| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
५. बुद्धवग्गो
5. Buddhavaggo
१. बुद्धस्स अत्थिनत्थिभावपञ्हो
1. Buddhassa atthinatthibhāvapañho
१. राजा आह ‘‘भन्ते नागसेन, बुद्धो तया दिट्ठो’’ति? ‘‘न हि, महाराजा’’ति। ‘‘अथ ते आचरियेहि बुद्धो दिट्ठो’’ति? ‘‘न हि, महाराजा’’ति। ‘‘तेन हि, भन्ते नागसेन, नत्थि बुद्धो’’ति। ‘‘किं पन, महाराज, हिमवति ऊहा नदी तया दिट्ठा’’ति? ‘‘न हि, भन्ते’’ति। ‘‘अथ ते पितरा ऊहा नदी दिट्ठा’’ति? ‘‘न हि, भन्ते’’ति। ‘‘तेन हि, महाराज, नत्थि ऊहा नदी’’ति। ‘‘अत्थि, भन्ते, किञ्चापि मया ऊहा नदी न दिट्ठा, पितरापि मे ऊहा नदी न दिट्ठा, अपि च अत्थि ऊहा नदी’’ति। ‘‘एवमेव खो, महाराज, किञ्चापि मया भगवा न दिट्ठो, आचरियेहिपि मे भगवा न दिट्ठो, अपि च अत्थि भगवा’’ति।
1. Rājā āha ‘‘bhante nāgasena, buddho tayā diṭṭho’’ti? ‘‘Na hi, mahārājā’’ti. ‘‘Atha te ācariyehi buddho diṭṭho’’ti? ‘‘Na hi, mahārājā’’ti. ‘‘Tena hi, bhante nāgasena, natthi buddho’’ti. ‘‘Kiṃ pana, mahārāja, himavati ūhā nadī tayā diṭṭhā’’ti? ‘‘Na hi, bhante’’ti. ‘‘Atha te pitarā ūhā nadī diṭṭhā’’ti? ‘‘Na hi, bhante’’ti. ‘‘Tena hi, mahārāja, natthi ūhā nadī’’ti. ‘‘Atthi, bhante, kiñcāpi mayā ūhā nadī na diṭṭhā, pitarāpi me ūhā nadī na diṭṭhā, api ca atthi ūhā nadī’’ti. ‘‘Evameva kho, mahārāja, kiñcāpi mayā bhagavā na diṭṭho, ācariyehipi me bhagavā na diṭṭho, api ca atthi bhagavā’’ti.
‘‘कल्लोसि, भन्ते नागसेना’’ति।
‘‘Kallosi, bhante nāgasenā’’ti.
बुद्धस्स अत्थिनत्थिभावपञ्हो पठमो।
Buddhassa atthinatthibhāvapañho paṭhamo.
