| Library / Tipiṭaka / തിപിടക • Tipiṭaka / മിലിന്ദപഞ്ഹപാളി • Milindapañhapāḷi |
൨. ബുദ്ധഗുണസതിപടിലാഭപഞ്ഹോ
2. Buddhaguṇasatipaṭilābhapañho
൨. രാജാ ആഹ ‘‘ഭന്തേ നാഗസേന, തുമ്ഹേ ഏതം ഭണഥ ‘യോ വസ്സസതം അകുസലം കരേയ്യ, മരണകാലേ ച ഏകം ബുദ്ധഗുണം സതിം പടിലഭേയ്യ, സോ ദേവേസു ഉപ്പജ്ജേയ്യാ’തി ഏതം ന സദ്ദഹാമി, ഏവഞ്ച പന വദേഥ ‘ഏതേന പാണാതിപാതേന നിരയേ ഉപ്പജ്ജേയ്യാ’തി ഏതമ്പി ന സദ്ദഹാമീ’’തി.
2. Rājā āha ‘‘bhante nāgasena, tumhe etaṃ bhaṇatha ‘yo vassasataṃ akusalaṃ kareyya, maraṇakāle ca ekaṃ buddhaguṇaṃ satiṃ paṭilabheyya, so devesu uppajjeyyā’ti etaṃ na saddahāmi, evañca pana vadetha ‘etena pāṇātipātena niraye uppajjeyyā’ti etampi na saddahāmī’’ti.
‘‘തം കിം മഞ്ഞസി, മഹാരാജ, ഖുദ്ദകോപി പാസാണോ വിനാ നാവായ ഉദകേ ഉപ്പിലവേയ്യാ’’തി . ‘‘ന ഹി, ഭന്തേ’’തി. ‘‘കിം നു ഖോ, മഹാരാജ, വാഹസതമ്പി പാസാണാനം നാവായ ആരോപിതം ഉദകേ ഉപ്പിലവേയ്യാ’’തി? ‘‘ആമ, ഭന്തേ’’തി. ‘‘യഥാ, മഹാരാജ, നാവാ, ഏവം കുസലാനി കമ്മാനി ദട്ഠബ്ബാനീ’’തി.
‘‘Taṃ kiṃ maññasi, mahārāja, khuddakopi pāsāṇo vinā nāvāya udake uppilaveyyā’’ti . ‘‘Na hi, bhante’’ti. ‘‘Kiṃ nu kho, mahārāja, vāhasatampi pāsāṇānaṃ nāvāya āropitaṃ udake uppilaveyyā’’ti? ‘‘Āma, bhante’’ti. ‘‘Yathā, mahārāja, nāvā, evaṃ kusalāni kammāni daṭṭhabbānī’’ti.
‘‘കല്ലോസി, ഭന്തേ നാഗസേനാ’’തി.
‘‘Kallosi, bhante nāgasenā’’ti.
ബുദ്ധഗുണസതിപടിലാഭപഞ്ഹോ ദുതിയോ.
Buddhaguṇasatipaṭilābhapañho dutiyo.
