| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၂. ဗုဒ္ဓသ္သ အနုတ္တရဘာဝပဉ္ဟော
2. Buddhassa anuttarabhāvapañho
၂. ရာဇာ အာဟ ‘‘ဘန္တေ နာဂသေန, ဗုဒ္ဓော အနုတ္တရော’’တိ? ‘‘အာမ, မဟာရာဇ, ဘဂဝာ အနုတ္တရော’’တိ။ ‘‘ကထံ, ဘန္တေ နာဂသေန, အဒိဋ္ဌပုဗ္ဗံ ဇာနာသိ ‘ဗုဒ္ဓော အနုတ္တရော’’’တိ? ‘‘တံ ကိံ မညသိ, မဟာရာဇ, ယေဟိ အဒိဋ္ဌပုဗ္ဗော မဟာသမုဒ္ဒော, ဇာနေယ္ယုံ တေ, မဟာရာဇ, မဟန္တော ခော မဟာသမုဒ္ဒော ဂမ္ဘီရော အပ္ပမေယ္ယော ဒုပ္ပရိယောဂာဟော, ယတ္ထိမာ ပဉ္စ မဟာနဒိယော သတတံ သမိတံ အပ္ပေန္တိ, သေယ္ယထိဒံ, ဂင္ဂာ ယမုနာ အစိရဝတီ သရဘူ မဟီ, နေဝ တသ္သ ဦနတ္တံ ဝာ ပူရတ္တံ ဝာ ပညာယတီ’’တိ ? ‘‘အာမ, ဘန္တေ, ဇာနေယ္ယု’’န္တိ။ ‘‘ဧဝမေဝ ခော, မဟာရာဇ, သာဝကေ မဟန္တေ ပရိနိဗ္ဗုတေ ပသ္သိတ္ဝာ ဇာနာမိ ‘ဘဂဝာ အနုတ္တရော’’’တိ။
2. Rājā āha ‘‘bhante nāgasena, buddho anuttaro’’ti? ‘‘Āma, mahārāja, bhagavā anuttaro’’ti. ‘‘Kathaṃ, bhante nāgasena, adiṭṭhapubbaṃ jānāsi ‘buddho anuttaro’’’ti? ‘‘Taṃ kiṃ maññasi, mahārāja, yehi adiṭṭhapubbo mahāsamuddo, jāneyyuṃ te, mahārāja, mahanto kho mahāsamuddo gambhīro appameyyo duppariyogāho, yatthimā pañca mahānadiyo satataṃ samitaṃ appenti, seyyathidaṃ, gaṅgā yamunā aciravatī sarabhū mahī, neva tassa ūnattaṃ vā pūrattaṃ vā paññāyatī’’ti ? ‘‘Āma, bhante, jāneyyu’’nti. ‘‘Evameva kho, mahārāja, sāvake mahante parinibbute passitvā jānāmi ‘bhagavā anuttaro’’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ဗုဒ္ဓသ္သ အနုတ္တရဘာဝပဉ္ဟော ဒုတိယော။
Buddhassa anuttarabhāvapañho dutiyo.
