| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༥. བུདྡྷལཱབྷནྟརཱཡཔཉྷོ
5. Buddhalābhantarāyapañho
༥. ‘‘བྷནྟེ ནཱགསེན, ཏུམྷེ བྷཎཐ ‘ལཱབྷཱི ཏཐཱགཏོ ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱན’ནྟི། པུན ཙ ཏཐཱགཏོ པཉྩསཱལཾ བྲཱཧྨཎགཱམཾ པིཎྜཱཡ པཝིསིཏྭཱ ཀིཉྩིདེཝ ཨལབྷིཏྭཱ ཡཐཱདྷོཏེན པཏྟེན ནིཀྑནྟོཏི། ཡདི, བྷནྟེ ནཱགསེན, ཏཐཱགཏོ ལཱབྷཱི ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱནཾ, ཏེན ཧི པཉྩསཱལཾ བྲཱཧྨཎགཱམཾ པིཎྜཱཡ པཝིསིཏྭཱ ཀིཉྩིདེཝ ཨལབྷིཏྭཱ ཡཐཱདྷོཏེན པཏྟེན ནིཀྑནྟོཏི ཡཾ ཝཙནཾ, ཏཾ མིཙྪཱ། ཡདི པཉྩསཱལཾ བྲཱཧྨཎགཱམཾ པིཎྜཱཡ པཝིསིཏྭཱ ཀིཉྩིདེཝ ཨལབྷིཏྭཱ ཡཐཱདྷོཏེན པཏྟེན ནིཀྑནྟོ, ཏེན ཧི ལཱབྷཱི ཏཐཱགཏོ ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱནནྟི ཏམྤི ཝཙནཾ མིཙྪཱ། ཨཡམྤི ཨུབྷཏོ ཀོཊིཀོ པཉྷོ སུམཧནྟོ དུནྣིབྦེཋོ ཏཝཱནུཔྤཏྟོ, སོ ཏཡཱ ནིབྦཱཧིཏབྦོ’’ཏི།
5. ‘‘Bhante nāgasena, tumhe bhaṇatha ‘lābhī tathāgato cīvarapiṇḍapātasenāsanagilānappaccayabhesajjaparikkhārāna’nti. Puna ca tathāgato pañcasālaṃ brāhmaṇagāmaṃ piṇḍāya pavisitvā kiñcideva alabhitvā yathādhotena pattena nikkhantoti. Yadi, bhante nāgasena, tathāgato lābhī cīvarapiṇḍapātasenāsanagilānappaccayabhesajjaparikkhārānaṃ, tena hi pañcasālaṃ brāhmaṇagāmaṃ piṇḍāya pavisitvā kiñcideva alabhitvā yathādhotena pattena nikkhantoti yaṃ vacanaṃ, taṃ micchā. Yadi pañcasālaṃ brāhmaṇagāmaṃ piṇḍāya pavisitvā kiñcideva alabhitvā yathādhotena pattena nikkhanto, tena hi lābhī tathāgato cīvarapiṇḍapātasenāsanagilānappaccayabhesajjaparikkhārānanti tampi vacanaṃ micchā. Ayampi ubhato koṭiko pañho sumahanto dunnibbeṭho tavānuppatto, so tayā nibbāhitabbo’’ti.
