| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. பு³த்³த⁴ஸஞ்ஞகத்தே²ரஅபதா³னவண்ணனா
3. Buddhasaññakattheraapadānavaṇṇanā
து³மக்³கே³ பங்ஸுகூலிகந்திஆதி³கங் ஆயஸ்மதோ பு³த்³த⁴ஸஞ்ஞகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ திஸ்ஸஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ வுத்³தி⁴ப்பத்தோ ஸத்³தா⁴ஜாதோ து³மக்³கே³ லக்³கி³தங் ப⁴க³வதோ பங்ஸுகூலசீவரங் தி³ஸ்வா பஸன்னமானஸோ ‘‘அரஹத்³த⁴ஜ’’ந்தி சிந்தெத்வா வந்த³னபூஜனாதி³ஸக்காரமகாஸி. ஸோ தேன புஞ்ஞகம்மேன தே³வமனுஸ்ஸஸம்பத்திமனுப⁴வித்வா இமஸ்மிங் பு³த்³து⁴ப்பாதே³ விப⁴வஸம்பன்னே ஏகஸ்மிங் குலகே³ஹே நிப்³ப³த்தோ ஸத்³தா⁴ஜாதோ பப்³ப³ஜித்வா நசிரஸ்ஸேவ அரஹா அஹோஸி.
Dumagge paṃsukūlikantiādikaṃ āyasmato buddhasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle ekasmiṃ kulagehe nibbatto vuddhippatto saddhājāto dumagge laggitaṃ bhagavato paṃsukūlacīvaraṃ disvā pasannamānaso ‘‘arahaddhaja’’nti cintetvā vandanapūjanādisakkāramakāsi. So tena puññakammena devamanussasampattimanubhavitvā imasmiṃ buddhuppāde vibhavasampanne ekasmiṃ kulagehe nibbatto saddhājāto pabbajitvā nacirasseva arahā ahosi.
9. ஸோ பத்தஅரஹத்தாதி⁴க³மோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ து³மக்³கே³ பங்ஸுகூலிகந்திஆதி³மாஹ. தத்த² து⁴னாதி கம்பதீதி து³மோ. து³ஹதி பூரேதி ஆகாஸதலந்தி வா து³மோ, து³மஸ்ஸ அக்³கோ³ கோடீதி து³மக்³கோ³, தஸ்மிங் து³மக்³கே³. பங்ஸுமிவ படிக்கூலபா⁴வங் அமனுஞ்ஞபா⁴வங் உலதி க³ச்ச²தீதி பங்ஸுகூலங், பங்ஸுகூலமேவ பங்ஸுகூலிகங், ஸத்து²னோ பங்ஸுகூலங் து³மக்³கே³ லக்³கி³தங் தி³ஸ்வா அஹங் அஞ்ஜலிங் பக்³க³ஹெத்வா தங் பங்ஸுகூலங் அவந்தி³ங் பணாமமகாஸிந்தி அத்தோ². தந்தி நிபாதமத்தங். ஸேஸங் ஸப்³ப³த்த² உத்தானத்த²மேவாதி.
9. So pattaarahattādhigamo attano pubbakammaṃ saritvā somanassajāto pubbacaritāpadānaṃ pakāsento dumagge paṃsukūlikantiādimāha. Tattha dhunāti kampatīti dumo. Duhati pūreti ākāsatalanti vā dumo, dumassa aggo koṭīti dumaggo, tasmiṃ dumagge. Paṃsumiva paṭikkūlabhāvaṃ amanuññabhāvaṃ ulati gacchatīti paṃsukūlaṃ, paṃsukūlameva paṃsukūlikaṃ, satthuno paṃsukūlaṃ dumagge laggitaṃ disvā ahaṃ añjaliṃ paggahetvā taṃ paṃsukūlaṃ avandiṃ paṇāmamakāsinti attho. Tanti nipātamattaṃ. Sesaṃ sabbattha uttānatthamevāti.
பு³த்³த⁴ஸஞ்ஞகத்தே²ரஅபதா³னவண்ணனா ஸமத்தா.
Buddhasaññakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. பு³த்³த⁴ஸஞ்ஞகத்தே²ரஅபதா³னங் • 3. Buddhasaññakattheraapadānaṃ
