| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၂. ဗုဒ္ဓဂုဏသတိပဋိလာဘပဉ္ဟော
2. Buddhaguṇasatipaṭilābhapañho
၂. ရာဇာ အာဟ ‘‘ဘန္တေ နာဂသေန, တုမ္ဟေ ဧတံ ဘဏထ ‘ယော ဝသ္သသတံ အကုသလံ ကရေယ္ယ, မရဏကာလေ စ ဧကံ ဗုဒ္ဓဂုဏံ သတိံ ပဋိလဘေယ္ယ, သော ဒေဝေသု ဥပ္ပဇ္ဇေယ္ယာ’တိ ဧတံ န သဒ္ဒဟာမိ, ဧဝဉ္စ ပန ဝဒေထ ‘ဧတေန ပာဏာတိပာတေန နိရယေ ဥပ္ပဇ္ဇေယ္ယာ’တိ ဧတမ္ပိ န သဒ္ဒဟာမီ’’တိ။
2. Rājā āha ‘‘bhante nāgasena, tumhe etaṃ bhaṇatha ‘yo vassasataṃ akusalaṃ kareyya, maraṇakāle ca ekaṃ buddhaguṇaṃ satiṃ paṭilabheyya, so devesu uppajjeyyā’ti etaṃ na saddahāmi, evañca pana vadetha ‘etena pāṇātipātena niraye uppajjeyyā’ti etampi na saddahāmī’’ti.
‘‘တံ ကိံ မညသိ, မဟာရာဇ, ခုဒ္ဒကောပိ ပာသာဏော ဝိနာ နာဝာယ ဥဒကေ ဥပ္ပိလဝေယ္ယာ’’တိ ။ ‘‘န ဟိ, ဘန္တေ’’တိ။ ‘‘ကိံ နု ခော, မဟာရာဇ, ဝာဟသတမ္ပိ ပာသာဏာနံ နာဝာယ အာရောပိတံ ဥဒကေ ဥပ္ပိလဝေယ္ယာ’’တိ? ‘‘အာမ, ဘန္တေ’’တိ။ ‘‘ယထာ, မဟာရာဇ, နာဝာ, ဧဝံ ကုသလာနိ ကမ္မာနိ ဒဋ္ဌဗ္ဗာနီ’’တိ။
‘‘Taṃ kiṃ maññasi, mahārāja, khuddakopi pāsāṇo vinā nāvāya udake uppilaveyyā’’ti . ‘‘Na hi, bhante’’ti. ‘‘Kiṃ nu kho, mahārāja, vāhasatampi pāsāṇānaṃ nāvāya āropitaṃ udake uppilaveyyā’’ti? ‘‘Āma, bhante’’ti. ‘‘Yathā, mahārāja, nāvā, evaṃ kusalāni kammāni daṭṭhabbānī’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ဗုဒ္ဓဂုဏသတိပဋိလာဘပဉ္ဟော ဒုတိယော။
Buddhaguṇasatipaṭilābhapañho dutiyo.
