| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
10. බුද්‌ධසබ්‌බඤ්‌ඤුභාවපඤ්‌හො
10. Buddhasabbaññubhāvapañho
10. ‘‘භන්‌තෙ නාගසෙන, තුම්‌හෙ භණථ ‘තථාගතො සබ්‌බඤ්‌ඤූ’ති. පුන ච භණථ ‘තථාගතෙන සාරිපුත්‌තමොග්‌ගල්‌ලානප්‌පමුඛෙ භික්‌ඛුසඞ්‌ඝෙ පණාමිතෙ චාතුමෙය්‍යකා ච සක්‍යා බ්‍රහ්‌මා ච සහම්‌පති බීජූපමඤ්‌ච වච්‌ඡතරුණූපමඤ්‌ච උපදස්‌සෙත්‌වා භගවන්‌තං පසාදෙසුං ඛමාපෙසුං නිජ්‌ඣත්‌තං අකංසූ’ති. කිං නු ඛො, භන්‌තෙ නාගසෙන, අඤ්‌ඤාතා තා උපමා තථාගතස්‌ස, යාහි තථාගතො උපමාහි ඔරතො ඛමිතො උපසන්‌තො නිජ්‌ඣත්‌තං ගතො? යදි, භන්‌තෙ නාගසෙන, තථාගතස්‌ස තා උපමා අඤ්‌ඤාතා, තෙන හි බුද්‌ධො අසබ්‌බඤ්‌ඤූ, යදි ඤාතා, තෙන හි ඔකස්‌ස පසය්‌හ වීමංසාපෙක්‌ඛො පණාමෙසි, තෙන හි තස්‌ස අකාරුඤ්‌ඤතා සම්‌භවති. අයම්‌පි උභතො කොටිකො පඤ්‌හො තවානුප්‌පත්‌තො, සො තයා නිබ්‌බාහිතබ්‌බො’’ති.
10. ‘‘Bhante nāgasena, tumhe bhaṇatha ‘tathāgato sabbaññū’ti. Puna ca bhaṇatha ‘tathāgatena sāriputtamoggallānappamukhe bhikkhusaṅghe paṇāmite cātumeyyakā ca sakyā brahmā ca sahampati bījūpamañca vacchataruṇūpamañca upadassetvā bhagavantaṃ pasādesuṃ khamāpesuṃ nijjhattaṃ akaṃsū’ti. Kiṃ nu kho, bhante nāgasena, aññātā tā upamā tathāgatassa, yāhi tathāgato upamāhi orato khamito upasanto nijjhattaṃ gato? Yadi, bhante nāgasena, tathāgatassa tā upamā aññātā, tena hi buddho asabbaññū, yadi ñātā, tena hi okassa pasayha vīmaṃsāpekkho paṇāmesi, tena hi tassa akāruññatā sambhavati. Ayampi ubhato koṭiko pañho tavānuppatto, so tayā nibbāhitabbo’’ti.
‘‘සබ්‌බඤ්‌ඤූ, මහාරාජ, තථාගතො, තාහි ච උපමාහි භගවා පසන්‌නො ඔරතො ඛමිතො උපසන්‌තො නිජ්‌ඣත්‌තං ගතො. ධම්‌මස්‌සාමී, මහාරාජ, තථාගතො, තථාගතප්‌පවෙදිතෙහෙව තෙ ඔපම්‌මෙහි තථාගතං ආරාධෙසුං තොසෙසුං පසාදෙසුං, තෙසඤ්‌ච තථාගතො පසන්‌නො ‘සාධූ’ති අබ්‌භානුමොදි.
‘‘Sabbaññū, mahārāja, tathāgato, tāhi ca upamāhi bhagavā pasanno orato khamito upasanto nijjhattaṃ gato. Dhammassāmī, mahārāja, tathāgato, tathāgatappavediteheva te opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘යථා, මහාරාජ, ඉත්‌ථී සාමිකස්‌ස සන්‌තකෙනෙව ධනෙන සාමිකං ආරාධෙති තොසෙති පසාදෙති, තඤ්‌ච සාමිකො ‘සාධූ’ති අබ්‌භානුමොදති, එවමෙව ඛො, මහාරාජ, චාතුමෙය්‍යකා ච සක්‍යා බ්‍රහ්‌මා ච සහම්‌පති තථාගතප්‌පවෙදිතෙහෙව ඔපම්‌මෙහි තථාගතං ආරාධෙසුං තොසෙසුං පසාදෙසුං, තෙසඤ්‌ච තථාගතො පසන්‌නො ‘සාධූ’ති අබ්‌භානුමොදි.