‘‘ལཱབྷཱི, མཧཱརཱཛ, ཏཐཱགཏོ ཙཱིཝརཔིཎྜཔཱཏསེནཱསནགིལཱནཔྤཙྩཡབྷེསཛྫཔརིཀྑཱརཱནཾ, པཉྩསཱལཉྩ བྲཱཧྨཎགཱམཾ པིཎྜཱཡ པཝིསིཏྭཱ ཀིཉྩིདེཝ ཨལབྷིཏྭཱ ཡཐཱདྷོཏེན པཏྟེན ནིཀྑནྟོ, ཏཉྩ པན མཱརསྶ པཱཔིམཏོ ཀཱརཎཱ’’ཏི། ‘‘ཏེན ཧི, བྷནྟེ ནཱགསེན, བྷགཝཏོ གཎནཔཐཾ ཝཱིཏིཝཏྟཀཔྤེ 1 ཨབྷིསངྑཏཾ ཀུསལཾ ཀིནྟི ནིཊྛིཏཾ, ཨདྷུནུཊྛིཏེན མཱརེན པཱཔིམཏཱ ཏསྶ ཀུསལསྶ བལཝེགཾ 2 ཀིནྟི པིཧིཏཾ, ཏེན ཧི, བྷནྟེ ནཱགསེན, ཏསྨིཾ ཝཏྠུསྨིཾ དྭཱིསུ ཋཱནེསུ ཨུཔཝཱདོ ཨཱགཙྪཏི, ཀུསལཏོཔི ཨཀུསལཾ བལཝཏརཾ ཧོཏི, བུདྡྷབལཏོཔི མཱརབལཾ བལཝཏརཾ ཧོཏཱིཏི, ཏེན ཧི རུཀྑསྶ མཱུལཏོཔི ཨགྒཾ བྷཱརཏརཾ ཧོཏི, གུཎསམྤརིཀིཎྞཏོཔི པཱཔིཡཾ བལཝཏརཾ ཧོཏཱི’’ཏི། ‘‘ན, མཧཱརཱཛ, ཏཱཝཏཀེན ཀུསལཏོཔི ཨཀུསལཾ བལཝཏརཾ ནཱམ ཧོཏི, ན བུདྡྷབལཏོཔི མཱརབལཾ བལཝཏརཾ ནཱམ ཧོཏི། ཨཔི ཙེཏྠ ཀཱརཎཾ ཨིཙྪིཏབྦཾ།
‘‘Lābhī, mahārāja, tathāgato cīvarapiṇḍapātasenāsanagilānappaccayabhesajjaparikkhārānaṃ, pañcasālañca brāhmaṇagāmaṃ piṇḍāya pavisitvā kiñcideva alabhitvā yathādhotena pattena nikkhanto, tañca pana mārassa pāpimato kāraṇā’’ti. ‘‘Tena hi, bhante nāgasena, bhagavato gaṇanapathaṃ vītivattakappe 3 abhisaṅkhataṃ kusalaṃ kinti niṭṭhitaṃ, adhunuṭṭhitena mārena pāpimatā tassa kusalassa balavegaṃ 4 kinti pihitaṃ, tena hi, bhante nāgasena, tasmiṃ vatthusmiṃ dvīsu ṭhānesu upavādo āgacchati, kusalatopi akusalaṃ balavataraṃ hoti, buddhabalatopi mārabalaṃ balavataraṃ hotīti, tena hi rukkhassa mūlatopi aggaṃ bhārataraṃ hoti, guṇasamparikiṇṇatopi pāpiyaṃ balavataraṃ hotī’’ti. ‘‘Na, mahārāja, tāvatakena kusalatopi akusalaṃ balavataraṃ nāma hoti, na buddhabalatopi mārabalaṃ balavataraṃ nāma hoti. Api cettha kāraṇaṃ icchitabbaṃ.
