sa yathā kumāro vā mahārājo vā
mahābrāhmaṇo vā'tighnīmānandasya gatvā śayītaivamevaiṣa etacchete ॥ 19॥

mantra 20[II.i.20]
sa yathorṇabhistantunoccared yathā'gneḥ kṣudrā viṣphuliṅgā
vyuccarantyevamevāsmādātmanaḥ sarve prāṇāḥ sarve lokāḥ sarve
devāḥ sarvāṇi bhūtāni vyuccaranti । sarve ॥। vyuccaranti
tasyopaniṣatsatyasya satyamiti prāṇā vai satyaṃ teṣāmeṣa satyam ॥ 20॥

iti prathamaṃ brāhmaṇam ॥

atha dvitīyaṃ brāhmaṇam ।

mantra 1[II.ii.1]
yo ha vai śiśum̐ sādhānam̐ sapratyādhānam̐ sasthūṇam̐
sadāmaṃ veda sapta ha dviṣato bhrātṛvyānavaruṇaddhyayaṃ vāva
śiśuryo'yaṃ madhyamaḥ prāṇastasyedamevā''dhānamidaṃ pratyādhānaṃ
prāṇaḥ sthūṇā'nnaṃ dāma ॥ 1॥

mantra 2[II.ii.2]
tametāḥ saptākṣitaya upatiṣṭhante tadyā imā akṣam̐llohinyo
rājayastābhirenam̐ rudro'nvāyatto'tha yā akṣannāpastābhiḥ parjanyo
yā kanīnakā tayā''dityo yatkṛṣṇaṃ, tenāgniryacchuklaṃ tenendro
'dharayainaṃ vartanyā pṛthivyanvāyattā dyauruttarayā । nāsyānnaṃ
kṣīyate ya evaṃ veda ॥ 2॥

mantra 3[II.ii.3]
tadeṣa śloko bhavati । arvāgbilaścamasa ūrdhvabudhnastasminyaśo
nihitaṃ viśvarūpam । tasyā''sata ṛṣayaḥ sapta tīre vāgaṣṭamī
brahmaṇā saṃvidāneti । arvāgbilaścamasa ūrdhvabudhna itīdaṃ tacchiraḥ
eṣa hyarvāgbilaścamasa ūrdhvabudhnaḥ । tasminyaśo nihitaṃ
viśvarūpamiti prāṇā vai yaśo nihitaṃ viśvarūpaṃ prāṇānetadāha ।
tasyā''sata ṛṣayaḥ sapta tīra iti prāṇā vā ṛṣayaḥ prāṇāṇetadāha ।
vāgaṣṭamī brahmaṇā saṃvidāneti vāgghyaṣṭamī brahmaṇā saṃvitte ॥ 3॥

mantra 4[II.ii.4]
imāveva gotamabharadvājāvayameva gotamo'yaṃ bharadvāja imāveva
viśvāmitrajamadagnī ayameva viśvāmitro'yaṃ jamadagnirimāveva
vasiṣṭhakaśyapāvayameva vasiṣṭho'yaṃ kaśyapo vāgevātrirvācā
hyannamadyate'ttirha vai nāmaitadyadatririti । sarvasyāttā bhavati
sarvamasyānnaṃ bhavati ya evaṃ veda ॥ 4॥

iti dvitīyaṃ brāhmaṇam ॥

atha tṛtīyaṃ brāhmaṇam ।

mantra 1[II.iii.1]
dve vāva brahmaṇo rūpe mūrtaṃ caivāmūrtaṃ ca martyaṃ cāmṛtaṃ ca
sthitaṃ ca yacca sacca tyacca ॥ 1॥

mantra 2[II.iii.2]
tadetanmūrtaṃ yadanyadvāyoścāntarikṣāccaitanmartyametatsthitaṃ
etatsat । tasyaitasya mūrtasyaitasya martyasyaitasya sthitasyaitasya
sata eṣa raso ya eṣa tapati sato hyeṣa rasaḥ ॥ 2॥

mantra 3[II.iii.3]
athāmūrtaṃ vāyuścāntarikṣaṃ caitadamṛtametadyadetattyat
tasyaitasyāmūrtasyai tasyāmṛtasyaitasya yata etasya tyasyaiṣa raso
ya eṣa etasminmaṇḍale puruṣastasya hyeṣa rasa । ityadhidaivatam ॥ 3॥

mantra 4[II.iii.4]
athādhyātmamidameva mūrtaṃ yadanyatprāṇācca yaścāyamantarātmannākāśa
etanmartyametatsthitametatsat tasyaitasya mūrtasyai tasya
martyasyaitasya sthitasyaitasya sata eṣa raso yaccakṣuḥ sato hyeṣa
rasaḥ ॥ 4॥

mantra 5[II.iii.5]
athāmūrtaṃ prāṇaśca yaścāyamantarātmannākāśa etadamṛtametadyad
etattyaṃ tasyaitasyāmūrtasyaitasyāmṛtasyaitasya yata etasya tyasyaiṣa
raso yo'yaṃ dakṣiṇe'kṣanpuruṣastyasya hyeṣa rasaḥ ॥ 5॥

mantra 6[II.iii.6]
tasya haitasya puruṣasya rūpam । yathā māhārajanaṃ vāso yathā pāṇḍvāvikaṃ
yathendragopo yathā'gnyarciryathā puṇḍarīkaṃ yathā sakṛdvidyuttam̐ ।
sakṛdvidyutteva ha vā asya śrīrbhavati ya evaṃ vedā thāta ādeśo
neti neti na hyetasmāditi netyanyat paramastyatha nāmadheyam̐ satyasya
satyamiti prāṇā vai satyaṃ teṣāmeṣa satyam ॥ 6॥

iti tṛtīyaṃ brāhmaṇam ॥

atha caturthaṃ brāhmaṇam ।

mantra 1[II.iv.1]
maitreyīti hovāca yājñavalkya udyāsyanvā are'hamasmātsthānādasmi ।
hanta te'nayā kātyāyanyā'ntaṃ karavāṇīti ॥ 1॥

mantra 2[II.iv.2]
sā hovāca maitreyī yannu ma iyaṃ bhagoḥ sarvā pṛthivī vittena
pūrṇā syāt kathaṃ tenāmṛtā syāmiti । neti hovāca yājñavalkyo
yathaivopakaraṇavatāṃ jīvitaṃ tathaiva te jīvitam̐ syādamṛtatvasya
tu nā''śā'sti vitteneti ॥ 2॥

mantra 3[II.iv.3]
sā hovāca maitreyī yenāhaṃ nāmṛtā syāṃ kimahaṃ tena kuryām । yadeva
bhagavānveda tadeva me brūhīti ॥ 3॥

mantra 4[II.iv.4]
sa hovāca yājñavalkyaḥ priyā batāre naḥ satī priyaṃ bhāṣasa ehyāssva
vyākhyāsyāmi te । vyācakṣāṇasya tu me nididhyāsasveti ॥ 4॥

mantra 5[II.iv.5]
sa hovāca na vā are patyuḥ kāmāya patiḥ priyo bhavatyātmanastu kāmāya
patiḥ priyo bhavati । na vā are jāyāyai kāmāya jāyā priyā bhavatyātmanastu
kāmāya jāyā priyā bhavati । na vā are putrāṇāṃ kāmāya putrāḥ priyā
bhavantyātmanastu kāmāya putrāḥ priyā bhavanti । na vā are vittasya
kāmāya vittaṃ priyaṃ bhavatyātmanastu kāmāya vittaṃ priyaṃ bhavati ।
na vā are brahmaṇaḥ kāmāya brahma priyaṃ bhavatyātmanastu kāmāya
brahma priyaṃ bhavati । na vā are kṣatrasya kāmāya kṣatraṃ priyaṃ
bhavatyātmanastu kāmāya kṣatraṃ priyaṃ bhavati । na vā are lokānāṃ
kāmāya lokāḥ priyā bhavantyātmanastu kāmāya lokāḥ priyā bhavanti । na
vā are devānāṃ kāmāya devāḥ priyā bhavantyātmanastu kāmāya devāḥ priyā
bhavanti । na vā are bhūtānāṃ kāmāya bhūtāni priyāṇi bhavantyātmanastu
kāmāya bhūtāni priyāṇi bhavanti । na vā are sarvasya kāmāya sarvaṃ priyaṃ
bhavatyātmanastu kāmāya sarvaṃ priyaṃ bhavatyātmā vā are draṣṭavyaḥ
śrotavyo mantavyo nididhyāsitavyo । maitreyyātmano vā are darśanena
śravaṇena matyā vijñānenedam̐ sarvaṃ viditam ॥ 5॥

mantra 6[II.iv.6]
brahma taṃ parādādyo'nyatrā''tmano brahma veda kṣatraṃ taṃ
parādādyo'nyatrā''tmanaḥ kṣatraṃ veda lokāstaṃ parāduryo'nyatrātmano
lokānveda devāstaṃ parāduryo'nyatrātmano devānveda bhūtāni taṃ
parāduryo'nyatrātmano bhūtāni veda sarvaṃ taṃ parādād yo'nyatrātmanaḥ
sarvaṃ vededaṃ brahmedaṃ kṣatramime lokā ime devā imāni bhūtānīdam̐
sarvaṃ yadayamātmā ॥ 6॥

mantra 7[II.iv.7]
sa yathā dundubherhanyamānasya na bāhyāñchabdāñchaknuyād grahaṇāya
dundubhestu grahaṇena dundubhyāghātasya vā śabdo gṛhītaḥ ॥ 7॥

mantra 8[II.iv.8]
sa yathā śaṅkhasya dhmāyamānasya na bāhyāñchabdāñchaknuyād grahaṇāya
śaṅkhasya tu grahaṇena śaṅkhadhmasya vā śabdo gṛhītaḥ ॥ 8॥

mantra 9[II.iv.9]
sa yathā vīṇāyai vādyamānāyai na bāhyāñchabdāñchaknuyād grahaṇāya
vīṇāyai tu grahaṇena vīṇāvādasya vā śabdo gṛhītaḥ ॥ 9॥

mantra 10[II.iv.10]
sa yathā''rdraidhāgnerabhyāhitātpṛthagdhūmā viniścarantyevaṃ
vā are'sya mahato bhūtasya niḥśvasitametad yadṛgvedo yajurvedaḥ
sāmavedo'tharvāṅgirasa itihāsaḥ purāṇaṃ vidyā upaniṣadaḥ ślokāḥ
sūtrāṇyanuvyākhyānāni vyākhyānānysāmavedasatharvāṅgirasasitihāsaspurāṇaṃ
vidyāsupaniṣadasślokāssūtrāṇi anuvyākhyānāni vyākhyānani asyaivaitāni
niḥśvasitāni ॥ 10॥

mantra 11[II.iv.11]
sa yathā sarvāsāmapām̐ samudra ekāyanamevam̐ sarveṣām̐
sparśānāṃ tvagekāyanamevam̐ sarveṣāṃ gandhānāṃ nāsikaikāyanaṃ
evam̐ sarveṣām̐ rasānāṃ jihvaikāyanamevam̐ sarveṣām̐
rūpāṇāṃ cakṣurekāyanamevam̐ sarveṣām̐ śabdānām̐
śrotramekāyanamevam̐ sarveṣām̐ saṅkalpānāṃ mana ekāyanaṃ
evam̐ sarvāsāṃ vidyānām̐ hṛdayamekāyanamevam̐ sarveṣāṃ
karmaṇām̐ hastāvekāyanamevam̐ sarveṣāmānandānāmupastha ekāyanaṃ
evam̐ sarveṣāṃ visargāṇāṃ pāyurekāyanamevam̐ sarveṣāmadhvanāṃ
pādāvekāyanamevam̐ sarveṣāṃ vadānāṃ vāgekāyanam ॥ 11॥

mantra 12[II.iv.12]
sa yathā saindhavakhilya udake prāsta udakamevānuvilīyeta na
hāsyodgrahaṇāyeva na hāsyodgrahaṇāyaiva syād yato yatastvādadīta
lavaṇamevaivaṃ vā ara idaṃ mahad bhūtamanantamapāraṃ vijñānaghana
evaitebhyo bhūtebhyaḥ samutthāya etebhyasbhūtebhyassamutthāya
tānyevānuvinaśyati na pretya sañjñā'stītyare bravīmīti hovāca
yājñavalkyaḥ ॥ 12॥

mantra 13[II.iv.13]
sā hovāca maitreyyatraiva mā bhagavānamūmuhad na pretya sañjñā'stīti ।
sa hovāca na vā are'haṃ mohaṃ bravīmyalaṃ vā ara idaṃ vijñānāya ॥ 13॥

mantra 14[II.iv.14]
yatra hi dvaitamiva bhavati taditara itaraṃ jighrati taditara itaraṃ
paśyati taditara itaram̐ śṛṇoti taditara itaramabhivadati taditara
itaraṃ manute taditara itaraṃ vijānāti । yatra vā asya sarvamātmaivābhūt
tatkena kaṃ jighret tatkena kaṃ paśyet tatkena kam̐ śṛṇuyāt tatkena
kamabhivadet tatkena kaṃ manvīta tatkena kaṃ vijānīyāt । yenedam̐
sarvaṃ vijānāti taṃ kena vijānīyād vijñātāramare kena vijānīyāditi ॥ 14॥

iti caturthaṃ brāhmaṇam ॥

atha pañcamaṃ brāhmaṇam ।

mantra 1[II.v.1]
iyaṃ pṛthivī sarveṣāṃ bhūtānāṃ madhvasyai pṛthivyai sarvāṇi
bhūtāni madhu yaścāyamasyāṃ pṛthivyāṃ tejomayo'mṛtamayaḥ
puruṣo yaścāyamadhyātmam̐ śārīrastejomayo'mṛtamayaḥ puruṣaḥ
amṛtamayaspuruṣasayameva sa yo'yamātmedamamṛtamidaṃ brahmedam̐
sarvam ॥ 1॥

mantra 2[II.v.2]
imā āpaḥ sarveṣāṃ bhūtānāṃ madhvasāmapām̐ sarvāṇi bhūtāni madhu
yaścāyamāsvapsu tejomayo'mṛtamayaḥ puruṣaḥ yaścāyamadhyātmam̐
raitasastejomayo'mṛtamayaḥ puruṣo'yameva sa yo'yamātmedamamṛtaṃ
idaṃ brahmedam̐ sarvam ॥ 2॥

mantra 3[II.v.3]
ayamagniḥ sarveṣāṃ bhūtānāṃ madhvasyāgneḥ sarvāṇi bhūtāni madhu
yaścāyamasminnagnau tejomayo'mṛtamayaḥ puruṣo yaścāyamadhyātmaṃ
vāṅmayastejomayo'mṛtamayaḥ puruṣo'yameva sa yo'yamātmedamamṛtaṃ
idaṃ brahmedam̐ sarvam ॥ 3॥

mantra 4[II.v.4]
ayaṃ vāyuḥ sarveṣāṃ bhūtānāṃ madhvasya vāyoḥ sarvāṇi bhūtāni madhu
yaścāyamasminvāyau tejomayo'mṛtamayaḥ puruṣo yaścāyamadhyātmaṃ
prāṇastejomayo'mṛtamayaḥ puruṣo'yameva sa yo'yamātmedamamṛtam।
idaṃ brahmedam̐ sarvam ॥ 4॥

mantra 5[II.v.5]
ayamādityaḥ sarveṣāṃ bhūtānāṃ madhvasyā''dityasya sarvāṇi
bhūtāni madhu yaścāyamasminnāditye tejomayo'mṛtamayaḥ puruṣo
yaścāyamadhyātmaṃ cākṣuṣastejomayo'mṛtamayaḥ puruṣo'yameva
sa yo'yamātmedamamṛtamidaṃ brahmedam̐ sarvam ॥ 5॥

mantra 6[II.v.6]
imā diśaḥ sarveṣāṃ bhūtānāṃ madhvāsāṃ diśām̐ sarvāṇi bhūtāni madhu
yaścāyamāsu dikṣu tejomayo'mṛtamayaḥ puruṣo yaścāyamadhyātmam̐
śrautraḥ prātiśrutkastejomayo'mṛtamayaḥ puruṣo'yameva sa
yo'yamātmedamamṛtamidaṃ brahmedam̐ sarvam ॥ 6॥

mantra 7[II.v.7]
ayaṃ candraḥ sarveṣāṃ bhūtānāṃ madhvasya candrasya sarvāṇi
bhūtāni madhu yaścāyamasmiṃścandre tejomayo'mṛtamayaḥ puruṣo
yaścāyamadhyātmaṃ mānasastejomayo'mṛtamayaḥ puruṣo'yameva sa
yo'yamātmedamamṛtamidaṃ brahmedam̐ sarvam ॥ 7॥

mantra 8[II.v.8]
iyaṃ vidyutsarveṣāṃ bhūtānaṃ madhvasyai vidyutaḥ sarvāṇi bhūtāni madhu
yaścāyamasyāṃ vidyuti tejomayo'mṛtamayaḥ puruṣo yaścāyamadhyātmaṃ
taijasastejomayo'mṛtamayaḥ puruṣo'yameva sa yo'yamātmedamamṛtaṃ
idaṃ brahmedam̐ sarvam ॥ 8॥

mantra 9[II.v.9]
ayam̐ stanayitnuḥ sarveṣāṃ bhūtānāṃ madhvasya stanayitnoḥ sarvāṇi
bhūtāni madhu yaścāyamasminstanayitnau tejomayo'mṛtamayaḥ puruṣo
yaścāyamadhyātmam̐ śābdaḥ sauvarastejomayo'mṛtamayaḥ puruṣo
'yameva sa yo'yamātmedamamṛtamidaṃ brahmedam̐ sarvam ॥ 9॥

mantra 10[II.v.10]
ayamākāśaḥ sarveṣāṃ bhūtānāṃ madhvasyā''kāśasya sarvāṇi
bhūtāni madhu yaścāyamasminnākāśe tejomayo'mṛtamayaḥ puruṣo
yaścāyamadhyātmam̐ hṛdyākāśastejomayo'mṛtamayaḥ puruṣaḥ
'yameva sa yo'yamātmedamamṛtamidaṃ brahmedam̐ sarvam ॥ 10॥

mantra 11[II.v.11]
ayaṃ dharmaḥ sarveṣāṃ bhūtānāṃ madhvasya dharmasya sarvāṇi bhūtāni madhu
yaścāyamasmindharme tejomayo'mṛtamayaḥ puruṣo yaścāyamadhyātmaṃ
dhārmastejomayo'mṛtamayaḥ puruṣo'yameva sa yo'yamātmedamamṛtaṃ
idaṃ brahmedam̐ sarvam ॥ 11॥

mantra 12[II.v.12]
idam̐ satyam̐ sarveṣāṃ bhūtānāṃ madhvasya satyasya sarvāṇi
bhūtāni madhu yaścāyamasminsatye tejomayo'mṛtamayaḥ puruṣo
yaścāyamadhyātmam̐ sātyastejomayo'mṛtamayaḥ puruṣo'yameva sa
yo'yamātmedamamṛtamidaṃ brahmedam̐ sarvam ॥ 12॥

mantra 13[II.v.13]
idaṃ mānuṣam̐ sarveṣāṃ bhūtānāṃ madhvasya mānuṣasya sarvāṇi
bhūtāni madhu yaścāyamasminmānuṣe tejomayo'mṛtamayaḥ puruṣo
yaścāyamadhyātmaṃ mānuṣastejomayo'mṛtamayaḥ puruṣo'yameva sa
yo'yamātmedamamṛtamidaṃ brahmedam̐ sarvam ॥ 13॥

mantra 14[II.v.14]
ayamātmā sarveṣāṃ bhūtānāṃ madhvasyā''tmanaḥ sarvāṇi bhūtāni madhu
yaścāyamasminnātmani tejomayo'mṛtamayaḥ puruṣo yaścāyamātmā
tejomayo'mṛtamayaḥ puruṣo'yameva sa yo'yamātmedamamṛtamidaṃ
brahmedam̐ sarvam ॥ 14॥

mantra 15[II.v.15]
sa vā ayamātmā sarveṣāṃ bhūtānāmadhipatiḥ sarveṣāṃ bhūtānām̐
rājā । tadyathā rathanābhau ca rathanemau cārāḥ sarve samarpitā
evamevāsminnātmani sarvāṇi bhūtāni sarve devāḥ sarve lokāḥ sarve prāṇāḥ
sarva eta ātmānaḥ samarpitāḥ ॥ 15॥

mantra 16[II.v.16]
idaṃ vai tanmadhu dadhyaṅṅātharvaṇo'śvibhyāmuvāca । uvāca
tadetadṛṣiḥ paśyannavocat । tadvāṃ narā sanaye dam̐sa ugraṃ
āviṣkṛṇomi tanyaturna vṛṣṭim । dadhyaṅ ha yanmadhvātharvaṇo vāṃ
aśvasya śīrṣṇā pra yadīmuvāceti ॥ 16॥

mantra 17[II.v.17]
idaṃ vai tanmadhu dadhyaṅṅātharvaṇo'śvibhyāmuvāca । tadetadṛṣiḥ
paśyannavocat । ātharvaṇāyāśvinau dadhīce'śvyam̐ śiraḥ
pratyairayatam । sa vāṃ madhu pravocadṛtāyan tvāṣṭraṃ yad dasrāvapi
kakṣyaṃ vāmiti ॥ 17॥

mantra 18[II.v.18]
idaṃ vai tanmadhu dadhyaṅṅātharvaṇo'śvibhyāmuvāca । tadetadṛṣiḥ
paśyannavocat puraścakre dvipadaḥ puraścakre catuṣpadaḥ । puraḥ
sa pakṣī bhūtvā puraḥ puruṣa āviśaditi । sa vā ayaṃ puruṣaḥ sarvāsu
pūrṣu puriśayo nainena kiṃcanānāvṛtaṃ nainena kiṃcanāsaṃvṛtam ॥ 18॥

