| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
10. බුද්‌ධුපට්‌ඨාකත්‌ථෙරඅපදානවණ්‌ණනා
10. Buddhupaṭṭhākattheraapadānavaṇṇanā
විපස්‌සිස්‌ස භගවතොතිආදිකං ආයස්‌මතො බුද්‌ධුපට්‌ඨාකත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ සඞ්‌ඛධමකකුලෙ නිබ්‌බත්‌තො වුද්‌ධිමන්‌වාය අත්‌තනො සිප්‌පෙ සඞ්‌ඛධමනෙ ඡෙකො අහොසි, නිච්‌චකාලං භගවතො සඞ්‌ඛං ධමෙත්‌වා සඞ්‌ඛසද්‌දෙනෙව පූජෙසි. සො තෙන පුඤ්‌ඤෙන දෙවමනුස්‌සෙසු සංසරන්‌තො සබ්‌බත්‌ථ පාකටො මහාඝොසො මහානාදී මධුරස්‌සරො අහොසි, ඉමස්‌මිං බුද්‌ධුප්‌පාදෙ එකස්‌මිං පාකටකුලෙ නිබ්‌බත්‌තො වුද්‌ධිප්‌පත්‌තො මධුරස්‌සරොති පාකටො, සත්‌ථරි පසීදිත්‌වා පබ්‌බජිතො නචිරස්‌සෙව අරහා අහොසි, අපරභාගෙ මධුරස්‌සරත්‌ථෙරොති පාකටො.
Vipassissabhagavatotiādikaṃ āyasmato buddhupaṭṭhākattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle saṅkhadhamakakule nibbatto vuddhimanvāya attano sippe saṅkhadhamane cheko ahosi, niccakālaṃ bhagavato saṅkhaṃ dhametvā saṅkhasaddeneva pūjesi. So tena puññena devamanussesu saṃsaranto sabbattha pākaṭo mahāghoso mahānādī madhurassaro ahosi, imasmiṃ buddhuppāde ekasmiṃ pākaṭakule nibbatto vuddhippatto madhurassaroti pākaṭo, satthari pasīditvā pabbajito nacirasseva arahā ahosi, aparabhāge madhurassarattheroti pākaṭo.
51. සො එකදිවසං අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො විපස්‌සිස්‌ස භගවතොතිආදිමාහ. තං හෙට්‌ඨා වුත්‌තමෙව. අහොසිං සඞ්‌ඛධමකොති සං සුට්‌ඨු ඛනන්‌තො ගච්‌ඡතීති සඞ්‌ඛො, සමුද්‌දජලපරියන්‌තෙ චරමානො ගච්‌ඡති විචරතීති අත්‌ථො. තං සඞ්‌ඛං ධමති ඝොසං කරොතීති සඞ්‌ඛධමකො, සොහං සඞ්‌ඛධමකොව අහොසින්‌ති අත්‌ථො. සෙසං සබ්‌බත්‌ථ උත්‌තානමෙවාති.
51. So ekadivasaṃ attano pubbakammaṃ saritvā somanassajāto pubbacaritāpadānaṃ pakāsento vipassissa bhagavatotiādimāha. Taṃ heṭṭhā vuttameva. Ahosiṃ saṅkhadhamakoti saṃ suṭṭhu khananto gacchatīti saṅkho, samuddajalapariyante caramāno gacchati vicaratīti attho. Taṃ saṅkhaṃ dhamati ghosaṃ karotīti saṅkhadhamako, sohaṃ saṅkhadhamakova ahosinti attho. Sesaṃ sabbattha uttānamevāti.
බුද්‌ධුපට්‌ඨාකත්‌ථෙරඅපදානවණ්‌ණනා සමත්‌තා.
Buddhupaṭṭhākattheraapadānavaṇṇanā samattā.
දසමවග්‌ගවණ්‌ණනා සමත්‌තා.
Dasamavaggavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 9. වෙය්‍යාවච්‌චකත්‌ථෙරඅපදානං • 9. Veyyāvaccakattheraapadānaṃ