‘‘ཡཐཱ, མཧཱརཱཛ, པུརིསོ རཉྙོ ཙཀྐཝཏྟིསྶ མདྷུཾ ཝཱ མདྷུཔིཎྜིཀཾ ཝཱ ཨཉྙཾ ཝཱ ཨུཔཱཡནཾ ཨབྷིཧརེཡྻ, ཏམེནཾ རཉྙོ དྭཱརཔཱལོ ཨེཝཾ ཝདེཡྻ ‘ཨཀཱལོ, བྷོ, ཨཡཾ རཉྙོ དསྶནཱཡ, ཏེན ཧི, བྷོ, ཏཝ ཨུཔཱཡནཾ གཧེཏྭཱ སཱིགྷསཱིགྷཾ པཊིནིཝཏྟ, པུརེ ཏཝ རཱཛཱ དཎྜཾ དྷཱརེསྶཏཱི’ཏི 5། ཏཏོ སོ པུརིསོ དཎྜབྷཡཱ ཏསིཏོ ཨུབྦིགྒོ ཏཾ ཨུཔཱཡནཾ ཨཱདཱཡ སཱིགྷསཱིགྷཾ པཊིནིཝཏྟེཡྻ, ཨཔི ནུ ཁོ སོ, མཧཱརཱཛ, རཱཛཱ ཙཀྐཝཏྟཱི ཏཱཝཏཀེན ཨུཔཱཡནཝིཀལམཏྟཀེན དྭཱརཔཱལཏོ དུབྦལཏརོ ནཱམ ཧོཏི , ཨཉྙཾ ཝཱ པན ཀིཉྩི ཨུཔཱཡནཾ ན ལབྷེཡྻཱ’’ཏི? ‘‘ན ཧི, བྷནྟེ, ཨིསྶཱཔཀཏོ སོ, བྷནྟེ, དྭཱརཔཱལོ ཨུཔཱཡནཾ ནིཝཱརེསི, ཨཉྙེན པན དྭཱརེན སཏསཧསྶགུཎམྤི རཉྙོ ཨུཔཱཡནཾ ཨུཔེཏཱི’’ཏི ། ‘‘ཨེཝམེཝ ཁོ, མཧཱརཱཛ, ཨིསྶཱཔཀཏོ མཱརོ པཱཔིམཱ པཉྩསཱལཀེ བྲཱཧྨཎགཧཔཏིཀེ ཨནྭཱཝིསི, ཨཉྙཱནི པན ཨནེཀཱནི དེཝཏཱསཏསཧསྶཱནི ཨམཏཾ དིབྦཾ ཨོཛཾ གཧེཏྭཱ ཨུཔགཏཱནི ‘བྷགཝཏོ ཀཱཡེ ཨོཛཾ ཨོདཧིསྶཱམཱ’ཏི བྷགཝནྟཾ ནམསྶམཱནཱནི པཉྫལིཀཱནི ཋིཏཱནཱི’’ཏི།
‘‘Yathā, mahārāja, puriso rañño cakkavattissa madhuṃ vā madhupiṇḍikaṃ vā aññaṃ vā upāyanaṃ abhihareyya, tamenaṃ rañño dvārapālo evaṃ vadeyya ‘akālo, bho, ayaṃ rañño dassanāya, tena hi, bho, tava upāyanaṃ gahetvā sīghasīghaṃ paṭinivatta, pure tava rājā daṇḍaṃ dhāressatī’ti 6. Tato so puriso daṇḍabhayā tasito ubbiggo taṃ upāyanaṃ ādāya sīghasīghaṃ paṭinivatteyya, api nu kho so, mahārāja, rājā cakkavattī tāvatakena upāyanavikalamattakena dvārapālato dubbalataro nāma hoti , aññaṃ vā pana kiñci upāyanaṃ na labheyyā’’ti? ‘‘Na hi, bhante, issāpakato so, bhante, dvārapālo upāyanaṃ nivāresi, aññena pana dvārena satasahassaguṇampi rañño upāyanaṃ upetī’’ti . ‘‘Evameva kho, mahārāja, issāpakato māro pāpimā pañcasālake brāhmaṇagahapatike anvāvisi, aññāni pana anekāni devatāsatasahassāni amataṃ dibbaṃ ojaṃ gahetvā upagatāni ‘bhagavato kāye ojaṃ odahissāmā’ti bhagavantaṃ namassamānāni pañjalikāni ṭhitānī’’ti.