mantra 19[II.v.19]
idaṃ vai tanmadhu dadhyaṅṅātharvaṇo'śvibhyāmuvāca । tadetadṛṣiḥ
paśyannavocat । rūpam̐rūpaṃ pratirūpo babhūva tadasya rūpaṃ
praticakṣaṇāya । indro māyābhiḥ pururūpa īyate yuktā hyasya harayaḥ
śatā daśetiyayaṃ vai harayo'yaṃ vai daśa ca sahasraṇi bahūni
cānantāni ca । tadetadbrahmāpūrvamanaparamanantaramabāhyamayamātmā
brahma sarvānubhūrityanuśāsanam ॥ 19॥

iti pañcamaṃ brāhmaṇam ॥

atha ṣaṣṭhaṃ brāhmaṇam ।

mantra 1[II.vi.1]
atha vam̐śaḥ pautimāṣyo gaupavanād gaupavanaḥ pautimāṣyāt
pautimāṣyo gaupavanād gaupavanaḥ kauśikāt kauśikaḥ kauṇḍinyāt
kauṇḍinyaḥ śāṇḍilyācchāṇḍilyaḥ kauśikācca gautamācca gautamaḥ ॥ 1॥

mantra 2[II.vi.2]
āgniveśyādagniveśyaḥ śāṇḍilyāccānabhimlātāccānabhimlāta
ānabhimlātādanabhimlāta anabhimlātādanabhimlāto gautamād gautamaḥ
saitavaprācīnayogyābhyām̐, saitavaprācīnayogyau pārāśaryāt
pārāśaryo bhāradvājād bhāradvājo bhāradvājācca gautamācca
gautamo bhāradvājād bhāradvājaḥ pārāśaryāt pārāśaryo vaijavāpāyanād
vaijavāpāyanaḥ kauśikāyaneḥ kauśikāyaniḥ ॥ 2॥

mantra 3[II.vi.3]
ghṛtakauśikād ghṛtakauśikaḥ pārāśaryāyaṇāt pāraśaryāyaṇaḥ
pārāśaryāt pārāśaryo jātūkarṇyāj jātūkarṇya āsurāyaṇācca yāskācc-
''surāyaṇastraivaṇestraivaṇiraupajandhaneraupajandhanirāsurāsurirbhāradvājād
bhāradvāja ātreyādatreyo māṇṭermāṇṭirgautamād gautamo gautamād gautamo
vātsyād vātsyaḥ śāṇḍilyācchāṇḍilyaḥ kaiśoryātkāpyāt kaiśoryaḥ
kāpyaḥ kumārahāritāt kumārahārito gālavād gālavo vidarbhīkauṇḍinyād
vidarbhīkauṇḍinyo vatsanapāto bābhravād vatsanapādbābhravaḥ
pathaḥ saubharāt panthāḥ saubharo'yāsyādāṅgirasādayāsya
āṅgirasa ābhūtestvāṣṭrādābhūtistvāṣṭro viśvarūpāttvāṣṭrād
viśvarūpastvāṣṭro'śvibhyāmaśvinau dadhīca ātharvaṇād
dadhyaṅṅātharvaṇo'tharvaṇo daivādatharvā daivo mṛtyoḥ
prādhvam̐sanān mṛtyuḥ prādhvam̐sanaḥ pradhvam̐sanāt
pradhvam̐sana ekarṣeḥ ekarṣirvipracittervipracittirvyaṣṭervyaṣṭiḥ
sanāroḥ sanāruḥ sanātanāt sanātanaḥ sanagāt sanagaḥ parameṣṭhinaḥ
parameṣṭhī brahmaṇo brahma svayambhu brahmaṇe namaḥ ॥ 3॥

iti ṣaṣṭhaṃ brāhmaṇam ॥

॥ iti bṛhadāraṇyakopaniṣadi dvitīyo'dhyāyaḥ ॥

atha tṛtīyodhyāyaḥ ॥

atha prathamaṃ brāhmaṇam ।

mantra 1 [III.i.1]
oṃ janako ha vaideho bahudakṣiṇena yajñeneje । tatra ha kurupañcālānāṃ
brāhmaṇā abhisametā babhūvustasya ha janakasya vaidehasya vijijñāsā
babhūva kaḥ svideṣāṃ brāhmaṇānāmanūcānatama iti । sa ha gavām̐
sahasramavarurodha daśadaśa pādā ekaikasyāḥ śṛṅgayorābaddhā babhūvuḥ ॥ 1॥

mantra 2 [III.i.2]
tānhovāca brāhmaṇā bhagavanto yo vo brahmiṣṭhaḥ sa etā gā
udajatāmiti । te ha brāhmaṇā na dadhṛṣuratha ha yājñavalkyaḥ svameva
brahmacāriṇamuvācaitāḥ saumyodaja sāmaśravā3 iti । tā hodācakāra ।
te ha brāhmaṇāścukrudhuḥ kathaṃ nu no brahmiṣṭho bruvītetyatha ha
janakasya vaidehasya hotā'śvalo babhūva । sa hainaṃ papraccha tvaṃ
nu khalu no yājñavalkya brahmiṣṭho'sī3 iti । sa hovāca namo vayaṃ
brahmiṣṭhāya kurmo gokāmā eva vayam̐ sma iti । tam̐ ha tata eva
praṣṭuṃ dadhre hotā'śvalaḥ ॥ 2॥

mantra 3 [III.i.3]
yājñavalkyeti hovāca yadidam̐ sarvaṃ mṛtyunā''ptam̐, sarvaṃ
mṛtyunā'bhipannaṃ kena yajamāno mṛtyorāptimatimucyata iti ।
hotrartvijā'inā vācā vāgvai yajñasya hotā । tadyeyaṃ vāk so'yamagniḥ
sa hotā sā muktiḥ sā'timuktiḥ ॥ 3॥

mantra 4 [III.i.4]
yājñavalkyeti hovāca yadidam̐ sarvamahorātrābhyāmāptam̐,
sarvamahorātrābhyāmabhipannaṃ kena yajamāno'horātrayorāptimatimucyata
ityadhvaryuṇartvijā cakṣuṣā''dityena cakṣurvai
yajñasyādhvaryustadyadidaṃ cakṣuḥ so'sāvādityaḥ so'dhvaryuḥ sā
muktiḥ sā'timuktiḥ ॥ 4॥

mantra 5 [III.i.5]
yājñavalkyeti hovāca yadidam̐ sarvaṃ
pūrvapakṣāparapakṣābhyāmāptam̐, sarvaṃ
pūrvapakṣāparapakṣābhyāmabhipannaṃ kena yajamānaḥ
pūrvapakṣāparapakṣayorāptimatimucyata ityudgātrartvijā vāyunā prāṇena
prāṇo vai yajñasyodgātā । tadyo'yaṃ prāṇaḥ sa vāyuḥ sa udgātā sā muktiḥ
sā'timuktiḥ ॥ 5॥

mantra 6 [III.i.6]
yājñavalkyeti hovāca yadidamantarikṣamanārambaṇamiva kenā''kramena
yajamānaḥ svargaṃ lokamākramata iti brahmaṇartvijā manasā candreṇa
mano vai yajñasya brahmā । tadyadidaṃ manaḥ so'sau candraḥ sa brahmā
sā muktiḥ sātimuktirityatimokṣā atha sampadaḥ ॥ 6॥

mantra 7 [III.i.7]
yājñavalkyeti hovāca katibhirayamadyargbhirhotāsminyajñe kariṣyatīti ।
tisṛbhiriti । katamāstāstisra iti । puronuvākyā ca yājyā ca śasyaiva
tṛtīyā । kiṃ tābhirjayatīti । yat kiñcedaṃ prāṇabhṛditi ॥ 7॥

mantra 8 [III.i.8]
yājñavalkyeti hovāca katyayamadyādhvaryurasminyajña āhutīrhoṣyatīti ।
tisra iti । katamāstāstisra iti । yā hutā ujjvalanti yā hutā atinedante yā
hutā adhiśerate । kiṃ tābhirjayatīti । yā hutā ujjvalanti devalokameva
tābhirjayati dīpyata iva hi devaloko । yā hutā atinedante pitṛlokameva
tābhirjayatyatīva hi pitṛloko । yā hutā adhiśerate manuṣyalokameva
tābhirjayatyadha iva hi manuṣyalokaḥ ॥ 8॥

mantra 9 [III.i.9]

yājñavalkyeti hovāca katibhirayamadya brahmā yajñaṃ dakṣiṇato
devatābhirgopāyatītyekayeti । katamā saiketi । mana evetyanantaṃ vai
mano ṃantā viśve devā anantameva sa tena lokaṃ jayati ॥ 9॥

mantra 10 [III.i.10]
yājñavalkyeti hovāca katyayamadyodgātā'sminyajñe stotriyāḥ stoṣyatīti ।
tisra iti । katamāstāstisra iti । puronuvākyā ca yājyā ca śasyaiva
tṛtīyā katamāstā yā adhyātmamiti । prāṇa eva puronuvākyā'pāno yājyā
vyānaḥ śasyā । kiṃ tābhirjayatīti । pṛthivīlokameva puronuvākyayā
jayatyantarikṣalokaṃ yājyayā dyulokam̐ śasyayā tato ha hotā'śvala
upararāma ॥ 10॥

iti prathamaṃ brāhmaṇam ॥

atha dvitīyaṃ brāhmaṇam ।

mantra 1[III.ii.1]
atha hainaṃ jāratkārava ārtabhāgaḥ papraccha । yājñavalkyeti hovāca
kati grahāḥ katyatigrahā ityaṣṭau grahā aṣṭāvatigrahā iti ye te'ṣṭau
grahā aṣṭāvatigrahāḥ katame ta iti ॥ 1॥

mantra 2[III.ii.2]
prāṇo vai grahaḥ । so'pānenātigrāheṇa gṛhīto'pānena hi
gandhāñjighrati ॥ 2॥

mantra 3[III.ii.3]
vāgvai grahaḥ । sa nāmnātigrāheṇa gṛhīto vācā hi nāmānyabhivadati ॥ 3॥

mantra 4[III.ii.4]
jihvā vai grahaḥ । sa rasenātigrāheṇa gṛhīto jihvayā hi rasānvijānāti ॥ 4॥

mantra 5[III.ii.5]
cakṣurvai grahaḥ । sa rūpeṇātigrāheṇa gṛhītaścakṣuṣā hi rūpāṇi
paśyati ॥ 5॥

mantra 6[III.ii.6]
śrotraṃ vai grahaḥ । sa śabdenātigrāheṇa gṛhītaḥ śrotreṇa hi
śabdāñśṛṇoti ।

mantra 7[III.ii.7]
mano vai grahaḥ । sa kāmenātigrāheṇa gṛhīto manasā hi kāmānkāmayate ॥ 7॥

mantra 8[III.ii.8]
hastau vai grahaḥ । sa karmaṇā'tigrāheṇa gṛhīto hastābhyām̐ hi
karma karoti ॥ 8॥

mantra 9[II.ii.9]
tvagvai grahaḥ । sa sparśenātigrāheṇa gṛhītastvacā hi sparśānvedayata ।
ityete'ṣṭau grahā aṣṭāvatigrahāḥ ॥ 9॥

mantra 10[III.ii.10]
yājñavalkyeti hovāca yadidam̐ sarvaṃ mṛtyorannaṃ kā svitsā devatā
yasyā mṛtyurannamityagnirvai mṛtyuḥ so'pāmannamapa punarmṛtyuṃ
jayati ॥ 10॥

mantra 11[III.ii.11]
yājñavalkyeti hovāca yatrāyaṃ puruṣo mriyata udasmātprāṇāḥ
krāmantyaho3 neti neti hovāca yājñavalkyo'traiva samavanīyante sa
ucchvayatyādhmāyati ādhmāto mṛtaḥ śete ॥ 11॥

mantra 12[III.ii.12]
yājñavalkyeti hovāca yatrāyaṃ puruṣo mriyate kimenaṃ na jahātīti ।
nāmetyanantaṃ vai nāmānantā viśve devā anantameva sa tena lokaṃ jayati ॥ 12॥

mantra 13[III.ii.13]
yājñavalkyeti hovāca yatrāsya puruṣasya mṛtasyāgniṃ vāgapyeti vātaṃ
prāṇaścakṣurādityaṃ manaścandraṃ diśaḥ śrotraṃ pṛthivīm̐
śarīramākāśamātmauṣadhīrlomāni vanaspatīnkeśā apsu lohitaṃ ca
retaśca nidhīyate kvāyaṃ tadā puruṣo bhavatītyahara saumya hastaṃ
ārtabhāgeti hovā''cāvāmevaitasya vediṣyāvo na nāvetatsajana iti । tau
hotkramya mantrayāṃ cakrāte tau ha yadūcatuḥ karma haiva tadūcaturatha
ha yatpraśam̐satuḥ karma haiva tat praśam̐satuḥ puṇyo vai puṇyena
karmaṇā bhavati pāpaḥ pāpeneti । tato ha jāratkārava ārtabhāga upararāma ॥ 13॥

iti dvitīyaṃ brāhmaṇam ॥

atha tṛtīyaṃ brāhmaṇam ।

mantra 1[III.iii.1]
atha hainaṃ bhujyurlāhyāyaniḥ papraccha । yājñavalkyeti
hovāca madreṣu carakāḥ paryavrajāma te patañcalasya kāpyasya
gṛhānaima । tasyā''sīd duhitā gandharvagṛhītā tamapṛcchāma
ko'sīti । so'bravīt sudhanvā''ṅgirasa iti । taṃ yadā
lokānāmantānapṛcchāmāthaitadathainamabrūma kva pārikṣitā abhavanniti
kva pārikṣitā abhavan sa tvā pṛcchāmi yājñavalkya kva pārikṣitā
abhavanniti ॥ 1॥

mantra 2[III.iii.2]
sa hovācovāca vai so'gacchanvai te tad yatrāśvamedhayājino
gacchantīti । kva nvaśvamedhayājino gacchantīti । dvātrim̐śataṃ
vai devarathāhnyānyayaṃ lokastam̐ samantaṃ pṛthivī dvistāvatparyeti
tām̐ samantaṃ pṛthivī dvistāvatsamudraḥ paryeti । tadyāvatī kṣurasya
dhārā yāvadvā makṣikāyāḥ patraṃ tāvānantareṇā''kāśastān indraḥ
suparṇo bhūtvā vāyave prāyacchat tān vāyurātmani dhitvā tatrāgamayadyatra
aśvamedhayājino'bhavannityevamiva vai sa vāyumeva praśaśam̐sa
tasmādvāyureva vyaṣṭirvāyuḥ samaṣṭirapa punarmṛtyuṃ jayati ya evaṃ
veda । tato ha bhujyurlāhyāyanirupararāma ॥ 2॥

iti tṛtīyaṃ brāhmaṇam ॥

atha caturthaṃ brahmaṇam ।

mantra 1[III.iv.1]
atha hainamūṣastaścākrāyaṇaḥ papraccha । yājñavalkyeti hovāca
yatsākṣādaparokṣādbrahma ya ātmā sarvāntarastaṃ me vyācakṣvetyeṣa ta
ātmā sarvāntaraḥ । katamo yājñavalkya sarvāntaro । yaḥ prāṇena prāṇiti
sa ta ātmā sarvāntaro yo'pānenāpāniti sa ta ātmā sarvāntaro yo vyānena
vyāniti sa ta ātmā sarvāntaro ya udānenodāniti sa ta ātmā sarvāntara
eṣa ta ātmā sarvāntaraḥ ॥ 1॥

mantra 2[III.iv.2]
sa hovācoṣastaścākrāyaṇaḥ yathā vibrūyādasau gaurasāvaśva
ityevamevaitadvyapadiṣṭaṃ bhavati । yadeva sākṣādaparokṣād brahma
ya ātmā sarvāntaraḥ taṃ me vyācakṣveti । eṣa ta ātmā sarvāntaraḥ ।
katamo yājñavalkya sarvāntaro । na dṛṣṭerdraṣṭāraṃ paśyerna śruteḥ
śrotāram̐ śṛṇuyā na matermantāraṃ manvīthā na vijñātervijñātāraṃ
vijānīyā eṣa ta ātmā sarvāntaro'to'nyadārtaṃ tato hoṣastascākrāyaṇa
upararāma ॥ 2॥

iti caturthaṃ brāhmaṇam ॥

atha pañcamaṃ brāhmaṇam ।

mantra 1[III.v.1]
atha hainaṃ kaholaḥ kauṣītakeyaḥ papraccha papraccha yājñavalkyeti
hovāca yadeva sākṣādaparokṣādbrahma ya ātmā sarvāntarastaṃ me
vyācakṣvetyeṣa ta ātmā sarvāntaraḥ । katamo yājñavalkya sarvāntaro ।
yo'śanāyāpipāse śokaṃ mohaṃ jarāṃ mṛtyumatyetyetaṃ vai tamātmānaṃ
viditvā brāhmaṇāḥ putraiṣaṇāyāśca vittaiṣaṇāyāśca lokaiṣaṇāyāśca
vyutthāyātha bhikṣācaryaṃ caranti । yā hyeva putraiṣaṇā sā vittaiṣaṇā
yā vittaiṣaṇā sā lokaiṣaṇobhe hyete eṣaṇe eva bhavatastasmādbrāhmaṇaḥ
pāṇḍityaṃ nirvidya bālyena tiṣṭhāset । bālyaṃ ca pāṇḍityaṃ ca
nirvidyātha muniramaunaṃ ca maunaṃ ca nirvidyātha brāhmaṇaḥ । sa
brāhmaṇaḥ kena syād yena syāt tenedṛśa evāto'nyadārtam । ya evaṃ
veda evāto'nyadārtam । tato ha kaholaḥ kauṣītakeya upararāma ॥ 1॥

iti pañcamaṃ brāhmaṇam ॥

atha ṣaṣṭhaṃ brāhmaṇam ।

mantra 1[III.vi.1]
atha hainaṃ gārgī vācaknavī papraccha yājñavalkyeti hovāca
yadidam̐ sarvamapsvotaṃ ca protaṃ ca kasminnu khalvāpa
otāśca protāśceti । vāyau gārgīti । kasminnu khalu vāyurotaśca
protaścetyantarikṣalokeṣu gārgīti । kasminnu khalvantarikṣalokā
otāśca protāśceti । gandharvalokeṣu gārgīti । kasminnu gandharvalokā
otāśca protāścetyādityalokeṣu gārgīti । kasmin nu khalvādityalokā
otāśca protāśceti । candralokeṣu gārgīti । kasminnu khalu
candralokā otāśca protāśceti । nakṣatralokeṣu gārgīti । kasminnu
khalu nakṣatralokā otāśca protāśceti । devalokeṣu gārgīti ।
kasminnu khalu devalokā otāśca protāśceti indralokeṣu gārgīti ।
kasminnu khalvindralokā otāśca protāśceti । prajāpatilokeṣu
gārgīti । kasminnu khalu prajāpatilokā otāśca protāśceti ।
brahmalokeṣu gārgīti । kasminnu khalu brahmalokā otāśca protāśceti ।
sa hovāca gārgi mātiprākṣīrmā te mūrdhā vyapaptadanatipraśnyāṃ
vai devatāmatipṛcchasi । gārgi mā'tiprākṣīriti । tato ha gārgī
vācaknavyupararāma ॥ 1॥

iti ṣaṣṭhaṃ brāhmaṇam ॥

atha saptamaṃ brāhmaṇam ।

mantra 1[III.vii.1]
atha hainamūddālaka āruṇiḥ papraccha yājñavalkyeti
hovāca madreṣvavasāma patañcalasya kāpyasya gṛheṣu
yajñamadhīyānāstasyā''sīdbhāryā gandharvagṛhītā । tamapṛcchāma
ko'sīti । so'bravīt kabandha ātharvaṇa iti । so'bravītpatañcalaṃ
kāpyaṃ yājñikām̐śca vettha nu tvaṃ kāpya tatsūtraṃ yenāyaṃ
ca lokaḥ paraśca lokaḥ sarvāṇi ca bhūtāni sandṛbdhāni
bhavantīti । so'bravītpatañcalaḥ kāpyo nāhaṃ tad bhagavan vedeti ।
so'bravīt patañcalaṃ kāpyaṃ yājñikām̐ścaḥ vettha nu tvaṃ kāpya
tamantaryāmiṇaṃ ya imaṃ ca lokaṃ paraṃ ca lokam̐ sarvāṇi ca bhūtāni
yo'ntaro yamayatīti । so'bravīt patañcalaḥ kāpyo nāhaṃ taṃ bhagavan
vedeti । so'bravīt patañcalaṃ kāpyaṃ yājñikām̐śca yo vai tat
kāpya sūtraṃ vidyāttaṃ cāntaryāmiṇamiti sa brahmavit sa lokavit sa
devavit sa vedavit sa bhūtavit sa ātmavit sa sarvaviditi tebhyo'bravīt
tadahaṃ veda । taccettvaṃ yājñavalkya sūtramavidvām̐staṃ
cāntaryāmiṇaṃ brahmagavīrudajase mūrdhā te vipatiṣyatīti । veda vā ahaṃ
gautama tatsūtraṃ taṃ cāntaryāmiṇamiti । yo vā idaṃ kaścidbrūyāt veda
vedeti । yathā vettha tathā brūhīti ॥ 1॥

mantra 2[III.vii.2]
sa hovāca vāyurvai gautama tatsūtraṃ vāyunā vai gautama sūtreṇāyaṃ
ca lokaḥ paraśca lokaḥ sarvāṇi ca bhūtāni sandṛbdhāni bhavanti ।
tasmādvai gautama puruṣaṃ pretamāhurvyasram̐siṣatāsyāṅgānīti
vāyunā hi gautama sūtreṇa saṃdṛbdhāni bhavantītyevamevaitad
yājñavalkyāntaryāmiṇaṃ brūhīti ॥ 2॥

