| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
१०. बुद्धनिदस्सनपञ्हो
10. Buddhanidassanapañho
१०. राजा आह ‘‘भन्ते नागसेन, बुद्धो अत्थी’’ति? ‘‘आम, महाराज, भगवा अत्थी’’ति। ‘‘सक्का पन, भन्ते नागसेन, बुद्धो निदस्सेतुं इधवा इधवा’’ति? ‘‘परिनिब्बुतो, महाराज, भगवा अनुपादिसेसाय निब्बानधातुया, न सक्का भगवा निदस्सेतुं ‘इध वा इध वा’’’ति।
10. Rājā āha ‘‘bhante nāgasena, buddho atthī’’ti? ‘‘Āma, mahārāja, bhagavā atthī’’ti. ‘‘Sakkā pana, bhante nāgasena, buddho nidassetuṃ idhavā idhavā’’ti? ‘‘Parinibbuto, mahārāja, bhagavā anupādisesāya nibbānadhātuyā, na sakkā bhagavā nidassetuṃ ‘idha vā idha vā’’’ti.
‘‘ओपम्मं करोही’’ति। ‘‘तं किं मञ्ञसि, महाराज, महतो अग्गिक्खन्धस्स जलमानस्स या अच्चि अत्थङ्गता, सक्का सा अच्चि दस्सेतुं ‘इध वा इध वा’’’ति? ‘‘न हि, भन्ते, निरुद्धा सा अच्चि अप्पञ्ञत्तिं गता’’ति। ‘‘एवमेव खो, महाराज, भगवा अनुपादिसेसाय निब्बानधातुया परिनिब्बुतो अत्थङ्गतो, न सक्का भगवा निदस्सेतुं ‘इध वा इध वा’ ति, धम्मकायेन पन खो, महाराज, सक्का भगवा निदस्सेतुं। धम्मो हि, महाराज, भगवता देसितो’’ति।
‘‘Opammaṃ karohī’’ti. ‘‘Taṃ kiṃ maññasi, mahārāja, mahato aggikkhandhassa jalamānassa yā acci atthaṅgatā, sakkā sā acci dassetuṃ ‘idha vā idha vā’’’ti? ‘‘Na hi, bhante, niruddhā sā acci appaññattiṃ gatā’’ti. ‘‘Evameva kho, mahārāja, bhagavā anupādisesāya nibbānadhātuyā parinibbuto atthaṅgato, na sakkā bhagavā nidassetuṃ ‘idha vā idha vā’ ti, dhammakāyena pana kho, mahārāja, sakkā bhagavā nidassetuṃ. Dhammo hi, mahārāja, bhagavatā desito’’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
बुद्धनिदस्सनपञ्हो दसमो।
Buddhanidassanapañho dasamo.
बुद्धवग्गो पञ्चमो।
Buddhavaggo pañcamo.
इमस्मिं वग्गे दस पञ्हा।
Imasmiṃ vagge dasa pañhā.