‘‘ཧོཏུ, བྷནྟེ ནཱགསེན, སུལབྷཱ བྷགཝཏོ ཙཏྟཱརོ པཙྩཡཱ ལོཀེ ཨུཏྟམཔུརིསསྶ, ཡཱཙིཏོཝ བྷགཝཱ དེཝམནུསྶོཧི ཙཏྟཱརོ པཙྩཡེ པརིབྷུཉྫཏི, ཨཔི ཙ ཁོ པན མཱརསྶ ཡོ ཨདྷིཔྤཱཡོ, སོ ཏཱཝཏཀེན སིདྡྷོ, ཡཾ སོ བྷགཝཏོ བྷོཛནསྶ ཨནྟརཱཡམཀཱསི། ཨེཏྠ མེ, བྷནྟེ, ཀངྑཱ ན ཚིཛྫཏི, ཝིམཏིཛཱཏོཧཾ ཏཏྠ སཾསཡཔཀྑནྡོ། ན མེ ཏཏྠ མཱནསཾ པཀྑནྡཏི, ཡཾ ཏཐཱགཏསྶ ཨརཧཏོ སམྨཱསམྦུདྡྷསྶ སདེཝཀེ ལོཀེ ཨགྒཔུགྒལཝརསྶ ཀུསལཝརཔུཉྙསམྦྷཝསྶ ཨསམསམསྶ ཨནུཔམསྶ ཨཔྤཊིསམསྶ ཚཝཀཾ ལཱམཀཾ པརིཏྟཾ པཱཔཾ ཨནརིཡཾ ཝིཔནྣཾ མཱརོ ལཱབྷནྟརཱཡམཀཱསཱི’’ཏི།
‘‘Hotu, bhante nāgasena, sulabhā bhagavato cattāro paccayā loke uttamapurisassa, yācitova bhagavā devamanussohi cattāro paccaye paribhuñjati, api ca kho pana mārassa yo adhippāyo, so tāvatakena siddho, yaṃ so bhagavato bhojanassa antarāyamakāsi. Ettha me, bhante, kaṅkhā na chijjati, vimatijātohaṃ tattha saṃsayapakkhando. Na me tattha mānasaṃ pakkhandati, yaṃ tathāgatassa arahato sammāsambuddhassa sadevake loke aggapuggalavarassa kusalavarapuññasambhavassa asamasamassa anupamassa appaṭisamassa chavakaṃ lāmakaṃ parittaṃ pāpaṃ anariyaṃ vipannaṃ māro lābhantarāyamakāsī’’ti.
‘‘ཙཏྟཱརོ ཁོ, མཧཱརཱཛ, ཨནྟརཱཡཱ ཨདིཊྛནྟརཱཡོ ཨུདྡིསྶ ཀཏནྟརཱཡོ ཨུཔཀྑཊནྟརཱཡོ པརིབྷོགནྟརཱཡོཏི། ཏཏྠ ཀཏམོ ཨདིཊྛནྟརཱཡོ? ཨནོདིསྶ ཨདསྶནེན ཨནབྷིསངྑཏཾ ཀོཙི ཨནྟརཱཡཾ ཀརོཏི ‘ཀིཾ པརསྶ དིནྣེནཱ’ཏི, ཨཡཾ ཨདིཊྛནྟརཱཡོ ནཱམ།
‘‘Cattāro kho, mahārāja, antarāyā adiṭṭhantarāyo uddissa katantarāyo upakkhaṭantarāyo paribhogantarāyoti. Tattha katamo adiṭṭhantarāyo? Anodissa adassanena anabhisaṅkhataṃ koci antarāyaṃ karoti ‘kiṃ parassa dinnenā’ti, ayaṃ adiṭṭhantarāyo nāma.
‘‘ཀཏམོ ཨུདྡིསྶ ཀཏནྟརཱཡོ? ཨིདྷེཀཙྩཾ པུགྒལཾ ཨུཔདིསིཏྭཱ ཨུདྡིསྶ བྷོཛནཾ པཊིཡཏྟཾ ཧོཏི, ཏཾ ཀོཙི ཨནྟརཱཡཾ ཀརོཏི, ཨཡཾ ཨུདྡིསྶ ཀཏནྟརཱཡོ ནཱམ།
‘‘Katamo uddissa katantarāyo? Idhekaccaṃ puggalaṃ upadisitvā uddissa bhojanaṃ paṭiyattaṃ hoti, taṃ koci antarāyaṃ karoti, ayaṃ uddissa katantarāyo nāma.
‘‘ཀཏམོ ཨུཔཀྑཊནྟརཱཡོ? ཨིདྷ ཡཾ ཀིཉྩི ཨུཔཀྑཊཾ ཧོཏི ཨཔྤཊིགྒཧིཏཾ, ཏཏྠ ཀོཙི ཨནྟརཱཡཾ ཀརོཏི, ཨཡཾ ཨུཔཀྑཊནྟརཱཡོ ནཱམ།
‘‘Katamo upakkhaṭantarāyo? Idha yaṃ kiñci upakkhaṭaṃ hoti appaṭiggahitaṃ, tattha koci antarāyaṃ karoti, ayaṃ upakkhaṭantarāyo nāma.