mantra 3[III.vii.3]
yaḥ pṛthivyāṃ tiṣṭhanpṛthivyā antaro yaṃ pṛthivī na veda
yasya pṛthivī śarīraṃ yaḥ pṛthivīmantaro yamayatyeṣa ta
ātmā'ntaryāmyamṛtaḥ ॥ 3॥

mantra 4[III.vii.4]
yo'psu tiṣṭhannadbhyo'ntaro yamāpo na viduḥ yasyāpaḥ śarīraṃ
yo'po'ntaro yamayatyeṣa ta ātmā'ntaryāmyamṛtaḥ ॥ 4॥

mantra 5[III.vii.5]
yo'gnau tiṣṭhannagnerantaro yamagnirna veda yasyāgniḥ śarīraṃ
yo'gnimantaro yamayati eṣa ta ātmāntaryāmyamṛtaḥ ॥ 5॥

mantra 6[III.vii.6]
yo'ntarikṣe tiṣṭhannantarikṣādantaro yamantarikṣaṃ na veda
yasyāntarikṣam̐ śarīraṃ yo'ntarikṣamantaro yamayatyeṣa ta
ātmā'ntaryāmyamṛtaḥ ॥ 6॥

mantra 7[III.vii.7]
yo vāyau tiṣṭhanvāyorantaro yaṃ vāyurna veda yasya vāyuḥ śarīraṃ yo
vāyumantaro yamayatyeṣa ta ātmā'ntaryāmyamṛtaḥ ॥ 7॥

mantra 8[III.vii.8]
yo divi tiṣṭhandivo'ntaro yaṃ dyaurna veda yasya dyauḥ śarīraṃ yo
divamantaro yamayatyeṣa ta ātmā'ntaryāmyamṛtaḥ ॥ 8॥

mantra 9[III.vii.9]
ya āditye tiṣṭhannādityādantaro yamādityo na veda yasyā''dityaḥ
śarīraṃ ya ādityamantaro yamayatyeṣa ta ātmā'ntaryāmyamṛtaḥ ॥ 9॥

mantra 10[III.vii.10]
yo dikṣu tiṣṭhandigbhyo'ntaro yaṃ diśo na viduryasya diśaḥ śarīraṃ
yo diśo'ntaro yamayatyeṣa ta ātmā'ntaryāmyamṛtaḥ ॥ 10॥

mantra 11[III.vii.11]
yaścandratārake tiṣṭham̐candratārakādantaro yaṃ candratārakaṃ
na veda yasya candratārakam̐ śarīraṃ yaścandratārakamantaro
yamayatyeṣa ta ātmā'ntaryāmyamṛtaḥ ॥ 11॥

mantra 12[III.vii.12]
ya ākāśe tiṣṭhannākāśādantaro yamākāśo na veda yasyā''kāśaḥ
śarīraṃ ya ākāśamantaro yamayatyeṣa ta ātmā'ntaryāmyamṛtaḥ ॥ 12॥

mantra 13[III.vii.13]
yastamasi tiṣṭham̐stamaso'ntaro yaṃ tamo na veda yasya tamaḥ
śarīraṃ yastamo'ntaro yamayatyeṣa ta ātmāntaryāmyamṛtaḥ ॥ 13॥

mantra 14[III.vii.14]
yastejasi tiṣṭham̐stejaso'ntaro yaṃ tejo na veda yasya tejaḥ śarīraṃ
yastejo'ntaro yamayatysa eṣa ta ātmā'ntaryāmyamṛta ityadhidaivataṃ
athādhibhūtam ॥ 14॥

mantra 15[III.vii.15]
yaḥ sarveṣu bhūteṣu tiṣṭhansarvebhyo bhūtebhyo'ntaro yam̐ sarvāṇi
bhūtāni na viduryasya sarvāṇi bhutāni śarīraṃ yaḥ sarvāṇi bhūtānyantaro
yamayatyeṣa ta ātmā'ntaryāmyamṛta ityadhibhūtamathādhyātmam ॥ 15॥

mantra 16[III.vii.16]
yaḥ prāṇe tiṣṭhanprāṇādantaro yaṃ prāṇo na veda yasya prāṇaḥ śarīraṃ
yaḥ prāṇamantaro yamayatyeṣa ta ātmā'ntaryāmyamṛtaḥ ॥ 16॥

mantra 17[III.vii.17]
yo vāci tiṣṭhanvāco'ntaro yaṃ vāṅna veda yasya vāk śarīraṃ yo
vācamantaro yamayatyeṣa ta ātmā'ntaryāmyamṛtaḥ ॥ 17॥

mantra 18[III.vii.18]
yaścakṣuṣi tiṣṭham̐ścakṣuṣo'ntaro yaṃ cakṣurna
veda yasya cakṣuḥ śarīraṃ yaścakṣurantaro yamayatyeṣa ta
ātmā'ntaryāmyamṛtaḥ ॥ 18॥

mantra 19[III.vii.19]
yaḥ śrotre tiṣṭhañchrotrādantaro yam̐ śrotraṃ na veda
yasya śrotram̐ śarīraṃ yaḥ śrotramantaro yamayatysa eṣa ta
ātmā'ntaryāmyamṛtaḥ ॥ 19॥

mantra 20[III.vii.20]
yo manasi tiṣṭhanmanaso'ntaro yaṃ mano na veda yasya manaḥ śarīraṃ
yo mano'ntaro yamayatyeṣa ta ātmā'ntaryāmyamṛtaḥ ॥ 20॥

mantra 21[III.vii.21]
yastvaci tiṣṭham̐stvaco'ntaro yaṃ tvaṅna veda yasya tvak śarīraṃ
yastvacamantaro yamayatyeṣa ta ātmā'ntaryāmyamṛtaḥ ॥ 21॥

mantra 22[III.vii.22]
yo vijñāne tiṣṭhanvijñānādantaro yam̐ vijñānaṃ na veda
yasya vijñānam̐ śarīraṃ yo vijñānamantaro yamayatyeṣa ta
ātmā'ntaryāmyamṛtaḥ ॥ 22॥

mantra 23[III.vii.23]
yo retasi tiṣṭhan retaso'ntaro yam̐ reto na veda yasya retaḥ
śarīraṃ yo reto'ntaro yamayatyeṣa ta ātmā'ntaryāmyamṛto'dṛṣṭo
draṣṭā'śrutaḥ śrotā'mato mantā'vijñato vijñātā । nānyo'to'sti
draṣṭā nānyo'to'sti śrotā nānyo'to'sti mantā nānyo'to'sti
vijñātaiṣa ta ātmā'ntaryāmyamṛto'to'nyadārtaṃ tato hoddālaka
āruṇirupararāma ॥ 23॥

iti saptamaṃ brāhmaṇam ॥

atha aṣṭamaṃ brāhmaṇam ।

mantra 1[III.viii.1]
atha ha vācaknavyuvāca brāhmaṇā bhagavanto hantāhamimaṃ dvau
praśnau prakṣyāmi tau cenme vakṣyati na vai jātu yuṣmākamimaṃ
kaścidbrahmodyaṃ jeteti । pṛccha gārgīti ॥ 1॥

mantra 2[III.viii.2]
sā hovācāhaṃ vai tvā yājñavalkya yathā kāśyo vā vaideho vograputra
ujjyaṃ dhanuradhijyaṃ kṛtvā dvau bāṇavantau sapatnātivyādhinau haste
kṛtvopottiṣṭhedevamevāhaṃ tvā dvābhyāṃ praśnābhyāmupodasthām ।
tau me brūhīti । pṛccha gārgīti ॥ 2॥

mantra 3[III.viii.3]
sā hovāca yadūrdhvaṃ yājñavalkya divo yadavākpṛthivyā yadantarā
dyāvāpṛthivī ime yadbhūtaṃ ca bhavacca bhaviṣyaccetyācakṣate
kasmim̐stadotaṃ ca protaṃ ceti ॥ 3॥

mantra 4[III.viii.4]
sa hovāca yadūrdhvaṃ gārgi divo yadavākpṛthivyā yadantarā
dyāvāpṛthivī ime yadbhūtaṃ ca bhavacca bhaviṣyaccetyācakṣata
ākāśe tadotaṃ ca protaṃ ceti ॥ 4॥

mantra 5[III.viii.5]
sā hovāca namaste'stu yājñavalkya yo ma etaṃ vyavoco'parasmai
dhārayasveti । pṛccha gārgīti ॥ 5॥

mantra 6[III.viii.6]
sā hovāca yadūrdhvaṃ yājñavalkya divo yadavāk pṛthivyāḥ yadantarā
dyāvāpṛthivī ime yadbhūtaṃ ca bhavacca bhaviṣyaccetyācakṣate
ācakṣate kasmim̐stadotaṃ ca protaṃ ceti ॥ 6॥

mantra 7[III.viii.7]
sa hovāca yadūrdhvaṃ gārgi divo yadavākpṛthivyā yadantarā
dyāvāpṛthivī ime yadbhūtaṃ ca bhavacca bhaviṣyaccetyācakṣata
ākāśa eva tadotaṃ ca protaṃ ceti । kasminnu khalvākāśa otaśca
protaśceti ॥ 7॥

mantra 8[III.viii.8]
sa hovācaitadvai tadakṣara' gārgi brāhmaṇā
abhivadantyasthūlamanaṇvahrasvamadīrghamalohitamasnehamacchāyamatamo-
'vāyvanākāśamasaṅgaṃ acakṣuṣkamaśrotramavāg
amano'tejaskamaprāṇamamukhamamātraṃ anantaramabāhyaṃ na tadaśnāti
kiṃ cana na tadaśnāti kaścana ॥ 8॥

mantra 9[III.viii.9]
etasya vā akṣarasya praśāsane gārgi sūryācandramasau vidhṛtau
tiṣṭhata etasya vā akṣarasya praśāsane gārgi dyāvāpṛthivyau
vidhṛte tiṣṭhata etasya vā akṣarasya praśāsane gārgi
nimeṣā muhūrtā ahorātrāṇyardhamāsā māsā ṛtavaḥ saṃvatsarā iti
vidhṛtāstiṣṭhantyetasya vā akṣarasya praśāsane gārgi prācyo'nyā
nadyaḥ syandante śvetebhyaḥ parvatebhyaḥ pratīcyo'nyā yāṃ yāṃ
ca diśamanvetasya vā akṣarasya praśāsane gārgi dadato manuṣyāḥ
praśam̐santi yajamānaṃ devā darvīṃ pitaro'nvāyattāḥ ॥ 9॥

mantra 10[III.viii.10]
yo vā etadakṣaraṃ gārgyaviditvā'smim̐lloke juhoti yajate
tapastapyate bahūni varṣasahasrāṇyantavadevāsya tadbhavati loko bhavati
yo vā etadakṣaraṃ gārgyaviditvā'smāllokātpraiti sa kṛpaṇo'tha ya
etadakṣaraṃ gārgi viditvā'smāllokātpraiti sa brāhmaṇaḥ ॥ 10॥

mantra 11[III.viii.11]
tadvā etadakṣaraṃ gārgyadṛṣṭaṃ draṣṭṛśrutam̐ śrottramataṃ
mantravijñātaṃ vijñātṛ nānyadato'sti draṣṭṛ nānyadato'sti
śrotṛ nānyadato'sti mantṛ nānyadato'sti vijñāttretasminnu
khalvakṣare gārgyākāśa otaśca protaśceti ॥ 11॥

mantra 12[III.viii.12]
sā hovāca brāhmaṇā bhagavantastadeva bahu manyedhvaṃ yadasmānnamaskāreṇa
mucyedhvaṃ na vai jātu yuṣmākamimaṃ kaścidbrahmodyaṃ jeteti tato ha
vācaknavyupararāma ॥ 12॥

ityaṣṭamaṃ brāhmaṇam ॥

atha navamaṃ brāhmaṇam ।

mantra 1[III.ix.1]
atha hainaṃ vidagdhaḥ śākalyaḥ papraccha kati devā yājñavalkyeti ।
sa haitayaiva nividā pratipede yāvanto vaiśvadevasya nividyucyante
trayaśca trī ca śatā trayaśca trī ca sahasretyomiti hovāca katyeva
devā yājñavalkyeti । trayastrim̐śadityomiti hovāca । katyeva devā
yājñavalkyeti । ṣaḍityomiti hovāca । katyeva devā yājñavalkyeti ।
traya ityomiti hovāca । katyeva devā yājñavalkyetydvāvityomiti hovāca ।
katyeva devā yājñavalkyetyadhyardha ityomiti hovāca । katyeva devā
yājñavalkyetyeka ityomiti hovāca । katame te trayaśca trī ca śatā
trayaśca trī ca sahasreti ॥ 1 ॥

mantra 2[III.ix.2]
sa hovāca mahimāna evaiṣāmete trayastrim̐śattveva devā iti katame
te trayastrim̐śadityaṣṭau vasava ekādaśa rudrā dvādaśā''dityāste
ekatrim̐śadindraścaiva prajāpatiśca trayastrim̐śāviti ॥ 2॥

mantra 3[III.ix.3]
katame vasava ityagniśca pṛthivī ca vāyuścāntarikṣaṃ
cā''dityaśca dyauśca candramāśca nakṣatrāṇi caite vasava
eteṣu hīdaṃ vasu sarvam̐ hitamiti tasmādvasava iti ॥ 3॥

mantra 4[III.ix.4]
katame rudrā iti । daśeme puruṣe prāṇā ātmaikādaśaste
yadā'smāccharīrānmartyādutkrāmantyatha rodayanti tadyadrodayanti
tasmādrudrā iti ॥ 4॥

mantra 5[III.ix.5]
katama ādityā iti । dvādaśa vai māsāḥ saṃvatsarasyaita ādityā ete
hīdam̐ sarvamādadānā yanti te yadidam̐ sarvamādadānā yanti
tasmādādityā iti ॥ 5॥

mantra 6[III.ix.6]
katama indraḥ katamaḥ prajāpatiriti । stanayitnurevendro yajñaḥ
prajāpatiriti । katamaḥ stanayitnurityaśaniriti । katamo yajña iti ।
paśava iti ॥ 6॥

mantra 7[III.ix.7]
katame ṣaḍityagniśca pṛthivī ca vāyuścāntarikṣaṃ
cā''dityaśca dyauścaite ṣaḍ ete hīdam̐ sarvaṃ ṣaḍiti ॥ 7॥

mantra 8[III.ix.8]
katame te trayo devā iti ima eva trayo lokā eṣu hīme sarve devā iti ।
katamau tau dvau devāvityannaṃ caiva prāṇaśceti । katamo'dhyardha
iti । yo'yaṃ pavata iti ॥ 8॥

mantra 9[III.ix.9]
tadāhuryadayameka eva eka ivaiva pavate ।ātha kathamadhyardha iti ।
yadasminnidam̐ sarvamadhyārdhnot tenādhyardha iti । katama eko deva
iti । prāṇa iti sa brahma tyadityācakṣate ॥ 9॥

mantra 10[III.ix.10]
pṛthivyeva yasyā''yatanamagnirloko mano jyotiryo vai taṃ puruṣaṃ
vidyātsarvasyā''tmanaḥ parāyaṇam̐, parāyaṇaṃ sa vai veditā syād
yājñavalkya । veda vā ahaṃ taṃ puruṣam̐ sarvasyā''tmanaḥ parāyaṇaṃ
yamāttha ya evāyam̐ śārīraḥ puruṣaḥ sa eṣa । vadaiva śākalya
tasya kā devatetyamṛtamiti hovāca ॥ 10॥

mantra 11[III.ix.11]
kāma eva yasyā''yatanam̐ hṛdayaṃ loko mano jyotiryo vai taṃ
puruṣaṃ vidyātsarvasyā''tmanaḥ parāyaṇam̐, sa vai veditā syād
yājñavalkya । veda vā ahaṃ taṃ puruṣam̐ sarvasyā''tmanaḥ parāyaṇaṃ
yamāttha ya evāyaṃ kāmamayaḥ puruṣaḥ sa eṣa vadaiva śākalya tasya kā
devateti । striya iti hovāca ॥ 11॥

mantra 12[III.ix.12]
rūpāṇyeva yasyā''yatanaṃ cakṣurloko mano jyotiryo vai taṃ puruṣaṃ
vidyātsarvasyā''tmanaḥ parāyaṇam̐, sa vai veditā syād yājñavalkya ।
veda vā ahaṃ taṃ puruṣam̐ sarvasyā''tmanaḥ parāyaṇaṃ yamāttha
ya evāsāvāditye puruṣaḥ sa eṣa vadaiva śākalya tasya kā devateti ।
satyamiti hovāca ॥ 12॥

mantra 13[III.ix.13]
ākāśa eva yasyā''yatanam̐ śrotraṃ loko mano jyotiryo vai taṃ
puruṣaṃ vidyātsarvasyā''tmanaḥ parāyaṇam̐, sa vai veditā syād
yājñavalkya । veda vā ahaṃ taṃ puruṣam̐ sarvasyā''tmanaḥ parāyaṇaṃ
yamāttha ya evāyam̐ śrautraḥ prātiśrutkaḥ puruṣaḥ sa eṣa vadaiva
śākalya tasya kā devateti । diśa iti hovāca ॥ 13॥

mantra 14[III.ix.14]
tama eva yasyā''yatanam̐ hṛdayaṃ loko mano jyotiryo vai taṃ
puruṣaṃ vidyātsarvasyā''tmanaḥ parāyaṇam̐, sa vai veditā syād
yājñavalkya । veda vā ahaṃ taṃ puruṣam̐ sarvasyā''tmanaḥ parāyaṇaṃ
yamāttha ya evāyaṃ chāyāmayaḥ puruṣaḥ sa eṣa vadaiva śākalya tasya
kā devateti । mṛtyuriti hovāca ॥ 14॥

mantra 15[III.ix.15]
rūpāṇyeva yasyā''yatanaṃ cakṣurloko mano jyotiryo vai taṃ puruṣaṃ
vidyātsarvasyā''tmanaḥ parāyaṇam̐, parāyaṇaṃ sa vai veditā syād
yājñavalkya । veda vā ahaṃ taṃ puruṣam̐ sarvasyā''tmanaḥ parāyaṇaṃ
yamāttha ya evāyamādarśe puruṣaḥ sa eṣa vadaiva śākalya tasya kā
devatetyasuriti hovāca ॥ 15॥

mantra 16[III.ix.16]
āpa eva yasyā''yatanam̐ hṛdayaṃ loko mano jyotiryo vai taṃ puruṣaṃ
vidyātsarvasyā''tmanaḥ parāyaṇam̐, parāyaṇaṃ sa vai veditā syād
yājñavalkya । veda vā ahaṃ taṃ puruṣam̐ sarvasyā''tmanaḥ parāyaṇaṃ
yamāttha ya evāyamapsu puruṣaḥ sa eṣa vadaiva śākalya tasya kā devateti ।
varuṇa iti hovāca ॥ 16॥

mantra 17[III.ix.17]
reta eva yasyā''yatanam̐ hṛdayaṃ loko mano jyotiryo vai taṃ
puruṣaṃ vidyātsarvasyā''tmanaḥ parāyaṇam̐, sa vai veditā syād
yājñavalkya । veda vā ahaṃ taṃ puruṣam̐ sarvasyā''tmanaḥ parāyaṇaṃ
yamāttha ya evāyaṃ putramayaḥ puruṣaḥ sa eṣa vadaiva śākalya tasya
kā devateti । prajāpatiriti hovāca ॥ 17॥

mantra 18[III.ix.18]
śākalyeti hovāca yājñavalkyastvām̐ svidime brāhmaṇā
aṅgārāvakṣayaṇamakratā3 iti ॥ 18॥

mantra 19[III.ix.19]
yājñavalkyeti hovāca śākalyo yadidaṃ kurupañcālānāṃ
brāhmaṇānatyavādīḥ kiṃ brahma vidvāniti । diśo veda sadevāḥ sapratiṣṭhā
iti । yaddiśo vettha sadevāḥ sapratiṣṭhāḥ ॥ 19॥

mantra 20[III.ix.20]
kindevato'syāṃ prācyāṃ diśyasītyādityadevata iti । sa
ādityaḥ kasminpratiṣṭhita iti । cakṣuṣīti । kasminnu cakṣuḥ
pratiṣṭhitamiti । rūpeṣviti cakṣuṣā hi rūpāṇi paśyati । kasminnu
rūpāṇi pratiṣṭhitānīti । hṛdaya iti hovāca hṛdayena hi rūpāṇi jānāti
hṛdaye hyeva rūpāṇi pratiṣṭhitāni bhavantītyevamevaitad yājñavalkya ॥ 20॥

mantra 21[III.ix.21]
kindevato'syāṃ dakṣiṇāyāṃ diśyasīti । yamadevata iti । sa yamaḥ
kasminpratiṣṭhita iti । yajña iti । kasminnu yajñaḥ pratiṣṭhita iti।
dakṣiṇāyāmiti । kasminnu dakṣiṇā pratiṣṭhiteti śraddhāyāmiti yadā
hyeva śraddhatte'tha dakṣiṇāṃ dadāti śraddhāyām̐ hyeva dakṣiṇā
pratiṣṭhiteti kasminnu śraddhā pratiṣṭhiteti hṛdaya iti hovāca
hṛdayena hi śraddhāṃ jānāti hṛdaye hyeva śraddhā pratiṣṭhitā
bhavatītyevamevaitad yājñavalkya ॥ 21॥

mantra 22[III.ix.22]
kindevato'syāṃ pratīcyāṃ diśyasīti । varuṇadevata iti । sa varuṇaḥ
kasmin pratiṣṭhita ityapsviti । kasminnvāpaḥ pratiṣṭhiteti retasīti ।
kasminnu retaḥ pratiṣṭhiteti iti hṛdaya iti tasmādapi pratirūpaṃ
jātamāhurhṛdayādiva sṛpto hṛdayādiva nirmita iti hṛdaye hyeva
retaḥ pratiṣṭhitaṃ bhavatītyevamevaitad yājñavalkya ॥ 22॥

