| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
10. பு³த்³த⁴ஸப்³ப³ஞ்ஞுபா⁴வபஞ்ஹோ
10. Buddhasabbaññubhāvapañho
10. ‘‘ப⁴ந்தே நாக³ஸேன, தும்ஹே ப⁴ணத² ‘ததா²க³தோ ஸப்³ப³ஞ்ஞூ’தி. புன ச ப⁴ணத² ‘ததா²க³தேன ஸாரிபுத்தமொக்³க³ல்லானப்பமுகே² பி⁴க்கு²ஸங்கே⁴ பணாமிதே சாதுமெய்யகா ச ஸக்யா ப்³ரஹ்மா ச ஸஹம்பதி பீ³ஜூபமஞ்ச வச்ச²தருணூபமஞ்ச உபத³ஸ்ஸெத்வா ப⁴க³வந்தங் பஸாதே³ஸுங் க²மாபேஸுங் நிஜ்ஜ²த்தங் அகங்ஸூ’தி. கிங் நு கோ², ப⁴ந்தே நாக³ஸேன, அஞ்ஞாதா தா உபமா ததா²க³தஸ்ஸ, யாஹி ததா²க³தோ உபமாஹி ஓரதோ க²மிதோ உபஸந்தோ நிஜ்ஜ²த்தங் க³தோ? யதி³, ப⁴ந்தே நாக³ஸேன, ததா²க³தஸ்ஸ தா உபமா அஞ்ஞாதா, தேன ஹி பு³த்³தோ⁴ அஸப்³ப³ஞ்ஞூ, யதி³ ஞாதா, தேன ஹி ஓகஸ்ஸ பஸய்ஹ வீமங்ஸாபெக்கோ² பணாமேஸி, தேன ஹி தஸ்ஸ அகாருஞ்ஞதா ஸம்ப⁴வதி. அயம்பி உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
10. ‘‘Bhante nāgasena, tumhe bhaṇatha ‘tathāgato sabbaññū’ti. Puna ca bhaṇatha ‘tathāgatena sāriputtamoggallānappamukhe bhikkhusaṅghe paṇāmite cātumeyyakā ca sakyā brahmā ca sahampati bījūpamañca vacchataruṇūpamañca upadassetvā bhagavantaṃ pasādesuṃ khamāpesuṃ nijjhattaṃ akaṃsū’ti. Kiṃ nu kho, bhante nāgasena, aññātā tā upamā tathāgatassa, yāhi tathāgato upamāhi orato khamito upasanto nijjhattaṃ gato? Yadi, bhante nāgasena, tathāgatassa tā upamā aññātā, tena hi buddho asabbaññū, yadi ñātā, tena hi okassa pasayha vīmaṃsāpekkho paṇāmesi, tena hi tassa akāruññatā sambhavati. Ayampi ubhato koṭiko pañho tavānuppatto, so tayā nibbāhitabbo’’ti.
‘‘ஸப்³ப³ஞ்ஞூ, மஹாராஜ, ததா²க³தோ, தாஹி ச உபமாஹி ப⁴க³வா பஸன்னோ ஓரதோ க²மிதோ உபஸந்தோ நிஜ்ஜ²த்தங் க³தோ. த⁴ம்மஸ்ஸாமீ, மஹாராஜ, ததா²க³தோ, ததா²க³தப்பவேதி³தேஹேவ தே ஓபம்மேஹி ததா²க³தங் ஆராதே⁴ஸுங் தோஸேஸுங் பஸாதே³ஸுங், தேஸஞ்ச ததா²க³தோ பஸன்னோ ‘ஸாதூ⁴’தி அப்³பா⁴னுமோதி³.
‘‘Sabbaññū, mahārāja, tathāgato, tāhi ca upamāhi bhagavā pasanno orato khamito upasanto nijjhattaṃ gato. Dhammassāmī, mahārāja, tathāgato, tathāgatappavediteheva te opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘யதா², மஹாராஜ, இத்தீ² ஸாமிகஸ்ஸ ஸந்தகேனேவ த⁴னேன ஸாமிகங் ஆராதே⁴தி தோஸேதி பஸாதே³தி, தஞ்ச ஸாமிகோ ‘ஸாதூ⁴’தி அப்³பா⁴னுமோத³தி, ஏவமேவ கோ², மஹாராஜ, சாதுமெய்யகா ச ஸக்யா ப்³ரஹ்மா ச ஸஹம்பதி ததா²க³தப்பவேதி³தேஹேவ ஓபம்மேஹி ததா²க³தங் ஆராதே⁴ஸுங் தோஸேஸுங் பஸாதே³ஸுங், தேஸஞ்ச ததா²க³தோ பஸன்னோ ‘ஸாதூ⁴’தி அப்³பா⁴னுமோதி³.