‘‘ཀཏམོ པརིབྷོགནྟརཱཡོ? ཨིདྷ ཡཾ ཀིཉྩི པརིབྷོགཾ, ཏཏྠ ཀོཙི ཨནྟརཱཡཾ ཀརོཏི, ཨཡཾ པརིབྷོགནྟརཱཡོ ནཱམ། ཨིམེ ཁོ, མཧཱརཱཛ, ཙཏྟཱརོ ཨནྟརཱཡཱ།
‘‘Katamo paribhogantarāyo? Idha yaṃ kiñci paribhogaṃ, tattha koci antarāyaṃ karoti, ayaṃ paribhogantarāyo nāma. Ime kho, mahārāja, cattāro antarāyā.
‘‘ཡཾ པན མཱརོ པཱཔིམཱ པཉྩསཱལཀེ བྲཱཧྨཎགཧཔཏིཀེ ཨནྭཱཝིསི, ཏཾ ནེཝ བྷགཝཏོ པརིབྷོགཾ ན ཨུཔཀྑཊཾ ན ཨུདྡིསྶཀཏཾ, ཨནཱགཏཾ ཨསམྤཏྟཾ ཨདསྶནེན ཨནྟརཱཡཾ ཀཏཾ, ཏཾ པན ནེཀསྶ བྷགཝཏོ ཡེཝ, ཨཐ ཁོ ཡེ ཏེ ཏེན སམཡེན ནིཀྑནྟཱ ཨབྦྷཱགཏཱ, སབྦེཔི ཏེ ཏཾ དིཝསཾ བྷོཛནཾ ན ལབྷིཾསུ, ནཱཧཾ ཏཾ, མཧཱརཱཛ, པསྶཱམི སདེཝཀེ ལོཀེ སམཱརཀེ སབྲཧྨཀེ སསྶམཎབྲཱཧྨཎིཡཱ པཛཱཡ སདེཝམནུསྶཱཡ, ཡོ ཏསྶ བྷགཝཏོ ཨུདྡིསྶ ཀཏཾ ཨུཔཀྑཊཾ པརིབྷོགཾ ཨནྟརཱཡཾ ཀརེཡྻ། སཙེ ཀོཙི ཨིསྶཱཡ ཨུདྡིསྶ ཀཏཾ ཨུཔཀྑཊཾ པརིབྷོགཾ ཨནྟརཱཡཾ ཀརེཡྻ, ཕལེཡྻ ཏསྶ མུདྡྷཱ སཏདྷཱ ཝཱ སཧསྶདྷཱ ཝཱ།
‘‘Yaṃ pana māro pāpimā pañcasālake brāhmaṇagahapatike anvāvisi, taṃ neva bhagavato paribhogaṃ na upakkhaṭaṃ na uddissakataṃ, anāgataṃ asampattaṃ adassanena antarāyaṃ kataṃ, taṃ pana nekassa bhagavato yeva, atha kho ye te tena samayena nikkhantā abbhāgatā, sabbepi te taṃ divasaṃ bhojanaṃ na labhiṃsu, nāhaṃ taṃ, mahārāja, passāmi sadevake loke samārake sabrahmake sassamaṇabrāhmaṇiyā pajāya sadevamanussāya, yo tassa bhagavato uddissa kataṃ upakkhaṭaṃ paribhogaṃ antarāyaṃ kareyya. Sace koci issāya uddissa kataṃ upakkhaṭaṃ paribhogaṃ antarāyaṃ kareyya, phaleyya tassa muddhā satadhā vā sahassadhā vā.