mantra 23[III.ix.23]
kindevato'syāmudīcyāṃ diśyasīti । somadevata iti । sa somaḥ
kasminpratiṣṭhita iti । dīkṣāyāmiti । kasminnu dīkṣā pratiṣṭhiteti
satya iti tasmādapi dīkṣitamāhuḥ satyaṃ vadeti satye hyeva dīkṣā
pratiṣṭhiteti kasminnu satyaṃ pratiṣṭhitamiti hṛdaya iti hovāca
hṛdayena hi satyaṃ jānāti hṛdaye hyeva satyaṃ pratiṣṭhitaṃ
bhavatītyevamevaitad yājñavalkya ॥ 23॥

mantra 24[III.ix.24]
kindevato'syāṃ dhruvāyāṃ diśyasītyagnidevata iti । so'gniḥ
kasminpratiṣṭhita iti vācīti । kasminnu vākpratiṣṭhiteti hṛdaya iti ।
kasminnu hṛdayaṃ pratiṣṭhitamiti

mantra 25[III.ix.25]
ahalliketi hovāca yājñavalkyo yatraitadanyatrāsmanmanyāsai ।
yaddhyetadanyatrāsmatsyācchvāno vainadadyurvayām̐si
vainadvimathnīranniti ॥ 25॥

mantra 26[III.ix.26]
kasminnu tvaṃ cātmā ca pratiṣṭhitau stha iti । prāṇa iti । kasminnu
prāṇaḥ pratiṣṭhita ityapāna iti । kasminnvapānaḥ pratiṣṭhita iti ।
vyāna iti । kasminnu vyānaḥ pratiṣṭhita ityudāna iti । kasminnūdānaḥ
pratiṣṭhita iti । samāna iti । sa eṣa neti netyātmā'gṛhyo na
hi gṛhyate'śīryo na hi śīryate'saṅgo na hi sajyate'sito
na vyathate na riṣyatyetānyaṣṭāvāyatanānyaṣṭau lokā aṣṭau devā
aṣṭau puruṣāḥ । sa yastānpuruṣānniruhya pratyuhyātyakrāmat taṃ
tvaupaniṣadaṃ puruṣaṃ pṛcchāmi । taṃ cenme na vivakṣyasi mūrdhā
te vipatiṣyatīti । tam̐ ha na mene śākalyastasya ha mūrdhā vipapāta
api hāsya parimoṣiṇo'sthīnyapajahruranyanmanyamānāḥ ॥ 26॥

mantra 27[III.ix.27]
atha hovāca brāhmaṇā bhagavanto yo vaḥ kāmayate sa mā pṛcchatu
sarve vā mā pṛcchata yo vaḥ kāmayate taṃ vaḥ pṛcchāmi sarvānvā
vaḥ pṛcchāmīti । te ha brāhmaṇā na dadhṛṣuḥ ॥ 27॥

mantra 28[III.ix.28]
tānhaitaiḥ ślokaiḥ papraccha yathā vṛkṣo vanaspatistathaiva
puruṣo'mṛṣā tasya lomāni parṇāni tvagasyotpāṭikā bahiḥ ॥ 1॥ tvaca
evāsya rudhiraṃ prasyandi tvaca utpaṭaḥ tasmāttadatṛṇṇātpraiti raso
vṛkṣādivā''hatāt ॥ 2॥ mām̐sānyasya śakarāṇi kināṭam̐
snāva tatsthiram । asthīnyantarato dārūṇi majjā majjopamā kṛtā ॥ 3॥
yadvṛkṣo vṛkṇo rohati mūlānnavataraḥ punaḥ martyaḥ
svinmṛtyunā vṛkṇaḥ kasmānmūlātprarohati ॥ 4॥ retasa iti mā
vocata jīvatastatprajāyate dhānāruha iva vai vṛkṣo'ñjasā pretya
sambhavaḥ ॥ 5॥ yatsamūlamāvṛheyurvṛkṣaṃ na punarābhavet । martyaḥ
svinmṛtyunā vṛkṇaḥ kasmānmūlātprarohati ॥ 6॥ jāta eva na jāyate
ko nvenaṃ janayetpunaḥ vijñānamānandaṃ brahma rātirdātuḥ parāyaṇaṃ
tiṣṭhamānasya tadvida iti ॥ 7॥ ॥ 28 ॥

iti navamaṃ brāhmaṇam ॥

॥ iti bṛhadāraṇyakopaniṣadi tṛtīyo'dhyāyaḥ ॥

atha caturto'dhyāyaḥ ।

atha prathamaṃ brāhmaṇam ।

mantra 1 [IV.i.1]
oṃ janako ha vaideha āsāṃ cakre'tha ha yājñavalkya āvavrāja । tam̐
hovāca yājñavalkya kimarthamacārīḥ paśūnicchannaṇvantānityubhayameva
samrāḍ iti hovāca ॥ 1॥

mantra 2[IV.i.2]
yatte kaścidabravīt tacchṛṇavāmetyabravīn me jitvā śailinirvāgvai
brahmeti । yathā mātṛmānpitṛmānācāryavānbrūyāt tathā
tacchailirabravīd vāgvai brahmetyavadato hi kim̐ syādityabravīttu te
tasyā''yatanaṃ pratiṣṭhām । na me'bravīdityekapādvā etat samrāḍ iti ।
sa vai no brūhi yājñavalkya । vāgevā''yatanamākāśaḥ pratiṣṭhā
prajñetyenadupāsīta । kā prajñatā yājñavalkya । vāgeva samrāḍ
iti hovāca vācā vai samrāḍ bandhuḥ prajñāyata ṛgvedo yajurvedaḥ
sāmavedo'tharvāṅgirasa itihāsaḥ purāṇaṃ vidyā upaniṣadaḥ ślokāḥ
sūtrāṇyanuvyākhyānāni vyākhyānānīṣṭam̐ hutamāśitaṃ pāyitamayaṃ ca
lokaḥ paraśca lokaḥ sarvāṇi ca bhūtāni vācaiva sarvāṇi ca bhūtāni
vācā eva samrāṭ prajñāyante vāgvai samrāṭ paramaṃ brahma nainaṃ
vāgjahāti sarvāṇyenaṃ bhūtānyabhikṣaranti । devo bhūtvā devānapyeti ya
evaṃ vidvānetadupāste । hastyṛṣabham̐ sahasraṃ dadāmīti hovāca
janako vaidehaḥ । sa hovāca yājñavalkyaḥ pitā me'manyata nānanuśiṣya
hareteti ॥ 2॥

mantra 3[IV.i.3]
yadeva te kaścidabravīttacchṛṇavāmetyabravīnma ūdaṅkaḥ śaulbāyanaḥ
prāṇo vai brahmeti । yathā mātṛmānpitṛmānācāryavānbrūyāt
tathā tacchaulvāyano'bravīt prāṇo vai brahmetyaprāṇato hi
kim̐ syādityabravīttu te tasyā''yatanaṃ pratiṣṭhām । na
me'bravīdityekapādvā etat samrāḍ iti । sa vai no brūhi yājñavalkya ।
prāṇa evā''yatanamākāśaḥ pratiṣṭhā priyamityenadupāsīta ।
kā priyatā yājñavalkya । prāṇa eva samrāḍ iti hovāca prāṇasya
vai samrāṭ kāmāyāyājyaṃ yājayatyapratigṛhyasya pratigṛhṇātyapi
tatra vadhāśaṅkaṃ bhavati yāṃ diśameti prāṇasyaiva samrāṭ kāmāya
prāṇo vai samrāṭ paramaṃ brahma । nainaṃ prāṇo jahāti sarvāṇyenaṃ
bhūtānyabhikṣaranti । devo bhūtvā devānapyeti ya evaṃ vidvānetadupāste ।
hastyṛṣabham̐ sahasraṃ dadāmīti hovāca janako vaidehaḥ । sa
hovāca yājñavalkyaḥ pitā me'manyata nānanuśiṣya hareteti ॥ 3॥

mantra 4[IV.i.4]
yadeva te kaścidabravīt tacchṛṇavāmetyabravīnme
barkurvārṣṇaścakṣurvai brahmeti । yathā mātṛmānpitṛmānācāryavān
brūyāt tathā tadvārṣṇo'bravītccakṣurvai brahmetyapaśyato
hi kim̐ syādityabravīttu te tasyā''yatanaṃ pratiṣṭhām । na
me'bravīdityekapādvā etat samrāḍ iti । sa vai no brūhi yājñavalkya ।
cakṣurevā''yatanamākāśaḥ pratiṣṭhā satyamityetadupāsīta । kā
satyatā yājñavalkya । cakṣureva samrāḍ iti hovāca cakṣuṣā vai
samrāṭ paśyantamāhuradrākṣīriti । sa āhādrākṣamiti tatsatyaṃ bhavati
cakṣurvai samrāṭ paramaṃ brahma nainaṃ cakṣurjahāti sarvāṇyenaṃ
bhūtānyabhikṣaranti । devo bhūtvā devānapyeti ya evaṃ vidvānetadupāste ।
hastyṛṣabham̐ sahasraṃ dadāmīti hovāca janako vaidehaḥ । sa
hovāca yājñavalkyaḥ pitā me'manyata nānanuśiṣya hareteti ॥4॥

mantra 5[IV.i.5]
yadeva te kaścidabravīt tacchṛṇavāmetyabravīnme gardabhīvipīto
bhāradvājaḥ śrotraṃ vai brahmeti yathā mātṛmānpitṛmānācāryavānbrūyāt
tathā tadbhāradvājo'bravīcchrotraṃ vai brahmetyaśṛṇvato
hi kim̐ syādityabravīttu te tasyā''yatanaṃ pratiṣṭhām । na
me'bravīdityekapādvā etat samrāḍ iti । sa vai no brūhi yājñavalkya ।
śrotramevā''yatanamākāśaḥ pratiṣṭhā'nantamityenadupāsīta ।
kā'nantatā yājñavalkya । diśa eva samrāḍ iti hovāca tasmādvai
samrāḍ api yāṃ kāñca diśaṃ gacchati naivāsyā antaṃ gacchatyanantā
hi diśo diśo vai samrāṭ śrotram̐śrotraṃ vai samrāṭ paramaṃ
brahma । nainam̐ śrotraṃ jahāti sarvāṇyenaṃ bhūtānyabhikṣaranti ।
devo bhūtvā devānapyeti ya evaṃ vidvānetadupāste । hastyṛṣabham̐
sahasraṃ dadāmīti hovāca janako vaidehaḥ । sa hovāca yājñavalkyaḥ
pitā me'manyata nānanuśiṣya hareteti ॥ 5॥

mantra 6[IV.i.6]
yadeva te kaścidabravīt tacchṛṇavāmetyabravīnme satyakāmo jābālo
mano vai brahmeti yathā mātṛmānpitṛmānācāryavānbrūyāt tathā
tajjābālo abravīn mano vai brahmetyamanaso hi kim̐ syādityabravīttu
te tasyā''yatanaṃ pratiṣṭhām । na me'bravīdityekapādvā etat samrāḍ
iti । sa vai no brūhi yājñavalkya । mana evā''yatanamākāśaḥ
pratiṣṭhā''nanda ityenadupāsīta । kā''nandatā yājñavalkya ।
mana eva samrāḍ iti hovāca manasā vai samrāṭ striyamabhihāryate tasyāṃ
pratirūpaḥ putro jāyate sa ānando । mano vai samrāṭ paramaṃ brahma nainaṃ
mano jahāti sarvāṇyenaṃ bhūtānyabhikṣaranti । devo bhūtvā devānapyeti
ya evaṃ vidvānetadupāste । hastyṛṣabham̐ sahasraṃ dadāmīti hovāca
janako vaidehaḥ । sa hovāca yājñavalkyaḥ pitā me'manyata nānanuśiṣya
hareteti ॥ 6॥

mantra 7[IV.i.7]
yadeva te kaścidabravīt tacchṛṇavāmetyabravīnme vidagdhaḥ śākalyo
hṛdayaṃ vai brahmeti yathā mātṛmānpitṛmānācāryavānbrūyāt
tathā tacchākalyo'bravīd dhṛdayaṃ vai brahmetyahṛdayasya hi
kim̐ syādityabravīttu te tasyā''yatanaṃ pratiṣṭhāṃ । na
me'bravīdityekapādvā etat samrāḍ iti । sa vai no brūhi yājñavalkya ।
hṛdayamevā''yatanamākāśaḥ pratiṣṭhā sthitirityenadupāsīta । kā
sthititā yājñavalkya । hṛdayameva samrāḍ iti hovāca hṛdayaṃ vai
samrāṭ sarveṣāṃ bhūtānāmāyatanam̐ hṛdayaṃ vai samrāṭ, sarveṣāṃ
bhūtānāṃ pratiṣṭhā hṛdaye hyeva samrāṭ sarvāṇi bhūtāni pratiṣṭhitāni
bhavanti hṛdayaṃ vai samrāṭ paramaṃ brahma nainam̐ hṛdayaṃ
jahāti sarvāṇyenaṃ bhūtānyabhikṣaranti । devo bhūtvā devānapyeti ya
evaṃ vidvānetadupāste । hastyṛṣabham̐ sahasraṃ dadāmīti hovāca
janako vaidehaḥ । sa hovāca yājñavalkyaḥ pitā me'manyata nānanuśiṣya
hareteti ॥ 7॥

iti prathamaṃ brāhmaṇam ॥

atha dvitīyaṃ brāhmaṇam ।

mantra 1[IV.ii.1]
janako ha vaidehaḥ kūrcādupāvasarpannuvāca namaste'stu yājñavalkyānu
mā śādhīti । sa hovāca yathā vai samrāṇ mahāntamadhvānameṣyanrathaṃ
vā nāvaṃ vā samādadītaivamevaitābhirupaniṣadbhiḥ samāhitātmā'syasi
evaṃ vṛndāraka āḍhyaḥ sannadhītaveda uktopaniṣatka ito vimucyamānaḥ
kva gamiṣyasīti । nāhaṃ tad bhagavan veda yatra gamiṣyāmītyatha vai
te'haṃ tadvakṣyāmi yatra gamiṣyasīti । bravītu bhagavāniti ॥ 1॥

mantra 2[IV.ii.2]
indho ha vai nāmaiṣa yo'yaṃ dakṣiṇe'kṣanpuruṣastaṃ vā etamindham̐
santamindra ityācakṣate parokṣeṇaiva parokṣapriyā iva hi devāḥ
pratyakṣadviṣaḥ ॥ 2॥

mantra 3[IV.ii.3]
athaitadvāme'kṣaṇi puruṣarūpameṣā'sya patnī virāṭ tayoreṣa
sam̐stāvo ya eṣo'ntarhṛdaya ākāśo'thainayoretadannaṃ
ya eṣo'ntarhṛdaye lohitapiṇḍo'thainayoretatprāvaraṇaṃ
yadetadantarhṛdaye jālakamivāthainayoreṣā sṛtiḥ sañcaraṇī
yaiṣā hṛdayādūrdhvā nāḍyuccarati । yathā keśaḥ sahasradhā
bhinna evamasyaitā hitā nāma nāḍyo'ntarhṛdaye pratiṣṭhitā
bhavantyevamasya etāśitāsnāma nāḍyasantarhṛdaye pratiṣṭhitāsbhavanti
etābhirvā etadāsravadāsravati tasmādeṣa praviviktāhāratara ivaiva
bhavatyasmācchārīrādātmanaḥ ॥ 3॥

mantra 4[IV.ii.4]
tasya prācī dikprāñcaḥ prāṇāḥ dakṣiṇā digdakṣiṇe prāṇāḥ pratīcī
dikpratyañcaḥ prāṇā udīcī digudañcaḥ prāṇāḥ ūrdhvā digūrdhvāḥ
prāṇāḥ avācī digavāñcaḥ prāṇāḥ sarvā diśaḥ sarve prāṇāḥ । sa eṣa
neti netyā'tmāgṛhyo na hi gṛhyate'śīryo na hi śīryate'saṅgo
na hi sajyate'sito na vyathate na riṣyatyvyathate asaṅgasna hi
sajyate asitasna vyathate na riṣyati abhayaṃ vai janaka prāpto'sīti
hovāca yājñavalkyaḥ । sa hovāca janako vaideho'bhayaṃ tvā gacchatād
yājñavalkya yo no bhagavann abhayaṃ vedayase namaste'stvime videhā
ayamahamasmi ॥ 4॥

iti dvitīyaṃ brāhmaṇam ॥

atha tṛtīyaṃ brāhmaṇam ।

mantra 1[IV.iii.1]
janakam̐ ha vaidehaṃ yājñavalkyo jagāma sa mene na vadiṣya
iti sa mene na vadiṣya ityatha ha yajjanakaśca vaideho
yājñavalkyaścāgnihotre samūdāte tasmai ha yājñavalkyo varaṃ dadau ।
sa ha kāmapraśnameva vavre । tam̐ hāsmai dadau । tam̐ ha samrāḍeva
pūrvaṃ papraccha ॥ 1॥

mantra 2[IV.iii.2]
yājñavalkya kiñjyotirayaṃ puruṣa ityādityajyotiḥ samrāḍ iti
hovācā''dityenaivāyaṃ jyotiṣā''ste palyayate karma kurute
vipalyetītyevamevaitad yājñavalkya ॥ 2॥

mantra 3[IV.iii.3]
astamita āditye yājñavalkya kiñjyotirevāyaṃ puruṣa iti । candramā
evāsya jyotirbhavatīti candramasaivāyaṃ jyotiṣāste palyayate karma
kurute vipalyetītyevamevaitad yājñavalkya ॥ 3॥

mantra 4[IV.iii.4]
astamita āditye yājñavalkya candramasyastamite kiñjyotirevāyaṃ puruṣa
ityagnirevāsya jyotirbhavatyagninaivāyaṃ jyotiṣā''ste palyayate
karma kurute vipalyetītyevamevaitad yājñavalkya ॥ 4॥

mantra 5[IV.iii.5]
astamita āditye yājñavalkya candramasyastamite śānte'gnau
kiñjyotirevāyaṃ puruṣa iti । vāgevāsya jyotirbhavatīti vācaivāyaṃ
jyotiṣāste palyayate karma kurute vipalyetīti । tasmādvai samrāḍ api
yatra svaḥ pāṇirna vinirjñāyate'tha yatra vāguccaratyupaiva tatra
nyetītyevamevaitad yājñavalkya ॥ 5॥

mantra 6[IV.iii.6]
astamita āditye yājñavalkya candramasyastamite śānte'gnau śāntāyāṃ
vāci kiñjyotirevāyaṃ puruṣa ityātmaivāsya jyotirbhavatyātmanaivāyaṃ
jyotiṣā''ste palyayate karma kurute vipalyetīti ॥ 6॥

mantra 7[IV.iii.7]
katama ātmeti । yo'yaṃ vijñānamayaḥ prāṇeṣu hṛdyantarjyotiḥ
vijñānamayaḥ prāṇeṣu hṛdyantarjyotiḥ puruṣaḥ puruṣassa samānaḥ
sannubhau lokāvanusañcarati । dhyāyatīva lelāyatīva sa hi svapno
bhūtvemaṃ lokamatikrāmati mṛtyo rūpāṇi ॥ 7॥

mantra 8[IV.iii.8]
sa vā ayaṃ puruṣo jāyamānaḥ śarīramabhisampadyamānaḥ pāpmabhiḥ
sam̐sṛjyate । sa utkrāmanmriyamāṇaḥ pāpmano vijahāti ॥ 8॥

mantra 9[IV.iii.9]
tasya vā etasya puruṣasya dve eva sthāne bhavata idaṃ ca paralokasthānaṃ
ca sandhyaṃ tṛtīyam̐ svapnasthānaṃ tasminsandhye sthāne
tiṣṭhannete ubhe sthāne paśyatīdaṃ ca paralokasthānaṃ ca atha
yathākramo'yaṃ paralokasthāne bhavati tamākramamākramyobhayānpāpmana
ānandām̐śca paśyati । paśyati sa yatra prasvapityasya lokasya
sarvāvato mātrāmapādāya svayaṃ vihatya svayaṃ nirmāya svena bhāsā svena
jyotiṣā prasvapityatrāyaṃ puruṣaḥ svayaṃ jyotirbhavati ॥ 9॥

mantra 10[IV.iii.10]
na tatra rathā na rathayogā na panthāno bhavantyatha
rathānrathayogānpathaḥ sṛjate । na tatrā''nandā mudaḥ pramudo
bhavantyathā''nandānmudaḥ pramudaḥ sṛjate । na tatra veśāntāḥ
puṣkariṇyaḥ sravantyo bhavantyatha veśāntānpuṣkariṇīḥ sravantīḥ
sṛjate sa hi kartā ॥ 10॥

mantra 11[IV.iii.11]
tadete ślokā bhavanti svapnena śārīramabhiprahatyā suptaḥ
suptānabhicākaśīti । śukramādāya punaraiti sthānam̐ hiraṇmayaḥ
puruṣa ekaham̐saḥ ॥ 11॥

mantra 12[IV.iii.12]
prāṇena rakṣannaparaṃ kulāyaṃ bahiṣkulāyādamṛtaścaritvā sa
īyate'mṛto yatrakāmam̐ hiraṇmayaḥ puruṣa ekaham̐saḥ ॥ 12॥

mantra 13[IV.iii.13]
svapnānta uccāvacamīyamāno rūpāṇi devaḥ kurute bahūni । uteva strībhiḥ
saha modamāno jakṣadutevāpi bhayāni paśyan ॥ 13॥

