| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੧੦. ਬੁਦ੍ਧਸਬ੍ਬਞ੍ਞੁਭਾવਪਞ੍ਹੋ
10. Buddhasabbaññubhāvapañho
੧੦. ‘‘ਭਨ੍ਤੇ ਨਾਗਸੇਨ, ਤੁਮ੍ਹੇ ਭਣਥ ‘ਤਥਾਗਤੋ ਸਬ੍ਬਞ੍ਞੂ’ਤਿ। ਪੁਨ ਚ ਭਣਥ ‘ਤਥਾਗਤੇਨ ਸਾਰਿਪੁਤ੍ਤਮੋਗ੍ਗਲ੍ਲਾਨਪ੍ਪਮੁਖੇ ਭਿਕ੍ਖੁਸਙ੍ਘੇ ਪਣਾਮਿਤੇ ਚਾਤੁਮੇਯ੍ਯਕਾ ਚ ਸਕ੍ਯਾ ਬ੍ਰਹ੍ਮਾ ਚ ਸਹਮ੍ਪਤਿ ਬੀਜੂਪਮਞ੍ਚ વਚ੍ਛਤਰੁਣੂਪਮਞ੍ਚ ਉਪਦਸ੍ਸੇਤ੍વਾ ਭਗવਨ੍ਤਂ ਪਸਾਦੇਸੁਂ ਖਮਾਪੇਸੁਂ ਨਿਜ੍ਝਤ੍ਤਂ ਅਕਂਸੂ’ਤਿ। ਕਿਂ ਨੁ ਖੋ, ਭਨ੍ਤੇ ਨਾਗਸੇਨ, ਅਞ੍ਞਾਤਾ ਤਾ ਉਪਮਾ ਤਥਾਗਤਸ੍ਸ, ਯਾਹਿ ਤਥਾਗਤੋ ਉਪਮਾਹਿ ਓਰਤੋ ਖਮਿਤੋ ਉਪਸਨ੍ਤੋ ਨਿਜ੍ਝਤ੍ਤਂ ਗਤੋ? ਯਦਿ, ਭਨ੍ਤੇ ਨਾਗਸੇਨ, ਤਥਾਗਤਸ੍ਸ ਤਾ ਉਪਮਾ ਅਞ੍ਞਾਤਾ, ਤੇਨ ਹਿ ਬੁਦ੍ਧੋ ਅਸਬ੍ਬਞ੍ਞੂ, ਯਦਿ ਞਾਤਾ, ਤੇਨ ਹਿ ਓਕਸ੍ਸ ਪਸਯ੍ਹ વੀਮਂਸਾਪੇਕ੍ਖੋ ਪਣਾਮੇਸਿ, ਤੇਨ ਹਿ ਤਸ੍ਸ ਅਕਾਰੁਞ੍ਞਤਾ ਸਮ੍ਭવਤਿ। ਅਯਮ੍ਪਿ ਉਭਤੋ ਕੋਟਿਕੋ ਪਞ੍ਹੋ ਤવਾਨੁਪ੍ਪਤ੍ਤੋ, ਸੋ ਤਯਾ ਨਿਬ੍ਬਾਹਿਤਬ੍ਬੋ’’ਤਿ।
10. ‘‘Bhante nāgasena, tumhe bhaṇatha ‘tathāgato sabbaññū’ti. Puna ca bhaṇatha ‘tathāgatena sāriputtamoggallānappamukhe bhikkhusaṅghe paṇāmite cātumeyyakā ca sakyā brahmā ca sahampati bījūpamañca vacchataruṇūpamañca upadassetvā bhagavantaṃ pasādesuṃ khamāpesuṃ nijjhattaṃ akaṃsū’ti. Kiṃ nu kho, bhante nāgasena, aññātā tā upamā tathāgatassa, yāhi tathāgato upamāhi orato khamito upasanto nijjhattaṃ gato? Yadi, bhante nāgasena, tathāgatassa tā upamā aññātā, tena hi buddho asabbaññū, yadi ñātā, tena hi okassa pasayha vīmaṃsāpekkho paṇāmesi, tena hi tassa akāruññatā sambhavati. Ayampi ubhato koṭiko pañho tavānuppatto, so tayā nibbāhitabbo’’ti.
