| Library / Tipiṭaka / ತಿಪಿಟಕ • Tipiṭaka / ಧಮ್ಮಪದಪಾಳಿ • Dhammapadapāḷi |
೧೪. ಬುದ್ಧವಗ್ಗೋ
14. Buddhavaggo
೧೭೯.
179.
ಯಸ್ಸ ಜಿತಂ ನಾವಜೀಯತಿ, ಜಿತಂ ಯಸ್ಸ 1 ನೋ ಯಾತಿ ಕೋಚಿ ಲೋಕೇ।
Yassa jitaṃ nāvajīyati, jitaṃ yassa 2 no yāti koci loke;
ತಂ ಬುದ್ಧಮನನ್ತಗೋಚರಂ, ಅಪದಂ ಕೇನ ಪದೇನ ನೇಸ್ಸಥ॥
Taṃ buddhamanantagocaraṃ, apadaṃ kena padena nessatha.
೧೮೦.
180.
ಯಸ್ಸ ಜಾಲಿನೀ ವಿಸತ್ತಿಕಾ, ತಣ್ಹಾ ನತ್ಥಿ ಕುಹಿಞ್ಚಿ ನೇತವೇ।
Yassa jālinī visattikā, taṇhā natthi kuhiñci netave;
ತಂ ಬುದ್ಧಮನನ್ತಗೋಚರಂ, ಅಪದಂ ಕೇನ ಪದೇನ ನೇಸ್ಸಥ॥
Taṃ buddhamanantagocaraṃ, apadaṃ kena padena nessatha.
೧೮೧.
181.
ಯೇ ಝಾನಪಸುತಾ ಧೀರಾ, ನೇಕ್ಖಮ್ಮೂಪಸಮೇ ರತಾ।
Ye jhānapasutā dhīrā, nekkhammūpasame ratā;
ದೇವಾಪಿ ತೇಸಂ ಪಿಹಯನ್ತಿ, ಸಮ್ಬುದ್ಧಾನಂ ಸತೀಮತಂ॥
Devāpi tesaṃ pihayanti, sambuddhānaṃ satīmataṃ.
೧೮೨.
182.
ಕಿಚ್ಛೋ ಮನುಸ್ಸಪಟಿಲಾಭೋ, ಕಿಚ್ಛಂ ಮಚ್ಚಾನ ಜೀವಿತಂ।
Kiccho manussapaṭilābho, kicchaṃ maccāna jīvitaṃ;
ಕಿಚ್ಛಂ ಸದ್ಧಮ್ಮಸ್ಸವನಂ, ಕಿಚ್ಛೋ ಬುದ್ಧಾನಮುಪ್ಪಾದೋ॥
Kicchaṃ saddhammassavanaṃ, kiccho buddhānamuppādo.
೧೮೩.
183.
೧೮೪.
184.
ಖನ್ತೀ ಪರಮಂ ತಪೋ ತಿತಿಕ್ಖಾ, ನಿಬ್ಬಾನಂ 7 ಪರಮಂ ವದನ್ತಿ ಬುದ್ಧಾ।
Khantī paramaṃ tapo titikkhā, nibbānaṃ 8 paramaṃ vadanti buddhā;
ನ ಹಿ ಪಬ್ಬಜಿತೋ ಪರೂಪಘಾತೀ, ನ 9 ಸಮಣೋ ಹೋತಿ ಪರಂ ವಿಹೇಠಯನ್ತೋ॥
Na hi pabbajito parūpaghātī, na 10 samaṇo hoti paraṃ viheṭhayanto.
೧೮೫.
185.
ಮತ್ತಞ್ಞುತಾ ಚ ಭತ್ತಸ್ಮಿಂ, ಪನ್ತಞ್ಚ ಸಯನಾಸನಂ।
Mattaññutā ca bhattasmiṃ, pantañca sayanāsanaṃ;
ಅಧಿಚಿತ್ತೇ ಚ ಆಯೋಗೋ, ಏತಂ ಬುದ್ಧಾನ ಸಾಸನಂ॥
Adhicitte ca āyogo, etaṃ buddhāna sāsanaṃ.
೧೮೬.
186.
ನ ಕಹಾಪಣವಸ್ಸೇನ, ತಿತ್ತಿ ಕಾಮೇಸು ವಿಜ್ಜತಿ।
Na kahāpaṇavassena, titti kāmesu vijjati;
ಅಪ್ಪಸ್ಸಾದಾ ದುಖಾ ಕಾಮಾ, ಇತಿ ವಿಞ್ಞಾಯ ಪಣ್ಡಿತೋ॥
Appassādā dukhā kāmā, iti viññāya paṇḍito.
೧೮೭.
187.
ಅಪಿ ದಿಬ್ಬೇಸು ಕಾಮೇಸು, ರತಿಂ ಸೋ ನಾಧಿಗಚ್ಛತಿ।
Api dibbesu kāmesu, ratiṃ so nādhigacchati;
ತಣ್ಹಕ್ಖಯರತೋ ಹೋತಿ, ಸಮ್ಮಾಸಮ್ಬುದ್ಧಸಾವಕೋ॥
Taṇhakkhayarato hoti, sammāsambuddhasāvako.
೧೮೮.
188.
