| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၁၀. ဗုဒ္ဓနိဒသ္သနပဉ္ဟော
10. Buddhanidassanapañho
၁၀. ရာဇာ အာဟ ‘‘ဘန္တေ နာဂသေန, ဗုဒ္ဓော အတ္ထီ’’တိ? ‘‘အာမ, မဟာရာဇ, ဘဂဝာ အတ္ထီ’’တိ။ ‘‘သက္ကာ ပန, ဘန္တေ နာဂသေန, ဗုဒ္ဓော နိဒသ္သေတုံ ဣဓဝာ ဣဓဝာ’’တိ? ‘‘ပရိနိဗ္ဗုတော, မဟာရာဇ, ဘဂဝာ အနုပာဒိသေသာယ နိဗ္ဗာနဓာတုယာ, န သက္ကာ ဘဂဝာ နိဒသ္သေတုံ ‘ဣဓ ဝာ ဣဓ ဝာ’’’တိ။
10. Rājā āha ‘‘bhante nāgasena, buddho atthī’’ti? ‘‘Āma, mahārāja, bhagavā atthī’’ti. ‘‘Sakkā pana, bhante nāgasena, buddho nidassetuṃ idhavā idhavā’’ti? ‘‘Parinibbuto, mahārāja, bhagavā anupādisesāya nibbānadhātuyā, na sakkā bhagavā nidassetuṃ ‘idha vā idha vā’’’ti.
‘‘ဩပမ္မံ ကရောဟီ’’တိ။ ‘‘တံ ကိံ မညသိ, မဟာရာဇ, မဟတော အဂ္ဂိက္ခန္ဓသ္သ ဇလမာနသ္သ ယာ အစ္စိ အတ္ထင္ဂတာ, သက္ကာ သာ အစ္စိ ဒသ္သေတုံ ‘ဣဓ ဝာ ဣဓ ဝာ’’’တိ? ‘‘န ဟိ, ဘန္တေ, နိရုဒ္ဓာ သာ အစ္စိ အပ္ပညတ္တိံ ဂတာ’’တိ။ ‘‘ဧဝမေဝ ခော, မဟာရာဇ, ဘဂဝာ အနုပာဒိသေသာယ နိဗ္ဗာနဓာတုယာ ပရိနိဗ္ဗုတော အတ္ထင္ဂတော, န သက္ကာ ဘဂဝာ နိဒသ္သေတုံ ‘ဣဓ ဝာ ဣဓ ဝာ’ တိ, ဓမ္မကာယေန ပန ခော, မဟာရာဇ, သက္ကာ ဘဂဝာ နိဒသ္သေတုံ။ ဓမ္မော ဟိ, မဟာရာဇ, ဘဂဝတာ ဒေသိတော’’တိ။
‘‘Opammaṃ karohī’’ti. ‘‘Taṃ kiṃ maññasi, mahārāja, mahato aggikkhandhassa jalamānassa yā acci atthaṅgatā, sakkā sā acci dassetuṃ ‘idha vā idha vā’’’ti? ‘‘Na hi, bhante, niruddhā sā acci appaññattiṃ gatā’’ti. ‘‘Evameva kho, mahārāja, bhagavā anupādisesāya nibbānadhātuyā parinibbuto atthaṅgato, na sakkā bhagavā nidassetuṃ ‘idha vā idha vā’ ti, dhammakāyena pana kho, mahārāja, sakkā bhagavā nidassetuṃ. Dhammo hi, mahārāja, bhagavatā desito’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ဗုဒ္ဓနိဒသ္သနပဉ္ဟော ဒသမော။
Buddhanidassanapañho dasamo.
ဗုဒ္ဓဝဂ္ဂော ပဉ္စမော။
Buddhavaggo pañcamo.
ဣမသ္မိံ ဝဂ္ဂေ ဒသ ပဉ္ဟာ။
Imasmiṃ vagge dasa pañhā.