mantra 14[IV.iii.14]
ārāmamasya paśyanti na taṃ paśyati kaścaneti । taṃ nā''yataṃ
bodhayedityāhuḥ । durbhiṣajyam̐ hāsmai bhavati yameṣa na
pratipadyate ॥ 14॥ atho khalvāhurjāgaritadeśa evāsyaiṣa yāni hyeva
jāgrat paśyati tāni supta ityatrāyaṃ puruṣaḥ svayaṃ jyotirbhavati ।
so'haṃ bhagavate sahasraṃ dadāmyata ūrdhvaṃ vimokṣāya brūhīti ॥ 14॥

mantra 15[IV.iii.15]
sa vā eṣa etasminsamprasāde ratvā caritvā dṛṣṭvaiva puṇyaṃ
ca pāpaṃ ca punaḥ pratinyāyaṃ pratiyonyādravati svapnāyaiva eva sa
yattatra kiñcitpaśyatyananvāgatastena bhavatyasaṅgo hyayaṃ puruṣa
ityevamevaitad yājñavalkya । so'haṃ bhagavate sahasraṃ dadāmyata
ūrdhvaṃ vimokṣāyaiva brūhīti ॥ 15॥

mantra 16[IV.iii.16]
sa vā eṣa etasmintsvapne ratvā caritvā dṛṣṭvaiva puṇyaṃ ca pāpaṃ ca
punaḥ pratinyāyaṃ pratiyonyādravati buddhāntāyaiva ādravati buddhāntāya
eva sa yattatra kiñcitpaśyatyananvāgatastena bhavatyasaṅgo hyayaṃ
puruṣa ityevamevaitad yājñavalkya । so'haṃ bhagavate sahasraṃ dadāmyata
ūrdhvaṃ vimokṣāyaiva brūhīti ॥ 16॥

mantra 17[IV.iii.17]
sa vā eṣa etasminbuddhānte ratvā caritvā dṛṣṭvaiva puṇyaṃ ca pāpaṃ
ca punaḥ pratinyāyaṃ pratiyonyādravati svapnāntāyaiva ॥ 17॥ ādravati
svapnāntāya eva

mantra 18[IV.iii.18]
tadyathā mahāmatsya ubhe kūle'nusañcarati pūrvaṃ cāparaṃ caivamevāyaṃ
puruṣa etāvubhāvantāvanusañcarati svapnāntaṃ ca buddhāntaṃ ca ॥
18॥ antau anusañcarati svapnāntam ca buddhāntam ca

mantra 19[IV.iii.19]
tadyathāsminnā'kāśe śyeno vā suparṇo vā viparipatya śrāntaḥ
sam̐hatya pakṣau saṃlayāyaiva dhriyata dhriyate evamevāyaṃ puruṣa
etasmā antāya dhāvati yatra supto na kaṃ cana kāmaṃ kāmayate na kaṃ
cana svapnaṃ paśyati ॥ 19॥ svapnam paśyati

mantra 20[IV.iii.20]
tā vā asyaitā hitā nāma nāḍyo yathā keśaḥ sahasradhā bhinnastāvatā'ṇimnā
tiṣṭhanti śuklasya nīlasya piṅgalasya haritasya lohitasya pūrṇā ।
nīlasya piṅgalasya haritasya lohitasya pūrṇāsatha yatrainaṃ ghnantīva
jinantīva hastīva vicchāyayati gartamiva patati yadeva jāgradbhayaṃ
paśyati tadatrāvidyayā manyate'tha yatra deva iva rājevāhamevedam̐
sarvo'smīti manyate so'sya paramo lokāḥ ॥ 20॥

mantra 21[IV.iii.21]
tadvā asyaitadaticchandā apahatapāpmābhayam̐ rūpam । tadyathā priyayā
striyā sampariṣvakto na bāhyaṃ kiṃ cana veda nā''ntaramevamevāyaṃ
puruṣaḥ prājñenā''tmanā sampariṣvakto na bāhyaṃ kiṃ cana veda
nā''ntaram । sampariṣvaktasna bāhyam kim cana veda na antaraṃ tadvā
asyaitadāptakāmamātmakāmamakāmaṃ rūpam śokāntaram ॥ 21॥

mantra 22[IV.iii.22]
atra pitā'pitā bhavati mātā'mātā lokā alokā devā adevā vedā avedā
atra steno'steno bhavati bhrūṇahā'bhrūṇahā cāṇḍālo'caṇḍālaḥ
paulkaso'paulkaso śramaṇo'śramaṇa stāpaso'tāpaso'nanvāgataṃ
puṇyenānanvāgataṃ pāpena aśramaṇastāpasasatāpasasananvāgataspuṇyena
ananvāgataspāpena tīrṇo hi tadā sarvāñchokānhṛdayasya bhavati ॥ 22॥

mantra 23[IV.iii.23]
yadvai tanna paśyati paśyanvai tanna paśyati na hi
draṣṭurdṛṣṭerviparilopo vidyate'vināśitvān na tu taddvitīyamasti
tato'nyadvibhaktaṃ yatpaśyet ॥ 23॥

mantra 24[IV.iii.24]
yadvai tanna jighrati jighranvai tanna jighrati na hi
ghrāturghrāterviparilopo vidyate'vināśitvān na tu taddvitīyamasti
tato'nyadvibhaktaṃ yajjighret ॥ 24॥

mantra 25[IV.iii.25]
yadvai tanna rasayate rasayanvai tanna rasayate na hi rasayitū
rasayiterviparilopo vidyate'vināśitvān na tu taddvitīyamasti
tato'nyadvibhaktaṃ yadrasayet ॥ 25॥

mantra 26[IV.iii.26]
yadvai tanna vadati vadanvai tanna vadati na hi vakturvakterviparilopo
vidyate'vināśitvān na tu taddvitīyamasti tato'nyadvibhaktaṃ yadvadet ॥ 26॥

mantra 27[IV.iii.27]
yadvai tanna śṛṇoti śṛṇvanvai tanna śṛṇoti na hi śrotuḥ
śruterviparilopo vidyate'vināśitvān na tu taddvitīyamasti
tato'nyadvibhaktaṃ yacchṛṇuyāt ॥ 27॥

mantra 28[IV.iii.28]
yadvai tanna manute manvāno vai tanna manute na hi manturmaterviparilopo
vidyate'vināśitvān na tu taddvitīyamasti tato'nyadvibhaktaṃ
yanmanvīta ॥ 28॥

mantra 29[IV.iii.29]
yadvai tanna spṛśati spṛśanvai tanna spṛśati na hi spraṣṭuḥ
spṛṣṭerviparilopo vidyate'vināśitvān na tu taddvitīyamasti
tato'nyadvibhaktaṃ yatspṛśet ॥ 29॥

mantra 30[IV.iii.30]
yadvai tanna vijānāti vijānanvai tanna vijānāti na hi
vijñāturvijñāterviparilopo vidyate'vināśitvān na tu taddvitīyamasti
tato'nyadvibhaktaṃ yadvijānīyāt ॥ 30॥

mantra 31[IV.iii.31]
yatra vā anyadiva syāt tatrānyo'nyatpaśyedanyo'nyajjighred
anyo'nyadrasayedanyo'nyadvadedanyo'nyacchṛṇuyādanyo'nyanmanvītā
nyo'nyatspṛśedanyo'nyadvijānīyāt ॥ 31॥

mantra 32[IV.iii.32]
salila eko draṣṭādvaito bhavatyeṣa brahmalokaḥ samrāḍ iti
hainamanuśaśāsa yājñavalkya। eṣāsya paramā gatireṣāsya paramā sampad
eṣo'sya paramo loka eṣo'sya parama ānanda etasyaivā''nandasyānyāni
bhūtāni mātrāmupajīvanti ॥ 32॥

mantra 33[IV.iii.33]
sa yo manūṣyāṇām̐ rāddhaḥ samṛddho bhavatyanyeṣāmadhipatiḥ
sarvairmānuṣyakairbhogaiḥ sampannatamaḥ anyeṣāṃ sampannatamassa
manuṣyāṇāṃ parama ānando'tha ye śataṃ manuṣyāṇāmānandāḥ sa ekaḥ
pitṛṇāṃ jitalokānāmānando'tha ye śataṃ pitṛṇāṃ jitalokānāmānandāḥ
sa eko gandharvaloka ānando'tha ye śataṃ gandharvaloka ānandāḥ
sa ekaḥ karmadevānāmānando ye karmaṇā devatvamabhisampadyante'tha
ye śataṃ karmadevānāmānandāḥ sa eka ājānadevānāmānando yaśca
śrotriyo'vṛjino'kāmahato'tha ye śatamājānadevānāmānandāḥ
sa ekaḥ prajāpatiloka ānando yaśca śrotriyo'vṛjino'kāmahato
atha ye śataṃ prajāpatiloka ānandāḥ sa eko brahmaloka ānando yaśca
śrotriyo'vṛjino'kāmahato'thaiṣa eva parama ānanda eṣa brahmalokaḥ
samrāḍ iti hovāca yājñavalkyaḥ । so'haṃ bhagavate sahasraṃ dadāmyata
ūrdhvaṃ vimokṣāyaiva brūhītyatra ha yājñavalkyo bibhayāṃcakāraḥ
medhāvī rājā sarvebhyo mā'ntebhya udarautsīditi ॥ 33॥

mantra 34[IV.iii.34]
sa vā eṣa etasminsvapnānte ratvā caritvā dṛṣṭvaiva puṇyaṃ ca pāpaṃ
ca punaḥ pratinyāyaṃ pratiyonyādravati buddhāntāyaiva ॥ 34॥

mantra 35[IV.iii.35]
tadyathā'naḥ susamāhitamutsarjadyāyādevamevāyam̐ śārīra ātmā
prājñenā''tmanā'nvārūḍha utsarjanyāti yatraitadūrdhvocchvāsī
bhavati ॥ 35॥ utsarjam yāti yatraitadūrdhvocchvāsī bhavati ॥ 35॥

mantra 36[IV.iii.36]
sa yatrāyamaṇimānaṃ nyeti jarayā vopatapatā vā'ṇimānaṃ nigacchati
tadyathā''mraṃ vodumbaraṃ vā pippalaṃ vā bandhanātpramucyata evamevāyaṃ
puruṣa ebhyo'ṅgebhyaḥ sampramucya punaḥ pratinyāyaṃ pratiyonyādravati
prāṇāyaiva ॥ 36॥ prāṇāya eva

mantra 37[IV.iii.37]
tadyathā rājānamāyantamugrāḥ pratyenasaḥ sūtagrāmaṇyo'nnaiḥ
pānairavasathaiḥ pratikalpante ayamāyātyayamāgacchatītyevam̐
haivaṃvidam̐ sarvāṇi bhūtāni pratikalpanta idaṃ
brahmā''yātīdamāgacchatīti ॥ 37॥

mantra 38[IV.iii.38]
tadyathā rājānaṃ prayiyāsantamugrāḥ pratyenasaḥ
sūtagrāmaṇyo'bhisamāyantyevamevemamātmānamantakāle sarve prāṇā
abhisamāyanti yatraitadūrdhvocchvāsī bhavati ॥ 38॥

iti tṛtīyaṃ brāhmaṇam ॥

atha caturthaṃ brāhmaṇam ।

mantra 1[IV.iv.1]
sa yatrāyamātmā'balyaṃ nyetya sammohamiva nyetyathainamete prāṇā
abhisamāyanti sa etāstejomātrāḥ samabhyādadāno hṛdayamevānvavakrāmati sa
yatraiṣa cākṣuṣaḥ puruṣaḥ parāṅparyāvartate'thārūpajño bhavati ॥ 1॥

mantra 2[IV.iv.2]
ekībhavati na paśyatītyāhurekībhavati na jighratītyāhurekībhavati
na rasayatītyāhurekībhavati na vadatītyāhurekībhavati
na śṛṇotītyāhurekībhavati na manuta ityāhurekībhavati na
spṛśatītyāhurekībhavati na vijānātītyāhustasya haitasya hṛdayasyāgraṃ
pradyotate tena pradyotenaiṣa ātmā niṣkrāmati cakṣuṣṭo vā mūrdhno
vā'nyebhyo vā śarīradeśebhyastamutkrāmantaṃ prāṇo'nūtkrāmati
prāṇamanūtkrāmantam̐ sarve prāṇā anūtkrāmanti । savijñāno bhavati
savijñānamevānvavakrāmati । taṃ vidyākarmaṇī samanvārabhete pūrvaprajñā
ca ॥ 2॥

mantra 3[IV.iv.3]
tadyathā tṛṇajalāyukā tṛṇasyāntaṃ
gatvā'nyamākramamākramyātmānamupasam̐haratyevamevāyamātmedam̐
śarīraṃ nihatyāvidyāṃ
gamayitvā'nyamākramamākramyā''tmānamupasam̐harati ॥ 3॥

mantra 4[IV.iv.4]
tadyathā peśaskārī peśaso mātrāmapādāyānyannavataraṃ kalyāṇataram̐
rūpaṃ tanuta evamevāyamātmedam̐ śarīraṃ nihatyāvidyāṃ
gamayitvā'nyannavataraṃ kalyāṇataram̐ rūpaṃ kurute pitryaṃ vā
gāndharvaṃ vā daivaṃ vā prājāpatyaṃ vā brāhmaṃ vā'nyeṣāṃ vā bhūtānām ॥
4॥ brāhmam vā prājāpatyam vā daivam vā anyebhyasvā bhūtebhyas

mantra 5[IV.iv.5]
sa vā ayamātmā brahma vijñānamayo manomayaḥ prāṇamayaścakṣurmayaḥ
śrotramayaḥ pṛthivīmaya āpomayo vāyumaya ākāśamayastejomayo'tejomayaḥ
kāmamayo'kāmamayaḥ krodhamayo'krodhamayo dharmamayo'dharmamayaḥ
sarvamayasśrotramayasākāśamayasvāyumayastejomaya-
sāpomayaspṛthivīmayaskrodhamayasakrodhamaya- śarṣamayasaharṣamayas
tadyadetadidammayo'domaya iti yathākārī yathācārī tathā bhavati ।
sādhukārī sādhurbhavati pāpakārī pāpo bhavati puṇyaḥ puṇyena karmaṇā
bhavati pāpaḥ pāpena । atho khalvāhuḥ kāmamaya evāyaṃ puruṣa iti sa
yathākāmo bhavati tatkraturbhavati yatkraturbhavati tatkarma kurute
yatkarma kurute tadabhisampadyate ॥ 5॥

mantra 6[IV.iv.6]
tadeṣa śloko bhavati । tadeva saktaḥ saha karmaṇaiti liṅgaṃ mano
yatra niṣaktamasya । prāpyāntaṃ karmaṇastasya yatkiñceha karotyayam ।
tasmāllokātpunaraityasmai lokāya karmaṇ iti nu kāmayamāno'thākāmayamāno
yo'kāmo niṣkāma bhavati āptakāma ātmakāmo na tasya prāṇā utkrāmanti
brahmaiva sanbrahmāpyeti ॥ 6॥

mantra 7[IV.iv.7]
tadeṣa śloko bhavati yadā sarve pramucyante kāmā ye'sya hṛdi
śritāḥ । atha martyo'mṛto bhavatyatra brahma samaśnuta iti ॥
tadyathā'hinirvlayanī valmīke mṛtā pratyastā śayītaivamevedam̐
śarīram̐ śete'thāyamaśarīro'mṛtaḥ prāṇo brahmaiva teja eva
so'haṃ bhagavate sahasraṃ dadāmīti hovāca janako vaidehaḥ ॥ 7॥

mantra 8[IV.iv.8]
tadete ślokā bhavanti । aṇuḥ panthā vitataḥ purāṇo mām̐
spṛṣṭo'nuvitto mayaiva । tena dhīrā apiyanti brahmavidaḥ svargaṃ
lokamita ūrdhvaṃ vimuktāḥ ॥ 8॥

mantra 9[IV.iv.9]
tasmiñchuklamuta nīlamāhuḥ piṅgalam̐ haritaṃ lohitaṃ ca । eṣa
panthā brahmaṇā hānuvittastenaiti brahmavitpuṇyakṛttaijasaśca ॥ 9॥

mantra 10[IV.iv.10]
andhaṃ tamaḥ praviśanti ye'vidyāmupāsate । tato bhūya iva te tamo ya
u vidyāyām̐ ratāḥ ॥ 10॥

mantra 11[IV.iv.11]
anandā nāma te lokā andhena tamasā''vṛtāḥ tām̐ste
pretyābhigacchantyavidvām̐so'budho janāḥ ॥ 11॥

mantra 12[IV.iv.12]
ātmānaṃ cedvijānīyādayamasmīti pūruṣaḥ kimicchankasya kāmāya
śarīramanusañjvaret ॥ 12॥

mantra 13[IV.iv.13]
yasyānuvittaḥ pratibuddha ātmā'sminsandehye gahane praviṣṭaḥ । sa
viśvakṛt sa hi sarvasya kartā tasya lokaḥ sa u loka eva ॥ 13॥

mantra 14[IV.iv.14]
ihaiva santo'tha vidmastadvayaṃ na cedavedirmahatī vinaṣṭiḥ । ye
tadviduramṛtāste bhavantyathetare duḥkhamevāpiyanti ॥ 14॥

mantra 15[IV.iv.15]
yadaitamanupaśyatyātmānaṃ devamañjasā । īśānaṃ bhūtabhavyasya na tato
vijugupsate ॥ 15॥

mantra 16[IV.iv.16]
yasmādarvāksaṃvatsaro'hobhiḥ parivartate । taddevā jyotiṣāṃ
jyotirāyurhopāsate'mṛtam ॥ 16॥

mantra 17[IV.iv.17]
yasminpañca pañcajanā ākāśaśca pratiṣṭhitaḥ । tameva manya
ātmānaṃ vidvānbrahmāmṛto'mṛtam ॥ 17॥

mantra 18[IV.iv.18]
prāṇasya prāṇamuta cakṣuṣaścakṣuruta śrotrasya śrotraṃ manaso
ye mano viduḥ । te nicikyurbrahma purāṇamagryam ॥ 18॥

mantra 19[IV.iv.19]
manasaivānudraṣṭavyaṃ neha nānā'sti kiṃ cana । mṛtyoḥ sa
mṛtyumāpnoti ya iha nāneva paśyati ॥ 19॥

mantra 20[IV.iv.20]
ekadhaivānudraṣṭavyametadapramayaṃ dhruvam । virajaḥ para ākāśādaja
ātmā mahāndhruvaḥ ॥ 20॥

mantra 21[IV.iv.21]
tameva dhīro vijñāya prajñāṃ kurvīta brāhmaṇaḥ ।
nānudhyāyādbahūñchabdān vāco viglāpanam̐ hi taditi ॥ 21॥

mantra 22[IV.iv.22]
sa vā eṣa mahānaja ātmā yo'yaṃ vijñānamayaḥ prāṇeṣu ya
eṣo'ntarhṛdaya ākāśastasmiñchete sarvasya vaśī sarvasyeśānaḥ
sarvasyādhipatiḥ sa na sādhunā karmaṇā bhūyānno evāsādhunā kanīyāneṣa
sarveśvara eṣa bhūtādhipatireṣa bhūtapāla eṣa seturvidharaṇa eṣāṃ
lokānāmasambhedāya । tametaṃ vedānuvacanena brāhmaṇā vividiṣanti
yajñena dānena tapasā'nāśakenaitameva viditvā munirbhavatyviditvā
munisbhavati etameva pravrājino lokamicchantaḥ pravrajantyetaddha sma
vai tatpūrve vidvām̐saḥ prajāṃ na kāmayante kiṃ prajayā kariṣyāmo
yeṣāṃ no'yamātmā'yaṃ loka iti । te ha sma putraiṣaṇāyāśca
vittaiṣaṇāyāśca lokaiṣaṇāyāśca vyutthāyātha bhikṣācaryaṃ caranti
yā hyeva putraiṣaṇā sā vittaiṣaṇā yā vittaiṣaṇā sā lokaiṣaṇobhe hyete
eṣaṇe eva bhavataḥ । sa eṣa neti netyātmā'gṛhyo na hi gṛhyate
'śīryo na hi śīryate'saṅgo na hi sajyate'sito na vyathate
na riṣyatyetamu haivaite na tarata ityataḥ pāpamakaravamityataḥ
kalyāṇamakaravamityubhe u haivaiṣa ete tarati nainaṃ kṛtākṛte
tapataḥ ॥ 22॥

mantra 23[IV.iv.23]
tadetadṛcābhyuktam । eṣa nityo mahimā brāhmaṇasya na vardhate karmaṇā
no kanīyān । tasyaiva syāt padavittaṃ viditvā na lipyate karmaṇā
pāpakeneti । tasmādevaṃvicchānto dānta uparatastitikṣuḥ samāhito
bhūtvā''tmanyevā''tmānaṃ paśyati sarvamātmānaṃ paśyati nainaṃ pāpmā
tarati sarvaṃ pāpmānaṃ tarati nainaṃ pāpmā tapati sarvaṃ pāpmānaṃ tapati
vipāpo virajo'vicikitso brāhmaṇo bhavati eṣa brahmalokaḥ samrāḍ iti
hovāca yājñavalkyaḥ । so'haṃ bhagavate videhāndadāmi mām cāpi saha
dāsyāyeti ॥ 23॥

mantra 24[IV.iv.24]
sa vā eṣa mahānaja ātmā'nnādo vasudāno vindate vasu ya evaṃ veda ॥ 24॥

mantra 25[IV.iv.25]
sa vā eṣa mahānaja ātmā'jaro'maro'mṛto'bhayo brahmābhayaṃ vai
brahmābhayam̐ hi vai brahma bhavati ya evaṃ veda ॥ 25॥

