| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၁၀. ဗုဒ္ဓုပဋ္ဌာကတ္ထေရအပဒာနဝဏ္ဏနာ
10. Buddhupaṭṭhākattheraapadānavaṇṇanā
ဝိပသ္သိသ္သ ဘဂဝတောတိအာဒိကံ အာယသ္မတော ဗုဒ္ဓုပဋ္ဌာကတ္ထေရသ္သ အပဒာနံ။ အယမ္ပိ ပုရိမဗုဒ္ဓေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော ဝိပသ္သိသ္သ ဘဂဝတော ကာလေ သင္ခဓမကကုလေ နိဗ္ဗတ္တော ဝုဒ္ဓိမန္ဝာယ အတ္တနော သိပ္ပေ သင္ခဓမနေ ဆေကော အဟောသိ, နိစ္စကာလံ ဘဂဝတော သင္ခံ ဓမေတ္ဝာ သင္ခသဒ္ဒေနေဝ ပူဇေသိ။ သော တေန ပုညေန ဒေဝမနုသ္သေသု သံသရန္တော သဗ္ဗတ္ထ ပာကဋော မဟာဃောသော မဟာနာဒီ မဓုရသ္သရော အဟောသိ, ဣမသ္မိံ ဗုဒ္ဓုပ္ပာဒေ ဧကသ္မိံ ပာကဋကုလေ နိဗ္ဗတ္တော ဝုဒ္ဓိပ္ပတ္တော မဓုရသ္သရောတိ ပာကဋော, သတ္ထရိ ပသီဒိတ္ဝာ ပဗ္ဗဇိတော နစိရသ္သေဝ အရဟာ အဟောသိ, အပရဘာဂေ မဓုရသ္သရတ္ထေရောတိ ပာကဋော။
Vipassissabhagavatotiādikaṃ āyasmato buddhupaṭṭhākattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle saṅkhadhamakakule nibbatto vuddhimanvāya attano sippe saṅkhadhamane cheko ahosi, niccakālaṃ bhagavato saṅkhaṃ dhametvā saṅkhasaddeneva pūjesi. So tena puññena devamanussesu saṃsaranto sabbattha pākaṭo mahāghoso mahānādī madhurassaro ahosi, imasmiṃ buddhuppāde ekasmiṃ pākaṭakule nibbatto vuddhippatto madhurassaroti pākaṭo, satthari pasīditvā pabbajito nacirasseva arahā ahosi, aparabhāge madhurassarattheroti pākaṭo.
၅၁. သော ဧကဒိဝသံ အတ္တနော ပုဗ္ဗကမ္မံ သရိတ္ဝာ သောမနသ္သဇာတော ပုဗ္ဗစရိတာပဒာနံ ပကာသေန္တော ဝိပသ္သိသ္သ ဘဂဝတောတိအာဒိမာဟ။ တံ ဟေဋ္ဌာ ဝုတ္တမေဝ။ အဟောသိံ သင္ခဓမကောတိ သံ သုဋ္ဌု ခနန္တော ဂစ္ဆတီတိ သင္ခော, သမုဒ္ဒဇလပရိယန္တေ စရမာနော ဂစ္ဆတိ ဝိစရတီတိ အတ္ထော။ တံ သင္ခံ ဓမတိ ဃောသံ ကရောတီတိ သင္ခဓမကော, သောဟံ သင္ခဓမကောဝ အဟောသိန္တိ အတ္ထော။ သေသံ သဗ္ဗတ္ထ ဥတ္တာနမေဝာတိ။
51. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento vipassissa bhagavatotiādimāha. Taṃ heṭṭhā vuttameva. Ahosiṃ saṅkhadhamakoti saṃ suṭṭhu khananto gacchatīti saṅkho, samuddajalapariyante caramāno gacchati vicaratīti attho. Taṃ saṅkhaṃ dhamati ghosaṃ karotīti saṅkhadhamako, sohaṃ saṅkhadhamakova ahosinti attho. Sesaṃ sabbattha uttānamevāti.
ဗုဒ္ဓုပဋ္ဌာကတ္ထေရအပဒာနဝဏ္ဏနာ သမတ္တာ။
Buddhupaṭṭhākattheraapadānavaṇṇanā samattā.
ဒသမဝဂ္ဂဝဏ္ဏနာ သမတ္တာ။
Dasamavaggavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၉. ဝေယ္ယာဝစ္စကတ္ထေရအပဒာနံ • 9. Veyyāvaccakattheraapadānaṃ
