| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၃. ဗုဒ္ဓသ္သ အနုတ္တရဘာဝဇာနနပဉ္ဟော
3. Buddhassa anuttarabhāvajānanapañho
၃. ရာဇာ အာဟ ‘‘ဘန္တေ နာဂသေန, သက္ကာ ဇာနိတုံ ‘ဗုဒ္ဓော အနုတ္တရော’’’တိ? ‘‘အာမ, မဟာရာဇ, သက္ကာ ဇာနိတုံ ‘ဘဂဝာ အနုတ္တရော’’’တိ။ ‘‘ကထံ, ဘန္တေ နာဂသေန, သက္ကာ ဇာနိတုံ ‘ဗုဒ္ဓော အနုတ္တရော’’’တိ။ ‘‘ဘူတပုဗ္ဗံ, မဟာရာဇ, တိသ္သတ္ထေရော နာမ လေခာစရိယော အဟောသိ, ဗဟူနိ ဝသ္သာနိ အဗ္ဘတီတာနိ ကာလင္ကတသ္သ ကထံ သော ဉာယတီ’’တိ။ ‘‘လေခေန ဘန္တေ’’တိ။ ‘‘ဧဝမေဝ ခော, မဟာရာဇ, ယော ဓမ္မံ ပသ္သတိ, သော ဘဂဝန္တံ ပသ္သတိ, ဓမ္မော ဟိ, မဟာရာဇ, ဘဂဝတာ ဒေသိတော’’တိ။
3. Rājā āha ‘‘bhante nāgasena, sakkā jānituṃ ‘buddho anuttaro’’’ti? ‘‘Āma, mahārāja, sakkā jānituṃ ‘bhagavā anuttaro’’’ti. ‘‘Kathaṃ, bhante nāgasena, sakkā jānituṃ ‘buddho anuttaro’’’ti. ‘‘Bhūtapubbaṃ, mahārāja, tissatthero nāma lekhācariyo ahosi, bahūni vassāni abbhatītāni kālaṅkatassa kathaṃ so ñāyatī’’ti. ‘‘Lekhena bhante’’ti. ‘‘Evameva kho, mahārāja, yo dhammaṃ passati, so bhagavantaṃ passati, dhammo hi, mahārāja, bhagavatā desito’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ဗုဒ္ဓသ္သ အနုတ္တရဘာဝဇာနနပဉ္ဟော တတိယော။
Buddhassa anuttarabhāvajānanapañho tatiyo.
