| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. பு³த்³த⁴ஸஞ்ஞகத்தே²ரஅபதா³னவண்ணனா
7. Buddhasaññakattheraapadānavaṇṇanā
யதா³ விபஸ்ஸீ லோகக்³கோ³திஆதி³கங் ஆயஸ்மதோ பு³த்³த⁴ஸஞ்ஞகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே ஏகஸ்மிங் பூ⁴மட்ட²கவிமானே தே³வபுத்தோ ஹுத்வா நிப்³ப³த்தி. ததா³ விபஸ்ஸீ ப⁴க³வா ஆயுஸங்கா²ரங் வொஸ்ஸஜ்ஜி. அத² ஸகலத³ஸஸஹஸ்ஸிலோகதா⁴து ஸஸாக³ரபப்³ப³தா பகம்பித்த². ததா³ தஸ்ஸ தே³வபுத்தஸ்ஸ ப⁴வனம்பி கம்பித்த². தஸ்மிங் க²ணே ஸோ தே³வபுத்தோ ஸங்ஸயஜாதோ – ‘‘கிங் நு கோ² பத²வீகம்பாய நிப்³ப³த்தீ’’தி சிந்தெத்வா பு³த்³த⁴ஸ்ஸ ஆயுஸங்கா²ரவொஸ்ஸஜ்ஜபா⁴வங் ஞத்வா மஹாஸோகங் தோ³மனஸ்ஸங் உப்பாதே³ஸி. ததா³ வெஸ்ஸவணோ மஹாராஜா ஆக³ந்த்வா ‘‘மா சிந்தயித்தா²’’தி அஸ்ஸாஸேஸி. ஸோ தே³வபுத்தோ ததோ சுதோ தேன புஞ்ஞேன தே³வமனுஸ்ஸேஸு ஸங்ஸரந்தோ இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ விஞ்ஞுதங் பத்தோ க⁴ராவாஸங் பஹாய பப்³ப³ஜித்வா நசிரஸ்ஸேவ அரஹா அஹோஸி.
Yadāvipassī lokaggotiādikaṃ āyasmato buddhasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ bhūmaṭṭhakavimāne devaputto hutvā nibbatti. Tadā vipassī bhagavā āyusaṅkhāraṃ vossajji. Atha sakaladasasahassilokadhātu sasāgarapabbatā pakampittha. Tadā tassa devaputtassa bhavanampi kampittha. Tasmiṃ khaṇe so devaputto saṃsayajāto – ‘‘kiṃ nu kho pathavīkampāya nibbattī’’ti cintetvā buddhassa āyusaṅkhāravossajjabhāvaṃ ñatvā mahāsokaṃ domanassaṃ uppādesi. Tadā vessavaṇo mahārājā āgantvā ‘‘mā cintayitthā’’ti assāsesi. So devaputto tato cuto tena puññena devamanussesu saṃsaranto imasmiṃ buddhuppāde kulagehe nibbatto viññutaṃ patto gharāvāsaṃ pahāya pabbajitvā nacirasseva arahā ahosi.
57. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ யதா³ விபஸ்ஸீ லோகக்³கோ³திஆதி³மாஹ. ஆயுஸங்கா²ரமொஸ்ஸஜ்ஜீதி ஆ ஸமந்ததோ யுனோதி பாலேதி ஸத்தேதி ஆயு, ஆயுஸ்ஸ ஸங்கா²ரோ ராஸிபா⁴வோ ஆயுஸங்கா²ரோ, தங் ஆயுஸங்கா²ரங் ஒஸ்ஸஜ்ஜி பரிச்சஜி ஜஹாஸீதி அத்தோ². தஸ்மிங் ஆயுஸங்கா²ரவொஸ்ஸஜ்ஜனே. ஜலமேக²லாஸாக³ரோத³கமேக²லாஸஹிதா ஸகலத³ஸஸஹஸ்ஸசக்கவாளபத²வீ கம்பித்தா²தி ஸம்ப³ந்தோ⁴.
57. So aparabhāge attano pubbakammaṃ saritvā somanassajāto pubbacaritāpadānaṃ pakāsento yadā vipassī lokaggotiādimāha. Āyusaṅkhāramossajjīti ā samantato yunoti pāleti satteti āyu, āyussa saṅkhāro rāsibhāvo āyusaṅkhāro, taṃ āyusaṅkhāraṃ ossajji pariccaji jahāsīti attho. Tasmiṃ āyusaṅkhāravossajjane. Jalamekhalāsāgarodakamekhalāsahitā sakaladasasahassacakkavāḷapathavī kampitthāti sambandho.
58. ஓததங் வித்த²தங் மய்ஹந்தி மய்ஹங் ப⁴வனங் ஓததங் வித்த²தங் சித்தங் விசித்தங் ஸுசி ஸுபரிஸுத்³த⁴ங் சித்தங் அனேகேஹி ஸத்தஹி ரதனேஹி விசித்தங் ஸோப⁴மானங் பகம்பித்த² பகாரேன கம்பித்தா²தி அத்தோ². ஸேஸங் ஸப்³ப³த்த² உத்தானமேவாதி.
58.Otataṃ vitthataṃ mayhanti mayhaṃ bhavanaṃ otataṃ vitthataṃ cittaṃ vicittaṃ suci suparisuddhaṃ cittaṃ anekehi sattahi ratanehi vicittaṃ sobhamānaṃ pakampittha pakārena kampitthāti attho. Sesaṃ sabbattha uttānamevāti.
பு³த்³த⁴ஸஞ்ஞகத்தே²ரஅபதா³னவண்ணனா ஸமத்தா.
Buddhasaññakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. பு³த்³த⁴ஸஞ்ஞகத்தே²ரஅபதா³னங் • 7. Buddhasaññakattheraapadānaṃ
