| Library / Tipiṭaka / তিপিটক • Tipiṭaka / ধম্মপদপাল়ি • Dhammapadapāḷi |
১৪. বুদ্ধৰগ্গো
14. Buddhavaggo
১৭৯.
179.
যস্স জিতং নাৰজীযতি, জিতং যস্স 1 নো যাতি কোচি লোকে।
Yassa jitaṃ nāvajīyati, jitaṃ yassa 2 no yāti koci loke;
তং বুদ্ধমনন্তগোচরং, অপদং কেন পদেন নেস্সথ॥
Taṃ buddhamanantagocaraṃ, apadaṃ kena padena nessatha.
১৮০.
180.
যস্স জালিনী ৰিসত্তিকা, তণ্হা নত্থি কুহিঞ্চি নেতৰে।
Yassa jālinī visattikā, taṇhā natthi kuhiñci netave;
তং বুদ্ধমনন্তগোচরং, অপদং কেন পদেন নেস্সথ॥
Taṃ buddhamanantagocaraṃ, apadaṃ kena padena nessatha.
১৮১.
181.
যে ঝানপসুতা ধীরা, নেক্খম্মূপসমে রতা।
Ye jhānapasutā dhīrā, nekkhammūpasame ratā;
দেৰাপি তেসং পিহযন্তি, সম্বুদ্ধানং সতীমতং॥
Devāpi tesaṃ pihayanti, sambuddhānaṃ satīmataṃ.
১৮২.
182.
কিচ্ছো মনুস্সপটিলাভো, কিচ্ছং মচ্চান জীৰিতং।
Kiccho manussapaṭilābho, kicchaṃ maccāna jīvitaṃ;
কিচ্ছং সদ্ধম্মস্সৰনং, কিচ্ছো বুদ্ধানমুপ্পাদো॥
Kicchaṃ saddhammassavanaṃ, kiccho buddhānamuppādo.
১৮৩.
183.
১৮৪.
184.
খন্তী পরমং তপো তিতিক্খা, নিব্বানং 7 পরমং ৰদন্তি বুদ্ধা।
Khantī paramaṃ tapo titikkhā, nibbānaṃ 8 paramaṃ vadanti buddhā;
ন হি পব্বজিতো পরূপঘাতী, ন 9 সমণো হোতি পরং ৰিহেঠযন্তো॥
Na hi pabbajito parūpaghātī, na 10 samaṇo hoti paraṃ viheṭhayanto.
১৮৫.
185.
মত্তঞ্ঞুতা চ ভত্তস্মিং, পন্তঞ্চ সযনাসনং।
Mattaññutā ca bhattasmiṃ, pantañca sayanāsanaṃ;
অধিচিত্তে চ আযোগো, এতং বুদ্ধান সাসনং॥
Adhicitte ca āyogo, etaṃ buddhāna sāsanaṃ.
১৮৬.
186.
ন কহাপণৰস্সেন, তিত্তি কামেসু ৰিজ্জতি।
Na kahāpaṇavassena, titti kāmesu vijjati;
অপ্পস্সাদা দুখা কামা, ইতি ৰিঞ্ঞায পণ্ডিতো॥
Appassādā dukhā kāmā, iti viññāya paṇḍito.
১৮৭.
187.
অপি দিব্বেসু কামেসু, রতিং সো নাধিগচ্ছতি।
Api dibbesu kāmesu, ratiṃ so nādhigacchati;
তণ্হক্খযরতো হোতি, সম্মাসম্বুদ্ধসাৰকো॥
Taṇhakkhayarato hoti, sammāsambuddhasāvako.
১৮৮.
188.
বহুং ৰে সরণং যন্তি, পব্বতানি ৰনানি চ।
Bahuṃ ve saraṇaṃ yanti, pabbatāni vanāni ca;
আরামরুক্খচেত্যানি, মনুস্সা ভযতজ্জিতা॥
Ārāmarukkhacetyāni, manussā bhayatajjitā.
১৮৯.
189.
নেতং খো সরণং খেমং, নেতং সরণমুত্তমং।
Netaṃ kho saraṇaṃ khemaṃ, netaṃ saraṇamuttamaṃ;
নেতং সরণমাগম্ম, সব্বদুক্খা পমুচ্চতি॥
Netaṃ saraṇamāgamma, sabbadukkhā pamuccati.
১৯০.
190.
যো চ বুদ্ধঞ্চ ধম্মঞ্চ, সঙ্ঘঞ্চ সরণং গতো।
Yo ca buddhañca dhammañca, saṅghañca saraṇaṃ gato;
চত্তারি অরিযসচ্চানি, সম্মপ্পঞ্ঞায পস্সতি॥
Cattāri ariyasaccāni, sammappaññāya passati.
১৯১.
191.
দুক্খং দুক্খসমুপ্পাদং, দুক্খস্স চ অতিক্কমং।
Dukkhaṃ dukkhasamuppādaṃ, dukkhassa ca atikkamaṃ;
অরিযং চট্ঠঙ্গিকং মগ্গং, দুক্খূপসমগামিনং॥
Ariyaṃ caṭṭhaṅgikaṃ maggaṃ, dukkhūpasamagāminaṃ.
১৯২.
192.
এতং খো সরণং খেমং, এতং সরণমুত্তমং।
Etaṃ kho saraṇaṃ khemaṃ, etaṃ saraṇamuttamaṃ;
এতং সরণমাগম্ম, সব্বদুক্খা পমুচ্চতি॥
Etaṃ saraṇamāgamma, sabbadukkhā pamuccati.
১৯৩.
193.
দুল্লভো পুরিসাজঞ্ঞো, ন সো সব্বত্থ জাযতি।
Dullabho purisājañño, na so sabbattha jāyati;
যত্থ সো জাযতি ধীরো, তং কুলং সুখমেধতি॥
Yattha so jāyati dhīro, taṃ kulaṃ sukhamedhati.
১৯৪.
194.
সুখো বুদ্ধানমুপ্পাদো, সুখা সদ্ধম্মদেসনা।
Sukho buddhānamuppādo, sukhā saddhammadesanā;
সুখা সঙ্ঘস্স সামগ্গী, সমগ্গানং তপো সুখো॥
Sukhā saṅghassa sāmaggī, samaggānaṃ tapo sukho.
১৯৫.
195.
পূজারহে পূজযতো, বুদ্ধে যদি ৰ সাৰকে।
Pūjārahe pūjayato, buddhe yadi va sāvake;
পপঞ্চসমতিক্কন্তে, তিণ্ণসোকপরিদ্দৰে॥
Papañcasamatikkante, tiṇṇasokapariddave.
১৯৬.
196.
তে তাদিসে পূজযতো, নিব্বুতে অকুতোভযে।
Te tādise pūjayato, nibbute akutobhaye;
ন সক্কা পুঞ্ঞং সঙ্খাতুং, ইমেত্তমপি কেনচি॥
Na sakkā puññaṃ saṅkhātuṃ, imettamapi kenaci.
বুদ্ধৰগ্গো চুদ্দসমো নিট্ঠিতো।
Buddhavaggo cuddasamo niṭṭhito.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ধম্মপদ-অট্ঠকথা • Dhammapada-aṭṭhakathā / ১৪. বুদ্ধৰগ্গো • 14. Buddhavaggo
