| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༡༠. བུདྡྷསབྦཉྙུབྷཱཝཔཉྷོ
10. Buddhasabbaññubhāvapañho
༡༠. ‘‘བྷནྟེ ནཱགསེན, ཏུམྷེ བྷཎཐ ‘ཏཐཱགཏོ སབྦཉྙཱུ’ཏི། པུན ཙ བྷཎཐ ‘ཏཐཱགཏེན སཱརིཔུཏྟམོགྒལླཱནཔྤམུཁེ བྷིཀྑུསངྒྷེ པཎཱམིཏེ ཙཱཏུམེཡྻཀཱ ཙ སཀྱཱ བྲཧྨཱ ཙ སཧམྤཏི བཱིཛཱུཔམཉྩ ཝཙྪཏརུཎཱུཔམཉྩ ཨུཔདསྶེཏྭཱ བྷགཝནྟཾ པསཱདེསུཾ ཁམཱཔེསུཾ ནིཛ྄ཛྷཏྟཾ ཨཀཾསཱུ’ཏི། ཀིཾ ནུ ཁོ, བྷནྟེ ནཱགསེན, ཨཉྙཱཏཱ ཏཱ ཨུཔམཱ ཏཐཱགཏསྶ, ཡཱཧི ཏཐཱགཏོ ཨུཔམཱཧི ཨོརཏོ ཁམིཏོ ཨུཔསནྟོ ནིཛ྄ཛྷཏྟཾ གཏོ? ཡདི, བྷནྟེ ནཱགསེན, ཏཐཱགཏསྶ ཏཱ ཨུཔམཱ ཨཉྙཱཏཱ, ཏེན ཧི བུདྡྷོ ཨསབྦཉྙཱུ, ཡདི ཉཱཏཱ, ཏེན ཧི ཨོཀསྶ པསཡ྄ཧ ཝཱིམཾསཱཔེཀྑོ པཎཱམེསི, ཏེན ཧི ཏསྶ ཨཀཱརུཉྙཏཱ སམྦྷཝཏི། ཨཡམྤི ཨུབྷཏོ ཀོཊིཀོ པཉྷོ ཏཝཱནུཔྤཏྟོ, སོ ཏཡཱ ནིབྦཱཧིཏབྦོ’’ཏི།
10. ‘‘Bhante nāgasena, tumhe bhaṇatha ‘tathāgato sabbaññū’ti. Puna ca bhaṇatha ‘tathāgatena sāriputtamoggallānappamukhe bhikkhusaṅghe paṇāmite cātumeyyakā ca sakyā brahmā ca sahampati bījūpamañca vacchataruṇūpamañca upadassetvā bhagavantaṃ pasādesuṃ khamāpesuṃ nijjhattaṃ akaṃsū’ti. Kiṃ nu kho, bhante nāgasena, aññātā tā upamā tathāgatassa, yāhi tathāgato upamāhi orato khamito upasanto nijjhattaṃ gato? Yadi, bhante nāgasena, tathāgatassa tā upamā aññātā, tena hi buddho asabbaññū, yadi ñātā, tena hi okassa pasayha vīmaṃsāpekkho paṇāmesi, tena hi tassa akāruññatā sambhavati. Ayampi ubhato koṭiko pañho tavānuppatto, so tayā nibbāhitabbo’’ti.
‘‘སབྦཉྙཱུ, མཧཱརཱཛ, ཏཐཱགཏོ, ཏཱཧི ཙ ཨུཔམཱཧི བྷགཝཱ པསནྣོ ཨོརཏོ ཁམིཏོ ཨུཔསནྟོ ནིཛ྄ཛྷཏྟཾ གཏོ། དྷམྨསྶཱམཱི, མཧཱརཱཛ, ཏཐཱགཏོ, ཏཐཱགཏཔྤཝེདིཏེཧེཝ ཏེ ཨོཔམྨེཧི ཏཐཱགཏཾ ཨཱརཱདྷེསུཾ ཏོསེསུཾ པསཱདེསུཾ, ཏེསཉྩ ཏཐཱགཏོ པསནྣོ ‘སཱདྷཱུ’ཏི ཨབྦྷཱནུམོདི།
‘‘Sabbaññū, mahārāja, tathāgato, tāhi ca upamāhi bhagavā pasanno orato khamito upasanto nijjhattaṃ gato. Dhammassāmī, mahārāja, tathāgato, tathāgatappavediteheva te opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘ཡཐཱ, མཧཱརཱཛ, ཨིཏྠཱི སཱམིཀསྶ སནྟཀེནེཝ དྷནེན སཱམིཀཾ ཨཱརཱདྷེཏི ཏོསེཏི པསཱདེཏི, ཏཉྩ སཱམིཀོ ‘སཱདྷཱུ’ཏི ཨབྦྷཱནུམོདཏི, ཨེཝམེཝ ཁོ, མཧཱརཱཛ, ཙཱཏུམེཡྻཀཱ ཙ སཀྱཱ བྲཧྨཱ ཙ སཧམྤཏི ཏཐཱགཏཔྤཝེདིཏེཧེཝ ཨོཔམྨེཧི ཏཐཱགཏཾ ཨཱརཱདྷེསུཾ ཏོསེསུཾ པསཱདེསུཾ, ཏེསཉྩ ཏཐཱགཏོ པསནྣོ ‘སཱདྷཱུ’ཏི ཨབྦྷཱནུམོདི།
