| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๒. พุทฺธสฺส อนุตฺตรภาวปโญฺห
2. Buddhassa anuttarabhāvapañho
๒. ราชา อาห ‘‘ภเนฺต นาคเสน, พุโทฺธ อนุตฺตโร’’ติ? ‘‘อาม, มหาราช, ภควา อนุตฺตโร’’ติฯ ‘‘กถํ, ภเนฺต นาคเสน, อทิฎฺฐปุพฺพํ ชานาสิ ‘พุโทฺธ อนุตฺตโร’’’ติ? ‘‘ตํ กิํ มญฺญสิ, มหาราช, เยหิ อทิฎฺฐปุโพฺพ มหาสมุโทฺท, ชาเนยฺยุํ เต, มหาราช, มหโนฺต โข มหาสมุโทฺท คมฺภีโร อปฺปเมโยฺย ทุปฺปริโยคาโห, ยตฺถิมา ปญฺจ มหานทิโย สตตํ สมิตํ อเปฺปนฺติ, เสยฺยถิทํ, คงฺคา ยมุนา อจิรวตี สรภู มหี, เนว ตสฺส อูนตฺตํ วา ปูรตฺตํ วา ปญฺญายตี’’ติ ? ‘‘อาม, ภเนฺต, ชาเนยฺยุ’’นฺติฯ ‘‘เอวเมว โข, มหาราช, สาวเก มหเนฺต ปรินิพฺพุเต ปสฺสิตฺวา ชานามิ ‘ภควา อนุตฺตโร’’’ติฯ
2. Rājā āha ‘‘bhante nāgasena, buddho anuttaro’’ti? ‘‘Āma, mahārāja, bhagavā anuttaro’’ti. ‘‘Kathaṃ, bhante nāgasena, adiṭṭhapubbaṃ jānāsi ‘buddho anuttaro’’’ti? ‘‘Taṃ kiṃ maññasi, mahārāja, yehi adiṭṭhapubbo mahāsamuddo, jāneyyuṃ te, mahārāja, mahanto kho mahāsamuddo gambhīro appameyyo duppariyogāho, yatthimā pañca mahānadiyo satataṃ samitaṃ appenti, seyyathidaṃ, gaṅgā yamunā aciravatī sarabhū mahī, neva tassa ūnattaṃ vā pūrattaṃ vā paññāyatī’’ti ? ‘‘Āma, bhante, jāneyyu’’nti. ‘‘Evameva kho, mahārāja, sāvake mahante parinibbute passitvā jānāmi ‘bhagavā anuttaro’’’ti.
‘‘กโลฺลสิ, ภเนฺต นาคเสนา’’ติฯ
‘‘Kallosi, bhante nāgasenā’’ti.
พุทฺธสฺส อนุตฺตรภาวปโญฺห ทุติโยฯ
Buddhassa anuttarabhāvapañho dutiyo.