iti caturthaṃ brāhmaṇam ।

atha pañcamaṃ brāhmaṇam ।

mantra 1[IV.v.1]
atha ha yājñavalkyasya dve bhārye babhūvaturmaitreyī ca kātyāyanī ca
tayorha maitreyī brahmavādinī babhūva strīprajñaiva tarhi kātyāyanyatha
ha yājñavalkyo'nyadvṛttamupākariṣyan ॥ 1॥

mantra 2[IV.v.2]
maitreyīti hovāca yājñavalkyaḥ pravrajiṣyanvā are'hamasmātsthānādasmi ।
hanta te'nayā katyāyānyā'ntaṃ karavāṇīti ॥ 2॥

mantra 3[IV.v.3]
sā hovāca maitreyī yannu ma iyaṃ bhagoḥ sarvā pṛthivī vittena
pūrṇā syāt syāṃ nvahaṃ tenāmṛtā''ho3 neti neti hovāca yājñavalkyo
yathaivopakaraṇavatāṃ jīvitaṃ tathaiva te jīvitam̐ syādamṛtatvasya
tu nā''śā'sti vitteneti ॥ 3॥

mantra 4[IV.v.4]
sā hovāca maitreyī yenāhaṃ nāmṛtā syāṃ kimahaṃ tena kuryām । yadeva
bhagavānveda tadeva me brūhīti ॥ 4॥

mantra 5[IV.v.5]
sa hovāca yājñavalkyaḥ priyā vai khalu no bhavatī satī priyamavṛdhad
dhanta tarhi bhavatyetad vyākhyāsyāmi te vyācakṣāṇasya tu me
nididhyāsasveti ॥ 5॥

mantra 6[IV.v.6]
sa hovāca na vā are patyuḥ kāmāya patiḥ priyo bhavatyātmanastu kāmāya
patiḥ priyo bhavati । na vā are jāyāyai kāmāya jāyā priyā bhavatyātmanastu
kāmāya jāyā priyā bhavati । na vā are putrāṇāṃ kāmāya putrāḥ priyā
bhavantyātmanastu kāmāya putrāḥ priyā bhavanti । na vā are vittasya kāmāya
vittaṃ priyaṃ bhavatyātmanastu kāmāya vittaṃ priyaṃ bhavati ॥ na vā are
paśūnāṃ kāmāya paśavaḥ priyā bhavanti ātmanastu kāmāya paśavaḥ priyā
bhavanti । na vā are brahmaṇaḥ kāmāya brahma priyaṃ bhavatyātmanastu
kāmāya brahma priyaṃ bhavati । na vā are kṣatrasya kāmāya kṣatraṃ
priyaṃ bhavatyātmanastu kāmāya kṣatraṃ priyaṃ bhavati । na vā are
lokānāṃ kāmāya lokāḥ priyā bhavantyātmanastu kāmāya lokāḥ priyā bhavanti ।
na vā are devānāṃ kāmāya devāḥ priyā bhavantyātmanastu kāmāya devāḥ
priyā bhavanti । na vā are vedānāṃ kāmāya vedāḥ priyā bhavantyātmanastu
kāmāya vedāḥ priyā bhavanti । na vā are bhūtānāṃ kāmāya bhūtāni priyāṇi
bhavantyātmanastu kāmāya bhūtāni priyāṇi bhavanti । na vā are sarvasya
kāmāya sarvaṃ priyaṃ bhavatyātmanastu kāmāya sarvaṃ priyaṃ bhavatyātmā
vā are draṣṭavyaḥ śrotavyo mantavyo nididhyāsitavyo maitreyyātmani
khalvare dṛṣṭe śrute mate vijñāta idam̐ sarvaṃ viditam ।

mantra 7[IV.v.7]
brahma taṃ parādād yo'nyatrā''tmano brahma veda kṣatraṃ taṃ parādād
yo'nyatrā''tmanaḥ kṣatraṃ veda lokāstaṃ parāduḥ yo'nyatrā''tmano
lokānveda devāstaṃ parāduḥ yo'nyatrātmano devānveda vedāstaṃ
parāduryo'nyatrātmano vedānveda bhūtāni taṃ parāduryo'nyatrā''tmano
bhūtāni veda sarvaṃ taṃ parādād yo'nyatrā''tmanaḥ sarvaṃ vededaṃ
brahmedaṃ kṣatramime lokā ime devā ime vedā imāni bhūtānīdam̐ sarvaṃ
yadayamātmā ॥ 7॥

mantra 8[IV.v.8]
sa yathā dundubherhanyamānasya na bāhyāñchabdāñchaknuyād grahaṇāya
dundubhestu grahaṇena dundubhyāghātasya vā śabdo gṛhītaḥ ॥ 8॥

mantra 9[IV.v.9]
sa yathā śaṅkhasya dhmāyamānasya na bāhyāñchabdāñchaknuyād grahaṇāya
śaṅkhasya tu grahaṇena śaṅkhadhmasya vā śabdo gṛhītaḥ ॥ 9॥

mantra 10[IV.v.10]
sa yathā vīṇāyai vādyamānāyai na bāhyāñchabdāñchaknuyādgrahaṇāya
vīṇāyai tu grahaṇena vīṇāvādasya vā śabdo gṛhītaḥ ॥ 10॥

mantra 11[IV.v.11]
sa yathā''rdraidhāgnerabhyāhitasya pṛthagdhūmā viniścarantyevaṃ
vā are'sya mahato bhūtasya niḥśvasitametadyadṛgvedo yajurvedaḥ
sāmavedo'tharvāṅgirasa itihāsaḥ purāṇaṃ vidyā upaniṣadaḥ ślokāḥ
sūtrāṇyanuvyākhyānāni vyākhyānāni iṣṭam̐ hutamāśitaṃ pāyitamayaṃ
ca lokaḥ paraśca lokaḥ sarvāṇi ca bhūtānyasyaivaitāni sarvāṇi
niḥśvasitāni ॥ 11॥ sāmavedasatharvāṅgirasasitihāsaspurāṇaṃ
vidyāsupaniṣadasślokāssūtrāṇi anuvyākhyānāni vyākhyānani dattaṃ

mantra 12[IV.v.12]
sa yathā sarvāsāmapām̐ samudra ekāyanamevam̐ sarveṣām̐
sparśānāṃ tvagekāyanamevam̐ sarveṣāṃ gandhānāṃ nāsikaikāyanaṃ
evam̐ sarveṣām̐ rasānāṃ jihvaikāyanamevam̐ sarveṣām̐
rūpāṇāṃ cakṣurekāyanamevam̐ sarveṣaṃ śabdānāṃ śrotramekāyanaṃ
evam̐ sarveṣām̐ saṅkalpānāṃ mana ekāyanamevam̐ sarvāsāṃ
vidyānām̐ hṛdayamekāyanamevam̐ sarveṣāṃ karmaṇām̐
hastāvekāyanamevam̐ sarveṣāmānandānāmupastha ekāyanamevam̐
sarveṣāṃ visargāṇāṃ pāyurekāyanamevam̐ sarveṣāmadhvanāṃ
pādāvekāyanamevam̐ sarveṣāṃ vedānāṃ vāgekāyanam ॥ 12॥

mantra 13[IV.v.13]
sa yathā saindhavaghano'nantaro'bāhyaḥ kṛtsno rasaghana evai vaṃ
vā are'yamātmānantaro'bāhyaḥ kṛtsnaḥ prajñānaghana evaitebhyo
bhūtebhyaḥ samutthāya tānyevānuvinayaṣyatiti prajñānaghanaseva
etebhyasbhūtebhyassamutthāya tāni eva anuvinayati na pretya
sañjñā'stītyare bravīmīti hovāca yājñavalkyaḥ ॥ 13॥

mantra 14[IV.v.14]
sā hovāca maitreyyatraiva mā bhagavānmohāntamāpīpipan na vā ahamimaṃ
vijānāmīti sa hovāca na vā are'haṃ mohaṃ bravīmyavināśī vā
are'yamātmā'nucchittidharmā ॥ 14॥

mantra 15[IV.v.15]
yatra hi dvaitamiva bhavati taditara itaraṃ paśyati taditara itaraṃ
jighrati taditara itaram̐ rasayate taditara itaramabhivadati taditara
itaram̐ śṛṇoti taditara itaraṃ manute taditara itaram̐ spṛśati
taditara itaraṃ vijānāti । yatra tvasya sarvamātmaivābhūt tatkena kaṃ
paśyet tatkena kaṃ jighret tatkena kam̐ rasayet tatkena kamabhivadet
tatkena kam̐ śṛṇuyāt tatkena kaṃ manvīta tatkena kam̐ spṛśet
tatkena kaṃ vijānīyādyenedam̐ sarvaṃ vijānāti taṃ kena vijānīyāt
sa eṣa neti netyā'tmāgṛhyo na hi gṛhyate'śīryo na hi śīryate
'saṅgo na hi sajyate'sito na vyathate na riṣyati । vijñātāramare
kena vijānīyādityuktānuśāsanāsi maitreyyetāvadare khalvamṛtatvamiti
hoktvā yājñavalkyo vijahāra ॥ 15॥

iti pañcamaṃ brāhmaṇam ॥

atha ṣaṣṭhaṃ brāhmaṇam ।

mantra 1[IV.vi.1]
atha vam̐śaḥ pautimāṣyo gaupavanād gaupavanaḥ pautimāṣyāt
pautimāṣyo gaupavanād gaupavanaḥ kauśikāt kauśikaḥ kauṇḍinyāt
kauṇḍinyaḥ śāṇḍilyācchāṇḍilyaḥ kauśikācca gautamācca gautamaḥ ॥ 1॥

mantra 2[IV.vi.2]
āgniveśyādagniveśyo gārgyād gārgyo gārgyād gārgyo gautamād gautamaḥ
saitavāt saitavaḥ pārāśaryāyaṇāt pārāśāryāyaṇo gārgyāyaṇād gārgyāyaṇa
uddālakāyanāduddālakāyano jābālāyanāj jābālāyano mādhyandināyanān
mādhyandināyanaḥ saukarāyaṇāt saukarāyaṇaḥ kāṣāyaṇāt kāṣāyaṇaḥ
sāyakāyanāt sāyakāyanaḥ kauśikāyaneḥ kauśikāyaniḥ ॥ 2॥

mantra 3[IV.vi.3]
ghṛtakauśikād ghṛtakauśikaḥ pārāśaryāyaṇāt pārāśaryāyaṇaḥ
pārāśaryāt pārāśaryo jātūkarṇyāj jātūkarṇya āsurāyaṇācca yāskāccā
''surāyaṇastraivaṇestraivaṇiraupajandhaneraupajandhanirāsurerāsurirbhāradvājād
bhāradvāja ātreyādātreyo māṇṭermāṇṭirgautamād gautamo gautamād gautamo
vātsyād vātsyaḥ śāṇḍilyācchāṇḍilyaḥ kaiśoryātkāpyāt kaiśoryaḥ
kāpyaḥ kumārahāritāt kumārahārito gālavād gālavo vidarbhīkauṇḍinyād
vidarbhīkauṇḍinyo vatsanapāto bābhravād vatsanapādbābhrava
pathaḥ saubharāt panthāḥ saubharo'yāsyādāṅgirasādayāsya
āṅgirasa ābhūtestvāṣṭrādābhūtistvāṣṭro viśvarūpāttvāṣṭrād
viśvarūpastvāṣṭro'vśvibhyāmaśvinau dadhīca ātharvaṇād
dadhyaṅṅātharvaṇo'tharvaṇo daivādatharvā daivo mṛtyoḥ
prādhvam̐sanān mṛtyuḥ prādhvam̐sanaḥ pradhvam̐sanāt
pradhvam̐sana ekarṣerekarṣirvipracitteḥ vipracittirvyaṣṭervyaṣṭiḥ
sanāroḥ sanāruḥ sanātanāt sanātanaḥ sanagāt sanagaḥ parameṣṭhinaḥ
parameṣṭhī brahmaṇo brahma svayambhu brahmaṇe namaḥ ॥ 3॥

iti ṣaṣṭhaṃ brāhmaṇam ॥

॥ iti bṛhadāraṇyakopaniṣadi caturtho'dhyāyaḥ ॥

atha pañcamo'dhyāyaḥ ।

atha prathamaṃ brāhmaṇam ।

mantra 1[V.i.1]
oṃ pūrṇamadaḥ pūrṇamidaṃ pūrṇātpūrṇamudacyate । pūrṇasya pūrṇamādāya
pūrṇamevāvaśiṣyate । oṃ3 khaṃ brahma khaṃ purāṇaṃ vāyuraṃ khamiti
ha smā''ha kauravyāyaṇīputro । vedo'yamṃ brāhmaṇā vidurvedainena
yadveditavyam ॥ 1॥

iti prathamaṃ brāhmaṇam ॥

atha dvitīyaṃ brāhmaṇam ।

mantra 1[V.ii.1]
trayāḥ prājāpatyāḥ prajāpatau pitari brahmacaryamūṣurdevā manuṣyā
asurā uṣitvā brahmacaryaṃ devā ūcurbravītu no bhavāniti । tebhyo
haitadakṣaramuvāca da iti vyajñāsiṣṭā3 iti । vyajñāsiṣmeti
hocurdāmyateti na ātthetyomiti hovāca vyajñāsiṣṭeti ॥ 1॥

mantra 2[V.ii.2]
atha hainaṃ manuṣyā ūcurbravītu no bhavāniti । tebhyo
haitadevākṣaramuvāca da iti vyajñāsiṣṭā3 iti । vyajñāsiṣmeti
hocurdatteti na ātthetyomiti hovāca vyajñāsiṣṭeti ॥ 2॥

mantra 3[V.ii.3]
atha hainamasurā ūcurbravītu no bhavāniti । tebhyo haitadevākṣaramuvāca
da iti vyajñāsiṣṭā3 iti । vyajñāsiṣmeti hocurdayadhvamiti na
ātthetyomiti hovāca vyajñāsiṣṭeti । tadetadevaiṣā daivī vāganuvadati
stanayitnurda da da iti dāmyata datta dayadhvamiti । tadetattrayam̐
śikṣed damaṃ dānaṃ dayāmiti ॥ 3॥

iti dvitīyaṃ brāhmaṇam ॥

atha tṛtīyaṃ brāhmaṇam ।

mantra 1[V.iii.1]
eṣa prajāpatiryaddhṛdayametadbrahmaitatsarvam । tadetattryakṣaram̐
hṛdayamiti । hṛ ityekamakṣaramabhiharantyasmai svāścānye ca ya
evaṃ veda । da ityekamakṣaraṃ dadatyasmai svāścānye ca ya evaṃ veda ।
yamityekamakṣarameti svargaṃ lokaṃ ya evaṃ veda ॥ 1॥

iti tṛtīyaṃ brāhmaṇam ॥

atha caturthaṃ brāhmaṇam ।

mantra 1[V.iv.1]
tadvai tadetadeva tadāsa satyameva । sa yo haitaṃ mahadyakṣaṃ
prathamajaṃ veda satyaṃ brahmeti jayatīmām̐llokāñ jita innvasāvasad
ya evametanmahadyakṣaṃ prathamajaṃ veda satyaṃ brahmeti satyam̐
hyeva brahma ॥ 1॥

iti caturthaṃ brāhmaṇam ॥

atha pañcamaṃ brāhmaṇam ।

mantra 1[V.v.1]
apa evedamagra āsustā āpaḥ satyamasṛjanta satyaṃ brahma
brahma prajāpatiṃ prajāpatirdevām̐ste devāḥ satyamevopāsate
tadetattryakṣaram̐ satyamiti । sa ityekamakṣaraṃ tītyekamakṣaraṃ
yamityekamakṣaram । prathamottame akṣare satyaṃ madhyato'nṛtaṃ
tadetadanṛtamubhayataḥ satyena parigṛhītam̐ satyabhūyameva bhavati ।
nainaṃvidvām̐samanṛtam̐ hinasti ॥ 1॥

mantra 2[V.v.2]
tadyattatsatyamasau sa ādityo । ya eṣa etasminmaṇḍale puruṣo
yaścāyaṃ dakṣiṇe'kṣan puruṣastāvetāvanyo'nyasminpratiṣṭhitau
raśmibhireṣo'sminpratiṣṭhitaḥ prāṇairayamamuṣmin sa
yadotkramiṣyanbhavati śuddhamevaitanmaṇḍalaṃ paśyati nainamete
raśmayaḥ pratyāyanti ॥ 2॥

mantra 3[V.v.3]
ya eṣa etasminmaṇḍale puruṣastasya bhūriti śira ekam̐ śira
ekametadakṣaraṃ bhuva iti bāhū dvau bāhū dve ete akṣare svariti
pratiṣṭhā dve pratiṣṭhe dve ete akṣare । tasyopaniṣadahariti ।
hanti pāpmānaṃ jahāti ca ya evaṃ veda ॥ 3॥

mantra 4[V.v.4]
yo'yaṃ dakṣiṇe'kṣanpuruṣastasya bhūriti śiraḥ ekam̐ śira
ekametadakṣaraṃ bhuva iti bāhū dvau bāhū dve ete akṣare svariti
pratiṣṭhā dve pratiṣṭhe dve ete akṣare । tasyopaniṣadahamiti ।
hanti pāpmānaṃ jahāti ca ya evaṃ veda ॥ 4॥

iti pajñcamaṃ brāhmaṇam ॥

atha ṣaṣṭhaṃ brāhmaṇam ।

mantra 1[V.vi.1]
manomayo'yaṃ puruṣo bhāḥsatyastasminnantarhṛdaye yathā vrīhirvā yavo
vā sa eṣa sarvasya sarvasyeśānaḥ sarvasyādhipatiḥ sarvamidaṃ praśāsti
yadidaṃ kiñca ॥ 1॥

iti ṣaṣṭhaṃ brāhmaṇam ॥

atha saptamaṃ brāhmaṇam ।

mantra 1[V.vii.1]
vidyud brahmetyāhurvidānādvidyud vidyatyenaṃ pāpmano ya evaṃ veda
vidyudbrahmeti । vidyuddhyeva brahma ॥ 1॥

iti saptamaṃ brāhmaṇam ॥

atha athāṣṭamaṃ brāhmaṇam ।

mantra 1[V.viii.1]
vācaṃ dhenumupāsīta । tasyāścatvāraḥ stanāḥ svāhākāro vaṣaṭkāro
hantakāraḥ svadhākārastasyai dvau stanau devā upajīvanti svāhākāraṃ ca
vaṣaṭkāraṃ ca hantakāraṃ manuṣyāḥ svadhākāraṃ pitaraḥ । tasyāḥ prāṇa
ṛṣabho mano vatsaḥ ॥ 1॥

ityaṣṭamaṃ brāhmaṇam ॥

atha navamaṃ brāhmaṇam ।

mantra 1[V.ix.1]
ayamāgnirvaiśvānaro yo'yamantaḥ puruṣe yenedamannaṃ pacyate
yadidamadyate । tasyaiṣa ghoṣo bhavati yametatkarṇāvapidhāya śṛṇoti ।
sa yadotkramiṣyanbhavati nainaṃ ghoṣam̐ śṛṇoti ॥ 1॥

iti navamaṃ brāhmaṇam ॥

atha daśamaṃ brāhmaṇam ।

mantra 1[V.x.1]
yadā vai puruṣo'smāllokātpraiti sa vāyumāgacchati tasmai sa tatra
vijihīte yathā rathacakrasya khaṃ tena sa ūrdhva ākramate । sa
ādityamāgacchati tasmai sa tatra vijihīte yathālambarasya khaṃ tena sa
ūrdhva ākramate । sa candramasamāgacchati tasmai sa tatra vijihīte yathā
dundubheḥ khaṃ tena sa ūrdhva ākramate । sa lokamāgacchatyaśokamahimaṃ
tasminvasati śāśvatīḥ samāḥ ॥ 1॥

iti daśamaṃ brāhmaṇam ॥

ekādaśaṃ brāhmaṇam ।

mantra 1[V.xi.1]
etadvai paramaṃ tapo yadvyāhitastapyate paramam̐ haiva lokaṃ
jayati ya evaṃ vedaitadvai paramaṃ tapo yaṃ pretamaraṇyam̐ haranti
paramam̐ haiva lokaṃ jayati ya evaṃ vedaitadvai paramaṃ tapo yaṃ
pretamagnāvabhyādadhati paramam̐ haiva lokaṃ jayati ya evaṃ veda ॥ 11॥

iti ekādaśaṃ brāhmaṇam ॥

atha dvādaśaṃ brāhmaṇam । [V.xii.1]

annaṃ brahmetyeka āhustanna tathā
pūyati vā annamṛte prāṇāt
prāṇo brahmetyeka āhustanna tathā
śuṣyati vai prāṇa ṛte'nnād
ete ha tveva devate
ekadhābhūyaṃ bhūtvā
paramatāṃ gacchatastaddha smā''ha prātṛdaḥ pitaraṃ
kim̐ svidevaivaṃ viduṣe sādhu kuryāṃ
kimevāsmā asādhu kuryāmiti ।
sa ha smāha pāṇinā
mā
prātṛda
kastvenayorekadhābhūyaṃ bhūtvā paramatāṃ gacchatīti ।
tasmā u haitaduvāca
vītyannaṃ vai vi
anne hīmāni sarvāṇi bhūtāni viṣṭāni ।
ramiti
prāṇo vai raṃ
prāṇe hīmāni sarvāṇi bhūtāni ramante ।
sarvāṇi ha vā asmin bhūtāni viśanti
sarvāṇi bhūtāni ramante
ya evaṃ veda ॥ 12॥

iti dvādaśaṃ brāhmaṇam ॥

atha trayodaśaṃ brāhmaṇam ।

mantra 1[V.xiii.1]
ukthaṃ prāṇo vā ukthaṃ prāṇo hīdam̐ sarvamutthāpayatyuddhāsmā
dhasmādukthavidvīrastiṣṭhatyukthasya sāyujyam̐ salokatāṃ jayati ya
evaṃ veda ॥ 1॥

