| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၅. ဗုဒ္ဓဝဂ္ဂော
5. Buddhavaggo
၁. ဗုဒ္ဓသ္သ အတ္ထိနတ္ထိဘာဝပဉ္ဟော
1. Buddhassa atthinatthibhāvapañho
၁. ရာဇာ အာဟ ‘‘ဘန္တေ နာဂသေန, ဗုဒ္ဓော တယာ ဒိဋ္ဌော’’တိ? ‘‘န ဟိ, မဟာရာဇာ’’တိ။ ‘‘အထ တေ အာစရိယေဟိ ဗုဒ္ဓော ဒိဋ္ဌော’’တိ? ‘‘န ဟိ, မဟာရာဇာ’’တိ။ ‘‘တေန ဟိ, ဘန္တေ နာဂသေန, နတ္ထိ ဗုဒ္ဓော’’တိ။ ‘‘ကိံ ပန, မဟာရာဇ, ဟိမဝတိ ဦဟာ နဒီ တယာ ဒိဋ္ဌာ’’တိ? ‘‘န ဟိ, ဘန္တေ’’တိ။ ‘‘အထ တေ ပိတရာ ဦဟာ နဒီ ဒိဋ္ဌာ’’တိ? ‘‘န ဟိ, ဘန္တေ’’တိ။ ‘‘တေန ဟိ, မဟာရာဇ, နတ္ထိ ဦဟာ နဒီ’’တိ။ ‘‘အတ္ထိ, ဘန္တေ, ကိဉ္စာပိ မယာ ဦဟာ နဒီ န ဒိဋ္ဌာ, ပိတရာပိ မေ ဦဟာ နဒီ န ဒိဋ္ဌာ, အပိ စ အတ္ထိ ဦဟာ နဒီ’’တိ။ ‘‘ဧဝမေဝ ခော, မဟာရာဇ, ကိဉ္စာပိ မယာ ဘဂဝာ န ဒိဋ္ဌော, အာစရိယေဟိပိ မေ ဘဂဝာ န ဒိဋ္ဌော, အပိ စ အတ္ထိ ဘဂဝာ’’တိ။
1. Rājā āha ‘‘bhante nāgasena, buddho tayā diṭṭho’’ti? ‘‘Na hi, mahārājā’’ti. ‘‘Atha te ācariyehi buddho diṭṭho’’ti? ‘‘Na hi, mahārājā’’ti. ‘‘Tena hi, bhante nāgasena, natthi buddho’’ti. ‘‘Kiṃ pana, mahārāja, himavati ūhā nadī tayā diṭṭhā’’ti? ‘‘Na hi, bhante’’ti. ‘‘Atha te pitarā ūhā nadī diṭṭhā’’ti? ‘‘Na hi, bhante’’ti. ‘‘Tena hi, mahārāja, natthi ūhā nadī’’ti. ‘‘Atthi, bhante, kiñcāpi mayā ūhā nadī na diṭṭhā, pitarāpi me ūhā nadī na diṭṭhā, api ca atthi ūhā nadī’’ti. ‘‘Evameva kho, mahārāja, kiñcāpi mayā bhagavā na diṭṭho, ācariyehipi me bhagavā na diṭṭho, api ca atthi bhagavā’’ti.
‘‘ကလ္လောသိ, ဘန္တေ နာဂသေနာ’’တိ။
‘‘Kallosi, bhante nāgasenā’’ti.
ဗုဒ္ဓသ္သ အတ္ထိနတ္ထိဘာဝပဉ္ဟော ပဌမော။
Buddhassa atthinatthibhāvapañho paṭhamo.
