| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
२. बुद्धगुणसतिपटिलाभपञ्हो
2. Buddhaguṇasatipaṭilābhapañho
२. राजा आह ‘‘भन्ते नागसेन, तुम्हे एतं भणथ ‘यो वस्ससतं अकुसलं करेय्य, मरणकाले च एकं बुद्धगुणं सतिं पटिलभेय्य, सो देवेसु उप्पज्जेय्या’ति एतं न सद्दहामि, एवञ्च पन वदेथ ‘एतेन पाणातिपातेन निरये उप्पज्जेय्या’ति एतम्पि न सद्दहामी’’ति।
2. Rājā āha ‘‘bhante nāgasena, tumhe etaṃ bhaṇatha ‘yo vassasataṃ akusalaṃ kareyya, maraṇakāle ca ekaṃ buddhaguṇaṃ satiṃ paṭilabheyya, so devesu uppajjeyyā’ti etaṃ na saddahāmi, evañca pana vadetha ‘etena pāṇātipātena niraye uppajjeyyā’ti etampi na saddahāmī’’ti.
‘‘तं किं मञ्ञसि, महाराज, खुद्दकोपि पासाणो विना नावाय उदके उप्पिलवेय्या’’ति । ‘‘न हि, भन्ते’’ति। ‘‘किं नु खो, महाराज, वाहसतम्पि पासाणानं नावाय आरोपितं उदके उप्पिलवेय्या’’ति? ‘‘आम, भन्ते’’ति। ‘‘यथा, महाराज, नावा, एवं कुसलानि कम्मानि दट्ठब्बानी’’ति।
‘‘Taṃ kiṃ maññasi, mahārāja, khuddakopi pāsāṇo vinā nāvāya udake uppilaveyyā’’ti . ‘‘Na hi, bhante’’ti. ‘‘Kiṃ nu kho, mahārāja, vāhasatampi pāsāṇānaṃ nāvāya āropitaṃ udake uppilaveyyā’’ti? ‘‘Āma, bhante’’ti. ‘‘Yathā, mahārāja, nāvā, evaṃ kusalāni kammāni daṭṭhabbānī’’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
बुद्धगुणसतिपटिलाभपञ्हो दुतियो।
Buddhaguṇasatipaṭilābhapañho dutiyo.