mantra 2[V.xiii.2]
yajuḥ prāṇo vai yajuḥ prāṇe hīmāni sarvāṇi bhūtāni yujyante । yujyante
hāsmai sarvāṇi bhūtāni śraiṣṭhyāya yajuṣaḥ sāyujyam̐ salokatāṃ
jayati ya evaṃ veda ॥ 2॥

mantra 3[V.xiii.3]
sāma prāṇo vai sāma prāṇe hīmāni sarvāṇi bhūtāni samyañci । samyañci
hāsmai sarvāṇi bhūtāni śraiṣṭhyāya kalpante sāmnaḥ sāyujyam̐
salokatāṃ jayati ya evaṃ veda ॥ 3॥

mantra 4[V.xiii.4]
kṣatraṃ prāṇo vai kṣatraṃ prāṇo hi vai kṣatraṃ trāyate hainaṃ prāṇaḥ
kṣaṇitoḥ । pra kṣatramatramapnoti kṣatrasya sāyujyam̐ salokatāṃ
jayati ya evaṃ veda ॥ 4॥

iti trayodaśaṃ brāhmaṇam ॥

atha caturdaśaṃ brāhmaṇam ।

mantra 1[V.xiv.1]
bhūmirantarikṣaṃ dyaurityaṣṭāvakṣarāṇyaṣṭākṣaram̐ ha vā ekaṃ
gāyatryai padametadu haivāsyā etat sa yāvadeṣu triṣu lokeṣu tāvaddha
jayati yo'syā etadevaṃ padaṃ veda ॥ 1॥

mantra 2[V.xiv.2]
ṛco yajūm̐ṣi sāmānītyaṣṭāvakṣarāṇyaṣṭākṣaram̐ ha vā ekaṃ
gāyatryai padam । etadu haivāsyā etat sa yāvatīyaṃ trayī vidyā tāvaddha
jayati yo'syā etadevaṃ padaṃ veda ॥ 2॥

mantra 3[V.xiv.3]
prāṇo'pāno vyāna ityaṣṭāvakṣarāṇi aṣṭākṣaram̐ ha vā ekaṃ gāyatryai
padametadu haivāsyā etat sa yāvadidaṃ prāṇi tāvaddha jayati yo'syā
etadevaṃ padaṃ veda athāsyā etadeva turīyaṃ darśataṃ padaṃ parorajā ya
eṣa tapati yadvai caturthaṃ tatturīyaṃ darśataṃ padamiti dadṛśa
iva hyeṣa parorajā iti sarvamu hyevaiṣa raja uparyupari tapatyevam̐
haiva śriyā yaśasā tapati yo'syā etadevaṃ padaṃ veda ॥ 3॥

mantra 4[V.xiv.4]
saiṣā gāyatryetasmim̐sturīye darśate pade parorajasi pratiṣṭhitā
tadvai tatsatye pratiṣṭhitaṃ cakṣurvai satyaṃ cakṣurhi
vai satyaṃ tasmādyadidānīṃ dvau vivadamānāveyātāmaham adarśaṃ
ahamaśrauṣamiti ya eva evaṃ brūyādaham adarśamiti tasmā eva
śraddadhyāma । tadvai tatsatyaṃ bale pratiṣṭhitaṃ prāṇo vai balaṃ
tatprāṇe pratiṣṭhitaṃ tasmādāhurbalam̐ satyādogīya ityevaṃ veṣā
gāyatryadhyātmaṃ pratiṣṭhitā । sā haiṣā gayām̐statre prāṇā vai
gayāstatprāṇām̐statre tadyadgayām̐statre tasmād gāyatrī nāma ।
sa yāmevāmūm̐ sāvitrīmanvāhaiṣaiva sā । sa yasmā anvāha tasya
prāṇām̐strāyate ॥ 4॥

mantra 5[V.xiv.5]
tām̐ haitāmeke sāvitrīmanuṣṭubhamanvāhurvāganuṣṭub etadvācamanubrūma
iti । na tathā kuryād gāyatrīmevānubrūyād । yadi ha vā apyevaṃvidbahviva
pratigṛhṇāti na haiva tadgāyatryā ekaṃ cana padaṃ prati ॥ 5॥

mantra 6[V.xiv.6]
sa ya imām̐strīṃllokānpūrṇānpratigṛhṇīyāt so'syā etatprathamaṃ
padamāpnuyād । atha yāvatīyaṃ trayī vidyā yastāvatpratigṛhṇīyāt
so''syā etaddvitīyaṃ padamāpnuyādatha yāvadidaṃ prāṇi
yastāvatpratigṛhṇīyāt so'syā etattṛtīyaṃ padamāpnuyādathāsyā
etadeva turīyaṃ darśataṃ padaṃ parorajā ya eṣa tapati naiva kena
canāpyaṃ kuta u etāvatpratigṛhṇīyāt ॥ 6॥

mantra 7[V.xiv.7]
tasyā upasthānaṃ gāyatryasyekapadī dvipadī tripadī catuṣpadyapadasi na
hi padyase । namaste turīyāya darśatāya padāya parorajase'sāvado mā
prāpaditi yaṃ dviṣyādasāvasmai kāmo mā samṛddhīti vā na haivāsmai sa
kāmaḥ samṛddhyate yasmā evamupatiṣṭhate'hamadaḥ prāpamiti vā ॥ 7॥

mantra 8[V.xiv.8]
etaddha vai tajjanako vaideho buḍilamāśvatarāśvimuvāca yannu ho
tadgāyatrīvidabrūthā atha katham̐ hastī bhūto vahasīti । mukham̐
hyasyāḥ samrāṇ na vidāṃ cakāreti hovāca । tasyā agnireva mukhaṃ
yadi ha vā api bahvivāgnāvabhyādadhati sarvameva tatsandahatyevam̐
haivaivaṃvid yadyapi bahviva pāpaṃ kurute sarvameva tatsampsāya śuddhaḥ
pūto'jaro'mṛtaḥ sambhavati ॥ 8॥

iti caturdaśaṃ brāhmaṇam ॥

atha pañcadaśaṃ brāhmaṇam ।

mantra 1[V.xv.1]
hiraṇmayena pātreṇa satyasyāpihitaṃ mukham । tattvaṃ pūṣann apāvṛṇu
satyadharmāya dṛṣṭaye । pūṣann ekarṣe yama sūrya prājāpatya
vyūha raśmīn । samūha tejo yatte rūpaṃ kalyāṇatamaṃ tatte paśyāmi ।
yo'sāvasau puruṣaḥ so'hamasmi । vāyuranilamamṛtamathedaṃ
bhasmāntam̐ śarīram । oṃ3 krato smara kṛtam̐ smara krato smara
kṛtam̐ smara । agne naya supathā rāye'smān viśvāni deva vayunāni
vidvān । yuyodhyasmajjuhurāṇameno bhūyiṣṭhāṃ te nama uktiṃ vidhema ॥ 1॥

iti pañcadaśaṃ brāhmaṇam ॥

॥ iti bṛhadāraṇyakopaniṣadi pañcamo'dhyāyaḥ ॥

atha ṣaṣṭho'dhyāyaḥ ।

atha prathamaṃ brāhmaṇam ॥

mantra 1[VI.i.1]
oṃ yo ha vai jyeṣṭhaṃ ca śreṣṭhaṃ ca veda jyeṣṭhaśca
śreṣṭhaśca svānāṃ bhavati । prāṇo vai jyeṣṭhaśca śreṣṭhaśca ।
jyeṣṭhaśca śreṣṭhaśca svānāṃ bhavatyapi ca yeṣāṃ bubhūṣati ya
evaṃ veda ॥ 1॥

mantra 2[VI.i.2]
yo ha vai vasiṣṭhāṃ veda vasiṣṭhaḥ svānāṃ bhavati । vāgvai vasiṣṭhā ।
vasiṣṭhaḥ svānāṃ bhavatyapi ca yeṣāṃ bubhūṣati , ya evaṃ veda ॥ 2॥

mantra 3[VI.i.3]
yo ha vai pratiṣṭhāṃ veda pratitiṣṭhati same pratitiṣṭhati durge ।
cakṣurvai pratiṣṭhā cakṣuṣā hi same ca durge ca pratitiṣṭhati ।
pratitiṣṭhati same pratitiṣṭhati durge ya evaṃ veda ॥ 3॥

mantra 4[VI.i.4]
yo ha vai sampadaṃ veda sam̐ hāsmai padyate yaṃ kāmaṃ kāmayate ।
śrotraṃ vai sampacchrotre hīme sarve vedā abhisampannāḥ । sam̐
hāsmai padyate yaṃ kāmaṃ kāmayate ya evaṃ veda ॥ 4॥

mantra 5[VI.i.5]
yo ha vā āyatanaṃ vedā''yatanam̐ svānāṃ bhavati āyatanaṃ janānām ।
mano vā āyatanamāyatanam̐ svānāṃ bhavatyāyatanaṃ janānāṃ ya evaṃ
veda ॥ 5॥

mantra 6[VI.i.6]
yo ha vai prajātiṃ veda prajāyate ha prajayā paśubhī reto vai prajātiḥ ।
prajāyate ha prajayā paśubhirya evaṃ veda ॥ 6॥

mantra 7[VI.i.7]
te heme prāṇā aham̐śreyase vivadamānā brahma jagmustaddhocuḥ ko no
vasiṣṭha iti । taddhovāca yasminva utkrānta idam̐ śarīraṃ pāpīyo
manyate sa vo vasiṣṭha iti ॥ 7॥

mantra 8[VI.i.8]
vāgghoccakrāma । sā saṃvatsaraṃ proṣyā।ā।āgatyovāca kathamaśakata
madṛte jīvitumiti । te hocuryathā'kalā avadanto vācā prāṇantaḥ
prāṇena paśyantaścakṣuṣā śṛṇvantaḥ śrotreṇa vidvām̐so manasā
prajāyamānā retasaivamajīviṣmeti । praviveśa ha vāk ॥ 8॥

mantra 9[VI.i.9]
cakṣurhoccakrāma । tatsaṃvatsaraṃ proṣyā''gatyovāca kathamaśakata
madṛte jīvitumiti । te hocuryathāndhā apaśyantaścakṣuṣā
prāṇantaḥ prāṇena vadanto vācā śṛṇvantaḥ śrotreṇa vidvām̐so
manasā prajāyamānā retasaivamajīviṣmeti । praviveśa ha cakṣuḥ ॥ 9॥

mantra 10[VI.i.10]
śrotram̐ hoccakrāma । tatsaṃvatsaraṃ proṣyā''gatyovāca
kathamaśakata madṛte jīvitumiti । te hocuryathā badhirā aśṛṇvantaḥ
śrotreṇa prāṇantaḥ prāṇena vadanto vācā paśyantaścakṣuṣā
vidvām̐so manasā prajāyamānā retasaivamajīviṣmeti । praviveśa ha
śrotram ॥ 10॥

mantra 11[VI.i.11]
mano hoccakrāma । tatsaṃvatsaraṃ proṣyā''gatyovāca kathamaśakata
madṛte jīvitumiti । te hocuryathā mugdhā avidvām̐so manasā
prāṇantaḥ prāṇena vadanto vācā paśyantaścakṣuṣā śṛṇvantaḥ
śrotreṇa prajāyamānā retasaivamajīviṣmeti । praviveśa ha manaḥ ॥ 11॥

mantra 12[VI.i.12]
reto hoccakrāma । tatsaṃvatsaraṃ proṣyā''gatyovāca kathamaśakata
madṛte jīvitumiti । te hocuryathā klībā aprajāyamānā retasā prāṇantaḥ
prāṇena vadanto vācā paśyantaścakṣuṣā śṛṇvantaḥ śrotreṇa
vidvām̐so manasaivamajīviṣmeti । praviveśa ha retaḥ ॥ 12॥

mantra 13[VI.i.13]
atha ha prāṇa utkramiṣyan yathā mahāsuhayaḥ saindhavaḥ
paḍvīśaśaṅkūnsaṃvṛhedevam̐ haivemānprāṇānsaṃvavarha । te hocurmā
bhagava utkramīrna vai śakṣyāmastvadṛte jīvitumiti । tasyo me baliṃ
kuruteti tatheti ॥ 13॥

mantra 14[VI.i.14]
sā ha vāguvāca yadvā ahaṃ vasiṣṭhā'smi tvaṃ tadvasiṣṭho'sīti ।
yad vā ahaṃ pratiṣṭhāsmi tvaṃ tatpratiṣṭho'sīti cakṣuryadvā
aham̐ sampadasmi tvaṃ tat sampadasīti śrotram । yad vā
ahamāyatanamasmi tvaṃ tadāyatanamasīti mano yadvā ahaṃ prajātirasmi
tvaṃ tat prajātirasīti retastasyo me kimannaṃ kiṃ vāsa iti । yadidaṃ
kiñcā''śvabhya ā kṛmibhya ā kīṭapataṅgebhyastatte'nnamāpo
vāsa iti । na ha vā asyānannaṃ jagdhaṃ bhavati nānannaṃ pratigṛhītaṃ
ya evametadanasyānnaṃ veda । tad vidvām̐saḥ śrotriyā aśiṣyanta
ācāmantyaśitvā''cāmantyetameva tadanamanagnaṃ kurvanto manyante ॥ 14॥

iti prathamaṃ brāhmaṇam ॥

atha dvitīyaṃ brāhmaṇam ।

mantra 1[VI.ii.1]
śvetaketurha vā āruṇeyaḥ pañcālānāṃ pariṣadamājagāma । sa ājagāma
jaivaliṃ pravāhaṇaṃ paricārayamāṇam । tamudīkṣyābhyuvāda kumārā3 iti ।
sa bhoḥ 3 iti pratiśuśrāva anuśiṣṭo'nvasi pitretyomiti hovāca ॥ 1॥

mantra 2[VI.ii.2]
vettha yathemāḥ prajāḥ prayatyo vipratipadyantā3 iti । neti hovāca ।
vettho yathemaṃ lokaṃ punarāpadyantā3 iti । neti haivovāca । vettho
yathā'sau loka evaṃ bahubhiḥ punaḥpunaḥ prayadbhirna sampūryatā3 iti
neti haivovāca । vettho yatithyāmāhutyām̐ hutāyāmāpaḥ puruṣavāco
bhūtvā samutthāya vadantī3 iti । neti haivovāca । vettho devayānasya vā
pathaḥ pratipadaṃ pitṛyāṇasya vā yatkṛtvā devayānaṃ vā panthānaṃ
pratipadyante pitṛyāṇaṃ vā'pi hi na ṛṣervacaḥ śrutaṃ dve
sṛtī aśṛṇavaṃ pitṛṇāmahaṃ devānāmuta martyānāṃ tābhyāmidaṃ
viśvamejatsameti yadantarā pitaraṃ mātaraṃ ceti । nāhamata ekaṃ cana
vedeti hovāca ॥ 2॥

mantra 3[VI.ii.3]
athainaṃ vasatyopamantrayāṃ cakre'nādṛtya vasatiṃ kumāraḥ
pradudrāva । sa ājagāma pitaraṃ tam̐ hovāceti vāva kila no
bhavānpurā'nuśiṣṭānavoca iti । katham̐, sumedha iti । pañca
mā praśnānrājanyabandhuraprākṣīt tato naikañcana vedeti । katame ta
iti ima iti ha pratīkānyudājahāra ॥ 3॥

mantra 4[VI.ii.4]
sa hovāca tathā nastvaṃ tāta jānīthā yathā yadahaṃ kiñca veda
sarvamahaṃ tattubhamavocam । prehi tu tatra pratītya brahmacaryaṃ
vatsyāva iti । bhavāneva gacchatviti । sa ājagāma gautamo yatra
pravāhaṇasya jaivalerāsa । tasmā āsanamāhṛtyodakamahārayāṃ cakārātha
hāsmā arghyaṃ cakāra । tam̐ hovāca varaṃ bhagavate gautamāya dadma
iti ॥ 4॥

mantra 5[VI.ii.5]
sa hovāca pratijñāto ma eṣa varo yāṃ tu kumārasyānte
vācamabhāṣathāstāṃ me brūhīti ॥ 5॥

mantra 6[VI.ii.6]
sa hovāca daiveṣu vai gautama tadvareṣu mānuṣāṇāṃ brūhīti ॥ 6॥

mantra 7[VI.ii.7]
sa hovāca vijñāyate hāsti hiraṇyasyāpāttaṃ goaśvānāṃ dāsīnāṃ pravārāṇāṃ
paridhānasya mā no bhavānbahoranantasyāparyantasyābhyavadānyo bhūditi ।
sa vai gautama tīrthenecchāsā ityupaimyahaṃ bhavantamiti vācā ha smaiva
pūrva upayanti । sa hopāyanakīrtyovāsa ॥ 7॥

mantra 8[VI.ii.8]
sa hovāca tathā nastvaṃ gautama mā'parādhāstava ca pitāmahā yatheyaṃ
vidyetaḥ pūrvaṃ na kasmim̐ścana brāhmaṇa uvāsa tāṃ tvahaṃ tubhyaṃ
vakṣyāmi ko hi tvaivaṃ bruvantamarhati pratyākhyātumiti ॥ 8॥

mantra 9[VI.ii.9]
asau vai loko'gnirgautama । tasyā''ditya eva samid raśmayo dhūmo
'hararcirdiśo'ṅgārā avāntaradiśo visphuliṅgāstasminnetasminnagnau
devāḥ śraddhāṃ juhvati tasyā āhutyai somo rājā sambhavati ॥ 9॥

mantra 10[VI.ii.10]
parjanyo vā agnirgautama । tasya saṃvatsara eva samidabhrāṇi dhūmo
vidyudarciraśaniraṅgārā hrādunayo visphuliṅgāstasminnetasminnagnau
devāḥ somam̐ rājānaṃ juhvati tasyā āhutyai vṛṣṭiḥ sambhavati ॥ 10॥

mantra 11[VI.ii.11]
ayaṃ vai loko'gnirgautama । tasya pṛthivyeva samid
agnirdhūmo rātrirarciścandramā aṅgārā nakṣatrāṇi
viṣphuliṅgāstasminnetasminnagnau devā vṛṣṭiṃ juhvati tasyā āhutyā
annam̐ sambhavati ॥ 11॥

mantra 12[VI.ii.12]
puruṣo vā agnirgautama । tasya vyāttameva samit prāṇo dhūmo
vāgarciścakṣuraṅgārāḥ śrotraṃ visphuliṅgāstasminnetasminnagnau
devā annaṃ juhvati tasyā āhutyai retaḥ sambhavati ॥ 12॥

mantra 13[VI.ii.13]
yoṣā vā āgnirgautama । tasyā upastha eva samillomāni
dhūmo yonirarciryadantaḥ karoti te'ṅgārā abhinandā
visphuliṅgāstasminnetasminnagnau devā reto juhvati tasyā āhutyai puruṣaḥ
sambhavati । sa jīvati yāvajjīvatyatha yadā mriyate । 13॥

mantra 14[VI.ii.14]
athainamagnaye haranti । tasyāgnirevāgnirbhavati samitsamid
dhūmo dhūmo'rcirarciraṅgārā aṅgārā visphuliṅgā
visphuliṅgāstasminnetasminnagnau devāḥ puruṣaṃ juhvati tasyā āhutyai
puruṣo bhāsvaravarṇaḥ sambhavati ॥ 14॥

mantra 15[VI.ii.15]
te ya evametadvidurye cāmī araṇye śraddhām̐ satyamupāsate
te'rcirabhisambhavantyarciṣo'ho'hna āpūryamāṇapakṣaṃ
āpūryamāṇapakṣādyānṣaṇmāsānudaṅṅāditya eti māsebhyo devalokaṃ
devalokādādityamādityādvaidyutaṃ tānvaidyutānpuruṣo mānasa etya
brahmalokān gamayati te teṣu brahmalokeṣu parāḥ parāvato vasanti ।
teṣāṃ na punarāvṛttiḥ ।

mantra 16[VI.ii.16]
atha ye yajñena dānena tapasā lokāñjayanti te
dhūmamabhisambhavanti dhūmādrātrim̐, rātrerapakṣīyamāṇapakṣaṃ
apakṣīyamāṇapakṣādyānṣaṇmāsāndakṣiṇāditya eti māsebhyaḥ
pitṛlokaṃ pitṛlokāccandraṃ te candraṃ prāpyānnaṃ
bhavanti tām̐statra devā yathā somam̐ rājānamāpyāyasva
apakṣīyasvetyevamenām̐statra bhakṣayanti । teṣāṃ yadā
tatparyavaityathemamevā''kāśamabhiniṣpadyante ākāśādvāyuṃ
vāyorvṛṣṭiṃ vṛṣṭeḥ pṛthivīṃ te pṛthivīṃ prāpyānnaṃ bhavanti te
punaḥ puruṣāgnau hūyante tato yoṣāgnau jāyante te lokānpratyuthāyinasta
evamevānuparivartante'tha ya etau panthānau na viduste kīṭāḥ pataṅgā
yadidaṃ dandaśūkam ॥ 16॥

iti dvitīyaṃ brāhmaṇam ॥

atha tṛtīyaṃ brāhmaṇam ।

mantra 1[VI.iii.1]
sa yaḥ kāmayate mahatprāpnuyāmityudagayana āpūryamāṇapakṣasya
puṇyāhe dvādaśāhamupasadvratī bhūtvaudumbare kam̐se camase vā
sarvauṣadhaṃ phalānīti sambhṛtya parisamuhya parilipyāgnimupasamādhāya
paristīryā''vṛtā''jyam̐ sam̐skṛtya pum̐sā nakṣatreṇa
mantham̐ sannīya juhoti । yāvanto devāstvayi jātavedastiryañco
ghnanti puruṣasya kāmān tebhyo'haṃ bhāgadheyaṃ juhomi te mā tṛptāḥ
sarvaiḥ kāmaistarpayantu svāhā । yā tiraścī nipadyate'haṃ vidharaṇī
iti tāṃ tvā ghṛtasya dhārayā yaje sam̐rādhanīmaham̐ । svāhā ॥ 1॥