ಬಹುಂ ವೇ ಸರಣಂ ಯನ್ತಿ, ಪಬ್ಬತಾನಿ ವನಾನಿ ಚ।
Bahuṃ ve saraṇaṃ yanti, pabbatāni vanāni ca;
ಆರಾಮರುಕ್ಖಚೇತ್ಯಾನಿ, ಮನುಸ್ಸಾ ಭಯತಜ್ಜಿತಾ॥
Ārāmarukkhacetyāni, manussā bhayatajjitā.
೧೮೯.
189.
ನೇತಂ ಖೋ ಸರಣಂ ಖೇಮಂ, ನೇತಂ ಸರಣಮುತ್ತಮಂ।
Netaṃ kho saraṇaṃ khemaṃ, netaṃ saraṇamuttamaṃ;
ನೇತಂ ಸರಣಮಾಗಮ್ಮ, ಸಬ್ಬದುಕ್ಖಾ ಪಮುಚ್ಚತಿ॥
Netaṃ saraṇamāgamma, sabbadukkhā pamuccati.
೧೯೦.
190.
ಯೋ ಚ ಬುದ್ಧಞ್ಚ ಧಮ್ಮಞ್ಚ, ಸಙ್ಘಞ್ಚ ಸರಣಂ ಗತೋ।
Yo ca buddhañca dhammañca, saṅghañca saraṇaṃ gato;
ಚತ್ತಾರಿ ಅರಿಯಸಚ್ಚಾನಿ, ಸಮ್ಮಪ್ಪಞ್ಞಾಯ ಪಸ್ಸತಿ॥
Cattāri ariyasaccāni, sammappaññāya passati.
೧೯೧.
191.
ದುಕ್ಖಂ ದುಕ್ಖಸಮುಪ್ಪಾದಂ, ದುಕ್ಖಸ್ಸ ಚ ಅತಿಕ್ಕಮಂ।
Dukkhaṃ dukkhasamuppādaṃ, dukkhassa ca atikkamaṃ;
ಅರಿಯಂ ಚಟ್ಠಙ್ಗಿಕಂ ಮಗ್ಗಂ, ದುಕ್ಖೂಪಸಮಗಾಮಿನಂ॥
Ariyaṃ caṭṭhaṅgikaṃ maggaṃ, dukkhūpasamagāminaṃ.
೧೯೨.
192.
ಏತಂ ಖೋ ಸರಣಂ ಖೇಮಂ, ಏತಂ ಸರಣಮುತ್ತಮಂ।
Etaṃ kho saraṇaṃ khemaṃ, etaṃ saraṇamuttamaṃ;
ಏತಂ ಸರಣಮಾಗಮ್ಮ, ಸಬ್ಬದುಕ್ಖಾ ಪಮುಚ್ಚತಿ॥
Etaṃ saraṇamāgamma, sabbadukkhā pamuccati.
೧೯೩.
193.
ದುಲ್ಲಭೋ ಪುರಿಸಾಜಞ್ಞೋ, ನ ಸೋ ಸಬ್ಬತ್ಥ ಜಾಯತಿ।
Dullabho purisājañño, na so sabbattha jāyati;
ಯತ್ಥ ಸೋ ಜಾಯತಿ ಧೀರೋ, ತಂ ಕುಲಂ ಸುಖಮೇಧತಿ॥
Yattha so jāyati dhīro, taṃ kulaṃ sukhamedhati.
೧೯೪.
194.
ಸುಖೋ ಬುದ್ಧಾನಮುಪ್ಪಾದೋ, ಸುಖಾ ಸದ್ಧಮ್ಮದೇಸನಾ।
Sukho buddhānamuppādo, sukhā saddhammadesanā;
ಸುಖಾ ಸಙ್ಘಸ್ಸ ಸಾಮಗ್ಗೀ, ಸಮಗ್ಗಾನಂ ತಪೋ ಸುಖೋ॥
Sukhā saṅghassa sāmaggī, samaggānaṃ tapo sukho.
೧೯೫.
195.
ಪೂಜಾರಹೇ ಪೂಜಯತೋ, ಬುದ್ಧೇ ಯದಿ ವ ಸಾವಕೇ।
Pūjārahe pūjayato, buddhe yadi va sāvake;
ಪಪಞ್ಚಸಮತಿಕ್ಕನ್ತೇ, ತಿಣ್ಣಸೋಕಪರಿದ್ದವೇ॥
Papañcasamatikkante, tiṇṇasokapariddave.
೧೯೬.
196.
ತೇ ತಾದಿಸೇ ಪೂಜಯತೋ, ನಿಬ್ಬುತೇ ಅಕುತೋಭಯೇ।
Te tādise pūjayato, nibbute akutobhaye;
ನ ಸಕ್ಕಾ ಪುಞ್ಞಂ ಸಙ್ಖಾತುಂ, ಇಮೇತ್ತಮಪಿ ಕೇನಚಿ॥
Na sakkā puññaṃ saṅkhātuṃ, imettamapi kenaci.
ಬುದ್ಧವಗ್ಗೋ ಚುದ್ದಸಮೋ ನಿಟ್ಠಿತೋ।
Buddhavaggo cuddasamo niṭṭhito.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಧಮ್ಮಪದ-ಅಟ್ಠಕಥಾ • Dhammapada-aṭṭhakathā / ೧೪. ಬುದ್ಧವಗ್ಗೋ • 14. Buddhavaggo
