| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༧. བུདྡྷཔཱུཛནཔཉྷོ
7. Buddhapūjanapañho
༧. ‘‘བྷནྟེ ནཱགསེན, བྷཱསིཏམྤེཏཾ ཏཐཱགཏེན ‘ཨབྱཱཝཊཱ ཏུམྷེ, ཨཱནནྡ, ཧོཐ ཏཐཱགཏསྶ སརཱིརཔཱུཛཱཡཱ’ཏི། པུན ཙ བྷཎིཏཾ –
7. ‘‘Bhante nāgasena, bhāsitampetaṃ tathāgatena ‘abyāvaṭā tumhe, ānanda, hotha tathāgatassa sarīrapūjāyā’ti. Puna ca bhaṇitaṃ –
‘‘‘པཱུཛེཐ ནཾ པཱུཛནིཡསྶ དྷཱཏུཾ།
‘‘‘Pūjetha naṃ pūjaniyassa dhātuṃ;
ཨེཝཾ ཀརཱ སགྒམིཏོ གམིསྶཐཱ’ཏི༎
Evaṃ karā saggamito gamissathā’ti.
‘‘ཡདི, བྷནྟེ ནཱགསེན, ཏཐཱགཏེན བྷཎིཏཾ ‘ཨབྱཱཝཊཱ ཏུམྷེ, ཨཱནནྡ, ཧོཐ ཏཐཱགཏསྶ སརཱིརཔཱུཛཱཡཱ’ཏི, ཏེན ཧི ‘པཱུཛེཐ ནཾ པཱུཛནིཡསྶ དྷཱཏུཾ, ཨེཝཾ ཀརཱ སགྒམིཏོ གམིསྶཐཱ’ཏི ཡཾ ཝཙནཾ, ཏཾ མིཙྪཱ། ཡདི ཏཐཱགཏེན བྷཎིཏཾ ‘པཱུཛེཐ ནཾ པཱུཛནིཡསྶ དྷཱཏུཾ, ཨེཝཾ ཀརཱ སགྒམིཏོ གམིསྶཐཱ’ཏི, ཏེན ཧི ‘ཨབྱཱཝཊཱ ཏུམྷེ ཨཱནནྡ, ཧོཐ ཏཐཱགཏསྶ སརཱིརཔཱུཛཱཡཱ’ཏི ཏམྤི ཝཙནཾ མིཙྪཱ། ཨཡམྤི ཨུབྷཏོ ཀོཊིཀོ པཉྷོ ཏཝཱནུཔྤཏྟོ, སོ ཏཡཱ ནིབྦཱཧིཏབྦོ’’ཏི།
‘‘Yadi, bhante nāgasena, tathāgatena bhaṇitaṃ ‘abyāvaṭā tumhe, ānanda, hotha tathāgatassa sarīrapūjāyā’ti, tena hi ‘pūjetha naṃ pūjaniyassa dhātuṃ, evaṃ karā saggamito gamissathā’ti yaṃ vacanaṃ, taṃ micchā. Yadi tathāgatena bhaṇitaṃ ‘pūjetha naṃ pūjaniyassa dhātuṃ, evaṃ karā saggamito gamissathā’ti, tena hi ‘abyāvaṭā tumhe ānanda, hotha tathāgatassa sarīrapūjāyā’ti tampi vacanaṃ micchā. Ayampi ubhato koṭiko pañho tavānuppatto, so tayā nibbāhitabbo’’ti.