‘‘ཙཏྟཱརོམེ, མཧཱརཱཛ, ཏཐཱགཏསྶ ཀེནཙི ཨནཱཝརཎཱིཡཱ གུཎཱ། ཀཏམེ ཙཏྟཱརོ? ལཱབྷོ, མཧཱརཱཛ, བྷགཝཏོ ཨུདྡིསྶ ཀཏོ ཨུཔཀྑཊོ ན སཀྐཱ ཀེནཙི ཨནྟརཱཡཾ ཀཱཏུཾ; སརཱིརཱནུགཏཱ , མཧཱརཱཛ, བྷགཝཏོ བྱཱམཔྤབྷཱ ན སཀྐཱ ཀེནཙི ཨནྟརཱཡཾ ཀཱཏུཾ; སབྦཉྙུཏཾ, མཧཱརཱཛ, བྷགཝཏོ ཉཱཎརཏནཾ ན སཀྐཱ ཀེནཙི ཨནྟརཱཡཾ ཀཱཏུཾ; ཛཱིཝིཏཾ, མཧཱརཱཛ, བྷགཝཏོ ན སཀྐཱ ཀེནཙི ཨནྟརཱཡཾ ཀཱཏུཾ། ཨིམེ ཁོ, མཧཱརཱཛ, ཙཏྟཱརོ ཏཐཱགཏསྶ ཀེནཙི ཨནཱཝརཎཱིཡཱ གུཎཱ, སབྦེཔེཏེ, མཧཱརཱཛ, གུཎཱ ཨེཀརསཱ ཨརོགཱ ཨཀུཔྤཱ ཨཔརཱུཔཀྐམཱ ཨཕུསཱནི ཀིརིཡཱནི། ཨདསྶནེན, མཧཱརཱཛ, མཱརོ པཱཔིམཱ ནིལཱིཡིཏྭཱ པཉྩསཱལཀེ བྲཱཧྨཎགཧཔཏིཀེ ཨནྭཱཝིསི།
‘‘Cattārome, mahārāja, tathāgatassa kenaci anāvaraṇīyā guṇā. Katame cattāro? Lābho, mahārāja, bhagavato uddissa kato upakkhaṭo na sakkā kenaci antarāyaṃ kātuṃ; sarīrānugatā , mahārāja, bhagavato byāmappabhā na sakkā kenaci antarāyaṃ kātuṃ; sabbaññutaṃ, mahārāja, bhagavato ñāṇaratanaṃ na sakkā kenaci antarāyaṃ kātuṃ; jīvitaṃ, mahārāja, bhagavato na sakkā kenaci antarāyaṃ kātuṃ. Ime kho, mahārāja, cattāro tathāgatassa kenaci anāvaraṇīyā guṇā, sabbepete, mahārāja, guṇā ekarasā arogā akuppā aparūpakkamā aphusāni kiriyāni. Adassanena, mahārāja, māro pāpimā nilīyitvā pañcasālake brāhmaṇagahapatike anvāvisi.
‘‘ཡཐཱ, མཧཱརཱཛ, རཉྙོ པཙྩནྟེ དེསེ ཝིསམེ ཨདསྶནེན ནིལཱིཡིཏྭཱ ཙོརཱ པནྠཾ དཱུསེནྟི། ཡདི པན རཱཛཱ ཏེ ཙོརེ པསྶེཡྻ, ཨཔི ནུ ཁོ ཏེ ཙོརཱ སོཏྠིཾ ལབྷེཡྻུ’’ནྟི? ‘‘ན ཧི, བྷནྟེ, ཕརསུནཱ ཕཱལཱཔེཡྻ སཏདྷཱ ཝཱ སཧསྶདྷཱ ཝཱ’’ཏི། ‘‘ཨེཝམེཝ ཁོ, མཧཱརཱཛ, ཨདསྶནེན མཱརོ པཱཔིམཱ ནིལཱིཡིཏྭཱ པཉྩསཱལཀེ བྲཱཧྨཎགཧཔཏིཀེ ཨནྭཱཝིསི།
‘‘Yathā, mahārāja, rañño paccante dese visame adassanena nilīyitvā corā panthaṃ dūsenti. Yadi pana rājā te core passeyya, api nu kho te corā sotthiṃ labheyyu’’nti? ‘‘Na hi, bhante, pharasunā phālāpeyya satadhā vā sahassadhā vā’’ti. ‘‘Evameva kho, mahārāja, adassanena māro pāpimā nilīyitvā pañcasālake brāhmaṇagahapatike anvāvisi.
