| Library / Tipiṭaka / തിപിടക • Tipiṭaka / മിലിന്ദപഞ്ഹപാളി • Milindapañhapāḷi |
൨. ബുദ്ധസ്സ അനുത്തരഭാവപഞ്ഹോ
2. Buddhassa anuttarabhāvapañho
൨. രാജാ ആഹ ‘‘ഭന്തേ നാഗസേന, ബുദ്ധോ അനുത്തരോ’’തി? ‘‘ആമ, മഹാരാജ, ഭഗവാ അനുത്തരോ’’തി. ‘‘കഥം, ഭന്തേ നാഗസേന, അദിട്ഠപുബ്ബം ജാനാസി ‘ബുദ്ധോ അനുത്തരോ’’’തി? ‘‘തം കിം മഞ്ഞസി, മഹാരാജ, യേഹി അദിട്ഠപുബ്ബോ മഹാസമുദ്ദോ, ജാനേയ്യും തേ, മഹാരാജ, മഹന്തോ ഖോ മഹാസമുദ്ദോ ഗമ്ഭീരോ അപ്പമേയ്യോ ദുപ്പരിയോഗാഹോ, യത്ഥിമാ പഞ്ച മഹാനദിയോ സതതം സമിതം അപ്പേന്തി, സേയ്യഥിദം, ഗങ്ഗാ യമുനാ അചിരവതീ സരഭൂ മഹീ, നേവ തസ്സ ഊനത്തം വാ പൂരത്തം വാ പഞ്ഞായതീ’’തി ? ‘‘ആമ, ഭന്തേ, ജാനേയ്യു’’ന്തി. ‘‘ഏവമേവ ഖോ, മഹാരാജ, സാവകേ മഹന്തേ പരിനിബ്ബുതേ പസ്സിത്വാ ജാനാമി ‘ഭഗവാ അനുത്തരോ’’’തി.
2. Rājā āha ‘‘bhante nāgasena, buddho anuttaro’’ti? ‘‘Āma, mahārāja, bhagavā anuttaro’’ti. ‘‘Kathaṃ, bhante nāgasena, adiṭṭhapubbaṃ jānāsi ‘buddho anuttaro’’’ti? ‘‘Taṃ kiṃ maññasi, mahārāja, yehi adiṭṭhapubbo mahāsamuddo, jāneyyuṃ te, mahārāja, mahanto kho mahāsamuddo gambhīro appameyyo duppariyogāho, yatthimā pañca mahānadiyo satataṃ samitaṃ appenti, seyyathidaṃ, gaṅgā yamunā aciravatī sarabhū mahī, neva tassa ūnattaṃ vā pūrattaṃ vā paññāyatī’’ti ? ‘‘Āma, bhante, jāneyyu’’nti. ‘‘Evameva kho, mahārāja, sāvake mahante parinibbute passitvā jānāmi ‘bhagavā anuttaro’’’ti.
‘‘കല്ലോസി, ഭന്തേ നാഗസേനാ’’തി.
‘‘Kallosi, bhante nāgasenā’’ti.
ബുദ്ധസ്സ അനുത്തരഭാവപഞ്ഹോ ദുതിയോ.
Buddhassa anuttarabhāvapañho dutiyo.
