| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༨. བྱཱཔནྣསུཏྟཾ
8. Byāpannasuttaṃ
༡༡༡. ཨེཀམནྟཾ ནིསིནྣཾ ཁོ ཨནཱཐཔིཎྜིཀཾ གཧཔཏིཾ བྷགཝཱ ཨེཏདཝོཙ – ‘‘ཙིཏྟེ, གཧཔཏི, བྱཱཔནྣེ ཀཱཡཀམྨམྤི བྱཱཔནྣཾ ཧོཏི, ཝཙཱིཀམྨམྤི བྱཱཔནྣཾ ཧོཏི, མནོཀམྨམྤི བྱཱཔནྣཾ ཧོཏི། ཏསྶ བྱཱཔནྣཀཱཡཀམྨནྟསྶ བྱཱཔནྣཝཙཱིཀམྨནྟསྶ བྱཱཔནྣམནོཀམྨནྟསྶ ན བྷདྡཀཾ མརཎཾ ཧོཏི, ན བྷདྡིཀཱ ཀཱལངྐིརིཡཱ། སེཡྻཐཱཔི, གཧཔཏི, ཀཱུཊཱགཱརེ དུཙྪནྣེ ཀཱུཊམྤི བྱཱཔནྣཾ ཧོཏི, གོཔཱནསིཡོཔི བྱཱཔནྣཱ ཧོནྟི, བྷིཏྟིཔི བྱཱཔནྣཱ ཧོཏི; ཨེཝམེཝཾ ཁོ, གཧཔཏི, ཙིཏྟེ བྱཱཔནྣེ ཀཱཡཀམྨམྤི བྱཱཔནྣཾ ཧོཏི, ཝཙཱིཀམྨམྤི བྱཱཔནྣཾ ཧོཏི, མནོཀམྨམྤི བྱཱཔནྣཾ ཧོཏི། ཏསྶ བྱཱཔནྣཀཱཡཀམྨནྟསྶ བྱཱཔནྣཝཙཱིཀམྨནྟསྶ བྱཱཔནྣམནོཀམྨནྟསྶ ན བྷདྡཀཾ མརཎཾ ཧོཏི, ན བྷདྡིཀཱ ཀཱལངྐིརིཡཱ།
111. Ekamantaṃ nisinnaṃ kho anāthapiṇḍikaṃ gahapatiṃ bhagavā etadavoca – ‘‘citte, gahapati, byāpanne kāyakammampi byāpannaṃ hoti, vacīkammampi byāpannaṃ hoti, manokammampi byāpannaṃ hoti. Tassa byāpannakāyakammantassa byāpannavacīkammantassa byāpannamanokammantassa na bhaddakaṃ maraṇaṃ hoti, na bhaddikā kālaṅkiriyā. Seyyathāpi, gahapati, kūṭāgāre ducchanne kūṭampi byāpannaṃ hoti, gopānasiyopi byāpannā honti, bhittipi byāpannā hoti; evamevaṃ kho, gahapati, citte byāpanne kāyakammampi byāpannaṃ hoti, vacīkammampi byāpannaṃ hoti, manokammampi byāpannaṃ hoti. Tassa byāpannakāyakammantassa byāpannavacīkammantassa byāpannamanokammantassa na bhaddakaṃ maraṇaṃ hoti, na bhaddikā kālaṅkiriyā.
‘‘ཙིཏྟེ , གཧཔཏི, ཨབྱཱཔནྣེ ཀཱཡཀམྨམྤི ཨབྱཱཔནྣཾ ཧོཏི, ཝཙཱིཀམྨམྤི ཨབྱཱཔནྣཾ ཧོཏི, མནོཀམྨམྤི ཨབྱཱཔནྣཾ ཧོཏི། ཏསྶ ཨབྱཱཔནྣཀཱཡཀམྨནྟསྶ ཨབྱཱཔནྣཝཙཱིཀམྨནྟསྶ ཨབྱཱཔནྣམནོཀམྨནྟསྶ བྷདྡཀཾ མརཎཾ ཧོཏི, བྷདྡིཀཱ ཀཱལངྐིརིཡཱ། སེཡྻཐཱཔི, གཧཔཏི, ཀཱུཊཱགཱརེ སུཙྪནྣེ ཀཱུཊམྤི ཨབྱཱཔནྣཾ ཧོཏི, གོཔཱནསིཡོཔི ཨབྱཱཔནྣཱ ཧོནྟི, བྷིཏྟིཔི ཨབྱཱཔནྣཱ ཧོཏི; ཨེཝམེཝཾ ཁོ, གཧཔཏི, ཙིཏྟེ ཨབྱཱཔནྣེ ཀཱཡཀམྨམྤི ཨབྱཱཔནྣཾ ཧོཏི, ཝཙཱིཀམྨམྤི ཨབྱཱཔནྣཾ ཧོཏི, མནོཀམྨམྤི ཨབྱཱཔནྣཾ ཧོཏི། ཏསྶ ཨབྱཱཔནྣཀཱཡཀམྨནྟསྶ…པེ॰… ཨབྱཱཔནྣམནོཀམྨནྟསྶ བྷདྡཀཾ མརཎཾ ཧོཏི, བྷདྡིཀཱ ཀཱལངྐིརིཡཱ’’ཏི། ཨཊྛམཾ།
‘‘Citte , gahapati, abyāpanne kāyakammampi abyāpannaṃ hoti, vacīkammampi abyāpannaṃ hoti, manokammampi abyāpannaṃ hoti. Tassa abyāpannakāyakammantassa abyāpannavacīkammantassa abyāpannamanokammantassa bhaddakaṃ maraṇaṃ hoti, bhaddikā kālaṅkiriyā. Seyyathāpi, gahapati, kūṭāgāre succhanne kūṭampi abyāpannaṃ hoti, gopānasiyopi abyāpannā honti, bhittipi abyāpannā hoti; evamevaṃ kho, gahapati, citte abyāpanne kāyakammampi abyāpannaṃ hoti, vacīkammampi abyāpannaṃ hoti, manokammampi abyāpannaṃ hoti. Tassa abyāpannakāyakammantassa…pe… abyāpannamanokammantassa bhaddakaṃ maraṇaṃ hoti, bhaddikā kālaṅkiriyā’’ti. Aṭṭhamaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༨. བྱཱཔནྣསུཏྟཝཎྞནཱ • 8. Byāpannasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༤-༩. སམཎབྲཱཧྨཎསུཏྟཱདིཝཎྞནཱ • 4-9. Samaṇabrāhmaṇasuttādivaṇṇanā