‘‘ਸਬ੍ਬਞ੍ਞੂ, ਮਹਾਰਾਜ, ਤਥਾਗਤੋ, ਤਾਹਿ ਚ ਉਪਮਾਹਿ ਭਗવਾ ਪਸਨ੍ਨੋ ਓਰਤੋ ਖਮਿਤੋ ਉਪਸਨ੍ਤੋ ਨਿਜ੍ਝਤ੍ਤਂ ਗਤੋ। ਧਮ੍ਮਸ੍ਸਾਮੀ, ਮਹਾਰਾਜ, ਤਥਾਗਤੋ, ਤਥਾਗਤਪ੍ਪવੇਦਿਤੇਹੇવ ਤੇ ਓਪਮ੍ਮੇਹਿ ਤਥਾਗਤਂ ਆਰਾਧੇਸੁਂ ਤੋਸੇਸੁਂ ਪਸਾਦੇਸੁਂ, ਤੇਸਞ੍ਚ ਤਥਾਗਤੋ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਿ।
‘‘Sabbaññū, mahārāja, tathāgato, tāhi ca upamāhi bhagavā pasanno orato khamito upasanto nijjhattaṃ gato. Dhammassāmī, mahārāja, tathāgato, tathāgatappavediteheva te opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘ਯਥਾ, ਮਹਾਰਾਜ, ਇਤ੍ਥੀ ਸਾਮਿਕਸ੍ਸ ਸਨ੍ਤਕੇਨੇવ ਧਨੇਨ ਸਾਮਿਕਂ ਆਰਾਧੇਤਿ ਤੋਸੇਤਿ ਪਸਾਦੇਤਿ, ਤਞ੍ਚ ਸਾਮਿਕੋ ‘ਸਾਧੂ’ਤਿ ਅਬ੍ਭਾਨੁਮੋਦਤਿ, ਏવਮੇવ ਖੋ, ਮਹਾਰਾਜ, ਚਾਤੁਮੇਯ੍ਯਕਾ ਚ ਸਕ੍ਯਾ ਬ੍ਰਹ੍ਮਾ ਚ ਸਹਮ੍ਪਤਿ ਤਥਾਗਤਪ੍ਪવੇਦਿਤੇਹੇવ ਓਪਮ੍ਮੇਹਿ ਤਥਾਗਤਂ ਆਰਾਧੇਸੁਂ ਤੋਸੇਸੁਂ ਪਸਾਦੇਸੁਂ, ਤੇਸਞ੍ਚ ਤਥਾਗਤੋ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਿ।
‘‘Yathā, mahārāja, itthī sāmikassa santakeneva dhanena sāmikaṃ ārādheti toseti pasādeti, tañca sāmiko ‘sādhū’ti abbhānumodati, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘ਯਥਾ વਾ ਪਨ, ਮਹਾਰਾਜ, ਕਪ੍ਪਕੋ ਰਞ੍ਞੋ ਸਨ੍ਤਕੇਨੇવ ਸੁવਣ੍ਣਫਣਕੇਨ ਰਞ੍ਞੋ ਉਤ੍ਤਮਙ੍ਗਂ ਪਸਾਧਯਮਾਨੋ ਰਾਜਾਨਂ ਆਰਾਧੇਤਿ ਤੋਸੇਤਿ ਪਸਾਦੇਤਿ, ਤਸ੍ਸ ਚ ਰਾਜਾ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਤਿ, ਯਥਿਚ੍ਛਿਤਮਨੁਪ੍ਪਦੇਤਿ, ਏવਮੇવ ਖੋ, ਮਹਾਰਾਜ, ਚਾਤੁਮੇਯ੍ਯਕਾ ਚ ਸਕ੍ਯਾ ਬ੍ਰਹ੍ਮਾ ਚ ਸਹਮ੍ਪਤਿ ਤਥਾਗਤਪ੍ਪવੇਦਿਤੇਹੇવ ਓਪਮ੍ਮੇਹਿ ਤਥਾਗਤਂ ਆਰਾਧੇਸੁਂ ਤੋਸੇਸੁਂ ਪਸਾਦੇਸੁਂ, ਤੇਸਞ੍ਚ ਤਥਾਗਤੋ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਿ।
‘‘Yathā vā pana, mahārāja, kappako rañño santakeneva suvaṇṇaphaṇakena rañño uttamaṅgaṃ pasādhayamāno rājānaṃ ārādheti toseti pasādeti, tassa ca rājā pasanno ‘sādhū’ti abbhānumodati, yathicchitamanuppadeti, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumodi.