‘‘བྷཱསིཏམྤེཏཾ, མཧཱརཱཛ, བྷགཝཏཱ ‘ཨབྱཱཝཊཱ ཏུམྷེ, ཨཱནནྡ, ཧོཐ ཏཐཱགཏསྶ སརཱིརཔཱུཛཱཡཱ’ཏི, པུན ཙ བྷཎིཏཾ ‘པཱུཛེཐ ནཾ པཱུཛནིཡསྶ དྷཱཏུཾ, ཨེཝཾ ཀརཱ སགྒམིཏོ གམིསྶཐཱ’ཏི, ཏཉྩ པན ན སབྦེསཾ ཛིནཔུཏྟཱནཾ ཡེཝ ཨཱརབྦྷ བྷཎིཏཾ ‘ཨབྱཱཝཊཱ ཏུམྷེ, ཨཱནནྡ, ཧོཐ ཏཐཱགཏསྶ སརཱིརཔཱུཛཱཡཱ’ཏི། ཨཀམྨཾ ཧེཏཾ, མཧཱརཱཛ, ཛིནཔུཏྟཱནཾ ཡདིདཾ པཱུཛཱ, སམྨསནཾ སངྑཱརཱནཾ, ཡོནིསོ མནསིཀཱརོ, སཏིཔཊྛཱནཱནུཔསྶནཱ, ཨཱརམྨཎསཱརགྒཱཧོ, ཀིལེསཡུདྡྷཾ, སདཏྠམནུཡུཉྫནཱ, ཨེཏཾ ཛིནཔུཏྟཱནཾ ཀརཎཱིཡཾ, ཨཝསེསཱནཾ དེཝམནུསྶཱནཾ པཱུཛཱ ཀརཎཱིཡཱ།
‘‘Bhāsitampetaṃ, mahārāja, bhagavatā ‘abyāvaṭā tumhe, ānanda, hotha tathāgatassa sarīrapūjāyā’ti, puna ca bhaṇitaṃ ‘pūjetha naṃ pūjaniyassa dhātuṃ, evaṃ karā saggamito gamissathā’ti, tañca pana na sabbesaṃ jinaputtānaṃ yeva ārabbha bhaṇitaṃ ‘abyāvaṭā tumhe, ānanda, hotha tathāgatassa sarīrapūjāyā’ti. Akammaṃ hetaṃ, mahārāja, jinaputtānaṃ yadidaṃ pūjā, sammasanaṃ saṅkhārānaṃ, yoniso manasikāro, satipaṭṭhānānupassanā, ārammaṇasāraggāho, kilesayuddhaṃ, sadatthamanuyuñjanā, etaṃ jinaputtānaṃ karaṇīyaṃ, avasesānaṃ devamanussānaṃ pūjā karaṇīyā.
‘‘ཡཐཱ, མཧཱརཱཛ, མཧིཡཱ རཱཛཔུཏྟཱནཾ ཧཏྠིཨསྶརཐདྷནུཐརུལེཁམུདྡཱསིཀྑཱཁགྒམནྟསུཏི- སམྨུཏིཡུདྡྷཡུཛ྄ཛྷཱཔནཀིརིཡཱ ཀརཎཱིཡཱ, ཨཝསེསཱནཾ པུཐུཝེསྶསུདྡཱནཾ ཀསི ཝཎིཛྫཱ གོརཀྑཱ ཀརཎཱིཡཱ, ཨེཝམེཝ ཁོ, མཧཱརཱཛ, ཨཀམྨཾ ཧེཏཾ ཛིནཔུཏྟཱནཾ ཡདིདཾ པཱུཛཱ, སམྨསནཾ སངྑཱརཱནཾ, ཡོནིསོ མནསིཀཱརོ, སཏིཔཊྛཱནཱནུཔསྶནཱ, ཨཱརམྨཎསཱརགྒཱཧོ, ཀིལེསཡུདྡྷཾ, སདཏྠམནུཡུཉྫནཱ, ཨེཏཾ ཛིནཔུཏྟཱནཾ ཀརཎཱིཡཾ, ཨཝསེསཱནཾ དེཝམནུསྶཱནཾ པཱུཛཱ ཀརཎཱིཡཱ།
‘‘Yathā, mahārāja, mahiyā rājaputtānaṃ hatthiassarathadhanutharulekhamuddāsikkhākhaggamantasuti- sammutiyuddhayujjhāpanakiriyā karaṇīyā, avasesānaṃ puthuvessasuddānaṃ kasi vaṇijjā gorakkhā karaṇīyā, evameva kho, mahārāja, akammaṃ hetaṃ jinaputtānaṃ yadidaṃ pūjā, sammasanaṃ saṅkhārānaṃ, yoniso manasikāro, satipaṭṭhānānupassanā, ārammaṇasāraggāho, kilesayuddhaṃ, sadatthamanuyuñjanā, etaṃ jinaputtānaṃ karaṇīyaṃ, avasesānaṃ devamanussānaṃ pūjā karaṇīyā.