‘‘Yathā, mahārāja, itthī sāmikassa santakeneva dhanena sāmikaṃ ārādheti toseti pasādeti, tañca sāmiko ‘sādhū’ti abbhānumodati, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘யதா² வா பன, மஹாராஜ, கப்பகோ ரஞ்ஞோ ஸந்தகேனேவ ஸுவண்ணப²ணகேன ரஞ்ஞோ உத்தமங்க³ங் பஸாத⁴யமானோ ராஜானங் ஆராதே⁴தி தோஸேதி பஸாதே³தி, தஸ்ஸ ச ராஜா பஸன்னோ ‘ஸாதூ⁴’தி அப்³பா⁴னுமோத³தி, யதி²ச்சி²தமனுப்பதே³தி, ஏவமேவ கோ², மஹாராஜ, சாதுமெய்யகா ச ஸக்யா ப்³ரஹ்மா ச ஸஹம்பதி ததா²க³தப்பவேதி³தேஹேவ ஓபம்மேஹி ததா²க³தங் ஆராதே⁴ஸுங் தோஸேஸுங் பஸாதே³ஸுங், தேஸஞ்ச ததா²க³தோ பஸன்னோ ‘ஸாதூ⁴’தி அப்³பா⁴னுமோதி³.
‘‘Yathā vā pana, mahārāja, kappako rañño santakeneva suvaṇṇaphaṇakena rañño uttamaṅgaṃ pasādhayamāno rājānaṃ ārādheti toseti pasādeti, tassa ca rājā pasanno ‘sādhū’ti abbhānumodati, yathicchitamanuppadeti, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘யதா² வா பன, மஹாராஜ, ஸத்³தி⁴விஹாரிகோ உபஜ்ஜா²யாப⁴தங் பிண்ட³பாதங் க³ஹெத்வா உபஜ்ஜா²யஸ்ஸ உபனாமெந்தோ உபஜ்ஜா²யங் ஆராதே⁴தி தோஸேதி பஸாதே³தி, தஞ்ச உபஜ்ஜா²யோ பஸன்னோ ‘ஸாதூ⁴’தி அப்³பா⁴னுமோத³தி, ஏவமேவ கோ², மஹாராஜ, சாதுமெய்யகா ச ஸக்யா ப்³ரஹ்மா ச ஸஹம்பதி ததா²க³தப்பவேதி³தேஹேவ ஓபம்மேஹி ததா²க³தங் ஆராதே⁴ஸுங் தோஸேஸுங் பஸாதே³ஸுங், தேஸஞ்ச ததா²க³தோ பஸன்னோ ‘ஸாதூ⁴’தி அப்³பா⁴னுமோதி³த்வா ஸப்³ப³து³க்க²பரிமுத்தியா த⁴ம்மங் தே³ஸேஸீ’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீதி.
‘‘Yathā vā pana, mahārāja, saddhivihāriko upajjhāyābhataṃ piṇḍapātaṃ gahetvā upajjhāyassa upanāmento upajjhāyaṃ ārādheti toseti pasādeti, tañca upajjhāyo pasanno ‘sādhū’ti abbhānumodati, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumoditvā sabbadukkhaparimuttiyā dhammaṃ desesī’’ti. ‘‘Sādhu, bhante nāgasena, evametaṃ tathā sampaṭicchāmīti.
பு³த்³த⁴ஸப்³ப³ஞ்ஞுபா⁴வபஞ்ஹோ த³ஸமோ.
Buddhasabbaññubhāvapañho dasamo.
ஸப்³ப³ஞ்ஞுதஞாணவக்³கோ³ சதுத்தோ².
Sabbaññutañāṇavaggo catuttho.
இமஸ்மிங் வக்³கே³ த³ஸ பஞ்ஹா.
Imasmiṃ vagge dasa pañhā.