‘‘ਯਥਾ વਾ ਪਨ, ਮਹਾਰਾਜ, ਸਦ੍ਧਿવਿਹਾਰਿਕੋ ਉਪਜ੍ਝਾਯਾਭਤਂ ਪਿਣ੍ਡਪਾਤਂ ਗਹੇਤ੍વਾ ਉਪਜ੍ਝਾਯਸ੍ਸ ਉਪਨਾਮੇਨ੍ਤੋ ਉਪਜ੍ਝਾਯਂ ਆਰਾਧੇਤਿ ਤੋਸੇਤਿ ਪਸਾਦੇਤਿ, ਤਞ੍ਚ ਉਪਜ੍ਝਾਯੋ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਤਿ, ਏવਮੇવ ਖੋ, ਮਹਾਰਾਜ, ਚਾਤੁਮੇਯ੍ਯਕਾ ਚ ਸਕ੍ਯਾ ਬ੍ਰਹ੍ਮਾ ਚ ਸਹਮ੍ਪਤਿ ਤਥਾਗਤਪ੍ਪવੇਦਿਤੇਹੇવ ਓਪਮ੍ਮੇਹਿ ਤਥਾਗਤਂ ਆਰਾਧੇਸੁਂ ਤੋਸੇਸੁਂ ਪਸਾਦੇਸੁਂ, ਤੇਸਞ੍ਚ ਤਥਾਗਤੋ ਪਸਨ੍ਨੋ ‘ਸਾਧੂ’ਤਿ ਅਬ੍ਭਾਨੁਮੋਦਿਤ੍વਾ ਸਬ੍ਬਦੁਕ੍ਖਪਰਿਮੁਤ੍ਤਿਯਾ ਧਮ੍ਮਂ ਦੇਸੇਸੀ’’ਤਿ। ‘‘ਸਾਧੁ, ਭਨ੍ਤੇ ਨਾਗਸੇਨ, ਏવਮੇਤਂ ਤਥਾ ਸਮ੍ਪਟਿਚ੍ਛਾਮੀਤਿ।
‘‘Yathā vā pana, mahārāja, saddhivihāriko upajjhāyābhataṃ piṇḍapātaṃ gahetvā upajjhāyassa upanāmento upajjhāyaṃ ārādheti toseti pasādeti, tañca upajjhāyo pasanno ‘sādhū’ti abbhānumodati, evameva kho, mahārāja, cātumeyyakā ca sakyā brahmā ca sahampati tathāgatappavediteheva opammehi tathāgataṃ ārādhesuṃ tosesuṃ pasādesuṃ, tesañca tathāgato pasanno ‘sādhū’ti abbhānumoditvā sabbadukkhaparimuttiyā dhammaṃ desesī’’ti. ‘‘Sādhu, bhante nāgasena, evametaṃ tathā sampaṭicchāmīti.
ਬੁਦ੍ਧਸਬ੍ਬਞ੍ਞੁਭਾવਪਞ੍ਹੋ ਦਸਮੋ।
Buddhasabbaññubhāvapañho dasamo.
ਸਬ੍ਬਞ੍ਞੁਤਞਾਣવਗ੍ਗੋ ਚਤੁਤ੍ਥੋ।
Sabbaññutañāṇavaggo catuttho.
ਇਮਸ੍ਮਿਂ વਗ੍ਗੇ ਦਸ ਪਞ੍ਹਾ।
Imasmiṃ vagge dasa pañhā.