‘‘Yathā, mahārāja, itthī sāmikassa santakeneva dhanena sāmikaṃ ārādheti toseti pasādeti, tañca sāmiko ‘sādhū’ti abbhānumodati, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘ཡཐཱ ཝཱ པན, མཧཱརཱཛ, ཀཔྤཀོ རཉྙོ སནྟཀེནེཝ སུཝཎྞཕཎཀེན རཉྙོ ཨུཏྟམངྒཾ པསཱདྷཡམཱནོ རཱཛཱནཾ ཨཱརཱདྷེཏི ཏོསེཏི པསཱདེཏི, ཏསྶ ཙ རཱཛཱ པསནྣོ ‘སཱདྷཱུ’ཏི ཨབྦྷཱནུམོདཏི, ཡཐིཙྪིཏམནུཔྤདེཏི, ཨེཝམེཝ ཁོ, མཧཱརཱཛ, ཙཱཏུམེཡྻཀཱ ཙ སཀྱཱ བྲཧྨཱ ཙ སཧམྤཏི ཏཐཱགཏཔྤཝེདིཏེཧེཝ ཨོཔམྨེཧི ཏཐཱགཏཾ ཨཱརཱདྷེསུཾ ཏོསེསུཾ པསཱདེསུཾ, ཏེསཉྩ ཏཐཱགཏོ པསནྣོ ‘སཱདྷཱུ’ཏི ཨབྦྷཱནུམོདི།
‘‘Yathā vā pana, mahārāja, kappako rañño santakeneva suvaṇṇaphaṇakena rañño uttamaṅgaṃ pasādhayamāno rājānaṃ ārādheti toseti pasādeti, tassa ca rājā pasanno ‘sādhū’ti abbhānumodati, yathicchitamanuppadeti, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘ཡཐཱ ཝཱ པན, མཧཱརཱཛ, སདྡྷིཝིཧཱརིཀོ ཨུཔཛ྄ཛྷཱཡཱབྷཏཾ པིཎྜཔཱཏཾ གཧེཏྭཱ ཨུཔཛ྄ཛྷཱཡསྶ ཨུཔནཱམེནྟོ ཨུཔཛ྄ཛྷཱཡཾ ཨཱརཱདྷེཏི ཏོསེཏི པསཱདེཏི, ཏཉྩ ཨུཔཛ྄ཛྷཱཡོ པསནྣོ ‘སཱདྷཱུ’ཏི ཨབྦྷཱནུམོདཏི, ཨེཝམེཝ ཁོ, མཧཱརཱཛ, ཙཱཏུམེཡྻཀཱ ཙ སཀྱཱ བྲཧྨཱ ཙ སཧམྤཏི ཏཐཱགཏཔྤཝེདིཏེཧེཝ ཨོཔམྨེཧི ཏཐཱགཏཾ ཨཱརཱདྷེསུཾ ཏོསེསུཾ པསཱདེསུཾ, ཏེསཉྩ ཏཐཱགཏོ པསནྣོ ‘སཱདྷཱུ’ཏི ཨབྦྷཱནུམོདིཏྭཱ སབྦདུཀྑཔརིམུཏྟིཡཱ དྷམྨཾ དེསེསཱི’’ཏི། ‘‘སཱདྷུ, བྷནྟེ ནཱགསེན, ཨེཝམེཏཾ ཏཐཱ སམྤཊིཙྪཱམཱིཏི།
‘‘Yathā vā pana, mahārāja, saddhivihāriko upajjhāyābhataṃ piṇḍapātaṃ gahetvā upajjhāyassa upanāmento upajjhāyaṃ ārādheti toseti pasādeti, tañca upajjhāyo pasanno ‘sādhū’ti abbhānumodati, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumoditvā sabbadukkhaparimuttiyā dhammaṃ desesī’’ti. ‘‘Sādhu, bhante nāgasena, evametaṃ tathā sampaṭicchāmīti.
བུདྡྷསབྦཉྙུབྷཱཝཔཉྷོ དསམོ།
Buddhasabbaññubhāvapañho dasamo.
སབྦཉྙུཏཉཱཎཝགྒོ ཙཏུཏྠོ།
Sabbaññutañāṇavaggo catuttho.
ཨིམསྨིཾ ཝགྒེ དས པཉྷཱ།
Imasmiṃ vagge dasa pañhā.