‘‘ཡཐཱ ཝཱ པན, མཧཱརཱཛ, ཨིཏྠཱི སཔཏིཀཱ ཨདསྶནེན ནིལཱིཡིཏྭཱ པརཔུརིསཾ སེཝཏི, ཨེཝམེཝ ཁོ, མཧཱརཱཛ, ཨདསྶནེན མཱརོ པཱཔིམཱ ནིལཱིཡིཏྭཱ པཉྩསཱལཀེ བྲཱཧྨཎགཧཔཏིཀེ ཨནྭཱཝིསི། ཡདི, མཧཱརཱཛ, ཨིཏྠཱི སཱམིཀསྶ སམྨུཁཱ པརཔུརིསཾ སེཝཏི, ཨཔི ནུ ཁོ སཱ ཨིཏྠཱི སོཏྠིཾ ལབྷེཡྻཱ’’ཏི? ‘‘ན ཧི, བྷནྟེ, ཧནེཡྻཱཔི ཏཾ, བྷནྟེ, སཱམིཀོ ཝདྷེཡྻཱཔི བནྡྷེཡྻཱཔི དཱསིཏྟཾ ཝཱ ཨུཔནེཡྻཱ’’ཏི། ‘‘ཨེཝམེཝ ཁོ, མཧཱརཱཛ, ཨདསྶནེན མཱརོ པཱཔིམཱ ནིལཱིཡིཏྭཱ པཉྩསཱལཀེ བྲཱཧྨཎགཧཔཏིཀེ ཨནྭཱཝིསི། ཡདི, མཧཱརཱཛ, མཱརོ པཱཔིམཱ བྷགཝཏོ ཨུདྡིསྶ ཀཏཾ ཨུཔཀྑཊཾ པརིབྷོགཾ ཨནྟརཱཡཾ ཀརེཡྻ, ཕལེཡྻ ཏསྶ མུདྡྷཱ སཏདྷཱ ཝཱ སཧསྶདྷཱ ཝཱ’’ཏི། ‘‘ཨེཝམེཏཾ, བྷནྟེ ནཱགསེན, ཙོརིཀཱཡ ཀཏཾ མཱརེན པཱཔིམཏཱ, ནིལཱིཡིཏྭཱ མཱརོ པཱཔིམཱ པཉྩསཱལཀེ བྲཱཧྨཎགཧཔཏིཀེ ཨནྭཱཝིསི། སཙེ སོ, བྷནྟེ, མཱརོ པཱཔིམཱ བྷགཝཏོ ཨུདྡིསྶ ཀཏཾ ཨུཔཀྑཊཾ པརིབྷོགཾ ཨནྟརཱཡཾ ཀརེཡྻ, མུདྡྷཱ ཝཱསྶ ཕལེཡྻ སཏདྷཱ ཝཱ སཧསྶདྷཱ ཝཱ, ཀཱཡོ ཝཱསྶ བྷུསམུཊྛི ཝིཡ ཝིཀིརེཡྻ, སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Yathā vā pana, mahārāja, itthī sapatikā adassanena nilīyitvā parapurisaṃ sevati, evameva kho, mahārāja, adassanena māro pāpimā nilīyitvā pañcasālake brāhmaṇagahapatike anvāvisi. Yadi, mahārāja, itthī sāmikassa sammukhā parapurisaṃ sevati, api nu kho sā itthī sotthiṃ labheyyā’’ti? ‘‘Na hi, bhante, haneyyāpi taṃ, bhante, sāmiko vadheyyāpi bandheyyāpi dāsittaṃ vā upaneyyā’’ti. ‘‘Evameva kho, mahārāja, adassanena māro pāpimā nilīyitvā pañcasālake brāhmaṇagahapatike anvāvisi. Yadi, mahārāja, māro pāpimā bhagavato uddissa kataṃ upakkhaṭaṃ paribhogaṃ antarāyaṃ kareyya, phaleyya tassa muddhā satadhā vā sahassadhā vā’’ti. ‘‘Evametaṃ, bhante nāgasena, corikāya kataṃ mārena pāpimatā, nilīyitvā māro pāpimā pañcasālake brāhmaṇagahapatike anvāvisi. Sace so, bhante, māro pāpimā bhagavato uddissa kataṃ upakkhaṭaṃ paribhogaṃ antarāyaṃ kareyya, muddhā vāssa phaleyya satadhā vā sahassadhā vā, kāyo vāssa bhusamuṭṭhi viya vikireyya, sādhu, bhante nāgasena, evametaṃ tathā sampaṭicchāmī’’ti.
བུདྡྷལཱབྷནྟརཱཡཔཉྷོ པཉྩམོ།
Buddhalābhantarāyapañho pañcamo.
Footnotes:
