| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
7. බුද්‌ධසඤ්‌ඤකත්‌ථෙරඅපදානවණ්‌ණනා
7. Buddhasaññakattheraapadānavaṇṇanā
යදා විපස්‌සී ලොකග්‌ගොතිආදිකං ආයස්‌මතො බුද්‌ධසඤ්‌ඤකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ එකස්‌මිං භූමට්‌ඨකවිමානෙ දෙවපුත්‌තො හුත්‌වා නිබ්‌බත්‌ති. තදා විපස්‌සී භගවා ආයුසඞ්‌ඛාරං වොස්‌සජ්‌ජි. අථ සකලදසසහස්‌සිලොකධාතු සසාගරපබ්‌බතා පකම්‌පිත්‌ථ. තදා තස්‌ස දෙවපුත්‌තස්‌ස භවනම්‌පි කම්‌පිත්‌ථ. තස්‌මිං ඛණෙ සො දෙවපුත්‌තො සංසයජාතො – ‘‘කිං නු ඛො පථවීකම්‌පාය නිබ්‌බත්‌තී’’ති චින්‌තෙත්‌වා බුද්‌ධස්‌ස ආයුසඞ්‌ඛාරවොස්‌සජ්‌ජභාවං ඤත්‌වා මහාසොකං දොමනස්‌සං උප්‌පාදෙසි. තදා වෙස්‌සවණො මහාරාජා ආගන්‌ත්‌වා ‘‘මා චින්‌තයිත්‌ථා’’ති අස්‌සාසෙසි. සො දෙවපුත්‌තො තතො චුතො තෙන පුඤ්‌ඤෙන දෙවමනුස්‌සෙසු සංසරන්‌තො ඉමස්‌මිං බුද්‌ධුප්‌පාදෙ කුලගෙහෙ නිබ්‌බත්‌තො විඤ්‌ඤුතං පත්‌තො ඝරාවාසං පහාය පබ්‌බජිත්‌වා නචිරස්‌සෙව අරහා අහොසි.
Yadāvipassī lokaggotiādikaṃ āyasmato buddhasaññakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ bhūmaṭṭhakavimāne devaputto hutvā nibbatti. Tadā vipassī bhagavā āyusaṅkhāraṃ vossajji. Atha sakaladasasahassilokadhātu sasāgarapabbatā pakampittha. Tadā tassa devaputtassa bhavanampi kampittha. Tasmiṃ khaṇe so devaputto saṃsayajāto – ‘‘kiṃ nu kho pathavīkampāya nibbattī’’ti cintetvā buddhassa āyusaṅkhāravossajjabhāvaṃ ñatvā mahāsokaṃ domanassaṃ uppādesi. Tadā vessavaṇo mahārājā āgantvā ‘‘mā cintayitthā’’ti assāsesi. So devaputto tato cuto tena puññena devamanussesu saṃsaranto imasmiṃ buddhuppāde kulagehe nibbatto viññutaṃ patto gharāvāsaṃ pahāya pabbajitvā nacirasseva arahā ahosi.
57. සො අපරභාගෙ අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො යදා විපස්‌සී ලොකග්‌ගොතිආදිමාහ. ආයුසඞ්‌ඛාරමොස්‌සජ්‌ජීති ආ සමන්‌තතො යුනොති පාලෙති සත්‌තෙති ආයු, ආයුස්‌ස සඞ්‌ඛාරො රාසිභාවො ආයුසඞ්‌ඛාරො, තං ආයුසඞ්‌ඛාරං ඔස්‌සජ්‌ජි පරිච්‌චජි ජහාසීති අත්‌ථො. තස්‌මිං ආයුසඞ්‌ඛාරවොස්‌සජ්‌ජනෙ. ජලමෙඛලාසාගරොදකමෙඛලාසහිතා සකලදසසහස්‌සචක්‌කවාළපථවී කම්‌පිත්‌ථාති සම්‌බන්‌ධො.
57. So aparabhāge attano pubbakammaṃ saritvā somanassajāto pubbacaritāpadānaṃ pakāsento yadā vipassī lokaggotiādimāha. Āyusaṅkhāramossajjīti ā samantato yunoti pāleti satteti āyu, āyussa saṅkhāro rāsibhāvo āyusaṅkhāro, taṃ āyusaṅkhāraṃ ossajji pariccaji jahāsīti attho. Tasmiṃ āyusaṅkhāravossajjane. Jalamekhalāsāgarodakamekhalāsahitā sakaladasasahassacakkavāḷapathavī kampitthāti sambandho.
58. ඔතතං විත්‌ථතං මය්‌හන්‌ති මය්‌හං භවනං ඔතතං විත්‌ථතං චිත්‌තං විචිත්‌තං සුචි සුපරිසුද්‌ධං චිත්‌තං අනෙකෙහි සත්‌තහි රතනෙහි විචිත්‌තං සොභමානං පකම්‌පිත්‌ථ පකාරෙන කම්‌පිත්‌ථාති අත්‌ථො. සෙසං සබ්‌බත්‌ථ උත්‌තානමෙවාති.
58.Otataṃ vitthataṃ mayhanti mayhaṃ bhavanaṃ otataṃ vitthataṃ cittaṃ vicittaṃ suci suparisuddhaṃ cittaṃ anekehi sattahi ratanehi vicittaṃ sobhamānaṃ pakampittha pakārena kampitthāti attho. Sesaṃ sabbattha uttānamevāti.
බුද්‌ධසඤ්‌ඤකත්‌ථෙරඅපදානවණ්‌ණනා සමත්‌තා.
Buddhasaññakattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 7. බුද්‌ධසඤ්‌ඤකත්‌ථෙරඅපදානං • 7. Buddhasaññakattheraapadānaṃ
