| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༢. བུདྡྷགུཎསཏིཔཊིལཱབྷཔཉྷོ
2. Buddhaguṇasatipaṭilābhapañho
༢. རཱཛཱ ཨཱཧ ‘‘བྷནྟེ ནཱགསེན, ཏུམྷེ ཨེཏཾ བྷཎཐ ‘ཡོ ཝསྶསཏཾ ཨཀུསལཾ ཀརེཡྻ, མརཎཀཱལེ ཙ ཨེཀཾ བུདྡྷགུཎཾ སཏིཾ པཊིལབྷེཡྻ, སོ དེཝེསུ ཨུཔྤཛྫེཡྻཱ’ཏི ཨེཏཾ ན སདྡཧཱམི, ཨེཝཉྩ པན ཝདེཐ ‘ཨེཏེན པཱཎཱཏིཔཱཏེན ནིརཡེ ཨུཔྤཛྫེཡྻཱ’ཏི ཨེཏམྤི ན སདྡཧཱམཱི’’ཏི།
2. Rājā āha ‘‘bhante nāgasena, tumhe etaṃ bhaṇatha ‘yo vassasataṃ akusalaṃ kareyya, maraṇakāle ca ekaṃ buddhaguṇaṃ satiṃ paṭilabheyya, so devesu uppajjeyyā’ti etaṃ na saddahāmi, evañca pana vadetha ‘etena pāṇātipātena niraye uppajjeyyā’ti etampi na saddahāmī’’ti.
‘‘ཏཾ ཀིཾ མཉྙསི, མཧཱརཱཛ, ཁུདྡཀོཔི པཱསཱཎོ ཝིནཱ ནཱཝཱཡ ཨུདཀེ ཨུཔྤིལཝེཡྻཱ’’ཏི ། ‘‘ན ཧི, བྷནྟེ’’ཏི། ‘‘ཀིཾ ནུ ཁོ, མཧཱརཱཛ, ཝཱཧསཏམྤི པཱསཱཎཱནཾ ནཱཝཱཡ ཨཱརོཔིཏཾ ཨུདཀེ ཨུཔྤིལཝེཡྻཱ’’ཏི? ‘‘ཨཱམ, བྷནྟེ’’ཏི། ‘‘ཡཐཱ, མཧཱརཱཛ, ནཱཝཱ, ཨེཝཾ ཀུསལཱནི ཀམྨཱནི དཊྛབྦཱནཱི’’ཏི།
‘‘Taṃ kiṃ maññasi, mahārāja, khuddakopi pāsāṇo vinā nāvāya udake uppilaveyyā’’ti . ‘‘Na hi, bhante’’ti. ‘‘Kiṃ nu kho, mahārāja, vāhasatampi pāsāṇānaṃ nāvāya āropitaṃ udake uppilaveyyā’’ti? ‘‘Āma, bhante’’ti. ‘‘Yathā, mahārāja, nāvā, evaṃ kusalāni kammāni daṭṭhabbānī’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
བུདྡྷགུཎསཏིཔཊིལཱབྷཔཉྷོ དུཏིཡོ།
Buddhaguṇasatipaṭilābhapañho dutiyo.
