| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
১০. বুদ্ধুপট্ঠাকত্থেরঅপদানৰণ্ণনা
10. Buddhupaṭṭhākattheraapadānavaṇṇanā
ৰিপস্সিস্স ভগৰতোতিআদিকং আযস্মতো বুদ্ধুপট্ঠাকত্থেরস্স অপদানং। অযম্পি পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো ৰিপস্সিস্স ভগৰতো কালে সঙ্খধমককুলে নিব্বত্তো ৰুদ্ধিমন্ৰায অত্তনো সিপ্পে সঙ্খধমনে ছেকো অহোসি, নিচ্চকালং ভগৰতো সঙ্খং ধমেত্ৰা সঙ্খসদ্দেনেৰ পূজেসি। সো তেন পুঞ্ঞেন দেৰমনুস্সেসু সংসরন্তো সব্বত্থ পাকটো মহাঘোসো মহানাদী মধুরস্সরো অহোসি, ইমস্মিং বুদ্ধুপ্পাদে একস্মিং পাকটকুলে নিব্বত্তো ৰুদ্ধিপ্পত্তো মধুরস্সরোতি পাকটো, সত্থরি পসীদিত্ৰা পব্বজিতো নচিরস্সেৰ অরহা অহোসি, অপরভাগে মধুরস্সরত্থেরোতি পাকটো।
Vipassissabhagavatotiādikaṃ āyasmato buddhupaṭṭhākattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle saṅkhadhamakakule nibbatto vuddhimanvāya attano sippe saṅkhadhamane cheko ahosi, niccakālaṃ bhagavato saṅkhaṃ dhametvā saṅkhasaddeneva pūjesi. So tena puññena devamanussesu saṃsaranto sabbattha pākaṭo mahāghoso mahānādī madhurassaro ahosi, imasmiṃ buddhuppāde ekasmiṃ pākaṭakule nibbatto vuddhippatto madhurassaroti pākaṭo, satthari pasīditvā pabbajito nacirasseva arahā ahosi, aparabhāge madhurassarattheroti pākaṭo.
৫১. সো একদিৰসং অত্তনো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো ৰিপস্সিস্স ভগৰতোতিআদিমাহ। তং হেট্ঠা ৰুত্তমেৰ। অহোসিং সঙ্খধমকোতি সং সুট্ঠু খনন্তো গচ্ছতীতি সঙ্খো, সমুদ্দজলপরিযন্তে চরমানো গচ্ছতি ৰিচরতীতি অত্থো। তং সঙ্খং ধমতি ঘোসং করোতীতি সঙ্খধমকো, সোহং সঙ্খধমকোৰ অহোসিন্তি অত্থো। সেসং সব্বত্থ উত্তানমেৰাতি।
51. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento vipassissa bhagavatotiādimāha. Taṃ heṭṭhā vuttameva. Ahosiṃ saṅkhadhamakoti saṃ suṭṭhu khananto gacchatīti saṅkho, samuddajalapariyante caramāno gacchati vicaratīti attho. Taṃ saṅkhaṃ dhamati ghosaṃ karotīti saṅkhadhamako, sohaṃ saṅkhadhamakova ahosinti attho. Sesaṃ sabbattha uttānamevāti.
বুদ্ধুপট্ঠাকত্থেরঅপদানৰণ্ণনা সমত্তা।
Buddhupaṭṭhākattheraapadānavaṇṇanā samattā.
দসমৰগ্গৰণ্ণনা সমত্তা।
Dasamavaggavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৯. ৰেয্যাৰচ্চকত্থেরঅপদানং • 9. Veyyāvaccakattheraapadānaṃ