mantra 2[VI.iii.2]
jyeṣṭhāya svāhā śreṣṭhāya svāhetyagnau hutvā manthe
sam̐sravamavanayati । prāṇāya svāhā vasiṣṭhāyai svāhetyagnau hutvā
manthe sam̐sravamavanayati । vāce svāhā pratiṣṭhāyai svāhetyagnau
hutvā manthe sam̐sravamavanayati । cakṣuṣe svāhā sampade svāheti
agnau hutvā manthe sam̐sravamavanayati । śrotrāya svāhā''yatanāya
svāhetyagnau hutvā manthe sam̐sravamavanayati । manase svāhā prajātyai
svāhetyagnau hutvā manthe sam̐sravamavanayati । retase svāheti agnau
hutvā manthe sam̐sravamavanayati ॥ 2॥

mantra 3[VI.iii.3]
agnaye svāhetyagnau hutvā manthe sam̐sravamavanayati । somāya
svāhetyagnau hutvā manthe sam̐sravamavanayati । bhūḥ svāhetyagnau
hutvā manthe sam̐sravamavanayati । bhuvaḥ svāhetyagnau hutvā
manthe sam̐sravamavanayati । svaḥ svāhetyagnau hutvā manthe
sam̐sravamavanayati । bhūrbhuvaḥ svaḥ svāhetyagnau hutvā
manthe sam̐sravamavanayati । brahmaṇe svāhetyagnau hutvā
manthe sam̐sravamavanayati । kṣatrāya svāhetyagnau hutvā
manthe sam̐sravamavanayati । bhūtāya svāhetyagnau hutvā manthe
sam̐sravamavanayati । bhaviṣyate svāhetyagnau hutvā manthe
sam̐sravamavanayati । viśvāya svāhetyagnau hutvā manthe
sam̐sravamavanayati । sarvāya svāhetyagnau hutvā manthe
sam̐sravamavanayati । prajāpataye svāhetyagnau hutvā manthe
sam̐sravamavanayati ॥ 3॥

mantra 4[VI.iii.4]
athainamabhimṛśati bhramadasi jvaladasi
pūrṇamasi prastabdhamasyekasabhamasi hiṅkṛtamasi
hiṅkriyamāṇamasyudgīthamasyudgīyamānamasi śrāvitamasi
pratyāśrāvitamasyardre sandīptamasi vibhūrasi prabhūrasyannamasi
jyotirasi nidhanamasi saṃvargo'sīti ॥ 4॥

mantra 5[VI.iii.5]
athainamudyacchatyamam̐syāmam̐ hi te mahi । sa hi
rājeśāno'dhipatiḥ sa mām̐ rājeśano'dhipatiṃ karotviti ॥ 5॥

mantra 6[VI.iii.6]
athainamācāmati tatsaviturvareṇyam । madhu vātā ṛtāyate madhu
kṣaranti sindhavaḥ । mādhvīrnaḥ santvoṣadhīḥ । bhūḥ svāhā । bhargo
devasya dhīmahi madhu naktamutoṣaso madhumatpārthivam̐ rajaḥ । madhu
dyaurastu naḥ pitā । bhuvaḥ svāhā । dhiyo yo naḥ pracodayāt । madhumānno
vanaspatirmadhumām̐ astu sūryaḥ । mādhvīrgāvo bhavantu naḥ । svaḥ
svāheti । sarvāṃ ca sāvitrīmanvāha sarvāśca madhumatīrahamevedam̐
sarvaṃ bhūyāsam । bhūrbhuvaḥ svaḥ svāhetyantata ācamya pāṇī prakṣālya
jaghanenāgniṃ prākṣirāḥ saṃviśati । prātarādityamupatiṣṭhate
diśāmekapuṇḍarīkamasi ahaṃ manuṣyāṇāmekapuṇḍarīkaṃ bhūyāsamiti ।
yathetametya jaghanenāgnimāsīno vam̐śaṃ japati ॥ 6॥

mantra 7[VI.iii.7]
tam̐ haitamūddālaka āruṇirvājasaneyāya yājñavalkyāyāntevāsina
uktvovācāpi ya enam̐ śuṣke sthāṇau niṣiñcej śuṣke sthāṇau
niṣiñcet jāyerañchākhāḥ praroheyuḥ palāśānīti ॥ 7॥

mantra 8[VI.iii.8]
etamu haiva vājasaneyo yājñavalkyo madhukāya paiṅgyāyāntevāsina
uktvovācāpi ya enam̐ śuṣke sthāṇau niṣiñcej sthāṇau niṣiñcet
jāyerañchākhāḥ praroheyuḥ palāśānīti ॥ 8॥

mantra 9[VI.iii.9]
etamu haiva madhukaḥ paiṅgyaścūlāya bhāgavittaye'ntevāsina
uktvovācāpi ya enam̐ śuṣke sthāṇau niṣiñcej jāyerañchākhāḥ
praroheyuḥ palāśānīti ॥ 9॥

mantra 10[VI.iii.10]
etamu haiva cūlo bhāgavittirjānakaya āyasthūṇāyāntevāsina uktvovācāpi ya
enam̐ śuṣke sthāṇau niṣiñcej yasenam śuṣke sthāṇau niṣiñcet
jāyerañchākhāḥ praroheyuḥ palāśānīti ॥ 10॥

mantra 11[VI.iii.11]
etamu haiva jānakirayasthūṇaḥ satyakāmāya jābālāyāntevāsina uktvovācāpi
ya enam̐ śuṣke sthāṇau niṣiñcej jāyerañchākhāḥ praroheyuḥ
palāśānīti ॥ 11॥

mantra 12[VI.iii.12]
etamu haiva satyakāmo jābālo'ntevāsibhya uktvovācāpi ya enam̐
śuṣke sthāṇau niṣiñcej jāyerañchākhāḥ praroheyuḥ palāśānīti ।
tametaṃ nāputrāya vā'nantevāsine vā brūyāt ॥ 12॥

mantra 13[VI.iii.13]
caturaudumbaro bhavatyaudumbaraḥ sruva audumbaraścamasa audumbara
idhma audumbaryā upamanthanyau । daśa grāmyāṇi dhānyāni bhavanti
vrīhiyavāstilamāṣā aṇupriyaṅgavo godhūmāśca masūrāśca khalvāśca
khalakulāśca tānpiṣṭāndadhani madhuni ghṛta upasiñcatyājyasya
juhoti ॥ 13॥

iti tṛtīyaṃ brāhmaṇam ॥

atha caturthaṃ brāhmaṇam ।

mantra 1[VI.iv.1]
eṣāṃ vai bhūtānāṃ pṛthivī rasaḥ pṛthivyā āpo'pāmoṣadhaya
oṣadhīnāṃ puṣpāṇi puṣpāṇāṃ phalāni phalānāṃ puruṣaḥ puruṣasya retaḥ ॥ 1॥

mantra 2[VI.iv.2]
sa ha prajāpatirīkṣāṃcakre hantāsmai pratiṣṭhāṃ kalpayānīti sa
striyam̐ sasṛje । tām̐ sṛṣṭvā'dha upāsta tasmātstriyamadha
upāsīta sa etaṃ prāñcaṃ grāvāṇamātmana eva samudapārayat
tenaināmabhyasṛjat ॥ 2॥

mantra 3[VI.iv.3]
tasyā vedirupastho lomāni barhiścarmādhiṣavaṇe samiddho madhyatastau
muṣkau । sa yāvānha vai vājapeyena yajamānasya loko bhavati tāvānasya
loko bhavati ya evaṃ vidvānadhopahāsaṃ caratyāsām̐ strīṇām̐
sukṛtaṃ vṛṅkte'tha ya idamavidvānadhopahāsaṃ caratyā'sya striyaḥ
sukṛtaṃ vṛñjate ॥ 3॥

mantra 4[VI.iv.4]
etaddha sma vai tadvidvānuddālaka āruṇirāhaitaddha sma vai tadvidvānnāko
maudgalya āhaitaddha sma vai tadvidvān kumārahārita āha etad dha sma
vai tad vidvān kumārahāritasāha bahavo maryā brāhmaṇāyanā nirindriyā
visukṛto'smāllokātprayanti ya idamavidvām̐so'dhopahāsaṃ carantīti ।
bahu vā idam̐ suptasya vā jāgrato vā retaḥ skandati ॥ 4॥

mantra 5[VI.iv.5]
tadabhimṛśedanu vā mantrayeta yanme'dya retaḥ pṛthivīmaskāntsīd
yadoṣadhīrapyasarad yadapaḥ । idamahaṃ tadreta ādade
punarmāmaitvindriyaṃ punastejaḥ punarbhagaḥ । punaragnirdhiṣṇyā
yathāsthānaṃ kalpantāmityanāmikāṅguṣṭhābhyāmādāyāntareṇa stanau vā
bhruvau vā nimṛjyāt ॥ 5॥

mantra 6[VI.iv.6]
atha yadyudaka ātmānaṃ paśyet tadabhimantrayeta mayi teja
indriyaṃ yaśo draviṇam̐ sukṛtamiti । śrīrha vā eṣā strīṇāṃ
yanmalodvāsāstasmānmalodvāsasaṃ yaśasvinīmabhikramyopamantrayeta ॥ 6॥

mantra 7[VI.iv.7]
sā cedasmai na dadyāt kāmamenāmavakriṇīyāt sā cedasmai naiva dadyāt
kāmamenāṃ yaṣṭyā vā pāṇinā vopahatyātikrāmedindriyeṇa te yaśasā yaśa
ādada ityayaśā eva bhavati ॥ 7॥

mantra 8[VI.iv.8]
sā cedasmai dadyādindriyeṇa te yaśasā yaśa ādadhāmīti yaśasvināveva
bhavataḥ ॥ 8॥

mantra 9[VI.iv.9]
sa yāmicchet kāmayeta meti tasyāmarthaṃ niṣṭhāya mukhena mukham̐
sandhāyopasthamasyā abhimṛśya japedaṅgādaṅgātsambhavasi
hṛdayādadhijāyase । sa tvamaṅgakaṣāyo'si digdhaviddhamiva
mādayemāmamūṃ mayīti ॥ 9॥

mantra 10[VI.iv.10]
atha yāmicchen na garbhaṃ dadhīteti tasyāmarthaṃ niṣṭhāya mukhena
mukham̐ sandhāyābhiprāṇyāpānyādindriyeṇa te retasā reta ādada ityaretā
eva bhavati ॥ 10॥

mantra 11[VI.iv.11]
atha yāmicched dadhīteti tasyāmarthaṃ niṣṭhāya mukhena mukham̐
sandhāyāpānyābhiprāṇyādindriyeṇa te retasā reta ādadhāmīti garbhiṇyeva
bhavati ॥ 11॥

mantra 12[VI.iv.12]
atha yasya jāyāyai jāraḥ syāt taṃ ced dviṣyādāmapātre'gnimupasamādhāya
pratilomam̐ śarabarhistīrtvā tasminnetāḥ śarabhṛṣṭīḥ
pratilomāḥ sarpiṣā'ktā juhuyān mama samiddhe'hauṣīḥ prāṇāpānau
ta ādade'sāviti । mama samiddhe'hauṣīḥ putrapaśūm̐sta ādade
'sāviti । mama samiddhe'hauṣīriṣṭāsukṛte ta ādade'sāviti ।
mama samiddhe'hauṣīrāśāparākāśau ta ādade'sāviti । sa vā eṣa
nirindriyo visukṛto'smāllokātpraiti yamevaṃvidbrāhmaṇaḥ śapati ।
tasmādevaṃvitchrotriyasya dāreṇa nopahāsamiccheduta hyevaṃvitparo
bhavati ॥ 12॥

mantra 13[VI.iv.13]
atha yasya jāyāmārtavaṃ vindet tryahaṃ kam̐se na pibedahatavāsā
naināṃ vṛṣalo na vṛṣalyupahanyāt apahanyāt trirātrānta āplutya
vrīhīnavaghātayet ॥ 13॥

mantra 14[VI.iv.14]
sa ya icchet putro me śuklo jāyeta vedamanubruvīta sarvamāyuriyāditi
kṣīraudanaṃ pācayitvā sarpiṣmantamaśnīyātāmīśvarau janayitavai ॥ 14॥

mantra 15[VI.iv.15]
atha ya icchet putro me kapilaḥ piṅgalo jāyeta dvau vedāvanubruvīta
sarvamāyuriyāditi dadhyodanaṃ pācayitvā sarpiṣmantamaśnīyātāmīśvarau
janayitavai ॥ 15॥

mantra 16[VI.iv.16]
atha ya icchet putro me śyāmo lohitākṣo jāyeta trīnvedānanubruvīta
sarvamāyuriyādityudaudanaṃ pācayitvā sarpiṣmantamaśnīyātāmīśvarau
janayitavai ॥ 16॥

mantra 17[VI.iv.17]
atha ya icched duhitā me paṇḍitā jāyeta sarvamāyuriyāditi tilaudanaṃ
pācayitvā sarpiṣmantamaśnīyātāmīśvarau janayitavai ॥ 17॥

mantra 18[VI.iv.18]
atha ya icchet putro me paṇḍito vigītaḥ samitiṅgamaḥ śuśrūṣitāṃ
vācaṃ bhāṣitā jāyeta sarvānvedānanubruvīta sarvamāyuriyāditi
mām̐saudanaṃ pācayitvā sarpiṣmantamaśnīyātāmīśvarau janayitavai ।
aukṣeṇa vā''rṣabheṇa vā ॥ 18॥

mantra 19[VI.iv.19]
athābhiprātareva sthālīpākāvṛtā''jyaṃ ceṣṭitvā
sthālīpākasyopaghātaṃ juhotyagnaye svāhā'numataye svāhā devāya savitre
satyaprasavāya svāheti hutvoddhṛtya prāśnāti । prāśyetarasyāḥ
prayacchati । prakṣālya pāṇī udapātraṃ pūrayitvā tenaināṃ
trirabhyukṣatyuttiṣṭhāto viśvāvaso'nyāmiccha prapūrvyām̐ saṃ
jāyāṃ patyā saheti ॥ 19॥

mantra 20[VI.iv.20]
athaināmabhipadyate'mo'hamasmi sā tvam̐ sā tvamasyamo'ham̐
sāmāhamasmi ṛktvaṃ dyaurahaṃ pṛthivī tvam । tāvehi sam̐rabhāvahai
saha reto dadhāvahai pum̐se putrāya vittaya iti ॥ 20॥

mantra 21[VI.iv.21]
athāsyā ūrū vihāpayati vijihīthāṃ dyāvāpṛthivī iti । tasyāmarthaṃ
niṣṭhāya mukhena mukham̐ sandhāya trirenāmanulomāmanumārṣṭi
viṣṇuryoniṃ kalpayatu tvaṣṭā rūpāṇi pim̐śatu āsiñcatu
prajāpatirdhātā garbhaṃ dadhātu te । garbhaṃ dhehi sinīvāli garbhaṃ dhehi
pṛthuṣṭuke । garbhaṃ te āśvinau devāvādhattāṃ puṣkarasrajau ॥ 21॥

mantra 22[VI.iv.22]
hiraṇmayī araṇī yābhyāṃ nirmanthatāmāśvinau taṃ te garbham̐ havāmahe
daśame māsi sūtaye । yathā'gnigarbhā pṛthivī yathā dyaurindreṇa
garbhiṇī vāyurdiśāṃ yathā garbha evaṃ garbhaṃ dadhāmi te'sāviti ॥ 22॥

mantra 23[VI.iv.23]
soṣyantīmadbhirabhyukṣati yathā vāyuḥ puṣkariṇīm̐ samiṅgayati
sarvataḥ । evā te garbha ejatu sahāvaitu jarāyuṇā । indrasyāyaṃ vrajaḥ
kṛtaḥ sārgalaḥ sapariśrayaḥ । tamīndra nirjahi garbheṇa sāvarām̐
saheti ॥ 23॥

mantra 24[VI.iv.24]
jāte'gnimupasamādhāyāṅka ādhāya kam̐se pṛṣadājyam̐ sannīya
pṛṣadājyasyopaghātaṃ juhotyasminsahasraṃ puṣyāsamedhamānaḥ sve
gṛhe । asyopasandyāṃ mā cchaitsīt prajayā ca paśubhiśca svāhā ।
mayi prāṇām̐stvayi manasā juhomi svāhā । yat karmaṇā'tyarīricaṃ
yadvā nyūnamihākaram । agniṣṭatsviṣṭakṛdvidvān sviṣṭam̐ suhutaṃ
karotu naḥ svāheti ॥ 24॥

mantra 25[VI.iv.25]
athāsya dakṣiṇaṃ karṇamabhinidhāya vāgvāgiti triratha dadhi madhu
ghṛtam̐ sannīyānantarhitena jātarūpeṇa prāśayati । bhūste dadhāmi
bhuvaste dadhāmi svaste dadhāmi bhūrbhuvaḥ svaḥ sarvaṃ tvayi dadhāmīti ॥ 25॥

mantra 26[VI.iv.26]
athāsya nāma karoti vedo'sīti । tadasyaitadguhyameva nāma bhavati ॥ 26॥

mantra 27[VI.iv.27]
athainaṃ mātre pradāya stanaṃ prayacchati yaste stanaḥ śaśayo yo
mayobhūryo ratnadhā vasuvidyaḥ sudatro yena viśvā puṣyasi vāryāṇi
sarasvati tamiha dhātave kariti ॥ 27॥

mantra 28[VI.iv.28]
athāsya mātaramabhimantrayate । ilā'si maitrāvaruṇī vīre vīramajījanat ।
sā tvaṃ vīravatī bhava yā'smānvīravato'karaditi । taṃ vā etamāhuratipitā
batābhūratipitāmaho batābhūḥ । paramāṃ bata kāṣṭhāṃ prāpayacchriyā
yaśasā brahmavarcasena ya evaṃvido brāhmaṇasya putro jāyata iti ॥ 28॥

iti caturthaṃ brāhmaṇam ॥

atha pañcamaṃ brāhmaṇam ।

mantra 1[VI.v.1]
atha vam̐śaḥ । pautimāṣīputraḥ kātyāyanīputrāt kātyāyanīputro
gautamīputrād gautamīputro bhāradvājīputrād bhāradvājīputraḥ
pārāśarīputrāt pārāśarīputra aupasvastīputrādaupasvastīputraḥ
pārāśarīputrāt pārāśarīputraḥ kātyāyanīputrāt kātyāyanīputraḥ
kauśikīputrāt kauśikīputra ālambīputrācca vaiyāghrapadīputrācca
vaiyāghrapadīputraḥ kāṇvīputrācca kāpīputrācca kāpīputraḥ ॥ 1॥

mantra 2[VI.v.2]
ātreyīputrādātreyīputro gautamīputrād gautamīputro bhāradvājīputrād
bhāradvājīputraḥ pārāśarīputrāt pārāśarīputro vātsīputrād vātsīputraḥ
pārāśarīputrāt pārāśarīputro vārkāruṇīputrād vārkāruṇīputro
vārkāruṇīputrād vārkāruṇīputra ārtabhāgīputrādārtabhāgīputraḥ
śauṅgīputrāccauṅgīputraḥ sāṅkṛtīputrāt sāṅkṛtīputra
ālambāyanīputrādālambāyanīputra ālambīputrādālambīputro jāyantīputrāj
jāyantīputro māṇḍūkāyanīputrān māṇḍūkāyanīputro māṇḍūkīputrān
māṇḍūkīputraḥ śāṇḍilīputrācchāṇḍilīputro rāthītarīputrād rāthītarīputro
bhālukīputrād bhālukīputraḥ krauñcikīputrābhyāṃ krauñcikīputrau
vaidabhṛtīputrād vaidabhṛtīputraḥ kārśakeyīputrāt kārśakeyīputraḥ
prācīnayogīputrāt prācīnayogīputraḥ sāñjīvīputrāt sāñjīvīputraḥ
prāśnīputrādāsurivāsinaḥ prāśnīputra āsurāyaṇādāsurāyaṇa āsurerāsuriḥ ॥ 2॥

mantra 3[VI.v.3]
yājñavalkyād yājñavalkya ūddālakādūddālako'ruṇādaruṇa
upaveśerupaveśiḥ kuśreḥ kuśrirvājaśravaso vājaśravā jīhvāvato
bādhyogāj jīhvāvānbādhyogo'sitādvārṣagaṇādasito vārṣagaṇo
haritātkaśyapādd haritaḥ kaśyapaḥ śilpātkaśyapācchilpaḥ
kaśyapaḥ kaśyapānnaidhruveḥ kaśyapo naidhruvirvāco vāgambhiṇyāḥ
ambhiṇyādityādādityānīmāni śuklāni yajūm̐ṣi vājasaneyena
yājñavalkyenā''khyayante ॥ 3॥

mantra 4[VI.v.4]
samānamā sāñjīvīputrāt sañjivīputro māṇḍūkāyanermāṇḍūkāyanirmāṇḍavyān
māṇḍavyaḥ kautsāt kautso māhitthermāhitthirvāmakakṣāyaṇād vāmakakṣāyaṇaḥ
śāṇḍilyācchāṇḍilyo vātsyād vātsyaḥ kuśreḥ kuśriryajñavacaso
rājastambāyanād yajñavacā rājastambāyanasturātkāvaṣeyāt turaḥ
kāvaṣeyaḥ prajāpateḥ prajāpatirbrahmaṇo brahma svayambhu । brahmaṇe
namaḥ ॥ 4॥

iti pañcamaṃ brāhmaṇam ॥

iti bṛhadāraṇyakopaniṣadi ṣaṣṭho'dhyāyaḥ ॥

iti vājasaneyake bṛhadāraṇyakopaniṣatsamāptā ॥