| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
३. बुद्धस्स अनुत्तरभावजाननपञ्हो
3. Buddhassa anuttarabhāvajānanapañho
३. राजा आह ‘‘भन्ते नागसेन, सक्का जानितुं ‘बुद्धो अनुत्तरो’’’ति? ‘‘आम, महाराज, सक्का जानितुं ‘भगवा अनुत्तरो’’’ति। ‘‘कथं, भन्ते नागसेन, सक्का जानितुं ‘बुद्धो अनुत्तरो’’’ति। ‘‘भूतपुब्बं, महाराज, तिस्सत्थेरो नाम लेखाचरियो अहोसि, बहूनि वस्सानि अब्भतीतानि कालङ्कतस्स कथं सो ञायती’’ति। ‘‘लेखेन भन्ते’’ति। ‘‘एवमेव खो, महाराज, यो धम्मं पस्सति, सो भगवन्तं पस्सति, धम्मो हि, महाराज, भगवता देसितो’’ति।
3. Rājā āha ‘‘bhante nāgasena, sakkā jānituṃ ‘buddho anuttaro’’’ti? ‘‘Āma, mahārāja, sakkā jānituṃ ‘bhagavā anuttaro’’’ti. ‘‘Kathaṃ, bhante nāgasena, sakkā jānituṃ ‘buddho anuttaro’’’ti. ‘‘Bhūtapubbaṃ, mahārāja, tissatthero nāma lekhācariyo ahosi, bahūni vassāni abbhatītāni kālaṅkatassa kathaṃ so ñāyatī’’ti. ‘‘Lekhena bhante’’ti. ‘‘Evameva kho, mahārāja, yo dhammaṃ passati, so bhagavantaṃ passati, dhammo hi, mahārāja, bhagavatā desito’’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
बुद्धस्स अनुत्तरभावजाननपञ्हो ततियो।
Buddhassa anuttarabhāvajānanapañho tatiyo.