‘‘ཡཐཱ ཝཱ པན, མཧཱརཱཛ, བྲཱཧྨཎམཱཎཝཀཱནཾ ཨིརུཝེདཾ ཡཛུཝེདཾ སཱམཝེདཾ ཨཐབྦཎཝེདཾ ལཀྑཎཾ ཨིཏིཧཱསཾ པུརཱཎཾ ནིགྷཎྜུ ཀེཊུབྷཾ ཨཀྑརཔྤབྷེདཾ པདཾ ཝེཡྻཱཀརཎཾ བྷཱསམགྒཾ ཨུཔྤཱཏཾ སུཔིནཾ ནིམིཏྟཾ ཚལ༹ངྒཾ ཙནྡགྒཱཧཾ སཱུརིཡགྒཱཧཾ སུཀྐརཱཧུཙརིཏཾ ཨུལུ༹གྒཧཡུདྡྷཾ 1 དེཝདུནྡུབྷིསྶརཾ ཨོཀྐནྟི ཨུཀྐཱཔཱཏཾ བྷཱུམིཀམྨཾ 2 དིསཱདཱཧཾ བྷུམྨནྟལིཀྑཾ ཛོཏིསཾ ལོཀཱཡཏིཀཾ སཱཙཀྐཾ མིགཙཀྐཾ ཨནྟརཙཀྐཾ མིསྶཀུཔྤཱདཾ སཀུཎརུཏརཝིཏཾ 3 སིཀྑཱ ཀརཎཱིཡཱ, ཨཝསེསཱནཾ པུཐུཝེསྶསུདྡཱནཾ ཀསི ཝཎིཛྫཱ གོརཀྑཱ ཀརཎཱིཡཱ, ཨེཝམེཝ ཁོ, མཧཱརཱཛ, ཨཀམྨཾ ཧེཏཾ ཛིནཔུཏྟཱནཾ ཡདིདཾ པཱུཛཱ, སམྨསནཾ སངྑཱརཱནཾ, ཡོནིསོ མནསིཀཱརོ, སཏིཔཊྛཱནཱནུཔསྶནཱ, ཨཱརམྨཎསཱརགྒཱཧོ, ཀིལེསཡུདྡྷཾ, སདཏྠམནུཡུཉྫནཱ, ཨེཏཾ ཛིནཔུཏྟཱནཾ ཀརཎཱིཡཾ, ཨཝསེསཱནཾ དེཝམནུསྶཱནཾ པཱུཛཱ ཀརཎཱིཡཱ, ཏསྨཱ, མཧཱརཱཛ, ཏཐཱགཏོ ‘མཱ ཨིམེ ཨཀམྨེ ཡུཉྫནྟུ, ཀམྨེ ཨིམེ ཡུཉྫནྟཱུ’ཏི ཨཱཧ ‘ཨབྱཱཝཊཱ ཏུམྷེ, ཨཱནནྡ, ཧོཐ ཏཐཱགཏསྶ སརཱིརཔཱུཛཱཡཱ’ཏི། ཡདེཏཾ, མཧཱརཱཛ, ཏཐཱགཏོ ན བྷཎེཡྻ, པཏྟཙཱིཝརམྤི ཨཏྟནོ པརིཡཱདཱཔེཏྭཱ བྷིཀྑཱུ བུདྡྷཔཱུཛཾ ཡེཝ ཀརེཡྻུ’’ནྟི། ‘‘སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱི’’ཏི།
‘‘Yathā vā pana, mahārāja, brāhmaṇamāṇavakānaṃ iruvedaṃ yajuvedaṃ sāmavedaṃ athabbaṇavedaṃ lakkhaṇaṃ itihāsaṃ purāṇaṃ nighaṇḍu keṭubhaṃ akkharappabhedaṃ padaṃ veyyākaraṇaṃ bhāsamaggaṃ uppātaṃ supinaṃ nimittaṃ chaḷaṅgaṃ candaggāhaṃ sūriyaggāhaṃ sukkarāhucaritaṃ uḷuggahayuddhaṃ 4 devadundubhissaraṃ okkanti ukkāpātaṃ bhūmikammaṃ 5 disādāhaṃ bhummantalikkhaṃ jotisaṃ lokāyatikaṃ sācakkaṃ migacakkaṃ antaracakkaṃ missakuppādaṃ sakuṇarutaravitaṃ 6 sikkhā karaṇīyā, avasesānaṃ puthuvessasuddānaṃ kasi vaṇijjā gorakkhā karaṇīyā, evameva kho, mahārāja, akammaṃ hetaṃ jinaputtānaṃ yadidaṃ pūjā, sammasanaṃ saṅkhārānaṃ, yoniso manasikāro, satipaṭṭhānānupassanā, ārammaṇasāraggāho, kilesayuddhaṃ, sadatthamanuyuñjanā, etaṃ jinaputtānaṃ karaṇīyaṃ, avasesānaṃ devamanussānaṃ pūjā karaṇīyā, tasmā, mahārāja, tathāgato ‘mā ime akamme yuñjantu, kamme ime yuñjantū’ti āha ‘abyāvaṭā tumhe, ānanda, hotha tathāgatassa sarīrapūjāyā’ti. Yadetaṃ, mahārāja, tathāgato na bhaṇeyya, pattacīvarampi attano pariyādāpetvā bhikkhū buddhapūjaṃ yeva kareyyu’’nti. ‘‘Sādhu, bhante nāgasena, evametaṃ tathā sampaṭicchāmī’’ti.
བུདྡྷཔཱུཛནཔཉྷོ སཏྟམོ།
Buddhapūjanapañho sattamo.
Footnotes:
