| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၇. ဗုဒ္ဓသညကတ္ထေရအပဒာနဝဏ္ဏနာ
7. Buddhasaññakattheraapadānavaṇṇanā
ယဒာ ဝိပသ္သီ လောကဂ္ဂောတိအာဒိကံ အာယသ္မတော ဗုဒ္ဓသညကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဝိပသ္သိသ္သ ဘဂဝတော ကာလေ ဧကသ္မိံ ဘူမဋ္ဌကဝိမာနေ ဒေဝပုတ္တော ဟုတ္ဝာ နိဗ္ဗတ္တိ။ တဒာ ဝိပသ္သီ ဘဂဝာ အာယုသင္ခာရံ ဝောသ္သဇ္ဇိ။ အထ သကလဒသသဟသ္သိလောကဓာတု သသာဂရပဗ္ဗတာ ပကမ္ပိတ္ထ။ တဒာ တသ္သ ဒေဝပုတ္တသ္သ ဘဝနမ္ပိ ကမ္ပိတ္ထ။ တသ္မိံ ခဏေ သော ဒေဝပုတ္တော သံသယဇာတော – ‘‘ကိံ နု ခော ပထဝီကမ္ပာယ နိဗ္ဗတ္တီ’’တိ စိန္တေတ္ဝာ ဗုဒ္ဓသ္သ အာယုသင္ခာရဝောသ္သဇ္ဇဘာဝံ ဉတ္ဝာ မဟာသောကံ ဒောမနသ္သံ ဥပ္ပာဒေသိ။ တဒာ ဝေသ္သဝဏော မဟာရာဇာ အာဂန္တ္ဝာ ‘‘မာ စိန္တယိတ္ထာ’’တိ အသ္သာသေသိ။ သော ဒေဝပုတ္တော တတော စုတော တေန ပုညေန ဒေဝမနုသ္သေသု သံသရန္တော ဣမသ္မိံ ဗုဒ္ဓုပ္ပာဒေ ကုလဂေဟေ နိဗ္ဗတ္တော ဝိညုတံ ပတ္တော ဃရာဝာသံ ပဟာယ ပဗ္ဗဇိတ္ဝာ နစိရသ္သေဝ အရဟာ အဟောသိ။
Yadāvipassī lokaggotiādikaṃ āyasmato buddhasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ bhūmaṭṭhakavimāne devaputto hutvā nibbatti. Tadā vipassī bhagavā āyusaṅkhāraṃ vossajji. Atha sakaladasasahassilokadhātu sasāgarapabbatā pakampittha. Tadā tassa devaputtassa bhavanampi kampittha. Tasmiṃ khaṇe so devaputto saṃsayajāto – ‘‘kiṃ nu kho pathavīkampāya nibbattī’’ti cintetvā buddhassa āyusaṅkhāravossajjabhāvaṃ ñatvā mahāsokaṃ domanassaṃ uppādesi. Tadā vessavaṇo mahārājā āgantvā ‘‘mā cintayitthā’’ti assāsesi. So devaputto tato cuto tena puññena devamanussesu saṃsaranto imasmiṃ buddhuppāde kulagehe nibbatto viññutaṃ patto gharāvāsaṃ pahāya pabbajitvā nacirasseva arahā ahosi.
၅၇. သော အပရဘာဂေ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ယဒာ ဝိပသ္သီ လောကဂ္ဂောတိအာဒိမာဟ။ အာယုသင္ခာရမောသ္သဇ္ဇီတိ အာ သမန္တတော ယုနောတိ ပာလေတိ သတ္တေတိ အာယု, အာယုသ္သ သင္ခာရော ရာသိဘာဝော အာယုသင္ခာရော, တံ အာယုသင္ခာရံ ဩသ္သဇ္ဇိ ပရိစ္စဇိ ဇဟာသီတိ အတ္ထော။ တသ္မိံ အာယုသင္ခာရဝောသ္သဇ္ဇနေ။ ဇလမေခလာသာဂရောဒကမေခလာသဟိတာ သကလဒသသဟသ္သစက္ကဝာဠပထဝီ ကမ္ပိတ္ထာတိ သမ္ဗန္ဓော။
57. So aparabhāge attano pubbakammaṃ saritvā somanassajāto pubbacaritāpadānaṃ pakāsento yadā vipassī lokaggotiādimāha. Āyusaṅkhāramossajjīti ā samantato yunoti pāleti satteti āyu, āyussa saṅkhāro rāsibhāvo āyusaṅkhāro, taṃ āyusaṅkhāraṃ ossajji pariccaji jahāsīti attho. Tasmiṃ āyusaṅkhāravossajjane. Jalamekhalāsāgarodakamekhalāsahitā sakaladasasahassacakkavāḷapathavī kampitthāti sambandho.
၅၈. ဩတတံ ဝိတ္ထတံ မယ္ဟန္တိ မယ္ဟံ ဘဝနံ ဩတတံ ဝိတ္ထတံ စိတ္တံ ဝိစိတ္တံ သုစိ သုပရိသုဒ္ဓံ စိတ္တံ အနေကေဟိ သတ္တဟိ ရတနေဟိ ဝိစိတ္တံ သောဘမာနံ ပကမ္ပိတ္ထ ပကာရေန ကမ္ပိတ္ထာတိ အတ္ထော။ သေသံ သဗ္ဗတ္ထ ဥတ္တာနမေဝာတိ။
58.Otataṃ vitthataṃ mayhanti mayhaṃ bhavanaṃ otataṃ vitthataṃ cittaṃ vicittaṃ suci suparisuddhaṃ cittaṃ anekehi sattahi ratanehi vicittaṃ sobhamānaṃ pakampittha pakārena kampitthāti attho. Sesaṃ sabbattha uttānamevāti.
ဗုဒ္ဓသညကတ္ထေရအပဒာနဝဏ္ဏနာ သမတ္တာ။
Buddhasaññakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၇. ဗုဒ္ဓသညကတ္ထေရအပဒာနံ • 7. Buddhasaññakattheraapadānaṃ
