| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
10. බ්‍යසනසුත්‌තං
10. Byasanasuttaṃ
130. ‘‘පඤ්‌චිමානි , භික්‌ඛවෙ, බ්‍යසනානි. කතමානි පඤ්‌ච? ඤාතිබ්‍යසනං, භොගබ්‍යසනං, රොගබ්‍යසනං, සීලබ්‍යසනං, දිට්‌ඨිබ්‍යසනං. න, භික්‌ඛවෙ, සත්‌තා ඤාතිබ්‍යසනහෙතු වා භොගබ්‍යසනහෙතු වා රොගබ්‍යසනහෙතු වා කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජන්‌ති. සීලබ්‍යසනහෙතු වා, භික්‌ඛවෙ, සත්‌තා දිට්‌ඨිබ්‍යසනහෙතු වා කායස්‌ස භෙදා පරං මරණා අපායං දුග්‌ගතිං විනිපාතං නිරයං උපපජ්‌ජන්‌ති. ඉමානි ඛො, භික්‌ඛවෙ, පඤ්‌ච බ්‍යසනානි.
130. ‘‘Pañcimāni , bhikkhave, byasanāni. Katamāni pañca? Ñātibyasanaṃ, bhogabyasanaṃ, rogabyasanaṃ, sīlabyasanaṃ, diṭṭhibyasanaṃ. Na, bhikkhave, sattā ñātibyasanahetu vā bhogabyasanahetu vā rogabyasanahetu vā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti. Sīlabyasanahetu vā, bhikkhave, sattā diṭṭhibyasanahetu vā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapajjanti. Imāni kho, bhikkhave, pañca byasanāni.
‘‘පඤ්‌චිමා, භික්‌ඛවෙ, සම්‌පදා. කතමා පඤ්‌ච? ඤාතිසම්‌පදා, භොගසම්‌පදා, ආරොග්‍යසම්‌පදා, සීලසම්‌පදා, දිට්‌ඨිසම්‌පදා. න, භික්‌ඛවෙ, සත්‌තා ඤාතිසම්‌පදාහෙතු වා භොගසම්‌පදාහෙතු වා ආරොග්‍යසම්‌පදාහෙතු වා කායස්‌ස භෙදා පරං මරණා සුගතිං සග්‌ගං ලොකං උපපජ්‌ජන්‌ති. සීලසම්‌පදාහෙතු වා, භික්‌ඛවෙ, සත්‌තා දිට්‌ඨිසම්‌පදාහෙතු වා කායස්‌ස භෙදා පරං මරණා සුගතිං සග්‌ගං ලොකං උපපජ්‌ජන්‌ති. ඉමා ඛො, භික්‌ඛවෙ, පඤ්‌ච සම්‌පදා’’ති. දසමං.
‘‘Pañcimā, bhikkhave, sampadā. Katamā pañca? Ñātisampadā, bhogasampadā, ārogyasampadā, sīlasampadā, diṭṭhisampadā. Na, bhikkhave, sattā ñātisampadāhetu vā bhogasampadāhetu vā ārogyasampadāhetu vā kāyassa bhedā paraṃ maraṇā sugatiṃ saggaṃ lokaṃ upapajjanti. Sīlasampadāhetu vā, bhikkhave, sattā diṭṭhisampadāhetu vā kāyassa bhedā paraṃ maraṇā sugatiṃ saggaṃ lokaṃ upapajjanti. Imā kho, bhikkhave, pañca sampadā’’ti. Dasamaṃ.
ගිලානවග්‌ගො තතියො.
Gilānavaggo tatiyo.
තස්‌සුද්‌දානං –
Tassuddānaṃ –
ගිලානො සතිසූපට්‌ඨි, ද්‌වෙ උපට්‌ඨාකා දුවායුසා;
Gilāno satisūpaṭṭhi, dve upaṭṭhākā duvāyusā;
වපකාසසමණසුඛා, පරිකුප්‌පං බ්‍යසනෙන චාති.
Vapakāsasamaṇasukhā, parikuppaṃ byasanena cāti.
Related texts:
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / (13) 3. ගිලානවග්‌ගො • (13) 3. Gilānavaggo
