| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༡༠. བུདྡྷནིདསྶནཔཉྷོ
10. Buddhanidassanapañho
༡༠. རཱཛཱ ཨཱཧ ‘‘བྷནྟེ ནཱགསེན, བུདྡྷོ ཨཏྠཱི’’ཏི? ‘‘ཨཱམ, མཧཱརཱཛ, བྷགཝཱ ཨཏྠཱི’’ཏི། ‘‘སཀྐཱ པན, བྷནྟེ ནཱགསེན, བུདྡྷོ ནིདསྶེཏུཾ ཨིདྷཝཱ ཨིདྷཝཱ’’ཏི? ‘‘པརིནིབྦུཏོ, མཧཱརཱཛ, བྷགཝཱ ཨནུཔཱདིསེསཱཡ ནིབྦཱནདྷཱཏུཡཱ, ན སཀྐཱ བྷགཝཱ ནིདསྶེཏུཾ ‘ཨིདྷ ཝཱ ཨིདྷ ཝཱ’’’ཏི།
10. Rājā āha ‘‘bhante nāgasena, buddho atthī’’ti? ‘‘Āma, mahārāja, bhagavā atthī’’ti. ‘‘Sakkā pana, bhante nāgasena, buddho nidassetuṃ idhavā idhavā’’ti? ‘‘Parinibbuto, mahārāja, bhagavā anupādisesāya nibbānadhātuyā, na sakkā bhagavā nidassetuṃ ‘idha vā idha vā’’’ti.
‘‘ཨོཔམྨཾ ཀརོཧཱི’’ཏི། ‘‘ཏཾ ཀིཾ མཉྙསི, མཧཱརཱཛ, མཧཏོ ཨགྒིཀྑནྡྷསྶ ཛལམཱནསྶ ཡཱ ཨཙྩི ཨཏྠངྒཏཱ, སཀྐཱ སཱ ཨཙྩི དསྶེཏུཾ ‘ཨིདྷ ཝཱ ཨིདྷ ཝཱ’’’ཏི? ‘‘ན ཧི, བྷནྟེ, ནིརུདྡྷཱ སཱ ཨཙྩི ཨཔྤཉྙཏྟིཾ གཏཱ’’ཏི། ‘‘ཨེཝམེཝ ཁོ, མཧཱརཱཛ, བྷགཝཱ ཨནུཔཱདིསེསཱཡ ནིབྦཱནདྷཱཏུཡཱ པརིནིབྦུཏོ ཨཏྠངྒཏོ, ན སཀྐཱ བྷགཝཱ ནིདསྶེཏུཾ ‘ཨིདྷ ཝཱ ཨིདྷ ཝཱ’ ཏི, དྷམྨཀཱཡེན པན ཁོ, མཧཱརཱཛ, སཀྐཱ བྷགཝཱ ནིདསྶེཏུཾ། དྷམྨོ ཧི, མཧཱརཱཛ, བྷགཝཏཱ དེསིཏོ’’ཏི།
‘‘Opammaṃ karohī’’ti. ‘‘Taṃ kiṃ maññasi, mahārāja, mahato aggikkhandhassa jalamānassa yā acci atthaṅgatā, sakkā sā acci dassetuṃ ‘idha vā idha vā’’’ti? ‘‘Na hi, bhante, niruddhā sā acci appaññattiṃ gatā’’ti. ‘‘Evameva kho, mahārāja, bhagavā anupādisesāya nibbānadhātuyā parinibbuto atthaṅgato, na sakkā bhagavā nidassetuṃ ‘idha vā idha vā’ ti, dhammakāyena pana kho, mahārāja, sakkā bhagavā nidassetuṃ. Dhammo hi, mahārāja, bhagavatā desito’’ti.
‘‘ཀལློསི, བྷནྟེ ནཱགསེནཱ’’ཏི།
‘‘Kallosi, bhante nāgasenā’’ti.
བུདྡྷནིདསྶནཔཉྷོ དསམོ།
Buddhanidassanapañho dasamo.
བུདྡྷཝགྒོ པཉྩམོ།
Buddhavaggo pañcamo.
ཨིམསྨིཾ ཝགྒེ དས པཉྷཱ།
Imasmiṃ vagge dasa pañhā.