‘‘Yathā, mahārāja, itthī sāmikassa santakeneva dhanena sāmikaṃ ārādheti toseti pasādeti, tañca sāmiko ‘sādhū’ti abbhānumodati, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘යථා වා පන, මහාරාජ, කප්‌පකො රඤ්‌ඤො සන්‌තකෙනෙව සුවණ්‌ණඵණකෙන රඤ්‌ඤො උත්‌තමඞ්‌ගං පසාධයමානො රාජානං ආරාධෙති තොසෙති පසාදෙති, තස්‌ස ච රාජා පසන්‌නො ‘සාධූ’ති අබ්‌භානුමොදති, යථිච්‌ඡිතමනුප්‌පදෙති, එවමෙව ඛො, මහාරාජ, චාතුමෙය්‍යකා ච සක්‍යා බ්‍රහ්‌මා ච සහම්‌පති තථාගතප්‌පවෙදිතෙහෙව ඔපම්‌මෙහි තථාගතං ආරාධෙසුං තොසෙසුං පසාදෙසුං, තෙසඤ්‌ච තථාගතො පසන්‌නො ‘සාධූ’ති අබ්‌භානුමොදි.
‘‘Yathā vā pana, mahārāja, kappako rañño santakeneva suvaṇṇaphaṇakena rañño uttamaṅgaṃ pasādhayamāno rājānaṃ ārādheti toseti pasādeti, tassa ca rājā pasanno ‘sādhū’ti abbhānumodati, yathicchitamanuppadeti, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘යථා වා පන, මහාරාජ, සද්‌ධිවිහාරිකො උපජ්‌ඣායාභතං පිණ්‌ඩපාතං ගහෙත්‌වා උපජ්‌ඣායස්‌ස උපනාමෙන්‌තො උපජ්‌ඣායං ආරාධෙති තොසෙති පසාදෙති, තඤ්‌ච උපජ්‌ඣායො පසන්‌නො ‘සාධූ’ති අබ්‌භානුමොදති, එවමෙව ඛො, මහාරාජ, චාතුමෙය්‍යකා ච සක්‍යා බ්‍රහ්‌මා ච සහම්‌පති තථාගතප්‌පවෙදිතෙහෙව ඔපම්‌මෙහි තථාගතං ආරාධෙසුං තොසෙසුං පසාදෙසුං, තෙසඤ්‌ච තථාගතො පසන්‌නො ‘සාධූ’ති අබ්‌භානුමොදිත්‌වා සබ්‌බදුක්‌ඛපරිමුත්‌තියා ධම්‌මං දෙසෙසී’’ති. ‘‘සාධු, භන්‌තෙ නාගසෙන, එවමෙතං තථා සම්‌පටිච්‌ඡාමීති.
‘‘Yathā vā pana, mahārāja, saddhivihāriko upajjhāyābhataṃ piṇḍapātaṃ gahetvā upajjhāyassa upanāmento upajjhāyaṃ ārādheti toseti pasādeti, tañca upajjhāyo pasanno ‘sādhū’ti abbhānumodati, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumoditvā sabbadukkhaparimuttiyā dhammaṃ desesī’’ti. ‘‘Sādhu, bhante nāgasena, evametaṃ tathā sampaṭicchāmīti.
බුද්‌ධසබ්‌බඤ්‌ඤුභාවපඤ්‌හො දසමො.
Buddhasabbaññubhāvapañho dasamo.
සබ්‌බඤ්‌ඤුතඤාණවග්‌ගො චතුත්‌ථො.
Sabbaññutañāṇavaggo catuttho.
ඉමස්‌මිං වග්‌ගෙ දස පඤ්‌හා.
Imasmiṃ vagge dasa pañhā.
